လိပ်အသက်ရှူနည်းသံချပ်ကာ။ ပင်လယ်ချောက်နက်ကြီးကဲ့သို့ ကျယ်ပြောခြင်း။ (၂)

"နာမည်ကြီး ပင်လယ်ဓားပြအဖွဲ့အားလုံးရဲ့ တစ်ဝက်နီးပါးလောက် စုစည်းပြီး ရောက်လာမှာကို ငါစိုးရိမ်မိတယ်။ သူတို့ရဲ့ စုစုပေါင်း အရေအတွက်နဲ့ စစ်သင်္ဘောတွေက ငါတို့ရဲ့ ဧရာမဝေလငါးဂိုဏ်းထက် ကျော်သွားနိုင်တယ်။"

ထိုသို့သော အခြေအနေမျိုးကို မျှော်မှန်းထားသော်လည်း စစ်ခုန်းဝမ်သည် မထိတ်လန့်ဘဲ မနေနိုင်ပေ။

လွန်ခဲ့သည့် နှစ်ဝက်အတွင်း လီဟွင်းသည် ဧရာမဝေလငါးဂိုဏ်းကို ဆန့်ကျင်ရန် အခြားသော ပင်လယ်ဓားပြအဖွဲ့များကို အကြောင်းကြားကာ စည်းရုံးရင်း အလုပ်များနေခဲ့သည်။

ဧရာမဝေလငါးဂိုဏ်းသည် အစည်ကားဆုံးသော သင်္ဘောလမ်းကြောင်းများကို သိမ်းပိုက်ထားပြီး ငွေဝင်နေသောကြောင့် ပင်လယ်ဓားပြများအတွက် မနာလိုဖွယ်ရာ အရင်းအမြစ်တစ်ခုဖြစ်ခဲ့သည်မှာ ကြာပြီဖြစ်သည်။ ဧရာမဝေလငါးဂိုဏ်းသည် ၎င်းတို့၏အာဏာကို ထူထောင်ရန်အတွက် ပင်လယ်ဓားပြများကို သုတ်သင်ရန် မကြာခဏထွက်လေ့ရှိသောကြောင့် မိုးပြာပင်လယ်က ပင်လယ်ဓားပြများကို အမုန်းပွားစေခဲ့သည်။

အခုတော့ သူတို့၏လက်ထဲတွင် စစ်ခုန်းကျန့်ရှိနေပြီး လီဟွင်း၏ သွေးဆောင်မှုကြောင့် ပင်လယ်ဓားပြအဖွဲ့ ရှစ်ဖွဲ့ သို့မဟုတ် ကိုးဖွဲ့ကို စုစည်းနိုင်ခဲ့သည်။ ယနေ့ သူတို့သည် အရသာရှိသော ဧရာမဝေလငါးကြီးကို နောက်ဆုံးအကိုက်အထိ ကိုက်ဖြတ်စားသောက်လိုသော သွေးဆာနေသည့် ငါးမန်းအစုအဝေးကဲ့သို့ ဤပင်လယ်ဒေသတွင် စုဝေးနေကြသည်။

နှစ်ဦးနှစ်ဖက် ထိပ်တိုက်တွေ့ကြသော်လည်း လှုပ်ရှားမှု မပြုကြသေးပေ။ ပင်လယ်တစ်ပြင်လုံးတွင် အရွယ်စုံသင်္ဘောများဖြင့် ပြည့်နှက်နေ၏။ တိုက်ပွဲစတင်သည်နှင့် တပြိုင်နက် အလွန်ပြင်းထန်ပြီး သွေးထွက်သံယို တိုက်ပွဲတစ်ခုဖြစ်လာမှာ သေချာပါသည်။

ခပ်လှမ်းလှမ်းတွင် လှပစွာ သွန်းလုပ်ထားပြီး ပန်းများစွာဖြင့် အလှဆင်ထားသည့် လှေငယ်တစ်စင်းသည်အနားသို့ ချဉ်းကပ်လာကာ ပွဲလမ်းသဘင်ရှိသည့် အသွင်အပြင်နှင့်။

သင်္ဘောဦးကိုကြည့်လိုက်တော့ အစိမ်းရောင်အဝတ်အစားနှင့် ပျော့ပျောင်းတဲ့ အသွင်နဲ့ လူတစ်ယောက်က အကျယ်ကြီး အော်ပြောလိုက်သည် "ဂိုဏ်းခေါင်းဆောင် စစ်ခုန်း၊ ကျွန်တော်က ဂိုဏ်းခေါင်းဆောင် စစ်ခုန်းကိုကြိုဆိုဖို့ ခေါင်းဆောင် လီဟွင်း ညွှန်ကြားထားတဲ့ တစ္ဆေပင်လယ်ဓားပြအဖွဲ့ရဲ့ ဒုခေါင်းဆောင် လီဖေးပါ။"

သူစကားပြောနေစဉ်တွင် ဤဇိမ်ခံအနီရောင်လှေသင်္ဘောသည် အကြီးဆုံးနှင့် အထင်ရှားဆုံး ဧရာမဝေလငါး နံပါတ်တစ်ဆီသို့ ဦးတည်လာနေသည်။

“ဂိုဏ်းခေါင်းဆောင်…”

ဧရာမဝေလငါးနံပါတ်တစ်တွင် ခန်းမခေါင်းဆောင်များစွာသည် စစ်ခုန်းယုံအဖြစ်အသွင်ပြောင်းထားသော စူးချန်ခုန်းဆီသို့ လှမ်းကြည့်လိုက်ကြသည်။

ဤပင်လယ်ဓားပြများသည် အစည်းအဝေးအတွက် စစ်ခုန်းယုံကို တစ်ယောက်တည်း ဖိတ်ခေါ်ခြင်းဖြင့် 'ကျားကို တောင်ပေါ်မှ ဆင်းလာဖို့ မျှားခေါ်ရန်' ကြံစည်နေကြောင်း သူတို့ သိသည်။ ၎င်းက သေချာပေါက် အလွန်အန္တရာယ်များသော နေရာတစ်ခုဖြစ်ပြီး စစ်ခုန်းယုံသာ ထောင်ချောက်ထဲသို့ ကျသွားခဲ့ပါက သို့မဟုတ် ကြိုမမြင်နိုင်သော အန္တရာယ်နှင့် ကြုံတွေ့ခဲ့ရပါက သူတို့၏ခေါင်းဆောင်မရှိတော့ရင် ဧရာမဝေလငါးဂိုဏ်း သေချာပေါက် စိတ်ဓာတ်ကျသွားမည်ပင်။ ပင်လယ်ဓားပြများ အများအပြားကို ရင်ဆိုင်ရင်း ရလဒ်မှာ ဆိုးရွားသော ရှုံးနိမ့်မှုဖြစ်နိုင်သည်။

သို့ပေမယ့် သွားဖို့ ငြင်းဆန်၍လည်း မဖြစ်ပေ။ စစ်ခုန်းကျန့်သည် ရန်သူ့လက်ထဲမှာ ရှိနေ၏။

ဒီအခြေအနေကို စောစောက ဆွေးနွေးထားပြီးတာဖြစ်လို့ စူးချန်ခုန်းက ဂရုမစိုက်ဟန်ဖြင့် ဆိုလေ၏ "ဒါဆို ငါ လိုက်သွားမယ်!"

"သမီးလည်း အဖေနဲ့အတူ လိုက်ခဲ့မယ်!"

"ကျွန်တော်ရောပဲ!"

"ကျွန်တော်လည်း လိုက်ခဲ့မယ်!"

စူးချန်ခုန်း ပြောပြီးတာနဲ့ တခြားလူတော်တော်များများက တုံ့ပြန်ကြသည်။

ထိုလူများထဲတွင် စစ်ခုန်းဟွမ်နှင့် ခန်းမခေါင်းဆောင်နှစ်ယောက်ဖြစ်သည့် ကျောက်ထျန်းဟောက်နှင့် ကုန်းအန်းတို့ ပါဝင်သည်။ ခန်းမခေါင်းဆောင်နှစ်ဦးစလုံးသည် ထိပ်တန်း ခန်းမခေါင်းဆောင်လေးဦးထဲတွင် ထူးခြားစွာ ငယ်ရွယ်တက်ကြွပြီး စစ်ခုန်းယုံ ကိုယ်တိုင် ရာထူးတိုးပေးခဲ့တာဖြစ်သည်။ ယခုအခါ သူတို့သည် သတ္တိရှိရှိဖြင့် 'စစ်ခုန်းယုံ' နောက်လိုက်လိုကြသည်။

"ကောင်းပြီ အကြီးအကဲက ကျေးဇူးပြုပြီး ဒီမှာ အမိန့်ပေးဖို့ နေခဲ့ပါ။ တစ်ခုခုဖြစ်ရင် အခြေအနေကို ကြည့်ပြီးစီစဉ်ပေးပါ။ ကျွန်တော် သူတို့ ခေါင်းတွေကို ယူခဲ့မယ်။"

စူးချန်ခုန်းက စစ်ခုန်းဝမ်ကို ပြောလိုက်သည် ။

စစ်ခုန်းဝမ်သည် ဧရာမဝေလငါးဂိုဏ်း၏ ဂိုဏ်းခေါင်းဆောင်ဟောင်းဖြစ်ပြီး အခြားသော ခန်းမခေါင်းဆောင်နှစ်ဦးနှင့်အတူ တိုက်ပွဲတွင် သူတို့၏ဂိုဏ်းကို ကွပ်ကဲရာ၌ ပို၍အတွေ့အကြုံရှိသည်။

လီဟွင်းသည် 'ကျားကိုတောင်ပေါ်မှ ဆင်းလာဖို့ မျှားခေါ်ရန်' ကြံစည်နေပါက စူးချန်ခုန်းသည် သားကောင်အစစ်အမှန်ကို သူတို့အား ပြသမည်ဖြစ်သည်။

“ဟုတ်ကဲ့” စစ်ခုန်းဝမ်နှင့် အခြားသော ခန်းမခေါင်းဆောင်များအားလုံးသည် စူးချန်ခုန်း၏ ရဲစွမ်းသတ္တိကို နှလုံးသားထဲတွင် ချီးမွမ်းကာ တလေးတစား တုံ့ပြန်လိုက်ကြသည်။ တစ္ဆေကျွန်းသည် ထောင်ချောက်တစ်ခုဖြစ်သည်ကို ကောင်းစွာသိထားသော်လည်း သူကတည်ငြိမ်နေဆဲပင်။

အနီရောင် အခမ်းအနား လှေငယ်လေး နီးကပ်လာ၏။ မဆိုင်းမတွဘဲ စူးချန်ခုန်းသည် ဧရာမဝေလငါးနံပါတ်တစ်၏ ကုန်းပတ်မှ ကျက်သရေရှိစွာ ခုန်ဆင်းကာ အနီရောင် လှေပေါ်တွင် ဆင်းသက်ခဲ့ပြီး စစ်ခုန်းဟွမ်၊ ကျောက်ထျန်းဟောက်နှင့် ကုန်းအန်းတို့က အနီရောင် လှေပေါ်သို့ ဆက်တိုက် ဆင်းလာကြသည်။

“သွားကြရအောင်။”

စူးချန်ခုန်းသည် လီဟွင်း၏ညီဖြစ်သည့် တစ္ဆေအုပ်စု၏ ဒုခေါင်းဆောင် လီဖေးကို သာမန်ကာလျှံကာ တစ်ချက်ကြည့်လိုက်သည်။

“ဟုတ်ကဲ့။”

လီဖေးသည် စူးချန်ခုန်းကို စေ့စေ့စပ်စပ်ကြည့်ရင်း အပြုံးလေးနှင့် ခေါင်းညိတ်ပြလိုက်သည်။

ဝှီး!

လှေနီပေါ်ရှိ သင်္ဘောသားများသည် တစ္ဆေကျွန်းဆီသို့ ဦးတည်သွားစဉ် လှေကို ရေစီးကြောင်းကိုဖြတ်ကာ လှော်ခတ်ခဲ့ကြသည်။

အနီရောင် လှေသည် ဧရာမဝေလငါးဂိုဏ်း၏ ရေယာဉ်စု သိမ်းပိုက်ထားသော ပင်လယ် ဧရိယာမှ ထွက်ခွာပြီး လမ်းတစ်လျှောက် ပင်လယ်ဓားပြ သင်္ဘောများကို ဖြတ်သန်းကာ လမ်းကြောင်းအတိုင်း ဆက်သွားခဲ့သည်။

တစ္ဆေကျွန်းသည် ဤပင်လယ်ဓားပြသင်္ဘောများနောက်တွင် ရှိသည်။ ပြဿနာဖြစ်လာရင် ကယ်တင်မယ့်သူ မရှိပေ။

မကြာမီတွင် ကြီးမားကျယ်ပြန့်သော ကျွန်းတစ်ကျွန်းသည် လက်နက်ကိုင်ပင်လယ်ဓားပြများ ကမ်းစပ်တွင် အပြည့်ဖြင့် အနီးနားတွင် ပေါ်လာသည်။

အနီရောင်လှေကို ဆိုက်ကပ်လိုက်ပြီး လီဖေး သည် ပထမဆုံး ဆင်းလာသူဖြစ်သည်။ "လူကြီးမင်းတို့၊ ကျွန်တော့်နောက်က လိုက်ခဲ့ကြပါ။ ကျွန်တော့်ရဲ့ အစ်ကိုက ဧည်ခံဖို့ စောင့်နေတာကြာပါ၊ပြီ"

လေးယောက်အုပ်စုသည် လီဖေးနောက်မှ လိုက်လာကြသည်။

"ဒီကျွန်းမှာ ပင်လယ်ဓားပြအဖွဲ့တွေရဲ့ ထိပ်တန်းလက်ရွေးစင်တွေ၊ ခြေလှမ်းဆယ်လှမ်းတိုင်းမှာ ကင်းစောင့်တွေ၊ ခြေလှမ်းငါးလှမ်းတိုင်း အစောင့်တွေနဲ့ ပြည့်နေတယ်။ အများစု က ချပ်ဝတ်တန်ဆာ အထူကြီးတွေကို ဝတ်ထားကြတယ်။"

မီးဝေလငါး ခန်းမခေါင်းဆောင်သည် တစ္ဆေကျွန်းက အမှန်တကယ်ပင် ထောင်ချောက်ဖြစ်ကြောင်း သတိပြုမိသောအခါ လေးနက်သော အမူအရာ ပေါ်လာလေ၏။

လမ်းတစ်လျှောက်တွင် ပင်လယ်ဓားပြအများအပြားသည် မတ်တပ်ရပ်ကာ ပြင်းထန်သော ရောင်ဝါများ ထုတ်လျက် လေးလံသော သတ္တုချပ်ဝတ်တန်ဆာကို ၀တ်ဆင်ထားကြသည်။ သူတို့ဟာ ပင်လယ်ဓားပြတွေနဲ့ သိပ်မတူသလို လေ့ကျင့်ထားတဲ့ စစ်သားတွေနဲ့ ပိုတူသည်။

စူးချန်ခုန်းသည် အရိပ်ထဲတွင် ပုန်းကွယ်နေသော ဆိုးယုတ်သည့် အကြည့်များကို ခံစားရင်း တည်ငြိမ်သော အမူအရာဖြင့် ထိန်းထားသည်။ ဒီအချိန်မှာ ဒီကျွန်းဟာ ရန်သူတွေနဲ့ ပြည့်နှက်နေသည်။

လမ်းလျှောက်ရင်း အဆောက်အဦများစွာကို တွေ့ခဲ့ကြပြီး ရာနှင့်ချီသော ပင်လယ်ဓားပြများ တစ်ထောင်နီးပါးနှင့် ပြည့်ကျပ်နေသော လေ့ကျင့်ရေးကွင်းဟု ထင်ရသည့် ရင်ပြင်ကြီးတစ်ခုသို့ ရောက်သောအခါ အားလုံးသည် စူးချန်ခုန်းနှင့် သူ၏အဖော်များကို စိုက်ကြည့်နေကြသည်။

"ငါတို့ တိုက်ကြခိုက်ကြရင်... ဒီပင်လယ်ဓားပြတွေရဲ့ အရေအတွက်နဲ့တင် ငါတို့ကို ခက်ခဲ စေလိမ့်မယ်!"

အရပ်ရှည်ရှည် သွယ်လျလျနှင့် လျှပ်စီးဝေလငါးခန်းမခေါင်းဆောင် ကုန်းအန်းသည် စိတ်ထဲ ရှုံ့မဲ့နေမိသည်။

ချီသွေးနယ်ပယ်၏ သိုင်းပညာရှင်တစ်‌ေယာက်သည် ယောက်ျားတစ်ရာကို ချနိုင်သော်လည်း ကောင်းစွာလေ့ကျင့်ထားသော စစ်သည်တစ်ထောင်နှင့်ရင်ဆိုင်ရပါက အရှင်လတ်လတ် နုတ်နုတ်စဉ်းခံရနိုင်ဖွယ်ရှိသည်။

"ဂိုဏ်းခေါင်းဆောင် စစ်ခုန်းက အဝေးကနေ ခရီးထွက်လာတာပဲ။ ကျွန်တော်တို့ သေသေချာချာ မကြိုဆိုလိုက်ရဘူးဗျာ။"

လမ်းတစ်လျှောက် ပင်လယ်ဓားပြများသည် လမ်းကြောင်းတစ်ခုကို ရှင်းလင်းလိုက်စဉ်တွင် ပေါ့ပေါ့ပါးပါးရယ်သံတစ်ခု ထွက်ပေါ်လာသည်။

ရင်ပြင်ကျယ်ကြီး၏အလယ်ဗဟိုတွင် လူများဝိုင်းရံထားသော စားပွဲဝိုင်းကြီးတစ်ခုရှိသည်။ အနည်းဆုံး တစ်ဒါဇင် သို့မဟုတ် လူ နှစ်ဆယ်လောက်ရှိကာ တစ်ယောက်စီတွင် အားကောင်းသော အရောင်အဝါနှင့် ပြင်းထန်သော ချီစွမ်းအင်နှင့် သွေးများ စီးဆင်းနေသည့် ခံစားရသည်။

"အားလုံးနီးပါးက ချီသွေးနယ်ပယ်မှာ ရှိနေကြတယ်... သူတို့က ပင်လယ်ဓားပြအဖွဲ့တွေရဲ့ ခေါင်းဆောင်နဲ့ ဒုခေါင်းဆောင်တွေလား။"