ဘယ်လိုလုပ်ပြီး ဒီလို ဖြစ်နိုင်ရတာလဲ

ဟန်ယွမ်ခိုင်သာ နတ်ဆိုးကျင့်စဉ်ကျင့်သူတစ်ယောက် မဟုတ်ခဲ့လျှင်၊ သွေးဆာနည်းဗျူဟာပုံစံကြီးကိုသာ အသုံးမပြုခဲ့လျှင် သူ့၏လက်ရှိအင်အားဖြင့် လုချန်းသည် သူ့အတွက် ပြိုင်ဘက်တစ်ယောက် ဖြစ်နိုင်မည် မဟုတ်ပေ။

သို့သော် ကံတရားက ဟန်ယွမ်ခိုင်ဘက်တွင် မရှိခဲ့။ သူသည် နတ်ဆိုးကျင့်စဉ်ကျင့်သူတစ်ယောက် ဖြစ်နေခဲ့ပြီး သူ၏အင်အားသည် သွေးဆာနည်းဗျူဟာပုံစံကြီး၏ အစွမ်းအပေါ်တွင်သာ အဓိကမှီခိုနေသည်။

လုချန်းဆိုသူက နတ်ဆိုးကျင့်စဉ်ကျင့်သူများ၏ ရန်ဘက်တော်ကြီးတစ်ယောက်ဟု ယူဆ၍ရသည်။

ဟန်ယွမ်ခိုင်သည် သူ၏ကိုယ်ပိုင်စွမ်းအား၌ ယစ်မူးနေဆဲဖြစ်ပြီး နောက်ဆက်တွဲရင်ဆိုင်ရမည့်အရာကို မြူတစ်မှုန်မျှပင် သတိမထားမိသေးချေ။

သို့သော် လုချန်း၏ မျက်နှာပေါ်မှ အပြုံးကို မြင်လိုက်ရသောအခါ ဟန်ယွမ်ခိုင်သည် အနည်းငယ် ဇဝေဇဝါဖြစ်သွားသည်။ သူ၏အင်အားသည် ဥပဒေနိယာမ အလုံးစုံ နယ်ပယ်အဆင့်သို့ ရောက်နေပြီဖြစ်သည်။ ထို့ပြင် သွေးဆာနည်းဗျူဟာပုံစံကြီး၏

ဆက်တိုက် အစွမ်းမြှင့်တင်မှုကြောင့် သူ၏အင်အားသည် အနည်းဆုံး ဥပဒေနိယာမ အလုံးစုံ နယ်ပယ်အဆင့်ငါး အလွှာထက်တွင် ရှိနေကြောင်း သူ ကောင်းစွာသိ၏။

ဤအခြေအနေတွင်တောင် ဆွမ်ဧကရာဇ်က ပြုံးနေနိုင်သေးလား။

သူ ထုတ်လွှတ်လိုက်သော အရှိန်အဝါကြောင့် ကြောက်လန့်၍ ရူးများရူးသွားခဲ့တာလား။

ဟန်ယွမ်ခိုင်က လုချန်းကို တိုက်ခိုက်ရန် ရည်ရွယ်နေသည်ကို မြင်သောအခါ ကျိဟုန်ဝမ်နှင့် တန်ခိုးရှင်တစ်သောင်းဂိုဏ်း၏ အကြီးအကဲများလည်း နတ်လှေ၏ရှေ့သို့ အလျင်အမြန် ပျံသန်းလာကြပြီး ဟန်ယွမ်ခိုင်၏လမ်းကို ပိတ်ဆို့ရန် ကြိုးစားလိုက်ကြ၏။

သူတို့နှစ်ဦးကို မြင်သောအခါ ဟန်ယွမ်ခိုင်၏မျက်နှာထက်တွင် မထီမဲ့မြင် အမူအရာတစ်ခု ပေါ်လာခဲ့သည်။

ထို့နောက် သူ၏လက်ကို မြှောက်လိုက်ရာ သွေးဆာနည်းဗျူဟာပုံစံကြီးအတွင်းမှ ဧရာမသွေးဓားကြီးတစ်လက် ထပ်မံပေါ်ထွက်ကာ လုချန်းဆီသို့ ချက်ချင်းပင် တိုးဝင်သွားခဲ့၏။

ကျိဟုန်ဝမ်နှင့် တန်ခိုးရှင်တစ်သောင်းဂိုဏ်း၏ အကြီးအကဲများ ခုခံကာကွယ်ရန် ပြင်လိုက်စဉ်မှာပင် လုချန်း၏ စိတ်အာရုံ သတင်းပို့ချက်ကို ကြားလိုက်ရသည်။

“ဖယ်ပေးကြပါ။ ကျွန်တော့်မှာ ဖောက်ထွက်ဖို့ ကိုယ်ပိုင်နည်းလမ်း ရှိပါတယ်။”

လုချန်းက ထိုသို့ပြောသည်ကို ကြားသောအခါ သူတို့နှစ်ဦး တစ်ယောက်ကိုတစ်ယောက် ကြည့်လိုက်ကြသည်။ ထို့နောက် သူတို့၏စိတ်ကို အမြန်ပြန်စုစည်းကာ မိုးပျံလှေရှေ့မှ ချက်ချင်း ဖယ်ခွာသွားကြတော့သည်။

ကျိဟုန်ဝမ်နှင့် အကြီးအကဲတို့က သွေးဓားကို ကြားဖြတ်မတားဆီးသည်ကို မြင်သောအခါ ဟန်ယွမ်ခိုင် မျက်မှောင်ကြုတ်သွားသည်။ သူ၏ စိတ်ထဲတွင်လည်း မကောင်းသော ခံစားချက်တစ်ခု ပေါ်ပေါက်လာခဲ့၏။

ကျိဟုန်ဝမ်နှင့် အကြီးအကဲတွေက ဤဓားချက်ကို မခံနိုင်မှန်းသိသောကြောင့် ဆွမ်ဧကရာဇ်ကို စွန့်ပစ်ရန် ဆုံးဖြတ်လိုက်ကြခြင်းလား။

သို့သော် ဆွမ်ဧကရာဇ်၏နောက်ခံက ရိုးရှင်းမည်မဟုတ်ပေ။ အကယ်၍ သူတို့ ဆွမ်ဧကရာဇ်ကို အမှန်တကယ် စွန့်ပစ်၍ သူ တစ်ခုခုဖြစ်သွားခဲ့ပါက ဆွမ်ဧကရာဇ်၏နောက်ကွယ်မှ အင်အားကြီးအဖွဲ့၏ အပြစ်ပေးမှုကို မကြောက်ကြဘူးလား။

သို့မဟုတ် ဆွမ်ဧကရာဇ်မှာ အခြားလှည့်ကွက်များ ရှိနေသေးတာလား။

ယခု လုချန်းထံတွင် အခြား လျှို့ဝှက်လက်နက်တစ်ခုခု ရှိနေမည်ကို ဟန်ယွမ်ခိုင်ကြောက်ရွံ့နေခဲ့သည်။ သို့မဟုတ် သူ၏နောက်ကွယ်တွင် ပို၍ပင် အားကောင်းသော အစောင့်အရှောက်တစ်ဦး ရှိနေမည်ကို စိုးရိမ်နေမိသည်။

ဟန်ယွမ်ခိုင် အတွေးများဖြင့် လွင့်မျောနေစဉ်မှာပင် သွေးဓားက လုချန်း၏ရှေ့သို့ ရောက်ရှိနေပြီဖြစ်သည်။ သို့သော် လုချန်းက ရှောင်တိမ်းခြင်းမရှိသလို သူ၏ဘေးတွင်လည်း အစွမ်းထက်သော အစောင့်အရှောက်တစ်ယောက်မှ ပေါ်မလာခဲ့ချေ။

ဟန်ယွမ်ခိုင် ပို၍ပင် နားမလည်နိုင် ဖြစ်သွားသည်။

သူက အများကြီး စဉ်းစားလွန်းနေတာလား။

ဆွမ်ဧကရာဇ်တွင် လျှို့ဝှက်လက်နက်မရှိသလို သူ့နောက်တွင် ပိုအားကောင်းသော အစောင့်အရှောက်များလည်းမရှိပဲ ကျိဟုန်ဝမ်ကသာ သူ၏တိုက်ခိုက်မှုကို ခုခံရန် ကြောက်ရွံ့နေခြင်း ဖြစ်နိုင်လား။

ဆွမ်ဧကရာဇ်က သူ၏ခန္ဓာကိုယ်ကိုပင် မလှုပ်ရှားခဲ့ပေ။ သူ၏အရှိန်အဝါကြောင့် လန့်ပြီး ကြောက်ဒူးတုန်နေခြင်းများလား။

လုချန်းကို ရှင်းလင်းနိုင်တော့မည်ဟု ဟန်ယွမ်ခိုင် ထင်မှတ်နေစဉ်မှာပင် ရုတ်တရက် လုချန်း၏ပတ်ပတ်လည်မှ အငွေ့အသက်များ တိုးပွားလာကာ သူ့ထံမှ ရွှေရောင်အလင်းတန်းများ ထွက်ပေါ်လာခဲ့၏။

ထို့နောက် လုချန်းက နတ်ဆိုးမြေမြုပ်ကျင့်စဉ်ကို ထုတ်ဖော်လိုက်သည်။ နောက်တစ်ခဏတွင် သူ၏ခန္ဓာကိုယ်မှ ရွှေရောင်အလင်းတန်းတစ်ခု ပျံထွက်လာပြီး သူ၏ပတ်လည်တွင် အဆက်မပြတ် လှည့်ပတ်ကာ အကာအကွယ်တစ်ခု ဖွဲ့စည်းလိုက်သည်။

ထိုအချိန်တွင်ပင် လုချန်း၏လက်ထဲ၌ ရွှေရောင်အလင်းတန်းများ ထုတ်လွှတ်နေသော အလံတစ်ခု ပေါ်လာခဲ့သည်။ ထိုအလံ ပေါ်လာသည့်အခိုက်တွင် ဟန်ယွမ်ခိုင်၏ မျက်လုံးသူငယ်အိမ်များ ရုတ်တရက် ကျုံ့သွား၏။ သူ၏ခန္ဓာကိုယ်လည်း အလိုလို တောင့်တင်းသွားပြီး နက်ရှိုင်းသော ကြောက်ရွံ့မှုတစ်ခုကို ခံစားလိုက်ရသည်။

လုချန်း၏လက်ထဲမှ နတ်ဆိုးနှင် အလံကို ဟန်ယွမ်ခိုင် မသိပါ။ သို့သော် သူ အလိုလို ကြောက်ရွံ့မှုလာပြီး ထိုအရာက သူ၏အသက်ကို ခြိမ်းခြောက်နိုင်သည်ဟုလည်း ချက်ချင်း ခံစားမိလိုက်၏။

ဟန်ယွမ်ခိုင်၏ မျက်ခုံးများ တင်းနေပြီး သူ၏အမူအရာလည်း အလွန် လေးနက်သွားသည်။ ထိုအချိန်တွင် သွေးဓားသည် ဖေးဟုန်နတ်လှေ၏ အကာအကွယ်အတားအဆီးနှင့် ထိတွေ့မိခဲ့ပြီ ဖြစ်သည်။ သို့သော် ဖေးဟုန်နတ်လှေ၏ အတားအဆီးသည် အသက်မဝင်ခဲ့ပဲ သွေးဓားက လုချန်းဆီသို့ ဆက်လက်တိုးဝင်သွားခဲ့သည်။

လုချန်းက နတ်ဆိုးနှင်အလံထဲသို့ စိတ်ဝိညာဉ်စွမ်းအားများကို ထည့်သွင်းပြီးနောက် ဝှေ့ယမ်းလိုက်သည်။ ထိုအခါ အလံမှ အဖြူရောင် စိတ်ဝိညာဉ်စွမ်းအားစီးကြောင်းတစ်ခု ထွက်ပေါ်လာ၏။ ဤအဖြူရောင် စိတ်ဝိညာဉ်စွမ်းအား သွေးဓားနှင့် ထိတွေ့လိုက်သောအခါ ဓားသည် အရည်ပျော်သွားသကဲ့သို့ အလွန်တိုတောင်းသော အချိန်အတွင်း၌ ပျောက်ကွယ်သွားခဲ့သည်။

ဤမြင်ကွင်းကို မြင်သောအခါ ဟန်ယွမ်ခိုင် လုံးဝ မှင်တက်သွားခဲ့သည်။

“ဘယ်လို... ဘယ်လိုလုပ်ပြီး ဒါက ဖြစ်နိုင်ရတာလဲ”

သွေးဆာနည်းဗျူဟာပုံစံကြီး၏ အင်အားဖြင့် သူ၏အပြင်းထန်ဆုံး တိုက်ခိုက်မှုသည် မူလအစကမ္ဘာ နယ်ပယ်အဆင့်မှ လူတစ်ယောက်၏လက်ထဲ၌ ဤမျှ လွယ်ကူစွာ ချေဖျက်ခံလိုက်ရသည်ကို ဟန်ယွမ်ခိုင် ယုံရခက်နေခဲ့သည်။

မဟုတ်ပါ။ ဒါက ဆွမ်ဧကရာဇ်ကိုယ်တိုင်နှင့် သိပ်မသက်ဆိုင်လောက်ပေ။ အားလုံးက သူ၏လက်ထဲမှ ထိုအလံကြောင့်သာ ဖြစ်ရမည်။

နတ်ဆိုးနှင်အလံ၏ အစွမ်းကြောင့်သာ ဖြစ်ကြောင်း ဟန်ယွမ်ခိုင် ချက်ချင်း သဘောပေါက်လိုက်သည်။

သူ၏တိုက်ခိုက်မှုကို ဤမျှ လွယ်ကူစွာ ပိတ်ဆို့နိုင်ခဲ့သောကြောင့် ဤစိတ်ဝိညာဉ်လက်နက်၏ အဆင့် အလွန်မြင့်မားရမည်ဟု သူ မတွေးပဲ မနေနိုင်တော့ပေ။ ထိုသို့တွေးမိသောအခါ ဟန်ယွမ်ခိုင်၏ စိတ်ထဲ၌ လောဘစိတ်များ တိုးပွားလာခဲ့သည်။

သွေးဆာနည်းဗျူဟာပုံစံကြီး၏ လွှမ်းမိုးမှုကြောင့် သူ၏ ပုဂ္ဂိုလ်ရေးဆိုင်ရာ အဆိုးမြင်စိတ်ခံစားချက်များနှင့် အမျိုးမျိုးသော တပ်မက်မှုများလည်း ပိုမိုကြီးထွားလာခဲ့၏။

ယခုအခိုက်အတန့်တွင် လုချန်း၏လက်ထဲမှ နတ်ဆိုးနှင် အလံကို ဟန်ယွမ်ခိုင် အလွန်လိုချင်တပ်မက်နေသည်။

ထို့ကြောင့် သူ၏ စိတ်ဝိညာဉ်စွမ်းအားကို တစ်ဖန်ပြန်စုစည်းကာ နောက်တစ်ကြိမ် တိုက်ခိုက်ရန် ပြင်ဆင်လိုက်သည်။

သို့သော်လည်း ထိုအချိန်တွင် လုချန်းက နတ်ဆိုးနှင်အလံကို ထပ်မံ ဝှေ့ယမ်းလိုက်ပြန်သည်။ ဤတစ်ကြိမ်တွင် အဖြူရောင် စိတ်ဝိညာဉ်စွမ်းအားများသည် မြစ်တစ်စင်းအဖြစ် ပြောင်းလဲသွားကာ အောက်ရှိ သွေးဆာနည်းဗျူဟာပုံစံကြီးဆီသို့ စီးဆင်းသွားခဲ့သည်။

ထိုမြင်ကွင်းကို မြင်သောအခါ ဟန်ယွမ်ခိုင်က သွေးဓားကို ဖန်တီးခြင်းကို အရှိန်မြှင့်လိုက်သည်။ ခဏအကြာတွင် ဧရာမသွေးဓားကြီးတစ်လက် လေထဲတွင် တစ်ဖန်ပြန်လည်ပေါ်ထွက်လာကာ လုချန်းဆီသို့ တန်းတန်းမတ်မတ် ပျံတက်သွားခဲ့၏။

သို့သော်လည်း နတ်ဆိုးနှင်အလံမှ ထွက်ပေါ်လာသော အဖြူရောင် စိတ်ဝိညာဉ်စွမ်းအားသည် သွေးဓားကို လွယ်ကူစွာ အရည်ပျော်စေခဲ့ပြန်သည်။

ပိုမိုနီးကပ်လာသော အဖြူရောင်မြစ်ကို ကြည့်ရင်း ဟန်ယွမ်ခိုင်၏ အလွန်အမင်း ကြောက်လန့်သွားခဲ့သည်။ ဤတံခွန်မှ ထုတ်လွှတ်သော စိတ်ဝိညာဉ်စွမ်းအား ဤမျှ ကြောက်မက်ဖွယ်ကောင်းသော စွမ်းအားကို ပိုင်ဆိုင်လိမ့်မည်ဟု သူ မမျှော်လင့်ထားခဲ့ပေ။

ဤအခြေအနေကို လက်ခံရန် ဟန်ယွမ်ခိုင် ဆန္ဒမရှိပါ။ ဥပဒေနိယာမ အလုံးစုံ နယ်ပယ်အဆင့်၏ စွမ်းအားဖြင့် မူလအစကမ္ဘာ နယ်ပယ်အဆင့်မှ ကျင့်စဉ်ကျင့်သူတစ်ယောက်ကို အနိုင်မယူနိုင်ဟု သူ မယုံကြည်နိုင်ပေ။

ထို့နောက် ဟန်ယွမ်ခိုင်က သူ၏လက်ချောင်းများကို ဝှေ့ယမ်းလိုက်ပြီး သွေးဆာနည်းဗျူဟာပုံစံကြီးမှ စွမ်းအားကို ထပ်မံ၍ အရှိန်မြှင့်ကာ ထုတ်ယူလိုက်သည်။ အကယ်၍ သူ၏လက်ရှိစွမ်းအားက ဆွမ်ဧကရာဇ်ကို ရင်ဆိုင်ရန် မလုံလောက်သေးပါက ပို၍ အားကောင်းလာအောင် ပြုလုပ်ရန်သာရှိသည်။

သူသာ ဆွမ်ဧကရာဇ်ကို အနိုင်ယူပြီး ဤကမ္ဘာမှ ထွက်ခွာရန် နတ်လှေကို သိမ်းပိုက်နိုင်ပါက မြူခိုးမှော်ဂိုဏ်းတစ်ခုလုံးကို စတေးရလျှင်ပင် သူ ဝမ်းနည်းမည်မဟုတ်ပေ။

သူ့အတွက် မြူခိုးမှော်ဂိုဏ်း၏ တပည့်များသည် ယဇ်ပူဇော်ခံ သတ္တဝါများသာ ဖြစ်ကြသည်။

ယခု ဤယဇ်ပူ‌ဇော်ခံ သတ္တဝါများကို စတေးရမည့် အချိန်ရောက်ပြီ ဖြစ်၏။

သွေးဆာနည်းဗျူဟာပုံစံကြီး၏ စွမ်းအားကို ထပ်မံတိုးမြှင့်လိုက်သည်နှင့်အမျှ မြူခိုးမှော်ဂိုဏ်း၏ တပည့်များ တစ်ယောက်ပြီးတစ်ယောက် သွေးမြူများအဖြစ်သို့ ပြောင်းလဲသွားကြသည်။ မကြာမီပင် မြူခိုးမှော်ဂိုဏ်း၏ မူလအစကမ္ဘာ နယ်ပယ်အဆင့် အကြီးအကဲပင် သွေးမြူအဖြစ်သို့ ပြောင်းလဲကာ ဟန်ယွမ်ခိုင်၏ စုပ်ယူခြင်းကို ခံလိုက်ရသည်။

စုဟန်ယန်သည် မျက်မှောင်အနည်းငယ် ကြုတ်ကာ မျက်နှာဖြူဖျော့လျက်ရှိသည်။ သူမ၏ ခန္ဓာကိုယ်အတွင်းမှ စိတ်ဝိညာဉ်စွမ်းအားကို သွေးဆာနည်းဗျူဟာပုံစံကြီးက စုပ်ယူနေသည်ကို အနည်းငယ် ခံစားမိနေသည်။

စုဟန်ယန်သည် သွေးဆာနည်းဗျူဟာပုံစံကြီးကို အတွင်းမှ ဖျက်ဆီးလိုသော်လည်း သူမ၏ လက်ရှိကျင့်ကြံမှုအဆင့်ဖြင့် ဟန်ယွမ်ခိုင်အနားသို့ ကပ်ရန်ပင် ခက်ခဲနေသည်။ ထို့ပြင် သွေးဆာနည်းဗျူဟာပုံစံကြီး၏ တိုက်စားမှုကိုလည်း အဆက်မပြတ် တွန်းလှန်နေရ၏။

ဤအချိန်တွင် ကောင်းကင်မှ အဖြူရောင်မြစ်သည် သွေးဆာနည်းဗျူဟာပုံစံကြီး၏ရှေ့သို့ ရောက်ရှိနေပြီဖြစ်သည်။

ထိုအချိန် ဟန်ယွမ်ခိုင် ကျယ်လောင်စွာ အော်ဟစ်လိုက်၏။ တချိန်တည်းမှာပင် သွေးစွမ်းအင်လှိုင်းလုံးကြီးတစ်ခုသည် နတ်ဆိုးနှင်အလံမှ ထုတ်လွှတ်လိုက်သော အဖြူရောင် စိတ်ဝိညာဉ်စွမ်းအားကို တိုက်ရိုက် ရင်ဆိုင်လိုက်သည်။

သို့သော်လည်း သွေးစွမ်းအင်သည် မြစ်၏ အဖြူရောင် စိတ်ဝိညာဉ်စွမ်းအားနှင့် ထိတွေ့လိုက်သောအခါ ချက်ချင်း ပျောက်ကွယ်သွားခဲ့သည်။ ထိုအခါမှ ဟန်ယွမ်ခိုင်လည်း အခြေအနေကို နောက်ဆုံးတွင် သဘောပေါက်သွားခဲ့သည်။

ပြိုင်ဘက်၏ စိတ်ဝိညာဉ်လက်နက်တစ်ခုတည်းက အစွမ်းထက်နေခြင်း မဟုတ်ပေ။ ဆွမ်ဧကရာဇ် ထုတ်လွှတ်သော စိတ်ဝိညာဉ်စွမ်းအားသည် နတ်ဆိုးကျင့်စဉ်ကျင့်သူများကို တန်ပြန်ချေဖျက်ရန် အထူးပြုလုပ်ထားခြင်းဖြစ်သည်။

ထို့ကြောင့် သူ၏ သွေးဆာနည်းဗျူဟာပုံစံကြီးကို အသုံးပြု၍ မည်မျှပင် အစွမ်းမြှင့်တင်စေကာမူ စိတ်ဝိညာဉ်လက်နက်မှ ထုတ်လွှတ်သော စိတ်ဝိညာဉ်စွမ်းအား၏ ချေဖျက်မှုကို ခံရမည်သာ ဖြစ်၏။

နတ်ဆိုးနှင်အလံ၏ ကြောက်မက်ဖွယ်ကောင်းသော အချက်ကို သဘောပေါက်သွားသောအခါ ဟန်ယွမ်ခိုင်၏ စိတ်ထဲ ထိတ်လန့်မှုဖြင့် ပြည့်နှက်သွားခဲ့သည်။ နတ်ဆိုးကျင့်စဉ်ကျင့်သူများကို ဤမျှ ထိရောက်စွာ တန်ပြန်ချေဖျက်နိုင်သော စိတ်ဝိညာဉ်လက်နက်မျိုးကို သူ ပထမဆုံးအကြိမ် တွေ့ကြုံဖူးခြင်းဖြစ်သည်။

မဖြစ်ပါ။ သူ ဆွမ်ဧကရာဇ်ကို ထိပ်တိုက် ရင်ဆိုင်လို့ မရတော့ပါ။

ဤအတိုင်းဆက်သွားပါက သူ၏သေဆုံးရမှာ သေချာနေသည်။

သူ ပိရှကမ္ဘာသို့ ပြန်သွားရဦးမည်ဖြစ်သည်။ ဤအဆင့်နိမ့်ကမ္ဘာတွင် သူ မသေချင်ပေ။

ထိုသို့တွေးပြီး သွေးစွမ်းအင်ကို တစ်ဖန်ပြန်စုစည်းလိုက်သည်။ နောက်တစ်ခဏတွင် သွေးရောင်ဧရာမလက်ကြီးတစ်ဖက် သွေးဆာနည်းဗျူဟာပုံစံကြီးအထက်တွင် ပေါ်လာပြီး နတ်ဆိုးနှင်အလံမှ ထုတ်လွှတ်လိုက်သော အဖြူရောင် စိတ်ဝိညာဉ်မြစ်ကို နောက်တစ်ကြိမ် ပိတ်ဆို့ရန် ကြိုးစားလိုက်သည်။

သို့သော်လည်း နတ်ဆိုးနှင်အလံ၏ စိတ်ဝိညာဉ်စွမ်းအားသည် သွေးရောင် ဧရာမလက်ကြီးနှင့် ထိတွေ့လိုက်သည်နှင့် သွေးစွမ်းအင်များကို အလွယ်တကူ အရည်ပျော်သွားစေခဲ့သည်။ ထို့နောက်တွင် လုချန်းက သူ၏လက်ထဲမှ နတ်ဆိုးနှင်အလံကို မြှောက်ကာ စိတ်ဝိညာဉ်စွမ်းအားများ တစ်ဖန်ပြန်ထည့်သွင်းလိုက်သည်။ ထိုအခါ လှိုင်းလုံးကဲ့သို့ အဖြူရောင် စိတ်ဝိညာဉ်စွမ်းအားတစ်ခု ထပ်မံထွက်ပေါ်လာခဲ့၏။

နတ်ဆိုးနှင်အလံမှ ထုတ်လွှတ်လိုက်သော အဖြူရောင် စိတ်ဝိညာဉ်စွမ်းအားသည် မြစ်နှစ်စင်းကဲ့သို့ သွေးဆာနည်းဗျူဟာပုံစံကြီးဆီသို့ တိုးဝင်သွားခဲ့သည်။ စိတ်ဝိညာဉ်စွမ်းအားမြစ်မျာ သွေးဆာနည်းဗျူဟာပုံစံကြီးနှင့် ထိတွေ့လိုက်သည့်အခိုက်တွင် နည်းဗျူဟာပုံစံ၏ အကာအကွယ်တစ်ခုလုံး ချက်ချင်း ပြိုကျသွားခဲ့သည်။

သွေးဆာနည်းဗျူဟာပုံစံကြီးအတွင်းရှိ မြူခိုးမှော်ဂိုဏ်း၏ တပည့်များလည်း ရုတ်တရက် ထိန်းချုပ်မှုမှ လွတ်မြောက်သွားကြပြီး အလွန် သက်သာရာရသွားကြသည်။

ဤအချိန်တွင် စုဟန်ယန်အပေါ်မှ သွေးစွမ်းအင်များလည်း ပျောက်ကွယ်သွားပြီး သူမ၏ခန္ဓာကိုယ် ပုံမှန်အတိုင်း ပြန်ဖြစ်သွားခဲ့သည်။

သွေးဆာနည်းဗျူဟာပုံစံကြီး ပျောက်ကွယ်သွားသည်နှင့် မြူခိုးမှော်ဂိုဏ်းရှိ လူတိုင်း၏ အကြည့်များက ဟန်ယွမ်ခိုင်ထံသို့ ရောက်လာကြသည်။

စုဟန်ယန်ကလည်း သူမ၏ဓားကို ကျစ်ကျစ်ပါအောင် ဆုပ်ကိုင်ထားခဲ့သည်။ ယခု သူမကိုယ်တိုင် ဟန်ယွမ်ခိုင်ကို အဆုံးသတ်ပေးချင်နေမိသည်။

ဤအချိန်တွင် ဟန်ယွမ်ခိုင်၏စွမ်းအားများ လျင်မြန်စွာ ကျဆင်းသွားခဲ့သည်။ သွေးဆာနည်းဗျူဟာပုံစံ ပျောက်ကွယ်သွားခြင်းက သူ့အား တန်ပြန်သက်ရောက်မှု ခံစားစေခဲ့ပြီး နဂို ယင်ယန်နယ်ပယ်အဆင့်သို့ ပြန်ကျဆင်းသွားခဲ့သည်။

မြူခိုးမှော်ဂိုဏ်း၏ တပည့်များနှင့် အကြီးအကဲများ၏ သတ်ဖြတ်လိုသော အကြည့်များကို မြင်သောအခါ ဟန်ယွမ်ခိုင်က နှာခေါင်းရှုံ့ကာ

“မင်းတို့မှာ ငါ့ကိုသတ်နိုင်တဲ့ အရည်အချင်းရှိတယ်လို့ ထင်နေတာလား။”

“ငါ အသက်မရှင်နိုင်ရင် မင်းတို့အားလုံးလည်း အသက်ရှင်နိုင်မှာ မဟုတ်ဘူး။”

စကားပြောနေစဉ်မှာပင် ဟန်ယွမ်ခိုင်က သူ၏ဓားကို တစ်ဖန်ပြန်မြှောက်ကာ သူ၏ရင်ဘတ်ကို ထိုးဖောက်လိုက်တော့သည်။