ဒီလူတွေက ကိုယ့်စီလာတာ ဖြစ်နိုင်တယ်

" မကြာသေးခင်က အမည်မသိအုပ်စုတစ်စု ကျန်းကောပြည်နယ်ထဲကို ဝင်လာတဲ့အကြောင်း လျှို့ဝှက်အစီရင်ခံစာ ရထားတယ်။ သူတို့ရဲ့ လှုပ်ရှားမှုတွေက ထူးဆန်းလွန်းနေတော့ လုပ်ဖော်ကိုင်ဖက်တချို့နဲ့ ဒီကိစ္စကို စုံစမ်းစစ်ဆေးဖို့ ကျွန်မကို အမိန့်ပေးခဲ့တာ "

" ကောင်းတယ်၊ ကိုယ့်နေရာကို လာခဲ့လိုက်။ ကိုယ်တို့တွေ့ပြီး စကားပြောကြမယ် "

ယဲ့ဖန်သည် ချန်းဖေးအယ်ကို လိပ်စာပေးပြီးနောက် Feng Shaokunကို ဖုန်းဆက်ပြီး အလောင်းကို ဖြေရှင်းရန် တောင်းဆိုလိုက်သည်။

ထို့နောက် ကျူးရှောင်ကျောင်းနှင့်အတူ ကားဖြင့် ထွက်ခွာသွားခဲ့သည်။

သူတို့နှစ်ယောက် ငှားထားသည့် ခြံသို့ အမြန်ပြန်သွားတဲ့အခါ ဖန်းကျန်းဝူသည် ခြံဝင်းထဲရှိ ပန်းများကို ရေလောင်းနေသည်။

ယဲ့ဖန် ပြန်လာသည်ကို မြင်ပြီး ကောင်မလေးမှာ သူမသခင်ကို ပွေ့ဖက်ချင်၍ စိတ်လှုပ်ရှားစွာ ပြေးသွားသည် ။

သို့သော် ကျူးရှောင်ကျောင်းသည် အနောက်မှ လိုက်လာသည်ကို သတိပြုမိပြီး ထိုစိတ်ကို စွန့်လွှတ်ခဲ့သည်။

" သခင်ကြီး၊ ဒီနှစ်ရက်မှာ ပျော်စရာတွေ ကြုံခဲ့လား "

ဖန်းကျန်းဝူသည် ပန်းရေလောင်းလျက် စိတ်လှုပ်ရှားစွာ မေးသည်။

" အစ်မတို့တောင်ပေါ်ကို ရောက်တဲ့ ပထမဆုံးနေ့မှာပဲ တောဝက်နဲ့တွေ့ခဲ့တာ .... "

ကျူးရှောင်ကျောင်းသည် ယဲ့ဖန်ကို တွန်းဖယ်ပြီး လွန်ခဲ့သည့် နှစ်ရက်အတွင်း သူမ၏အတွေ့အကြုံကို ဖန်းကျန်းဝူ

အား ပြောပြသည်။

သူမသည် အလွန်ပုံဖော်တတ်ပြီး ဖြစ်စဉ်တစ်ခုလုံးကို ကွက်ကွက်ကွင်းကွင်း ဖော်ပြနေခဲ့သည်။

မျက်လုံးနှင့်မြင်ရသည်ထက် ပိုစိတ်လှုပ်ရှားစရာကောင်းနေသည်။

ထိုစကားကို ကြားပြီး ဖန်းကျန်းဝူသည် ရွှင်မြူးစွာ ယဲ့ဖန်ကို စိုက်ကြည့်နေသည်။

" အရမ်းပျော်စရာကောင်းတာပဲ။ ဘာလို့ ကျန်းဝူမခေါ်တာလဲ။ ဟွန့်၊ အရမ်းစိတ်ဆိုးတယ် "

" နောက်တစ်ခေါက်ပေါ့၊ နောက်တစ်ခေါက် သေချာပေါက် "

ယဲ့ဖန် အမြန်ပြန်ဖြေသည်။

သူတို့သုံးယောက် စကားစမြည်ပြောနေကြစဉ် နောက်ဆုံး၌ ချန်းဖေးအယ် ရောက်လာသည်။

သူမအနောက်ကျော၌ ကျောင်းလွယ်အိတ်ကို လွယ်ထားသည့် ကောင်လေးတစ်ယောက်လည်း ပါသည်။

သူသည် ကျောင်းသားနှင့် ပိုတူသည်။

ချန်းဖေးအယ်သည် ကျူးရှောင်ကျောင်းနှင့် ဖန်းကျန်းဝူကို မြင်သောအခါ ယဲ့ဖန် ကို ပို၍ပင် မထီမဲ့မြင်ပြုလာသည်။

ဒီကောင်က ပလေးဘွိုင်ပဲ။

မိန်းမလှပတွေတိုင်းက သူ့ကို အမြဲဝိုင်းရံနေတာ။

ဖန်းကျန်းဝူကို ချန်းဖေးအယ် သိသည်။

သူမကို ဂျပန်၌ မကြာခဏတွေ့ဖူးသည်။

သို့သော် ကျူးရှောင်ကျောင်းကို သူမ ပထမဆုံးအကြိမ် တွေ့ဖူးခြင်းဖြစ်သည်။

သူမသည် ဖန်းကျန်းဝူကဲ့သို့ လှပချောမောသည်။

ဒီကောင်က အမြင်တော့ရှိသားပဲ။

ကျူးရှောင်ကျောင်းသည် ချန်းဖေးအယ် ကိုတွေ့သောအခါ ခြိမ်းခြောက်မှုကို ခံစားခဲ့ရသည်။

သူမအရှေ့ရှိ ကောင်မလေးသည် ရုပ်ရည်အရ သူမကို မရှုံးပေ။

သူမသည် ရဲရင့်ပြီး သူရဲကောင်းဆန်သည့် လှပသော အလှတရားကို ပိုင်ဆိုင်ထားသည်။

မိန်းကလေးတစ်ယောက်အနေဖြင့် ဆဌမအာရုံခံစားမှုအရ ဤမိန်းကလေးနှင့် ယဲ့ဖန်ကြားတွင် ပြောမပြနိုင်သော လျှို့ဝှက်ချက်အချို့ရှိမည်ဟု သူမ ခံစားခဲ့ရသည်။

ကောင်မလေးနှစ်ယောက်သည် တစ်ယောက်ကိုတစ်ယောက် ကြည့်ကာ ယဲ့ဖန်ကို တချိန်တည်း စိုက်ကြည့်လာသည်။

လေထုမှာ အနည်းငယ် ထူးဆန်းနေသည်။

" ဟားဟားဟား၊ ကြိုဆိုပါတယ် "

ယဲ့ဖန် ခြောက်ကပ်စွာရယ်ပြီး ချန်းဖေးအယ်ကို နှုတ်ဆက်သည်။

ချန်းဖေးအယ်၏ အမူအရာမှာ အေးစက်လွန်းသည်။

သူမအနောက်မှလူကို မိတ်ဆက်ပေးသည်။

အဆိုပါလူမှာ လုံခြုံရေးအဖွဲ့မှ ခေါ်ယူခြင်းခံထားရသည့် သတင်းအချက်အလက်ဆိုင်ရာ အထူးကျွမ်းကျင်သူ သန်းယောင် ဖြစ်သည်။

သူသည် ငယ်ရွယ်ပါသော်လည်း ရှစ်မူတက္ကသိုလ် အီလက်ထရွန်နစ်သတင်းအချက်အလက်ဌာနမှ PhDကျောင်းသားဖြစ်သည်။

ထိုကောင်လေး၏ဘွဲ့ကို ထုတ်ဖော်လိုက်သောအခါတွင် တက္ကသိုလ် ကောင်းစွာမတက်ရသေးသော ယဲ့ဖန်သည် သူ့ကိုယ်သူ ရှက်သွားရသည်။

" မင်္ဂလာပါ၊ မင်္ဂလာပါ "

ယဲ့ဖန်သည် သူ့လက်ကို ဆန့်လိုက်ပြီး သန်းယောင်၏လက်ကို ဆွဲလိုက်သည်။

သန်းယောင်သည် စကားလုံးအပြောမတတ်သူဖြစ်၍ အဓိကအကြောင်းကိုသာ ဦးတည်သည်။

" ပြောခဲ့တဲ့ ဖုန်းက ဘယ်မှာလဲဘ"

ယဲ့ဖန်သည် ချက်ချင်းပင် အသေခံစစ်သည်တော်၏ ဖုန်းကို အိတ်ကပ်ထဲမှ ထုတ်ကာ သူ့ကို ပေးလိုက်သည်။

သန်းယောင်သည် ဖုန်းကိုလက်ခံရရှိပြီးနောက် စကားများစွာ မပြောခဲ့ပေ။

ကျောပိုးအိတ်ထဲမှ လက်ပ်တော့တစ်လုံးကို ထုတ်ပြီး ဆောင်ရွက်ရန် ထောင့်တစ်နေရာ၌ နေခဲ့သည်။

ယဲ့ဖန်သည် သူ့ကို စိတ်မ၀င်စားဘဲ ချန်းဖေးအယ်ကို သူတို့တာဝန်အကြောင်း မေးသည်။

" ဒီလူတွေက လွန်ခဲ့တဲ့ တစ်ပတ်လောက်က ကျန်းကောပြည်နယ်ကို ဝင်လာတယ်။ ကျွန်မတို့ရဲ့ စုံစမ်းစစ်ဆေးမှုအပြီး ဒီလူတွေရဲ့ အထောက်အထားအချက်အလက်တွေ သိရပေမဲ့ အဲ့တာတွေက အတုတွေ "

" ကျန်းကောပြည်နယ်ထဲ ဝင်ပြီးတော့ သူတို့ ပျောက်သွားတယ် ...... "

ချန်းဖေးအယ်သည် သံသယရှိသူများ၏ အကြောင်းကို ပြောခဲ့သည်။

ထိုသည်ကို ယဲ့ဖန် ကြားပြီးနောက် သူ မတတ်နိုင်ဘဲ မျက်မှောင်ကြုတ်သည်။

" သူတို့က ကိုယ့်စီလာတာ ဖြစ်နိုင်တယ် "

" ရှင့်မှာ စိတ်ရောဂါရှိတာလား။ ကမ္ဘာပေါ်က လူတိုင်းက ရှင့်ကို ဒုက္ခပေးချင်နေတယ်လို့ ထင်နေလား "

ချန်းဖေးအယ်သည် လှောင်ပြောင်ရန် လိုက်သည်။

" ဒါဆို ကိုယ် ဒီနေ့ အလိုက်ခံရတာကို မင်းဘယ်လိုရှင်းပြမှာလဲ "

" တစ်ဖက်သူက သူ မလွတ်မြောက်နိုင်ဘူးဆိုတာ သိလိုက်တာနဲ့ အဆိပ်သောက်ပြီး သတ်သေသွားတယ်။ ဒါက သာမန်အဖွဲ့အစည်းတစ်ခု ဖြစ်နိုင်ပါ့မလား "

ယဲ့ဖန်သည် ချက်ချင်းပင် မေးခွန်းထုတ်လိုက်သည်။

ချန်းဖေးအယ် မျက်မှောင်ကြုတ်လိုက်သည်။

" အခုပြောနေတာက တကယ် သံသယဖြစ်စရာပဲ။ ခန္ဓာကိုယ်က ဘယ်မှာလဲ။ ဒီလူရဲ့ အထောက်အထားကို စုံစမ်းကြည့်ချင်တယ် "

" ကိုယ့်သူငယ်ချင်းက အဲ့တာကို ကူညီဖြေရှင်းပေးထားတယ်။ အလောင်းကို လိုအပ်ရင် သူ့ကို ဆက်သွယ်လိုက် "

ယဲ့ဖန်သည် သူမကို Feng Shaokun၏ အချက်အလက်အား ချက်ချင်း ပေးလိုက်သည်။

သူတို့နှစ်ယောက် အချင်းချင်း တိုးတိုးပြောနေချိန်မှာ သန်းယောင်မှ သူတို့အနောက်၌ တိတ်တဆိတ် ပေါ်လာသည်။

" ဒေတာတွေကို ပြန်ယူပြီးပြီ "

သူပြောပြီးသည်နှင့် ယဲ့ဖန်ထံသို့ ဖုန်းပေးလိုက်သည်။

" ဒီလောက်မြန်လား "

ယဲ့ဖန် အနည်းငယ် အံ့သြသွားသည်။

သူသည် ချန်းဖေးအယ်နှင့် စကားပြောနေသည်မှာ ငါးမိနစ်သာရှိသေး၍ ဒေတာများကို အပြည့်အဝ ပြန်လည်ယူနိုင်မည်ဟု သူ မမျှော်လင့်ထားပေ။

" လက်တွေရှိသရွေ့ လုပ်နိုင်တယ် "

သန်းယောင်မှ နှိမ့်ချစွာ ပြန်ပြောသည်။

" ဟားဟားဟား၊ လူငယ်လေး၊ မင်းမှာ တောက်ပတဲ့ အနာဂတ်ရှိတယ် "

ယဲ့ဖန်သည် သူ့ကို လူအိုကြီးသဖွယ် ချီးကျူးလေသည်။

ချန်းဖေးအယ်သည် စကားမပြောနိုင် ဖြစ်သွားရသည်။

သန်းယောင်က သူ့ထက် အသက်ကြီးတာကို လူငယ်လေးလို့ ခေါ်နေတာလား။ ဒါက ရယ်စရာကောင်းလွန်းတယ်။

ယဲ့ဖန် ဖုန်းကိုယူပြီးနောက် ဖုန်းအတွင်းမှ မက်ဆေ့ခ်ျများကို စတင်ဖတ်သည်။

ဤဖုန်းထဲ၌ အဆက်အသွယ်တစ်ခုသာ ရှိပြီး မက်ဆေ့ချ်များအားလုံးကို ထိုတစ်ဦးတည်းဖြင့်သာ အပြန်အလှန် ပေးပို့ခဲ့သည်။

" သူတို့က တောကြီးထဲ ဝင်နေပြီ။ သူတို့နောက်ကို လိုက်ဖို့ အဆင်မပြေဘူး "

"ရော်ဂျာ၊ စောင့်နေလိုက် "

" သူတို့ တောထဲက ထွက်သွားပြီ။ သူတို့နောက်ကို လိုက်နေတယ် "

" ရော်ဂျာ၊ သေချာပုန်း "

" မန်းတောင်ကျောက်မီးသွေးတွင်းနားမှာ ရွှေတွင်းတစ်ခုကို တွေ့ပြီး တစ်ယောက်ယောက်နဲ့ ရန်ဖြစ်နေတယ် ...... "

ယဲ့ဖန်သည် စာများကို ဖတ်ပြီးနောက် အသေခံလူသည် လွန်ခဲ့သည့်နှစ်ရက်အတွင်း သူ၏လုပ်ရပ်များကို ထိုလျှို့ဝှက်ဆန်းကြယ်သောလူထံသို့ သတင်းပို့ခဲ့ကြောင်း သဘောပေါက်လိုက်သည်။

အချက်အလက်များကို ဖတ်ပြီးသော်လည်း နောက်ကွယ်မှလူမှာ မည်သူဖြစ်သည်ကို မဆုံးဖြတ်နိုင်သေးချေ။

ခဏတာ တုံ့ဆိုင်းသွားပြီးနောက် ဖုန်းဆက်လိုက်သည်။

" တီ၊ တီ၊ တီ ......... "

အနည်းငယ်ကြာပြီးနောက် တစ်ဖက်မှ ဖုန်းချလိုက်သည်။

ယဲ့ဖန် ထပ်ခေါ်သောအခါ ထိုဖုန်းနံပါတ်သည် အသုံးမပြုသောနံပါတ်ဖြစ်ကြောင်း အသံပေါ်လာသည်။

ယဲ့ဖန် မတတ်နိုင်ဘဲ မျက်မှောင်ကြုတ်လိုက်သည်။

တစ်ဖက်ကလူမှာ အလွန်သတိရှိပုံရသည်။

နောက်ယောင်ခံလိုက်သူမှာ တစ်စုံတစ်ခုဖြစ်သွားသည်ကို သိကာ အဆက်အသွယ်ဖြတ်လိုက်ခြင်း ဖြစ်မည်။

ဤရန်သူမှာ အတော်လိမ္မာပါးနပ်ပုံရသည်။

ချန်းဖေးအယ်သည် စာကိုဖတ်ပြီးနောက် သူမ၏မျက်ခုံးများ တွန့်သွားသည်။

" ဒီနှစ်ရက်အတွင်း ရှင့်ရဲ့လှုပ်ရှားမှုတိုင်းကို တစ်ဖက်လူတွေက စောင့်ကြည့်နေပုံရတယ်။ ဒီလူတွေ ဘာလုပ်ဖို့ ကြိုးစားနေကြတာလဲ "

" သူတို့ရဲ့ စကားဝိုင်းထဲက အကြောင်းအရာတွေအရ သူတို့က ကိုယ်တို့ရဲ့ စူးစမ်းရှာဖွေရေးကို အရမ်းစိတ်ဝင်စားတာ ဖြစ်မယ် "

ယဲ့ဖန်သည် ရေတစ်ငုံသောက်လိုက်ပြီး အဓိကအချက်ကို အမြန်ထောက်ပြလိုက်သည်။

" ဒါပေမယ့် ရှင်တို့တွေ စူးစမ်းရှာဖွေနေကြတဲ့အရာတွေ အားလုံးက သတ္တုသွေးကြောတွေလေ။ အဲ့တာက မရှားပါဘူး။ တစ်ဖက်သူက ဒီလောက်ထိလုပ်ဖို့ လိုအပ်လို့လား "

ချန်းဖေးအယ် နားမလည်နိုင် ဖြစ်နေသည်။

" တစ်ဖက်သူရဲ့ ရည်ရွယ်ချက်ကို အရင်မတွေးနဲ့။ အခု အဓိကက သူတို့ ဘာဆက်လုပ်မယ်ဆိုတာကို အဖြေရှာဖို့ပဲ "

ယဲ့ဖန် ခွက်ကို ချလိုက်ပြီး သူ့မျက်လုံးများ မှေးကျဉ်းသွားသည်။

ချန်းဖေးအယ် ခဏတာ စဉ်းစားပြီး သူ့မျက်လုံးများ ရုတ်တရက် တောက်ပသွားသည်။

" ရှင်ဆိုလိုတာက စူးစမ်းရှာဖွေရေးအဖွဲ့ကို နောက်တစ်ခေါက် သွားခိုင်းမှာလား "

" တော်တယ် "

ယဲ့ဖန် ချက်ချင်း လက်မထောင်ပြလိုက်သည်။

ချန်းဖေးအယ် မျက်လုံးပြူးသွားသည်။

" ဒါက ရိုးရှင်းတဲ့ အကြောင်းတရားနဲ့ အကျိုးသက်ရောက်မှု ဆက်စပ်ပုံလေ။ ဒါကိုမှ ရှင်းမပြနိုင်ရင် အချည်းနှီး နေထိုင်ခဲ့တာ မဟုတ်ဘူးလား "

ယဲ့ဖန်သည် သူမနှင့် ဆက်၍ နောက်ပြောင်မနေဘဲ ဖြည်းညှင်းစွာ ထရပ်လိုက်သည်။

" ကိုယ်မမှားရင် ဒီစူးစမ်းရှာဖွေရေးမှာ ပါဝင်ခဲ့တဲ့ အဖွဲ့ဝင်တွေကို သူတို့ တိုက်ခိုက်နိုင်တယ်။ ကိုယ်တို့ အခု လှုပ်ရှားရမယ်။ မင်းရဲ့ပူးပေါင်းဆောင်ရွက်မှုကို ကိုယ်လိုတယ် "