အဆင့်သုံး သားရဲ၏ခြိမ်းခြောက်မှု၊ တိမ်မြူခိုးတောင်တန်းမှ မိသားစုကျင့်ကြံသူများ

"ဆိုတော့.. ဒါက အကြီးအကဲရှန်ပေါ့...”

ကျိုးစွေ့က ခေါင်းညိတ်လိုက်ပြီး "ကျွန်တော့်နာမည် ကျိုးစွေ့ပါ.. ဒီတစ်ခေါက် ကျွန်တော်က အခြေတည်အဆင့်အကြီးအကဲတစ်ယောက်နဲ့အတူ တိမ်မြူခိုးတောင်တန်းကို လာခဲ့တာပါ... ကျွန်တော်တို့က အနှောင့်အယှက်ပေးမိခဲ့ရင် ခွင့်လွှတ်ပေးကြပါ..."

သူ့နောက်တွင် အခြေတည်အဆင့်ကျင့်ကြံသူတစ်ဦး ကျောထောက်နောက်ခံပြုထားကြောင်းကိုလည်း ထောက်ပြလိုက်ပြီး ထိုလူများနှင့် အဆင့်အတန်းတူညီကြောင်း မသိမသာညွှန်ပြလိုက်သည်။

သို့မဟုတ်လျှင် သူတို့သည် သူ့အား အကူအညီမရှိသည့်တစ်ကိုယ်တော်ဟု ထင်ကာ မကောင်းသောအကြံမှား ကြံစည်နိုင်ပေသည်။

၎င်းမှာ ရွှေတုံးတစ်တုံးကို ကိုင်ဆောင်ထားသော သုံးနှစ်အရွယ်ကလေးတစ်ဦးနှင့် တူညီပေသည်။ မကောင်းသောစိတ်များ မဖြစ်ပေါ်စေအောင် နေထိုင်ရန်မှာ ခက်ခဲလှ၏။

သို့သော် ရွှေတုံးသည် လက်နက်ကိုင်ရဲတစ်ဦး၏ လက်ထဲတွင် ရှိနေပါက မည်သူမျှ ရန်စဝံ့မည်မဟုတ်ပေ။

ဤနေရာတွင်လည်း ထိုနည်းတူပင်ဖြစ်သည်။

"ဒီလိုကိုး.. ငါတို့ ဒီအခြေတည်အဆင့်အကြီးအကဲနဲ့ တွေ့ဆုံလို့ရနိုင်မလား..."

ရှန်ဝမ်သည် မည်သည့်ထူးခြားသော အမူအရာမျှ မပြဘဲ သူ၏အမူအရာမှာ နွေဦးလေပြေကဲ့သို့ နူးညံ့သိမ်မွေ့နေသည်။

"ဒါက သိပ်အဆင်ပြေမယ်မထင်ဘူး... အကြီးအကဲကျိုးက လက်ရှိမှာ တံခါးပိတ်ကျင့်ကြံနေတယ်... သူထွက်လာဖို့ အချိန်နည်းနည်း ကြာလောက်အုံးမယ်ဗျ..."

"ခင်ဗျားတို့ ဆွေးနွေးစရာ အရေးကြီးတဲ့ကိစ္စတစ်ခုခု ရှိခဲ့ရင် ကျွန်တော့်ကို ပြောပြခဲ့လို့ရပါတယ်.. ကျွန်တော် နောက်ပိုင်းမှာ အကြီးအကဲကျိုးကို ပြန်ပြောပြပေးပါ့မယ်..."

ကျိုးစွေ့က လေးနက်စွာ ပြောလိုက်သည်။

ဤကာလအတွင်း လန်ယွဲ့ရှီသည် အများအားဖြင့် တံခါးပိတ်ကျင့်ကြံနေသည်။

သူမ၏ခန္ဓာကိုယ်မှ သေစေနိုင်သောအဆိပ်ကို ဖယ်ရှားပြီးဖြစ်သော်လည်း၊ နှစ်ပေါင်းများစွာ ထိခိုက်မှုသည် အချိန်တိုအတွင်း ပြန်လည်ဖြည့်တင်းနိုင်သောအရာမဟုတ်ပေ။

ထို့ကြောင့် သူမသည် အချိန်အများစုကို တံခါးပိတ်ကျင့်ကြံရင်း သူမ၏ အခြေတည်အဆင့် အထွတ်အထိပ်စွမ်းအားကို ပြန်လည်ရယူနေသည်။

သူသည် လန်ယွဲ့ရှီ၏မျိုးရိုးအမည်ကို ကျိုးဟု တိုက်ရိုက် ပြောင်းလဲခဲ့သည်။

မည်သို့ပင်ဖြစ်စေ လန်ယွဲ့ရှီ၏ အမည်မှာ အလွန်ကျော်ကြားသည်။

မိုင်ပေါင်းသောင်းချီသော အကွာအဝေးအတွင်း အနည်းငယ်နာမည်ရှိသည့် မည်သည့်ကျင့်ကြံသူမဆို သူမကို သိရှိပေလိမ့်မည်။

သူမ၏တည်နေရာ ဖော်ထုတ်ခံရပါက တစ္ဆေမိစ္ဆာဂိုဏ်း၏ အခြေတည်အဆင့်ကျင့်ကြံသူများထံသို့ ဦးတည်သွားနိုင်သည်။

ထို့ကြောင့် သူသည် လန်ယွဲ့ရှီအား အထောက်အထားအသစ်တစ်ခု ပေးရန်စီစဉ်ပြီး၊ သူမကို သူ့ကျိုးမိသားစု၏ အကြီးအကဲတစ်ဦးအဖြစ် သတ်မှတ်ခဲ့သည်။

"အင်း... ဒါက ဝမ်းနည်းစရာပဲ..."

"တကယ်တော့ ငါတို့မှာ ထွေထွေထူးထူး ဘာမှမရှိပါဘူး... ငါတို့က အခွင့်အရေးရှာဖွေဖို့ တိမ်မြူခိုးတောင်တန်းထဲကို နက်နက်ရှိုင်းရှိုင်း ဝင်လာခဲ့ကြတဲ့ ကျင့်ကြံသူတွေပါပဲ..."

"အခုက တစ်ယောက်နဲ့တစ်ယောက် သိကျွမ်းအောင် လာနှုတ်ဆက်ကြတာပါ... ဒါမှ အနာဂတ်မှာ ငါတို့ တစ်ယောက်နဲ့တစ်ယောက် ကူညီပြီး သတင်းအချက်အလက်တွေ မျှဝေဖို့ ပိုလွယ်ကူစေမှာ..."

ရှန်ဝမ်သည် အနည်းငယ် စိတ်ပျက်သွားသော်လည်း နားလည်ကြောင်း ပြသခဲ့သည်။

မည်သို့ပင်ဖြစ်စေ၊ အခြေတည်အဆင့်ကျင့်ကြံသူများအတွက် တံခါးပိတ်ကျင့်ကြံခြင်းမှာ သာမန်ဖြစ်ပြီး ၎င်းကို ကြီးမားသောကိစ္စတစ်ခုဟု မထင်ပေ။

"တိမ်မြူခိုးတောင်တန်းတစ်ဝိုက်မှာ ကျင့်ကြံသူတွေ အများကြီး ရှိလား..."

ကျိုးစွေ့က စိတ်ဝင်တစား စူးစမ်းလိုက်သည်။

သူသည် မီယွင်မြို့တွင် အမြဲတစေနေထိုင်ခဲ့ပြီး အပြင်ထွက်သည်မှာ ရှားပါးလှသည်။

ကျင့်ကြံသူများစွာသည် တောင်တန်းထဲသို့ နက်ရှိုင်းစွာ စွန့်စားဝင်ရောက်ပြီး၊ အတွင်းရှိ သားရဲများ၏ သတ်ဖြတ်ခြင်းခံရသည်ကို ရံဖန်ရံခါ သူကြားဖူးခဲ့သည်။

သူ၏အမြင်တွင် တိမ်မြူခိုးတောင်တန်း၏ အတွင်းပိုင်းနက်ရှိုင်းသောနေရာများသည် အလွန်ပင် အန္တရာယ်များလှသည်။

တိမ်းရှောင်ရန်အတွက်နှင့်၊ အဆင့်နှစ်ယောင်သားရဲအမြုတေတစ်ခုကို ရယူရန်သာမဟုတ်လျှင် သူသည် ဤနေရာသို့ ရောက်လာခဲ့မည်မဟုတ်ပေ။

"ဟုတ်တယ်.. တော်တော်များများပေါ့... "

ရှန်ဝမ်က အနည်းငယ် ပြုံးလိုက်ပြီး "ဒီအနီးအနားမှာ အနည်းဆုံး အခြေတည်အဆင့် မိသားစုသုံးစု ရှိတယ်... ငါ့ရှန်မိသားစုရယ်.. ပြီးတော့ မုမိသားစုနဲ့.. ရှောင်မိသားစုတို့ပေါ့... ဒီမိသားစုတစ်ခုချင်းစီက ငါတို့ကျင့်ကြံသူတွေ တိမ်မြူခိုးတောင်တန်းထဲမှာ နေထိုင်နေစဥ် အဆင်ပြေအောင်လို့... ဒီပတ်ဝန်းကျင်မှာ ခြေကုပ်စခန်းတစ်ခုစီ တည်ဆောက်ထားကြတယ်လေ..."

"ဘယ်လိုပဲဖြစ်ဖြစ်.. တိမ်မြူခိုးတောင်တန်းက စိတ်ဝိညာဉ်ဆေးပင်တွေနဲ့ သားရဲအမျိုးမျိုး ပြည့်နှက်နေတာလေ... အန္တရာယ်များပေမဲ့ ကံကောင်းရင်တော့ အခြေတည်ဆေးလုံးတစ်လုံး တတ်နိုင်လောက်အောင်ထိ ချမ်းသာကြွယ်ဝလာနိုင်တယ်..."

တိမ်မြူခိုးတောင်တန်းထဲသို့ နက်ရှိုင်းစွာ စွန့်စားဝင်ရောက်သော ကျင့်ကြံသူအရေအတွက်မှာ မနည်းပါးကြောင်း ၎င်းကဆိုသည်။

သူတို့သည် တစ်ဖွဲ့ချင်းစီသည် တောင်တန်း၏မတူညီသောနေရာများတွင် အခြေချနေထိုင်ကြပြီး၊ ကိုယ်အစီစဉ်နှင့်ကိုယ် စိတ်ဝိညာဉ်ဆေးပင်များ စုဆောင်းကာ၊ သားရဲများကို အမဲလိုက်ကြသည်။

တိမ်မြူခိုးတောင်တန်းသည် ကျင့်ကြံသူအမြောက်အမြားကို နေရာချထားနိုင်လောက်အောင် ကြီးမားသောကြောင့် နယ်မြေအငြင်းပွားမှုများလည်း မရှိချေ။

ဤနေရာရှိ အကြီးမားဆုံးအန္တရာယ်မှာ ကျင့်ကြံသူများမဟုတ်ဘဲ၊ မြူခိုး၏နက်ရှိုင်းသောနေရာတွင် ပုန်းအောင်းနေသော သားရဲများနှင့် အဆိပ်ပြင်းသောပိုးမွှားအမျိုးမျိုးတို့ ဖြစ်၏။

"ကြည့်ရတာ.. ညီလေးကျိုးလည်း တိမ်မြူခိုးတောင်တန်းရဲ့ သယံဇာတအမျိုးမျိုးအတွက် ဒီကို ရောက်လာတာပဲထင်တယ်..."

ရှန်ဝမ်က ကျိုးစွေ့ကို တီးခေါက်ကြည့်လိုက်သည်။

"အမှန်ပါပဲ.. တကယ်တော့ ဒီတစ်ခေါက် ငါတို့မိသားစုအကြီးအကဲနောက်ကို လိုက်ပြီး.. အဆင့်နှစ်သားရဲတွေကို အမဲလိုက်ပြီးတော့.. အဆင့်နှစ် ယောင်သားရဲအမြုတေတွေ ရယူဖို့ပဲ... အဲ့တာတွေနဲ့ဆိုရင် ငါတို့မိသားစုက အခြေတည်ဆေးလုံးတစ်လုံး ဖော်စပ်နိုင်လောက်တယ်လေ.. ဒါတွေအားလုံးက ငါတို့မိသားစုရဲ့ အနာဂတ်အတွက်ပဲမဟုတ်လား..."

ကျိုးစွေ့က ရိုးသားစွာဖြင့်၊ ဤတစ်ကြိမ် သူတိမ်မြူခိုးတောင်တန်းသို့ လာရောက်ခြင်းမှာ အဆင့်နှစ် ယောင်သားရဲအမြုတေများအတွက် ဖြစ်ကြောင်း ထုတ်ဖော်လိုက်သည်။

အမှန်တကယ်တွင် ၎င်းနှင့်ပတ်သက်၍ ဖုံးကွယ်ထားစရာ ဘာမှမရှိပေ။

တိမ်မြူခိုးတောင်တန်းထဲသို့ နက်ရှိုင်းစွာ ဝင်ရောက်ကြသော ကျင့်ကြံသူအများစုမှာ အဆင့်နှစ်ယောင်သားရဲအမြုတေများ ရရှိရန် မျှော်မှန်းကြလေ့ရှိသည်။

သို့သော် ဝမ်းနည်းစရာမှာ ကျင့်ကြံသူအများစုမှာ မည်သည့်သဲလွန်စမှမကျန်၊ သားရဲများ၏အစာအိမ်အတွင်း၌သာ ပြီးဆုံးသွားရကြသည်။

"အဆင့်နှစ်ယောင်သားရဲအမြုတေလား... ရွှေကျောက်စိမ်းလင်ဇီးမှိုမရှိဘဲ မင်းသာ အဆင့်နှစ် ယောင်သားရဲအမြုတေတစ်ခု ရနိုင်ခဲ့ရင်.. အခြေတည်ဆေးလုံးကို ဖော်စပ်ဖို့ ကြိုးစားနိုင်တာပေါ့... ဒါပေမဲ့ အဆင့်နှစ် ယောင်သားရဲအမြုတေတစ်ခု ရဖို့က အရမ်းခက်တယ်..."

"ဘယ်လိုပဲဖြစ်ဖြစ် အဆင့်နှစ်သားရဲတိုင်းမှာ ယောင်သားရဲအမြုတေ မရှိဘူးလေ.. တစ်ခါတစ်လေ မင်း ဒါဇင်ပေါင်းများစွာ ဒါမှမဟုတ် အဲ့ဒီထက်ပိုတဲ့သားရဲတွေကို သတ်တာတောင် လက်ဗလာဖြစ်ရတတ်တယ်..."

"ပိုဆိုးတာက.. အဆင့်နှစ်သားရဲတွေ အရမ်းအများကြီး သတ်ဖြတ်ခံရရင်... သားရဲလှိုင်းလုံးတစ်ခု ဖြစ်ပေါ်လာနိုင်တယ်..."

ရှန်ဝမ်က လေးလေးနက်နက် ပြောလိုက်သည်။

"သားရဲလှိုင်းလုံး... ဘာကိုဆိုလိုတာလဲ..."

ကျိုးစွေ့က အလေးအနက် မေးလိုက်သည်။ အကြောင်းမှာ သူသည် တိမ်မြူခိုးတောင်တန်းနှင့် ပတ်သက်၍ များစွာ မရင်းနှီးသောကြောင့် ဖြစ်သည်။

"ညီလေးကျိုးက တိမ်မြူခိုးတောင်တန်းအကြောင်း သိပ်မသိပုံပဲ... တိမ်မြူခိုးတောင်တန်းရဲ့ အတွင်းပိုင်းနက်ရှိုင်းတဲ့နေရာမှာ ရွှေအမြုတေအဆင့်ဆရာသခင်တွေနဲ့ နှိုင်းယှဉ်နိုင်တဲ့ ကြောက်စရာ အဆင့်သုံးသားရဲတွေ ရှိတယ်ဆိုတာ မင်းသိသင့်တယ်..."

"တိမ်မြူခိုးတောင်တန်းမှာ နေထိုင်တဲ့ အဆင့်နှစ်သားရဲအများစုက အဲ့ဒီအဆင့်သုံး သားရဲတွေရဲ့ လက်အောက်ကပဲ.."

"အဆင့်နှစ် သားရဲအမြောက်အမြား သတ်ဖြတ်ခံရရင် သူတို့ကို ရန်စသလို ဖြစ်သွားလိမ့်မယ်.."

"တိမ်မြူခိုးတောင်တန်းရဲ့ သမိုင်းတစ်လျှောက်မှာ သားရဲလှိုင်း အများစုက အဆင့်သုံးယောင်သားရဲတွေကြောင့်ပဲ... "

"တကယ်လို့ သားရဲလှိုင်းလုံးတစ်ခု ဖြစ်ပွားခဲ့ရင် တိမ်မြူခိုးတောင်တန်းတစ်ခုလုံးကို သက်ရောက်ပြီးတော... မရေမတွက်နိုင်တဲ့ ကျင့်ကြံသူတွေ သေရလိမ့်မယ်..."

"ဟုတ်ပါတယ်လေ.. အဆင့်နှစ်သားရဲ အများကြီးကို သတ်ဖြတ်နိုင်ဖို့ဆိုတာကလည်း ဖြစ်နိုင်ခြေ အတော်လေး နည်းပါတယ်.."

"ဘယ်လိုပဲဖြစ်ဖြစ်.. အခြေတည်အဆင့်ကျင့်ကြံသူတစ်ဦးအတွက်တောင် အဆင့်နှစ် သားရဲတစ်ကောင်ကို သတ်ဖို့ဆိုတာ မယုံနိုင်လောက်အောင် ခက်ခဲတဲ့အလုပ်တစ်ခု ဖြစ်တယ်.."

"ညီလေးကျိုးက ဒီအကြောင်းကို စိုးရိမ်စရာမလိုလောက်ပါဘူး..."

ရှန်ဝမ် ရယ်မောလိုက်သည်။

တိမ်မြူခိုးတောင်တန်းတွင် သားရဲလှိုင်းလုံးတစ်ခု မဖြစ်ပွားခဲ့သည်မှာ အချိန်အတော်ကြာပြီဖြစ်သောကြောင့် ၎င်းအား အထူးတလည် သူစိုးရိမ်မနေချေ။

ထို့အပြင် အဆင့်နှစ်သားရဲများကို အကြီးအကျယ် အမဲလိုက်ရန် စိတ်ကူးမှာ မဖြစ်နိုင်သော အိပ်မက်တစ်ခုသာ ဖြစ်၏။

မည်သို့ပင်ဖြစ်စေ အဆုံးမရှိသော မြူခိုးတောထဲတွင် အဆင့်နှစ်သားရဲတစ်ကောင်ကို ရှာဖွေခြင်းမှာပင် အလွန်ခက်ခဲသည်။

ထို့အပြင် သားရဲတိုက်ခိုက်မှုများကို အချိန်တိုင်း သတိထားနေရန် လိုအပ်သည်။

သတိမထားပါက သင်က အဆင့်နှစ်သားရဲကို အမဲလိုက်ခြင်းမဟုတ်ဘဲ၊ အဆင့်နှစ်သားရဲက သင့်ကို အမဲလိုက်ခြင်း ဖြစ်ပေလိမ့်မည်။

တိမ်မြူခိုးတောင်တန်းသို့ ဝင်ရောက်သော ကျင့်ကြံသူအများစုမှာ စိတ်ဝိညာဉ်ဆေးပင်အမျိုးမျိုးကို ခူးဆွတ်ရန်၊ အဆင့်တစ်သားရဲအချို့ကို အမဲလိုက်ရန်နှင့် ဝိညာဉ်ကျောက်တုံးအမြောက်အမြား ရရှိရန်သာ လိုလားကြသည်။

"နားလည်ပါပြီ.. ကျုပ်ဒါကို မှတ်ထားပါ့မယ်..."

ကျိုးစွေ့ ရုတ်တရက် ကျောချမ်းသွားသည်။

တိမ်မြူခိုးတောင်တန်း၏ အတွင်းပိုင်းနက်ရှိုင်းသောနေရာမှ အဆက်မပြတ် ခြိမ်းခြောက်နေသော အငွေ့အသက်တစ်ခုကို သူအာရုံခံမိခြင်းမှာ အံ့ဩစရာမဟုတ်တော့ပေ။ ရွှေအမြုတေအဆင့် ဆရာသခင်နှင့် နှိုင်းယှဉ်နိုင်သော အဆင့်သုံးသားရဲတစ်ကောင် ထိုနေရာတွင် နေထိုင်လိမ့်မည်ဟု သူ မမျှော်လင့်ထားခဲ့ပေ။

၎င်းကို မတော်တဆရန်စမိခဲ့ပါက သူတို့ မည်သို့သေဆုံးသွားသည်ကိုပင် သိရှိမည်မဟုတ်ပေ၊ ၎င်းအား အနိုင်ယူရန် မဖြစ်နိုင်ပေ။

သို့သော် သူ၏ပြိုင်ဘက်မှာ အဆင့်နှစ်သားရဲတစ်ကောင်ဖြစ်သောကြောင့် အခြေအနေမှာ ထိုမျှ ဆိုးရွားသည်မဟုတ်ပေ။

"ကောင်းပြီ.. ငါတို့ရဲ့အခြေစိုက်စခန်းက ဟိုးအဝေးက ချိုင့်ဝှမ်းတစ်ခုမှာ တည်ရှိတယ်.. ညီလေးကျိုးသာ စိတ်ဝိညာဉ်ဆေးပင်တွေ ဒါမှမဟုတ် ရတနာတွေရခဲ့ရင် ငါတို့နဲ့ လာပြီး ကုန်သွယ်လို့ရတယ်.. ဒါဆိုရင် ငါတို့ အရင်းအမြစ်တွေချင်း လဲလှယ်လို့ရတာပေါ့..."

"တကယ်တော့ တိမ်မြူခိုးတောင်တန်းရဲ့ အတွင်းပိုင်းနက်ရှိုင်းတဲ့နေရာမှာ နေထိုင်တဲ့ ကျင့်ကြံသူတွေက.. ရတနာတွေကို မကြာခဏကုန်သွယ်ကြပြီး သူတို့အားလုံး အကျိုးအမြတ်တွေ ရကြတယ်လေ..."

ရှန်ဝမ်က လေးနက်စွာ ပြောသည်။

"စိတ်ချပါ.. ကျုပ်မှာ လိုအပ်တာတစ်ခုခု ရှိခဲ့ရင် ခင်ဗျားတို့နဲ့ သေချာပေါက် ကုန်သွယ်မှာပါ.."

ကျိုးစွေ့က ခေါင်းညိတ်လိုက်သည်။

ဝှစ်...။

စကားများ ပြောဆိုပြီးနောက် ထိုအဖွဲ့သည် နှုတ်ဆက်လိုက်ကာ အမြန်ပင် ပြန်လည်ထွက်ခွာသွားကြတော့၏။