ကျားဖြူလေး

Vol. 31 Ch. 405

ရှေးဟောင်းကျောင်းတော်ကဲ့သို့ တပည့်များ၏ အဆင့်အတန်းကို တိတိကျကျ ခွဲခြားသတ်မှတ်ထားသော နေရာမျိုးတွင် အဆင့်ခုနစ် တပည့်သည် ထိပ်ဆုံးနှင့် မကွာလှရာ အေးအေးဆေးဆေး နေထိုင်နိုင်၏။ လန်ရီက တစ်ဦးတည်းသော အဆင့်တစ်ဆယ် တပည့်ဖြစ်ကာ ဓားစံအိမ်၏မျိုးဆက် ဟူယန်ပင်မှာ အဆင့်ခုနစ်သာ ဖြစ်သည်။

"ကောင်းပြီ"

လန်ရီ၏ စိတ်က စိုးရိမ်ပူပန်နေသော်လည်း ယွမ်ရှောင်၏ အကြံအပေါ် အားလုံးကို အလောင်းအစား လုပ်လိုက်ရသည်။

"ငါ့ကို မျှော်စင်ထဲ ပစ်ထည့်လိုက်"

ယွမ်ရှောင်က တည်ငြိမ်စွာ မှာကြားထားပြီး ရှေးဟောင်းမျှော်စင်၏ စည်းမျဥ်းသည် တင်းကြပ်သဖြင့် ဝင်ရောက်သွားသည်နှင့်တပြိုင်နက် လမ်းပြအသင်းသားများ အပြင်ဘက်တွင် စောင့်ဆိုင်းနေရပေလိမ့်မည်။

"အသင့်ပြင်ထား"

နူးညံ့သိမ်မွေ့ပုံပေါ်သော မိန်းကလေးသည် ကျားတစ်ကောင်၏ ခွန်အားမျိုးဖြင့် သူ၏ လက်ကို ဖမ်းဆွဲကာ အမြှောက်ဆန်တစ်ခုအလား ပစ်ထုတ်လိုက်သည်။

"မြန်လှချည်လား"

လေထဲတွင် လွင့်ထွက်သွားသော ယွမ်ရှောင်သည် ဓားပျံစီးနင်းသည်ထက် ပို၍ မြန်ဆန်နေကာ မျက်တောင်တစ်ခတ်အတွင်း ရှေးဟောင်းမျှော်စင်အတွင်း ဝင်ရောက်သွား၍ ပထမဆုံး စိန်ခေါ်မှု ရင်ဆိုင်ခဲ့ရ၏။ ဤမြင်ကွင်းက တပည့်များကို မင်သက်သွားစေကာ ရှေ့မှ ဦးဆောင်နေသူများလည်း မျက်နှာအပျက်ပျက်အယွင်းယွင်းနှင့် လှည့်ကြည့်လာကြသည်။

"ဒါက ဘာသဘောလဲ။ ဒီလိုလုပ်ရုံနဲ့ တရားရင်ဆိုင်တာက လွတ်မြောက်မှာ မဟုတ်ဘူး"

"ရှေးဟောင်းမျှော်စင်ရဲ့ ရှုခင်း ကြည့်မလို့လေ။ ဘာလုပ်ချင်လို့လဲ နင်က"

ဟူယန်ပင်က အေးစက်စက် ပြောလိုက်သော်လည်း လန်ရီသည် မထီမဲ့မြင်ဖြင့် ခွန်းတုံ့ပြန်သည်။

"သူက အဆင့်ခုနစ်တပည့် ဖြစ်လာအောင် ကြိုးပမ်းနေတာ ဖြစ်ရမယ်"

တွေးခေါ်မြော်မြင်တတ်သူ တစ်ဦးက ထုတ်ပြောလာသောအခါ ဟူယန်ပင်၏ အမြင်တွင် မူလဝိညာဥ်နယ်ပယ် ကျင့်ကြံသူတစ်ယောက်သည် ရှေးဟောင်းမျှော်စင်၏ အဆင့်ငါးကို ကျော်ဖြတ်နိုင်မည်ဟု မယုံကြည်ပေ။

"ထားလိုက်ပါ။ ချောင်ပိတ်နေတဲ့ ခွေးတစ်ကောင်က ဘာလုပ်နိုင်မှာလဲ။ အများဆုံး တစ်နာရီပဲ"

လမ်းပြအသင်းသားများအနက် အနက်ရောင်ဝတ် လူငယ်တစ်ယောက်က အထင်သေးစွာ မှတ်ချက်ချ၏။

"ဒါပေမယ့် ဒီခွေးကို ဘာအခွင့်အရေးမှ မပေးနိုင်ဘူး"

ရှေးဟောင်းမျှော်စင်ကို စိုက်ကြည့်နေသော ဟူယန်ပင်၏ မျက်လုံးများက ရေခဲပမာ အေးစက်နေသဖြင့် ထန်ကျစ်လည်း စုံစမ်းလိုက်သည်။

"ဘာအစီအစဥ် ရှိလို့လဲ"

"ရှေးဟောင်းမျှော်စင်ရဲ့ အဆင့်ငါးမှာ စိန်ခေါ်သူတွေကို တားဆီးဖို့ သံချပ်ကာဝတ် ကြီးကြပ်သူတစ်ယောက် ရှိရတယ်"

သူမက မဲ့ပြုံးတစ်ချက်ဖြင့် ရှင်းပြလိုက်ရာ အဆင့်ငါးရောက်လာလျှင်ပင် သတ်ဖြတ်ခံရပေလိမ့်မည်ဟု ထန်ကျစ် နားလည်သွားသည်။

"ဒါပေမယ့် နင်က ကြီးကြပ်သူ ဖြစ်လာဖို့ အရည်အချင်း မီလို့လား"

"ငါ့ဓားက ငါလိုအပ်တဲ့ အရည်အချင်း ရှိတယ်"

မိန်းကလေးတစ်ယောက်က ထောက်ပြလိုက်သော်လည်း အေးစက်စက် ဒေါသဖြင့်သာ ရင်ဆိုင်လိုက်ရပြီး သူမသည် ဓားဆွဲ၍ ရှေးဟောင်းမျှော်စင် အဆင့်ငါးထံ ချက်ချင်း ထွက်ခွာသွားခဲ့သည်။ ထိုသတင်းက တမဟုတ်ချင်း ပျံ့နှံ့သွားပြီး ကျောင်းတော်၏ တပည့်များ ကြည့်ရှုရန် ရောက်ရှိလာကာ မည်သည့်ဘက်သို့မဆို ပါဝင်ခြင်း မရှိပေ။

ရှေးဟောင်းမျှော်စင်၏ အဆင့်တစ်တွင် ယွမ်ရှောင်သည် စိန်ခေါ်ရန် အခန်းများအနက် တစ်ခုကို ကျပန်း ဝင်ရောက်သွားကာ နံရံဖြူဖြူများထက် ချိတ်ဆွဲထားသော ပန်းချီကားတစ်ချပ်နှင့် မျက်နှာချင်းဆိုင်နေ၏။ ပန်းချီကားအတွင်း စူးရှသော မျက်ဝန်းများဖြင့် ကျားဖြူတစ်ကောင် ဘုရင်တစ်ပါးပမာ ထိုင်နေပြီး မည်သူ့ကိုမဆို ကျောစိမ့်သွားစေလောက်သော အကြည့်မျိုး ပိုင်ဆိုင်ထားသည်။ သူ ခြေချလိုက်သည်နှင့် တပြိုင်နက် ကျားဟိန်းသံများ ပြည့်နှက်သွားကာ စက္ကန့်တိုင်း တုန်ခါမှု ပြင်းထန်လာသော်လည်း အပြင်ဘက်တွင် မျှော်စင်မှာ ငြိမ်သက်နေဆဲပင် ဖြစ်၏။

"ယွမ်ရှောင်"

နာမည်ခေါ်သံကြောင့် အတွေးနက်နေသော သူက ကျားဖြူတစ်ကောင်၏ ပုံရိပ်များဖြင့် တန်ဆာဆင်ထားသည့် အဖြူရောင် ခေါင်းလောင်းငယ်တစ်ခု ဆွဲထုတ်လိုက်သည်။

"ကျားဖြူလေးလား"

"မင်း ချန်ရီကို သတ်ဖြတ်ခဲ့တယ်။ လွတ်မြောက်နိုင်မယ် ထင်နေလို့လား"

ပန်းချီကားထဲမှ ကျားဖြူက သူ့ကို စိုက်ကြည့်ရင်း ဟိန်းဟောက်နေ၏။ ၎င်း ဟိန်းဟောက်လိုက်သည်နှင့် ခေါင်းလောင်း တုန်ခါသွားသကဲ့သို့ ရှေးဟောင်းမျှော်စင်လည်း တုန်ခါနေကာ ညီရင်းအစ်ကိုပမာပင်။ သူက အသက်ကို ခပ်ပြင်းပြင်းရှူ၍ ခေါင်းလောင်းကို သိုလှောင်အိတ်အတွင်း ပြန်လည်သိမ်းဆည်းလိုက်သော်လည်း ကျားဖြူတစ်ကောင် ရုတ်တရက် ထွက်ပေါ်လာ၍ ပြင်းထန်စွာ ခုန်အုပ်ခဲ့သည်။ ၎င်းမှာ ပုံရိပ်ယောင် မဟုတ်ဘဲ ရှေးဟောင်းမျှော်စင်၏ စမ်းသပ်ချက် ရုပ်သေးတစ်ခု ဖြစ်သောကြောင့် သူသည် ငုံ့ထွက်၍ လျှောတိုက်သွားကာ ဓားဖြင့် နှလုံးသားနေရာသို့ ပင့်ထိုးလိုက်၏။ ထိုမြင်ကွင်းသည် ချန်ရီ၏ အဖြစ်ဆိုးကို ပြန်လည်သတိရစေပြီး နှလုံးခုန်မြန်လာသည်။

"ဒါက ရှေးဟောင်းအင်မော်တယ်ဘိုးဘေးရဲ့ ကပ်ဘေးလူဝင်စားတစ်ယောက်ပါပဲ။ ဘာကြောင့် စိုးရိမ်ပူပန်နေမှာလဲ"

ကြယ်ပြာက သတိပေးလိုက်သဖြင့် သူ့ကို အသိပြန်ဝင်လာစေသည်။

"အောင်မြင်တယ်။ နောက်တစ်ဆင့် သွားပါ"

အသံတစ်သံက ကြေညာလိုက်သောအခါ လှေကားမှာ ရုတ်တရက် ထွက်ပေါ်လာပြီး ယွမ်ရှောင်သည် တည်ငြိမ်လေးနက်စွာ တက်သွားခဲ့သည်။ နှစ်ထပ်မြောက်တွင် ကျားရုပ်သေး ဆယ်ကောင် ရှိနေသဖြင့် ချွေးပင် မထွက်လိုက်ဘဲ အကောင်တစ်ရာ ရှိသော သုံးထပ်၊ အကောင်တစ်ထောင်ရှိသော လေးထပ်အထိ ရောက်ရှိသွား၏။ သူက တိုက်ပွဲအတွင်း ကျားထောင်ချီကို ဓားတစ်လက်ဖြင့် ရင်ဆိုင်နေကာ ကျဆုံးသွားသော ကျားတစ်ကောင်ချင်းစီ၏ အကြည့်များသည် ထူးခြားလွန်းနေသဖြင့် စိတ်မသက်မသာ ဖြစ်လာခဲ့သည်။ အသက်ဓာတ်မရှိသော ကျားရုပ်သေးများ၏ အကြည့်သည် နှလုံးသားကို ဓားဖြင့် ထိုးဖောက်ခံလိုက်ရသည့် ချန်ရီ၏ အကြည့်နှင့် တစ်ထပ်တည်း ကျနေသည် မဟုတ်ပါလော။

"ငါးထပ်မြောက်မှာ ကျားရုပ်သေးတွေ ရှိသေးလား"

"ငါးထပ်မှာ ရှေးဟောင်းသံချပ်ကာဝတ် ကြီးကြပ်သူတစ်ယောက်ကို ရင်ဆိုင်ရမယ်"

ယွမ်ရှောင်၏ အမေးကို ရှေးဟောင်းမျှော်စင်၏ အသံက ပြန်ဖြေလိုက်ပြီး အပြာရောင်ဝတ် လူငယ်တစ်ယောက်၏ ပုံရိပ် ရုတ်တရက် ထွက်ပေါ်လာကာ သတိပေးခဲ့သည်။

"ဟူယန်ပင်က တကယ့်ကြီးကြပ်သူကို နှင်ထုတ်ပြီး ရှေးဟောင်းသံချပ်ကာ ဝတ်လို့ စောင့်ဆိုင်းနေတယ်။ မင်း စိုးရိမ်နေပြီလား"

သူ၏ ခြေလှမ်းများ တိခနဲ ရပ်၍ တိတ်ဆိတ်သွားသဖြင့် လူငယ်က စုံစမ်းလိုက်သည်။

"မဟုတ်ဘူး။ ပြိုင်ဘက်တစ်ယောက် ရောက်လာပြီဆိုတော့ အဆင့်တက်လိုက်တာ ပိုကောင်းမယ် ထင်လို့"

သူက ခေါင်းယမ်း၍ အသက်ရှူချိန် ဆယ်ကြိမ်အတွင်း မူလဝိညာဥ် အလယ်အဆင့်သို့ ဖောက်ထွက်ကာ ထပ်မံ တက်လှမ်း၍ ချီတက်သွားသည်။

"ငါးထပ်မြောက်ရဲ့ တိုက်ပွဲကို အပြင်မှာ ထုတ်လွှင့်ထားတယ်။ ပြပွဲကောင်းကောင်းတစ်ခု ဖြစ်ပါစေ ညီအစ်ကို"

ထွက်ခွာသွားသော ပုံရိပ်ကို ကြည့်ရင်း အတွေးနက်နေသော အပြာရောင်ဝတ်လူငယ်က နောက်ဆုံးတွင် ရယ်မောရင်း ရေရွတ်နေခဲ့သည်။

ရှေးဟောင်းမျှော်စင်ပတ်လည်တွင် လူပင်လယ်ကြီး စုဝေးနေသော်လည်း လန်ရီနှင့် ထန်ကျစ်တို့ လူစုအနား မည်သူမှ မကပ်ရဲချေ။ ငါးထပ်မြောက်၏ မြင်ကွင်းကို အလင်းမျက်နှာပြင်က ထုတ်ဖော်ပြသနေစဥ် ပုံရိပ်နှစ်ခု ဆင်းသက်လာ၍ ရွှေရောင်ရင့်ရင့် ဝတ်ရုံနှင့် ယောကျ်ားတစ်ယောက်၊ တည်ရှိမှုက ကြောက်မက်ဖွယ်ကောင်း၍ လျှို့ဝှက်ဆန်းကြယ်သော အကြည့်မျိုး ပိုင်ဆိုင်ထား၏။ ကျန်တစ်ယောက်မှာ ငွေရောင်ဝတ်ရုံနှင့် မိန်းမတစ်ယောက် ဖြစ်၍ ရေခဲကဲ့သို့ အေးစက်သော အမူအရာမျိုး ထုတ်ဖော်ထားကာ ထိုအမျိုးသားထက် အသက်ငယ်ရွယ်ပုံပေါ်သည်။

"ဓားစံအိမ်သခင်နဲ့ သခင်မချင်ကို ဂါရဝပြုပါတယ်"

ဟူယန်ပင်သည် ထိုနှစ်ယောက်ကို ကြိုဆိုရန် နောက်လိုက်များဖြင့် အလျင်အမြန် လှုပ်ရှားလိုက်သည်။ ဟူယန်ပင်၏ ဖခင် ဓားစံအိမ်သခင်က ခန့်ညားထည်ဝါစွာ ရပ်နေ၍ ဆန်းကြယ်ဘုရားကျောင်း ကိုယ်စားပြု သခင်မချင်၏ ကျောဘက်၌ အလင်းစက်ဝိုင်းတစ်ခု ထွက်ပေါ်နေသည်။

"ငါ့သမီး တက်သွားပြီလား"

"ယွမ်ရှောင်နဲ့ တွေ့ဆုံနေပါပြီ"

ထန်ကျစ်က အထက်သို့ ညွှန်ပြလိုက်လေသည်။