အခန်း (၁၅၂၃)

“ ရွှေကျီးကန်း ”

“ ရှေးဦးအပျက်အစီးတောအုပ်ထဲမှာ ရွှေကျီးကန်းစွမ်းအားက ရှိသေးတာလား ”

“ အခု ရွှေကျီးကန်းက အရှေ့ပင်လယ်ကမ်းစပ်မှာ အခြေချနေထိုင်နေတဲ့ သေးငယ်တဲ့ ကလန်တစ်ခုပဲ မဟုတ်ဘူးလား ”

နတ်သားရဲလေးကောင်ဖြစ်သော မြွေနဂါး၊ တိမ်ကြောင်နှင့် ကြေးမုံလိပ်နှစ်ကောင်သည် အမွှေးရှည်မြင်းနှင့် သံမဏိမျောက်၏ သေခြင်းရှင်ခြင်းကို ဂရုမစိုက်ကြချေ။ ယင်းအစား ၎င်းတို့က ဟန်မူယဲ့ပိုင်ဆိုင်ထားသော ရွှေကျီးကန်းစွမ်းအားကို ပိုပြီးစိတ်ဝင်စားကြသည်။

ဟန်မူယဲ့က ထိုမြင်ကွင်းကို ကြည့်လိုက်ပြီး အရှေ့သို့ ခုန်လိုက်သည်။ တစ်ဆက်တည်းမှာ သူက လက်ထဲမှ လှံရှည်ကို ကိုင်မြှောက်လိုက်သည်။

ရွှေကျီးကန်းနတ်ဘုရားမီးတောက်က လှံရှည်၏ ထိပ်ဖျားပေါ်မှာ ထွက်ပေါ်လာပြီး လှံကိုယ်ထည်တစ်ခုလုံးကို ဖုံးလွှမ်းသွားသည်။

လှံထိပ်ဖျားက လေထဲမှာ လှည့်ပတ်သွားပြီး အမြှီးရှည် ကြေးမုံလိပ်တစ်ကောင်ဆီသို့ ဦးတည်ပျံသန်းသွားသည်။

“ ဝှီး ”

လှံထိပ်ဖျားက ကြေးမုံလိပ်၏ အမြှီးနှင့် ထိပ်တိုက် တွေ့ဆုံသွားသည့်အခါ လှံပေါ်မှ မီးတောက်များက အမြှီးတစ်ခုလုံးကို ရစ်ပတ်သွားသည်။ ယင်းက ကြေးမုံလိပ်ကို မြေပေါ်မှာ လူးလွန့်သွားစေပြီး နာကျင်စွာ အော်ဟစ်ညည်းညူသွားစေသည်။

ဤနေရာမှာ အချိန်အတန်ကြာ နေထိုင်ပြီးနောက် လေ၊ မိုးကြိုး၊ ရေနှင့် မီးက ရှေးဦးအပျက်အစီးတောအုပ်၏ အခြေခံမူလစွမ်းအားများဖြစ်ကြောင်း ဟန်မူယဲ့ နားလည်သွားခဲ့သည်။ ယင်းတို့က နတ်သားရဲများ၏ သွေးမျိုးဆက်စွမ်းအားထက်ပင် ပိုပြီးအားကောင်းကြသည်။

ယင်းက နဂါးမီကျောင်း၏ ရုပ်ခန္ဓာကိုယ်နှင့် သွေးမျိုးဆက်ကို တိုက်ရိုက် ယှဉ်ပြိုင်နိုင်သော မူလစွမ်းအားတစ်မျိုး ဖြစ်သည်။

ဖြစ်နိုင်သည်မှာ အထက်ဘုံအားလုံးတွင်လည်း ထိုအတိုင်းပင်လော။

ထိုအတွေးက အသူရာကောင်းကင်ဘုံဆီသို့ ရောက်ဖူးသော ဟန်မူယဲ့၏ စိတ်ထဲမှာ ထွက်ပေါ်လာလေသည်။

“ ဗုန်း ”

လှံထိပ်ဖျားက ကြေးမုံလိပ်၏ ကျောပေါ်မှ အခွံကို ထိမှန်သွားလေရာ ၎င်း၏ ခန္ဓာကိုယ်က အဝေးသို့ လွင့်စင်သွားသည်။

ဟန်မူယဲ့က လေထဲမှာ ရပ်လိုက်ပြီး လှံကို ပြန်ဖမ်းယူလိုက်သည်။ ထို့နောက် သူက မီးခိုးရောင်မြူခိုးထဲမှာ ပုန်းအောင်းနေပြီး သူ့အား သတိကြီးကြီးထား၍ စောင့်ကြည့်နေသော တိမ်ကြောင်ကို ကြည့်လိုက်သည်။

“ ဘီဖန်… တိမ်ကြောင်ကို အသက်သုံးခါရှူချိန်ကြာ ငါထိန်းထားနိုင်မယ်ဆိုရင် မြွေနဂါးကို မင်းသတ်ပစ်နိုင်မလား ”

ဟန်မူယဲ့က တည်ငြိမ်သော အမူအရာဖြင့် ပွင့်လင်းစွာ ပြောသည်။

အသက်သုံးခါရှူချိန်အတွင်း မြွေနဂါးကို သတ်ရမှာလား… ။

ဟန်မူယဲ့ထံမှ စကားက ဤနေရာမှ နတ်သားရဲအားလုံးကို အံ့ဩသွားစေသည်။

လေကဲ့သို့ အလွန်လျှင်မြန်သော တိမ်ကြောင်ကို အသက်သုံးခါရှူချိန်ကြာ ထိန်းထားပေးမည်လော။

ထိုအသက်သုံးခါရှူချိန်အတွင်းမှာ မြွေနဂါးကို သတ်ပစ်မည်လော။

အရေးကြီးသည့်အချက်မှာ ထိုပူးပေါင်းဆောင်ရွက်မှုက အမှန်တကယ်လော။

အကယ်၍ ဟန်မူယဲ့ပြောသည့်စကားက အလိမ်အညာဖြစ်နေလျှင် အစွမ်းကုန် ထုတ်သုံးတော့မည့် ဘီဖန်က တန်ဖိုးကြီးတစ်ခုကို ပေးချေရလိမ့်မည်။

ဘီဖန်၏ အနောက်မှ လွင့်မျောမိုးတိမ်သားရဲက အတောင်ပံတဖျပ်ဖျပ်ခတ်လိုက်ပြီး ဘီဖန်ကို ကြည့်လိုက်သည်။

မြွေနဂါးက အနောက်ဆုတ်သွားပြီး တိုးညင်းသော ဟိန်းသံကို ထုတ်လွှတ်လိုက်သည်။ ထိုအခါ မြူခိုးတိမ်များက ၎င်း၏ ပါးစပ်ထဲမှ ထွက်ပေါ်လာပြီး ၎င်း၏ ဘေးပတ်ဝန်းကျင်မှာ သိပ်သည်းသွားသည်။

ကြယ်များက တိမ်ကြောင်၏ မျက်လုံးထဲမှာ မှိတ်တုတ်မှိတ်တုတ် လင်းလက်သွားသည်။ ထို့နောက် မရေမတွက်နိုင်သော ပုံရိပ်အများအပြားက ၎င်း၏ ဘေးပတ်ဝန်းကျင်မှာ ထွက်ပေါ်လာကြသည်။

ဤအခိုက်အတန့်မှာ နတ်သားရဲအားလုံးက စတင်လှုပ်ရှားလိုက်ကြသည်။

ဟန်မူယဲ့၏ ရောက်ရှိလာမှုက ၎င်းတို့အပေါ် ကြီးမားသော ဖိအားကို ဖြစ်ပေါ်စေသည်။

“ ကျီး ”

ဘီဖန်က အော်ဟစ်လိုက်ပြီး ၎င်း၏ အတောင်ပံများကို ဖြန့်ကားလိုက်ကာ မြွေနဂါးဆီသို့ ဦးတည်သွားသည်။

နောက်ဆုံးမှာတော့ ၎င်းက လှုပ်ရှားလိုက်သည်။

မြွေနဂါး ပါးစပ်ဟလိုက်သည့်အခါ ရက်စက်ကြမ်းကြုတ်မှုက ၎င်း၏ မျက်လုံးထဲမှာ ပေါ်လျှိုးလာသည်။ မီးခိုးရောင်ပုတီးစေ့တစ်လုံးက ၎င်း၏ ပါးစပ်ထဲမှ ထွက်ပေါ်လာပြီး ဘီဖန်၏ ခြေထောက်တစ်ချောင်းဖြင့် တွေ့ဆုံသွားသည်။

၎င်းက ဘီဖန်နှင့် အသေအကြေတိုက်ခိုက်ရန် ဆန္ဒမရှိပေ။ ၎င်းက အသက်သုံးခါရှူချိန် တောင့်ခံရန်သာ ဆန္ဒရှိသည်။

ထိုအခိုက်အတန့်မှာ တိမ်ကြောင်သည်လည်း တိုက်ခိုက်ရန် လှုပ်ရှားလိုက်လေသည်။ ၎င်း၏ ခြေထောက်များက လေဟာနယ်ကို ဆုတ်ဖြဲနိုင်သော စွမ်းအားကို သယ်ဆောင်၍ ဘီဖန်ဆီသို့ တစ်ဟုန်ထိုး ပြေးသွားသည်။

အကယ်၍ ဟန်မူယဲ့က ၎င်းကို မတားဆီးနိုင်လျှင် ဘီဖန်က သေချာပေါက် သေဆုံးသွားလိမ့်မည်။

အကယ်၍ ဟန်မူယဲ့က ၎င်းကို တားဆီးနိုင်မည်ဆိုလျှင်ပင် အသက်သုံးခါရှူချိန်ပြည့်အောင် မတောင့်ခံနိုင်သော် ဘီဖန်က ဒဏ်ရာပြင်းထန်စွာ ရရှိသွားလိမ့်မည်။

အခြေအနေက မျက်စိတစ်မှိတ်အတွင်းမှာ ကြီးမားစွာ ပြောင်းလဲသွားသည်။ ဤအခိုက်အတန့်မှာ ဘေးပတ်ဝန်းကျင်မှ လေဟာနယ်က တုန်ယင်သွားပြီး မိုးမြေစွမ်းအား၏ ဖိနှိပ်မှုက တိုက်ရိုက် လှုံ့ဆော်ခံလိုက်ရသည်။ လေဟာနယ်က အကြီးအကျယ် ပြိုကွဲပျက်စီးသွားသည်။

နတ်သားရဲသုံးကောင်၏ တစ်ပြိုင်နက် ထုတ်လွှတ်လိုက်သော စွမ်းအားက မိုးမြေစွမ်းအား၏ အာရုံစိုက်မှုကို ဆွဲဆောင်သွားသည်။

ထိုအခိုက်အတန့်မှာ ဟန်မူယဲ့က တင်းကျပ်စွာ သူဆုပ်ထားသော လှံကို ရုတ်တရက် ဖြေလွှတ်လိုက်သည်။

သူ၏ လက်ချောင်းထိပ်များပေါ်မှာ သန့်စင်သော အလင်းရောင်က ဖြတ်ပြေးသွားသည်။

ရွှေရောင်ဒေါင်လိုက်မျဉ်းကြောင်းသုံးခုက သူ၏ လက်ချောင်းထိပ်များမှတဆင့် ပေါ်လျှိုးလာပြီး တိမ်ကြောင်ဆီသို့ ဦးတည်သွားသည်။

ယင်းတို့က လျောင်ယွမ်မျိုးနွယ်စု၏ နတ်ဘုရားအင်းသင်္ကေတများမှလွဲ၍ တခြားမဟုတ်ပေ။

နတ်ဘုရားအင်းသင်္ကေတများကို အသုံးပြု၍ တိမ်ကြောင်ကို ဖိနှိပ်ခြင်း… ။

ထိုနတ်ဘုရားအင်းသင်္ကေတသုံးခုက မီးတောက်ဧရာမလက်ဝါးတစ်ခုအဖြစ် ပြောင်းလဲသွားပြီး တိမ်ကြောင်ပေါ်သို့ တိုက်ရိုက် ဖိချလိုက်သည်။

ဘီဖန်၏ အနားသို့ တိမ်ကြောင်မရောက်သွားမီ ဧရာမလက်ဝါးတစ်ခုက ၎င်း၏ ဦးခေါင်းပေါ်မှာ ထွက်ပေါ်လာပြီး အောက်သို့ ဖိချလိုက်သည်။

မြေပြင်ပေါ်တွင် ကျောက်တုံးများက တုန်ယင်သွားပြီး တိမ်ကြောင်၏ ဆယ်ပေရှည်လျားသော ခန္ဓာကိုယ်က မြေကြီးထဲသို့ ကျွံဝင်သွားသည်။ သွေးက ၎င်း၏ ခန္ဓာကိုယ်ထဲမှ ဒလဟော စိမ့်ထွက်လာသည်။

ကောင်းကင်ပေါ်တွင် မြွေနဂါးဆီသို့ ဦးတည်သွားနေသော ဘီဖန်က ရုတ်တရက် လမ်းကြောင်းပြောင်းလိုက်ပြီး မြေပြင်ပေါ်မှ တိမ်ကြောင်၏ ခန္ဓာကိုယ်ကို အကြင်နာမဲ့စွာ ကန်ကျောက်လိုက်သည်။

“ ခရက် ”

အရိုးကျိုးသံက ကျယ်လောင်စွာ ပဲ့တင်ထပ်သွားသည်။

သို့သော် တိုက်ခိုက်မှုက မပြီးဆုံးသေးပေ။

ဘီဖန်က ၎င်း၏ ခြေထောက်ကို နောက်တစ်ကြိမ် မြှောက်လိုက်ပြီး ဖိချလိုက်သည်။

“ ခရက် ”

ဤတစ်ကြိမ်တွင် ဘီဖန်၏ ခြေထောက်က တိမ်ကြောင်၏ ဦးခေါင်းပေါ်သို့ ကျဆင်းသွားလေရာ တိမ်ကြောင်၏ မူလစွမ်းအားက စတင်ယုတ်လျော့သွားသည်။

ထိုအချိန်မှာ အသက်သုံးခါရှူချိန်က ပြည့်သွားသည်။

ထိုအသက်သုံးခါရှူချိန်အတွင်းမှာ မြွေနဂါးက ဘာမှမထိခိုက်သွားသော်လည်း နတ်သားရဲတိမ်ကြောင်သည်တော့ ကျဆုံးသွားသည်။

အပြုံးက ဟန်မူယဲ့၏ မျက်နှာပေါ်မှာ ထွက်ပေါ်လာသည်။ သူက ဘီဖန်ကို ကြည့်လိုက်ပြီး ထပ်မံ ပြောသည်။

“ အသက်သုံးခါရှူချိန်အတွင်း မင်းက မြွေနဂါးနဲ့ တိုက်ခိုက်ပါ… ငါက ကျန်တဲ့အကောင်တွေနဲ့ တိုက်ခိုက်မယ် ”

ထိုသို့ပြောပြီးနောက် သူက အစောနက အဝေးသို့ လွင့်စင်သွားခဲ့သော ကြေးမုံလိပ်ကို လှမ်းကြည့်လိုက်သည်။

ဘီဖန်က အတောင်ပံဖြန့်လိုက်ပြီး ကောင်းကင်ပေါ်သို့ ပျံတတ်သွားသည်။

နတ်သားရဲများက ငတုံးများ မဟုတ်ကြချေ။ ၎င်းတို့က လူသားနည်းတူ အသိဉာဏ်ရှိကြသည်။

ဟန်မူယဲ့ဖြစ်စေ နတ်ငှက်ဘီဖန်ဖြစ်စေ ၎င်းတို့ထုတ်ဖော်ပြသခဲ့သော စွမ်းအားက အလွန်အားကောင်းလေရာ မြွေနဂါးနတ်သားရဲသည်ပင် ၎င်းတို့ကို တစ်ယောက်တည်း မရင်ဆိုင်နိုင်ပေ။

ဘီဖန်နှင့် လွင့်မျောမိုးတိမ်သားရဲ နှစ်ကောင်တည်းကိုပင် ၎င်းတို့အုပ်စုက အနိုင်မယူနိုင်ခဲ့သည့်အပြင် ယခု တိမ်ကြောင်နတ်သားရဲက အသစ်ရောက်ရှိလာသော ဟန်မူယဲ့၏ လက်ချက်ကြောင့် အသက်ဆုံးရှုံးသွားခဲ့သည်။ သို့ဖြစ်၍ ကျန်ရှိသော ၎င်းတို့သုံးကောင်က ဤတိုက်ပွဲမှာ မည်သို့မှ အနိုင်မရနိုင်တော့ပေ။

ဟန်မူယဲ့၏ စကားဆုံးသွားပြီး ဘီဖန်က လေပေါ်သို့ ပျံတတ်သွားသည်နှင့်ချက်ချင်း မြွေနဂါးပေါ်မှ အကြေးခွံအားလုံးက ထောင်မတ်သွားသည်။ ၎င်းက တရှဲရှဲမြည်သံကို ထုတ်ဖော်လိုက်ပြီး ချက်ချင်း အနောက်လှည့်ကာ ထွက်ပြေးသွားသည်။

မီးခိုးရောင်မြူခိုးက ပုံရိပ်ယောင်အတောင်ပံတစ်စုံအဖြစ် ပြောင်းလဲသွားပြီး ၎င်း၏ အလျင်ကို တိုးမြှင့်ပေးလိုက်လေရာ မြွေနဂါးက မျက်စိတစ်မှိတ်အတွင်း မိုင်တစ်ရာအကွာအဝေးသို့ ရောက်ရှိသွားသည်။

အခြားတစ်ဖက်တွင်တော့ ကြေးမုံလိပ်နှစ်ကောင်က မြေပြင်ပေါ်မှာ လွန်းပျံသဖွယ် တရစပ် လှည့်ပတ်လိုက်ကြပြီး မြေကြီးအောက်ထဲသို့ ထိုးဖောက်ဝင်သွားကြသည်။

ထိုနတ်သားရဲသုံးကောင်သည် သေဘေးမှ လွတ်မြောက်ရန် ၎င်းတို့၏ မွေးရာပါ အသက်ကယ်စွမ်းရည်များကို ထုတ်သုံးလိုက်ကြသည်။

ဘီဖန်၏ ခြေထောက်တစ်ချောင်းက မြေပြင်ပေါ်သို့ ကျဆင်းသွားသည့်အခါ လေမှလွဲ၍ တခြားမည်သူ့ကိုမှ မထိသွားချေ။ ယင်းက မြေပြင်ကို ဖုန်ထသွားစေပြီး သစ်ပင်ပေါ်မှ ငှက်များကို ကြောက်လန့်တကြား ထပျံသွားစေသည်။

ဟန်မူယဲ့သည် ထိုနတ်သားရဲများနောက်သို့ လိုက်မဖမ်းပေ။

နတ်သားရဲများကြားမှ တိုက်ပွဲတွင် ကြီးမားသော အင်အားကွာခြားမှုမရှိလျှင် တစ်ဖက်လူက ထွက်ပြေးချင်သည့်အခါ ၎င်းကို ထိန်းထားနိုင်ရန် အလွန်ခက်ခဲလိမ့်မည်။

ဥပမာ အစောနက ကြေးမုံလိပ်နှစ်ကောင် အသုံးပြုသွားခဲ့သော မြေလျှိုးအတတ်ပညာသည် ၎င်းတို့၏ ခန္ဓာကိုယ်ကို မြေကြီးဖြင့် တစ်သားတည်း ဖြစ်စေနိုင်သည်။ သို့ဖြစ်၍ တစ်စုံတစ်ယောက်ဆီမှာ အချင်းမိုင်တစ်ထောင်ကျယ်ဝန်းသော ကုန်းမြေကို ဖျက်ဆီးပစ်နိုင်သည့် စွမ်းအားမရှိလျှင် ထိုကြေးမုံလိပ်များကို သတ်ပစ်နိုင်လိမ့်မည် မဟုတ်ချေ။

ဘီဖန်၏ ဒေါသတကြီး ခြေဆောင့်မှုက အချင်းပေတစ်သောင်းအတွင်းမှ ဧရိယာကိုသာ ဖုန်ထစေနိုင်သည်။

“ ဘီဖန်… မိတ်ဆွေလေးအရှေ့မှာ ကိုယ့်ကိုယ်ကိုယ် အရှက်ရအောင် မလုပ်နဲ့ ”

သူတို့အနောက်မှ လွင့်မျောမိုးတိမ်သားရဲက အော်ပြောသည်။

နတ်သားရဲများသည် စကားဖြင့်မဟုတ်ဘဲ ဝိညာဉ်စွမ်းအားမှတဆင့် အပြန်အလှန် ဆက်သွယ်နိုင်ကြသည်။

လွင့်မျောမိုးတိမ်သားရဲ၏ စကားကို ကြားသောအခါ ဘီဖန်က ငြိမ်သက်သွားသည်။

သို့သော်လည်း ဘီဖန်က ဟန်မူယဲ့ကို ကျေးဇူးတင်စကားမဆိုပေ။ ယင်းအစား ၎င်းက အတောင်ပံဖြန့်လိုက်ပြီး ဟန်မူယဲ့ဆီသို့ တန်းမတ်စွာ ပျံသန်းသွားသည်။

ကြင်နာမှုကို ထိုသို့ကျေးစွပ်တော့မည်လော။

“ ဘီဖန်… ရှင်ရူးသွားပြီလား ”

လွင့်မျောမိုးတိမ်သားရဲက အနောက်မှ လှမ်းအော်လိုက်သည်။

ဟန်မူယဲ့၏ အမူအရာက မပြောင်းလဲသွားချေ။ ဘီဖန် သူ့အရှေ့သို့ ရောက်လာသည့်အခါ ဟန်မူယဲ့က ရိုးရှင်းစွာ လက်မြှောက်လိုက်ပြီး လက်ညှိုးညွှန်လိုက်သည်။

“ ဘန်း ”

သူ၏ သွေးအနှစ်သာရက ဧရာမတူတစ်လက်အဖြစ် အသွင်ပြောင်းလဲသွားပြီး ဘီဖန်၏ ခန္ဓာကိုယ်နှင့် ဝင်ဆောင့်သွားသည်။

ဘီဖန်က အနောက်သို့ နာကျင်စွာ လွင့်စင်သွားသည်။

“ သေစမ်း… ဒီကောင်က ရွှေကျီးကန်းကလန်က မဟုတ်ဘူးဆိုတာ ငါသိတယ် ”

ဘီဖန်က မြေပြင်ပေါ်သို့ ပြုတ်ကျသွားပြီးနောက် အတောင်ပံတဖျပ်ဖျပ်ခတ်လိုက်ပြီး အော်ဟစ်ညည်းညူလိုက်သည်။

လွင့်မျောမိုးတိမ်သားရဲက အမြန်ပြေးလာသည်။ ဘီဖန် ဒဏ်ရာမရသွားကြောင်း မြင်သည့်အခါမှ ၎င်းက စိတ်သက်သာရာရစွာ သက်ပြင်းချနိုင်သွားသည်။

လွင့်မျောမိုးတိမ်သားရဲက အတောင်ပံတဖျပ်ဖျပ်ခတ်လိုက်ပြီး ဟန်မူယဲ့ကို မော့ကြည့်လိုက်သည်။

“ မိတ်ဆွေလေး… ငါ့ကလေး အခြေအနေဘယ်လိုရှိလဲ သိလို့ရမလား ”

ဟန်မူယဲ့က ဤနေရာသို့ လွင့်မျောမိုးတိမ်သားရဲ၏ ကလေးကိုယ်ပေါ်မှ အငွေ့အသက်ကို အသုံးပြု၍ ရောက်လာခဲ့ခြင်း ဖြစ်၏။

သို့ဖြစ်၍ လွင့်မျောမိုးတိမ်သားရဲက သူ့အား ထိုသို့မေးလာခြင်းမှာ မထူးဆန်းပေ။

ဘီဖန်က မတ်တတ်ပြန်ရပ်လိုက်သည်။ ၎င်းက ခြေထောက်တစ်ချောင်းဖြင့် လမ်းအနည်းငယ် လျှောက်ပြီးနောက် တီးတိုးပြောသည်။

“ ငါ့ကလေး ဘယ်မှာလဲလို့ သူ့ကို ငါမေးမလို့ပါ ”

“ ကျုပ်ကလေးကို ရှင်စိတ်ပူပေးစရာ မလိုပါဘူး ”

လွင့်မျောမိုးတိမ်သားရဲက အေးစက်စက်လေသံဖြင့် ပြောသည်။

“ ငါက စိတ်မပူရဘူးလား… ငါ့ကလေးကြောင့် မဟုတ်ရင် ဒီလောက်မိုင်ထောင်ပေါင်းများစွာ ဝေးတဲ့ အကွာအဝေးကို ဖြတ်ကျော်ပြီး ဒီကို ရောက်လာမှာလား ”

ဘီဖန်က မကျေနပ်စွာ ပြောသည်။ ထို့နောက် ၎င်းက ဟန်မူယဲ့ထံသို့ လှည့်လိုက်ပြီး ပြောသည်။

“ ထားလိုက်ပါတော့… မိတ်ဆွေလေးအရှေ့မှာ ငါတို့စကားမများသင့်ဘူး ”

လွင့်မျောမိုးတိမ်သားရဲသည်လည်း ဟန်မူယဲ့ကို လှည့်ကြည့်လိုက်သည်။

“ ခင်ဗျားတို့ရဲ့ ကလေးကို ဟွမ်ယန်မျိုးနွယ်စုက ဘေးကင်းလုံခြုံတဲ့နေရာဆီ ခေါ်ဆောင်သွားပြီ ”

ဟန်မူယဲ့က ပြောသည်။

သူ၏ အကြည့်က ဘီဖန်ပေါ်သို့ ကျရောက်သွားသည့်အခါ စူးစမ်းလိုစိတ်က သူ၏ မျက်နှာပေါ်မှာ ထွက်ပေါ်လာသည်။

“ ရှေးဦးအပျက်အစီးကုန်းမြေရဲ့ စည်းမျဉ်းစွမ်းအားအရဆို မြွေနဂါးနဲ့ တခြားနတ်သားရဲတွေက ခင်ဗျားကို ဝိုင်းရံတိုက်ခိုက်ဖို့ အဲ့လောက်သတ္တိမရှိသင့်ဘူးမလား ”

မည်သို့ဖြစ်ပါစေ သွေးမျိုးဆက်စွမ်းအားကြားမှာ ကွာခြားချက် ရှိသည်။

ထို့ပြင် သွေးမျိုးဆက်ဖိနှိပ်မှုက ဟာသမဟုတ်ပေ။

ဘီဖန်၏ သွေးမျိုးဆက်က ကမ္ဘာဦးခေတ်မှာပင် ထိပ်တန်းအဆင့် တည်ရှိမှုတစ်ခုဖြစ်ပြီး ၎င်း၏ သွေးမျိုးဆက်က ပြီးပြည့်စုံသည်။

ထိုသို့နတ်သားရဲက ကမ္ဘာဦးအပျက်အစီးကုန်းမြေထဲမှာ ထိပ်တန်းတည်ရှိမှုအဖြစ် အမြဲတမ်း သတ်မှတ်ခံရလေရာ သာမန်နတ်သားရဲများက ၎င်းကို မရိုမသေ မဆက်ဆံဝံ့ကြချေ။

ဥပမာ ကမ္ဘာဦးအပျက်အစီးကုန်းမြေထဲတွင် ထိပ်ဆုံးဆယ်ကောင် အထွတ်အထိပ်နတ်သားရဲများနှင့်ပတ်သက်၍ ငြင်းခုန်မှုအမျိုးမျိုးရှိပြီး သွေးမျိုးဆက်အမျိုးမျိုးကြားတွင် နှိုင်းယှဉ်မှုများ ရှိသည်။

ဘီဖန်သည် လေနှင့်မီးဒြပ်စင် နတ်သားရဲများကြားတွင် အထွတ်အထိပ်တည်ရှိမှုတစ်ခု ဖြစ်သည်။

“ ဟူး… ရှေးဦးအပျက်အစီးကုန်းမြေက အရင်ကလို မဟုတ်တော့ဘူး… ”

ဘီဖန်က ဟန်မူယဲ့ကို ကြည့်လိုက်သည်။

“ အစောနက ငါမင်းကို တိုက်ခိုက်ခဲ့တာက မင်းက နတ်ဘုရားရင်းမြစ်ကောင်းကင်နန်းတော်ကလူ ဟုတ်မဟုတ် ငါစစ်ဆေးချင်လို့ပါ ”

နတ်ဘုရားရင်းမြစ်ကောင်းကင်နန်းတော်လား။

နတ်ဘုရားရင်းမြစ်ကောင်းကင်နန်းတော်၏ လက်တံက ကမ္ဘာဦးအပျက်အစီးကုန်းမြေအထိ ရောက်လာပြီလား။

ဟန်မူယဲ့က ဘီဖန်ကို ကြည့်လိုက်ပြီး လေးနက်စွာ ပြောသည်။

“ ကျုပ်ကို အသေးစိတ် ပြောပြပါ ”

နတ်ဘုရားရင်းမြစ်ကောင်းကင်နန်းတော်မှ လူများက ကမ္ဘာဦးအပျက်အစီးကုန်းမြေထဲမှာ မည်သည့်ကိစ္စကြီးကို ဆောင်ရွက်နေကြသနည်း။

ဘီဖန်က ဟန်မူယဲ့ကို ကြည့်လိုက်သည်။ ၎င်းက အတောင်ပံတဖျပ်ဖျပ်ခတ်၍ ကောင်းကင်ပေါ်သို့ ပျံသန်းသွားသည်။

“ ခရီးဆက်ရင်း စကားပြောကြတာပေါ့ ”

…..