အရှိန်ကို ဖမ်းဆုပ်ခြင်း

ထိုအကြီးအကဲက စတုတ္ထအကြီးအကဲအား လူအိုကြီးဟု ခေါ်တာကို ကြားရသောအခါ ရှိနေသောကျောင်းသားအားလုံး အံ့ဩသင့်သွားကြ၏။

သို့စေကာမူ သူတို့ထိုအကြီးအကဲ၏ မျက်နှာကိုမြင်လိုက်ရသောအခါ ချက်ချင်းနားလည်သွားကြသည်။

သူကအတွင်း၀င်းရှိ ပဉ္စမအကြီးအကဲပေတည်း။

တစ်နည်းအားဖြင့်သူက ဝိဉာဉ်အနှစ်သာရကျောင်းတော်၌ အားအကောင်းဆုံးအစီအရင်ဆရာဖြစ်သည်။

ပဉ္စမအကြီးအကဲရောက်လာတာကို မြင်ရသောအခါ ဥပဒေစိုးမိုးရေးခန်းမက အကြီးအကဲ၏ အမူအရာက အနည်းငယ် လေးနက်သွားပြီး တောင်းပန်နေသည့် အပြုံးနှင့် ချက်ချင်းချဉ်းကပ်သွား၏။

"ဘယ်လေကများ ပဉ္စမအကြီးအကဲကို တိုက်ခတ်ပြီး ကျွန်တော်တို့ထံ ရောက်လာစေတာလဲ"

ပဉ္စမအကြီးအကဲ ထိုင်ခုံကိုဆွဲယူကာ ဥပဒေစိုးမိုးရေးခန်းမက အကြီးအကဲကို ကြည့်ပင်မကြည့်ဘဲ စတုတ္ထအကြီးအကဲဘေးတွင် ထိုင်လိုက်ပြီး ပြုံးနေသည်။

"အာ၊ ငါဒီရက်ပိုင်း အစီအရင်တွေကို သီးသန့်လေ့လာနေတာ၊ ငါထွက်လာတော့ သူတို့ထဲမှာ အစီအရင်နဲ့ပတ်သက်ပြီး ကြောက်စရာကောင်းတဲ့ ပါရမီရှိတဲ့ ဖန်ချန်းဆိုတဲ့ ကောင်လေးတစ်ယောက်ရှိတယ်လို့ ငါကြားခဲ့ရတယ်၊ ဟုတ်တယ်မလား"

စတုတ္ထအကြီးအကဲ အပြုံးဖြင့်ခေါင်းညိတ်သည်။

"မှန်ပါတယ်၊ ဒါပေမယ့် အခုတော့ သူတို့ဘာထူးခြားတာတစ်ခုမှ မလုပ်ခဲ့တာတောင် ဥပဒေစိုးမိုးရေးခန်းမထဲကို ဆွဲခေါ်သွားခံရတယ်လေ"

ထိုစကားကိုကြားသောအခါ ပဉ္စမအကြီးအကဲ ထိုအကြီးအကဲအား တစ်ချက်စိုက်ကြည့်လိုက်၏။ သူ့အမူအရာကမူ အတော်လေးတည်ငြိမ်နေသည်။

"အိုး၊ သက်သေမရှိဘဲ တစ်စုံတစ်ယောက်ကို ဥပဒေစိုးမိုးရေးခန်းမထဲမှာ အတင်းဖိနှိပ်တွန်းသွင်းထားတာလား၊ မသိတဲ့လူတွေကတော့ ဥပဒေစိုးမိုးရေးခန်းမက တိုက်ခိုက်ဖို့နဲ့ လက်စားချေဖို့အတွက် တစ်ယောက်ယောက်ရဲ့ နောက်ဖေး၀င်းဖြစ်လာတယ်လို့ ထင်ကောင်းထင်ကြနိုင်တယ်"

ထိုစကားကိုကြားသောအခါ ဥပဒေစိုးမိုးရေးခန်းမမှ အကြီးအကဲမှာ ကျောရိုးတစ်ယောက် အေးစက်သွားသလိုပင် ခံစားလိုက်ရသည်။

ဒါက စွပ်စွဲချက်တစ်ခုဟု ပြောဆိုရန်အတွက် အရမ်းကြီးလွန်းသည်။ ဒါ့အပြင် ဥပဒေစိုးမိုးရေးခန်းမကို ယခု ဒုတိယအကြီးအကဲ လျှို့ဝှက်စွာ စီမံခန့်ခွဲနေတာကို မသိသူမည်သူရှိဦးမည်နည်း။

တစ်နည်းအားဖြင့် ကျိုင်းပင်ကိုကျိန်ဆဲရင်း ပိုးစာပင်အကြောင်းပြောနေတာနှင့် အလားတူသည်။

ဒါ့အပြင် ဤပြောဆိုမှုက ဥပဒေစိုးမိုးရေးခန်းမခန်းမသခင်နားထဲသို့ လျင်မြန်စွာပင် ရောက်သွားသည်။ သူ့တွင် ဒုတိယအကြီးအကဲ၏ ထောက်ပံ့မှုရှိသည့်တိုင် အတွင်း၀င်းထဲက အကြီးအကဲနှစ်ဦး၏ တည်ရှိမှုက သူ့ကို ကြီးမားသည့်ဖိအားတစ်ခု ပေးဆောင်နေဆဲပင်။

ရှောင်ဟိုင်နှင့်ကျန်သောသူများကို ကြည့်လိုက်စဉ် သူတို့အရေပြားက ကွဲအက်နေကြပြီး အသားများကပွင့်ထွက်နေကာ လတ်ဆတ်သည့် သွေးများက အနီးတွင် စီးဆင်းရင်း ကြမ်းပြင်အား ရဲရဲတောက်နီသွားစေသည်။

"ဒုတိယအကြီးအကဲကို ဒီအကြောင်းသွားပြော၊ သူ့ဆုံးဖြတ်ပါစေ"

စတုတ္ထနှင့် ပဉ္စမအကြီးအကဲတို့ အတူတကွ ရောက်လာသောအခါ ဒါက သူ့ကဲ့သို့ ဥပဒေစိုးမိုးရေးခန်းမ၏ ခန်းမသခင်တစ်ယောက် ခုခံနိုင်တာထက်ပိုနေလေပြီ။

.....

ဒုတိယအကြီးအကဲနေထိုင်သည့်ခြံ၀င်းလေး၌ ဥပဒေစိုးမိုးရေးခန်းမနှင့် ပတ်သက်သည့်အရာတိုင်းက ယခု ဒုတိယအကြီးအကဲ၏ အမြင်၌ရှိနေသည်။

စတုတ္ထနှင့် ပဉ္စမအကြီးအကဲတို့ ရောက်လာတာကို မြင်ရသောအခါ ဒုတိယအကြီးအကဲ အနည်းငယ်မျက်မှောင်ကြုတ်လိုက်၏။ ဒါကသူ့ကို ဖိအားပေးနေခြင်းပင်။

ထိုစဉ် ဥပဒေစိုးမိုးရေးခန်းမမှ တင်ပြနေသည့် အကြီးအကဲ၏အမူအရာကလည်း အလွန်အမင်းကြည့်ရဆိုးနေပြီး မေးသည်။

"ဒုတိယအကြီးအကဲ၊ ကျွန်တော်တို့အခုဘာလုပ်ကြမလဲ"

ထိုထူးခြားသည့်ကျောင်းသားများအား ဥပဒေစိုးမိုးရေးခန်းမသို့ ‌ပို့ဆောင်ရခြင်း၏ တကယ့်ရည်ရွယ်ချက်က သူတို့ပါးစပ်က အမှန်တရားကို ထုတ်ယူရန်အတွက်မဟုတ်ဘဲ ပထမအကြီးအကဲ၏ ဩဇာလွှမ်းမိုးမှုကို အားနည်းသွားစေရန်ပင်။

ဝိဉာဉ်အနှစ်သာရကျောင်းတော်က လူတိုင်းက ရှောင်ဟိုင်နှင့်ကျန်သောသူများအား ပထမအကြီးအကဲ အထူးစုဆောင်းထားတာကို သိကြသည်။

တိုက်ရိုက်သက်သေအထောက်အထားဟူ၍ မရှိသော်လည်း သူတို့ကို ဥပဒေစိုးမိုးရေးခန်းမထဲတွင် ဖိနှိပ်ပြီး ရက်အနည်းငယ်ကြာ စစ်ဆေးလိုက်မည်ဆိုပါက အပြင်ပကမ္ဘာမှ သံသယများနှင့် သဘောထားများကလည်း ပြောင်းသွားမည်ဖြစ်လေရာ အတိုင်းအတာတစ်ခုအထိ သူတို့က ချန်တဟိုင်နှင့် ယုချန်တို့အသတ်ခံရတာနှင့် ဆက်စပ်နေပေလိမ့်မည်။

ဤရည်မှန်းချက်သာ အောင်မြင်သွားပါက ထိုထူးခြားသည့်ကျောင်းသားသစ်များအား လျော်ကြေးအနည်းငယ်ပေးပြီး လွှတ်လိုက်ခြင်းဖြင့် သဘောထားကွဲလွဲသည့် အသံဗလံများအား တိတ်ဆိတ်ငြိမ်သက်သွားစေမည်သာ။

ဒီအရာအားလုံးကလည်း တရား၀င်အကြောင်းပြချက်များနှင့် ရှိသွားပေလိမ့်မည်။

သို့သော် ယခုလိုသေးငယ်သည့် ကိစ္စရပ်လေးအတွက် စတုတ္ထနှင့် ပဉ္စမအကြီးအကဲတို့ပင် မတ်တပ်ရပ်လာကြလိမ့်မည်ဟု မည်သူက မျှော်လင့်ထားမည်နည်း။

"စစ်ဆေးမှုကို ဆက်လုပ်" ဒုတိယအကြီးအကဲ လက်ဝှေ့ယမ်းရင်း ပြတ်သားစွာကြေညာသည်။

"ငါတို့အခုရပ်လိုက်မယ်ဆိုရင် ပြင်ပကမ္ဘာက ငါတို့ရည်ရွယ်ချက်တွေကို သံသယ၀င်သွားလိမ့်မယ်၊ ဒါ့အပြင် စတုတ္ထနဲ့ ပဉ္စမအကြီးအကဲတို့လာရင်တောင် သူတို့စည်းမျဉ်းတွေကို မချိုးဖောက်နိုင်ဘူး"

"နားလည်ပါပြီ" ဥပဒေစိုးမိုးရေးခန်းမမှ အကြီးအကဲပြောပြီးနောက် ထွက်သွားလေတော့သည်။

ဒုတိယအကြီးအကဲ ပထမအကြီးအကဲနေထိုင်သည့် အရှေ့ဘက်သို့ကြည့်လိုက်မိသည်။

"ကြည့်ရတာ ဘယ်သူ့အခြေခံအုတ်မြစ်က ပိုကောင်းသလဲဆိုတာ သိရဖို့အတွက် ငါ့ကို ထိပ်တိုက်ရင်ဆိုင်ဖို့အတွက် မင်းအစီအစဉ်တစ်ခုကို သုံးချင်ပုံပဲ၊ နှစ်ချီကြာတံခါးပိတ်နေခဲ့ပြီး ကျောင်းတော်ရဲ့ ကိစ္စရပ်တွေမှာ မပါ၀င်ခဲ့တဲ့ ဘယ်မှာ ဘယ်လောက် အခြေခံအုတ်မြစ်ရှိနိုင်မှာမို့လဲ၊ ဖြစ်နိုင်တာက စတုတ္ထနဲ့ ပဉ္စမအကြီးအကဲတို့က မင်းစုဆောင်းနိုင်တာအကုန်ပဲလေ"

စတုတ္ထနဲ့ ပဉ္စမအကြီးအကဲတို့ကို အားကိုးရုံမျှနှင့် သူ့အားဦးညွတ်စေရန် မလုံလောက်ပါ။

.....

သို့သော် နောက်ထပ်ပေါ်ပေါက်လာသောသူက ဒုတိယအကြီးအကဲ၏ အမူအရာကို အတော်လေး မကြည်မလင်ဖြစ်သွားစေသည်။

စတုတ္ထနဲ့ ပဉ္စမအကြီးအကဲတို့တင် ရောက်လာခြင်းမဟုတ်ဘဲ သန့်စင်မိုးမျှော်စင်မှ အကြီးအကဲလည်း ရောက်လာပြီး စာလိပ်တစ်လိပ်ကိုကိုင်ကာ ကျယ်လောင်စွာပြောလိုက်၏။

"နဂါးကိုးကောင်နတ်မင်းဆက်ရဲ့ အိမ်ရှေ့မင်းသားက ကိစ္စရပ်များစွာနဲ့ အလုပ်ရှုပ်နေတာမို့ မုဖူရှန်း၊ ဖုန်းယီ၊ ယဲ့ချိုးပိုင်၊ ရှောင်ဟိုင်၊ ရှီရှန်းနဲ့ ဖန်ချန်းတို့ကို သူတို့ရဲ့ ထိုက်တန်တဲ့ လိုက်ပါပို့ဆောင်မှုအတွက် ကျေးဇူးတင်ကြောင်း ဖော်ပြဖို့ ဒီစာကို ပို့လိုက်ပါတယ်"

ယေဘုယျအားဖြင့်ဆိုရပါက မင်းဆက်တစ်ခုထံမှ တာ၀န်ပြီးဆုံးသွားသောအခါ ထိုသို့သော အသိအမှတ်ပြုခြင်းကဲ့သို့ အရာမျိုးကို ထုတ်ပြန်ရန်ဟူသည် ထုံးစံသာဖြစ်သော်လည်း လူသိရှင်ကြား တမင်တကာ အသံထွက်ရွတ်ဆိုနေစရာမလိုပါ။

အထူးသဖြင့် နဂါးကိုးကောင်နတ်မင်းဆက်က ဝိဉာဉ်အနှစ်သာရကျောင်းတော်လောက် အားကောင်းမနေသောအခါဖြစ်သည်။

သို့သော် ဒုတိယအကြီးအကဲ၏အာရုံကို အများဆုံးဆွဲဆောင်သွားတာက ဆုလာဘ်မဟုတ်ဘဲ အတွင်းပိုင်းမျှော်စင်က အကြီးအကဲတစ်ဦး ကိုယ်တိုင်ရောက်လာခြင်းပင်။

အတွင်းပိုင်းမျှော်စင်ကို အမှန်တကယ်တာ၀န်ယူထားသောသူက ဒုဌာနမှူးဆိုတာ သတိပြုရန် အရေးကြီးသည်။

အခြေခံအားဖြင့် အတွင်းပိုင်းမျှော်စင်၏ အကြီးအကဲက ထိုအသစ်စုဆောင်းထားသည့် ကျောင်းသားသစ်များအား အသိအမှတ်ပြုရန် လာရောက်လည်ပတ်ခြင်းက အတွင်းပိုင်းမျှော်စင်ကို စီမံသည့် ဒုဌာနမှူးက သူနှင့်ပတ်သက်၍ မကျေနပ်တာကို ‌ညွှန်ပြနေသည်။

ဤအဆင့်တွင် စောင့်ကြည့်နေကြသည့် ကျောင်းသားများ တစ်ဦးကိုတစ်ဦး ထိတ်လန့်စွာ ကြည့်လိုက်မိကြ၏။

အမြင်စူးရှသောမည်သူမဆို အခြေအနေရပ်များ ပြောင်းလဲသွားတာကိုမြင်နိုင်သည်။

ဒုတိယအကြီးအကဲနဲ့ ပထမအကြီးအကဲကြားက အာဏာရုန်းကန်မှု၊ စိုးရိမ်မိတာကတော့.....!

ဥပဒေစိုးမိုးရေးခန်းမထဲတွင် ထိုသတင်းကို ကြားသောအခါ ခန်းမသခင်၏ ဒူးများပင်လျှင် တုန်ယင်သွားရသည်။

အတွင်းပိုင်းမျှော်စင်က တစ်ယောက်ယောက် ရောက်လာခဲ့လေပြီ။

တကယ်ပဲ ဒါကိုဆက်လုပ်ရမှာလား!

သွေးနှင့်ဖုံးလွှမ်းနေသည့် သူ့ရှေ့က လူများကို ကြည့်ရင်း သူ့မျက်ခုံးများက ထိန်းချုပ်၍မရနိုင်လောက်အောင် တုန်ယင်နေသည်။

နောက်တဒင်္ဂ၌ ဥပဒေစိုးမိုးရေးခန်းမအပြင်ဘက်မှ နောက်ထပ်ကြွေးကြော်သံတစ်သံ ပေါ်လာသောအခါ ခန်းမသခင်၏ အမူအရာက ထိတ်လန့်မှုသို့ ကူးပြောင်းသွားပြီး ကြောက်ရွှံ့နေသည့် ငှက်ကလေးတစ်ကောင်ပမာ ကျယ်လောင်စွာအော်လိုက်၏။

"ဘယ်သူထပ်လာတာလဲ"

သူ့ဘေးက အကြီးအကဲမှာ ဖြူရော်နေပြီး တုန်ယင်စွာပြောသည်။

"သန့်စင်မိုးမျှော်စင်ရဲ့တံခါးစောင့်၊ အကြီးအကဲဖန်းပါ...."

ဒါကိုကြားသော် ဥပဒေစိုးမိုးရေးခန်းမ၏ ခန်းမသခင်က ဒူးညွတ်လုနီးပါးပင်ဖြစ်သွားရသည်။ ဘေးကလူများ၏ ထောက်ကူမှုကြောင့်သာမဟုတ်ပါက သူပြိုလဲကျသွားလောက်သည်။

သန့်စင်မိုးမျှော်စင်က မူလမီးလျှံအမျှင်စလေးတစ်ခုလုံးကို ဖိနှိပ်ထားသည်။

အကြီးအကဲဖန်းကြောင့်သာမဟုတ်ပါက ‌သန့်စင်မိုးမျှော်စင်အထဲက မူလမီးလျှံက ထိန်းချုပ်၍မရနိုင်ဖြစ်သွား‌ပေလိမ့်မည်။

သာမန်ကျောင်းသားများက မသိသော်လည်း ခန်းမသခင်တစ်ဦးအဖြစ် အကြီးအကဲဖန်းက ဝိဉာဉ်အနှစ်သာရကျောင်းတော်၌ ဘာကိုကိုယ်စားပြုသလဲဆိုတာ သူကောင်းကောင်းနားလည်သည်။ ဒါ့အပြင် ဒုဌာနမှူးပင်လျှင် သူ့ကို လေးစားစွာ ဆက်ဆံရသည်။

ခန်းမသခင် တုန်ယင်နေသည့်လက်အစုံနှင့် အသံလွင့်ကျောက်စိမ်းဆွဲသီးကို ထုတ်ယူလိုက်၏။ အရေးပါသည့်ပုဂ္ဂိုလ်များစွာ ရောက်လာသဖြင့် ဒါက ဥပဒေစိုးမိုးရေးခန်းမမှ ခန်းမသခင်တစ်ဦးဖြစ်သည့် သူကိုယ်တိုင်ကိုင်တွယ်နိုင်သော အရာတစ်ခုမဟုတ်တော့ပါ။

"ဒုတိယအကြီးအကဲ...ဒုတိယအကြီးအကဲ၊ အဲမှာရှိနေလား"

ထပ်တလဲလဲခေါ်နေသည့်အသံများအား ဖြေဆိုသူမရှိလေရာ ခန်းမသခင်နားထဲ ၀င်နေသည့်အသံတိုင်းက ပို၍တုန်လှုပ်ဖွယ်ရာကောင်းပြီး လေးလံနေသည်။

တဖြည်းဖြည်း ခန်းမသခင် နောက်ဆုံးတွင် လက်လျှော့လိုက်ပြီး သူ့မျက်လုံးများက ငေးငိုင်နေသည်။

ဤလူများသာ၀င်လာမည်ဆိုပါက ဒုတိယအကြီးအကဲ သူ့မျက်နှာကို ပြ၍မရတော့တာကို သူသိပါသည်။

ရိုးရှင်းစွာဆိုရပါက ဒုတိယအကြီးအကဲမှာ သူ့ကိုယ်သူလွတ်မြောက်အောင် လုပ်နိုင်ခဲ့သော်လည်း ဥပဒေစိုးမိုးရေးခန်းမ၏ ခန်းမသခင်ဖြစ်သည့်သူကမူ စတေးခံလက်ကိုင်တုတ်တစ်ခုဖြစ်လာရသည်။

ခန်းမသခင် မုဖူရှန်းနှင့် ကျန်သောသူများအား ကြည့်လိုက်စဉ် သူ့မျက်လုံး၌ တက်ကြွသည့်အရိပ်အယောင်တစ်ခုပေါ်လာပြီး အလျင်စလိုပင်ပြောသည်။

"ရပ်၊ အခုချက်ချင်းရပ်တော့"

အရာရှိများမှာရပ်သွားကာ အံ့ဩသင့်နေကြပြီးနောက် သူတို့၏ သံဆူးကျာပွတ်များအား သိမ်းဆည်းရင်း ဘေးသို့ဆုတ်လိုက်ကြ၏။

ရှောင်ဟိုင် ကြိုးစားရုန်းကန်ကာ မျက်ခုံးပင့်ရင်း ခန်းမသခင်ကို လှောင်ပြောင်နေသည့် အကြည့်ဖြင့် ကြည့်လိုက်သည်။ သူ့၏ သွေးစွန်းနေသည့်မျက်နှာက စူးရှသည့် အပြုံးနှင့်အတူ ကျုံ့သွားသည်။

"ဘာလို့ရပ်လိုက်တာလဲ၊ လုပ်စမ်းပါ၊ နောက်ထပ်အားနည်းနည်းထည့်လိုက်စမ်းပါ၊ ဒါက ကျုပ်ခန္ဓာအတွက် မလုံလောက်သေးဘူး"

ခန်းမသခင်မှာ ရှေ့တိုးလာပြီး ချက်ချင်းဆိုသလို ဆေးလုံးအများအပြားကို ထုတ်ယူကာ ဖော်လန်ဖားအပြုံးဖြင့် သူတို့အား ကမ်းလှမ်းလာသည်။

"ဒါတွေအားလုံးကငါ့အမှားပါ၊ ဒီကိစ္စက ရှုပ်ထွေးလွန်းတော့ ငါပြန်ရှင်းပြဖို့လိုတယ်၊ ဒါပေမယ့် အခု မင်းတို့က တကယ့်အပြစ်ကျူးလွန်သူတွေမဟုတ်ဘူးဆိုတာ ငါယုံပါပြီ"

ရှောင်ဟိုင်လက်ဝှေ့ယမ်းကာ ဆေးလုံးများအား ပစ်ချလိုက်ပြီးနောက် နှာခေါင်းရှုံ့သည်။

"အရမ်းနောက်ကျသွားပြီ၊ စစ်ဆေးမှုစတင်ကတည်းက ကျုပ်တို့ပါးစပ်ကနေ ရလဒ်တစ်ချို့တော့ ရှိလာရမှာပဲလေ"

ဒီအခိုက်အတန့်၌ ဥပဒေစိုးမိုးရေးခန်းမ၏ တံခါးအလယ်တစ်နေရာက မီးတောက်အမျှင်စများနှင့်အတူ စတင်ကျုံ့လာသည်။

နောက်တစ်စက္ကန့်၌ မီးတောက်များ ထိုးတက်လာပြီး တံခါးများက မီးရှို့ခံလိုက်ရသည်။

မုတ်ဆိတ်ထူထူနှင့် အကြီးအကဲတစ်ဦး ဖြည်းဖြည်းချင်း၀င်လာပြီး အထင်အမြင်သေးစွာ နှာခေါင်းရှုံ့သည်။

"ဥပဒေစိုးမိုးရေးခန်းမက ဒီလိုပုံစံပြောင်းသွားပြီဆိုမှတော့ ဆက်လက်တည်ရှိနေစရာမလိုတော့ဘူး"