ချီသန့်စင်ခြင်း အဆင့်(၉)သို့ တက်လှမ်းခြင်း

“ရှင်... ရှင်.. ဘာကို ဆိုလိုတာလဲ..”

လန်ယွဲ့ရှီသည် ဒေါသထွက်ချင်သော်လည်း အကြောင်းတစ်စုံတစ်ရာကြောင့် ထိုအခိုက်အတန့်တွင် ဒေါသမထွက်နိုင်ခဲ့ပေ။

သူမ၏နှလုံးသားထဲတွင် ပျော်ရွှင်မှုအရိပ်အယောင်တစ်ခုကိုပင် ခံစားလိုက်ရသည်။

"ကျွန်တော် ဘာကိုဆိုလိုတာလဲဆိုတာ.. စီနီယာလန် အခုထိ နားမလည်သေးဘူးလား..."

"ကျွန်တော် ပွင့်ပွင့်လင်းလင်းပဲ ပြောမယ်... ခင်ဗျားကို ကျွန်တော့်ရဲ့ တာအိုလက်တွဲဖော် ဖြစ်စေချင်တယ်..."

ကျိုးစွေ့က လန်ယွဲ့ရှီကို စိုက်ကြည့်ရင်း ပွင့်လင်းစွာ ပြောလိုက်သည်။

ဝန်ခံရလျှင်၊ သူသည် ပုံမှန်အားဖြင့် ဤမျှ ရဲတင်းသူမဟုတ်ဘဲ ဤသို့ စိတ်လိုက်မာန်ပါ ပြုမူလေ့မရှိပေ။

သို့သော် ယခုလေးတင် သူ၏အတွင်းပိုင်းနက်ရှိုင်းသောနေရာရှိ 'ချစ်ခြင်းမေတ္တာကူ'သည် လှုပ်ရှားလာပုံရပြီး လျှို့ဝှက်ဆန်းကြယ်သော စွမ်းအင်တစ်ခုကို ဖြစ်ပေါ်စေသည်။

ဤသည်မှာ သူ့ကို ရုတ်တရက် သတ္တိများဖြင့် ဖြည့်တင်းပေးလိုက်ပြီး၊ ဤသို့ပြုလုပ်ခြင်းက သူ၏ရှေ့မှောက်ရှိ အမျိုးသမီး၏ မျက်နှာသာပေးမှုကို ရရှိနိုင်ပြီး သူမကိုပင် ရယူနိုင်သည်ဟု ပင်ကိုအသိစိတ်က ပြောပြနေသည်။

ထိုမထင်မရှားသော အခိုက်အတန့်တွင် သူတို့ကြား၌ ယင်နှင့်ယန် သို့မဟုတ် သံလိုက်များကဲ့သို့ တစ်ဦးနှင့်တစ်ဦး ဆွဲဆောင်မှုတစ်ခု ရှိနေသည်။

"ရှင်... ရှင် ဘာတွေပြောနေတာလဲ.. ရှင့်မှာ တာအိုလက်တွဲဖော်သုံးယောက်တောင် ရှိပြီးသားမဟုတ်ဘူးလား.."

"ဘာလို့ ကျွန်မကို မျက်စိကျနေရတာလဲ..."

ထိုစကားကို ကြားသောအခါ လန်ယွဲ့ရှီ၏ မျက်နှာမှာ နီမြန်းသွားပြီး သူမ၏စကားများပင် အထစ်ထစ်အငေါ့ငေါ့ ဖြစ်သွားသည်။

သူမသည် အခြေတည်အဆင့်ကျင့်ကြံသူတစ်ဦးဖြစ်သည်ကို လုံးဝ မေ့လျော့သွားပြီး သာမန်အမျိုးသမီးတစ်ဦးကဲ့သို့သာ ပြုမူနေမိတော့သည်။

သူမသည် ထိုယောက်ျား၏ ဝန်ခံမှုအောက်တွင် စကားလုံးများ ပျောက်ဆုံးနေပြီး မည်သို့ပြောရမည်ကို မသိဖြစ်နေသည်။

ထို့အပြင် ဤနှာဘူးကောင်သည် လုံးဝပင် အရှက်မရှိချေ။

သူ၏ တာအိုလက်တွဲဖော်သုံးဦးက တံခါးပိတ်ကျင့်ကြံနေစဥ် သူသည် သူမနှင့် ပရောပရည်လုပ်ရန် အပြေးပင်လာခဲ့၏။ မည်မျှပင် မျက်နှာပြောင်နိုင်ရသနည်း။

သူသည် သူမအား လွယ်ကူသော မိန်းမဟု ထင်နေသည်လော။

သို့သော် ကျင့်ကြံခြင်းလောကတွင် ယောက်ျားများအတွက် ဇနီးမယားများစွာနှင့် မောင်းမများစွာ ရှိခြင်းမှာ သာမန်ဖြစ်သောကြောင့်၊ ၎င်းမှာ ကြီးမားသောကိစ္စတစ်ခု မဟုတ်ဟု ထင်ရသည်။

ကျင့်ကြံခြင်းလောကတွင် ယောက်ျားတစ်ဦးသည် မိန်းမသုံးဦးရှိပြီးနောက်၊ စတုတ္ထမြောက် တာအိုလက်တွဲဖော် မရှိရဟူသည့် ရှင်းလင်းသော စည်းမျဥ်းများလည်း မရှိခဲ့ပေ။

"စီနီယာလန်.. ကျွန်တော့်မှာ တာအိုလက်တွဲဖော် ဘယ်လောက်ရှိလဲဆိုတာက အရေးမကြီးပါဘူး..."

"အဓိကက.. အခု ခင်ဗျားရဲ့ အတွေးတွေနဲ့ ကျွန်တော့်ရဲ့ အတွေးတွေပါပဲ..."

"ခင်ဗျားကို ပထမဆုံး တွေ့မြင်လိုက်တဲ့အချိန်ကတည်းက ခင်ဗျားကို ပိုင်ဆိုင်ချင်ခဲ့တာ..."

ကျိုးစွေ့သည် လန်ယွဲ့ရှီ၏ သွယ်လျသောလက်ကို ကိုင်လိုက်ပြီးနောက် သူမကို ခါးမှ မတင်လိုက်သည်။

"ရ.. ရပ်လိုက်.. ရှင်..ရှင် အရှက်မရှိတဲ့လူယုတ်မာ.. နှာ..နှာဘူးကောင်..”

"ကျွန်မဘယ်သူလဲဆိုတာ ရှင်သိရဲ့လား..."

"ငါက အင်မော်တယ်ရှားဂိုဏ်းရဲ့ ဂိုဏ်းသခင်ငယ်.. ကြီးကျယ်ခမ်းနားတဲ့ အခြေတည်အဆင့်ကျင့်ကြံသူ.. အနာဂတ်ရွှေအမြုတေဆရာသခင်ပဲ... မင်းငါ့ကို ဒီလိုလုပ်ရဲတယ်..."

"အရေးမပါတဲ့ ချီသန့်စင်ခြင်းအဆင့် ကျင့်ကြံသူတစ်ယောက်ကများ... အရမ်းကိုရဲတင်းလွန်းတယ်ပေါ့... ဘယ်သူ့အားကိုနဲ့ ဒီလောက် သတ္တိကောင်းရဲတာလဲ.."

"မြန်.. မြန်မြန် ငါ့ကို အောက်ချပေး.. အဟင့်.."

လန်ယွဲ့ရှီသည် သူမ၏ခန္ဓာကိုယ် အားနည်းသွားသည်ကို ခံစားလိုက်ရပြီး၊ မည်သည့်ခွန်အားမျှ မစုစည်းနိုင်ဘဲ သူမ၏မျက်နှာမှာ နီမြန်းလာကာ၊ ခန္ဓာကိုယ်အပူချိန်မှာ တစ်ကိုယ်လုံး မီးလောင်နေသကဲ့သို့ တက်လာတော့သည်။

ဤယောက်ျားသည် အလွန်ပင် စိုးမိုးလွန်းသည်။ သူမကို ဤသို့ အဘယ်ကြောင့် ဆက်ဆံရဲသည်နည်း။

သူသည် သူမအပေါ် ကျေးဇူးပြုခဲ့ဖူးသည်ကို အခွင့်ကောင်းယူ၍၊ သူမအပေါ် သူအလိုရှိသလို ပြုလုပ်နိုင်သည်ဟု ထင်နေသည်လော။

သူမ အဘယ်ကြောင့် မခုခံခဲ့သနည်းဆိုသော် သူမ၌ ရွေးချယ်စရာမရှိပေ။ မည်သို့ပင်ဖြစ်စေ သူမသည် အားနည်းသော အခြေတည်အဆင့်အမျိုးသမီးကျင့်ကြံသူတစ်ဦးသာဖြစ်ပြီး၊ ဤအားကောင်းသော ချီသန့်စင်ခြင်းအဆင့် ယောက်ျားကို သူမ မခုခံနိုင်ပေ။

ထို့ကြောင့် သူမသည် သူ၏အနိုင်ကျင့်မှုကို သည်းခံရုံသာ ရှိသည်။

ဟုတ်ပေသည်၊ အားလုံးက သူမ၏အားနည်းမှုကြောင့်သာ ဖြစ်၏။

ဤသို့သော ကျိုးကြောင်းဆင်ခြင်မှုဖြင့် သူမသည် မိမိကိုယ်ကို နှစ်သိမ့်နိုင်မည့် ဆင်ခြေအမျိုးမျိုးကို ရှာဖွေနေလိုက်တော့သည်။

...

ညတစ်ည ကုန်လွန်သွားသည်။

[ သင်၏ စိတ်ဝိညာဉ်အမြစ်သည် အတိုင်းအတာတစ်ခုအထိ တက်လှမ်းသွားပြီဖြစ်သည်။ ]

[ သင်သည် အခြေတည်အဆင့်နယ်ပယ်အတွက် ကျင့်ကြံမှုအတွေ့အကြုံများစွာ ရရှိခဲ့သည်။ ]

[ 'ချစ်ခြင်းမေတ္တာကူ'သည် စွမ်းအင်များစွာ ရရှိခဲ့ပြီး အဆင့်နှစ် ထိပ်တန်းအဆင့်သို့ တက်လှမ်းသွားသည်။ ]

[ သင်သည် စွမ်းအင်များစွာ ရရှိခဲ့ပြီး ချီသန့်စင်ခြင်းအဆင့်(၉)သို့ တက်လှမ်းသွားသည်။ ]

ထိုအခိုက်တွင် ကျိုးစွေ့သည် 'ချစ်ခြင်းမေတ္တာကူ'၏ အတွင်းပိုင်းနက်ရှိုင်းသောနေရာမှ ကြီးမားသော သတင်းအချက်အလက်ပမာဏကို အာရုံခံမိလိုက်သည်။ ဤသည်မှာ တစ်ညတာ သူ၏ကြိုးစားအားထုတ်မှု၏ အသီးအပွင့်များ ဖြစ်သည်။

ဤသို့သော ကြိုးစားအားထုတ်မှု၏ အသီးအပွင့်များမှာ ကြီးမားလှသည်မှာ ထင်ရှားလှပေသည်။

ဘုန်း…။

ထိုအခိုက်အတန့်တွင် သူ၏အစစ်အမှန်ချီ၏ စွမ်းအားသည် သူ၏ခန္ဓာကိုယ်အတွင်း၌ ဒီရေကဲ့သို့ တိုးတက်နေသည်ကို သူနားလည်လိုက်သည်။ ယခင်ကနှင့် နှိုင်းယှဉ်လျှင် ၎င်း၏စွမ်းအားမှာ အနည်းဆုံး နှစ်ဆတိုးလာခဲ့သည်။

သူ၏အစစ်အမှန်ချီ၊ ဝိညာဉ်စွမ်းအားနှင့် ကာယခွန်အားတို့မှာ အဆများစွာ တိုးတက်မှုများ ရရှိခဲ့သည်။

ရိုးရိုးသားသားပြောရလျှင် အခြေတည်အဆင့်အမျိုးသမီးကျင့်ကြံသူတစ်ဦး၏ ယင်အနှစ်သာရကို ရရှိပြီးနောက်၊ အကျိုးကျေးဇူးများမှာ အလွန်ပင်ကြီးမားပြီး သူ၏စိတ်ကူးထက် ကျော်လွန်နေကာ တိုင်းတာ၍ပင် မရနိုင်ချေ။

မူလက သူသည် ချီသန့်စင်ခြင်းအဆင့်(၉)သို့ တက်လှမ်းရန် ဆေးလုံးများ၏အကူအညီဖြင့်ပင် အနည်းဆုံး တစ်နှစ် သို့မဟုတ် နှစ်နှစ်ခန့် အချိန်ယူရလိမ့်မည်ဟု ထင်ခဲ့သည်။

သို့သော် ယခုအခါ အခြေတည်အဆင့် အမျိုးသမီးကျင့်ကြံသူတစ်ဦး၏ ယင်အနှစ်သာရအား ရရှိပြီးနောက်၊ သူသည် အစွမ်းထက်သော ဆေးဘက်ဝင်အပင်တစ်မျိုးကို စားသုံးလိုက်သကဲ့သို့ဖြစ်ပြီး သူ့အား နှစ်ပေါင်းများစွာကြာ အပြင်းအထန်ကျင့်ကြံရမည့်အချိန်ကို ချွေတာပေးခဲ့သည်။

ဤသည်မှာ သူ၏ကျင့်ကြံမှုကို ချီသန့်စင်ခြင်းအဆင့်(၉)သို့ ချက်ချင်းလက်ငင်း ချိုးဖျက်ဝင်ရောက်စေသည်။

ထို့အပြင် သူသည် ချီသန့်စင်ခြင်းအဆင့်(၉)သို့ ရောက်ရှိရုံသာမက အဆင့်(၉)၏ ၆၀%အထိ တိုးတက်သွားခဲ့သည်။ အချိန်တိုအတွင်းမှာပင် သူသည် အဆင့်(၉) အထွတ်အထိပ်သို့ ရောက်ရှိနိုင်သည်။

ထိုအခါတွင် သူသည် အခြေတည်အုတ်မြစ်ကို တည်ထောင်ရန်ကြိုးစားနိုင်ပြီး အခြေတည်အဆင့် ကျင့်ကြံသူတစ်ဦး ဖြစ်လာနိုင်သည်။

ဝန်ခံရလျှင်၊ သူ၏တိုးတက်မှုမှာ မယုံနိုင်လောက်အောင် မြန်ဆန်လှသည်။

ဂိုဏ်းချုပ်တစ်ဦး၏ ပင်မတပည့် သို့မဟုတ် ပါရမီရှင်တစ်ဦးပင် အသုံးပြုနိုင်မည့် အရင်းအမြစ်များစွာ ရှိနေလျှင်ပင် သူ၏ကျင့်ကြံမှုအရှိန်ကို လိုက်မီနိုင်မည်မဟုတ်ပေ။ ဤသတင်းသာ ပြင်ပသို့ ပေါက်ကြားသွားပါက ကျင့်ကြံခြင်းလောကတစ်ခုလုံး သေချာပေါက် တုန်လှုပ်စေပေလိမ့်မည်။

မှန်ပေသည်၊ ဤသတင်းကို ထုတ်ဖော်လောက်အောင်အထိ ကျိုးစွေ့ မမိုက်မဲပေ။

သူသည် သိုသိုသိပ်သိပ်သာ နေထိုင်လိုပေသည်။

"ဒါဆို.. ဒါက ချီသန့်စင်ခြင်းအဆင့်(၉)ရဲ့ ခံစားချက်လား.. သိပ်ကိုစွမ်းတာပဲ..."

ကျိုးစွေ့ အံ့အားသင့်သွားသည်။

ထိုအခိုက်အတန့်တွင် သူ၏ခန္ဓာကိုယ်ထဲရှိသွေးကြောများအားလုံးသည် အပြည့်အဝပွင့်လှစ်သွားပြီး၊ များပြားလှသော အစစ်အမှန်ချီမှာ မြစ်တစ်စင်းကဲ့သို့ စီးဆင်းနေကာ အတွင်းအင်္ဂါအားလုံးတွင် လည်ပတ်နေသည်။

၎င်းမှာ ပြီးပြည့်စုံသော လည်ပတ်မှုသံသရာတစ်ခုကဲ့သို့ဖြစ်နေပြီး အဆုံးမရှိသော သက်ဝင်လှုပ်ရှားမှုဖြင့် တုန်ခါနေသည်။

ဆိုရလျှင်၊ ချီသန့်စင်ခြင်းအဆင့်(၉)၏ခွန်အားမှာ အနည်းဆုံး အဆင့်(၈)ထက် နှစ်ဆကျော် ပိုမိုများပြားသည်။

မည်သို့ပင်ဖြစ်စေ၊ အဆင့်(၉)ကျင့်ကြံသူတစ်ဦး၏ ခန္ဓာကိုယ်ထဲရှိသွေးကြောများ အပြည့်အဝ ပွင့်သွားပြီ ဖြစ်၏။ ၎င်းမှာ နှစ်ဆပိုအားကောင်းသော အစစ်အမှန်ချီ ရှိရုံတင်မဟုတ်ဘဲ၊ ၎င်းနှင့်အတူ ပြီးပြည့်စုံသော လည်ပတ်မှုသံသရာတစ်ခု ဖွဲ့စည်းခြင်းပင်ဖြစ်သည်။

ဤသို့သော လည်ပတ်မှုသံသရာဖြင့် အဆင့်(၉)ကျင့်ကြံသူတစ်ဦးသည် သူတို့၏အစစ်အမှန်ချီကို အဆများစွာ ပိုမိုလျင်မြန်စွာ ပြန်လည်ရရှိနိုင်သည်။

အဆင့်(၈)ကျင့်ကြံသူတစ်ဦးက အဆင့်(၉)တစ်ဦးနှင့် မည်သို့ နှိုင်းယှဉ်နိုင်မည်နည်း။ ကွာခြားချက်မှာ အလွန်ပင် ကြီးမားလှသည်။

မှန်ပေသည်၊ ဤနယ်ပယ်သို့ ရောက်ရှိရန်မှာလည်း အလွန်ပင် ခက်ခဲလှသည်။

သာမန် တစ်ကိုယ်တော်ကျင့်ကြံသူများသည် ချိုးဖျက်တက်လှမ်းနိုင်ရန် အနည်းဆုံး ဆယ်နှစ်မှ နှစ်နှစ်ဆယ်ခန့် လိုအပ်ပေလိမ့်မည်။

ထိပ်တန်းအဆင့်စိတ်ဝိညာဉ်အမြစ်များ ပိုင်ဆိုင်သော ဂိုဏ်းကျင့်ကြံသူများအတွက်ပင်လျှင်၊ အဆင့်(၉)၏ အတားအဆီးကို ချိုးဖျက်နိုင်ရန် ဆေးလုံးများ၊ စိတ်ဝိညာဉ်ဆေးပင်အမျိုးမျိုး၏ အကူအညီဖြင့်တောင်မှ နှစ်ပေါင်းများစွာ အပြင်းအထန် ကျင့်ကြံအားထုတ်ရန် လိုအပ်ပေလိမ့်မည်။

သို့သော် ယခုအခါ၊ ကျိုးစွေ့မှာမူ လန်ယွဲ့ရှီ၏ ယင်အနှစ်သာရအကူအညီဖြင့် အလွယ်တကူ ချိုးဖျက်ဝင်ရောက်နိုင်ခဲ့ပြီး သူ့အား နှစ်ပေါင်းများစွာကြာအောင် အပြင်းအထန်ကျင့်ကြံရမည့်အချိန်ကို ချွေတာပေးခဲ့သည်။

အကျိုးကျေးဇူးမှာ အလွန်ပင် ကြီးမားလှသည်။

"အင်း.. တာအိုလက်တွဲဖော်များများ ရှိတာက ပိုကောင်းတယ်... အထူးသဖြင့် အရည်အသွေးမြင့်တဲ့သူတွေဆို ပိုကောင်း..."

"ကောင်းမွန်တဲ့ တာအိုလက်တွဲဖော်တစ်ယောက်က ကျင့်ကြံချိန်အများကြီးကို ချွေတာပေးနိုင်တာပဲ..."

"ငါ့မှာသာ တာအိုလက်တွဲဖော် ၃၀၀၀လောက်ရှိခဲ့ရင်.. ဘေးဒုက္ခကို ဖြတ်ကျော်ပြီး အင်မော်တယ်ဖြစ်မသွားနိုင်ဘူးလား..."

"တခြားသူတွေက ဆေးလုံးတွေကို အားကိုးတယ်.. ငါကျိုးစွေ့က တာအိုလက်တွဲဖော်တွေယူဖို့ အားကိုးတယ်.. ရလဒ်က အတူတူပဲမလား.. ဟဲဟဲ.. "

"တာအိုပေါင်းသုံးထောင်ဆိုပေမဲ့.. ပန်းတိုင်က တစ်ခုတည်းပဲမလား...”

ကျိုးစွေ့က သူ၏မေးစေ့ကို ပွတ်သပ်ရင်း ကျေနပ်နေတော့သည်။