'ကူ'အား နောက်တစ်ကြိမ် အသုံးပြုခြင်း၊ သေစေနိုင်သော အပြာရောင်မိစ္ဆာအဆိပ်။

ဖတ်..။

ထိုအခိုက်အတန့်တွင် ကျိုးစွေ့သည် ပေါ့ပါးသောလှုပ်ရှားမှုတစ်ခုကို လုပ်လိုက်ပြီး၊ 'ချစ်ခြင်းမေတ္တာကူ'၏ ကူအခွဲအား လန်ယွဲ့ရှီ၏ခန္ဓာကိုယ်ထဲသို့ တိတ်တဆိတ် ဝင်ရောက်ပျောက်ကွယ်သွားလိုက်စေသည်။

လန်ယွဲ့ရှီမှာမူ ၎င်းကို အနည်းငယ်မျှပင် အာရုံမခံမိလိုက်ပေ။

ဤသို့ပြုလုပ်ပြီးသည်နှင့် သူသည် အတော်ပင် စိတ်သက်သာရာရသွားသည်။

မည်သို့ပင်ဖြစ်စေ၊ အရန်အစီအစဉ်မရှိဘဲ အခြေတည်အဆင့်သို့ရောက်ရှိထားသော သူစိမ်း အမျိုးသမီးကျင့်ကြံသူတစ်ဦးအား သူ၏အခြေစိုက်စခန်းထဲသို့ ဝင်ရောက်ခွင့်ပေးခြင်းမှာ အန္တရာယ်ရှိသော လှုပ်ရှားမှုတစ်ခုဖြစ်သည်။ ၎င်းမှာ ဒုက္ခကိုဖိတ်ခေါ်ခြင်းသက်သက်သာ ဖြစ်၏။

သူမသာ ရုတ်တရက်စိတ်ပြောင်းသွားလျှင် မည်သို့ဖြစ်မည်နည်း။ ထိုအခါ သူဒုက္ခရောက်မည်မဟုတ်လော။

လူ့စိတ်မှာ ခန့်မှန်းရခက်လှသည်။

'ကူ'ကို အသုံးပြုခြင်းနှင့်ပတ်သက်၍လည်း မှားယွင်းသည်ဟု သူမယူဆချေ။

အချို့လူများသည် အမျိုးသမီးများကို ဓနဥစ္စာဖြင့် လိုက်ကြသည်။ အချို့မှာ ပညာဉာဏ် သို့မဟုတ် ရုပ်ရည်ဖြင့် လိုက်ကြသည်။ သူသည် 'ကူ'ကို အသုံးပြုနေခြင်းသာ ဖြစ်၏။

အခြေခံအားဖြင့် များစွာကွာခြားမှုမရှိပေ။

‘စိတ်နှလုံးဖြင့်မဟုတ်ဘဲ၊ လုပ်ရပ်ဖြင့်သာ တိုင်းတာပါ’ ဟူသော ရှေးဆိုရိုးရှိသည်။ အကြောင်းမှာ စိတ်နှလုံးများကိုသာ တိုင်းတာပါက လူကောင်းဟူ၍ မရှိသောကြောင့် ဖြစ်သည်။

ယောက်ျားနှင့်မိန်းမကြားက ကိစ္စများပင်လျှင် ထင်သလောက် မဖြူစင်ကြပေ။

သင်သည် အမျိုးသမီးတစ်ဦးကို သူမ၏အလှကြောင့် ဆွဲဆောင်ခံရနိုင်သလို၊ သူမသည်လည်း သင်၏ဓနဥစ္စာနှင့် အာဏာကြောင့် ဆွဲဆောင်ခံရနိုင်ပေသည်။ တူညီသောနိယာမသာ ဖြစ်၏။

ဆင်းရဲသောယောက်ျားနှင့် ရုပ်ဆိုးသောအမျိုးသမီးသာ အချစ်စစ်ကို ပိုင်ဆိုင်နိုင်ပြီး၊ ချမ်းသာသောယောက်ျားနှင့် လှပသောအမျိုးသမီးတို့ မပိုင်ဆိုင်နိုင်ဟု ဆိုလိုနိုင်မည်လော။

‌

ထို့ကြောင့် မည်သို့သောနည်းလမ်း၊ မည်သို့သာကစားကွက်ဖြစ်စေ ရလဒ်ကောင်းသရွေ့ ၎င်းမှာ အရေးအကြီးဆုံးဖြစ်သည်။

သူသည် အနာဂတ်တွင် သူ၏လက်တွဲဖော်ကို ကောင်းစွာဆက်ဆံသရွေ့ ၎င်းမှာ လုံလောက်သည်။

ယခု သူမက သူ့ကို ကူညီပေးသလို၊ နောက်ပိုင်းတွင် သူက သူမကို ကူညီပေလိမ့်မည်။

တာအိုလက်တွဲဖော်များဆိုသည်မှာ ထိုသို့မဟုတ်လော။ အပြန်အလှန် ထောက်ပံ့ကူညီခြင်းသာ ဖြစ်၏။

ထို့ကြောင့် သူသည် ဘာကိုမျှရှက်ရွံ့နေခြင်းမရှိပေ။ သူလုပ်နေသမျှ အရာအားလုံးသည် ဤရက်စက်ကြမ်းကြုတ်သော လောကတွင် အင်မော်တယ်လမ်းစဉ်နှင့် ရှင်သန်ရပ်တည်ရေးအတွက်သာ ဖြစ်သည်။

ဤသို့စဉ်းစားရင်း ကျိုးစွေ့သည် သူ၏တာအိုနှလုံးသား ကြည်လင်အေးချမ်းသွားကာ စိတ်လက်ပေါ့ပါးသွားသည်။ သူ၏လုပ်ရပ်အားလုံးမှာ ကျိုးကြောင်းဆီလျော်သည်ဟု သူခံစားလိုက်ရသည်။

သူသာမရှိခဲ့ပါက ဤလှပသောအမျိုးသမီးသည် ဤလောကမှ သိပ်မကြာမီအချိန်အတွင်း ပျောက်ကွယ်သွားရပေမည်။ သူမ ရှင်သန်လွတ်မြောက်နိုင်ရန် နည်းလမ်းမရှိပေ။

"ဒီလိုဆိုရင်တော့ အခုပဲ သွားကြစို့..."

ထိုအချိန်တွင် လန်ယွဲ့ရှီသည် သူမရှေ့မှောက်ရှိ ယောက်ျားက မည်သည့်အရာကို တွေးတောနေသည်ကို မသိပေ။ သူမသည် သူ့အပေါ် ပို၍ပို၍ ဆွဲဆောင်မှုရှိလာသည်ကို တွေ့ရှိခဲ့ရသည်။ သူသည် အစကတည်းက ဆွဲဆောင်မှုရှိခဲ့ပြီး ယခုမူ ပို၍ပင် စွဲမက်ဖွယ်ကောင်းနေပုံရသည်။

ဤယောက်ျားအပေါ် သူမ၏ လေးစားမှုမှာ ကြီးထွားလာနေသည်။

မည်သို့ပင်ဖြစ်စေ၊ တစ်စုံတစ်ယောက်အား သူတို့၏လိုအပ်ချိန်တွင် အကူအညီပေးခြင်းနှင့် လှပပြီးသားအရာတစ်ခုကို အပေါ်ယံရွှေမှုန့်ကြဲခြင်းက ကွာခြားပေသည်။

ဤယောက်ျားသည် သူမ၏ အကျပ်အတည်းအချိန်တွင် သူမကို ကယ်တင်ခဲ့သည်။

သူ၏ရည်ရွယ်ချက်မှာ အခြေတည်ဆေးလုံးဖြစ်လျှင်ပင်၊ သူသည် အမှန်တကယ်တွင် သူမ၏အသက်ကို ကယ်တင်ခဲ့ခြင်းသာ ဖြစ်သည်။

"ကောင်းပြီ.."

ထိုစကားများကို ပြောပြီးနောက်၊ ကျိုးစွေ့၏ လမ်းညွှန်မှုအောက်တွင် နှစ်ဦးသားသည် ဥမင်လိုဏ်ခေါင်းမှတစ်ဆင့် မြေအောက်စခန်းသို့ လျင်မြန်စွာ ထွက်ခွာသွားကြသည်။ ထုံးစံအတိုင်း ၎င်းလမ်းကြောင်းကို 'ရွှေစားကူ'များက လျင်မြန်စွာ ဖုံးကွယ်လိုက်ကြသည်။

ဤနည်းအားဖြင့် ဤနေရာတွင် တစ်ချိန်က ဥမင်လိုဏ်ခေါင်းတစ်ခု ရှိခဲ့သည်ကို မည်သူမျှ မသိတော့ပေ။

ထိုဥမင်လိုဏ်ခေါင်းမှတစ်ဆင့် သူ၏ပုန်းခိုရာနေရာကိုလည်း မည်သူမျှ ရှာဖွေနိုင်မည်မဟုတ်ပေ။

...

များမကြာမီ လန်ယွဲ့ရှီသည် ကျိုးစွေ့ကိုယ်ပွား၏ ဦးဆောင်မှုအောက်တွင် မီတာရာပေါင်းများစွာနက်သော မြေအောက်စခန်းသို့ ရောက်ရှိခဲ့တော့သည်။

ပထမတစ်ချက်ကြည့်လိုက်သည်နှင့် သူမသည် ကျိုးစွေ့၊ ကျိပင်းယွီ၊ မုဇီယန်နှင့် ရှားကျင်းယန်တို့ကို တွေ့မြင်လိုက်သည်။

သို့သော် သူမသည် ကျိုးစွေ့နှစ်ယောက် ရှိနေသည်ကို သတိပြုမိပြီး ထိတ်လန့်သွားသည်။ သူတို့သည် အမွှာညီအစ်ကိုများ ဖြစ်နိုင်သည်လော။

"ခင်ဗျားနဲ့ အစောပိုင်းက စကားပြောခဲ့တာ ကျွန်တော့်ရဲ့ကိုယ်ပွားတစ်ယောက်ပါ စီနီယာလန်..."

ကျိုးစွေ့က လက်ဝေ့ယမ်းလိုက်ရာ ပေါက်ကွဲသံတစ်ချက်နှင့်အတူ ကိုယ်ပွားက ချက်ချင်းပျောက်ကွယ်သွားတော့သည်။

"ကိုယ်ပွားလား... မင်းတစ်ယောက်တည်းလာပြီး.. ငါနဲ့ စကားပြောရဲတာ အံ့ဩစရာမဟုတ်တော့ဘူး.."

လန်ယွဲ့ရှီက ကျိုးစွေ့ကို လေးလေးနက်နက်တစ်ချက်ကြည့်လိုက်ပြီး သူမ၏နှလုံးသား တုန်လှုပ်သွားသည်။ ဤသို့သော ကိုယ်ပွားလျှို့ဝှက်ပညာရပ်သည် သူမ၏စိတ်ကူးထက် ကျော်လွန်နေသည်။ အခြေတည်အဆင့်သို့ ရောက်ရှိပြီးသား ကျင့်ကြံသူတစ်ဦးဖြစ်သော သူမပင်လျှင် မည်သည့်အားနည်းချက်ကိုမျှ မတွေ့ရှိနိုင်ခဲ့ပေ။

သူမသည် မူလက ၎င်းမှာ သူ၏ပင်မခန္ဓာကိုယ်ဖြစ်သည်ဟု ထင်ခဲ့သော်လည်း၊ ၎င်းမှာ ကိုယ်ပွားတစ်ဦးသာဖြစ်နေပေသည်။

အင်မော်တယ်ရှားဂိုဏ်းတွင်ပင် ဤသို့သော အားကောင်းသည့် ကိုယ်ပွားပညာရပ် မရှိပေ။

ဤသည်မှာ ထိပ်တန်းအဆင့် ကိုယ်ပွားပညာရပ်တစ်ခုဖြစ်သည်မှာ သံသယဖြစ်ဖွယ်မရှိဘဲ၊ ၎င်းမှာ အရေးကြီးသည့်အချိန်များတွင် မယုံနိုင်လောက်အောင် အသုံးဝင်နိုင်သည်။

အကယ်၍ စေ့စပ်ညှိနှိုင်းမှုတွင် အဆင်မပြေဖြစ်သွားခဲ့ပါက၊ သူမသည် သူ၏အကူအညီကို ရရှိခဲ့မည်မဟုတ်ပေ။

မည်သို့ပင်ဖြစ်စေ၊ သူမ အစောပိုင်းက ရင်ဆိုင်နေရသည်မှာ ကိုယ်ပွားတစ်ဦးသာ ဖြစ်သည်။ သူမက ရန်ပြုလာလျှင်ပင် သူ့ကို မထိခိုက်စေနိုင်ပေ။

သူမသည် မြစ်ကိုဖြတ်ပြီးနောက် တံတားကိုမီးရှို့တတ်သူ၊ သို့မဟုတ် ကျေးဇူးမသိတတ်သူမျိုး မဟုတ်သည့်အတွက် စိတ်ထဲတွင် စိတ်သက်သာရာရသွားသည်။

သို့မဟုတ်လျှင် သူမသည် သူ၏အကူအညီကို ရရှိခဲ့မည်မဟုတ်ပေ။

"သူတို့က ဘယ်သူတွေလဲ..."

လန်ယွဲ့ရှီက ကျိပင်းယွီနှင့် အခြားအမျိုးသမီးနှစ်ဦးကို ကြည့်ရင်း စူးစမ်းစွာ မေးလိုက်သည်။

"သူတို့အားလုံးက ကျွန်တော့်ရဲ့ တာအိုလက်တွဲဖော်တွေပါ.."

ကျိုးစွေ့သည် ဘာကိုမှဖုံးကွယ်မနေဘဲ သူတို့ကို လွတ်လပ်စွာ မိတ်ဆက်ပေးလိုက်သည်။

"တွေ့ရတာဝမ်းသာပါတယ် စီနီယာလန်.."

ကျိပင်းယွီ၊ မုဇီယန်နှင့် ရှားကျင်းယန်တို့က သူမကို နှုတ်ဆက်လိုက်ပြီး၊ ဤအင်မော်တယ်ရှားဂိုဏ်း၏ ဂိုဏ်းသခင်ငယ်ကို စူးစမ်းစွာ ကြည့်ရှုနေကြသည်။

သူတို့သည် ကျိုးစွေ့ထံမှ အင်မော်တယ်ရှားဂိုဏ်းမှ ဂိုဏ်းသခင်ငယ်တစ်ဦးကို ကယ်တင်ရန် ရည်ရွယ်ထားကြောင်း ယခင်က ကြားသိခဲ့ရသည်။

၎င်းမှာ နာမည်ကျော် ထိပ်တန်းအဆင့် အခြေတည်ကျင့်ကြံသူတစ်ဦးဖြစ်သည့် ဒဏ္ဍာရီလာ လန်ယွဲ့ရှီ ဖြစ်လိမ့်မည်ဟု သူတို့ မထင်ထားခဲ့ကြပေ။

ဤဆုံးဖြတ်ချက်နှင့်ပတ်သက်၍ သူတို့ စိတ်မသက်မသာ ခံစားရသော်လည်း၊ ကျိုးစွေ့၏ ဆုံးဖြတ်ချက်ကို သံသယဖြစ်ဖွယ်မရှိဘဲ ယုံကြည်ကြသည်။

အကြောင်းမှာ သူတို့၏ကျိုးစွေ့သည် ဤမျှ သတိကြီးတတ်သူဖြစ်ရာ၊ သူလုပ်နိုင်သည်ဟု လုံးဝသေချာမှုမရှိဘဲ တစ်စုံတစ်ယောက်ကို မည်သို့ ကယ်တင်နိုင်မည်နည်း။

မဟုတ်သေး၊ ဒါက အသက်ကယ်တင်ရုံသက်သက်တောင်မဟုတ်လောက်ချေ။ ၎င်းသည် သူရဲကောင်းက အလှပဂေလေးကို ကယ်တင်သည့်ဇာတ်ကွက်မျိုးပင် ဖြစ်နိုင်သေး၏။

ကျိုးစွေ့သည် အင်မော်တယ်ရှားဂိုဏ်း၏ ဂိုဏ်းသခင်ငယ်ကို ဆွဲဆောင်ကာ၊ သူမအား မောင်းမအဖြစ် သိမ်းပိုက်လိုခြင်း‌ဖြစ်မည်လော။

သို့သော် ၎င်းမှာ အလွန်အမင်း တရားလွန်လှပေသည်။

အခြေတည်အဆင့်သို့ ရောက်ရှိပြီးသား အမျိုးသမီးကျင့်ကြံသူတစ်ဦးအား မောင်းမအဖြစ် သိမ်းပိုက်ရန် စဉ်းစားခြင်းမှာ၊ မည်သို့ပင်ဖြစ်စေ မယုံနိုင်လောက်အောင်ချဲ့ကားပြောဆိုခြင်းသာဖြစ်၏။

သူသာ အောင်မြင်ခဲ့ပါက ကျင့်ကြံခြင်းလောကတစ်ခုစလုံးအား တုန်လှုပ်စေမည်မှာ သေချာပေသည်။

သို့သော် ကျိုးစွေ့သာဖြစ်ခဲ့ပါက သူ၏ဆွဲဆောင်မှုအရ သူအမှန်တကယ် စွမ်းဆောင်နိုင်ပေမည်။

အမျိုးသမီးသုံးဦးတွင် မတူညီသော ကိုယ်စီအတွေးများရှိသော်လည်း၊ ကိုယ့်ကိုယ်ကို ကောင်းမွန်စွာထိန်းသိမ်းကာ ဘာမျှထုတ်မပြောကြချေ။

"တွေ့ရတာဝမ်းသာပါတယ်..."

လန်ယွဲ့ရှီက ကျိပင်းယွီနှင့် အခြားအမျိုးသမီးများကို ကြည့်လိုက်ရင်း၊ သူမ၏မျက်နှာတွင် ထူးဆန်းသော အမူအရာတစ်ခု ပေါ်လာသည်။

သူမသည် ကျိုးစွေ့မှာ ငယ်ရွယ်ပြီး အထီးကျန်ပုံပေါက်သည်ဟု ထင်ခဲ့သည်။ သို့သော် အံ့ဩစရာမှာ သူ၌ တာအိုကြင်ဖော်သုံးဦး ရှိနေပြီဖြစ်သည်။

ထို့အပြင် သူတို့အားလုံးသည် ငယ်ရွယ်လှပကာ ကိုယ်လုံးကိုယ်ပေါက်လည်း တောင့်တင်းကြသည်။

‘ဟမ့်.. ဘယ်ယောက်ျားမှ မကောင်းဘူး..’

‘သူတို့သိတာဆိုလို့ မိန်းမတွေနဲ့ ကာမဆက်ဆံဖို့လောက်ပဲ…’

ကံကောင်းစွာဖြင့် သူမသည် သူနှင့်အတူ သဘောတူညီချက်တစ်ခုသာ ပတ်သက်သည်။ သူမ ရှင်သန်လွတ်မြောက်ပြီးနောက် သူ့ကို အခြေတည်ဆေးလုံးကို ပေးပြီးသည်နှင့် သူတို့၏ အပေးအယူက ပြီးဆုံးပေလိမ့်မည်။

ထို့နောက်တွင်မူ၊ သူတို့သည် ဆက်သွယ်မှုအားလုံးကို ဖြတ်တောက်ပြီး၊ တစ်ဦးနှင့်တစ်ဦး ဘယ်တော့မှ ပတ်သက်စရာမရှိတော့ပေ။

သို့သော် အကြောင်းတစ်ခုခုကြောင့် သူမသည် ခါးသီးမှုကို ခံစားလိုက်ရသည်။ သူမ၏နှလုံးသားထဲတွင် နာကျင်သောခံစားချက်တစ်ခု တိုးပွားလာသည်။

၎င်းမှာ သူမ နှစ်ပေါင်းများစွာ မကြုံတွေ့ခဲ့ရသော စိတ်ခံစားချက်တစ်ခုဖြစ်သည်။

သို့သော်ငြား အခြေတည်အဆင့်သို့ ရောက်ရှိပြီးသား ကျင့်ကြံသူတစ်ဦးအနေဖြင့် သူမသည် ခံစားချက်များကို ကောင်းစွာ ဖုံးကွယ်ထားပြီး မည်သည့်အရာကိုမျှ မဖော်ထုတ်ခဲ့ပေ။

"စီနီယာလန်.. ခင်ဗျား ဘယ်လိုအဆိပ်မျိုးနဲ့ ထိခိုက်မိတာလဲဆိုတာ ကျွန်တော့်ကို ပြောပြနိုင်မလား... ကျွန်တော် ဖြေရှင်းကောင်း ဖြေရှင်းပေးနိုင်လောက်တယ်..."

ကျိုးစွေ့က စူးစမ်းစွာ မေးလိုက်သည်။

သူသည် ယဉ်ကျေးမှုအရ ပြောဆိုနေခြင်းမဟုတ်ဘဲ အမှန်တရားကို ပြောပြနေခြင်းသာဖြစ်၏။

မည်သို့ပင်ဖြစ်စေ၊ 'ကူနတ်ဘုရား ပန်းကန်'သည် မရေမတွက်နိုင်သော 'ကူပိုးကောင်'များကို သန့်စင်နိုင်ပြီး၊ ၎င်းတို့ထဲမှ အချို့မှာ အဆိပ်ဖြေနိုင်စွမ်း ရှိသည်။

သူသာ သက်ဆိုင်ရာ ပစ္စည်းများကို ပြင်ဆင်နိုင်ခဲ့ပါက သူမကို အဆိပ်ဖြေပေးနိုင်ပေလိမ့်မည်။

"ငါက အပြာရောင်မိစ္ဆာဆိုတဲ့ အရမ်းပြင်းထန်တဲ့အဆိပ်မိခဲ့တာ...”

လန်ယွဲ့ရှီက လေးနက်စွာ ပြောလိုက်သည်။

ဝန်ခံရလျှင်၊ ဤမေးခွန်းကို သူမ မဖြေချင်ပေ၊ ၎င်းမှာ သူမ၏လျှို့ဝှက်ချက်ဖြစ်သည်။ သူမ၏အားနည်းချက်ကို သူစိမ်းများထံ ထုတ်ဖော်ပြသခြင်းမှာ၊ ကိုယ့်သေလမ်းကိုယ် ရှာဖွေခြင်းနှင့် တူညီပေသည်။

သို့သော် အမည်မသိသော အကြောင်းတစ်စုံတစ်ရာကြောင့်၊ ဤယောက်ျားနှင့် သူမသည် ပထမဆုံး တွေ့ဆုံခြင်းဖြစ်သော်လည်း၊ သူမသည် သူ့အပေါ်အကောင်းမြင်စိတ်ရှိပြီး သူ့ထံမှ မည်သည့်အရာကိုမျှ ဖုံးကွယ်ရန် မတတ်နိုင်ပေ။

ထို့ကြောင့် သူမသည် သူမ ထိခိုက်ခံစားနေရသော အဆိပ်ကို ထုတ်ဖော်ပြောဆိုလိုက်သည်။