စုန်းမများမျက်စိကျမည့် ခန္ဓာကိုယ်ဖွဲ့စည်းပုံ၊ ရွှေအမြုတေဂူဟောင်းစံအိမ်အား စူးစမ်းရှာဖွေရန် ဖိတ်ကြားချက်

ကျိုးစွေ့နှင့် လန်ယွဲ့ရှီသည် ငါးရက်၊ ခြောက်ရက်တိုင် အခန်းတွင်းအောင်းကာ တူနှစ်ကိုယ်ကျင့်ကြံမှုတွင်သာ နစ်မြုပ်နေကြသည်။

မည်သို့ပင်ဖြစ်စေ၊ သူတို့သည် ကြင်စဦးများဖြစ်သောကြောင့် ဤကျင့်ကြံမှုအပေါ် စိတ်အားထက်သန်နေကြသည်။

မှန်ပေသည်၊ ဤသို့သော တူနှစ်ကိုယ်ကျင့်ကြံခြင်းသည် ကျိုးစွေ့နှင့် လန်ယွဲ့ရှီနှစ်ဦးစလုံးအတွက် အလွန်ပင် အကျိုးကျေးဇူးများလှသည်။

"ယောက်ျား.. ကျွန်မရဲ့ ရုပ်ခန္ဓာခွန်အား တိုးတက်လာသလို ခံစားရတယ်…"

"အရင်က အပြာရောင်မိစ္ဆာအဆိပ်ကြောင့် ဖြစ်ခဲ့တဲ့ ရုပ်ခန္ဓာထိခိုက်မှုတွေလည်း လုံးဝ ပြန်ကောင်းသွားပြီ…"

"ပြီးတော့ အဲ့ဒီအခြေအနေထက်တောင် ပိုတိုးတက်လာသေးတယ်…"

"ညီမကျိနဲ့အခြားသူတွေက ရှင့်နဲ့တူနှစ်ကိုယ်ကျင့်ကြံရတာကို အရမ်းသဘောကျကြတာ အံ့ဩစရာမဟုတ်ဘူးပဲ… ဒါက ဒီလောက်ကြီးမားတဲ့ အကျိုးကျေးဇူးတွေ ရှိလို့ကိုး…"

လန်ယွဲ့ရှီ အမှန်တကယ်ပင် အံ့အားသင့်နေသည်။ ကျိုးစွေ့နှင့် ရက်အတော်ကြာ ဆက်တိုက် တူနှစ်ကိုယ်ကျင့်ကြံပြီးနောက် သူမ၏ ရုပ်ခန္ဓာသည် အဆက်မပြတ် သန်မာလာပြီး၊ အခြေတည်အဆင့်ကျင့်ကြံသူ၏ ပြန်လည်ကောင်းမွန်နှုန်းထက်ပင် သာလွန်နေပေသည်။

ပြင်းထန်သောအဆိပ်ကြောင့် ဖြစ်ပေါ်လာသော ရုပ်ခန္ဓာထိခိုက်မှုများအား ပြန်လည်ဖြည့်တင်းနိုင်ခဲ့ရုံသာမက ပို၍ပင် မြင့်မားလာခဲ့သည်။

သူမကိုယ်အတွင်းရှိ ထိခိုက်မှုများကို ပြန်လည်ဖြည့်တင်းနိုင်ရန် နှစ်ပေါင်းများစွာ ကျင့်ကြံအားထုတ်မှုမရှိဘဲ မဖြစ်နိုင်ဟု သူမ ခံစားမိခဲ့သည်။

သို့သော် ကျိုးစွေ့နှင့် ရက်အနည်းငယ်ကြာ တူနှစ်ကိုယ်ကျင့်ကြံလိုက်ခြင်းက လုံးဝ ပြန်လည်ကောင်းမွန်လာစေသည်။ ဤသည်မှာ အမှန်တကယ်ပင် ရူးလောက်စရာဖြစ်၏။

သူမ၏ရှေ့မှောက်ရှိ ဤယောက်ျားတွင် အံ့ဖွယ် ခန္ဓာကိုယ်ဖွဲ့စည်းပုံရှိပြီး၊ အမျိုးသမီးကျင့်ကြံသူများအတွက် သိသာထင်ရှားသော အကျိုးကျေးဇူးများကို ပေးစွမ်းသောကြောင့် ဤအကျိုးသက်ရောက်မှုများကို ဖြစ်ပေါ်စေသည်မှာ သေချာပေသည်။

ကျိုးစွေ့၏ ကာယဖွဲ့စည်းပုံအကြောင်းသာ လူသိရှင်ကြား ဖြစ်သွားပါက၊ မိစ္ဆာဂိုဏ်းများမှ မရေမတွက်နိုင်သော စုန်းမများသည် သေချာပေါက် သိသိသာသာ အာရုံစိုက်လာကြမည်ဖြစ်ပြီး၊ ကျိုးစွေ့အား သူတို့၏အသုံးပြုရန်အတွက် ပြန်ပေးဆွဲလိုကြပေမည်။

မည်သို့ပင်ဖြစ်စေ၊ ထိုမိစ္ဆာဂိုဏ်းမှ အမျိုးသမီးကျင့်ကြံသူများသည် မည်သည့်ကျင့်ဝတ်မျှ မရှိကြချေ။ သူတို့သည် မိမိတို့၏ကိုယ်ပိုင်ကျင့်ကြံမှုကို မြှင့်တင်ရန် မည်သည့်အရာကိုမဆို ပြုလုပ်ကြပေလိမ့်မည်။

ကျိုးစွေ့သာ ထိုစုန်းမများ၏ လက်ထဲသို့ ကျရောက်သွားပါက၊ သူသည် ဝံပုလွေများကြားထဲသို့ ပစ်ချခံလိုက်ရသော သိုးတစ်ကောင်ကဲ့သို့ ဖြစ်သွားမည်ဖြစ်ပြီး သေချာပေါက် ဝါးမျိုစုပ်ယူခြင်းကို ခံရပေလိမ့်မည်။

"ဆိုတော့.. မင်း.. ရွှေအမြုတေကို မကြာခင် စုစည်းနိုင်တော့မှာလား…"

ကျိုးစွေ့က စိတ်ဝင်တစား မေးမြန်းသည်။

လန်ယွဲ့ရှီသည် အခြေတည်အဆင့်နယ်ပယ်၏ အထွတ်အထိပ် ကျင့်ကြံသူတစ်ဦးဖြစ်သည်ကို သူကောင်းစွာသိရှိထားပြီး၊ သူမသည် ရွှေအမြုတေဖွဲ့စည်းရန် အသင့်ဖြစ်နေသင့်သည်။

သို့သော် သူမသည် တစ္ဆေမိစ္ဆာဂိုဏ်း၏ တိုက်ခိုက်ဖျက်ဆီးခြင်းကို ခံခဲ့ရသောကြောင့်၊ ရွှေအမြုတေ ဖွဲ့စည်းခြင်းတွင် သူမ၏တိုးတက်မှုမှာ နှောင့်နှေးခဲ့ရသည်။

ယခုအခါ သူမ၏ခန္ဓာကိုယ် ပြန်လည်ကောင်းမွန်လာပြီဖြစ်သောကြောင့်၊ သူမသာ ရွှေအမြုတေကို နောက်တစ်ကြိမ် ဖွဲ့စည်းရန် ကြိုးစားပါက အံ့ဩစရာမဟုတ်ပေ။

"ဟုတ်တယ်.."

လန်ယွဲ့ရှီက ခေါင်းညိတ်လိုက်သည်။

"ကျွန်မ အခြေတည်အဆင့်နယ်ပယ်ရဲ့ အထွတ်အထိပ်ကို ရောက်ရှိပြီးသွားပြီ.. ရွှေအမြုတေ ဖွဲ့စည်းဖို့ ကြိုးစားနိုင်ပါပြီ.. ဒါ့အပြင် ကျွန်မ နောက်ဆုံးလေလံပွဲမှာ ရရှိခဲ့တဲ့.. ရေခဲမီးဝိညာဉ်အရည်လိုမျိုး ရွှေအမြုတေဖွဲ့စည်းခြင်းအတွက် အ‌ထောက်အကူပစ္စည်းတချို့ကိုလည်း ပြင်ဆင်ထားပြီးပြီ… ဒါက ရွှေအမြုတေ ဖွဲ့စည်းနိုင်ခြေကို ၃၀% တိုးစေလိမ့်မယ်.. ပြီးတော့ အင်မော်တယ်ရှားဂိုဏ်းကနေ ကျွန်မရရှိခဲ့တဲ့ ပစ္စည်းတွေနဲ့ဆို ဖြစ်နိုင်ခြေကို အနည်းဆုံး ၇၀% အထိ တိုးပေးနိုင်တယ်…"

"ဒါပေမဲ့ အခုက အချိန်ကောင်းလို့ ကျွန်မမထင်သေးဘူး.. ယောက်ျားနဲ့ တူနှစ်ကိုယ်ကျင့်ကြံပြီးနောက်မှာတောင်.. ကျွန်မ ဖြည့်ဆည်းဖို့လိုအပ်နေသေးတဲ့ လိုအပ်ချက်တချို့ ရှိနေသေးတာကို သတိပြုမိလိုက်တယ်.. ကျွန်မသာ ဒီကိစ္စတွေကို သေသေချာချာကုစားနိုင်ခဲ့ရင် ရွှေအမြုတေ ဖွဲ့စည်းနိုင်ခြေက ၈၀% ဒါမှမဟုတ် ၉၀% အထိတောင် တိုးလာလိမ့်မယ်…"

သူမ လက်သီးဆုပ်လိုက်သည်။

ပထမတန်းစား စိတ်ဝိညာဉ်အမြစ်ကို ပိုင်ဆိုင်ထားသော သူမအတွက်မူ၊ ရွှေအမြုတေ ဖွဲ့စည်းခြင်းမှာ အထူးသဖြင့် အင်မော်တယ်ရှားဂိုဏ်းမှ အရင်းအမြစ်များအကူအညီဖြင့် လုံးဝသေချာသလောက်ပင် ဖြစ်သည်။

ဤအကြောင်းများကြောင့် အနီးအနားရှိ ဂိုဏ်းများသည် လန်ယွဲ့ရှီ၏ အလားအလာကို အလွန်သတိထားနေကြသည်။ လန်ယွဲ့ရှီသာ အောင်မြင်ခဲ့ပါက အင်မော်တယ်ရှားဂိုဏ်းသည် ရွှေအမြုတေဆရာသခင်သုံးဦးကို ပိုင်ဆိုင်ကာ မကြုံစဖူး ဖြစ်သွားပေလိမ့်မည်။

"ဒီလိုဆိုရင်တော့.. ငါတို့ နောက်ထပ် အချိန်တစ်ခုလောက်အထိ တူနှစ်ကိုယ်ကျင့်ကြံမှုကို ဆက်လုပ်သင့်တယ်…"

ကျိုးစွေ့သည် လန်ယွဲ့ရှီသာ ရွှေအမြုတေဆရာသခင်တစ်ဦး ဖြစ်လာပါက၊ သူ၌ ထို့အဆင့်ရှိ တာအိုလက်တွဲဖော်တစ်ဦး ရှိလာမည်အား တွေးတောရင်း အတော်ပင် ကျေနပ်သွားသည်။

ထိုအခါ သူသည် ဤဒေသတွင် မည်သူကိုမျှ ကြောက်ရွံစရာမလိုဘဲ၊ လွတ်လပ်စွာ သွားလာနိုင်မည်မဟုတ်လော။

ဒေါက်..ဒေါက်..ဒေါက်…။

ထိုအခိုက်တွင် စည်းချက်ကျသော ခေါက်သံများ တောင်ကြားမှပဲ့တင်ထွက်လာပြီး ဧည့်သည်များ ရောက်ရှိလာကြောင်း အချက်ပြနေသည်။

"အင်း.. ရှန်မိသားစု ရောက်လာပုံပဲ…"

ကျိုးစွေ့သည် ယခင်က လာရောက်လည်ပတ်ခဲ့ဖူးသော အခြေတည်အဆင့် ကျင့်ကြံသူ ရှန်ရှန်းနှင့် ရှန်မိသားစု၏ မျိုးဆက်တစ်ဦးဖြစ်သူ ရှန်ဝမ်တို့ အပါအဝင် ရှန်မိသားစုမှ ကျင့်ကြံသူ ဒါဇင်ကျော် တောင်ကြားအပြင်ဘက်တွင် ပေါ်လာသည်ကို အာရုံခံမိလိုက်သည်။

"ငါတို့ သွားကြည့်သင့်တယ်…"

လန်ယွဲ့ရှီသည်လည်း တိမ်မြူခိုးတောင်တန်းရှိ ကျင့်ကြံသူများကို တွေ့ဆုံလိုကြောင်း ဆုံးဖြတ်လိုက်သည်။ ဤနေရာတွင် ခဏမျှနေထိုင်ရနိုင်ပြီး၊ သူတို့၏ အိမ်နီးချင်းကျင့်ကြံသူများနှင့် တင်းမာမှုများ ဖန်တီးခြင်းသည် ပညာရှိရာမရောက်ပေ။

ဝှစ်.. ဝှစ်…။

ဤသို့သော အတွေးဖြင့် ကျိုးစွေ့သည် တွန့်ဆုတ်မနေဘဲ ချက်ချင်းပင် အိပ်ယာမှ ထလိုက်သည်။

ထို့နောက် သူတို့နှစ်ဦးစလုံးသည် ချိုင့်ဝှမ်း၏ဝင်ပေါက်တွင် ရှန်မိသားစုကို နှုတ်ဆက်လိုက်ကြသည်။

မှန်ပေသည်၊ လန်ယွဲ့ရှီသည် သူမ၏ရုပ်ရည်ကို မထင်ရှားသော သာမန်အမျိုးသမီးကျင့်ကြံသူတစ်ဦးအဖြစ်သို့ ပြောင်းလဲခဲ့ရသည်။

ဤသို့ဖြင့်၊ မည်သူမျှ သူမကို အင်မော်တယ်ရှားဂိုဏ်း၏ နာမည်ကျော် ဂိုဏ်းသခင်ငယ်အဖြစ် မှတ်မိတော့မည်မဟုတ်ပေ။

ထိုအထောက်အထားမှာ အလွန်ပင် ထင်ရှားပြီး တစ္ဆေမိစ္ဆာဂိုဏ်းကို ဆွဲဆောင်နိုင်ပေသည်။

ထို့ကြောင့် မသိနိုင်သော အန္တရာယ်များကို ဖိတ်ခေါ်မိနိုင်၏။

“တာအိုရောင်းရင်းကျိုး..”

ကျိုးစွေ့ ထွက်ပေါ်လာသည်ကို မြင်သောအခါ ရှန်ဝမ်က နှုတ်ဆက်လိုက်ပြီး၊ လန်ယွဲ့ရှီကိုလည်း လျင်မြန်စွာ သတိပြုမိကာ သူမကို ရိုသေစွာ ဆက်ဆံလိုက်သည်။

"အကြီးအကဲကို ဒီမှာတွေ့ရမယ်လို့ မထင်ထားဘူး.. ခင်ဗျားရဲ့ကျင့်ကြံမှုကနေ ထွက်လာတာကို ဂုဏ်ယူပါတယ်…"

မည်သို့ပင်ဖြစ်စေ၊ သူမသည် အခြေတည်အဆင့်ကျင့်ကြံသူတစ်ဦးဖြစ်ပြီး လုံးဝကွဲပြားခြားနားသော လေးစားမှုအဆင့်အတန်း ရှိသည်။

"အင်း.. ဒီတစ်ခေါက် ဘာကိစ္စများပါလိမ့်…"

လန်ယွဲ့ရှီက ပေါ့ပေါ့ပါးပါး မေးလိုက်သည်။

"နောက်ဆုံးတော့ ကျုပ်တို့ ကိုယ်တိုင်ကိုယ်ကျ တွေ့ဆုံရပြီပဲ…"

ရှန်ရှန်းက ကျယ်လောင်စွာ ရယ်မောသည်။

"ဘာမှ ဖုံးကွယ်စရာမရှိပါဘူး.. ငါတို့ ဒီတစ်ခေါက် လာလည်တာ ရည်ရွယ်ချက်တစ်ခု ရှိပါတယ်.. ငါတို့က တိမ်မြူခိုးတောင်တန်းကို စိတ်ဝိညာဉ်ဆေးပင်တွေနဲ့ သားရဲတွေအတွက်ပဲ လာခဲ့တာမဟုတ်ဘူး… တကယ်တော့ ငါတို့က ရွှေအမြုတေ ဂူဟောင်းစံအိမ်တစ်ခုကိုလည်း ရှာဖွေတွေ့ရှိထားတယ်.. ကံမကောင်းစွာနဲ့ စံအိမ်ကို ကာကွယ်ထားတဲ့အစီအရင်က ချိုးဖျက်ဖို့ အရမ်းခက်ခဲနေတယ်လေ.. ဒါကြောင့် ငါတို့နဲ့ ပူးပေါင်းဆောင်ရွက်ဖို့ ခင်ဗျားကို ဖိတ်ခေါ်ချင်ပါတယ်… အတွင်းထဲမှာ ရတနာတစ်ခုခု တွေ့ခဲ့ရင် အညီအမျှ ခွဲဝေဖို့ ငါတို့ ကတိပေးပါတယ်…"

ဝန်ခံရလျှင်၊ သူသည် ဤမရင်းနှီးသော အခြေတည်အဆင့်ကျင့်ကြံသူကို ဖိတ်ခေါ်လိုခြင်းမရှိပေ။

လူတစ်ယောက် ထပ်မံပါဝင်ခြင်းသည် အကျိုးကျေးဇူး ဝေစုနည်းသွားမည်ကို ဆိုလိုသည်။

ပြဿနာမှာ ထိုရှေးဟောင်းလိုဏ်ဂူကို အစီအရင်သုံးထပ်ဖြင့် ကာကွယ်ထားကြောင်း မကြာသေးမီက တွေ့ရှိခဲ့ရသည်။

အစီအရင်တစ်လွှာတည်းကိုပင် ဖြေရှင်းရန် ဆယ်စုနှစ်တစ်ခုကျော် အချိန်ယူခဲ့ရသည်။

ကျန်ရှိနေသောအရာများအတွက်ဆိုလျှင် မည်မျှကြာမြင့်မည်အား မပြောနိုင်ပေ။

ထို့ကြောင့် များစွာစဉ်းစားသုံးသပ်ပြီးနောက်၊ အချိန်ကုန်သက်သာစေရန် အကူအညီများ ပိုမိုလိုအပ်ကြောင်း သူနားလည်လိုက်သည်။

အခြေတည်အဆင့်ကျင့်ကြံသူများအတွက်ပင်လျှင် သက်တမ်းက အဆုံးမဲ့မဟုတ်ပေ။

သူသာ ပြီးပြည့်စုံသော အခြေတည်အဆင့်ကျင့်ကြံသူတစ်ဦးအဖြစ်သို့ မကြာမီ မတက်လှမ်းနိုင်ပါက၊ သူ၏ဘဝတစ်လျှောက်လုံး ရွှေအမြုတေအဆင့်ကို ရရှိရန် မျှော်လင့်ချက်မှာ နည်းပါးပေလိမ့်မည်။

ဤအကြောင်းကြောင့်ပင် သူတို့သည် အနီးအနားရှိ လျှို့ဝှက်ဆန်းကြယ်သောအခြေတည်အဆင့် ကျင့်ကြံသူကို ထည့်သွင်းစဉ်းစားခဲ့ခြင်း ဖြစ်သည်။

"ရွှေအမြုတေ ဂူဟောင်းစံအိမ်လား.."

ဤစကားကို ကြားသောအခါ လန်ယွဲ့ရှီက လက်ဝေ့ယမ်းလိုက်သည်။ "မေ့လိုက်ပါ.. ငါဒါကို စိတ်မဝင်စားဘူး.. ဒီကိစ္စပဲဆိုရင်တော့ ငါ့ကို ဆက်ပြီးပြောစရာမလိုတော့ဘူး.. ငါတို့က အဆင့်နှစ် ယောင်သားရဲအမြုတေကို ရှာဖို့ပဲ တိမ်မြူခိုးတောင်တန်းကို လာခဲ့တာ.. ငါတို့ ကိစ္စတွေကို ပိုပြီးမရှုပ်ထွေးစေချင်ဘူး…"

သူမသည် သူတို့၏ဖိတ်ခေါ်မှုကို ပြတ်ပြတ်သားသား ငြင်းပယ်ခဲ့သည်။

ဘာရယ်…။

ရှန်မိသားစုဝင်များ အံ့အားသင့်သွားကြသည်။ သူမက သူတို့၏ဖိတ်ခေါ်မှုကို ငြင်းပယ်လိမ့်မည်ဟု သူတို့ ထင်မထားခဲ့ချေ။

မည်သည့် အခြေတည်အဆင့်ကျင့်ကြံသူမဆို ရွှေအမြုတေဂူဟောင်းစံအိမ်အကြောင်း ကြားသည်နှင့်၊ ချက်ချင်း စူးစမ်းရှာဖွေရန် သွားလိုစိတ်ဖြင့် အူယားဖားယားဖြစ်နေရမည် မဟုတ်လော။

အကြောင်းမှာ ရရှိနိုင်သည့် အကျိုးကျေးဇူးများမှာ တိုင်းတာ၍ပင် မရနိုင်ပေ။

သို့သော် ဤလျှို့ဝှက်ဆန်းကြယ်သော အခြေတည်အဆင့်ကျင့်ကြံသူမှာမူ ရွှေအမြုတေ ဂူဟောင်းစံအိမ်ကို စိတ်မဝင်စားချေ။

၎င်းမှာ သူမ၏ ထူးကဲသောကြွယ်ဝမှုကြောင့်လော သို့မဟုတ် သူမသည် အလွန်ကြောက်တတ်သော‌သူ ဖြစ်၍လော။

"ကောင်းပြီလေ.. ခင်ဗျား ဆန္ဒမရှိမှတော့ ငါတို့ အတင်းအကျပ်မလုပ်တော့ပါဘူး…"

"ဒီတစ်ခေါက် လာလည်တာ.. ငါတို့က ကျင့်ကြံခြင်းအရင်းအမြစ်တချို့ကိုလည်း ကုန်သွယ်ချင်လို့ပါ.."

"အရင်းအမြစ်တွေချင်း ဖလှယ်နိုင်မယ်လို့ မျှော်လင့်ပါတယ်.."

အခြေတည်အဆင့်ကျင့်ကြံသူ ရှန်ရှန်းက စိတ်မဆိုးပေ။ သူသည် ရိုးရှင်းစွာပြုံးပြီး ကျင့်ကြံခြင်းအရင်းအမြစ်များကို လန်ယွဲ့ရှီနှင့် ကုန်သွယ်ရန်ညှိနှိုင်းကာ နှစ်ဦးနှစ်ဖက် အကျိုးရှိရန် ကမ်းလှမ်းလိုက်သည်။

"ဒါကိုတော့ လက်ခံနိုင်ပါတယ်…"

လန်ယွဲ့ရှီက ခေါင်းညိတ်လိုက်သည်။ အကြောင်းမှာ သူမဆီတွင်လည်း အပိုအရင်းအမြစ်များစွာ လက်ထဲတွင် ရှိနေပြီး၊ လဲလှယ်မှုတစ်ခုတွင် ပူးပေါင်းဆောင်ရွက်ရန် စီစဉ်နေသောကြောင့် ဖြစ်သည်။