ချီသွေးအသွင်ပြောင်းခြင်း အဆင့်ခြောက်။ ဆဋ္ဌမအဆင့် ဧရာမဝေလငါးနည်းပညာ။ (၄)

စူးချန်ခုန်း၏ ဧရာမဝေလငါးနည်းပညာနှင့် လိပ်အသက်ရှုနည်းပညာနှစ်ခုစလုံးသာ အဆင့်ခြောက်တွင်ရှိနေပါက ဆဋ္ဌမအဆင့်‌ ဧရာမဝေလငါးနည်းပညာသည် ပို၍သာလွန်ပြီး တိုက်ပွဲတွင် သတ္တမအဆင့် လိပ်အသက်ရှုနည်းပညာ၏ တိုက်ခိုက်ရေးစွမ်းအားကို အလွယ်တကူ ချေမှုန်းနိုင်မည်ဖြစ်သည်။

အမှန်တော့ သိုင်းပညာသည် စွမ်းအားချင်း ကွာခြားပြီး တူညီသောနယ်ပယ်ရှိ ပြိုင်ဘက်ကင်းဓားပညာက သာမာန်ဓားပညာကို သေချာပေါက် အနိုင်ယူနိုင်မည်ဖြစ်သည်။

"တကယ်လို့ ဧရာမဝေလငါးနည်းပညာက သတ္တမအဆင့်ထိ ရောက်သွားပြီး နက်နဲတဲ့ကျွမ်းကျင်မှုအထိ ကျင့်နိုင်ခဲ့ရင် ... တိုက်ပွဲဝင်နိုင်စွမ်းတိုးလာမှုက နဝမအဆင့် လိပ်အသက်ရှုနည်းပညာထက် အများကြီး နိမ့်ကျမှာ မဟုတ်ဘူး။ အဲ့တာသာ ဆဋ္ဌမအဆင့်ကိုရောက်သွားခဲ့ရင်... နဝမအဆင့် လိပ်အသက်ရှုနည်းပညာထက်တောင် ကျော်လွန်သွားနိုင်တယ်။"

စူးချန်ခုန်း သူ့ဘာသာသူ တွေးနေမိသည်။

အဆင့်နိမ့် သိုင်းပညာသည် ရိုးရှင်းပြီး လေ့ကျင့်ရန် ပိုမိုလွယ်ကူသော်လည်း ၎င်းတို့သည် ဆဋ္ဌမအဆင့်မြင့် သိုင်းပညာများနှင့် နှိုင်းယှဉ်ပါက စွမ်းရည်နိမ့်လေသည်။ လျှို့ဝှက်ဆန်းကြယ်ပြီး အဆင့်မြင့်သော သိုင်းပညာနှင့် နည်းစနစ်များက ပိုမိုကြီးမားသောအရည်အချင်းများ လိုအပ်ပြီး စတင်ကျင့်ကြံရန် ပိုခက်ခဲသည်။ နက်နဲစွာ ကျွမ်းကျင်ရန် ပို၍ပင် စိန်ခေါ်မှုရှိသော်လည်း ၎င်းတို့၏ စွမ်းရည်က ပိုမိုမြင့်မားပါသည်။

အမဲလိုက်ခွေးများကို ကျားများနှင့် နှိုင်းယှဉ်ခြင်းကဲ့သို့ပင်။ အမဲလိုက်ခွေးတွေက ရက်စက်ကြမ်းတမ်းပေမယ့် နှစ်ကောင်စလုံး အရွယ်ရောက်ရင် ကျားက အမဲလိုက်ခွေးကို အလွယ်တကူ သတ်နိုင်ပစ်နိုင်သည်။

အလားတူ အရွယ်ရောက်ပြီးသော ကျားသည် အရွယ်ရောက်ပြီးသော အမဲလိုက်ခွေးများထက် အစာပိုစားသည်။

ဧရာမဝေလငါးဂိုဏ်း၏ ထိပ်တန်းကျွမ်းကျင်မှုကြောင့် ဧရာမဝေလငါးစွမ်းရည်သည် ကြီးမားသော အလားအလာများရှိပြီး ၎င်းသည် သတ္တမအဆင့် သို့မဟုတ် ဆဋ္ဌမအဆင့်သို့ရောက်ရှိပါက နဝမအဆင့် လိပ်အသက်ရှုနည်းပညာထက် အားနည်းလိမ့်မည်မဟုတ်သလို ပို၍ပင် အားကောင်းလာမည်ဖြစ်သည်။

တူညီသော အဆင့်ကိုးသို့ ရောက်ပါက… အရွယ်ရောက်ပြီးသော ကျားနှင့် အမဲလိုက်ခွေးတို့ကြား ခြားနားမှုကဲ့သို့ တစ်ဖက်က အသာစီးလိမ့်မည်။

စူးချန်ခုန်းသည် ဧရာမဝေလငါးနည်းပညာကို အတော်လေး နောက်ကျမှ ကျင့်ကြံခဲ့ပြီး ၎င်းကို ကျင့်ကြံချိန်နည်းပါးသောကြောင့် ၎င်း၏နယ်ပယ်သည် လိပ်အသက်ရှုနည်းပညာထက် များစွာ နောက်ကျနေပြီဖြစ်သော်လည်း ၎င်းသည် လိပ်အသက်ရှုနည်းပညာထက် နိမ့်ကျသည်ဟု မဆိုလိုပါ။

သို့သော် စူးချန်ခုန်းသည် စစ်ခုန်းယုံပင်လျှင် သူ၏ ဧရာမဝေလငါးနည်းပညာနှင့် အဆင့်ခုနစ်နှင့် အဆင့်ရှစ် ကြားသာရှိနိုင်‌ကြောင်း ခံစားခဲ့ရပြီး သူသေဆုံးသွားသောအခါတွင် သူသည် ထိပ်တန်းအဆင့်တွင် ရှိနေလောက်သေးသည်။

"ကုန်းမိသားစုက နတ်ဘုရားလက်တံဒူးလေးကို လာမရွေးတာ သနားစရာပဲ။ ငါ့မှာ ငွေ ၅၅၀,၀၀၀ စွန်းစွန်းပဲ ရှိတော့တယ်။ ဒါတွေအားလုံးကို ချီသွေးဆေးအဖြစ်လုပ်ရင်တောင် ချီသွေးပြောင်းလဲခြင်းအဆင့်ခုနစ်ကို ဖြတ်ကျော်ဖို့ မလုံလောက်သေးဘူး"

စူးချန်ခုန်းက သူ့ကိုယ်သူ ညည်းတွားလိုက်သည်။

လွန်ခဲ့သော နှစ်ဝက်ခန့်က ကုန်းမိသားစုမှ ကုန်းယွိဟူက နတ်ဘုရားလက်တံဒူးလေးကို လာရောက် တောင်းယူခဲ့ပြီး စူးချန်ခုန်း ငွေတစ်သန်းရလျှင် ပြန်ပေးမည်ဟု တိုက်ရိုက် ပြောခဲ့သည်။

သို့သော် အချိန်အတော်ကြာပြီးနောက် ကုန်း မိသားစုမှ မည်သူမျှ ပြန်မလာတော့ဘဲ ဤမျှဖောဖောသီသီ ပေးဆောင်ရန် အဆင်သင့်မဖြစ်ဟု ညွှန်ပြနေပုံရသည်။

ထိုသို့မဟုတ်ပါက နောက်ထပ် ငွေတစ်သန်းဖြင့် စွမ်းအားမြှင့်တင်ရန်နှင့် သွေးအားဖြည့်ပေးသည့် ဆေးဖက်ဝင်ပစ္စည်းများကို ဝယ်ယူပြီးနောက် ၎င်းတို့အား ဆေးပြားအဖြစ် ပေါင်းစပ်လိုက်ခြင်းဖြင့် နောက်ထပ်သွေးသန့်စင်မှုအတွက် လုံလောက်မည်ဖြစ်သည်။

ချီသွေးပြောင်းလဲခြင်းအဆင့်လေးဆင့်သည် အသွင်ပြောင်းမှုသုံးကြိမ်တိုင်းတွင် အဓိကဂိတ်တစ်ခုပါရှိသော အဆင့် ဆယ့်နှစ်ဆင့်ပါရှိသည့်လုပ်ငန်းစဉ်ဖြစ်ပြီး ချီသွေးပြောင်းလဲခြင်းအဆင့်ခြောက်နှင့် ချီသွေးပြောင်းလဲခြင်းအဆင့်ခုနစ်အကြား ပိုင်းခြားမှုကို ချီသွေးဝံပု‌လွေမြူနှင့် ချီသွေးနဂါးရှည်အဆင့်တက်ရန် မလွယ်ကူသော နယ်နိမိတ်ဖြင့် မှတ်သားထားသည်။

မုန့်စန်းနှင့် ထျဲကျင့်ကန်းကဲ့သို့သော ကျွမ်းကျင်ပညာရှင်များသည် ဤနယ်ပယ်တွင် နှစ်ပေါင်းများစွာ ပိတ်မိနေခဲ့ပြီး ချီသွေးနဂါးရှည် အဆင့်ရှိသူများမှာ တောနက်စီရင်စုမြို့တစ်ခုလုံးတွင် အနည်းငယ်သာရှိသည်။

စူးချန်ခုန်းသည် နှစ်ဝက်ကြာ တိတ်တဆိတ် ကျင့်ကြံနေခဲ့သော်လည်း ငြိမ်သက်မှု ပြိုပျက်သွားခဲ့သည်။

"ဆရာစူး၊ ဒုတိယသခင်မလေးက ဆရာစူးနဲ့ တွေ့ဖို့ တောင်းဆိုလိုက်ပါတယ်။"

ထိုနေ့ညမှာ ဧရာမဝေလငါးဂိုဏ်းရဲ့ တပည့်တစ်ယောက်က စူးချန်ခုန်းကို လာတွေ့ပြီး တလေးတစား ပြောလိုက်သည်။

"အာ့ကျယ်က ငါ့ကိုတွေ့ချင်နေတာလား။"

ဒါကိုကြားတော့ စူးချန်ခုန်းအနည်းငယ် အံ့သြသွားပြီး သူ့ကိုလာရှာတာက စစ်ခုန်းဟွမ်ဆီမှာ ကိစ္စတစ်ခုခုရှိနေပြီလို့ ဆိုလိုပါသည်။

“အင်း၊ နားလည်ပြီ” စူးချန်ခုန်းက ခေါင်းညိတ်ပြီး တောင်းဆိုချက်ကို သဘောတူလိုက်ပါသည်။

စူးချန်ခုန်းသည် အချိန်ဆွဲမနေဘဲ သူ့ကိုတွေ့ရန် စစ်ခုန်းဟွမ်၏နေအိမ်သို့သွားကာ ဘာတွေဖြစ်နေလဲဆိုတာကို သိချင်မိသည်။

ခမ်းနားကြီးကျယ်သော ခန်းမကြီးထဲတွင် စူးချန်ခုန်းသည် စစ်ခုန်းဟွမ်ကို တွေ့လိုက်သော်လည်း သူတင်မက စစ်ခုန်းကျန့်လည်း ရှိနေကာ နှစ်ယောက်စလုံး မျက်နှာပေါ်တွင် လေးနက်သော အမူအရာများကိုယ်စီနှင့်။

“တာ့ကော(အစ်ကိုကြီး)၊ အာ့ကျယ်၊ ညကြီးအချိန်မတော် အရေးတကြီး တစ်ခုခုများ ဖြစ်လို့လား။”

စူးချန်ခုန်းက မနေနိုင်ဘဲ မေးလိုက်သည်။

စစ်ခုန်းကျန့်နှင့် စစ်ခုန်းဟွမ် နှစ်ယောက်လုံး ခေါင်းညိတ်လိုက်ကြသည်။ စစ်ခုန်းဟွမ်က လေးနက်တဲ့ လေသံနဲ့ဆို၏။ "ဖြစ်နိုင်တာက... ကုန်းမိသားစုက အစ်မတို့ရဲ့ ဧရာမဝေလငါးဂိုဏ်းကို အရေးယူဖို့ ပြင်ဆင်နေတာ ဖြစ်နိုင်တယ်"

"ကုန်းမိသားစုက ဧရာမဝေလငါးဂိုဏ်းကို အရေးယူဖို့လား။"

ဒါက စူးချန်ခုန်းကိုလည်း အံ့အားသင့်စေခဲ့သည်။ အဲ့တာက နတ်ဘုရားလက်တံဒူးလေးကြောင့်များလား။

ဒါပေမယ့် ဒါက ဒီလိုကိစ္စသေးသေးလေးအတွက် ကြီးမားတဲ့ တုံ့ပြန်မှုတစ်ခုလိုပဲ။ စူးချန်ခုန်းသည် ထိုအချိန်တွင် နတ်ဘုရားလက်တံဒူးလေးကို ကုန်းမိသားစုထံ ပြန်လည်ပေးအပ်ခြင်းမရှိသော်လည်း ဧရာမဝေလငါးဂိုဏ်းသည် ဤလွန်ခဲ့သည့်ရက်များအတွင်း ထိုကိစ္စကို ကြီးကြီးမားမား မလုပ်ခဲ့ပေ။

ယုတ္တိကျကျပြောရလျှင် ကုန်းမိသားစုသည် ဤကိစ္စနှင့် ဧရာမဝေလငါးဂိုဏ်းကို ပွင့်ပွင့်လင်းလင်း ဆန့်ကျင်မည်မဟုတ်ပါ။ တကယ်တော့ ဧရာမဝေလငါးဂိုဏ်းသည် ယခုအချိန်တွင် စိတ်ဓာတ်မြင့်မားနေပြီး ဂုဏ်သိက္ခာအပြည့်ရှိသည်။ အကယ်၍ ကုန်းမိသားစုသာ လှုပ်ရှားလိုပါက ဧရာမဝေလငါးဂိုဏ်း မတည်မငြိမ်ဖြစ်သောအခါတွင် ထိုသို့လုပ်ဆောင်နိုင်မည်ပင်။

ကုန်းမိသားစုက တောနက်စီရင်စုမြို့တော်ကို စီမံခန့်ခွဲကာ လုံခြုံပြီး သာယာဝပြောသော ဘဝဖြင့် နေထိုင်နေသည်ဖြစ်ရာ ဧရာမဝေလငါးဂိုဏ်းနဲ့ ထိပ်တိုက်တွေ့ဖို့ မလိုအပ်ပေ။ ၎င်းက နှစ်ဖက်စလုံး ထိခိုက်စေနိုင်ပါသည်။

"အခုလေးတင်ပဲ မေပယ်တောအနီးမှာ တပ်စွဲထားတဲ့ ဧရာမဝေလငါးဂိုဏ်းရဲ့ ဂိုဏ်းခွဲတစ်ခုက အရေးပေါ် အချက်ပြလာတယ်။ အနီးနားက တပည့်တွေက ပြေးလာကြပြီး တောနက်စီရင်စုမြို့စောင့်က လေ့ကျင့်ထားတဲ့ စစ်သားတော်တော်များများကို တွေ့ခဲ့ရတယ်။ အဲ့ဒါကြောင့် သူတို့လည်း အလျင်စလို မလုပ်ရဲဘဲ ချက်ချင်း သတင်းပို့ခဲ့တယ်။"

စစ်ခုန်းကျန့်က အခြေအနေကို ပြန်ပြောပြသည်။

ဧရာမဝေလငါးဂိုဏ်း၏ ဌာနချုပ်နှင့် မိုင်တစ်ရာခန့်ရှိ မေပယ်တောတွင် ဧရာမဝေလငါးဂိုဏ်း၏ အမာခံနယ်မြေတစ်ခုဖြစ်သည့် ဂိုဏ်းခွဲတစ်ခုရှိသည်။

"တောနက်စီရင်စုစစ်တပ်က စုစည်းနေပြီလား။ ဒါပေမယ့် ဧရာမဝေလငါးဂိုဏ်းရဲ့ အမာခံစခန်းတစ်ခုကိုပဲ တိုက်ခိုက်တာ ဘာအတွက်လဲ။"

စူးချန်ခုန်းလည်း အံ့ဩသွားသည်။

တောနက်စီရင်စုစစ်တပ်သည် တောနက်စီရင်စုမြို့၏ အင်အားအကြီးဆုံး အထက်တန်းစား သိုင်းပညာရှင်များဖြင့် ဖွဲ့စည်းထားပြီး ကောင်းစွာ လေ့ကျင့်ထားကြသူများဖြစ်သည်။ သူတို့သည် တောနက်စီရင်စုမြို့၏ အမိန့်နှင့် လုံခြုံရေးကို ကာကွယ်ရန် အရေးကြီးဆုံးဖြစ်ပြီး လွယ်လွယ်နှင့် စုဝေးခြင်းမပြုကြပါ။

သို့သော် ဧရာမဝေလငါးဂိုဏ်းသားများ၏ အစီရင်ခံချက်အရ မေပယ်တော ဌာနခွဲသည် အလွန်အရေးတကြီး အခြေအနေတွင်သာ ဖြစ်ပေါ်မည့် အရေးပေါ်အချက်ပြမှုကို ပေးပို့ခဲ့ပြီး နောက်ပိုင်းတွင် ရောက်ရှိလာသော ဧရာမဝေလငါးဂိုဏ်းသားများက တောနက်စီရင်စုမြို့စောင့်တပ်စစ်သားအများအပြားကို တွေ့ရှိခဲ့သည်။

အပေါ်ယံတွင် ကုန်းမိသားစုက တောနက်စီရင်စုမြို့စောင့်တပ်အား ဧရာမဝေလငါးဂိုဏ်း၏ ဂိုဏ်းခွဲကို တိုက်ခိုက်ရန် အမိန့်ပေးခဲ့ပုံရသော်လည်း ၎င်းနှင့်ပတ်သက်ပြီး သံသယဖြစ်စရာတစ်ခုခု ရှိနေသည်။

အကယ်၍ ကုန်းမိသားစုသည် ဧရာမဝေလငါးဂိုဏ်းကို အမှန်တကယ် အရေးယူလိုပါကဂိုဏ်းခွဲကို တိုက်ခိုက်ပြီး သတိပေးမည့်အစား ဧရာမဝေလငါးဂိုဏ်း၏ ဌာနချုပ်ကို အလစ်ဝင်တိုက်ရန် တပ်ဖွဲ့ဝင်များ အများအပြား စုဆောင်းထားမှာဖြစ်သည်။

"ဒီအခြေအနေက တော်တော် ထူးဆန်းတယ်။ ကုန်းမိသားစုက ဧရာမဝေလငါးဂိုဏ်းကို ခြိမ်းခြောက်ဖို့ ကြိုးစားနေတာလည်း ဖြစ်နိုင်တယ်။ အစ်မတို့ ကိုယ်တိုင် သွားကြည့်ဖို့ ဆုံးဖြတ်ထားပါတယ်... အခြေအနေတွေ ဆိုးရွားလာရင် အဖေနဲ့ ညှိနှိုင်းဖို့ လိုလိမ့်မယ်" ဟု စစ်ခုန်းဟွမ်က ပြောကြားလိုက်သည်။

“ကောင်းပြီ ကျွန်တော်လည်း လိုက်ကြည့်မယ်” စူးချန်ခုန်းက သဘောတူကြောင်း ခေါင်းညိတ်သည်။

ဤအခြေအနေသည် နတ်ဘုရားလက်တံဒူးလေးမှအစပြု၍ စူးချန်ခုန်းနှင့် အနည်းငယ်ဆက်စပ်နေသည်။ ဘာတွေဖြစ်နေတာလည်းဆိုတာကို အတိအကျသိရဖို့ အခင်းဖြစ်ပွားရာနေရာကို သွားပြီး ကိုယ်တိုင်သွားကြည့်ဖို့ ဆုံးဖြတ်လိုက်သည်။

မဆိုင်းမတွဘဲ စူးချန်ခုန်းသည် သူ၏ အရိုးတည်ဆောက်ပုံကို ကျွမ်းကျင်စွာ ပြောင်းလဲကာ စစ်ခုန်းယုံ၏အသွင်အပြင်ယူ၍ သူ့ကိုယ်သူ ရုပ်ဖျက်ခဲ့သည်။

အဆင်သင့်ဖြစ်ပြီဆိုတာနဲ့ စူးချန်ခုန်းနဲ့ သူတို့သုံးယောက်ဟာ မေပယ်သစ်တောကို ဦးတည်သွားခဲ့ကြသည်။ သူတို့သည် ပေါ်ပေါ်ထင်ထင်မလုပ်ဘဲ တိကျသော အခြေအနေကို လိုက်လျောညီထွေတုံ့ပြန်ရန် ဦးစွာနားလည်ထားဖို့ လိုအပ်သည်။

သာမန်လူတွေအတွက်တော့ မိုင်တစ်ရာက အတော်ဝေးပေမယ့် ချီသွေးပြောင်းလဲခြင်းအဆင့်လေးနဲ့ အထက်ရှိတဲ့ စူးချန်ခုန်းလို ဆရာသခင်တွေအတွက်တော့ အချိန်မီ ရောက်နိုင်ကာ အရှိန်အပြည့်နဲ့ ခရီးသွားရင်း အမွှေးနံ့သာတစ်ချောင်းစာသာကြာခဲ့သည်။

ယခုအချိန်သည် ညအချိန်ဖြစ်၍ လမင်းကြီးကကောင်းကင်ယံထက်မှာ ထွန်းလင်းတောက်ပနေ၏။ မေပယ်တောသည် တိတ်ဆိတ်နေပြီး ပန်းပင်များ၊ မြက်ပင်များနှင့် သစ်ပင်များဖြင့် ပြည့်နေကာ အားလုံးသည် လရောင်အောက်တွင် အတန်ငယ် ငြိမ်သက်တိတ်ဆိတ်နေကြသည်။

စူးချန်ခုန်းနဲ့ တခြားသူတွေက မေပယ်တောကို ရောက်တဲ့အခါ သူတို့ရဲ့ အရောင်ဝါကို တမင်တကာ ဖုံးကွယ်လိုက်ပြီး သစ်တောရဲ့ ပတ်၀န်းကျင်ကို ထောက်လှမ်းလိုက်ကြသည်။

"ဒါက...တကယ်ကို တောနက်စီရင်စုစစ်တပ်ပဲ!"

စစ်ခုန်းဟွမ်သည် အဝေးမှ လေးနက်စွာ စိုက်ကြည့်နေသည်။

စူးချန်ခုန်းကိုလည်း မြင်ရသည်။ မေပယ်တောပတ်ပတ်လည်တွင် သံချပ်ကာတပ်သားများသည် တစ်စုံတစ်ခုကို တိတ်တဆိတ် တပ်ဆင်နေကြသည်။

ဤစစ်သားများအားလုံးက အရပ်ရှည်ကာ သန်မာကြပြီး အရည်အသွေးမြင့် ချပ်ဝတ်တန်ဆာကို ဝတ်ဆင်ထားကာ သူတို့၏ခါးတွင် လက်နက်များ တပ်ဆင်လျက် လေးနှင့်မြှားများကို ကျောပေါ်တွင် တင်ဆောင်ကာ လက်နက်အပြည့်အစုံ ကိုင်ဆောင်ထားကြသည်။