အဆီအနှစ်ဂိတ်ပေါက်နည်းစနစ်

ဝမ်ဝေ့က ဂိုဏ်းကို ပြန်ရောက်ပြီးနောက် ဘိုးဘေးများ သီးသန့်ကျင့်ကြံနေမှန်းသိသည့်အတွက် ချက်ချင်း မဆက်သွယ်ခဲ့ပေ။ သူ တွက်ချက်ထားမှုအရ ယွမ်ခေတ်ကာလ ၇၂,၀၀၀ ကုန်ဆုံးခဲ့သော်လည်း သူတို့အတွက် အထွတ်အထိပ်သို့ ပြန်ရောက်ဖို့ရာ အချိန်လုံလောက်ဦးမည် မဟုတ်မှန်း သိထားလေသည်။ ထို့ကြောင့် သူက တွေ့ဆုံဖို့ တောင်းဆိုလိုက်သည့်အခါ ချက်ချင်း တုံ့ပြန်လာကြသည့်အတွက် အံ့အားသင့်မိသွားသည်။

ဝမ်ဝေ့က အကြီးအကဲအဖွဲ့အစည်းတောင်ထိပ်ဆီ ရောက်ရှိသွားသည့်အခါ ယန်းအိုက်နှင့် အခြားသူများ၏ ပုံရိပ်ယောင်များက စောင့်ဆိုင်းနေသည်ကို တွေ့ရသည်။

"ဒီလောက်မြန်မြန်ကြီး ရောက်နေကြတာလား"

ဝမ်ဝေ့က မေးလိုက်သည်။

"မိုးမြေကြား ရုတ်တရက် ပြောင်းလဲသွားတာကို ခံစားမိလို့ ကျင့်ကြံရာကနေ ထွက်လာခဲ့တာ" ချီယွမ်က ပြန်ဖြေသည်။

"ဒီမှာ ဘယ်သူမှ မရှိဘူးဆိုတော့ မင်း ကြိုက်တဲ့နေရာ ဝင်ထိုင်လို့ရတယ်"

အခန်းအပြင်အဆင်သည် ရိုးရှင်းသော်လည်း အဆင့်အတန်း ခွဲခြားထားသည်ကို ရှင်းရှင်းလင်းလင်း ပြသနေသည်။ ရှေ့ဆုံး မြင့်မြတ်သော နေရာတွင် အခင်းလေးခု ချထားပြီး ကျန်သူများအတွက်မူ အောက်ဘက်တွင် အစုလိုက် အပုံလိုက် ချထားသည်။

သို့သော်လည်း ဝမ်ဝေ့က ထိုအစုလိုက်နေရာများ၏ အရှေ့ဆုံးတန်းတွင် ထိုင်ခုံ ၄၅ လုံးနှင့် ကျန်နေရာများတွင်မူ တစ်ရာကျော်စီရှိသည်ကို သတိထားမိလိုက်သည်။ ရှေ့ဆုံးတန်းသည် ထိပ်သီး စံပြများ၏ နေရာဖြစ်ကြောင်း ဂိုဏ်း၏ သတင်းအချက်အလက်များကို သတိရလိုက်သည်။

ငါမှတ်မိသလောက်ဆိုရင် အရှေ့ဆုံးတန်းမှာ ၅၇ နေရာရှိခဲ့တာ။ အကြွင်းမဲ့တားမြစ်ချက်ကြောင့် ထိခိုက်မှုက ငါထင်ထားသလောက် မများဘူးပဲ …

ဝမ်ဝေ့က တွေးမိသည်။ ထိပ်သီးစံပြ ၁၀ ဦးကျော် ဆုံးရှုံးရခြင်းသည် မည်သည့်ဂိုဏ်းအတွက်မဆို ကြီးမားသော ဆုံးရှုံးမှုဖြစ်သော်လည်း၊ ဖြစ်ရပ်၏ အတိုင်းအတာကို ထည့်သွင်းစဉ်းစားပါက ဤအရေအတွက်သည် လက်ခံနိုင်ဖွယ်ရှိ၏။ အခြားသော ဂိုဏ်းများကမူ ပိုမို ဆုံးရှုံးကြရသည်။

လူတိုင်းက အောက်ဘက်နေရာတွင် စက်ဝိုင်းပုံစံ ထိုင်ကြရာ ဝမ်ဝေ့က ယန်းအိုက်ဘေးတွင် ဝင်ထိုင်လိုက်သည်။

"မိုးမြေကြားက အပြောင်းအလဲဆိုတာ မင်းနဲ့ ဆက်စပ်နေတယ်လို့ ငါ ထင်တယ်"

ယန်းအိုက်က ဆိုသည်။

"ဟုတ်လည်း ဟုတ်တယ်၊ မဟုတ်လည်း မဟုတ်ဘူး"

ဝမ်ဝေ့က ဝန်ခံပြီးနောက် မဟာတာအို၏ ကြီးမားသည့် ထုတ်ဖော်မှုအကြောင်း ရှင်းပြလိုက်သည်။

"ထူးကဲသာလွန်မှုခေတ်ကာလက ရောက်လာနေပြီ" ချီယွမ်က ရေရွတ်သည်။ လာမည့် ကပ်ဘေးသည် အရာရာကို အရှိန်မြှင့်တင်ပေးရန်မျှသာ ဖြစ်၏။

"ငါတို့လို ခန္ဓာကိုယ်ကျင့်ကြံသူတွေအတွက်ကရော ဘယ်လိုလဲ" ဝမ်ချုံးက မေးသည်။

"ငါတို့ရဲ့ ဝိညာဉ်က ခန္ဓာကိုယ်နဲ့ ပေါင်းစပ်ထားပြီး တာအိုလည်း မရှိဘူး။ ခွန်အားတာအိုကို စကျင့်ကြံရတော့မှာလား"

"မင်းတို့မှာ ဝိညာဉ် မရှိရင်တောင် စိတ် ရှိတယ်လေ"

လီမင်က ပြောလိုက်သည်။

"မင်းတို့ရဲ့ စိတ်စွမ်းအင်ကို ဝိညာဉ်သာလွန်ခြင်းအတွက် အသုံးပြုနိုင်တယ်။ တာအိုအတွက်ကတော့ ခွန်အားမဟာတာအိုအရင်းအမြစ်ကို လေ့လာရလိမ့်မယ်"

"ခွန်အားတာအိုအစစ်အမှန်နယ်ပယ်က အသန့်စင်ဆုံး ခွန်အားတာအိုအနှစ်သာရ မဟုတ်ဘူးလား။ တာအိုသာလွန်ခြင်းအတွက် ခွန်အားရဲ့ သဘောတရားအယူအဆကို လုံလောက်တဲ့ အဆင့်အထိ နားလည်ဖို့ပဲ လိုတယ်" ယန်းအိုက်က ဝင်ရောက် ပြောဆိုသည်။

"လူတွေအားလုံးထဲမှာ မင်းက ခန္ဓာကိုယ်ကျင့်ကြံရေးမှာ နက်နဲတဲ့ ထိုးထွင်းဉာဏ်တွေ ရှိနေတာမျိုးက ကျုပ်တော့ ဟွင်သွမ်းစကြဝဠာထဲမှာ အရာအားလုံးကို တရားဝင် မြင်ဖူးသွားသလိုပဲ" ဝမ်ချုံးက အံ့အားသင့်မှုကို မဖုံးကွယ်ဘဲ ပြောလိုက်သည်။

"ပါးစပ်ပိတ်ထား … ငါက ခန္ဓာကိုယ်လေ့ကျင့်နေပြီဆိုတော့ ငါ့ခန္ဓာကိုယ်အစွမ်းနဲ့ နင့်ကို ဖိနှိပ်ပစ်နိုင်ဖို့ သိပ်မကြာတော့ဘူး" ယန်းအိုက်က ရွဲ့စောင်းစွာ ပြောလိုက်သည်။

"စမ်းကြည့်ပေါ့" ဝမ်ချုံးက ပြန်ပြောလိုက်သည်။ ခန္ဓာကိုယ် ကြံ့ခိုင်မှု ပြိုင်ဆိုင်ရာတွင် ထိုမိန်းမဆီ ရှုံးနိမ့်မည့်အစား အသေခံလိုက်မည်။

"ဒါဆို မင်း ဘယ်လို ထင်လဲ" ချီယွမ်က ဝမ်ဝေ့ကို မေးလိုက်သည်။

"ဘာကိုလဲ"

"သာလွန်ခြင်းအဆင့်မှာ စစ်မှန်တဲ့ ခန္ဓာကိုယ်ကျင့်ကြံသူတွေရဲ့ လမ်းကြောင်းကို ပြောတာ”

"ဒီအဆင့်ရဲ့ နာမည်ကိုက လူသားတွေရဲ့ စိတ်ကို ထောင်ချောက်ဆင်ထားတာ"

ဝမ်ဝေ့က လှောင်ပြောင်လိုက်သည်။

"ဒီ သုံးဆင့်ကို လိုက်နာဖို့ မလိုပါဘူး။ စစ်မှန်တဲ့ ခန္ဓာကိုယ်ကျင့်ကြံသူ တစ်ယောက်ဟာ သူတို့ ခန္ဓာကိုယ်ကို သုံးကြိမ်အသွင်ပြောင်းပြီးတဲ့နောက်မှာ တတိယမြောက် သာလွန်ခြင်းအဆင့် ဖြစ်လာနိုင်တယ်။ တကယ်တော့ ကျွန်တော်ရဲ့ ကောက်ချက်ချမှုအရ အဆီအနှစ်ခေတ်ကာလတုန်းက အဲဒီလို ဖြစ်ခဲ့မယ်လို့ ထင်တယ်”

"အဲ့ဒါဆို ပိုရိုးရှင်းတာပေါ့" ဝမ်ချုံးက ပြောသည်။

"ဒါပေမဲ့ အကြိမ်တိုင်း အသွင်ကူးပြောင်းမှုက အရင်ထက် စွမ်းအား သိသိသာသာ ပိုမို ကြီးမားရလိမ့်မယ်။ အကြိမ်တိုင်း ကူးပြောင်းဖို့ လိုအပ်တဲ့ အရင်းအမြစ်တွေအကြောင်းကို ပြောဖို့တောင် မလိုဘူး။ ထူးကဲသာလွန်မှုလမ်းစဉ်က အဆီအနှစ်ခေတ်ကာလမှာ ဒီလိုဖြစ်ခဲ့တယ်ဆိုရင် မဟာတာအိုက ဘာကြောင့် ကန့်သတ်ခဲ့တယ်ဆိုတာ ငါ နားလည်သွားပြီ”

"ဒါဆို ဂိတ်ပေါက်တွေနဲ့ ဘယ်လို သက်ဆိုင်မလဲ" လီမင်က မေးသည်။

"ပဉ္စမမြောက်နဲ့ ဆဋ္ဌမမြောက် ဂိတ်ပေါက်တွေကို ထပ်ဖွဲ့စည်းရမှာလား"

"ဘာဖြစ်လို့ မရရမှာလဲ" ဝမ်ဝေ့က ပြန်ဖြေပြီး ဆက်လက် ရှင်းပြသည်။

"စတုတ္ထမြောက် ဂိတ်ပေါက်ဟာ တက်လှမ်းခြင်းဂိတ်ပေါက်၊ ခွန်အားဂိတ်ပေါက်နဲ့ ကိုယ်ခန္ဓာဂိတ်ပေါက် သုံးခု ပေါင်းစပ်မှု လိုအပ်တယ်။ ပဉ္စမမြောက် ဂိတ်ပေါက်အတွက် စတုတ္ထဂိတ်ပေါက်ကနေ လက်အောက်ခံ ဂိတ်ပေါက်သုံးခု အသစ်ဖန်တီးပြီး ပေါင်းစပ်ရလိမ့်မယ်။ မဟုတ်ဘူး … ပဉ္စမမြောက်အတွက် လက်အောက်ခံဂိတ်ပေါက် ခြောက်ခု လိုအပ်မယ်။ ဆဋ္ဌမမြောက်အတွက် ကိုးခု လိုအပ်မယ်။

ပြီးရင် စတုတ္ထ၊ ပဉ္စမ၊ ဆဋ္ဌမမြောက် ဂိတ်ပေါက်တွေကို ပေါင်းစပ်ပြီး သတ္တမမြောက် ဂိတ်ပေါက်ကို ဖန်တီးရင်း အစစ်အမှန်ထူးကဲသာလွန်မှုကို ရရှိနိုင်မယ်”

ဤလမ်းကြောင်းကား ကြီးမားသော အလားအလာရှိသည်ဟု ဝမ်ဝေ့၏ မျက်လုံးများက ဖော်ပြနေသည်။ သို့သော်လည်း သူ၏ ခန္ဓာကိုယ်သည် ရုတ်တရက် တန့်သွားပြီး အကျိုးဆက်များကို နားလည်လိုက်သည်။

သတ္တမမြောက် ဂိတ်ပေါက်သည် အစစ်အမှန်ထူးကဲသာလွန်မှုအဆင့်နှင့် တန်းတူ ဖြစ်နေပြီဆိုလျှင် အဋ္ဌမမြောက်နှင့် နဝမမြောက် ဂိတ်ပေါက်များကရော မည်သို့ဖြစ်မည်နည်း။

ဒါက ဖြစ်နိုင်ပါ့မလား …

ဂဏန်းပညာကို နားလည်သူက ဝမ်ဝေ့ တစ်ဦးတည်း မဟုတ်ပေ။ ထို့ကြောင့် ကျန်သူများသည်လည်း မကြာမီ အလားတူ အတွေးများ ဝင်လာကြသည်။ ထို့နောက် သူတို့၏ ကျောရိုးများပေါ်တွင် အအေးဓာတ် တစ်မျိုး ဖြတ်ပြေးသွားသည်။ သူတို့အားလုံး ထူးကဲသာလွန်မှုကိုသာ အာရုံစိုက်နေကြသည့်အတွက် ၎င်းထက် ကျော်လွန်သော လမ်းကြောင်း ရှိ၊ မရှိကို တစ်ခါမျှ မစဉ်းစားမိခဲ့ကြပေ။ သို့သော် ယခုအခါတွင် သူတို့ စဉ်းစားရတော့မည်ဖြစ်ပြီး ထိုအကျိုးဆက်များက သူတို့ကို ထိတ်လန့်စေသည်။

"ငါတို့ နားမလည်သေးတဲ့ အရာတွေအကြောင်းကို စဉ်းစားနေစရာ မလိုပါဘူး" ချီယွမ်က ပြောလိုက်ရာ လူတိုင်းက ခေါင်းညိတ်လိုက်ကြသည်။ ထို့ကြောင့် ဝမ်ဝေ့မှလွဲ၍ ကျန်သူများသည် ထိုအတွေးကို ချက်ချင်းပင် စိတ်ထဲမှ ထုတ်လိုက်ကြပြီး ပိုမိုအင်အားကြီးမားလာသောအခါမှ သတိရစေရန်အတွက် မန္တန်တစ်ခု ရွတ်ဆိုထားလိုက်ကြသည်။

စိတ်ဝင်စားစရာပဲ …

ဟုန်မုန့်ဆိုတာ ကျင့်ကြံရေးရဲ့ အဆုံးသတ် မဟုတ်သေးတာလား … ဒါမှမဟုတ် စည်းမျဉ်းတွေက ကွဲပြားစွာ လည်ပတ်နေတာလား။

ဒါပေမဲ့ စည်းမျဉ်းတွေ ရှိနေသေးရင် ငါ အကြွင်းမဲ့လွတ်လပ်မှုကို ပိုင်ဆိုင်နိုင်ပါ့မလား …

ဝမ်ဝေ့က ထိုမေးခွန်းများ၏ အဖြေကို မသိသေးသလို မကြာမီလည်း သိနိုင်မည် မဟုတ်ပေ။ သို့သော်လည်း ဤခန့်မှန်းချက်ကြောင့် သူ၏ စိတ်ထဲတွင် မျိုးစေ့တစ်ခု စိုက်ဝင်သွားခဲ့လေပြီ။

"မင်းရဲ့ လမ်းစဉ်က ဖြစ်နိုင်ခြေရှိတယ်" ချီယွမ်က မှတ်ချက်ပေးသည်။

"ဒါပေမဲ့ အဲဒီ လက်အောက်ခံဂိတ်ပေါက်တွေကို ဖန်တီးဖို့ကတော့ မလွယ်ကူဘူး”

"ထူးကဲသာလွန်မှုဆိုတာ လွယ်ကူတဲ့ လမ်းစဉ်ဖြစ်ဖို့ ရည်ရွယ်ထားတာမှ မဟုတ်တာ"

ဝမ်ချုံးက သူ့စိတ်လှုပ်ရှားမှုကို မဖုံးကွယ်ဘဲ ပြောလိုက်သည်။ ယခု သူ့တွင် ရှေ့ဆက်ရမည့် လမ်းကြောင်းရှိလာပြီဖြစ်ရာ သူ၏ အချိန်၊ ကြိုးစားအားထုတ်မှုနှင့် အရည်အချင်းများကို ဤပန်းတိုင်အတွက် ပေးဆပ်နိုင်တော့မည် ဖြစ်၏။

"ကျွန်တော်ရဲ့ စတုတ္ထမြောက်ဂိတ်ပေါက် ကျမ်းကို ဘိုးဘေးဆီ ပေးနိုင်ပါတယ်။ ဒါပေမဲ့ အခုထိ ၁၃ ရာခိုင်နှုန်းပဲ ပြီးစီးသေးတယ် … ၃၀ ရာခိုင်နှုန်း ပြည့်ဖို့ အချိန်နည်းနည်း ယူရလိမ့်မယ်"

ဝမ်ဝေ့က အကြံပြုလိုက်သည်။ ဤလမ်းစဉ်သည် သူအတွက် အသုံးမဝင်ဟု ထင်ရသော်လည်း မဟုတ်ပေ။

သူ့လက်ရှိ အစီအစဉ်သည် ခန္ဓာကိုယ်သာလွန်ခြင်းထက် ဝိညာဉ်သာလွန်ခြင်းကို စောစောရယူရန် ဖြစ်သည်။ သို့သော် ဒုတိယအဆင့်သို့ ရောက်ပြီးနောက်တွင် သူသည် ဤလမ်းစဉ်ကို အသုံးပြုကာ ပဉ္စမမြောက်ဂိတ်ပေါက်ကို ဖန်တီးနိုင်မည်ဖြစ်ပြီး ဒုတိယအဆင့်ရှိ သူ့အင်အားကို သိသိသာသာ တိုးမြှင့်နိုင်မည် ဖြစ်သည်။ တကယ်တော့ ဤကျမ်းသည် ဝမ်ဝေ့အတွက် ချို့ယွင်းနေသော တာအိုသာလွန်ခြင်းနှင့်အတူ သာလွန်ခြင်းအဆင့်တွင် အင်အားကို ဆက်လက် လွှမ်းမိုးထားနိုင်မည့် သော့ချက် ဖြစ်ကောင်း ဖြစ်နိုင်သည်။

"အဲဆို ၁၃ ရာခိုင်နှုန်းနဲ့ပဲ စလိုက်မယ်"

ဝမ်ချုံးက အကြည့်များ အရောင်တောက်လျက် ပြောလိုက်သည်။ ကြည့်ရသည်မှာ သူ့ကံတရား တက်လာလေပြီ။

ဝမ်ဝေ့က ခေါင်းညိတ်ပြီး မိတ္တူတစ်ခု ပေးလိုက်သည်။

"ဘိုးဘေးရဲ့ တက်လှမ်းခြင်းဂိတ်ပေါက်ကို ပြန်ဖွဲ့စည်းဖို့ သတိပေးရဦးမယ်”

"အဲဒါ လုပ်ဆောင်နေပါပြီ" ဝမ်ချုံးက ထုတ်ဖော်ပြောသည်။ ဒုတိယမူလစစ်ပွဲအတွင်းတွင် သူသည် ရှေးဦးခန္ဓာစံအိမ်မှ လူများနှင့် တွေ့ဆုံခဲ့ပြီး ထိုဂိတ်ပေါက်၏ အရေးကြီးပုံကို သိရှိခဲ့ရသည်။

"အဲဒါ ကောင်းတယ်" ဝမ်ဝေ့က ခေါင်းညိတ်သည်။

"အဆီအနှစ်ဂိတ်ပေါက် နည်းစနစ်အတွက် တခြား အကြံဉာဏ်များ ရှိသေးလား"

ဝမ်ဝေ့က နှုတ်ခမ်းများ တုန်ယင်သွားလေသည်။ ထိုလူသည် စတုတ္ထမြောက်ဂိတ်ပေါက်ကိုပင် မဖန်တီးရသေးဘဲ နောက်ဆက်တွဲ ဂိတ်ပေါက်များ ဖန်တီးရန် နည်းစနစ်ကို နာမည်ပင် ပေးလိုက်လေပြီ။ မည်သိုပင်ဆိုစေကာမူ သူက ခဏ စဉ်းစားလိုက်၏။

"စတုတ္ထမြောက်ဂိ‌တ်ပေါက်ရဲ့ အဓိကအနှစ်သာရက ကိုယ်ခန္ဓာဂိတ်ပေါက်ပဲ။ တက်လှမ်းခြင်းဂိတ်ပေါက်က တိုးတက်မှုနဲ့ ဆင့်ကဲပြောင်းလဲမှုကို ကိုယ်စားပြုပြီး ခွန်အားဂိတ်ပေါက်က ခန္ဓာကိုယ်ကျင့်ကြံမှုရဲ့ အခြေခံပဲ။ သူတို့ ပေါင်းစပ်လိုက်တာက ကိုယ်ခန္ဓာကို ပိုမိုမြင့်မားတဲ့ တည်ရှိမှုအဆင့်တစ်ခုဆီ ဆင့်ကဲပြောင်းလဲဖို့ ဖြစ်နိုင်ခြေကို ပေးစွမ်းတယ် … ပြောရရင် ပိုမို မြင့်မားတဲ့ အလားအလာကို ပေးလာတယ်”

စတုတ္ထမြောက်ဂိတ်ပေါက်ကို ဆင့်ကဲပြောင်းလဲခြင်းဂိတ်ပေါက် သို့မဟုတ် အသွင်ပြောင်းလဲခြင်းဂိတ်ပေါက်ဟု ခေါ်ဆိုနိုင်သည်။ နောက်ဆက်တွဲ ဂိတ်ပေါက်များသည် ခန္ဓာကိုယ်ကို ဆင့်ကဲပြောင်းလဲစေပြီး ၎င်း၏ အလားအလာကို တိုးမြှင့်ပေးလေ၏။

"ကျွန်တော် စံအိမ်ကလူတွေနဲ့ တွေ့တုန်းက သူတို့တွေက ကျင့်ကြံရေး အမျိုးအစားတွေကို ယင်ချီ လမ်းစဉ်၊ လူ့ဘီလူးလမ်းစဉ် ဒါမှမဟုတ် လောကခန္ဓာလမ်းစဉ်လိုမျိုး ချဉ်းကပ်မှုအပေါ် မူတည်ပြီး စီစဉ်ထားတာ။ ကျွန်တော်တို့ ဂိုဏ်းမှာ မကြာခင် လူသား-မကောင်းဆိုးဝါးသွေးမျိုးဆက် ပိုင်ဆိုင်လာတော့မယ်။ ဆိုလိုတာက ကျွန်တော်တို့တွေက သွေးမျိုးဆက်လမ်းစဉ်ကို လျှောက်လှမ်းနေတာပဲ”

"လက်အောက်ခံဂိတ်ပေါက်တွေက ဒီလမ်းစဉ်တွေအပေါ် အခြေခံနိုင်တယ်။ ဥပမာအနေနဲ့ သွေးမျိုးဆက်ဂိတ်ပေါက် … ပြီးတော့ ဘိုးဘေးက ရှေးဟောင်းခန္ဓာသန့်စင်ကျမ်းကို ကျင့်ကြံထားတဲ့အတွက် ပစ္စည်း-ခန္ဓာ ပေါင်းစပ် ဂိတ်ပေါက်နဲ့ ကြယ်ခန္ဓာဂိတ်ပေါက်တွေကို ပေါင်းစည်းနိုင်တယ်”

ဝမ်ချုံး၏ အကြည့်များက ပိုတောက်ပလာသည်။ လူတစ်ယောက်သည် ဉာဏ်အလင်းပွင့်ပြီး နောက်တစ်နေ့တွင် သေဆုံးနိုင်သည်ဟု ဆိုကြလေ၏။ ဤစကားကို ယနေ့ထက် ပိုမို နားလည်ခဲ့ဖူးခြင်း မရှိပေ။

"ကျုပ် သွားလိုက်ပါဦးမယ်" ဝမ်ချုံးက ပြောပြီးနောက် သူ့ပုံရိပ်ယောင်ကို ချက်ချင်း ရုပ်သိမ်းလိုက်သည်။ ထိုနောက် ချက်ချင်းဆိုသလို ကျန်သူများသည် ဂိုဏ်း၏ ချီကံကောင်းမှုအားလုံးကို တစ်စုံတစ်ယောက်က ကျင့်ကြံရေးအတွက် အသုံးပြုနေသည်ကို ခံစားမိသော်လည်း မည်သူမှ မတားဆီးခဲ့ကြပေ။

"သူ့လမ်းသူ ရှာတွေ့သွားလို့ တော်သေးတယ်"

ချီယွမ်က ပြုံးပြသည်။

"ဘိုးဘေးတို့တွေရော ဘယ်လိုလဲ" ဝမ်ဝေ့က မေးလိုက်သည်။

"ဒီဝိညာဉ်သာလွန်ခြင်းကျမ်းက အချိန်တာအိုဘက် အရမ်းဘက်လိုက်နေတယ်။ ဒါကြောင့် ငါ့အတွက် ပိုကိုက်ညီအောင် ပြောင်းလဲပစ်ရမယ်"

ယန်းအိုက်က ပြောရာ ချီယွမ်က သဘောတူကြောင်း ခေါင်းညိတ်ပြသည်။

"ကျွန်တော်ရဲ့ ဟုန်အာလဲ ဒီလိုပဲ ပြောတယ်" ဝမ်ဝေ့က မျက်နှာပူခြင်းအလျှင်းမရှိ ဝင်ပြောလိုက်သည်။

"အဲဒါ အကောင်းဆုံး ချဉ်းကပ်မှုပဲ" ချီယွမ်က ဆိုသည်။

"ကျုပ်တော့ မသိဘူး” လူတိုင်းသည် လီမင်ကို လှည့်ကြည့်လိုက်ကြသည်။

"တစ်ခုခု မှားနေလို့လား"

"ဒီလမ်းကြောင်းက ငါ့အတွက် အသင့်တော်ဆုံး မဖြစ်နိုင်ဘူးလို့ ခံစားရတယ်"

လီမင်က ပြောသည်။ တိုက်ခိုက်ရေးသမားတစ်ဦးအနေဖြင့် သူ၏ ဝိညာဉ်နှင့် ခန္ဓာကိုယ်သည် အကောင်းဆုံးမဟုတ်သည့်တိုင် အကောင်းဆုံးအခြေအနေတွင် ရှိလေသည်။ သို့သော် စံသတ်မှတ်ထားသည့် လမ်းစဉ်သည် သူ့ကိုယ်ရည်ကိုယ်သွေး၊ ရည်မှန်းချက်များနှင့် မကိုက်ညီဟု သူ ခံစားနေရသည်။

"ကျွန်တော်ဆီမှာ အကြံတစ်ခုရှိတယ်” လူတိုင်းက ဝမ်ဝေ့ကို ကြည့်လိုက်ကြသည်။