ချီသွေးအသွင်ပြောင်းခြင်း အဆင့်ခြောက်။ ဆဋ္ဌမအဆင့် ဧရာမဝေလငါးနည်းပညာ။ (၁)

“သူတို့က တကယ်ကို နတ်ဘုရားလက်တံဒူးလေးအတွက် လာခဲ့ကြတာပဲ…”

စူးချန်ခုန်း သူ့ဘာသာသူ တွေးနေမိသည်။

နတ်ဘုရားလက်တံဒူးလေးသည် တောနက်စီရင်စုစစ်တပ်အတွက် ထူးခြားပြီး အထင်ကြီးစရာကောင်းသော လက်နက်ဖြစ်သည်။ သို့သော်လည်း ထိုပင်လယ်ဓားပြများသည် စူးချန်ခုန်းကို တိုက်ခိုက်ရာတွင်ပင် ထိုဒူးလေးရှစ်ခုကို ပိုင်ဆိုင်ခဲ့သည်။ ဖြစ်နိုင်ခြေအရှိဆုံးမှာ တောနက်စီရင်စုစစ်တပ်က သို့မဟုတ် ကုန်းမိသားစုက လီဟွင်းကို ငှားရမ်းပေးခဲ့ကြောင်း စူးချန်ခုန်း သိသည်။

ရည်ရွယ်ချက်မှာ ထုံးစံအတိုင်း ပင်လယ်ဓားပြများ၏ စွမ်းအားကို မြှင့်တင်ကာ မကြာသေးမီက တံခါးပိတ်ကျင့်ကြံရာမှ ထွက်လာလာသော စစ်ခုန်းယုံကို သတ်ပစ်ဖို့ပင်။

ဧရာမဝေလငါးဂိုဏ်းသည် တောနက်စီရင်စုမြို့တွင် အလွန်ကျော်ကြားပြီး ကုန်းမိသားစုသည် မြို့ကို အမှန်တကယ် အုပ်ချုပ်နေသော အုပ်စိုးသူဖြစ်သောကြောင့် ဧရာမဝေလငါးဂိုဏ်း၏ စွမ်းအားကို အားနည်းသွားစေရန်အတွက် စဉ်းစားတာက သာမန်သာဖြစ်သည်။

ကုန်းမိသားစု မထင်မှတ်ထားသည့်အရာမှာ သူတို့ဘက်၌ အားသာချက်ရှိသော်လည်း လီဟွင်းဦးဆောင်သော ပင်လယ်ဓားပြမဟာမိတ်အဖွဲ့သည် တော်တော်လေး စိတ်ပျက်စရာကောင်းလောက်အောင် ရှုံးနိမ့်သွားမည်ဟူ၍ပင်။ လီဟွင်းသည် နေရာမှာတင် အသတ်ခံလိုက်ရပြီး ဆုကြေးငွေတောင်းခံရန် သူ၏ဦးခေါင်းအား ရုံးတော်ထံ ပေးပို့ခဲ့သည်။

နတ်ဘုရားလက်တံဒူးလေးရှစ်ချောင်းသည် ဧရာမဝေလငါးဂိုဏ်း၏လက်သို့ ရောက်သွားပြီဖြစ်ကြောင်း ကုန်းမိသားစုက သိထားပြီး ထိုဒူးလေးများကို ပြန်လည်ရယူရန် လိုအပ်သည်။

ဒီလိုမှမဟုတ်ရင် အဲ့တာတွေက သူတို့ကို ဆန့်ကျင်နိုင်မည့်အရာတွေ ဖြစ်သွားလိမ့်မည်တောနက်စီရင်စုစစ်တပ်အတွက် သီးသန့်ဖြစ်သော နတ်ဘုရားလက်တံဒူးလေးက ပင်လယ်ဓားပြများနှင့်အတူ ပေါ်လာသည်။ ထိုစကားတွေသာ ပြန့်သွားရင် သူတို့ကို လူတွေ ဘယ်လိုထင်ကြမလဲ။

ထို့ကြောင့် ကုန်းမိသားစုသည် အဆင်မပြေသော အနေအထားတွင် ရှိနေသော်လည်း နတ်ဘုရားလက်တံဒူးလေးများကို ပြန်ပေးရန် တောင်းဆိုရန် ကုန်းယွိဟူကို စေလွှတ်ရန် ရွေးချယ်ခွင့်မရှိပေ။

ကုန်းယွိဟူသည် ဆုငွေသုံးသိန်းကို အရင်ဆုံး ပေးအပ်ခဲ့သည်။ ဤမျှများပြားသော ပမာဏကို အလွယ်တကူ ပေးဆောင်ရခြင်း၏ အကြောင်းရင်းမှာ နတ်ဘုရားဒူးလေးလက်တံများကို ပြန်လည်ရယူခြင်းကိစ္စအား ထုတ်ဖော်ပြောဆိုခြင်းမပြုမီ 'စစ်ခုန်းယုံ' အမြင်ကြည်လာအောင်ဖြစ်သည်။

အပြုံးမမည်သော အပြုံးဖြင့် စူးချန်ခုန်းက ပြောလိုက်သည်။ "တောနက်စီရင်စုမြို့စောင့်တပ်ရဲ့ လက်နက်တိုက်ကနေ နတ်ဘုရားလက်တံဒူးလေးရှစ်ချောင်းကို ဘာအသံမှမထွက်ဘဲ ခိုးယူနိုင်တာက တကယ့်ကို စွမ်းရည်တစ်ခုပဲနော်။"

ကုန်းယွိဟူပြောသည့် နတ်ဘုရားလက်တံဒူးလေးရှစ်ချောင်း ခိုးယူခံရသည့် အကြောင်းကို ကလေးတောင် ယုံမည်မဟုတ်။

နတ်ဘုရားလက်တံဒူးလေးများသည် အလွန်တရာ ကြီးမားပြီး တစ်ခုစီသည် သေးငယ်သောရထားလုံး အရွယ်အစားရှိရာ တိတ်တဆိတ် ရွေ့ပြောင်းဖို့ခက်ခဲပါသည်။ ထို့အပြင် ၎င်းတို့ကို တောနက်စီရင်စုမြို့စောင့်တပ်၏ လက်နက်တိုက်တွင် အစောင့်အကြပ်များဖြင့် စောင့်ကြပ်ထားသည်ဖြစ်ရာ ပင်လယ်ဓားပြများသည် ဘာအသံမှမထွက်ဘဲနဲ့ နတ်ဘုရားလက်တံဒူးလေးရှစ်ခုကို မည်သို့ ခိုးယူနိုင်မည်နည်း။

ကုန်းယွိဟူသည် ရှက်ရွံ့ပြီး ကူကယ်ရာမဲ့ ဖြစ်နေ၏။ "အာ... မြို့စောင့်တပ်က မကြာသေးမီက နည်းနည်း ပေါ့ဆနေခဲ့တာ။ ကျွန်တော်ပြန်ရောက်ရင် မှန်ကန်တဲ့ညွှန်ကြားချက်တွေ ချမှတ်ပေးလိုက်ပါ့မယ်။"

ထိုအချိန်တွင် ကုန်းယွိဟူက ဦးညွတ်ကာ ရိုးရိုးသားသား ဆိုလေ၏။"ဂိုဏ်းခေါင်းဆောင်စစ်ခုန်းကပဲ ကူညီပေးဖို့ တောင်းဆိုပါရစေ။ ကျွန်တော့်ရဲ့ အစ်ကိုကြီးနဲ့ ကုန်းမိသားစုတစ်ခုလုံးကို အရမ်းကို ကျေးဇူးတင်နေမှာပါ။!"

သူ့စိတ်ထဲတွင် ကုန်းယွိဟူသည် ထိုပင်လယ်ဓားပြများကို အသုံးမကျကြောင်း ကျိန်ဆဲလိုက်သည်။ ဤမျှကြီးမားသောအင်အားနှင့် ကျွမ်းကျင်သူများစွာဖြင့် စစ်ခုန်းယုံကို ပေါင်းတိုက်တာတောင် သူတို့သည် ခွက်ခွက်လန်အောင် ရှုံးနိမ့်ခဲ့ပြီး နောက်ဆုံးတွင် ကုန်းမိသားစုကို အရှုပ်အထွေးထဲသို့ ဆွဲသွင်းကာ နတ်ဘုရားလက်တံဒူးလေးများကို ပြန်ပေးရန်အတွက် ဧရာမဝေလငါးဂိုဏ်းသို့ တောင်းရမ်းခိုင်းစေခဲ့သည်။

တကယ်တော့ ကုန်းယွိဟူသည် ကုန်းမိသားစုနှင့် ပင်လယ်ဓားပြများကြားတွင် ပတ်သက်မှုရှိနေသည်ကို အရင်က မသိခဲ့ပါ။ တကယ်တော့ ကုန်းမိသားစု၏ ကြီးမားကျယ်ပြန့်သော လုပ်ငန်းများဖြင့် မိသားစုကြီးဖြစ်ရာ အချို့သောသူများတွင် မတူညီသော စိတ်ကူးစိတ်သန်းများရှိပြီး သူတို့၏အကျိုးစီးပွားအတွက် ကိုယ်ပိုင် ရည်မှန်းချက်များ ရှိနေသည်က သာမန်ဖြစ်သည်။

“နတ်ဘုရားလက်တံဒူးလေးကို မင်းတို့ဆီ ပြန်ပေးဖို့က မဖြစ်နိုင်တာ မဟုတ်ပါဘူး။”

စူးချန်ခုန်းက ပြောလိုက်သည်။

ဒါပေမယ့် ကုန်းယွိဟူက ပျော်ပျော်ရွှင်ရွှင်နဲ့ ကျေးဇူးတင်စကား မဆိုမီမှာ စူးချန်ခုန်းက သူ့ရဲ့ လေသံကို ပြောင်းလိုက်သည်။ "ဒီနတ်ဘုရားလက်တံဒူးလေးရှစ်ချောင်းဟာ အဲဒီအချိန်က ငါ့အတွက် ကြီးမားတဲ့ ခြိမ်းခြောက်မှုတစ်ခုဖြစ်ခဲ့ပြီး ငါ့ရဲ့အသားအရေကို ပျက်စီးလုနီးပါးပဲ။ တန်ကြေးတစ်သိန်း ပေးရမယ်!"

"တစ်သိန်း?" ကုန်းယွိဟူရဲ့ နံဘေးက အဖြူရောင် ၀တ်ထားတဲ့ လူငယ်လေးက မျက်ခုံးပင့်လိုက်သည်။ ကုန်းမိသားစုက တောင်းဆိုမှုတစ်ခုပြုလုပ်ဖို့ ကိုယ့်ကိုယ်ကို ဒီလောက် နှိမ့်ချနေတာကို ဒီစစ်ခုန်းယုံသည် အခြေအနေတွေကို သတ်မှတ်ရဲတယ်ပေါ့။

“တစ်သိန်းလား။ အင်း ဒါဆိုလဲ…” သို့သော် ခဏလောက် စဉ်းစားပြီးနောက် ကုန်းယွိဟူက သဘောတူရန် ဆုံးဖြတ်လိုက်သည်။ တစ်သိန်းသည် သိသာထင်ရှားသော ပမာဏဖြစ်သော်လည်း နတ်ဘုရားလက်တံဒူးလေးရှစ်ခုကို ပြန်လည်ရရှိရန် တန်ပါသေးသည်။

သို့သော် စူးချန်ခုန်းက ကြားဖြတ်ပြောလိုက်သည်။ “ငါပြောတာ နတ်ဘုရားလက်တံဒူးလေးတစ်ချောင်းအတွက် တစ်သိန်း။”

ဒီစကားတွေကြားတော့ အဖြူရောင်ဝတ်စုံနဲ့ လူငယ်လေးရော ကုန်းယွိဟူရော နှစ်ယောက်စလုံးရဲ့ မျက်နှာထားတွေ ပြောင်းသွားသည်။ နတ်ဘုရားလက်တံဒူးလေးတစ်ချောင်းအတွက် တစ်သိန်းတဲ့လား။ ဒါက သက်သက်ကို ငွေညှစ်နေတာပဲ။

အဖြူရောင် ဝတ်စုံနှင့် လူငယ်လေးက ဒေါသတကြီး ပြောလိုက်သည်။ "စစ်ခုန်းယုံ၊ ခင်ဗျား ဒီလို မတန်မရာ တောင်းတာ လွန်နေပြီ မဟုတ်လား။ ဒီနတ်ဘုရားလက်တံဒူးလေးတွေက ကျွန်တော်တို့ပိုင်တာ အမှန်ပဲ!"

ထိုလူငယ်၏ဒေါသကို ရင်ဆိုင်ရင်း စူးချန်ခုန်းကတစ်ချက်မျှပင် ငဲ့မကြည့်ဘဲ ကုန်းယွိဟူကို စိုက်ကြည့်ကာ ပြောလိုက်သည်။ "နတ်ဘုရားလက်တံဒူးလေးတစ်ချောင်းအတွက် တစ်သိန်း၊ ငါမင်းကို လျှော့စျေးပေးပါ့မယ်။ နတ်ဘုရားလက်တံဒူးလေးရှစ်ချောင်းအတွက် စုစုပေါင်း ငွေ တစ်သန်း။ တစ်ပြားမှ မလျော့ဘူး။"

နောက်ပြောင်တာအပြင် စူးချန်ခုန်းက ဤနတ်ဘုရားလက်တံလေးများကို မည်သို့ လွယ်လွယ်ကူကူ ပြန်ပေးနိုင်မည်နည်း။

ကုန်းမိသားစုသည် ပင်လယ်ဓားပြများနှင့် ပူးပေါင်းပြီး 'စစ်ခုန်းယုံ' ကို ကိုင်တွယ်ရန် နတ်ဘုရားလက်တံဒူးလေးကို ငှားပေးခဲ့တာ ဖြစ်နိုင်ချေရှိသည်။ စူးချန်ခုန်း၏ သန်မာသော လိပ်အသက်ရှူနည်း ချီသံချပ်ကာကြောင့်သာ မဟုတ်ပါက ထိုနတ်ဘုရားဒူးလေးလက်တံများသည် သိသာထင်ရှားသော ခြိမ်းခြောက်မှုတစ်ခုဖြစ်နိုင်သည်။

ကုန်းမိသားစုသည် စူးချန်ခုန်းကို တိုက်ခိုက်ရာတွင် အသုံးပြုရန် ပင်လယ်ဓားပြများထံ လက်နက်များ ငှားပေးပေမယ့် မအောင်မြင်ခဲ့သဖြင့် ထိုလက်နက်များကို ပြန်တောင်းဖို့ စိတ်အားထက်သန်နေတယ်ပေါ့။ ဒီလောက်စျေးပေါတဲ့ သဘောတူညီမှုမျိုး မရှိပါ။

စူးချန်ခုန်းသည် ငွေတစ်သန်းအတွက် မတရားသဖြင့် တောင်းဆိုခဲ့သည်။ ကုန်းမိသားစုက ပေးဆောင်ရန် ဆန္ဒရှိပါက သူသည် နတ်ဘုရားလက်တံဒူးလေးများကို အင်တင်တင်ဖြင့် ပြန်ပေးကောင်းပေးနိုင်သည်။

ကုန်းယွိဟူ၏နဖူးတွင် သွေးကြောများ ထောင်လာ၏။ ငွေတစ်သန်းတဲ့လား။ ကုန်းမိသားစုသည် ချမ်းသာပြီး ပေးချေရန် တတ်နိုင်သော်လည်း ၎င်းသည် နတ်ဘုရားလက်တံဒူးလေးရှစ်ခုကို ပြန်ဝယ်ရန် ငွေအမြောက်အမြား ဖြစ်သည်မှာ ငြင်းဖွယ်ရာမရှိပေ။ ကုန်းမိသားစုက ဘယ်လောက်ပဲ ချမ်းသာပါစေ သူတို့ရဲ့ အခြေခံအုတ်မြစ် ဘယ်လောက်ပဲ ခိုင်မာပါစေ၊ သူတို့ဟာ အရူးလုပ်ခံပြီး ခြိမ်းခြောက်ခံမည်မဟုတ်ပါ။

ထိန်းချုပ်မထားနိုင်ဘဲ ကုန်းယွိဟူက တောင်းပန်လိုက်၏။ "ဂိုဏ်းခေါင်းဆောင်စစ်ခုန်း၊ ကျေးဇူးပြုပြီး ကူညီပေးပါ။ ကျွန်တော့်ကို ခက်ခဲအောင် မလုပ်ပါနဲ့။ ကျွန်တော့်ရဲ့အစ်ကိုကြီး၊ ကျွန်တော့်တို့ရဲ့ ကုန်းမိသားစုကလည်း ဂိုဏ်းခေါင်းဆောင်စစ်ခုန်းရဲ့ ကြင်နာမှုကို အမှတ်ရနေမှာပါ။"

နောက်ဆုံးဖဲချပ်အနေနှင့် ကုန်းယွိဟူက ကုန်းမိသားစုနှင့် မြို့တော်ဝန် ကုန်းယွိလုံတို့အကြောင်းကို ပြောပြခဲ့သည်။ တောနက်စီရင်စုမြို့၏ တုနှိုင်းမဲ့ အာဏာရှင်များအနေနှင့် သူတို့သည် ကောင်းကင်ကို လက်တစ်ဖက်ဖြင့် လွှမ်းမိုးနိုင်ပြီး နတ်ဘုရားလက်တံဒူးလေးကို ပြန်ပေးရန်အတွက် စူးချန်ခုန်းကို ခြိမ်းခြောက်နိုင်မည်ဟု မျှော်လင့်ခဲ့သည်။

စူးချန်ခုန်းက ရယ်မောလိုက်သည်။ "ငါက ကျေးဇူးရှိမှ ကျေးဇူးဆပ်တတ်တဲ့ လူမျိုးပဲ။ မင်းရဲ့ကုန်းမိသားစုက ပင်လယ်ဓားပြတွေကို ငါတို့ကို ဆန့်ကျင်ဖို့ ကူညီပေးခဲ့တယ်။ အခု အားလုံးပြီးတော့ မင်းတို့က ငါ့ကိုပစ်မှတ်ထားခဲ့တဲ့ လက်နက်တွေကို ပြန်တောင်းရဲတယ်ပေါ့။ အဲ့ဒီ ပင်လယ်ဓားပြတွေကို မင်းရဲ့ ကုန်းမိသားစုက ပြုစုပျိုးထောင်ပေးခဲ့တာများလား။ မင်းရဲ့ ကုန်းမိသားစုက ပင်လယ်ဓားပြတွေမို့လို့လား။"