ဆေးလုံးဖြစ်ပေါ်ခြင်း၊ အရည်အသွေးမြင့် အခြေတည်ဆေးလုံး သုံးလုံး

ချိုင့်ဝှမ်းအတွင်းရှိ ဆေးဖော်စပ်ခန်းထဲ၌။

ကြီးမားသော ဆေးမီးဖိုကြီးတစ်ခုသည် အလယ်ဗဟိုတွင် တည်ရှိနေသည်။

ကျိုးစွေ့သည် ဆေးမီးဖို၏ရှေ့တွင် ထိုင်နေပြီး သူ၏ရှေ့တွင် အခြေတည်ဆေးလုံးအတွက် ပါဝင်ပစ္စည်းများနှင့် အဆင့်နှစ်ယောင်သားရဲအမြုတေတစ်ခုကို ချထားသည်။

သူသည် လှုပ်ရှားနေသော အတွေးများကို တည်ငြိမ်စေရန် အသက်ပြင်းပြင်းတစ်ချက် ရှူလိုက်သည်။

ဝှစ်…။

တစ်ခဏအတွင်းမှာပင် ကျိုးစွေ့ သည် လက်ဟန်တစ်ချက်လှုပ်ရှားလိုက်ပြီး ဓာတ်ငါးပါး ဆေးဖော်စပ်ပညာရပ်ကို ထုတ်ဖော်လိုက်သည်။

အကြီးစားအောင်မြင်မှုနယ်ပယ်သို့ရောက်ရှိနေသည့် ဓာတ်ငါးပါး ဆေးဖော်စပ်ပညာရပ်သည် စိတ်ကူးပင်မယဉ်နိုင်လောက်သော စွမ်းအားကို ပိုင်ဆိုင်ထားသည်။ ၎င်းသည် ဓာတ်ငါးပါး၏ စွမ်းအားကို အလွန်ပင်သိမ်မွေ့သော အတိုင်းအတာအထိ ကျွမ်းကျင်စွာ ထိန်းချုပ်နိုင်စွမ်းရှိပြီး အဏုကြည့်မှန်ပြောင်းတစ်ခုဖြင့် ကြည့်ရှုနေသည့်အလား ဖြစ်သည်။

ပထမဦးစွာ ရွှေဒြပ်စင်၏ စွမ်းအားသည် ထက်မြက်သော ဓားငယ်လေးများအဖြစ်သို့ ပြောင်းလဲသွားပြီး၊ ပါဝင်ပစ္စည်းတစ်ခုချင်းစီကို ချက်ချင်း လှီးဖြတ်ပိုင်းခြားလိုက်သည်။ အန္တရာယ်ရှိသော အစိတ်အပိုင်းများကို ဖြတ်တောက်ဖယ်ရှားလိုက်ပြီး၊ အကျိုးပြုသော အစိတ်အပိုင်းများကိုသာ ချန်ထားခဲ့သည်။

စိတ်ဝိညာဉ်ဆေးပင်များစွာသည် မရေမတွက်နိုင်သော အပိုင်းအစများအဖြစ်သို့ ပိုင်းခြားခံလိုက်ရပြီး၊ ချက်ချင်းပင် အတုံးများစွာအဖြစ် လှီးဖြတ်ခံလိုက်ရသကဲ့သို့ ဖြစ်နေသည်။

နောက်ထပ်မှာ မီးဒြပ်စင်၏ စွမ်းအားဖြစ်သည်။ ကြီးမားသော မီးတောက်များသည် ဆေးမီးဖိုအောက်တွင် ချက်ချင်းပင် စတင်လောင်ကျွမ်းလာပြီး အပူချိန် တက်လာသည်။ မီး၏စွမ်းအားအောက်တွင် ဝိညာဉ်ဆေးပင်တစ်ခုချင်းစီမှာ အရည်ပျော်စပြုလာသည်။

မူလက အရည်ပျော်ရန် ခက်ခဲသော စိတ်ဝိညာဉ်ဆေးပင်များသည် ယခုအခါ ဝိညာဉ်အရည်များအဖြစ်သို့ လျင်မြန်စွာ အရည်ပျော်သွားကြသည်။

ထို့နောက် မြေဒြပ်စင်၏ စွမ်းအား ရောက်ရှိလာသည်။ ၎င်းသည် ဆေးမီးဖိုတစ်ခုလုံးကို ဝန်းရံထားသော ထူထဲသော ရွှံ့နံရံတစ်ခုသဖွယ် အပူကို ကာကွယ်ပေးရုံသာမက၊ ဝိညာဉ်အရည်များ အငွေ့ပျံခြင်းကိုပါ တားဆီးပေးသည်။

ဤအချက်မှာ အလွန်အရေးကြီးသည်။

စိတ်ဝိညာဉ်ဆေးပင်သည် ဝိညာဉ်အရည်အဖြစ်သို့ အရည်ပျော်သည့်အခါ မီးတောက်၏ အပူရှိန်အောက်တွင် ၎င်းသည် အငွေ့ပျံနိုင်သည်။

ယင်းကြောင့် ဆေးစွမ်းအင်၏ သိသာထင်ရှားသော အစိတ်အပိုင်းတစ်ခု ပျောက်ကွယ်သွားခြင်းကိုလည်း ဖြစ်ပေါ်စေနိုင်သည်။

ဆေးလုံးဖော်စပ်ရာတွင် အရည်အသွေးမြင့်ဆေးလုံးများ မထုတ်လုပ်နိုင်ဘဲ၊ မကြာခဏ ကျရှုံးရသည့် အဓိကအကြောင်းရင်းတစ်ခုဖြစ်သည်ကို အလွယ်တကူသိရှိနိုင်ပေသည်။

၎င်းမှာ ဆေးလုံးဖော်စပ်သည့် လုပ်ငန်းစဥ်အတွင်း ဆေးအရည်အမြောက်အမြား အငွေ့ပျံသွားသောကြောင့် ဖြစ်သည်။

မြေဒြပ်စင်၏ စွမ်းအားကို အသုံးပြုပြီး ရွှံ့အတားအဆီးတစ်ခု ဖွဲ့စည်းမှသာလျှင် ဝိညာဉ်အရည် အငွေ့ပျံခြင်းကို တားဆီးနိုင်သည်။

တစ်ချိန်တည်းမှာပင် ဤစွမ်းအားသည် ဆေးမီးဖိုအား သင့်လျော်သောအပူချိန်ကို ထိန်းသိမ်းရန် ကူညီပေးနိုင်ပြီး မီးတောက်၏စွမ်းအင်ကို ပိုမို ချွေတာပေးသည်။

သို့သော် ဤသည်မှာ အစမျှသာ ရှိသေး၏။

ရေဒြပ်စင်၏ စွမ်းအားသည် ဝိညာဉ်အရည်ထဲသို့ ပေါင်းစပ်သွားကာ အတွင်းရှိ အညစ်အကြေးများကို စတင်ခွဲထုတ်သည်။

မရေမတွက်နိုင်သော ဝိညာဉ်အရည်များသည် ဝဲဂယက်တစ်ခုအသွင်သို့ ပြောင်းလဲသွားပြီး ကြီးမားသော လည်ပတ်အားတစ်ခုကို ဖြစ်ပေါ်စေသည်။

အလယ်ဗဟို၏တွန်းအားကြောင့် ဝိညာဉ်ဆေးပင်ထဲရှိ အညစ်အကြေးအမြောက်အမြားမှာ အပြင်သို့ လွှင့်စင်သွားပြီး ဆေးမီးဖို၏ နံရံကို ပြင်းထန်စွာ ရိုက်ခတ်သည်။

နောက်ဆုံးမှာ သစ်သားဒြပ်စင်၏ စွမ်းအားဖြစ်သည့် အသက်စွမ်းအင်နှင့် မရေမတွက်နိုင်သော ဝိညာဉ်အရည်များကို ဆွဲဆောင်လိုက်ပြီး အပြည့်အဝ ပေါင်းစပ်လိုက်သည်။

၎င်းသည် ဝိညာဉ်အရည်ထဲရှိ ပျက်စီးနေသော ဆေးစွမ်းအင်ကိုပင် ပြုပြင်နိုင်ပြီး ဆေးစွမ်းအင်ကို ထူးကဲစွာ နူးညံ့စေသည်။

ဤသည်မှာ ဝိညာဉ်အရည်ထဲရှိ သဘာဝစွမ်းအားဖြစ်သည်။

"မယုံနိုင်စရာပဲ.. ဒါက ဓာတ်ငါးပါး ဆေးဖော်စပ်ပညာရပ်လား..."

ကျိုးစွေ့၏ မျက်လုံးများက စိတ်လှုပ်ရှားမှုဖြင့် တောက်ပနေသည်။

'စာအုပ်ကူ'၏ အကူအညီဖြင့် ဓာတ်ငါးပါး ဆေးဖော်စပ်ပညာရပ်ကို အကြီးစားအောင်မြင်မှုနယ်ပယ်သို့ မြှင့်တင်နိုင်ခဲ့ပြီးနောက်၊ သူ၏ဆေးဖော်စပ်ပညာ ကျွမ်းကျင်မှုများမှာ နောက်တစ်ဆင့်တက်လာသည်ကို သူချက်ချင်း နားလည်လိုက်သည်။

ဓာတ်ငါးပါး၏ ပြီးပြည့်စုံသော ပူးပေါင်းဆောင်ရွက်မှုက ဆေးဖော်စပ်ခြင်းတစ်ကြိမ်စီတိုင်းကို အပြစ်အနာအဆာကင်းမဲ့လုနီးပါး ဖြစ်စေသည်။

၎င်းမှာ ဝိညာဉ်ဆေးပင်များ ပေါင်းစပ်ခြင်း၊ အညစ်အကြေးများ ဖယ်ရှားခြင်း၊ သို့မဟုတ် ဝိညာဉ်အရည်များ ပေါင်းစည်းခြင်း စသည်တို့တွင် ဓာတ်ငါးပါး၏ စွမ်းအားများမှာ တစ်ခုနှင့်တစ်ခု အပြန်အလှန် ဖြည့်စွက်ပေးသည်။

ဤသည်မှာ ဝိညာဉ်မီးလျှံဖြင့် ရိုးရှင်းစွာ ဖော်စပ်ခြင်းထက် သိသိသာသာ ပို၍ကောင်းမွန်သည်။ အကန့်အသတ်မဲ့ မှော်ဆန်သည့်အသုံးပြုပုံများရှိသော ထိပ်တန်းအဆင့် ဆေးဖော်စပ်ပညာရပ်တစ်ခုဖြစ်သည်မှာ သံသယဖြစ်စရာမလိုချေ။

မှန်ပေသည်၊ သာမန်လူများအတွက်မူ ဓာတ်ငါးပါး ဆေးဖော်စပ်ပညာရပ်ကို အကြီးစားအောင်မြင်မှုနယ်ပယ်သို့ ပျိုးထောင်ရန်မှာ၊ နှစ်ပေါင်းရာချီသော ဆေးဖော်စပ်ပညာ အတွေ့အကြုံနှင့် အထင်ကြီးဖွယ်ကောင်းသော ပါရမီမရှိဘဲ အောင်မြင်ရန် မဖြစ်နိုင်ပေ။

သို့သော် သူမှာမူ မတူပေ။ 'စာအုပ်ကူ'၏ စွမ်းအားဖြင့် သူသည် အချိန်တိုင်း ဉာဏ်အလင်းပွင့်သော အခြေအနေတွင် နေထိုင်နိုင်သည်။

ထို့ကြောင့် သူ၏ ကျင့်ကြံမှုစွမ်းဆောင်ရည်မှာ အခြားဆေးဖော်စပ်ပညာရှင်များထက် အဆတစ်ရာ ထက်မကပိုပေသည်။

"အဆင့်နှစ်ယောင်သားရဲအမြုတေနဲ့ အခြေတည်ဆေးလုံးဖော်စပ်ဖို့ ကြိုးစားတာက.. ဒီလောက်မြန်မြန် ကျရှုံးနိုင်တာ အံ့ဩစရာမဟုတ်တော့ဘူး... အညစ်အကြေးတွေ အရမ်းများလွန်းတယ်..."

ကျိုးစွေ့ မျက်လုံးများ မှေးကျဉ်းသွားသည်။

သူသည် အဆင့်နှစ်ယောင်သားရဲအမြုတေကို ဓာတ်ငါးပါး ဆေးဖော်စပ်ပညာရပ်ဖြင့် အသုံးပြုသည့်အခါ၊ အခြေတည်ဆေးလုံးအတွက် အဓိကပါဝင်ပစ္စည်းအဖြစ် အဆင့်နှစ်ယောင်သားရဲအမြုတေသည် ရွှေကျောက်စိမ်းလင်ဇီးနှင့် အဘယ်ကြောင့် မယှဉ်နိုင်သည်ကို ချက်ချင်း နားလည်သွားသည်။

အဆင့်နှစ်ယောင်သားရဲအမြုတေသည် အညစ်အကြေးများဖြင့် ပြည့်နှက်နေပြီး မိစ္ဆာသဘာဝစွမ်းအားများဖြင့် ပြည့်နှက်နေသည်။

ဆေးဖော်စပ်ပညာရှင်သာ ထိုအညစ်အကြေးများကို ယောင်သားရဲအမြုတေမှ မဖယ်ရှားနိုင်ပါက၊ မလွဲမသွေ ကျရှုံးပေလိမ့်မည်။

အောင်မြင်ခဲ့လျှင်ပင် ရလဒ်အနေဖြင့် ထွက်ပေါ်လာသော ထုတ်ကုန်မှာ အဆင့်နိမ့် အခြေတည်ဆေးလုံးတစ်လုံးသာ ဖြစ်ပေလိမ့်မည်။

မှန်ပေသည်၊ အဆင့်နှစ်ယောင်သားရဲအမြုတေသည် အဓိကပါဝင်ပစ္စည်းအဖြစ် အဘယ်ကြောင့် ဆောင်ရွက်နိုင်ရသည်မှာ အကြောင်းရင်းတစ်ခု ရှိသည်။

အရေးကြီးဆုံးအကြောင်းရင်းမှာ ၎င်းတွင် အခြေတည်အဆင့်ကျင့်ကြံသူတစ်ဦး လိုအပ်သော သက်ဝင်လှုပ်ရှားမှု၊ ဝိညာဉ်နှင့် မှော်စွမ်းအား စသည့် စွမ်းအင်အားလုံး ပါဝင်သောကြောင့် ဖြစ်သည်။ ၎င်းသည် ချီသန့်စင်ခြင်းအဆင့်ကျင့်ကြံသူများကို ကူညီနိုင်ပြီး တစ်ပြိုင်နက်တည်းမှာပင် သူတို့၏စွမ်းအားကို မြှင့်တင်ပေးနိုင်သည်။

အဆင့်နှစ်ယောင်သားရဲအမြုတေ၏ အညစ်အကြေးများကို ဖယ်ရှားနိုင်သရွေ့ ၎င်း၏အနှစ်သာရမှာ ရွှေကျောက်စိမ်းလင်ဇီးနှင့် များစွာကွာခြားမည်မဟုတ်ပေ။

ကံကောင်းစွာဖြင့် သူသည် ဓာတ်ငါးပါး ဆေးဖော်စပ်ပညာရပ်ကို အကြီးစားအောင်မြင်မှုနယ်ပယ်သို့ မြှင့်တင်နိုင်ခဲ့သည်။

ထို့ကြောင့် အဆင့်နှစ်ယောင်သားရဲအမြုတေမှ အညစ်အကြေးများကို ဖယ်ရှားခြင်းမှာ ခက်ခဲသောအလုပ်တစ်ခု မဟုတ်တော့ပေ။

ဘန်း..ဘန်း…ဘန်း..။

တစ်ခဏအတွင်းမှာပင် ဝိညာဉ်ဆေးပင်အမျိုးမျိုးသည် ဆေးမီးဖိုထဲတွင် အရည်ပျော်စပြုလာပြီး၊ ကျိုးစွေ့၏ ကြီးမားသော ဝိညာဉ်အာရုံအောက်တွင် အညစ်အကြေးအားလုံးကို သေသေချာချာ ဖယ်ရှားခံလိုက်ရပြီး အနှစ်သာရဝိညာဉ်အရည်ကိုသာ ချန်ထားခဲ့သည်။

ဝူး..။

အချိန်ကြာလာသည်နှင့်အမျှ အညစ်အကြေးများက ဖြည်းဖြည်းချင်း ဖယ်ရှားခံလိုက်ရပြီး၊ အဆုံးတွင် မရှိမဖြစ်လိုအပ်သော ဝိညာဉ်အရည်သာ ကျန်ရှိတော့သည်။

ဓာတ်ငါးပါး၏ စွမ်းအားအောက်တွင် ဝိညာဉ်အရည်များသည် အတူတကွ စုစည်းစပြုလာသည်။

ဘန်း…။

ဤတစ်ကြိမ် ဆေးဖော်စပ်ခြင်းလုပ်ငန်းစဥ်မှာ တစ်နေ့နှင့်တစ်ညလုံး ကြာမြင့်ခဲ့ပြီး၊ ကျိုးစွေ့သည် အပြည့်အဝ အာရုံစိုက်ထားကာ မည်သည့် ပေါ့လျော့မှုမျှမရှိပေ။

ရုတ်တရက် ရွှေရောင်အလင်းတန်းတစ်ခု ဆေးမီးဖိုမှ ထွက်ပေါ်လာပြီး ဆေးဖော်စပ်ခန်းတစ်ခုလုံးကို လင်းထိန်သွားစေသည်။

တစ်ပြိုင်နက်တည်းမှာပင် ယစ်မူးစေနိုင်သော ဆေးရနံ့သည် ဆေးဖော်စပ်ခန်းတစ်ခုလုံး၌ ပျံ့နှံ့သွားသည်။

ထိုမျှပင်မကချေ၊ ၎င်းမှာ ဆေးဖော်စပ်ခန်းတွင်သာ ကန့်သတ်မထားဘဲ ချိုင့်ဝှမ်းတစ်ခုလုံးသို့ပင် ပျံ့နှံ့သွားသည်။

ချိုင့်ဝှမ်းရှိလူတိုင်း ထိုရနံ့ကို ရှုရှိုက်မိပြီး တံတွေးပင်မျိုချမိကြသည်။

သူတို့၏ခန္ဓာကိုယ်ရှိ ဆဲလ်တိုင်းက ထကြွလာသကဲ့သို့ ခံစားလိုက်ရသည်။

"ဟားဟား... အောင်မြင်ပြီ.. နောက်ဆုံးတော့ အောင်မြင်ပြီ..."

"ငါ့ရဲ့ ပထမဆုံးကြိုးပမ်းမှုမှာပဲ အခြေတည်ဆေးလုံးကို အောင်မြင်စွာ ဖော်စပ်နိုင်ခဲ့တယ်... ပြီးတော့ အခြေတည်ဆေးလုံး သုံးလုံးတောင်ပဲ... ဟားဟား.."

ကျိုးစွေ့သည် ပျော်ရွှင်မှုဖြင့် ပြည့်နှက်ကာ ကျယ်လောင်စွာ ရယ်မောလိုက်သည်။

သူသည် ဆေးမီးဖိုအတွင်းရှိ လုံးဝန်းပြီး ရွှေရောင်တောက်နေသော အခြေတည်ဆေးလုံးသုံးလုံးကို ကြည့်လိုက်ရင်း သူ၏စိတ်လှုပ်ရှားမှုမှာ မိုးပေါ်သို့ပင် တက်သွားချေသည်။

ဤမျှ အချိန်များစွာနှင့် ကြိုးစားအားထုတ်မှုများစွာကို ပြုလုပ်ပြီးနောက် သူသည် နောက်ဆုံးတွင် အခြေတည်ဆေးလုံးကို အောင်မြင်စွာ ဖော်စပ်နိုင်ခဲ့ပြီဖြစ်သည်။

အပြင်လောကသာ ဤအကြောင်းကို သိရှိသွားပါက သူတို့သည် သေချာပေါက် ရူးသွပ်သွားပေလိမ့်မည်။ တစ်ကြိမ်တည်းဖြင့် ဆေးလုံးသုံးလုံး ဖော်စပ်ခြင်းမှာ အခြေခံအားဖြင့် ဆေးဖော်စပ်ပညာရှင်တစ်ဦးအတွက် အကန့်အသတ်ဖြစ်သည်။

ဝါရင့် ဆေးဖော်စပ်ပညာရှင်များပင်လျှင် ဤသို့အောင်မြင်နိုင်သည်ဟု မကြွေးကြော်ဝံ့ပေ။

သို့သော် ကျိုးစွေ့သည် ၎င်းကို သူ၏ပထမဆုံး ကြိုးပမ်းမှုတွင် ပြုလုပ်နိုင်ခဲ့သည်။ ၎င်းမှာ လက်တွေ့တွင် ရှားပါးသော အစွမ်းတစ်ခုပင်ဖြစ်သည်။

"ယောက်ျား.. ရှင်အောင်မြင်သွားပြီလား... ရှင် အခြေတည်ဆေးလုံးကို အောင်အောင်မြင်မြင် ဖော်စပ်နိုင်ခဲ့ပြီလား..."

ထိုအခိုက်အတန့်တွင် ကျိပင်းယွီ၊ မုဇီယန်နှင့် ရှားကျင်းယန်တို့အားလုံးသည် သတင်းကောင်းကို ကြားသိပြီးနောက် ဆေးဖော်စပ်ခန်းသို့ အပြေးအလွှား ရောက်ရှိလာကြသည်။

သူတို့သည် ဤဆေးဖော်စပ်ကြိုးပမ်းမှု၏ ရလဒ်အား အခန်းအပြင်ဘက်တွင် စိုးရိမ်တကြီး စောင့်ဆိုင်းနေခဲ့ကြခြင်း ဖြစ်သည်။

သူတို့သည် ကျိုးစွေ့၏ အောင်မြင်နိုင်ခြေကို ထိခိုက်စေမည်ကို စိုးရိမ်သောကြောင့် အသက်ပင် ပြင်ပြင်း မရှူဝံ့ကြပေ။

သို့သော် ယခုမူ ကျိုးစွေ့၏ရေရွတ်သံကိုကြားပြီးနောက်၊ သူတို့သည် ဆေးဖော်စပ်ခန်းထဲသို့ အပြေးအလွှား ဝင်ရောက်ရန် မစောင့်ဆိုင်းနိုင်တော့ပေ။

သူတို့အားလုံး သူတို့၏ယောက်ျားကို အံ့အားသင့်မှု၊ ပျော်ရွှင်မှုတို့ဖြင့် ကြည့်လိုက်ကြသည်။

"ဟားဟား.. သိပ်ဟုတ်တာပေါ့ကွ.. မင်းတို့ယောက်ျားက ဘယ်သူလို့ ထင်နေလဲ... သဘာဝအတိုင်းပဲ ဒါက အသေးအဖွဲလေးပဲကို ဟားဟား.."

"ငါ အခြေတည်ဆေးလုံးတွေကို ဖော်စပ်နိုင်ခဲ့ရုံတင်မကဘူး.. ထိပ်တန်းအရည်အသွေးရှိတဲ့ အခြေတည်ဆေးလုံးသုံးလုံးတောင်ကွ... ဟားဟား"

ကျိုးစွေ့က ဂုဏ်ယူမှုအပြည့်ဖြင့် ရယ်မောလိုက်သည်။