တာအိုလက်တွဲဖော် သုံးယောက်နဲ့တောင် မကျေနပ်သေးဘူးလား

နောက်ထပ် သုံးရက်ကြာ အနားယူပြီးနောက် ကျိပင်းယွီ၊ ရှားကျင်းယန်နှင့် မုဇီယန်တို့သည် သူတို့၏ အထွတ်အထိပ်အခြေအနေသို့ အပြည့်အဝ ပြန်လည်ရောက်ရှိသွားကြပြီး၊ အားလုံးမှာ ချီသန့်စင်ခြင်းအဆင့်(၉)၏ ပြီးပြည့်စုံသောနယ်ပယ်သို့ ရောက်ရှိသွားကြသည်။

သူတို့သည် ကျိုးစွေ့ကို နှုတ်ဆက်လိုက်ပြီး အခြေတည်အဆင့်ကို ကြိုးစားရန် သူတို့၏ သီးသန့်ဂူများထဲသို့ ဝင်ရောက်သွားကြသည်။

မည်သို့ပင်ဖြစ်စေ၊ ဤနေရာတွင် ဒုတိယအဆင့် ဝိညာဉ်ကြောတစ်ခု ရှိနေသည်။

ဤနေရာသည် သူတို့၏ အခြေတည်အဆင့်အတွက် အလွန်အကျိုးရှိပြီး၊ ၎င်းမှာ အောင်မြင်နိုင်ခြေကိုပင် အတိုင်းအတာတစ်ခုအထိ မြှင့်တင်ပေးနိုင်သည်။

သူတို့သည် ကျင့်ကြံရန် အခြားမည်သည့်နေရာသို့မျှ သွားရန် မလိုအပ်ပေ။

သို့သော် ထိုနေ့ရက်များသည် ကျိုးစွေ့အတွက် ခက်ခဲသော အချိန်တစ်ခုဖြစ်သည်။

တာအိုလက်တွဲဖော်သုံးဦးစလုံး တစ်ပြိုင်နက်တည်း အဆင့်တက်ရန် တံခါးပိတ်ကျင့်ကြံခြင်းသို့ ဝင်ရောက်သွားကြရာ၊ သူ့ကို အဖော်ပြုရန် မည်သူမျှမရှိသော အထီးကျန်ညများမှာ လွန်ခဲ့သောနှစ်များအတွင်း ရှားပါးသော အဖြစ်အပျက်တစ်ခုဖြစ်သည်။

သို့သော် မကြာမီမှာပင် သူ၌ အခြေတည်အဆင့်သို့ ရောက်ရှိပြီးသား လက်တွဲဖော်သုံးဦး ရှိလာတော့မည်အား စဉ်းစားမိသည်။

ထိုအခါတွင် သူသည် အခြေတည်အဆင့်ကျင့်ကြံသူများနှင့်အတူ ကျင့်ကြံနိုင်မည်ဖြစ်ပြီး၊ ၎င်းမှာ ကျင့်ကြံခြင်းလောကတွင် မကြုံစဖူးသော အခွင့်ထူးတစ်ခုဖြစ်သည်။

မည်သည့်ယောက်ျားက ချီသန့်စင်ခြင်းအဆင့်အတွင်း၌ အခြေတည်အဆင့် လက်တွဲဖော်တစ်ဦးကို ရှာဖွေနိုင်မည်နည်း။ ၎င်းမှာ လုံးဝ မကြားဖူးသောအရာ ဖြစ်သည်။

၎င်းမှာ ကြွက်တစ်ကောင်က ကြောင်မကြီးတစ်ကောင်ကို ၎င်း၏လက်တွဲဖော်အဖြစ် ရှာဖွေတွေ့ရှိခြင်းကဲ့သို့ပင် ယုတ္တိမတန်သောကိစ္စ ဖြစ်သည်။

"ဟုတ်တယ်.. ဒါက ဂုဏ်ပြုရမယ့် အချိန်အခါပဲ..."

ဤသို့စဉ်းစားရင်း ကျိုးစွေ့သည် ယခင်က သူရရှိခဲ့သော ဒုတိယအဆင့် ယောင်သားရဲ ကျောက်တုံးမြွေကြီး၏ အသားကို အသုံးပြု၍ ကိုယ်တိုင်ကိုယ်ကျ စတင်ချက်ပြုတ်တော့သည်။

မီးဖိုချောင်သည် မကြာမီမှာပင် စွဲမက်ဖွယ်ကောင်းသော ရနံ့များဖြင့် ပြည့်နှက်သွားပြီး လူတိုင်း တံတွေးမျိုချနိုင်စေလောက်သည်။

ခဏအကြာတွင် စားပွဲပေါ်တွင် ဟင်းလျာငါးမျိုးနှင့် ဟင်းချိုတစ်ခွက်၊ အသီးအနှံများနှင့် ဟင်းသီးဟင်းရွက်များဖြင့် ပြည့်နှက်နေသော ပွဲတော်ကြီးတစ်ခု ဖြစ်သွားပြီး ၎င်းမှာ အတော်ပင် ခမ်းနားသော ပြင်ဆင်မှုတစ်ခုဖြစ်သည်။

လွန်ခဲ့သောသုံးလအတွင်း သူ၏အဓိကအစားအစာမှာ အခြေခံအားဖြင့် ဒုတိယအဆင့် ယောင်သားရဲများ၏ အသားပင် ဖြစ်သည်။

ရိုးရိုးသားသားပြောရလျှင် ဤသည်မှာ သူ၏ကျင့်ကြံမှုအတွက် ကြီးမားစွာ အကျိုးရှိသည်။

အထူးသဖြင့် နဂါးဆင်ကူအတွက် ဤယောင်သားရဲအသားများသည် အလွန်အမင်း အာဟာရဖြစ်ပြီး၊ ၎င်းတို့သည် ၎င်း၏ဆင့်ကဲပြောင်းလဲမှုကို သိသိသာသာ အရှိန်မြှင့်ပေးနိုင်သည်။

ဤသည်မှာ ကျိုးစွေ့အား ပိုမိုဆန်းကြယ်သော သွေးစွမ်းအင်ကို ရရှိစေသည်။ သံသယဖြစ်ဖွယ်မရှိဘဲ သူ၏လက်ရှိ ကာယကြံ့ခိုင်မှုမှာ လွန်ခဲ့သောသုံးလကနှင့် နှိုင်းယှဉ်လျှင် အများကြီး ပို၍အားကောင်းသည်။ သူ၏သက်စောင့်အနှစ်သာရမှာ အပြည့်အလျှံဖြစ်နေပြီး ရုပ်ခန္ဓာခွန်အားမှာ အလွန်ပင် ကြောက်မက်ဖွယ်ကောင်းလှသည်။

ဤအတိုင်းသာ ဆက်လက်ဖြစ်ပွားနေပါက သူ၏ကျင့်ကြံမှု အခြေတည်အဆင့်မရောက်မီပင် ရုပ်ခန္ဓာသည် အခြေတည်အဆင့်သို့ ဝင်ရောက်နိုင်ပေမည်။

"ဘာအနံ့ပါလိမ့်... အရမ်းမွှေးတာပဲ..."

ထိုအခိုက်အတန့်တွင် လန်ယွဲ့ရှီသည် အံ့ဖွယ်ကောင်းသော ချက်ပြုတ်မှု၏ ရနံ့ကို သတိပြုမိလိုက်ပြီး၊ အနံ့၏နောက်သို့ လိုက်ကာ ကျိုးစွေ့စားပွဲပေါ်ရှိ ဟင်းလျာများကို စူးစမ်းစွာ ကြည့်လိုက်သည်။

"စီနီယာလန်.. ခင်ဗျားလည်း အနံ့ကို သတိပြုမိတယ်ပေါ့.. ဒီနေ့ ကျွန်တော် မြွေသားဟင်းချက်ထားတယ်.. လာပါ အတူတူ စားကြတာပေါ့..."

ကျိုးစွေ့က သူမကို ဖိတ်ခေါ်လိုက်သည်။

"ရှင် ချက်ပြုတ်တတ်လိမ့်မယ်လို့ ကျွန်မ ဘယ်တုန်းကမှ မမျှော်လင့်ထားခဲ့ဘူး.. အစက ချက်ပြုတ်တာတွေအားလုံးကို ရှင့်ရဲ့ တာအိုလက်တွဲဖော်တွေပဲ လုပ်နေတာလို့ ကျွန်မထင်ခဲ့တာ..."

လန်ယွဲ့ရှီကလည်း မငြင်းဆန်ခဲ့ပေ။

ဤသုံးလတာကာလအတွင်း သူတို့သည် မကြာခဏ လက်ဆုံး စားလေ့ရှိပြီး၊ သူတို့၏ဆက်ဆံရေးမှာ သိသိသာသာ တိုးတက်လာကာ ၎င်းမှာ ရိုးရှင်းသော ဓလေ့တစ်ခု ဖြစ်လာခဲ့သည်။

အခြေတည်အဆင့်ကျင့်ကြံသူများအတွက်ပင်လျှင်၊ သူတို့၏နေ့စဥ် အစာစားချင်စိတ်မှာ များစွာလျော့ကျသွားသော်လည်း စားသုံးရန် လိုအပ်နေသေးသည်။

"ချက်ပြုတ်တာက ကျွန်တော့်ရဲ့ ကျွမ်းကျင်မှုတစ်ခုပါပဲ... ကျွန်တော်တစ်ယောက်တည်း ရှိနေတုန်းက ကျွန်တော့်ဘာသာ ချက်ပြုတ်ခဲ့ရတာလေ.. ဒါက ကြီးကြီးမားမားကိစ္စမဟုတ်ပါဘူး..."

ကျိုးစွေ့ အနည်းငယ် ပြုံးလိုက်သည်။

သူ၏ယခင်ဘဝတွင် သူသည် အိမ်တွင်းပုန်းတစ်ဦးဖြစ်ကာ မကြာခဏ အပြင်စာများ မှာယူလေ့ရှိသော်လည်း မိမိဘာသာ ချက်ပြုတ်သည့်အချိန်များလည်း ရှိခဲ့သည်။

သူသည် အွန်လိုင်းမှဗီဒီယိုများကို ကြည့်ရှုပြီး ရိုးရှင်းသော ချက်ပြုတ်နည်းအချို့ကို သင်ယူခဲ့သည်။ သူ၏ချက်ပြုတ်မှုမှာ အရသာကောင်းသည်ဟု မသတ်မှတ်နိုင်သော်လည်း၊ သူ၏အစာအိမ်ကို ဖြည့်တင်းရန်အတွက်မူ ကောင်းစွာလုံလောက်ပေသည်။

"ဒါဆို ရှင်လည်း တစ်ချိန်က တစ်ယောက်တည်း နေခဲ့ဖူးတာပေါ့... ကျွန်မလိုမျိုးပဲ ထင်ပါရဲ့...”

လန်ယွဲ့ရှီသည် တစ်စုံတစ်ခုကို အမှတ်ရသွားပုံရပြီး မနေနိုင်ဘဲ ပြောလိုက်သည်။

"အိုး.. စီနီယာလန်ရဲ့အဖေက အင်မော်တယ်ရှားဂိုဏ်းချုပ် မဟုတ်ဘူးလား.. မိသားစုရှိတယ်မလား.."

ကျိုးစွေ့က စိတ်ဝင်တစား မေးလိုက်သည်။

"အဟက်.. သူက မီယွင်မြို့မှာ နှစ်နှစ်ကျော်ကြာ ပိတ်မိနေတဲ့ သူ့သမီးအရင်းကို ကယ်တင်ဖို့ တောင်ပေါ်ကနေဆင်းလာဖို့တောင် သတ္တိမရှိဘူး... သူက ဘယ်လိုအဖေမျိုးလဲ..."

လန်ယွဲ့ရှီက အေးစက်စွာ လှောင်ပြောင်လိုက်သည်။

သူမသည် သူမ၏ဖခင်၊ အင်မော်တယ်ရှားဂိုဏ်း၏ ဂိုဏ်းချုပ်အပေါ် ကြီးမားသော မကျေနပ်မှုကို ထားရှိသည်မှာ ထင်ရှားပေသည်။

ဂိုဏ်းအတွက် သူ၏ရက်စက်ကြမ်းကြုတ်သော လုပ်ရပ်များကို သူမ နားလည်နိုင်သော်လည်း၊ အဖေတစ်ယောက်အနေဖြင့် သူ၏သမီးအရင်းဖြစ်သူ တစ္ဆေမိစ္ဆာဂိုဏ်း၏ လက်ထဲသို့ ကျရောက်သွားသည်ကို ဝင်ရောက်စွက်ဖက်ရန် မည်သည့်ကြိုးပမ်းမှုမျှမပြုဘဲ ကြည့်နေခဲ့သည်။

သူမ မည်မျှပင် နားလည်မှုရှိစေကာမူ စိတ်ခံစားချက်အရ လက်မခံနိုင်ဘဲ၊ ၎င်းမှာ သူမအား အလွန်ပင် ဝမ်းနည်းစေသည်။

သို့သော် ထိုသို့သော အဖြစ်အပျက်မျိုးမှာ ကျင့်ကြံခြင်းလောကတွင် ရှားပါးသည်မဟုတ်ဘဲ၊ ထာဝရအသက်ကို ရှာဖွေခြင်းက ဇနီးများနှင့်သားသမီးများကို စွန့်ပစ်ခြင်းသို့ပင် မကြာခဏ ဦးတည်သွားစေသည်။ ရက်စက်ကြမ်းကြုတ်သော ကျင့်ကြံသူအရေအတွက်မှာ အလွန်ပင် များပြားလှသည်။

"ရှင့်ရဲ့ တာအိုလက်တွဲဖော်တွေသာ မိစ္ဆာဂိုဏ်းကျင့်ကြံသူတွေရဲ့ ဝိုင်းရံခြင်းကို ခံရပြီး.. သေရေးရှင်ရေး အခြေအနေနဲ့ ရင်ဆိုင်ခဲ့ရရင် ရှင် သူတို့ကို ကယ်တင်မှာလား မကယ်တင်ဘူးလား..."

ထိုအခိုက်အတန့်တွင် လန်ယွဲ့ရှီက ကျိုးစွေ့ကို စူးစိုက်ကြည့်လိုက်သည်။ သူမ၏အမူအရာမှာ အတော်ပင် လေးနက်နေပုံရသည်။

"သေချာတာပေါ့.. ကျွန်တော်ကယ်တင်မှာပေါ့.. သေရေးရှင်ရေး အခြေအနေဖြစ်ခဲ့ရင်တောင် ကျွန်တော် သူတို့ကို ကယ်တင်ဦးမှာပဲ..."

" သူတို့မရှိတော့ဘဲ ကျွန်တော်တစ်ယောက်တည်း ကျန်ခဲ့ရင်.. ကျွန်တော့်အတွက် ဘာအဓိပ္ပာယ်မှ ကျန်တော့မှာမဟုတ်ဘူးလေ..."

ကျိုးစွေ့က စဉ်းပင်မစဉ်းစားဘဲ စိတ်အားထက်သန်စွာဖြင့် တုံ့ပြန်လိုက်သည်။ သူ၏ယခင်ဘဝတွင် သူသည် ရည်းစားသညာအမေးအဖြေများတွင် ကျွမ်းကျင်ထားပြီး၊ သူ၌ လုံလောက်သော သီအိုရီပိုင်းဆိုင်ရာ အတွေ့အကြုံရှိကာ အမှားလုပ်မည်မဟုတ်ပေ။

"ငါထင်တဲ့အတိုင်းပဲ... ဒီလောကမှာ မတူညီတဲ့ ယောက်ျားတွေ ရှိနေသေးတာပဲ.. မင်းက မကောင်းတဲ့လူဆိုပေမဲ့.. သစ္စာရှိပြီး ဖြောင့်မတ်တာပဲ..."

လန်ယွဲ့ရှီသည် သူမ၏နှလုံးသားထဲတွင် နွေးထွေးသော ခံစားချက်တစ်ခုကို ခံစားလိုက်ရပြီး အနည်းငယ် တုန်ယင်သွားသည်။

ကျိုးစွေ့အပေါ် သူမ၏နှစ်သက်တွယ်တာမှုမှာ လျင်မြန်စွာ တိုးလာသည်ဟု သူမ ခံစားလိုက်ရသည်။

အမှန်တကယ်တွင် သူမသည် သူ၏စကားလုံးများကို သံသယမဝင်ပေ။

မီယွင်မြို့ကို တစ္ဆေမိစ္ဆာဂိုဏ်းက ဝန်းရံတိုက်ခိုက်သည့်အခါတွင်၊ သူသည် သူ၏တာအိုလက်တွဲဖော်များကို မစွန့်ပစ်ဘဲ၊ ထိုအစား ကြီးမားသော မြေအောက်စခန်းတစ်ခုကို တည်ဆောက်နိုင်ခဲ့သည်။

သူသည် မိမိကိုယ်ကို ကာကွယ်ရုံသာမက၊ သူ၏တာအိုလက်တွဲဖော်များကိုပင် ကာကွယ်ခဲ့သည်။ သူသာ ဖြောင့်မတ်မှန်ကန်မှုနှင့် သစ္စာရှိသော ယောက်ျားတစ်ဦး မဟုတ်ခဲ့ပါက၊ ဤသို့သော များစွာပင်ပန်းရမည့် အလုပ်တစ်ခုကို ဘယ်တော့မှ ပြီးမြောက်အောင်မြင်နိုင်မည်မဟုတ်ပေ။

ယခုတွင်ပင်၊ သူသည် အခြေတည်ဆေးလုံးသုံးလုံးကို ဖော်စပ်ပြီး၊ သူ၏တာအိုလက်တွဲဖော်အားလုံးကို အဆင့်တက်ရာတွင် အထောက်အကူပြုရန် ပေးအပ်ခဲ့သည်။

အနာဂတ်တွင် ဤယောက်ျားသည် အခြေတည်ဆေးလုံးအား ရရှိနိုင်မည်ဟု ဆိုသော်ငြား၊ အနာဂတ်အား မည်သူက အာမခံနိုင်ပါမည်နည်း။

အဆင့်နှစ်ယောင်သားရဲအမြုတေအား မရရှိနိုင်ခဲ့လျှင်၊ သို့မဟုတ် သူသာ အခြေတည်ဆေးလုံးတစ်လုံးကို အောင်မြင်စွာ မဖော်စပ်နိုင်ခဲ့လျှင် မည်သို့လုပ်မည်နည်း။

အနာဂတ်တွင် မည်သည့်အရာမဆို ဖြစ်နိုင်သည်။ မည်သူက တစ်ရာရာခိုင်နှုန်း သေချာနိုင်မည်နည်း။

အခြေတည်ဆေးလုံးများသာ မရှိတော့ပါက တစ်စုံတစ်ယောက်၏ လမ်းကြောင်းမှာ ပိတ်ဆို့သွားနိုင်ခြေများသည်မှာ သံသယဖြစ်စရာမလိုချေ။

မိမိ၏တာအိုလက်တွဲဖော်များ အဆင့်တက်ရာတွင် ကူညီရန် မိမိ၏ကိုယ်ပိုင်လမ်းကြောင်းကို ဆန္ဒအလျောက် စတေးမည့်သူ၊ ဤသို့သော ရွေးချယ်မှုကို ပြုလုပ်မည့် နောက်ထပ်ယောက်ျားတစ်ဦးကို သူမ မည်သို့မျှစဉ်းစား၍ မရနိုင်ပေ။

အင်မော်တယ်ရှားဂိုဏ်းအတွင်း၌ပင် ပင်မတပည့်များသည် အလွန်ဖော်ရွေစွာ ပြုမူဆက်ဆံကြသော်လည်း၊ အခြေတည်ဆေးလုံးများအတွက် ယှဉ်ပြိုင်ရသည့်အခါ သူတို့သည် ရက်စက်ကြမ်းကြုတ်လာပြီး သနားညှာတာမှုမပြပေ။

ပင်မတပည့်များထဲမှ တစ်ဦးမျှ နောက်ဆုတ်မည်မဟုတ်ပေ။

ယောက်ျားတစ်ယောက်၏ စာရိတ္တကို သူပြောသောအရာ၊ သူတွေးသောအရာဖြင့် မဆုံးဖြတ်ဘဲ သူလုပ်သောအရာဖြင့်သာ ဆုံးဖြတ်နိုင်သည်။

အချို့လူများသည် စကားပြောကောင်းကြပြီး ဟန်ဆောင်တတ်ကာ စက်ဆုပ်ရွံရှာဖွယ်ကောင်းသည်။ သို့သော် အချို့မှာမူ စကားပြောကောင်းကြသလို၊ သူတို့သည် စစ်မှန်ပြီး အခြားသူများထံသို့ ပျော်ရွှင်မှုကို ယူဆောင်လာသည်။ ထင်ရှားသည်မှာ ဤယောက်ျားသည် ဒုတိယအမျိုးအစားတွင် ပါဝင်ပေသည်။

"စီနီယာလန်.. ခင်ဗျား အခု တစ်ယောက်တည်းလို့ ပြောခဲ့ပေမဲ့.. ခင်ဗျားသာ စိတ်မရှိဘူးဆိုရင် အနာဂတ်မှာ ကျွန်တော် ခင်ဗျားရဲ့မိသားစု ဖြစ်လာနိုင်ပါတယ်..."

ထိုအခိုက်အတန့်တွင် ကျိုးစွေ့သည် လန်ယွဲ့ရှီကို အလွန်လေးနက်စွာ စိုက်ကြည့်လိုက်သည်။

ဘာရယ်…။

ဤစကားကို ကြားသောအခါ လန်ယွဲ့ရှီသည် အရက်မူးနေသကဲ့သို့ ချက်ချင်းပင် မျက်နှာနီမြန်းသွားသည်။ ဤအကောင်စုတ်သည် သူဘာပြောနေသည်ဟု ထင်နေပါသနည်း။

"အနာဂတ်မှာ ကျွန်တော် ခင်ဗျားရဲ့မိသားစု ဖြစ်လာနိုင်ပါတယ်" ဆိုသည်မှာ အဘယ်နည်း။

၎င်းက နာမ်ပုဒ်လော သို့မဟုတ် ကြိယာပုဒ်လော။

ထိုအကောင်စုတ်က သူမ၏တာအိုလက်တွဲဖော် ဖြစ်လိုခြင်းပင်လော။

သို့သော် ဤနှာဘူးကောင်သည် သူ၏ဇနီးသုံးဦးနှင့်ပင် မကျေနပ်နိုင်ဘဲ၊ သူမကိုလည်း မျက်စိကျနေသည်လော။