စုရှင်း၏ လျှို့ဝှက်လက်နက် လေးမျိုး၊ မျှော်လင့်ထားသည့်အတိုင်း အားနည်းသူများကို ချေမှုန်းရသည်မှာ အရသာရှိလှသည်။

အပြင်လောကတွင် စုရှင်းသည် ဤအရာကိုမြင်ပြီး သက်ပြင်းချလိုက်သည်။

"နတ်ဆိုးသူတော်စင်ကို ငါးနှစ်ပဲ လှည့်စားနိုင်ခဲ့တာ စိတ်မကောင်းစရာပဲ... နည်းနည်းလေး ပိုကြာအောင် ဆွဲထားနိုင်ခဲ့ရင် သရုပ်ပြခြင်း အချိန်ကို ထပ်ပြီး ဆွဲဆန့်နိုင်ဦးမှာ..."

"နတ်ဆိုးသူတော်စင် အင်အားဖြည့်တင်းဖို့က ဘယ်လောက်ကြာမလဲ မသိဘူး။ နောက်တစ်ကြိမ်ကတော့ နတ်ဆိုးနှိမ်နင်းရေး စခန်း ပျက်စီးမယ့်အချိန် ဖြစ်လာလိမ့်မယ် ထင်တယ်။"

စုရှင်းသည် ခေါင်းအနည်းငယ် ခါယမ်းလိုက်သည်။ သို့သော် သူ့အတွက်တော့ သရုပ်ပြခြင်း အချိန်ကို တတ်နိုင်သမျှ ဆွဲဆန့်ပြီး ကိုယ့်စွမ်းအားကိုယ် မြှင့်တင်နိုင်လျှင် လုံလောက်ပြီ ဖြစ်သည်။

ယခုအချိန်သည် တိုင်းတစ်ပါး လူမျိုးစုနှင့် ဆင်းသက်ဂိုဏ်းကို လုံးဝ ဖြုတ်ချပစ်ရမည့် အချိန် မဟုတ်သေးပါ…

အကြွင်းမဲ့ စွမ်းအားကို မပိုင်ဆိုင်မီအထိ စုရှင်းသည် တည်ငြိမ်သော ဖွံ့ဖြိုးတိုးတက်မှုကိုသာ ဦးစားပေးမည် ဖြစ်သည်။

သူ၏ မျက်လုံးများသည် သရုပ်ပြခြင်း ဖန်သားပြင်သို့ ပြန်ရောက်သွားသည်။

[သုံးဆယ့်ငါးနှစ်မြောက်တွင် နတ်ဆိုးသူတော်စင် ထွက်ခွာသွားသည်မှာ သုံးနှစ်ကြာခဲ့ပြီ ဖြစ်သည်။]

[ဤသုံးနှစ်အတွင်း နတ်ဆိုးနှိမ်နင်းရေး စခန်းသို့ ဒဏ္ဍာရီအဆင့် ကျွမ်းကျင်သူ အနည်းငယ် ထပ်မံ ရောက်ရှိလာခဲ့ရာ စခန်းအတွင်းရှိ စုစုပေါင်း ဒဏ္ဍာရီအဆင့် ကျွမ်းကျင်သူ အရေအတွက် သုံးဆယ်နီးပါးအထိ ရှိလာခဲ့သည်။]

[သို့သော် သင့်နှင့် မဟာဧကရာဇ်မှလွဲ၍ မဟာဧကရာဇ် အဆင့် ကျွမ်းကျင်သူအသစ်များ ထွက်ပေါ်လာခြင်း မရှိသေးပေ။]

[သင့်ကို အနည်းငယ် အံ့အားသင့်စေသည်မှာ သင်၏ မိတ်ဆွေကောင်းများ ဖြစ်ကြသည့် ယုယန်နှင့် ကျင်းချုံးရွှယ်တို့ နှစ်ဦးစလုံး ဒဏ္ဍာရီအဆင့်နှင့် နီးစပ်သော စွမ်းအားကို ပိုင်ဆိုင်နေခြင်း ဖြစ်သည်။]

[လောရွေရင်မှာ အစောပိုင်း ဆယ်နှစ်ကတည်းက ဒဏ္ဍာရီအဆင့်၏ အထွတ်အထိပ်သို့ ရောက်ရှိခဲ့ပြီး ယခုအချိန်တွင်မူ ဧကရာဇ်အဆင့်သို့ ဖောက်ထွင်းဝင်ရောက်ရန် အခွင့်အရေးကို ရှာဖွေနေပြီ ဖြစ်သည်။]

[သုံးဆယ့်ခြောက်နှစ်မြောက်တွင် သင်သည် ဓားချီအတားအဆီး အသစ်တစ်ခုကို တတ်မြောက်ခဲ့သည်။]

[ဤနှစ်တွင် သင်သည် ကာကွယ်ရေး ဓားအရှိန်အဝါ တစ်ရာ့ရှစ်ခုကို အပြည့်အဝ တတ်မြောက်ခဲ့ပြီး သင်၏ ကာကွယ်ရေး ဓားအရှိန်အဝါ တတ်မြောက်မှုသည် အသေးစား အောင်မြင်မှုအဆင့်သို့ ရောက်ရှိခဲ့သည်။]

[သင်၏ စမ်းသပ်မှုများအရ ကာကွယ်ရေး ဓားအရှိန်အဝါ တစ်ရာ့ရှစ်ခုကို အပြည့်အဝ အသက်သွင်းလိုက်ပါက မဟာယာနအဆင့် အလယ်ပိုင်း ကျင့်ကြံသူ တစ်ဦး၏ အပြည့်အဝ တိုက်ခိုက်မှုနှင့် နှိုင်းယှဉ်နိုင်သော တိုက်ခိုက်ခြင်း အကျိုးသက်ရောက်မှု ရှိသည်။]

[ပို၍ပင် အစွမ်းထက်သည်မှာ ကာကွယ်ရေး ဓားအရှိန်အဝါ၏ ကာကွယ်ရေး အကျိုးသက်ရောက်မှု ဖြစ်သည်။ ဓားအရှိအဝါက သင့်ခန္ဓာကိုယ်ကို ကာကွယ်ထားခြင်းဖြင့် သင်သည် မဟာယာနအဆင့် နောက်ပိုင်း ကျင့်ကြံသူတစ်ဦး၏ တိုက်ခိုက်မှုများကိုပင် ခံနိုင်ရည် ရှိနိုင်သည်။]

စုရှင်းသည် ဤအရာကို မြင်သောအခါ မျက်လုံးများ လင်းလက်လာသည်။

"နောက်ဆုံးတော့ ကာကွယ်ရေး ဓားအရှိန်အဝါကလည်း အသေးစား အောင်မြင်မှုအဆင့်ကို အောင်မြင်စွာ ရောက်သွားပြီပဲ..."

"ဒီသရုပ်ပြခြင်းပြီးရင် ငါ့ရဲ့ တိုက်ခိုက်ရေးစွမ်းရည်တွေက မဟာယာနအဆင့် အလယ်ပိုင်း ကျင့်ကြံသူတွေနဲ့ ယှဉ်နိုင်ပြီ။ ကာကွယ်ရေးကတော့ မဟာယာန နောက်ပိုင်းအဆင့်နဲ့ နှိုင်းယှဉ်နိုင်လိမ့်မယ်။"

"ဒါပေမဲ့... ငါသာ ကာကွယ်ရေး ဓားအရှိန်အဝါကို ပြီးပြည့်စုံတဲ့ အဆင့်အထိ လုပ်နိုင်ခဲ့ရင် ဘေးဒဏ်ကို ကျော်လွှားခြင်း ဒါမှမဟုတ် အမတအဆင့် တိုက်ခိုက်မှုတွေကိုတောင် ပိတ်ဆို့နိုင်မလား။"

ဤအရာကို တွေးမိသောအခါ စုရှင်း၏ နှလုံးခုန်နှုန်း အနည်းငယ် မြန်ဆန်လာပြီး သူ၏ စိတ်ထဲတွင်လည်း မျှော်လင့်ချက်များ ဖြစ်ပေါ်လာခဲ့သည်။

ဤကာကွယ်ရေး ဓားအရှိန်အဝါသည် သူ နားလည်သဘောပေါက်ခဲ့သော အခိုင်မာဆုံး ကာကွယ်ရေး နတ်စွမ်းအင် ဖြစ်သည်မှာ သေချာသည်။

သူ၏ မျက်လုံးများသည် သရုပ်ပြခြင်း ဖန်သားပြင်စီသို့ ပြန်ရောက်သွားသည်။

[နောက်ထပ် လေးနှစ်တာ ကာလအတွင်း နတ်ဆိုးနှိမ်နင်းရေး စခန်းသည် ငြိမ်းချမ်းနေခဲ့သည်။]

[လေးဆယ်နှစ်မြောက်တွင် တစ်နေ့၌ သင်သည် နှလုံးခုန်နှုန်း မြန်လာသည့်အတွက် ဗေဒင်ဟောကိန်းကို ပြုလုပ်ခဲ့ရာ လာမည့် တစ်လအတွင်း နတ်ဆိုးနှိမ်နင်းရေး စခန်းသည် ကြီးမားသော ဘေးအန္တရာယ်နှင့် ရင်ဆိုင်ရမည်ဖြစ်ပြီး စခန်းကျိုးပေါက်ကာ လူသားမျိုးနွယ်များ ပျက်သုဉ်းလုနီးပါး ဖြစ်မည်ကို သိရှိလိုက်သည်။]

[ဤအခိုက်အတန့်၌ တစ်လအကြာသည် နတ်ဆိုးနှိမ်နင်းရေးစခန်း ပျက်စီးမည့်အချိန် ဖြစ်နိုင်ကြောင်း သင် နားလည်လိုက်သည်။]

[ထို မျက်လုံးနှစ်လုံးပါသော နတ်ဆိုးသူတော်စင်သည် ပြန်လာမည်ဖြစ်ပြီး တိုင်းတစ်ပါး လူမျိုးစုမှ အမတအဆင့် သတ္တဝါများကို ခေါ်ဆောင်လာလိမ့်မည်။]

[ထို့ကြောင့် သင်သည် မဆိုင်းမတွဘဲ ကျင်းချုံးရွှယ်၊ လောရွှေရင်၊ ယုယန်၊ ဝမ့်ချင်းရွှမ်နှင့် အခြားသူများ အပါအဝင် သင့်၏ ဆွေမျိုးသားချင်းများနှင့် မိတ်ဆွေများကို ကြယ်ပြာသို့ စုဝေးစေခဲ့သည်။]

[တစ်ချိန်တည်းမှာပင် သင်သည် တစ်လအတွင်း နတ်ဆိုးနှိမ်နင်းရေး စခန်း ပျက်စီးတော့မည့် အကြောင်းကို လူသားမျိုးနွယ်၏ ထိပ်တန်း မဟာဧကရာဇ်ကို အသိပေးခဲ့သည်။]

[လူသားဧကရာဇ်သည် ဤစကားကို ကြားသောအခါ ပျော်ရွှင်ခြင်းမရှိ၊ ဝမ်းနည်းခြင်းလည်း မရှိသည့်အမူအရာဖြင့် သင့်အား ဒဏ္ဍာရီအဆင့် ကျွမ်းကျင်သူ အချို့ကို ကြယ်ပြာသို့ ခေါ်သွားစေလိုကြောင်း၊ သူကိုယ်တိုင်ကမူ ဤနေရာတွင် နောက်ဆုံးအချိန်ထိ ခုခံကာကွယ်မည် ဖြစ်ကြောင်း ပြောကြားခဲ့သည်။]

[ဤစကားကိုကြားသော် သင်သည် တိတ်ဆိတ်စွာ ခေါင်းညိတ်လိုက်သည်။ ဤ သရုပ်ပြခြင်းတွင် သင် လုပ်ရမည့် နောက်ဆုံးတစ်ခု ကျန်သေးသဖြင့် သင် သဘောတူလိုက်သည်။]

[သင်သည် လူသားမျိုးနွယ်ဝင် အချို့ကို ကြယ်ပြာသို့ ခေါ်ဆောင်လာခဲ့ပြီး ကြီးမားသော သားရဲကြီး ရောက်ရှိလာမည့် အချိန်ကို စောင့်ဆိုင်းနေခဲ့သည်။]

[တစ်လအကြာတွင် နတ်ဆိုးနှိမ်နင်းရေး စခန်း ကျိုးပေါက်သွားပြီဟူသော ထောက်လှမ်းရေး သတင်းကို သင် ရရှိခဲ့သည်။]

[နောက်ထပ် လအနည်းငယ် ကြာပြီးနောက် သားရဲကြီး ရောက်ရှိလာခဲ့ပြီး ကြယ်ပြာ တစ်ခုလုံးကို တစ်ကိုက်တည်းဖြင့် မျိုချလိုက်သည်။]

[သားရဲကြီး ရောက်ရှိလာသောအခါ သင်သည် ဆယ်တောင်ရှည်လျားသော ဓားချီဖြင့် ဆန့်ကျင်တွန်းလှန်ရန် ကြိုးစားခဲ့သော်လည်း ဓားချီသည် သားရဲကြီး၏ မျိုချခြင်းကို ခံရပြီးနောက် ပျောက်ကွယ်သွားခဲ့သည်။]

[သင်သည် ကူကယ်ရာမဲ့စွာဖြင့် သင်၏ ကာကွယ်ရေး ဓားအရှိန်အဝါကို အသက်သွင်းခဲ့ပြီး သားရဲကြီး၏ ဝမ်းဗိုက်ထဲသို့ မျိုချခံလိုက်သည်။]

[ထိုနှစ်တွင် သင်၏ ကာကွယ်ရေး ဓားအရှိန်အဝါ အရေအတွက်သည် တစ်ရာ့နှစ်ဆယ့်ရှစ်ခုသို့ ရောက်ရှိခဲ့သည်။]

[သားရဲကြီး၏ ဝမ်းဗိုက်ထဲသို့ မျိုချခံရပြီးနောက် သင်သည် ကြီးမားသော မိုးကြိုးဒေသ၏ တည်နေရာကို စတင် ရှာဖွေခဲ့သည်။]

[အဘယ်ကြောင့်ဆိုသော် သင်၏ ကန့်သတ်ချက်များကို ဖောက်ထွင်းပြီး ကိုယ်ခန္ဓာသန့်စင်ခြင်းတွင် ကြီးမားသော အောင်မြင်မှုကို ရရှိစေမည့် အခွင့်အရေးသည် ထိုနေရာတွင် ရှိနေကြောင်း သင် သိသည်။]

[အချိန်အတိုင်းအတာတစ်ခု ကြာပြီးနောက် သင်သည် ကြီးမားသော မိုးကြိုးဒေသကို ရှာတွေ့ခဲ့သည်။]

[ဤ မိုးကြိုးဒေသတွင် ဒေါသထွက်နေသော နဂါးများကဲ့သို့သော ကြောက်မက်ဖွယ် မိုးခြိမ်းမုန်တိုင်းကဲ့သို့သော မိုးကြိုးများသည် ပေါက်ကွဲထွက်နေပြီး တိုက်ခိုက်မှု တစ်ချက်စီသည် အားအနည်းဆုံး ကောင်းကင်ကပ်ဘေးနှင့် ညီမျှလုနီးပါး ဖြစ်သည်။]

[ဤမိုးကြိုးအောက်တွင် သိမ်မွေ့စွာ ပဲ့တင်ထပ်နေသော စွမ်းအင်တစ်ခုကို သင်၏ခန္ဓာကိုယ်က ခံစားလိုက်ရသည်။]

[ဤသည်မှာ ကောင်းကင်မိုးကြိုး ကိုယ်ခန္ဓာ၏ မိုးကြိုးမူလရင်းမြစ်ကို အာရုံခံခြင်း ဖြစ်ကြောင်း သင် သိသည်။]

[ဤ မိုးကြိုးတိုက်ခိုက်မှုများသည် သင့်၏ ကန့်သတ်ချက်များကို ဖောက်ထွင်းရန် ကူညီပေးနိုင်ရုံသာမက မိုးကြိုး၏ မူလရင်းမြစ်ကို ပိုမို နားလည်သဘောပေါက်စေပြီး ကောင်းကင်မိုးကြိုး ကိုယ်ခန္ဓာကိုပါ အောင်မြင်စွာ တိုးတက်စေနိုင်သည်။]

[သင်သည် ထိုဒေသအတွင်းသို့ ခြေလှမ်းဝင်လိုက်ပြီး သင်၏ ကာကွယ်ရေး ဂန်ချီကို အသက်သွင်းကာ မိုးကြိုး၏ ဗုံးကြဲတိုက်ခိုက်မှုကို ခံနိုင်ရည်ရှိရန် ပြင်ဆင်လိုက်သည်။]

[သို့သော် ဤနေရာရှိ မိုးကြိုးသည် အလွန် ကြောက်မက်ဖွယ်ကောင်းပြီး၊ တိုက်ခိုက်မှု တစ်ချက်စီ၏ စွမ်းအားသည် မဟာယာနအဆင့် အထွတ်အထိပ် ကျင့်ကြံသူတစ်ဦး၏ အပြည့်အဝ တိုက်ခိုက်မှုနှင့် နှိုင်းယှဉ်နိုင်သည်။]

[လွန်ခဲ့သော သရုပ်ပြခြင်းတွင် သင်သည် မိုးကြိုးချက် တစ်ချက်ကြောင့် ပြင်းထန်စွာ ဒဏ်ရာရခဲ့ပြီး မိုးကြိုးချက် နှစ်ချက်ကြောင့် သင့်၏ မူလဝိညာဉ် ပျက်စီးခဲ့သည်...]

[သင်၏ ကာကွယ်ရေး ဓားအရှိန်အဝါသည် ယခုအချိန်တွင် အသေးစား အောင်မြင်မှုအဆင့်၌ ရှိနေသော်လည်း ဤနေရာရှိ မိုးကြိုးကို ခံနိုင်ရည်ရှိလိမ့်မည်ဟု သင့်တွင် အပြည့်အဝ ယုံကြည်မှု မရှိသေးပေ။]

[သို့သော် ဤအချိန်တွင် သင့်၌ ရှေ့ဆက်တိုးရုံမှလွဲ၍ အခြား ရွေးချယ်စရာ မရှိတော့ပေ။]

[မဟာယာနအဆင့် အထွတ်အထိပ် ကျင့်ကြံသူ တစ်ဦး၏ အပြည့်အဝ တိုက်ခိုက်မှုနှင့် နှိုင်းယှဉ်နိုင်သော မိုးကြိုးသည် မိုးကြိုး၏ မူလရင်းမြစ်နှင့်အတူ သင့်အား ရိုက်ခတ်လာခဲ့သည်။]

[မိုးကြိုး တစ်ချက်တည်းဖြင့်ပင် သင်၏ ကာကွယ်ရေး ဓားအရှန်အဝါသည် အလွှာလိုက် အလွှာလိုက် ကွဲကြေသွားပြီး လုံးဝ ပျောက်ကွယ်လုနီးပါး ဖြစ်သွားသည်။]

[ကာကွယ်ရေး ဓားအရှိန်အဝါ တစ်ရာ့နှစ်ဆယ့်ရှစ်ခုပင် ဤကြောက်မက်ဖွယ် မိုးကြိုးကို ခံနိုင်ရည်မရှိသေးကြောင်း နားလည်သဘောပေါက်ကာ သင်သည် စိတ်ထဲမှ သက်ပြင်းချလိုက်သည်။]

[ကံကောင်းထောက်မစွာဖြင့် သင်သည် ကောင်းကင်မိုးကြိုး ကိုယ်ခန္ဓာကို ပိုင်ဆိုင်ထားသောကြောင့် မိုးကြိုးတိုက်ခိုက်မှုများကို အနည်းငယ် ခုခံနိုင်စွမ်းရှိပြီး မသေမျိုးရှောင်ချီ စွမ်းရည်ဖြင့် ဒဏ်ရာများကို ခံနိုင်ရည်ရှိအောင် ရုန်းကန်နေရသည်။]

[သို့သော် သင် လုံးဝ ပျော်ရွှင်ခြင်း မရှိပေ။ အဘယ်ကြောင့်ဆိုသော် ဒုတိယ မိုးကြိုးတိုက်ခိုက်မှု ရောက်ရှိလာတော့မည် ဖြစ်သောကြောင့်ပင်။]

[ဒုတိယ မိုးကြိုးတိုက်ခိုက်မှုအပြီးတွင် သင်သည် အသက်လုပြီး ရှင်သန်နိုင်ခဲ့သော်လည်း ကာကွယ်ရေး ဓားအရှိန်အဝါကမူ လုံးဝ ပျက်စီးသွားခဲ့သည်။]

…