အရင်းအမြစ်ကို စုံစမ်းခြင်း

"ဟမ်"

ထိုလူသည် သူ၏နားကိုပင်မယုံနိုင်ဖြစ်သွားပြီး သူ၏မျက်နှာပေါ်မှအဆီများသည် တုန်ခါနေကာ အသိစိတ်လွတ်မတတ် ကြောက်လန့်နေသည်မှာ ထင်ရှားသည်။

"ကျင့်ကြံသူ၊ ခင်ဗျား ဘာလုပ်ချင်တာလဲ၊ ကျွန်တော်တို့ကြားမှာ ဘာရန်ငြိုးမှမရှိပါဘူး၊ အရာအားလုံးကို ညှိနှိုင်းဆွေးနွေးနိုင်ပါတယ်"

ရွှယ်အန်းက ခေါင်းညိတ်သည်။

"မင်းပြောတာမှန်တယ်၊ ဒါက ငါ့ရဲ့အတွေးပဲ၊ ဒါကြောင့် ငါမင်းကိုမေးမယ်၊ မင်းတို့သွေခေါင်းခွံအဖွဲ့က အဲ့ဒီမူလစွမ်းအင်တွေ အားလုံးကို ဘယ်သူ့ကိုရောင်းခဲ့သလဲ၊ ပြီးတော့ ခုနက ပုံရိပ်က ဘယ်သူလဲ"

ဤသည်ကိုကြားသောအခါ သွေးခေါင်းခွံပင်လယ်ဓားပြအဖွဲ့၏ ဥက္ကဋ္ဌဖြစ်သူ လူသိန်းပေါင်းများစွာ၏ အသက်နှင့်သေခြင်းတရားကို ချယ်လှယ်နိုင်သော အာဏာရှိလူသည် ချွေးစေးများပြန်လာသည်။

"ကျင့်ကြံသူ၊ ခင်ဗျား ဘာလို့ဒါကိုမေးတာလဲ၊ ပြီးတော့ ဒီကိစ္စမှာ ဝင်မပါတာက အကောင်းဆုံးလို့ ကျွန်တော်ခင်ဗျားကို အကြံပေးချင်ပါတယ်"

ရွှယ်အန်းက ခပ်ပေါ့ပေါ့ပြန်ဖြေသည်။

"ဒါဆို မင်းက မပြောချင်ဘူးဆိုတဲ့သဘောလား"

ဥက္ကဋ္ဌသည် ပြောတော့မည်အပြု

ရွှယ်အန်း၏မျက်လုံးများထဲတွင် တောက်ပသောအလင်းတန်းတစ်ခု လျှပ်ပြက်သွားပြီး ပင်လယ်သမုဒ္ဒရာကဲ့သို့ ကျယ်ပြောသော သူ၏နတ်အာရုံသည် တစ်ဖက်လူ၏စိတ်ထဲသို့ တိုက်ရိုက်ကျူးကျော်ဝင်ရောက်သွားသည်။

ခဏအကြာတွင် ရွှယ်အန်း၏မျက်နှာ အမူအရာသည် မည်းမှောင်သွားပြီး သူ၏နတ်အာရုံကို ပြန်ရုပ်သိမ်းလိုက်သည်။

ဥက္ကဋ္ဌ၏အကြည့်သည် ရှုပ်ထွေးနေရာမှ တဖြည်းဖြည်း ကြည်လင်လာပြီးနောက် ရွှယ်အန်းကို တုန်လှုပ်စွာ စိုက်ကြည့်နေသည်။

သူ ဘာဖြစ်သွားသည်ကို ရှင်းရှင်းလင်းလင်း သိနေသည်။

ရွှယ်အန်းသည် သူ့ကိုကြည့်ကယ တိတ်ဆိတ်နေသည်။ အဘယ်ကြောင့်ဆိုသော် သူလိုချင်သောအရာကို ဥက္ကဋ္ဌ၏မှတ်ဉာဏ်ထဲတွင် ရှာဖွေတွေ့ရှိပြီးဖြစ်သောကြောင့်ဖြစ်သည်။

သို့သော် ထူးဆန်းသည်မှာ အရာများစွာသည် ထူထဲသောမြူခိုးများဖြင့် ဖုံးလွှမ်းနေပြီး ယခင်ကပုံရိပ်၏အသွင်အပြင်ကို ရှင်းရှင်းလင်းလင်း မမြင်နိုင်ခြင်းဖြစ်သည်။

ရွှယ်အန်းသည် အစွမ်းထက်သော နတ်ဘုရားစွမ်းရည်များရှိသူတစ်ဦးသာ် သူထိတွေ့ခဲ့သူများ၏ မှတ်ဉာဏ်များကို ဝင်ရောက်စွက်ဖက်ခဲ့သည်ကို နားလည်လိုက်သည်။

သို့သော် မည်သို့ပင် စွက်ဖက်နေပါစေ ရွှယ်အန်းသည် နောက်ဆုံးတွင် အရေးကြီးဆုံးသော သဲလွန်စကို ရှာဖွေတွေ့ရှိခဲ့သည်။

"ကွေ့ယီကြယ်စုလား"

ရွှယ်အန်း ဤသို့ပြောသည်ကိုကြားသောအခါ ဥက္ကဋ္ဌသည် ပို၍ပင် ပြင်းထန်စွာ တုန်လှုပ်သွားပြီး သူ၏မျက်နှာပေါ်တွင် ဖော်လံဖားယားသော အပြုံးတစ်ခု အလိုအလျောက် ပေါ်လာသည်။

"ကြီး... ကြီးမြတ်သောသခင်၊ အခု သခင်လိုချင်တာကို တွေ့ပြီဆိုတော့ ကျွန်တော့်ကိုကော..."

ရွှယ်အန်း၏ မျက်လုံးများထဲတွင် သတ်ဖြတ်လိုသော အရိပ်အယောင်တစ်ခု လျှပ်ပြက်သွားပြီး ဥက္ကဋ္ဌ၏ခေါင်းသည် ပေါက်ကွဲသွားသည်။

ရွှယ်အန်းသည် သူ၏မှတ်ဉာဏ်ထဲတွင် အလွန်အမင်း ရက်စက်ကြမ်းကြုတ်သော မြင်ကွင်းများစွာကို မြင်တွေ့ခဲ့ရသည်။

ဤသွေခေါင်းခွံဥက္ကဋ္ဌ၏ လုပ်ရပ်များသည် လုံးဝကို ဆိုးရွားရွံရှာဖွယ်ကောင်းပြီး သာမန်လူများသာ နေထိုင်သော ဂြိုဟ်အချို့ကို သတ်ဖြတ်ရှင်းလင်းရန်ပင် အမိန့်ပေးခဲ့သည်။

ထို့အပြင် ဤသွေခေါင်းခွံလူများသည် သက်ရှိဂြိုဟ်များ၏ မူလစွမ်းအင်ကို လုယက်ရဲသည်ဟူသောအချက်ကပင် သူတို့သေသင့်ကြောင်း ပြနေသည်။

ဤအရာအားလုံးကို လုပ်ဆောင်နေစဉ် ရွှယ်အန်းသည် သူ၏သမီးနှစ်ယောက်၏ နတ်အာရုံကို ကာကွယ်ထားပြီးဖြစ်သောကြောင့် သူတို့မည်သည့်အရာမှ မခံစားမိခဲ့ရပေ။

အားလုံးပြီးစီးသွားသောအခါ ရွှယ်အန်းသည် သူ၏ခေါင်းကိုလှည့်ကာ ရွှီကောင်း ကို ကြည့်လိုက်သည်။

ရွှီကောင်း သည် တစ္ဆေကဲ့သို့ ဖြူဖျော့နေပြီး ခြေလှမ်းအနည်းငယ်နောက်ဆုတ်ကာ ထစ်ထစ်ငေါ့ငေါ့ဖြင့် ပြောလိုက်သည်။

"ကြီး... ကြီးမြတ်သောသခင်"

ရွှယ်အန်းက ပြုံးလိုက်သည်.

"စိတ်မပူပါနဲ့၊ ငါမင်းကိုမသတ်ပါဘူး, ဘာပဲဖြစ်ဖြစ် မင်းက ဘာမကောင်းမှုမှ မလုပ်ခဲ့ဘူးလေ"

ရွှီကောင်း သည် သက်ပြင်းတစ်ချက်ချလိုက်သည်။

"ဒါပေမဲ့ တခြားလူတွေကတော့..."

ထိုအချိန်တွင် ဌာနချုပ်တွင် ဖြစ်ပျက်ခဲ့သမျှသည် နောက်ဆုံးတွင် ပင်လယ်ဓားပြအဖွဲ့တစ်ခုလုံးကို အချက်ပေးလိုက်သကဲ့သို့ ဖြစ်သွားသည်။

လက်နက်အပြည့်အစုံတပ်ဆင်ထားသော မရေမတွက်နိုင်သော အစောင့်များသည်လည်း အပြေးအလွှား ရောက်ရှိလာကြသည်။

ရွှယ်အန်း ယခင်က တိုက်ခိုက်ခဲ့သော လူငယ်သည် တစ်နည်းနည်းဖြင့် လူအုပ်ထဲသို့ ပေါင်းစည်းလာပြီး ယခုအခါ သတ်ဖြတ်လိုသော ဆန္ဒအပြည့်နှင့် ဒေါသတကြီး အော်ဟစ်နေသည်။

"ဒီကောင်တွေက ဌာနချုပ်ကို ကျူးကျော်ဝင်ရောက်လာတာ၊ သူတို့ကိုသတ်စမ်း"

ရွှီကောင်း ကို မှတ်မိသော လူအများအပြားကလည်း သူ့ကို ကျိန်ဆဲကြသည်။

"ရွှီကောင်း... မင်းက ပြင်ပလူတွေနဲ့ပူးပေါင်းပြီး ကိုယ့်လူကိုယ်ပြန်တိုက်ခိုက်တယ်ဟုတ်လား၊ သစ္စာဖောက်ပဲ"

"သောက်ကောင် ဒီတစ်ခါတော့ မင်းသေပြီပဲ"

ဤအော်ဟစ်သံများကြားတွင် ရွှီကောင်း သည် ပိုလို့ပင် ကြောက်လန့်လာပြီး မျက်စိမှိတ်ထားသည်အထိပင် စိတ်ပျက်အားငယ်သွားသည်။

အဘယ်ကြောင့်ဆိုသော် ထိုအချိန်တွင် မရေမတွက်နိုင်သော သေနတ်ပြောင်းများသည် ပတ်ဝန်းကျင်နံရံများနှင့် မျက်နှာကျက်များပေါ်တွင် ပေါ်ထွက်လာပြီး အားလုံးသည် ရွှယ်အန်းနှင့် သူ၏အဖွဲ့ကို ချိန်ရွယ်ထားသောကြောင့်ဖြစ်သည်။

ပြီးပြီ၊ ဒီတစ်ခါတော့ ငါတို့ပြီးပြီပဲ...

ရွှီကောင်း သည် သူ၏နှလုံးသားထဲတွင် ညည်းတွားလိုက်သည်။

သို့သော် ထိုအချိန်တွင် ရွှယ်အန်းက ပြောလိုက်သည်။

"နတ်ဆိုးရှာ‌ဖွေရေးဓား၊ သတ်စမ်း"

ဘုန်း!

မရေမတွက်နိုင်သော ဓားအလင်းတန်းများသည် ရွှယ်အန်း၏ပတ်လည်တွင် ပေါ်ထွက်လာသည်။

ထိုအချိန်မှာပင် လူများသည်လည်း ပစ်ခတ်လိုက်ကြသည်။

စွမ်းအင်မြင့်ရောင်ခြည်တန်းများသည် နံရံတွင်တပ်ဆင်ထားသော သေမင်းရောင်ခြည်လက်နက်များနှင့် ပေါင်းစပ်ကာ မထိုးဖောက်နိုင်သော အတားအဆီးတစ်ခုအဖြစ် ရွှယ်အန်းနှင့် အခြားသူများထံသို့ ပြေးဝင်လာသည်။

ဤသို့ပြင်းထန်သော တိုက်ခိုက်မှုများအောက်တွင် သာမန်ရွှေအင်မော်တယ်တစ်ဦးပင် ကြာကြာတောင့်ခံနိုင်မည်မဟုတ်ပေ။

သို့သော် ရွှယ်အန်းသည် မျက်တောင်တစ်ချက်ပင် မခတ်ခဲ့ပေ။

ဓားအလင်းတန်းသည်လည်း ရှေ့သို့ပြေးဝင်သွားပြီးဖြစ်သည်။

ဘုန်း

၎င်းတို့၏တိုက်ခိုက်မှုမှ ကျယ်လောင်သောအသံကြီး ထွက်ပေါ်လာသည်။

ဤစွမ်းအင်မြင့်ရောင်ခြည်များနှင့် အခြားတိုက်ခိုက်မှုများသည် ဓားအလင်းတန်း၏ တိုက်ရိုက်ချေမှုန်းဖျက်ဆီးခြင်းကို ခံလိုက်ရပြီးနောက် ဓားအလင်းတန်းသည် ရန်သူများထံသို့ ပြေးဝင်သွားသည်။

"မဟုတ်ဘူး..."

နာကျင်စွာအော်ဟစ်သံများကြားတွင် မရပ်တန့်နိုင်သော ဓားအလင်းတန်းသည် သူ၏ရှေ့မှလူများကို သတ်ဖြတ်ပြီးနောက် မယုံနိုင်လောက်အောင် မြန်နှုန်းမြင့်ဖြင့် ခံတပ်တစ်ခုလုံးကို ဖြတ်သန်းသွားသည်။

ခဏအတွင်းမှာပင်...

ဓား၏စွမ်းအားအောက်တွင် ဤခံတပ်အတွင်းရှိ လက်တွင်သွေးစွန်းနေသော လူတိုင်း ချေမှုန်းဖျက်ဆီးခြင်းခံလိုက်ရသည်။

အသက်ရှင်ကျန်ရစ်သူများသည် မျက်နှာဖြူဖျော့စွာဖြင့် သူတို့ပတ်လည်မှ အလောင်းများကို စိုက်ကြည့်နေကြပြီး ဘာဖြစ်သွားသည်ကို လုံးဝနားမလည်နိုင်ဖြစ်နေကြသည်။

ရွှီကောင်း သည်လည်း ကြောင်ငေးကြည့်နေသည်။

ရွှယ်အန်းမှာမူ ပြုံးလိုက်သည်။

"ငါပြောပါတယ် ငါမင်းကိုမသတ်ဘူးလို့၊ ပြီးတော့ သေသွားတဲ့သူတွေအားလုံးက သေသင့်တဲ့လူတွေပဲ"

သို့သော် ရွှီကောင်းသည် သူ၏တုန်လှုပ်မှုမှ ပြန်လည်ကောင်းမွန်လာခြင်းမရှိသေးပေ။

ထို့နောက် ရွှယ်အန်းသည် အန်းယန်နှင့် အခြားသူများကို ဌာနချုပ်၏အခန်းများတစ်လျှောက် ဦးဆောင်ခေါ်သွားပြီး ထိုအသင်းခေါင်းဆောင်၏ မှတ်ဉာဏ်များကို အသုံးပြုကာ ရတနာများသိုလှောင်ရန် အထူးအသုံးပြုသော လျှို့ဝှက်ခန်းကို ရှာဖွေတွေ့ရှိခဲ့သည်။

ဤကျယ်ဝန်းသော သိုလှောင်ခန်းသည် ၎င်း လုယက်ခဲ့သော ထူးဆန်းအံ့ဩဖွယ်ရာများနှင့် ရှားပါးရတနာများအားလုံးဖြင့် ပြည့်နှက်နေသည်။

ရွှယ်အန်းသည် ၎င်းတို့ကို တစ်ချက်မျှပင်မကြည့်ဘဲ အရာအားလုံးကို သိုလှောင်ရတနာထဲသို့ တိုက်ရိုက်သိမ်းဆည်းလိုက်သည်။

ထို့နောက် သူသည် ပတ်ဝန်းကျင်ကြယ်တာရာနယ်မြေများ၏ အသေးစိတ်ကြယ်ပြမြေပုံများကို ရှာဖွေတွေ့ရှိခဲ့သည်။

ဤပစ္စည်းသည် အရေးကြီးဆုံးဖြစ်သည်။

သို့သော် ကူးပြောင်းခြင်းယန္တရားတစ်ခုကို ရှာဖွေတွေ့ရှိရန် စိတ်ကူးသည် ပျက်ပြယ်သွားသည်။

သွေးခေါင်းခွံပင်လယ်ဓားပြအဖွဲ့၏ ခေါင်းဆောင်သည် အလွန်သတိကြီးပုံရသည်။

အဘယ်ကြောင့်ဆိုသော် ကူးပြောင်းခြင်းယန္တရားတစ်ခုကိုသာ တည်ဆောက်ပါက ၎င်းသည် အပြန်အလှန်ဖြစ်ရန် လိုအပ်ပြီး အပြင်မှတိုက်ခိုက်ခံရနိုင်သော ပြတင်းပေါက်တစ်ခုကို ဖွင့်ထားသကဲ့သို့ ဖြစ်နေသောကြောင့်ဖြစ်သည်။

ထို့ကြောင့် သူသည် ကူးပြောင်းခြင်းယန္တရားတစ်ခုကို မတည်ဆောက်ခဲ့ခြင်းဖြစ်သည်။

သို့သော် ယခုအခါ ၎င်းရှိသည်ဖြစ်စေ မရှိသည်ဖြစ်စေ ကွာခြားမှုမရှိတော့ပေ။ ဤကြယ်မြေပုံနှင့်အတူ ရွှယ်အန်းသည် သူ၏ခရီးကို ဆက်လက်သွားနိုင်သည်။

ရွှယ်အန်းသည် ကြယ်မြေပုံကို စေ့စေ့စပ်စပ်လေ့လာပြီး လွန်ခဲ့သောနှစ်များက သူကျင့်ကြံခဲ့သော ကြယ်တာရာနယ်မြေကို ရှာဖွေရန် ကြိုးစားသော်လည်း ဝမ်းနည်းစရာမှာ ဤကြယ်မြေပုံ၏ကျယ်ပြန့်မှုသည် လုံလောက်မှုမရှိသည်ကို သူတွေ့ရှိခဲ့သည်။

ဤအချက်ကပင် စကြဝဠာ၏ကျယ်ပြန့်မှုကို ဖော်ပြနေသည်။

ခဏအကြာတွင် ရွှယ်အန်းသည် ကြယ်လှေကို ထုတ်ပြီး သူ၏မိသားစုနှင့်အတူ ယာဉ်ပေါ်သို့တက်ကာ ကျယ်ပြန့်သော ကြယ်တာရာကောင်းကင်ယံထဲသို့ ပျောက်ကွယ်သွားသည်။

ရွှီကောင်းသည် သူတို့၏ထွက်ခွာသွားသော ပုံရိပ်များကို ကြောင်ငေးကြည့်ရင်း အနည်းငယ် ရှုပ်ထွေးနေသည်။ သူ့ကိုယ်သူ ကံကောင်းသလား ကံဆိုးသလားဆိုသည်ပင် မသိတော့ချေ။

သို့သော် မည်သို့ပင်ဖြစ်စေ၊ သူသည် အနည်းဆုံးတော့ သူ၏အသက်ကို ကယ်တင်နိုင်ခဲ့သည်။

ဤနေရာတွင် ဆက်နေထိုင်ရန်မှာမူ သူ၏အစီအစဉ်မဟုတ်ပေ။

မည်သို့ပင်ဖြစ်စေ ဤနေရာသည် မကြာမီ သေမင်းမြို့တော်အဖြစ်သို့ ပြောင်းလဲတော့မည်ဖြစ်ပြီး ဤနေရာတွင်နေထိုင်ခြင်းသည် ဘေးဒုက္ခကိုသာ ဆွဲဆောင်လိမ့်မည်ဖြစ်သည်။

ဤအတွေးနှင့်အတူ သူသည် ကျန်ရှိနေသော ပစ္စည်းအချို့ကို အလျင်အမြန် စုဆောင်းပြီးနောက် အသစ်စက်စက် အာကာသယာဉ်တစ်စီးကို ယူကာ ထွက်ခွာရန် ပြင်ဆင်လိုက်သည်။

သို့သော် မမျှော်လင့်စွာ လင်ကျူးသည် သူ့နောက်သို့ အမြဲတမ်းလိုက်နေသည်။

သူမ၏ နတ်အာရုံသည် ပျက်စီးသွားသောကြောင့် သူမ၏ မသိစိတ်သည် ရွှီကောင်း ကို သခင်အဖြစ် မှတ်ယူထားသည်။

ရွှီကောင်း သည် ခဏစဉ်းစားပြီးနောက် သူမကို ပြတ်ပြတ်သားသား ခေါ်ဆောင်ကာ ထွက်ခွာလာသည်။

လျင်မြန်စွာပင်...

သွေခေါင်းခွံဓားပြအဖွဲ့အတွင်း ဖြစ်ပျက်ခဲ့သော အဖြစ်အပျက်များသည် ပျံ့နှံ့သွားသည်။

အစွန်အဖျား ကြယ်တာရာနယ်မြေများတွင် တည်ရှိသော်လည်း သွေခေါင်းခွံပင်လယ်ဓားပြအဖွဲ့သည် တစ်ညတည်းနှင့် ပျက်စီးသွားသည်ဟူသော သတင်းသည် လူများစွာကို တုန်လှုပ်စေခဲ့သည်။

ဤအချိန်တွင် ရွှယ်အန်းသည် ကြယ်လှေကို ကြယ်မြေပုံပေါ်တွင် အမှတ်အသားပြုထားသော ဦးတည်ရာသို့ မောင်းနှင်နေသည်။

ထိုသည်မှာ ကွေ့ယီကြယ်စုဆီကိုပင်။