နတ်လှေ...ဒါက နတ်လှေပဲ

လော့ရွှေမြစ်ကမ်းနား။

လေပြေတစ်ချက် တိုက်ခတ်လာသည်။ ၎င်းသည် မြစ်ရေ၏ စိုစွတ်မှုနှင့် အဝေးမှ ပန်းများ၏ရနံ့ကို သယ်ဆောင်လာ၏။ သဘာဝတရားက သူ၏ ချစ်ခင်ကြင်နာမှုကို ပြသနေသည့်အလား လေပြေက လူတို့၏မျက်နှာများကို ပွတ်သပ်သွားသည်။

မြစ်ရေသည် တိတ်ဆိတ်စွာ စီးဆင်းနေသည်။ ၎င်း၏မျက်နှာပြင်သည် နံနက်ခင်းအလင်းရောင်တွင် တောက်ပနေပြီး သေးငယ်သည့် စိန်ပွင့်ပေါင်းများစွာ ရှိနေသကဲ့သို့ တဖျပ်ဖျပ်လက်နေ၏။ မြစ်ရေသည် အလွန်ကြည်လင်နေသောကြောင့် ရံဖန်ရံခါ ကူးခတ်သွားသော ငါးများကိုပင် မြင်နိုင်ပြီး ၎င်းတို့က လှိုင်းသေးသေးလေးများကို ဖြစ်ပေါ်စေသည်။

မြစ်ကမ်းဘေးတွင် စိမ်းလန်းစိုပြေသော မြက်ခင်းပြင်ကြီးရှိသည်။ ၎င်းသည် ကြီးမားကျယ်ပြန့်သော စိမ်းလန်းသည့် ကတ္တီပါကော်ဇောကြီးတစ်ခုနှင့် တူနေ၏။ အရောင်အသွေးစုံလင်သော တောပန်းလေးများကလည်း အလှချင်းပြိုင်ကာ ပွင့်လန်းနေကြသည်။ ၎င်းတို့က မွှေးရနံ့သင်းသင်းကို ပျံ့လွင့်စေသည်။ အဝေးမှ စိမ်းလန်းသော တောင်တန်းများသည် အပြာရောင်ကောင်းကင်နှင့် တိမ်ဖြူများအောက်တွင် သာယာသော ရှုခင်းတစ်ခုကို ဖန်တီးနေသည်။

လေထုထဲတွင် မြေကြီး၏ စိုစွတ်သောရနံ့နှင့် ပန်းများ၏ ချိုမြသောအနံ့တို့ဖြင့် ပြည့်နှက်နေသည်။ ထိုရနံ့က စိတ်ကို လန်းဆန်းတက်ကြွစေသည်။ လိပ်ပြာအချို့ကလည်း ပန်းများကြားတွင် ကခုန်နေကြရာ ရှုခင်းကို ပို၍ အသက်ဝင်စေသည်။

သို့သော်လည်း ထိုကဲ့သို့ ငြိမ်းချမ်းသာယာသော ရှုခင်း မကြာမီမှာပင် ပျက်စီးသွား၏။ မြစ်ရေသည် တုန်ခါလာပြီး မြေကြီးသည်လည်း တုန်လှုပ်လာသည်။ ထိုတုန်ခါမှုကြောင့် မြစ်ကမ်းဘေးမှ လိပ်ပြာများ ကြောက်လန့်တကြား ပျံသန်းသွားကြသည်။

မကြာမီမှာပင် လူအုပ်များ မြစ်ကမ်းဘေးတွင် ပေါ်လာကြသည်။ လော့ရွှေမြစ်ကမ်းနားရှိ လေထုသည် ရုတ်တရက် ဖိစီးလာပြီး သေခြင်းတရား၏ လေးနက်မှုများဖြင့် ပြည့်နှက်သွား၏။

အချိန်ကုန်လွန်လာသည်နှင့်အမျှ ကျင့်စဉ်ကျင့်သူများ ပိုမိုများပြားစွာ မြစ်ကမ်းဘေးသို့ စုရုံးလာကြသည်။ မကြာမီမှာပင် လင်ဟူဂိုဏ်းမှ လူများပါ ရောက်လာသည်ကို အားလုံး မြင်တွေ့လိုက်ရသည်။ ၎င်းသည် အဓိကအင်အားစုသုံးစုထဲမှ တစ်ခုဖြစ်ပြီး ယခု လော့ရွှေမြစ်ကမ်းနားသို့ ရောက်ရှိလာခြင်းဖြစ်သည်။

လင်ဟူဂိုဏ်းကိုမြင်သောအခါ အမျိုးမျိုးသော အင်အားစုများမှ တပည့်များ ပို၍ သတိထားလာကြသည်။ ညှိနှိုင်းဆွေးနွေးပွဲအတွင်းတွင် အဓိကအင်အားစုသုံးစုက လွှမ်းမိုးရန် သေချာပေါက် ကြိုးစားလိမ့်မည်။

အဓိကအင်အားစုသုံးစုသည် ဆွမ်ဧကရာဇ်ထံမှ မြေနေရာများကို တတ်နိုင်သမျှ များများရအောင် ကြိုးစားကြမည်မှာ မလွဲဧကန်ပင်။ နောက်ပိုင်းတွင် ကျန်ရှိသော အင်အားစုများအတွက် အကြွင်းအကျန်များသာ ကျန်ရစ်ပေလိမ့်မည်။

ထို့ကြောင့် မြူခိုးဒေသမှ အခြားအင်အားစုများကလည်း အဓိကအင်အားစုသုံးခုနှင့် ပဋိပက္ခဖြစ်ရန် အသင့်ပြင်ထားကြသည်။ သူတို့ထဲတွင် တစ်ဦးချင်းအနေဖြင့် အဓိကအင်အားစုသုံးခုနှင့် ယှဉ်နိုင်သူ မည်သူမျှမရှိပေ။ သို့သော် သူတို့ချင်း စည်းလုံးညီညွှတ်ပါက ၎င်းတို့ကို မကြောက်ရွံ့စရာ မလိုပေ။

ကူချီကျိန့်က လင်ဟူဂိုဏ်းမှ တပည့်များကို လော့ရွှေမြစ်ကမ်းနားသို့ ဦးဆောင်လာသည်။ ထို့နောက် အချိန်အတော်ကြာ စောင့်ဆိုင်းပြီးမှ ပိုင်လီချန် အေးအေးဆေးဆေး ရောက်ရှိလာ၏။ သူကလည်း မြူခိုးမှော်ဂိုဏ်းမှ တပည့်များကို အတူခေါ်ဆောင်လာခဲ့သည်။

ပိုင်လီချန်ကို မြင်သောအခါ ကူချီကျိန့်က ခနဲ့သလို ပြောလိုက်သည်။

“ပိုင်လီချန်။ ညှိနှိုင်းပွဲက ဒီလောက်အရေးကြီးတာကို ခင်ဗျားတို့ဂိုဏ်းက ဒီလောက်နောက်ကျမှ ရောက်လာတယ်ပေါ့။ ခင်ဗျားတို့ မြူခိုးမှော်ဂိုဏ်း ရောက်လာတဲ့အချိန်မှာ ရှနိုင်ငံတော်ရဲ့ မြေနေရာတွေ အများကြီး မကျန်တော့မှာကို မစိုးရိမ်ဘူးလား။”

ပိုင်လီချန်က ခပ်ပေါ့ပေါ့ တုံ့ပြန်လိုက်သည်။

“မြေနေရာ ဘယ်လောက်ရနိုင်မလဲဆိုတာက အင်အားအပေါ်မှာ မူတည်တာပါ။ ဘယ်သူက စောရောက်တယ် နောက်ကျရောက်တယ်ဆိုတာနဲ့ မဆိုင်ဘူး။”

“အင်အားပိုကြီးလေ ယုံကြည်မှုပိုရှိလေလေပဲ။ ဒါကြောင့် ဒီလောက် အလျင်လိုနေစရာမလိုဘူး။”

ပိုင်လီချန်၏ စကားကို ကြားသောအခါ ကူချီကျိန့်က လှောင်ပြောင်ကာ ပြောလိုက်သည်။

“အိုး။ဟုတ်လို့လား။ တန်ခိုးရှင်တစ်သောင်းဂိုဏ်းက လူတွေတောင် မရောက်သေးဘူး။ ဒါဆို သူတို့ရဲ့အင်အားက ခင်ဗျားတို့ မြူခိုးမှော်ဂိုဏ်းထက်တောင် သာလွန်တယ်လို့ ဆိုလိုတာလား။”

ပိုင်လီချန် ခဏခန့် မှင်တက်သွားသည်။ သူ၏ ပတ်ဝန်းကျင်ကို ကြည့်လိုက်ရာ တန်ခိုးရှင်တစ်သောင်းဂိုဏ်းမှ လူများ၏ အရိပ်အယောင်ကို အမှန်ပင် မတွေ့ရချေ။

ပိုင်လီချန် အနည်းငယ် မျက်မှောင်ကြုတ်လိုက်၏။ သူတို့ ရောက်လာတာ အတော်လေး နောက်ကျနေပြီဟု သူထင်ထားခဲ့သည်။ သို့သော် သူတို့ထက်ပင် နောက်ကျသော အင်အားစုများ ရှိလိမ့်မည်ဟု မထင်ထားခဲ့ပေ။

လော့ရွှေမြစ်ကမ်းနား၏ အစွန်အဖျားတွင် အချို့သော အစီအစဉ်များကို ပြုလုပ်‌နေရသဖြင့် သူနောက်ကျမှရောက်လာခြင်း ဖြစ်သည်။ သို့သော် တန်ခိုးရှင်တစ်သောင်းဂိုဏ်းမှ တပည့်များက ပိုပြီးနောက်ကျနေသည်။

ပိုင်ကွမ်းယုလည်း လော့ရွှေမြစ်ကမ်းနား၏ အစွန်အဖျားတွင် အချို့သော အစီအစဉ်များကို ပြုလုပ်နေခြင်း ဖြစ်နိုင်လား။

ထိုအခိုက်တွင် ပိုင်လီချန်က ပြုံး၍

“ ဒီညှိနှိုင်းပွဲမှာ ရှနိုင်ငံတော်ရဲ့ အကြံအစည်တစ်ခုခုရှိမှာကို ပိုင်ကွမ်းယုက ကြောက်နေတာ ဖြစ်နိုင်တယ်။ ဒါကြောင့် မလာရဲတာ ဖြစ်မယ်။”

ကူချီကျိန့်က

“ဒါက ပြောရခက်တယ်”

ဆွမ်ဧကရာဇ် အမှန်တကယ် ညှိနှိုင်းလိုစိတ် မရှိသည်ကို သူတို့နှစ်ဦးလုံး ကောင်းစွာသိကြသည်။ သူသည် နဂါးနက်မြို့တော်တွင် သွေးခွဲရန် လှုပ်ရှားမှုများ ပြုလုပ်ခဲ့သည်။ ထိုအချက်ကို ထောက်ရှုလျှင် သူ့ထံ၌ မရိုးသားသော ရည်ရွယ်ချက်အချို့ သေချာပေါက် ရှိပေလိမ့်မည်။ သူသည် ငြိမ်းချမ်းရေးကို လိုလားသော ဧကရာဇ်တစ်ပါး မဟုတ်ပေ။

မည်သို့ပင်ဖြစ်စေ အဓိကအင်အားစုများကတော့ ဆွမ်ဧကရာဇ် ငြိမ်းချမ်းရေးကို တကယ်လိုလားလား မလိုလားဘူးလား ဆိုသည်ကို ဂရုမစိုက်ကြပေ။ သူတို့၏အမြင်အရ သူတို့ မျက်စိ‌ရှေ့တွင် ဧကရာဇ် ရှိနေသရွေ့ ဧကရာဇ်၏ မည်သည့်အကြံအစည်မှ အောင်မြင်မည် မဟုတ်ပေ။

လူတိုင်းကို ကျေနပ်စေမည့် ရလဒ်များကို မပေးနိုင်ခဲ့လျှင် ဧကရာဇ် အနေနှင့် အထိအခိုက်မရှိ ထွက်ခွာသွားရန် မဖြစ်နိုင်ပေ။

သူတို့ မြူခိုး‌ဒေသ အင်အားစုများထဲမှ တစ်ဖွဲ့၏ အကျဉ်းသားအဖြစ် အဆုံးသတ်သွားရန် အလွန် ဖြစ်နိုင်ခြေများ၏။

ပိုင်ကွမ်းယုနှင့် တန်ခိုးရှင်တစ်သောင်းဂိုဏ်းမှ တပည့်များ၏ အပြုအမူများ ထူးဆန်းနေသော်လည်း ကူချီကျိန့်နှင့် ပိုင်လီချန်တို့ ထိုအကြောင်းကို စဉ်းစားမနေတော့ပေ။ လော့ရွှေမြစ်ကမ်းနားတွင်သာ သူတို့ ဆက်လက်စောင့်ဆိုင်းနေကြ၏။

သို့သော်လည်း အချိန်အတော်ကြာသည်အထိ တန်ခိုးရှင်တစ်သောင်းဂိုဏ်းမှ တပည့်များ ပေါ်မလာသည်ကို တွေ့ရသဖြင့် ပိုင်လီချန် စိတ်မသက်မသာ ဖြစ်လာသည်။

ဤအချိန်တွင် ပိုင်လီချန်က

“ကူချီကျိန့်။ ကျုပ်သိချင်တာက ရှနိုင်ငံတော်ရဲ့ သံတမန်က ခင်ဗျားကို ဘာတွေပြောသွားလဲ။”

ကူချီကျိန့်က

“လေဝမ်တ လွှတ်လိုက်တဲ့ အဲ့ဒီသံတမန်က ပြောတယ်။ ရှနိုင်ငံတော်က အခု တန်ခိုးရှင်တစ်သောင်းဂိုဏ်းရဲ့ လက်အောက်မှာတဲ့။ သူတို့ကို သတိထားဖို့ ကျုပ်တို့ကို သတိပေးသွားတယ်။”

ကူချီကျိန့်၏ စကားကို ကြားသောအခါ ပိုင်လီချန် မျက်မှောင်ကြုတ်လိုက်ပြီး သူ၏အမူအရာလည်း လေးနက်လာ၏။

ပိုင်လီချန်၏ စိတ်အနှောင့်အယှက်ဖြစ်နေသော အမူအရာကို မြင်သောအခါ ကူချီကျိန့်က

“ဘာဖြစ်လို့လဲ။ တန်ခိုးရှင်တစ်သောင်းဂိုဏ်းမှာ တကယ်ပဲ တစ်ခုခု မှားနေတာလား။”

တစ်ခုခု မှားယွင်းနေသည်ဟု ကူချီကျိန့် ကိုယ်တိုင်လည်း ယခုစတင် ခံစားလာရသည်။ မူလက ထိုသံတမန်က သူတို့ကြားတွင် သွေးခွဲရန် ကြိုးစားနေသည်ဟုသာ သူ ထင်ခဲ့သည်။

သို့သော် တန်ခိုးရှင်တစ်သောင်းဂိုဏ်း၏ ပျောက်ဆုံးနေမှုက အမှန်တကယ်ပင် အလွန်ထူးဆန်းနေသည်။

ထို့နောက် ပိုင်လီချန်က

“ကျုပ်စိုးရိမ်တာက... ကျုပ်တို့အားလုံး တန်ခိုးရှင်တစ်သောင်းဂိုဏ်းရဲ့ လှည့်စားတာကို ခံလိုက်ရပြီလားလို့။”

ပိုင်လီချန်၏ စကားဆုံးသည်နှင့် အဝေးမှ ရုတ်တရက် ခရာသံတစ်ခု ထွက်ပေါ်လာသည်။ ထိုအသံက ကောင်းကင်မှ လာနေသကဲ့သို့ပင်။

ချက်ချင်းပင် လူတိုင်း၏ အကြည့်များ ကောင်းကင်ပေါ်သို့ ရောက်သွားကြ၏။ သို့သော် ကောင်းကင်သည် ကြည်လင်နေပြီး တိမ်ကင်းစင်ကာ ဘာမှမမြင်ရချေ။

ချက်ချင်းပင် လူများ အဝေးသို့ ကြည့်လိုက်ကြသော်လည်း ထိုနေရာတွင်လည်း ဘာမှမရှိပေ။

ပိုင်လီချန်နှင့် ကူချီကျိန့်တို့လည်း တစ်ခုခုမှားယွင်းနေသည်ဟု ပို၍ပို၍ ခံစားလာရသည်။ ဤအရာအားလုံးသည် တန်ခိုးရှင်တစ်သောင်းဂိုဏ်း၏ လက်ချက်ဖြစ်သည်ဟု သူတို့ သံသယဝင်လာကြသည်။

သူတို့ ထျန်းချန်တိုက်သို့ ပထမဆုံး ရောက်ရှိလာစဉ်ကတည်းက သူတို့၏ ဂိုဏ်းနှစ်ခုမှ တပည့်များ ပျောက်ဆုံးသွားခဲ့ကြသည်။ ပိုင်ကွမ်းယု၏ ရှင်းပြချက်က သူတို့၏ ဆန်းကြယ်‌သော ပျောက်ဆုံးမှုကို ဖြေရှင်းပေးနိုင်ခဲ့သည်။ သို့သော် သူတို့ သူ့ကို လုံးဝမယုံကြည်ခဲ့ကြပေ။

ယခုအချိန်အထိ တန်ခိုးရှင်တစ်သောင်းဂိုဏ်းမှ တပည့်များ ပေါ်မလာသေးပေ။ ရှနိုင်ငံတော်၏ သံတမန်ထံမှ သတိပေးချက်နှင့် ပေါင်းစပ်လိုက်သောအခါ သူတို့၏ သံသယများ ပိုမိုကြီးထွားလာသည်။ ဒါကသွေးခွဲခြင်းမျှသာ မဟုတ်ပဲ အမှန်တကယ် ဖြစ်နေသည်ဟု သူတို့ ယူဆလာကြသည်။

ထိုအခိုက်တွင် လင်ဟူဂိုဏ်းမှ တပည့်တစ်ဦးက ရုတ်တရက် အကျယ်လောင်ဆုံး အော်လိုက်သည်။

“ကောင်းကင်ကို ကြည့်ကြ။”

နောက်တစ်ခဏတွင် လော့ရွှေမြစ်ကမ်းနားဘေးမှ အင်အားစုအားလုံးသည် ရုတ်ရုတ်သဲသဲ ဖြစ်သွားကြ၏။

“ဘုရားရေ။ ဒီကမ္ဘာမှာလည်း မိုးပျံလှေတွေ ရှိနေတာပဲ။”

“ဒီလောက်ကြီးမားတဲ့ မိုးပျံလှေကြီး။ ရှနိုင်ငံတော်မှာ ဒီလောက်ကြီးတဲ့ မိုးပျံလှေ ဘယ်လိုလုပ် ရှိနိုင်မှာလဲ။”

“ဒါက မိုးပျံလှေနဲ့ မတူဘူး။ မိုးပျံလှေတွေမှာ ဒီလောက်များတဲ့ နည်းဗျူဟာပုံစံတွေ ရှိနေမှာ မဟုတ်ဘူး။”

“နတ်လှေ။ ဒါက နတ်လှေပဲ”

လူတိုင်း မှင်တက်သွားကြ၏။

အောက်ကမ္ဘာတစ်ခုတွင် အမှန်တကယ် နတ်လှေတစ်စင်း ရှိနေသည်....

မြူခိုးဒေသမှ မည်သည့်အင်အားစုတွင်မှ နတ်လှေမရှိပေ။ အကယ်၍ ရှိခဲ့လျှင် သူတို့ ဤအောက်ကမ္ဘာမှ အစောကြီးကတည်းက ထွက်ခွာသွားကြမည် ဖြစ်သည်။ အဆင့်နိမ့်သော ထျန်းချန်ကမ္ဘာ၏ မြေနေရာအတွက် အခြားအင်အားစုများနှင့် လာရောက်ယှဉ်ပြိုင်မည် မဟုတ်ပေ။

နတ်လှေကို မြင်သောအခါ မြူခိုးဒေသမှ ကျင့်စဉ်ကျင့်သူအားလုံးတွင် လောဘစိတ်များ မရှိတော့ပေ။ နက်ရှိုင်းသော ကြောက်ရွံ့မှုများသာ ရှိလာ၏။

နတ်လှေတစ်စင်းကို ပိုင်ဆိုင်ပြီး ထိန်းချုပ်နိုင်သော အင်အားစုသည် အလွန်အမင်း အင်အားကြီးမားရမည် ဖြစ်သည်။ မြူခိုးဒေသမှ အင်အားစုအားလုံး ပေါင်းလိုက်လျှင်ပင် နတ်လှေပိုင်ရှင်နှင့် ယှဉ်နိုင်ဖွယ်မရှိကြောင်း သူတို့ ကောင်းစွာ သိသောကြောင့် ဖြစ်သည်။

ကူချီကျိန့်နှင့် ပိုင်လီချန်တို့လည်း ကောင်းကင်မှ နတ်လှေကြောင့် ကြောက်လန့်တကြား မျက်နှာဖြူဖျော့နေကြသည်။ ထိုစဉ် ရုတ်တရက် နတ်လှေပေါ်မှ ကျယ်လောင်သောအသံတစ်ခု ထွက်ပေါ်လာသည်။

“မြူခိုးဒေသက မိတ်ဆွေတွေကို နှုတ်ခွန်းဆက်ပါတယ်။ ကျွန်တော်က ထျန်းချန်တိုက်ရဲ့ အုပ်စိုးသူ ရှနိုင်ငံတော်ရဲ့ ဧကရာဇ်ပါပဲ။ ခင်ဗျားတို့ကို စောင့်ဆိုင်းရစေတဲ့အတွက် တောင်းပန်ပါတယ်။”

ထိုသို့ကြားသောအခါ အောက်မှလူအုပ်လည်း တစ်ဖန်ပြန်၍ ရုတ်ရုတ်သဲသဲ ဖြစ်သွားကြပြန်သည်။

“ဒါက ဆွမ်ဧကရာဇ်ရဲ့ နတ်လှေပဲ။”

“မဖြစ်နိုင်ဘူး။ လုံးဝမဖြစ်နိုင်ဘူး။ အောက်ကမ္ဘာက သာမန်ဧကရာဇ်တစ်ပါးမှာ နတ်လှေတစ်စင်း ရှိနေမှာ မဟုတ်ဘူး။”

“အပေါ်ကလူက ဆွမ်ဧကရာဇ် ဖြစ်နိုင်မှာမဟုတ်ဘူး။”

“ငါတို့ အခု ဘာလုပ်ကြမလဲ။”

…….

ယေဘုယျအားဖြင့် နတ်လှေတစ်စင်းတွင် တိုက်ခိုက်ရေး နည်းဗျူဟာပုံစံတစ်ခု တပ်ဆင်ထားတတ်ပြီး ၎င်း၏ စွမ်းအားက အလွန်ကြီးမား၏။ ညီညွတ်ခြင်းနယ်ပယ်အဆင့်မှ ကျင့်စဉ်ကျင့်သူများသည် နတ်လှေ၏ နည်းဗျူဟာပုံစံမှ တိုက်ခိုက်မှုများကို မခံနိုင်ပေ။

ဤအချိန်တွင် လော့ရွှေမြစ်ကမ်းနားဘေးမှ ကျင့်စဉ်ကျင့်သူအားလုံး ထွက်ပြေးရန် စဉ်းစားနေကြ၏။

ဤအခိုက်တွင် လုချန်း၏ အသံက လေထဲတွင် ဆက်လက်၍ ပဲ့တင်ထပ်နေသည်။

“ကျွန်တော်က မူလက ခင်ဗျားတို့အားလုံးနဲ့ သေသေချာချာ ဆွေးနွေးဖို့ စီစဉ်ထားခဲ့တာပါ။ ဒါပေမဲ့ အံ့ဩစရာကောင်းစွာပဲ ခင်ဗျားတို့ထဲက တချို့က ကျွန်တော်လွှတ်လိုက်တဲ့ သံတမန်တွေကိုတောင် သတ်ပစ်ခဲ့ကြတယ်။ ဒါက ကျွန်တော့်တို့ရဲ့ အခွင့်အာဏာကို သိသိသာသာ မထီမဲ့မြင်ပြုတာပဲ။ ရှနိုင်ငံတော်ကို မလေးစားတာပဲ။ ပေါ်ပေါ်တင်တင် ရန်စတာပဲ။ စစ်ကြေညာတာပဲ။”

လုချန်း၏ စကားကို ကြားသောအခါ လူများအားလုံး နောက်ဆက်တွဲ ဘာဖြစ်လာနိုင်သည်ကို သိသွားကြ၏။ ပိုင်လီချန်က မြူခိုးမှော်ဂိုဏ်းမှ တပည့်များကို ချက်ချင်း ပြောလိုက်သည်။

“တစ်ခုခုမှားနေပြီ။ ဆုတ်ခွာ။”

သူ၏အသံဆုံးသည်နှင့် ပိုင်လီချန်လည်း သူ၏တပည့်များကို ဦးဆောင်ကာ မြူခိုးဒေသ ရှိရာဘက်သို့ အလျင်အမြန် ဦးတည်လိုက်သည်။ မြူခိုးမှော်ဂိုဏ်းမှ တပည့်များ ထွက်ပြေးနေသည်ကို မြင်သောအခါ

ကူချီကျိန့်သည် လုံးဝတုံ့ဆိုင်းမနေတော့ပေ။ သူလည်း လင်ဟူဂိုဏ်းမှ တပည့်များကို ချက်ချင်း ဦးဆောင်ကာ ထွက်ပြေးသည့် အုပ်စုထဲသို့ ဝင်ရောက်သွား၏။

သူတို့သည် ထျန်းချန်တိုက်မှ အားနည်းသူများကို အနိုင်ကျင့်ရန်နှင့် မြေနေရာများ ခွဲဝေယူရန် လာခဲ့ကြခြင်း ဖြစ်သည်။ အသေခံရန် လာခဲ့ကြခြင်း မဟုတ်ပေ။

ရှနိုင်ငံတော်၌ နတ်လှေပင် ရှိနေ၏။ ထိုတစ်ချက်တည်းဖြင့် ဒါက သာမန် နိုင်ငံတစ်ခု မဟုတ်ကြောင်း သိနိုင်သည်။ တိတိကျကျ ပြောရလျှင် ထိုဆွမ်ဧကရာဇ်သည် သာမန်ဧကရာဇ်တစ်ပါး မဟုတ်ပေ။ သူ၏နောက်ကွယ်တွင် ကြီးမားသော အင်အားစုတစ်ခုက ထောက်ပံ့ပေးနေရမည် ဖြစ်၏။

သူတို့ သူ့ကို မရန်စနိုင်ကြပေ။

ကျင့်စဉ်လောကမှ ကျင့်စဉ်ကျင့်သူများအနေနှင့် အချို့သောအချက်များကို ကောင်းစွာသိကြသည်။ အဆင့်မြင့်ကျင့်စဉ် ကမ္ဘာမှ အချို့သောအင်အားစုများသည် သူတို့၏ တပည့်များ သို့မဟုတ် မိသားစုဝင်များကို အတွေ့အကြုံရရှိရန် အောက်ကမ္ဘာများသို့ စေလွှတ်လေ့ရှိသည်။

အကယ်၍ အောက်ကမ္ဘာတစ်ခုတွင် နတ်လှေတစ်စင်း ရှိနေလျှင် ထိုကဲ့သို့သော အခြေအနေမျိုးနှင့် သူတို့ ရင်ဆိုင်နေရဖွယ်ရှိ၏။ ထိုသို့သောအခြေအနေတွင် ထွက်ပြေးခြင်းမှလွဲ၍ သူတို့၌ အခြားရွေးချယ်စရာများ မရှိပေ။

သူတို့သည် ကောင်းကင်လူသား စွမ်းအားရှင်များပင် မဟုတ်ကြပေ။ ထို့ကြောင့် နတ်လှေတစ်စင်းနှင့် မည်သို့ ရင်ဆိုင်နိုင်မည်နည်း။

အဆင့်မြင့်ကျင့်စဉ်ကမ္ဘာမှ မိုးပျံလှေဆိုလျှင်တောင် သူတို့ရင်ဆိုင်ရန် ဘယ်လိုမှ မဖြစ်နိုင်ချေ။

ယခု ထွက်ပြေးခြင်းသည် လုံးဝရှက်စရာမဟုတ်ပေ။ သူတို့၏ အသက်ကို ထိန်းသိမ်းထားဖို့ကသာ အရေးအကြီးဆုံး ဖြစ်၏။

မြူခိုးမှော်ဂိုဏ်းနှင့် လင်ဟူဂိုဏ်းမှ တပည့်များ ထွက်ပြေးရန် ရွေးချယ်ပြီးနောက် မြူခိုးဒေသမှ အခြားအင်အားစုများလည်း လျင်မြန်စွာ တုံ့ပြန်လိုက်ကြသည်။ သူတို့လည်း ထွက်ပြေးသည့် အုပ်စုထဲသို့ ဝင်ရောက်သွားကြ၏။

ဤအင်အားစုများမှ တပည့်အချို့ကတော့ ထွက်ပြေးရင်း ကျိန်ဆဲကြသည်။

“ဒါတွေအားလုံး အဓိကအင်အားစုသုံးခုရဲ့ အမှားပဲ။ သူတို့က အာကာသအက်ကွဲကြောင်းကို ဖွင့်ချင်ကြသေးတယ်။ သူတို့က ငါတို့ကို တကယ်သတ်လိုက်တာပဲ။”

“ဆွမ်ဧကရာဇ်က ဘယ်သူနဲ့ မဟာမိတ်ဖွဲ့ထားတာလဲ။ သူ့ရဲ့ကျင့်ကြံခြင်း စမ်းသပ်မှုတွေအတွက် အဆင့်မြင့်ကမ္ဘာတစ်ခုကို သိက္ခာရှိရှိ သွားသင့်တယ်။ ဒီလိုအဆင့်နိမ့်ကမ္ဘာကို ဘာလို့လာရတာလဲ။”

“ငါသေပြီး လေလွင့်တစ္ဆေဖြစ်သွားတောင်မှ အဓိကအင်အားစုသုံးစုက တပည့်တွေကို ခွင့်လွှတ်မှာမဟုတ်ဘူး။”