ကျွန်ဈေးကွက်

ကြားနေနယ်မြေ ဖြစ်သည့်အလျောက်၊ မျောလွင့်နဂါးကျွန်းတွင် ရာဇ၀တ်ကောင်များသာမက၊ မြို့ခံများ၊ အလုပ်သမားများနှင့် လုံခြုံရေးကို ထိန်းသိမ်းရန် အုပ်ချုပ်သူက အသုံးပြုသော နဂါးအစောင့်များဟုခေါ်သော တပ်ဖွဲ့များလည်း ရှိသည်။ ဤနေရာသည် ဖရိုဖရဲဖြစ်နေသော်လည်း မည်သို့ပင်ဖြစ်ပါစေ ကျွန်းသို့ဝင်သောအခါတွင် သူတို့သည် အုပ်ချုပ်သူအား လေးစားမှုကို ပြသသောအားဖြင့် အခွန်ပေးဆောင်ရသည်။ မည်သူမျှ ဤစည်းကမ်းကို မချိုးဖောက်ရဲပေ။

မျောလွင့်နဂါးကျွန်းသည် ပုံမှန်အားဖြင့် လုံခြုံရေးနည်းပါးသော ဧရိယာဖြစ်သည်။ ဤနေရာတွင် တိုက်ပွဲများကို ခွင့်ပြုထား၏။ မြို့ခံများနှင့် အလုပ်သမားများ မသေဆုံးဘဲ အဆောက်အဦများ မပျက်စီးသရွေ့ နဂါးအစောင့်များသည် ပြင်ပလူများ အချင်းချင်း သတ်ဖြတ်ခြင်းအတွက် ဘယ်သောအခါမှ နှောက်ယှက်မည်မဟုတ်ပေ။ ထိုနေရာ၏ ပတ်ဝန်းကျင်သည် ဥပဒေမဲ့၊ ဖရိုဖရဲဖြစ်ပြီး ရက်စက်ကြမ်းကြုတ်လှသည်။ မြို့တော်တွင် သင့်လျော်သော မြို့ပြစီမံကိန်းမရှိခဲ့ဘဲ အဆောက်အအုံများ နေရာအနှံ့တွင် ရှိနေသည်။ ကောင်းကင်တွင် နေနှင့် လတို့ မရှိချေ၊ မြို့တော်မှ မီးရောင်များသာ မျောပါနေသော ကျွန်းကို လင်းထိန်စေပြီး ကောင်းကင်ယံတွင် အမှောင်ထုနှင့် အရောင်အသွေးများ စုံလင်နေစေသည်။

ဗီလိန်များသည် ဤနေရာကို နှစ်သက်ကြသည်၊ ဤနေရာသည် ကြားနေထောက်ပံ့သည့် နေရာဖြစ်သောကြောင့်သာ မဟုတ်ဘဲ၊ ၎င်းတို့သည် ထိုနေရာတွင် စည်းမျဉ်းများကို သဘောကျကြသည်။ နဂါးအစောင့်များ၏ သတ်မှတ်မျဉ်းကို မဖြတ်ကျော်သရွေ့တော့ အကြမ်းဖက်မှုကို သူတို့ အလိုရှိသလောက် အသုံးချနိုင်သည်။ ဤနေရာ၌ သတ်ဖြတ်ခြင်းနှင့် သတ်ဖြတ်ခံရခြင်း နှစ်ခုစလုံးသည် ကြီးကျယ်သော ကိစ္စမဟုတ်ပေ။

ဟန်ရှောင်း၏ ရုတ်တရက် အကြမ်းဖက်လုပ်ရပ်သည် ကွင်းဆက်တုံ့ပြန်မှုကို ဖြစ်သွားစေသည်။ လမ်းပေါ်တွင် စက်သံများ မြည်လာကာ လမ်းတစ်ခုလုံးရှိ လူမိုက်များသည် ၎င်းတို့၏ သေနတ်များကို မြှောက်ကာ ရှေ့သို့ ချက်ချင်း ပြေးတက်လာတော့မည်သကဲ့သို့ ရက်စက်သော အသွင်အပြင်ဖြင့် သူ့ကို ချိန်ရွယ်ထားသည်။

ထိုအချိန်တွင် ကြေးစားအဖွဲ့ကြီး သုံးဖွဲ့မှ လူများအားလုံးသည် နောက်ပြန်မဆုတ်ဘဲ လက်နက်များဆွဲကာ ဟန်ရှောင်အား ကာရံထားကြသည်။ သူတို့သည် သူတို့၏ သူငယ်ချင်းများကို ကာကွယ်ရန် ခိုင်မာသော သဘောထားကို ပြသနေကြသည်။

လူဆိုးတွေက ရုတ်တရက် တုံ့ဆိုင်းသွား၏။ အကြောက်တရားဖြင့် လွှမ်းမိုးခံလိုက်ရပြီး သူတို့၏လက်နက်များကို ပြန်သိမ်းကာ မလိုလားဟန်ဖြင့် နောက်ဆုတ်လိုက်ကြသည်။ ကြေးစားအဖွဲ့ကြီး သုံးဖွဲ့နှင့် ပြဿနာမဖြစ်ချင်တဲ့အပြင်၊ သူတို့တိုက်ပွဲက အရမ်းပြင်းထန်လာလျှင် နဂါးအစောင့်တွေလည်း ပေါ်လာလိမ့်မည်။

အဘက်ဘက်မှ လူဆိုးများ၏ စိုက်ကြည့်ရင်း ရာနှင့်ချီသော ကြေးစားစစ်သားများသည် ဤလမ်းကို ဖြတ်လျှောက်လာပြီးမှသာ သူတို့၏လက်နက်များကို သိမ်းလိုက်ကြသည်။ သူတို့ ရှေ့ကို ဆက်လျှောက်သွားခဲ့ပြီး ဖြစ်ပျက်ခဲ့တာနဲ့ ပတ်သက်ပြီး ဖြစ်နေကျအရာတစ်ခုလို ဘယ်သူမှ ထင်မြင်ချက် မပြသခဲ့ကြပေ။

ဂိုအာသည် ဟန်ရှောင်းကို တစ်ချက်ကြည့်လိုက်ပြီး သူ့ရုတ်တရက် လုပ်ရပ်ကို လုံးဝအပြစ်မတင်ပေ။

ကြေးစားစစ်သားအားလုံးက သူတို့ကို ကျောထောက်နောက်ခံပေးထားပြီး ဘယ်သူကမှ အဲဒါကို အရေးတယူ မရှိကြပေ - ဒါဟာ ရှင်းပြစရာမလိုတဲ့ ပူးပေါင်းဆောင်ရွက်မှုတစ်ခုပင်။ ဟားလပ်စ်ချည်းမဟုတ်ပဲ ကစားသမားများပင် ထိတ်လန့်သွားကြသည်။

“နှိမ့်နှိမ့်ချချ နေတာက ဒီမှာ အသုံးမဝင်ဘူး” ဟန်ရှောင်းက ဆိုသည်။ “ဖြစ်နိုင်ချေရှိတဲ့ ရန်သူတွေကို ခြိမ်းခြောက်ဖို့ မင်းရဲ့ လက်သည်းနဲ့ အစွယ်တွေကို ပြရလိမ့်မယ်။ ကြေးစားတပ်ဖွဲ့ လုပ်ငန်းခွင်မှာ ပြောစရာမလိုဘဲ ပူးပေါင်းဆောင်ရွက်တဲ့ သဘောလည်း ရှိတယ်။ တူညီတဲ့မစ်ရှင်တစ်ခုမှာရှိတဲ့ ကြေးစားစစ်သားတိုင်းက ယုံကြည်စိတ်ချရတဲ့ အသင်းဖော်ပဲ။ ဖြစ်လာတဲ့ပြဿနာက လမ်းကြောင်းပေါ်က သွေဖယ်မသွားသရွေ့ လူတိုင်းက မင်းနဲ့အတူရှိနေလိမ့်မယ်။ မင်းရဲ့ ပြဿနာကလည်း ငါ့ရဲ့ ပြဿနာပဲ။

“အဲဒါအပြင်၊ ဒီနေရာမှာ ရာဇ၀တ်ကောင်အချို့ကို သတ်တာက စံနှုန်းတစ်ခုဖြစ်ပြီးတော့ ငါတို့ရဲ့ သန်မာမှုကို ဖော်ပြဖို့ နည်းလမ်းကောင်းတစ်ခုပဲ။ ဒီအကြောင်းကို ဘယ်သူမှ ဘာမှပြောမှာမဟုတ်ဘူး။”

ဟန်ရှောင်းသည် စကားများရန်ဖြစ်ခြင်းအပိုင်းကို ချက်ချင်းကျော်သွားကာ တိုက်ခိုက်ခြင်းကို တန်းပြောလိုက်သည်၊ ဤနေရာတွင် တစ်ခုခုကို အကြမ်းဖက်ခြင်းဖြင့် ဖြေရှင်းနိုင်လျှင် စကားပြောရန် မလိုအပ်ပေ။

ယခုအခါ ဟားလပ်စ်သည် ဟန်ရှောင်း၏ ဆိုလိုသည့် အရင်းအမြစ် အပြည့်အဝ အသုံးချမှုကို နားလည်လာသည်။ သူတို့သည် ကြီးမားသော ကြေးစားအဖွဲ့ကြီး သုံးဖွဲ့နှင့် အတူလုပ်ဆောင်နေသောကြောင့် အရေအတွက် အသာစီးရနေသည်။ ဒါကြောင့် သူတို့ရဲ့ လက်သီးချက်တွေကို ပြသဖို့ သင့်တော်တဲ့ အခွင့်အရေးပင်။

ဤစကားပြောစရာမလိုသည့် ပူးပေါင်းဆောင်ရွက်မှုသည် ကစားသမားများအား ကြေးစားသမားများနှင့် ပိုမိုနီးစပ်စေသည်ဟု ခံစားရစေသည်။

မျောလွင့်နဂါးကျွန်း၏ မြို့တော်အတွင်းဘက်ရှိ လမ်းများပေါ်တွင် ရာဇ၀တ်မှု နည်းပါးသည်။ သူတို့သည် ဟန်ရှောင်း၏ ကြိုမြင်မှုမှ ဖော်ပြသော ပစ်မှတ်၏ အထောက်အထားကို ဖောက်သည်မှတဆင့် အတည်ပြုနိုင်လိုက်သည် - ဟော်လိတ်- ဒေသခံ ကျွန်စျေးကွက်ပိုင်ရှင်နှင့် မျောလွင့်နဂါးကျွန်း အုပ်ချုပ်သူ၏ တိုက်ရိုက်မျိုးဆက် တစ်ဦးလည်းဖြစ်သည်။ သူသည် လုပ်ငန်း၏ အစိတ်အပိုင်းတစ်ခုကို စီမံခန့်ခွဲ၏။

“အခု ဒါက ခက်တယ်။ သူက မျောလွင့်နဂါးကျွန်း အုပ်ချုပ်သူရဲ့ လက်အောက်ခံ ဖြစ်တဲ့အတွက်ကြောင့် သူ့ကျွန်တွေကို လုယက်မယ်ဆိုရင် အုပ်ချုပ်သူကို မထီမဲ့မြင် ပြုရာရောက်လိမ့်မယ်…”

လမ်းမများပေါ်တွင် ကြေးစားသမားများ စုဝေးပြီး ထိုကိစ္စကို ဆွေးနွေးနေကြသည်။ ကောင်းကင်ကြိုးဝိုင်း၊ ဓါးသွားများ နှင့် ခရမ်းရောင်ရွှေတို့သည် ဟန်ရှောင်းကို လုံလောက်သော လေးစားမှုပေးထားပြီး ၎င်းတို့လေးဦးသည် လုပ်ဆောင်မည့် အစီအစဉ်ကို ဆွေးနွေးနေကြသည်။

လက်ရှိအခြေအနေက တော်တော်ပြဿနာများ၏။ ကြေးစားအဖွဲ့ကြီးသုံးဖွဲ့သည် ထိုနေရာတွင် မည်သည့်ရာဇ၀တ်ကောင်ကိုမျှ မကြောက်ကြသော်လည်း မျောလွင့်နဂါးကျွန်း ၏ အုပ်စိုးရှင်နှင့် မရှုပ်ဝံ့ကြပေ။

“မျောလွင့်နဂါးကျွန်းက လူတွေက ဒေါသထွက်အောင် လုပ်လို့မရဘူး၊ မဟုတ်ရင် ငါတို့သေသွားမှာ သေချာတယ်။ အစီအစဉ်တစ်ခုကို စဉ်းစားရမယ်” ဓါးသွားများ ၏ ခေါင်းဆောင် ပေါ်တာက အလွန်ခိုင်မာသောလေသံဖြင့် ပြောသည်။

ခရမ်းရောင်ရွှေ၏ ခေါင်းဆောင် စာလန်နီက "ဟော်လိတ်က ဆေးလ်ဗားတွေကို ဝယ်ပြီးပြီဆိုရင်၊ ငါတို့က သူတို့ကို အကြမ်းဖက်ပြီး ပြန်မယူနိုင်ဘူး။ ဟော်လိတ်ငွေမပေးချေခင် အကျဉ်းသားတွေကို အရင်လုတာက အကောင်းဆုံးနည်းလမ်းဖြစ်မယ်။ ဖောက်သည်က ဘယ်သူလဲဆိုတာ ငါတို့သိတဲ့အတွက် စကာဗန်ဂျာတွေရောက်လာဖို့ စောင့်မယ်၊ ကြိုတင်ပြီး ချောင်းမြောင်းတိုက်ခိုက်ဖို့ ပြင်ထားမယ်၊ အကျဉ်းသားတွေကို သူတို့လာတဲ့လမ်းမှာ ပြန်လုမယ်။ ဒီနည်းအတိုင်းဆိုရင် ဟော်လိတ်နဲ့ တိုက်ရိုက် ပဋိပက္ခဖြစ်မှာ မဟုတ်ဘူး။”

ဂိုအာက "ဒါဆို၊ ပထမဆုံး၊ ဟော်လိတ်က သုံ့ပန်းတွေကို လက်ခံထားပြီးလားဆိုတာ အတည်ပြုရမယ်။ သုံ့ပန်းတွေကို မဝယ်ရသေးသရွေ့ ဒီအစီအစဥ်ကို အကောင်အထည်ဖော်နိုင်လိမ့်မယ်။ ငါတို့ သူ့ကို ဆက်သွယ်ရမှာပေါ့… ဒါပေမယ့် ငါတို့ သူ့ကို ကြေးစားအဖြစ်နဲ့ ဆက်သွယ်ရင် သံသယတွေ တိုးလာနိုင်တယ်။ ဝယ်သူက သူဝယ်ချင်တဲ့ အရာကို တစ်ယောက်ယောက်က မျက်စိကျနေတာ လိုချင်မှာမဟုတ်ဘူး။ နဂါးအစောင့်တွေက ငါတို့ကို ဒုက္ခပေးလိမ့်မယ်”

ဤအစီအစဥ်၏ ကြိုတင်လိုအပ်ချက်မှာ ဟန်ရှောင်း၏ ကြိုမြင်မှုသည် ယုံကြည်စိတ်ချရသည်ဟူသော အချက်ဖြစ်သည်။ သူတို့တွင် သဲလွန်စများစွာမရှိသောကြောင့် ယုံကြည်ရန်သာ ရွေးချယ်နိုင်ခဲ့သည်။ မည်သို့ပင်ဆိုစေကာမူ အချက်အလက် မှားယွင်းနေပါက ဟန်ရှောင်းသည် တာဝန်မှ လွတ်ကင်းနိုင်မည်မဟုတ်ပေ၊ အပြစ်တင်စရာ တစ်ယောက်ယောက် ရှိနေသောကြောင့် အခြားခေါင်းဆောင် သုံးဦးသည် ၎င်းအတွက် ပြဿနာမရှိပေ။

ဟန်ရှောင်းက သူ့ကိုယ်သူ အကြံပြုပြီး "ကျွန်တော့်မှာ အတွေ့အကြုံရှိတယ်၊ ဒါကြောင့် သူ့ကို စမ်းသပ်ဖို့ ဝယ်သူအဖြစ် ဟန်ဆောင်နိုင်တယ်။"

ခေါင်းဆောင် သုံးဦးက ဤအရာသည် အလုပ်ဖြစ်နိုင်သည်ဟု ထင်မြင်ကြသည်။ သူတို့သည် ရိုးရှင်းသော အစီအစဥ်တစ်ခု ပြုလုပ်ခဲ့သည် - ဟန်ရှောင်းသည် အလင်းမျက်နှာဖုံးဖြင့် ပြောင်းလဲကာ သူ၏ ယန္တရားဝတ်စုံကိုချွတ်၍ အဝတ်အစားများကို ပြောင်းလဲလိုက်သည်။ ယခု သူသည် ဂါလက်တစ် အာကာသယာဉ်၏ ကပ္ပတိန်တစ်ဦးကဲ့သို့ ဖြစ်သည် - ဤသို့ဖောက်သည်မျိုးသည် အလွန်အတွေ့များ၏။

ကျွန်ဈေးကွက်သည် ညစ်ပတ် ရှုတ်ထွေးခြင်းမရှိဘဲ ဇိမ်ကျကျနှင့် တင့်တယ်၏။ ကျွန်များနှင့်ပတ်သက်သည့် အချက်အလက်မှန်သမျှကို ဝယ်ယူသူများမှ ရွေးချယ်နိုင်ရန် စာအုပ်များတွင် ပြသထားသည်။

မျောလွင့်နဂါးကျွန်းတွင် ကျွန်လုပ်ငန်းတွင် အလယ်လူရှိသည်။ သူတို့သည် စကာဗန်ဂျာများထံမှ ကျွန်များကိုဝယ်ပြီး ဖောက်သည်ကြီးများထံ ရောင်းချကြသည်။

"ကျွန်တော် ကျွန်နည်းနည်း ဝယ်ချင်တယ်..."

သူ စျေးကွက်ထဲကို ဝင်လိုက်သည်နှင့် ဟန်ရှောင်းသည် သူ့ကိုယ်သူ သာမာန်ဖောက်သည်တစ်ယောက်လို အသွင်ဆောင်ပြီး သူ့ရဲ့ ရည်ရွယ်ချက်ကို ထုတ်ဖော်လိုက်သည်။ ဖက်တီးတစ်ယောက်က သူ့ထံချဉ်းကပ်ပြီး မတူညီသော မျိုးနွယ်စု ကျွန်များနှင့် မိတ်ဆက်ပေးသည် - မျိုးကွဲများစွာရှိ၏။

သာမန်ကာလျှံကာနားထောင်ရင်း ခဏကြာသော် ဟန်ရှောင်းက ရည်ရွယ်ချက်ရှိရှိ မကျေမနပ်ဖြစ်ဟန်ဖြင့် "ဒီလို ကြမ်းတမ်းတဲ့ ပုံသဏ္ဍာန်တွေကို ငါမလိုချင်ဘူး၊ ပြီးတော့ ဒီစျေးပေါတဲ့ လူတန်းစား ကျွန်တွေလည်း မလိုချင်ဘူး။ ဒီမှာ ဘယ်လိုရှားပါးမျိုးစိတ်တွေရှိလဲဆိုတာ ငါကြည့်ချင်တယ်။ မင်းမှာ အဲလိုစံနှုန်းနဲ့ မှီတဲ့ဟာ မရှိဘူးလား။"

ထိုအချိန်တွင် အရပ်ပုပု ပိန်ပိန်ပါးပါးနှင့် ဇိမ်ခံအဝတ်အစားများ ဝတ်ဆင်ထားသော လူတစ်ယောက် လျှောက်လာသည်။ သူ၏ လက်ချောင်းများနှင့် လည်ပင်းများကို တန်ဖိုးကြီးသော လက်ဝတ်ရတနာများစွာဖြင့် ဖုံးအုပ်ထားသည်။ သူက ပြုံးပြီးပြော၏ "ဟီးဟီး၊ ငါ့မှာ ပစ္စည်းကောင်းတွေ ရှိတယ်"

"မင်းက ဘယ်သူလဲ?" ဟန်ရှောင်က မေးသည်။

“ကျွန်ဈေးကွက်မန်နေဂျာ ဟော်လိတ်။ ငါ့ကိုယုံပါ၊ ဒီမှာအရာတွေက မင်းရဲ့လိုအပ်ချက်တွေကို သေချာပေါက် ဖြည့်ဆည်းပေးနိုင်တယ်။” ဟော်လိတ်မှာ သံသယမရှိပေ။ သူသည် ဖောက်သည်များအပေါ် အလွန်စိတ်အားထက်သန်သူဖြစ်သည်။

ဟန်ရှောင်းက သူ့ကို အကဲခတ်လိုက်ပြီး ခေါင်းညိတ်လိုက်သည်။ ဟော်လိတ်က 'ငါ့နောက်သို့ လိုက်' ဟု အချက်ပြသည်ကို မြင်သောအခါ ဟန်ရှောင်းက သူ့နောက်သို့ လိုက်သွားသည်။ သူတို့နှစ်ဦးသည် အောက်ထပ်သို့ ဓာတ်လှေကားဖြင့် ဆင်းလာပြီး၊ အလိမ်အကောက်များနှင့် ပြည့်နေသော အဖြူရောင်စင်္ကြံတစ်ခု ပေါ်လာသည်။ ထိုနေရာတွင် မကြာခဏဆိုသလို အဖြူရောင်အလွိုင်းတံခါးတစ်ခုကို တွေ့ရပြီး တံခါးတွင် ပြတင်းပေါက်သေးသေးလေးတစ်ခု ပါရှိပါတယ်။

ထိုနေရာသို့ လျှောက်သွားပြီးနောက် ဟန်ရှောင်းသည် ၎င်းသည် တံခါးနောက်ကွယ်ရှိ တစ်ယောက်ခန်းထောင်ခန်းဖြစ်ကြောင်း သိလိုက်ရသည်။ အတွင်းပိုင်းသည် လုံးဝဖြူဖွေးကာ အလွန်သန့်ရှင်းပြီး အမျိုးမျိုးသော သတ္တဝါများစွာရှိသည်။

“ကျေးဇူးပြုပြီး ဒီအရည်အသွေးမြင့် ကျွန်တွေနဲ့ မိတ်ဆက်ပေးပါရစေ…” ဟော်လိတ်က ယုံကြည်မှုအပြည့်နဲ့ ပြုံးပြီး ချောမွေ့စွာ ရှင်းပြသည်။ ဟန်ရှောင်းသည် ထောင်ခန်းများရှိ ကျွန်တိုင်းကို ကြည့်ပြီး ရံဖန်ရံခါ တုံ့ပြန်ပြသည်။ အများစုမှာ ကြောင်တောင်တောင်ဖြစ်နေသော မျက်နှာရှိပြီး၊ အချို့မှာ နံရံများကို ဒေါသတကြီး ကုတ်နေကြသည်။ ၎င်းတို့ထဲမှ အတော်များများသည် စူပါများဖြစ်ကြသည် - ဤနေရာရှိ ကျွန်များသည် အမှန်တကယ်ပင် ပို၍တန်ဖိုးရှိပြီး အဖိုးတန်၏။

စင်္ကြံအဆုံးသို့ ရောက်လာသော်လည်း ထိုထောင်ခန်းတစ်ရာကျော်တွင် ဆေးလ်ဗားများ မရှိပေ။

ဟော်လိတ်က မိတ်ဆက်တာကို ရပ်လိုက်ပြီး “ဘယ်သူ့ကို ရွေးလိုက်တာလဲ”

ဟန်ရှောင်းက ချောင်းတစ်ချက်ဆိုးပြီး "အခြားပစ္စည်းတွေ ရှိသေးလား"

"ဟာဟား၊ မင်းကြည့်ရတာ ဇီဇာကြောင်တဲ့ ဖောက်သည်တစ်ယောက်လိုပဲ၊ ငါကလည်း စိန်ခေါ်မှုကို ကြိုက်တယ်။" ဟော်လိတ်သည် အလွန် ဟက်ဟက်ပက်ပက် ရယ်မောလိုက်ပြီး သူ၏လက်ချောင်းများကို ချိုးလိုက်ကာ "နောက်ဆုံး ကုန်ပစ္စည်းကောင်း တစ်ခုရှိတယ်။ သူမက မင်းရဲ့လိုအပ်ချက်တွေကို သေချာပေါက် ဖြည့်ဆည်းပေးနိုင်တယ်။”

စင်္ကြံ၏အဆုံးရှိ နံရံသည် ပွင့်သွားပြီး နေရာအသစ်တစ်ခုကို ပြသသည်။ ဒါကိုမြင်တော့ ဟန်ရှောင်းစိတ်သက်သာရာရသွား၏။ အချုပ်ခန်းတစ်ခုသာရှိ၍ အထဲတွင် ဆေးလ်ဗားများ ရှိနေပုံမပေါ်သောကြောင့် ထိုအကျဉ်းသားများသည် မျောလွင့်နဂါးကျွန်းသို့ မရောက်ရှိသေးဟု ဆိုလိုခြင်းဖြစ်သည်။

သူလမ်းလျှောက်ပြီး ပြတင်းပေါက်ကို စိတ်ဝင်တစားကြည့်ရင်း ရုတ်တရက် သတိလစ်သလို အသက်ရှူရပ်သွားသည် ။ အထဲမှာ မယုံနိုင်လောက်အောင် လှပသည့် မိန်းမတစ်ယောက်ရှိ၏။ လူသားတို့၏ အလှအပရှုထောင့်မှကြည့်လျှင် သူမသည် ပြီးပြည့်စုံလုနီးပါးရှိသော မျက်နှာတစ်ခုရှိသည်။ ယန္တရားပညာရှင်ကြီးဟန်သည် ပထမဆုံးအကြည့်နှင့်ပင် အံ့ဩသွားသည်။

ဒီအမျိုးသမီးက အရမ်းငယ်ပုံရ၏။ သူမသည် ဆံပင်ရှည်ရှည်နှင့် မှုန်ဝါးဝါး ကြယ်မှုန်များဖြင့် ဖုံးအုပ်ထားကာ သူမသည် နတ်သမီးတစ်ပါးအလား ဖြစ်နေသည်။ သူမသည် သာမန်ဂလက်ဆီလူသားမျိုးနွယ် ဖြစ်ပုံရသည်။ သူမ၏ခန္ဓာကိုယ်အနှံ့ စူပါများအတွက် အထူးပြုလုပ်ထားသည့် လက်ပတ်အမျိုးအစားဖြစ်သည့် အကြမ်းသတ္တုစပ်လက်ပတ်များကို ၀တ်ဆင်ထားသည်။ အသုံးပြုထားသော ပစ္စည်းသည် အတိုင်းအတာတစ်ခုအထိ စွမ်းအင်စီးဆင်းမှုကို နှေးကွေးစေပြီး ထိန်းချုပ်ရန် ခက်ခဲစေသောကြောင့် စူပါများ၏ ပေါက်ကွဲစွမ်းအားကို လျှော့ချနိုင်သည်။ သူမသည် အလိုအလျောက်ဖျက်စီးရေးကော်လာကို ၀တ်ထားသောကြောင့် ထူးဆန်းသော လှုပ်ရှားမှုတိုင်းသည် သူမ၏ ဦးခေါင်းခွံကို ပျက်စီးသွားစေနိုင်သည်။

သို့သော် ဤအမျိုးသမီးသည် အလွန်တည်ငြိမ်သည်။ အခြားကျွန်များနှင့် လုံးဝမတူဘဲ သူမသည် ကြောင်တောင်တောင် ဖြစ်မနေသလို ဒေါသလည်းမထွက်ပေ။ မျက်လုံးကိုမှိတ်ထားပြီး ထောင့်စွန်းမှာထိုင်ကာ သူမ၏ လက်ရှိအခြေအနေများကို လုံးဝဂရုမစိုက်ဘဲ အေးအေးဆေးဆေး ထိုင်နေသည်။

ဟန်ရှောင်းက သူမကို စူးစမ်းနေချိန်တွင် ထိုအမျိုးသမီးက မျက်လုံးများကို ဖျပ်ခနဲဖွင့်လိုက်ပြီး နဂါးငွေ့တန်းနှင့် ပင်လယ်ကြီးတစ်ခုလုံး ရှိနေသယောင်ထင်ရသော ဆွဲဆောင်မှုရှိသည့် မျက်လုံးတစ်စုံဖြင့် ဟန်ရှောင်း၏ မျက်လုံးများကို ကြည့်လိုက်သည်။ သူမသည် ထောင်ခန်းအတွင်းရှိ တစ်ဖက်မြင်ပြတင်းပေါက်ကို ငေးကြည့်နေသော်လည်း ပြတင်းပေါက်အပြင်ဘက်တွင် တစ်ယောက်ယောက်က သူမကို ကြည့်နေသည်ကို သူမသိလိုက်သလိုပင်။

အရမ်းအားကောင်းတဲ့ စူပါတစ်ယောက်ပဲ... ဟန်ရှောင်းတွေးပြီး ငြိမ်သက်သွားသည်။ သူမ၏ အလှကြောင့် တုန်လှုပ်ခြောက်ခြားသွားသည်မှာ လုံးဝမသိစိတ်၏ တုံ့ပြန်မှုတစ်ခုဖြစ်သည်။ သူ ထိုစိတ်ခံစားချက်ကို အမြန်ဖယ်ရှားလိုက်ပြီး သူမကိုကြည့်ပြီးနောက် ဒီအမျိုးသမီးကို သူမသိကြောင်း သိလိုက်သည် ။

သူ တခြားနေရာကို သွားကြည့်တော့မည်အပြုတွင် အင်တာဖေ့စ်၌ မစ်ရှင်အသစ်တစ်ခု စတင်လာသည်။ မစ်ရှင်ကို အစပျိုးစေသည်မှာ ဤအမျိုးသမီးမှန်း သိသာနေ၏။