ဒုတိယအဆင့် ဆေးဖော်စပ်ပညာရှင်အဖြစ်သို့ တက်လှမ်းခြင်း၊ အခြေတည်အဆင့် ဝိညာဉ်အာရုံ၏ အံ့ဖွယ်အသုံးပြုပုံ

မြေအောက်စခန်း။

တိတ်ဆိတ်သောအခန်းတစ်ခုထဲတွင်။

ကျိုးစွေ့သည် မီယွင်မြို့တွင် ဖြစ်ပျက်နေသောအရာများကို လျစ်လျူရှုထားလိုက်သည်။ သူတို့သည် သူ့ကို ဘယ်တော့မှ ရှာဖွေတွေ့ရှိနိုင်မည်မဟုတ်ကြောင်း သူသိထားသည်။

သူသည် လုမိသားစုထံမှ လုယက်ရရှိခဲ့သော ရတနာအမြောက်အမြားနှင့် လျှို့ဝှက်ကျမ်းအမျိုးမျိုး ပါဝင်သည့် မရေမတွက်နိုင်သော သိုလှောင်အိတ်များကို ပျော်ရွှင်စွာ စစ်ဆေးနေသည်။

"ဝိုး... သူတို့က ကျင့်ကြံခြင်းနည်းပညာကျမ်းတွေ အများကြီး စုဆောင်းထားကြတာပဲ..."

ကျိုးစွေ့ အံ့အားသင့်သွားသည်။

အနည်းဆုံး ကျမ်းတစ်ရာခန့် ရှိသည်ဟု သူအာရုံခံမိသည်။ တစ်ခုချင်းစီမှာ အခြေတည်အဆင့်အထိ ကျင့်ကြံနိုင်သည်။ အချို့မှာမူ ရွှေအမြုတေအဆင့်သို့တိုင် တက်လှမ်းနိုင်မည့် သတင်းအချက်အလက်များပင် ပါဝင်သေးသည်။

သာဓကအားဖြင့် ချန်ချွမ်းကျင့်စဉ်၊ ရှန်ကျားကျင့်စဉ်၊ ကူယွမ်ကျင့်စဉ်၊ တုလီကျင့်စဉ် စသည်တို့ ဖြစ်ကြ၏။

ဤလျှို့ဝှက်ကျမ်းတစ်ခုချင်းစီကိုသာ လေလံတင်ရောင်းချမည်ဆိုပါက၊ အဆင့်နိမ့်ဝိညာဉ်ကျောက်တုံး ထောင်ချီ၊ သောင်းချီ၍ပင် ရရှိပေလိမ့်မည်။

ထိုသို့သောကျမ်းမျိုးမှာ ချမ်းသာသော တစ်ကိုယ်တော်ကျင့်ကြံသူများပင်လျှင် တတ်နိုင်သည့်အရာမဟုတ်ချေ။

သို့သော် လုမိသားစုတွင်မူ ၎င်းတို့သည် နေရာတိုင်းတွင် ရှိနေကြပြီး၊ အရည်အချင်းပြည့်မီသော လုမိသားစုဝင်မည်သူမဆို ဤလျှို့ဝှက်ကျမ်းများကို လေ့လာနိုင်သည်။

ဤသည်မှာ လုမိသားစု၏အခြေခံအုတ်မြစ် မည်မျှနက်ရှိုင်းသည်အား ပြသနေသည်။

ရာစုနှစ်ပေါင်းများစွာ သက်တမ်းရှိမိသားစုတစ်စုသည် အမှန်တကယ်ပင် ဟာသမဟုတ်ချေ။

မှန်ပေသည်၊ ၎င်းမှာ လုမိသားစုဘိုးဘေး၏ ကြီးမြတ်ပုံကိုလည်း ပြသနေသည်။ သူသည် သူ၏ကိုယ်ပိုင်ကြိုးစားမှုဖြင့် လုမိသားစု၏ကြီးမားသော ကြွယ်ဝမှုကို တည်ဆောက်ခဲ့သည်။ သူမှလွဲ၍ ကျန်ရှိသော လုမိသားစုဝင်များမှာမူ သာမန်အရည်အချင်းမျှသာ ရှိကြသည်။

သို့သော်ငြား လုမိသားစု၏ ရာစုနှစ်များစွာ စုဆောင်းမှုသည် ယခုအခါတွင်မူ သူ၏ပိုင်ဆိုင်မှု ဖြစ်သွားခဲ့ပြီ ဖြစ်၏။

"ကျင့်ကြံခြင်းနည်းပညာကျမ်းတွေအပြင်.. အဆောင်ပညာရှင်.. လက်နက်ဖန်တီးရှင်.. အစီအရင်ပညာရှင်နဲ့ ဆေးဖော်စပ်ပညာရှင်တွေရဲ့ အမွေအနှစ်တွေလည်း ရှိသေးတယ်... ကျင့်ကြံခြင်းအနုပညာလေးရပ်ရဲ့ အမွေအနှစ်တွေက မယုံနိုင်လောက်အောင် ပြည့်စုံတာပဲ...”

"မီယွင်မြို့ကို ပိုင်ဆိုင်တဲ့ ဒီလုမိသားစုက စည်းစိမ်ဥစ္စာတွေ အများကြီး စုဆောင်းထားကြတာပဲ... အင်း... တကယ့်ကို အံ့ချီးလောက်စရာပါပဲ...”

"နှစ်သုံးရာ.. နှစ်ငါးရာလောက် သက်တမ်းရှိတဲ့ အခြေတည်အဆင့်မိသားစုတွေတောင်.. လုမိသားစုရဲ့ အမွေအနှစ်ကို ယှဉ်နိုင်လောက်မယ် မထင်ဘူး...”

"ဒါက မီယွင်မြို့ရဲ့ စည်ပင်သာယာမှုကြောင့်ပဲ ဖြစ်ရမယ်... တိမ်မြူခိုးတောင်တန်းဒေသမှာ တည်ရှိတော့.. အဆုံးမရှိတဲ့အရင်းအမြစ်တွေ ပေါကြွယ်ဝတာကိုး..”

"မိသားစုတွေအများကြီးက လုမိသားစုကိုမနာလိုကြတာ အံ့ဩစရာမဟုတ်တော့ဘူး... သူတို့အားလုံးက လုမိသားစုလဲကျနေချိန်မှာ အခွင့်ကောင်းယူချင်ကြမှာပေါ့... သူတို့က ပိုင်ဆိုင်မှုတွေ အများကြီး စုဆောင်းထားတာပဲ..."

"နေဦး... ဒုတိယအဆင့်ဆေးဖော်စပ်ပညာရှင် အမွေအနှစ်က တကယ်ပဲရှိနေတာပဲ... တကယ့်ကို အံ့ဩစရာပဲ..."

ရုတ်တရက် ကျိုးစွေ့၏မျက်လုံးများ တောက်ပသွားသည်။

လက်ကျန်ကျမ်းများကို သူလှန်လှောကြည့်ရာ အသိပညာတစ်ခုချင်းစီက သူ့ကို အံ့အားသင့်စေသည်။ ဤပညာရပ်များသည် သူယခင်က ပိုင်ဆိုင်ခဲ့သောအရာများထက် ကျော်လွန်နေသည်။

၎င်းတို့သည် တစ်ကိုယ်တော်ကျင့်ကြံသူများအတွက် ရရှိရန် လုံးဝမဖြစ်နိုင်သလောက်ဖြစ်သော ကျင့်ကြံခြင်းအသိပညာများဖြစ်၏။

ဤသည်မှာ ကျင့်ကြံခြင်းလောကတွင် အသိပညာအပေါ် လက်ဝါးကြီးအုပ်မှု မည်မျှပြင်းထန်သည်ကို ပြသနေသည်။

အဆင့်တစ်ခုသို့ မရောက်ရှိထားပါက၊ ၎င်းတို့အား ထိတွေ့နိုင်ရန် အရည်အချင်းပြည့်မီမည်မဟုတ်ပေ။

သို့သော် သူတန်ဖိုးအထားဆုံးအရာသည် သဘာဝအတိုင်း ဆေးဖော်စပ်ပညာရှင်၏ အမွေအနှစ်ပင်ဖြစ်ပြီး၊ ၎င်းမှာ သူ၏အခြေခံအုတ်မြစ်ပင် ဖြစ်၏။

သိပ်မကြာခင်မှာပင် သူသည် ဒုတိယအဆင့်ဆေးဖော်စပ်ပညာရှင် အမွေအနှစ်နှင့်ပတ်သက်သော ကျောက်စိမ်းမှတ်တမ်းကို ရှာဖွေတွေ့ရှိခဲ့ပြီး ချက်ချင်းပင် များစွာဝမ်းသာသွားသည်။

ဤသည်မှာ ဝိညာဉ်ကျောက်တုံးများ ရှိလျှင်ပင် မဝယ်ယူနိုင်သော အမွေအနှစ်အသိပညာဖြစ်သည်။

ဤအရာများကို ဂိုဏ်းများက တင်းတင်းကျပ်ကျပ် လက်ဝါးကြီးအုပ်ထားကြပြီး၊ တစ်ကိုယ်တော်ကျင့်ကြံသူများမှာမူ ၎င်းတို့ကို ရရှိပိုင်ခွင့်မရှိပေ။

သင်သာ ဂိုဏ်းတစ်ခုခုနှင့် မပူးပေါင်းပါက၊ ထိုသို့သောအသိပညာကို ရရှိရန်မှာ လက်တွေ့တွင် မဖြစ်နိုင်ပေ။

သူ၏အစောပိုင်းသံသယများက မှန်ကန်ပေသည်။ လုမိသားစုတွင် ဒုတိယအဆင့် ဆေးဖော်စပ်ပညာရှင်အမွေအနှစ် အမှန်တကယ် ရှိနေသည်။

လက်တွေ့အမှန်တရားမှာ သူ၏စိတ်ကူးထက်ပင် သာလွန်သွားသည်။ ၎င်းမှာ သူမျှော်လင့်ထားသည်ထက်ပင် ပို၍ပြည့်စုံနေသည်။

လုမိသားစုဘိုးဘေးသည် ဆေးဖော်စပ်ပညာရှင်အမွေအနှစ်၏ အရေးပါမှုကို သိရှိသည်မှာ ထင်ရှားပေသည်။ ၎င်းမှာ မိသားစု၏ အခြေခံအုတ်မြစ်ကို တည်ထောင်နိုင်သောအရာတစ်ခု ဖြစ်၏။

အကယ်၍ မိသားစုသည် ဒုတိယအဆင့် ဆေးဖော်စပ်ပညာရှင်တစ်ဦးကို အမှန်တကယ် မွေးထုတ်နိုင်ခဲ့ပါက၊ ၎င်းသည် လုမိသားစုအား ထောင်စုနှစ်သက်တမ်းရှိ မျိုးနွယ်တစ်ခုအဖြစ်သို့ တိုးတက်စေနိုင်ပေသည်။

"ငါတော့ ပွပြီ... ဒီဒုတိယအဆင့် ဆေးဖော်စပ်ပညာရှင်အသိပညာနဲ့ဆိုရင်... ငါ ဒုတိယအဆင့် ဆေးဖော်စပ်ပညာရှင်တစ်ယောက် ဖြစ်လာမှာသေချာတယ်..."

ကျိုးစွေ့ အလွန်ပင် စိတ်လှုပ်ရှားသွားသည်။

အချိန်အတော်ကြာ စောင့်ဆိုင်းပြီးနောက် နောက်ဆုံးတွင် ၎င်းကို သူရရှိခဲ့ပြီ ဖြစ်သည်။

သူသည် ဒုတိယအဆင့် ဆေးဖော်စပ်ပညာရှင်တစ်ဦး ဖြစ်လာရန် ခြေတစ်လှမ်းသာလိုတော့သည် ဖြစ်ပြီး၊ ဒုတိယအဆင့် ဆေးဖော်စပ်ပညာရှင်တစ်ဦး၏အသိပညာ မရှိသောကြောင့် တိုးတက်နိုင်ခြင်းမရှိခဲ့ပေ။

ထိုအတွေးများဖြင့်၊ သူသည် စိတ်လှုပ်ရှားမှုကို မထိန်းချုပ်နိုင်တော့ဘဲ၊ ထိုဆေးဖော်စပ်ပညာရှင်အမွေအနှစ် ကျောက်စိမ်းမှတ်တမ်းကို ဝါးမျိုရန် 'စာအုပ်ကူ'ကို ချက်ချင်း ထုတ်လွှတ်လိုက်သည်။

ဂျွတ်.. ဂျွတ်…

'စာအုပ်ကူ'သည် ချက်ချင်းပင် ၎င်းပေါ်သို့ ခုန်တက်ပြီး အမွေအနှစ် ကျောက်စိမ်းမှတ်တမ်းကို စတင်စားသုံးတော့သည်။

ကျောက်စိမ်းမှတ်တမ်းတစ်ခုလုံး 'စာအုပ်ကူ'၏ ဝမ်းဗိုက်ထဲသို့ ဝင်ရောက်သွားသောအခါ၊ တစ်ခဏအတွင်းမှာပင် များပြားလှသော အသိပညာစီးကြောင်းများက သူ့သိစိတ်ပင်လယ်၏ အနက်ပိုင်းထဲသို့ စီးဝင်လာတော့သည်။

ဒုတိယအဆင့် ဆေးဖော်စပ်ပညာရှင်နှင့် ပတ်သက်သော အသိပညာအမျိုးမျိုးသည် သူ၏စိတ်ထဲတွင် ချက်ချင်း ပေါ်လာသည်။

သူ၏ ဆေးဖော်စပ်ပညာ ကျင့်ကြံမှုမှာ ပထမအဆင့် ထိပ်တန်းအဆင့်၏ အထွတ်အထိပ်သို့ ရောက်ရှိနေပြီဖြစ်သော်လည်း သူချိုးဖျက်ဝင်ရောက်နိုင်ခြင်းမရှိခဲ့ပေ။

ဤအသိပညာကို ရရှိပြီးနောက် သူသည် နောက်ဆုံးတံခါး၏သော့ကို ရရှိလိုက်သကဲ့သို့ ခံစားရပြီး၊ သူ၏အတားအဆီးကို ချက်ချင်း ချိုးဖျက်နိုင်လိုက်သည်။

ဒုတိယအဆင့် ဆေးဖော်စပ်ပညာရှင်။

တစ်ခဏအတွင်းမှာပင် ကျိုးစွေ့သည် ဆေးဖော်စပ်ပညာရှင်နယ်ပယ်နှင့် ပတ်သက်၍၊ သူ၏နားလည်နိုင်စွမ်း ပိုမိုတိုးတက်လာသည်ကို အာရုံခံမိလိုက်သည်။ ၎င်းသည် မယုံနိုင်စရာ ခုန်ပျံကျော်တက်သွားခြင်းပင် ဖြစ်၏။

"ဒါဆိုရင် ဒါက ဒုတိယအဆင့် ဆေးဖော်စပ်ပညာရှင်တစ်ယောက်ရဲ့ လျှို့ဝှက်ချက်လား..."

"ဒုတိယအဆင့် ဆေးဖော်စပ်ပညာရှင်တစ်ယောက် ဖြစ်လာဖို့ အရေးကြီးဆုံးအရာက ဝိညာဉ်အာရုံကို အသုံးပြုခြင်းပဲ..."

ကျိုးစွေ့သည် ရုတ်တရက် ဉာဏ်အလင်းပွင့်သွားပြီး၊ ချီသန့်စင်ခြင်းအဆင့် ကျင့်ကြံသူများသည် မည်မျှပင်ပါရမီရှိစေကာမူ အဘယ်ကြောင့် ဒုတိယအဆင့် ဆေးဖော်စပ်ပညာရှင်များ ဖြစ်လာရန် ခက်ခဲသည်ကို ချက်ချင်း နားလည်သွားသည်၊ သူတို့သည် ပထမအဆင့် ထိပ်တန်းအဆင့် ဆေးဖော်စပ်ပညာရှင်နယ်ပယ်ကိုသာ ရရှိနိုင်သည်။

အကြောင်းရင်းမှာ ဒုတိယအဆင့် ဆေးဖော်စပ်ပညာရှင်တစ်ဦး ဖြစ်လာရန် ဝိညာဉ်အာရုံကို ကျွမ်းကျင်စွာ အသုံးပြုတတ်ရန် လိုအပ်သောကြောင့် ဖြစ်သည်။

ဝိညာဉ်အာရုံမရှိဘဲ မည်မျှပင် အံ့ဩဖွယ်ကောင်းသောပါရမီရှိစေကာမူ ဒုတိယအဆင့် ဆေးဖော်စပ်ပညာရှင်နယ်ပယ်သို့ မဝင်ရောက်နိုင်ပေ။

"ဒုတိယအဆင့် ဆေးလုံးတွေက.. ပထမအဆင့် ဆေးလုံးတွေထက် ပိုပြီးအစွမ်းထက်တယ်... အထူးသဖြင့် ဒုတိယအဆင့်ဆေးလုံးတစ်လုံးအဖြစ်.. ပေါင်းစပ်ဖို့လိုအပ်တဲ့ စိတ်ဝိညာဉ်ဆေးပင်တွေက.. သာမန်နည်းစနစ်တွေနဲ့ ဖော်စပ်ဖို့ လုံးဝမဖြစ်နိုင်သလောက်ပဲ..."

"ဒီအဆင့်မှာ စိတ်ဝိညာဉ်ဆေးပင်တွေထဲက အညစ်အကြေးအမျိုးမျိုးကို ထောက်လှမ်းဖို့ ဝိညာဉ်အာရုံရဲ့စွမ်းအားကို အသုံးပြုဖို့ လိုအပ်တာပဲ..."

"စိတ်ဝိညာဉ်ဆေးပင်တွေရဲ့ ဒီအတွင်းပိုင်း အညစ်အကြေးတွေကို ဝိညာဉ်အာရုံရဲ့ အကူအညီမပါဘဲ ရှာဖွေတွေ့ရှိနိုင်မှာမဟုတ်ဘူး..."

"ဒါက အဏုဇီဝပိုးမွှားတွေနဲ့ သဘောတရားတူတယ်... အဏုကြည့်မှန်ဘီလူးရဲ့ အကူအညီမပါဘဲ သူတို့ကို ရှာဖွေတွေ့ရှိနိုင်မှာမဟုတ်ဘူး..."

"ဝိညာဉ်အာရုံရဲ့စွမ်းအားကို အသုံးပြုပြီး ဒီအညစ်အကြေးတွေကို အာရုံခံ... မြေမီးလျှံစွမ်းအားကို အသုံးပြုပြီး သူတို့ကို ဖယ်ရှားမှသာ... ဒုတိယအဆင့် ဆေးလုံးတွေရဲ့ အောင်မြင်နိုင်ခြေကို အများကြီး တိုးမြှင့်နိုင်မှာပဲ..."

"ဝိညာဉ်အာရုံရဲ့ အကူအညီမပါဘဲ စိတ်ဝိညာဉ်ဆေးပင်တွေကို သန့်စင်ဖို့က အခြေခံအားဖြင့် မဖြစ်နိုင်ဘူး..."

"မသန့်စင်ရသေးတဲ့ စိတ်ဝိညာဉ်ဆေးပင်တွေထဲမှာ အညစ်အကြေးအများကြီးရှိတယ်... ဒီတော့စိတ်ဝိညာဉ်ဆေးပင်အမျိုးမျိုးက တစ်ခုနဲ့တစ်ခု ပဋိပက္ခဖြစ်မယ်... ဆေးဖော်စပ်ပညာက မလွဲမသွေ ကျရှုံးမှာဖြစ်ပြီးတော့... သဘာဝအတိုင်း ဒုတိယအဆင့် ဆေးလုံးတွေကို ဖော်စပ်နိုင်မှာမဟုတ်တော့ဘူး..."

"ဘယ်လောက်ပဲ ကြိုးစားကြိုးစား.. သေချာပေါက် အောင်မြင်နိုင်မှာ မဟုတ်ဘူး...”

ကျိုးစွေ့၏ မျက်လုံးများ တောက်ပသွားသည်။

၎င်းသည် အခြေတည်အဆင့်ကျင့်ကြံသူများ၏ ဝိညာဉ်အာရုံကို အံ့ဩဖွယ်ကောင်းစွာ အသုံးပြုခြင်းပင်ဖြစ်သည်မှာ သံသယဖြစ်စရာမလိုချေ။ ဝိညာဉ်အာရုံ၏စွမ်းအားမှာ ရန်သူများကို အာရုံခံရန်အတွက်သာမက ဆေးလုံးများ ဖော်စပ်ခြင်း၊ လက်နက်များ ပြုလုပ်ခြင်း၊ အဆောင်များ ဖန်တီးခြင်း စသည်တို့အတွက်ပါ အသုံးပြုသည်။

အင်မော်တယ်ကျင့်ကြံသူများ၏ စွမ်းရည်များစွာမှာ အခြေတည်အဆင့်ကျင့်ကြံသူတစ်ဦး ဖြစ်လာမှသာ ရရှိနိုင်ပေသည်။

ထို့ကြောင့် အခြေတည်အဆင့်သည် ကျင့်ကြံခြင်းလောကတွင် တကယ့်စမှတ်ပင် ဖြစ်၏။

ချီသန့်စင်ခြင်း ကျင့်ကြံသူများအတွက်မူ သူတို့သည် စမှတ်တွင်ပင် မထည့်သွင်းခံရဘဲ၊ သာမန်သေမျိုးလောကကိုသာ လွှမ်းမိုးနိုင်သည်ဟု သတ်မှတ်ခံရပေသည်။

ချီသန့်စင်ခြင်းအဆင့်ဖြင့်၊ ဒုတိယအဆင့် ဆေးဖော်စပ်ပညာရှင်အဆင့်ကို ရရှိခဲ့သော ပါရမီရှင်ဆေးဖော်စပ်ပညာရှင်များ အဘယ်ကြောင့် ဤမျှ မြင့်မားစွာ တန်ဖိုးထားခံရသည်မှာ အံ့ဩစရာမဟုတ်တော့ပေ။ သူတို့၏အဆင့်အတန်းမှာ အခြေတည်အဆင့် ကျင့်ကြံသူများနှင့် တန်းတူဖြစ်သည်။

၎င်းမှာ သူတို့သည် ဒုတိယအဆင့်ဆေးလုံးများ ဖော်စပ်နိုင်သည့်ကျွမ်းကျင်မှုကို ပိုင်ဆိုင်ထားသောကြောင့်သာ မဟုတ်ပေ။

ပို၍အရေးကြီးသည်မှာ ဒုတိယအဆင့် ဆေးဖော်စပ်ပညာရှင်တစ်ဦး ဖြစ်လာခြင်းသည် ဝိညာဉ်အာရုံ ဖွဲ့စည်းနိုင်ခြင်းကို ဆိုလိုသည်။

အကယ်၍ ထိုသို့သာဖြစ်ပါက ဒုတိယအဆင့် ဆေးဖော်စပ်ပညာရှင်တစ်ဦးသည် မလွဲမသွေ အခြေတည်အဆင့်ကျင့်ကြံသူတစ်ဦး ဖြစ်လာနိုင်ရန် အနည်းဆုံး ငါးဆယ်ရာခိုင်နှုန်း အခွင့်အရေးရှိသည်။

အကယ်၍ အခြေတည်ဆေးလုံးကို ထည့်သွင်းပါက အခွင့်အရေးမှာ ခုနစ်ဆယ်မှ ရှစ်ဆယ်ရာခိုင်နှုန်းအထိ တက်သွားပေမည်။

သူတို့သာ သူတို့၏ချီနှင့်သွေး၊ မှောစွမ်းအားကိုသာ ပြီးပြည့်စုံသောအခြေအနေသို့ ထပ်မံမြှင့်တင်နိုင်ပါက၊ သူတို့သည် အခြေတည်အဆင့်သို့ ရောက်ရှိရန် လုံးဝသေချာသလောက်ပင် ဖြစ်သည်။

ပြဿနာမှာ ချီသန့်စင်ခြင်းအဆင့်ဖြင့် ဒုတိယအဆင့် ဆေးဖော်စပ်ပညာရှင် ဖြစ်လာနိုင်သူများသည် ပန်ဒါဝက်ဝံများအလား ရှားပါးလှချေသည်။