တတိယအဆင့် ရွှေရည်ကျောက်စိမ်း ပြန်လည်ရှင်သန်ခြင်းဆေးလုံး၊ ဒေသတစ်ခု၏ မျှခြေကိုပင် သက်ရောက်စေသော ဆေးလုံး

"ဒါပေမဲ့ သူတို့က သေဖို့ထိုက်တန်တယ်.. အဲ့ဒီမိသားစုကျင့်ကြံသူတွေက မကောင်းတဲ့သူတွေဆိုတာ တစ်ချက်ကြည့်ရုံနဲ့ သိနိုင်တယ်..."

ရှားကျင်းယန်က မထီမဲ့မြင်ရယ်သည်။

"ငါတို့ချိုင့်ဝှမ်းကို သူတို့ရုတ်တရက်ရောက်လာတာ မကောင်းတဲ့ရည်ရွယ်ချက်နဲ့ဆိုတာ ထင်ရှားတယ်.. ဖြစ်နိုင်တာက ငါတို့ကို သူတို့ကိုယ်စား စတေးခံတွေ.. သူတို့ရဲ့ လူသားဒိုင်းတွေအဖြစ် အသုံးချဖို့ ရည်ရွယ်တာပဲ..."

"ဒါပေမဲ့ ဘယ်သူက ထင်ထားမှာလဲ.. ငါတို့က မြေအောက်ဥမင်လိုဏ်ခေါင်းကနေတစ်ဆင့် မြေအောက်စခန်းထဲကို ရောက်နှင့်နေပြီလေ... သူတို့က ငါတို့ကို ငါးစာအဖြစ် အသုံးချချင်ရင်တောင် ဆုတောင်း..."

သူမသည် ထိုမိသားစုကျင့်ကြံသူများ၏ မကောင်းသောစိတ်ထားကို ချက်ချင်း သတိထားမိသည်။

သူတို့သာ အမှန်တကယ် ထွက်ပြေးလိုပါက၊ ကြီးမားကျယ်ပြန့်သော တိမ်မြူခိုးတောင်တန်းတွင် သွားစရာနေရာ မြောက်မြားစွာ ရှိသည်။

သို့သော် ဤလူများသည် သူတို့ကို လှည့်ဖြားရန် ပေါ်တင် ရည်ရွယ်လျက်၊ သူတို့၏ နေအိမ်သို့ တည့်တည့်မတ်မတ် ဦးတည်ရန် ဆုံးဖြတ်ခဲ့ကြသည်။

တစ်ကိုယ်တော်ကျင့်ကြံသူတစ်ဦးအဖြစ် နှစ်ပေါင်းများစွာ နေထိုင်ခဲ့ရာ ကောက်ကျစ်မှုအမျိုးမျိုးကို သူမ မြင်တွေ့ခဲ့ပြီးဖြစ်သည်။

ထို့ကြောင့် သူမသည် ဤမိသားစုကျင့်ကြံသူများ၏ အတွေးများကို ချက်ချင်း ပိုင်းခြားသိမြင်ခဲ့သည်။

"အမှန်ပဲ.. ကံကောင်းလို့ ငါတို့ယောက်ျားက မြေအောက်စခန်းကို ကြိုတင်တည်ဆောက်ဖို့ အမြော်အမြင်ရှိခဲ့တာပဲ... မဟုတ်ရင် အဆင့်သုံးယောင်သားရဲနဲ့ဆိုရင် ငါတို့မှာ ပုန်းစရာနေရာ ရှိတော့မှာမဟုတ်ဘူး..."

ကျိပင်းယွီသည်လည်း သက်ပြင်းချလိုက်သည်။

ရိုးရိုးသားသားပြောရလျှင် ဤအဖြစ်အပျက်မှာ အတော်ပင် အန္တရာယ်များလှသည်။

သူမ၏ယောက်ျားသာ ပြတ်ပြတ်သားသားဖြင့် လွတ်မြောက်ရာလမ်းကြောင်းတစ်ခုကို ကြိုတင်ပြင်ဆင်မထားခဲ့ပါက၊ သူတို့သည် ထိုမိသားစုကျင့်ကြံသူများ၏ ချောက်ချမှုကို ကောင်းကောင်း ခံလိုက်ရနိုင်ပေသည်။ ထိုအချိန်တွင် သူတို့သည် အဆင့်သုံး ယောင်သားရဲနှင့် ထိပ်တိုက် ရင်ဆိုင်ရပေလိမ့်မည်။

၎င်းအကြောင်းကို တွေးတောရုံမျှဖြင့်ပင် ကြောက်မက်ဖွယ်ကောင်းလှသည်။

အကယ်၍ ထိုမိသားစုကျင့်ကြံသူများသာ မျောက်ဝံဘုရင်၏ လက်ဝါးတစ်ချက်တည်းဖြင့် သတ်ဖြတ်ခြင်းကို မခံရဘဲ သွေးမြူများအဖြစ်သာ ပျက်စီးမသွားခဲ့ပါက၊ သူမသည် သူတို့၏အလောင်းများကို ဒါဇင်ပေါင်းများစွာ ကြိမ်ဒဏ်ပင်ပေးလိုသေးသည်။

ထိုအခါမှသာ သူမ၏ မကျေနပ်မှုများကို ဖြေသိမ့်နိုင်ပေလိမ့်မည်။

"ဟားဟား.. အဲ့ဒီလောက် ဒေါသထွက်စရာမလိုပါဘူး.. ဒီတစ်ခေါက် ငါတို့ အဲ့ဒီမိသားစုကျင့်ကြံသူတွေကို တကယ်ပဲ ကျေးဇူးတင်ရလောက်တယ်.. သူတို့ သေကုန်ကြပြီဆိုပေမဲ့ ဆရာသခင်ဝမ်လျူရဲ့ ဂူဟောင်းစံအိမ်ကနေ အဖိုးတန်ပစ္စည်းတွေအများကြီး ယူဆောင်လာခဲ့ကြတယ်.." ကျိုးစွေ့က အနည်းငယ် ပြုံးရင်း ပြောလိုက်သည်။

ထိုကျင့်ကြံသူများ၏ ဝိညာဉ်မှတ်ဉာဏ်များမှ သူသည် အလွန်စိတ်လှုပ်ရှားစေသော အံ့ဖွယ် သတင်းအချက်အလက်အချို့ကို ရရှိခဲ့သည်။

ထင်ရှားသည်မှာ ထိုမိသားစုကျင့်ကြံသူများသည် ဆရာသခင်ဝမ်လျူ၏ ဂူဟောင်းစံအိမ်မှ လက်ဗလာဖြင့် ထွက်ခွာခဲ့ခြင်း မဟုတ်ပေ။

မထွက်ခွာမီ သူတို့သည် အဖိုးတန် ရတနာအချို့ကို ယူဆောင်နိုင်ခဲ့ကြသည်။

ယခုအခါ ထိုရတနာအားလုံးမှာ သူတို့၏ သိုလှောင်အိတ်များထဲတွင် ကျန်ရှိနေသည်။

ထို့အပြင်၊ မျောက်ဝံဘုရင်မှာ လူသားတို့၏ သိုလှောင်အိတ်များအပေါ် စိတ်ဝင်စားမှုမရှိပုံရသည်။

ရိုက်ချက်တစ်ခုတည်းဖြင့် သူတို့ကို သတ်ဖြတ်ပြီးနောက် ၎င်းမှာ ရိုးရှင်းစွာ ထွက်ခွာသွားသည်။

ထို့သို့ဖြင့် ထိုကျင့်ကြံသူများပေါ်ရှိ သိုလှောင်အိတ်အားလုံးမှာ ယခုအခါ သူ့အတွက် ကြီးမားသော အကျိုးအမြတ်ဖြစ်စေတော့သည်။

"မဖြစ်နိုင်တာ.. ရှင်ပြောချင်တာက.. သူတို့ ဒီလောက်ကြာအောင် ကြိုးစားပမ်းစား ဆရာသခင်ဝမ်လျူရဲ့ ဂူဟောင်းစံအိမ်ကနေ ရရှိခဲ့သမျှ.. ရတနာအားလုံးက အခု ငါတို့အပိုင် ဖြစ်သွားပြီလို့ ပြောချင်တာလား.."

ရှားကျင်းယန်၏ မျက်လုံးများ ရုတ်တရက် စိတ်လှုပ်ရှားမှုဖြင့် တောက်ပသွားသည်။

သူမသည် ဒေါသမထွက်တော့ဘဲ ထိုမိသားစုကျင့်ကြံသူများကိုပင် ကျေးဇူးတင်မိတော့သည်။ သူတို့သည် အခြေခံအားဖြင့် အသက်ကိုပင်ရင်း၍ သူတို့အတွက် ရတနာများ ရယူပေးခဲ့သည်။

သူတို့သည် သူတို့အတွက် ဘေးဒုက္ခတစ်ခုကိုပင် တားဆီးပေးခဲ့ခြင်းဖြစ်သည်။

ဤသူများသာ လူကောင်းများမဟုတ်လျှင် မည်သူက လူကောင်းများ ဖြစ်မည်နည်း။

"ဟုတ်တယ်.. အဲ့ဒီအထဲမှာ ရွှေရည်ကျောက်စိမ်းပြန်လည်ရှင်သန်ခြင်းဆေးလုံးလို့ခေါ်တဲ့ တတိယအဆင့် ဆေးလုံးပါတယ်.. ဒါက အခြေတည်အဆင့်ကျင့်ကြံသူတွေရဲ့ ရွှေအမြုတေ ဖွဲ့စည်းနိုင်ခြေကို ၃၀% တိုးမြှင့်ပေးနိုင်တဲ့ ရွှေအမြုတေဖွဲ့စည်းခြင်း စိတ်ဝိညာဉ်ဆေးလုံးပဲ... ဒါက ယွဲ့ရှီအတွက် အံကိုက်ပဲ.."

ကျိုးစွေ့က လန်ယွဲ့ရှီကို ကြည့်လိုက်သည်။

"ရွှေရည်ကျောက်စိမ်းပြန်လည်ရှင်သန်ခြင်းဆေးလုံး ဟုတ်လား.. ဒါက ဒဏ္ဍာရီထဲက ရွှေအမြုတေဖွဲ့စည်းခြင်း စိတ်ဝိညာဉ်ဆေးလုံး မဟုတ်ဘူးလား..."

"အင်မော်တယ်ရှားဂိုဏ်းက ဂိုဏ်းချုပ်အဆက်ဆက် ဒီဆေးလုံးကို ရှာဖွေချင်ခဲ့ကြတယ်.. ဒါပေမဲ့ ငါတို့ရဲ့တည်နေရာက အရမ်းဝေးလံခေါင်သီတယ်လေ..."

"ငါတို့သာ ဆေးလုံးဖော်စပ်နည်းကို ရခဲ့ရင်တောင်.. လိုအပ်တဲ့စိတ်ဝိညာဉ်ဆေးပင်တွေကို မရရှိနိုင်ဘူး..."

"ဒီဆေးလုံးကို အောင်မြင်စွာ ဖော်စပ်နိုင်ဖို့.. ပိုပြီးပေါများတဲ့ အရင်းအမြစ်တွေရှိတဲ့ ပိုပြီးကြွယ်ဝတဲ့နေရာကို ငါတို့ သွားဖို့ လိုအပ်လိမ့်မယ်..."

"ဆရာသခင်ဝမ်လျူရဲ့ ဂူဟောင်းစံအိမ်ထဲမှာ တကယ်ပဲ ဒီလို တတိယအဆင့် ဆေးလုံးချန်ထားခဲ့တာလား..."

ထိုစကားကို ကြားသောအခါ လန်ယွဲ့ရှီ စိတ်လှုပ်ရှားဘဲ မနေနိုင်တော့ပေ။

သူမသည်လည်း ဤသို့သော နာမည်ကြီး တတိယအဆင့်ဆေးလုံးအကြောင်းကို တစ်ချိန်က ကြားဖူးခဲ့သော်လည်း မြင်ပင်မမြင်ဖူးခဲ့ချေ။

ဤသည်မှာ လက်ရှိကာလတွင် မျိုးသုဉ်းသွားသော တတိယအဆင့် ဆေးလုံးတစ်လုံးဖြစ်သည်။

သူမသာ ရွှေရည်ကျောက်စိမ်းပြန်လည်ရှင်သန်ခြင်းဆေးလုံးကို ပိုင်ဆိုင်နိုင်ပြီး၊ ယခင်က သူမရရှိခဲ့သော ရွှေအမြုတေဖွဲ့စည်းခြင်းဆိုင်ရာ စိတ်ဝိညာဉ်ပစ္စည်းများနှင့် ပေါင်းစပ်လိုက်ပါက၊ သူမ၏ ရွှေအမြုတေဖွဲ့စည်းခြင်း အောင်မြင်နိုင်ခြေမှာ အလွန်မြင့်မားပေလိမ့်မည်။

"ယောက်ျား.. ဒီဆေးလုံးက အရမ်းအဖိုးတန်တယ်.. ရှင့်ရဲ့ ရွှေအမြုတေဖွဲ့စည်းတဲ့အခါ သုံးဖို့ သိမ်းထားလိုက်ပါ..."

လန်ယွဲ့ရှီက ကျိုးစွေ့ကို ကြည့်ရင်း စိတ်အားထက်သန်စွာ ပြောလိုက်သည်။

သူမ၏ချစ်ခင်ပွန်းသည် ဤတတိယအဆင့်ဆေးလုံးကို သူမထက် ပို၍လိုအပ်ပြီး၊ ၎င်းမှာ အနာဂတ်တွင် သူ၏ရွှေအမြုတေ ဖွဲ့စည်းနိုင်ခြေကို တိုးမြှင့်ပေးလိမ့်မည်ဟု သူမ ခံစားမိသည်။

သူမ၏ ချစ်ခင်ပွန်းသည် ချီသန့်စင်ခြင်းအဆင့်(၉)ကျင့်ကြံသူတစ်ဦးသာဖြစ်ပြီး အခြေတည်အဆင့်သို့ မရောက်ရှိသေးသော်လည်း၊ မရှေးမနှောင်းတွင် သူသည် ရွှေအမြုတေကို အောင်မြင်စွာ ဖွဲ့စည်းနိုင်လိမ့်မည်ဟု သူမ ယုံကြည်သည်။ ၎င်းမှာ ကြိုတင်ပြင်ဆင်ထားသည့် အစီအစဉ်မျှသာ ဖြစ်သည်။

"ဘာမှအားနာနေစရာမလိုဘူး.. ဒါက တတိယအဆင့် ဆေးလုံးတစ်ပုလင်းပဲ.. အထဲမှာ အနည်းဆုံး ရွှေရည်ကျောက်စိမ်းပြန်လည်ရှင်သန်ခြင်းဆေးလုံး သုံးလုံး ရှိတယ်..."

"မင်း အခုတစ်လုံး ယူလိုက်လို့ရတယ်.. နောက်ထပ် နှစ်လုံးတောင် ကျန်သေးတယ်... လုံလောက်တာထက် ပိုပါတယ်..."

"ပြီးတော့.. မင်းသာ ရွှေအမြုတေအဆင့် ကျင့်ကြံသူတစ်ယောက် ဖြစ်လာခဲ့ရင်.. ဒါက ငါတို့အတွက် ကြီးမားတဲ့ အားသာချက်တစ်ခု ဖြစ်လိမ့်မယ်..."

"ဒီလိုသာဆို.. တစ္ဆေမိစ္ဆာဂိုဏ်း ကျင့်ကြံသူတစ်ယောက်က မင်းကို ရှာတွေ့ခဲ့ရင်တောင် သူတို့ ခင်ဗျားကို ဒုက္ခပေးနိုင်မှာမဟုတ်ဘူး..."

ကျိုးစွေ့က လက်ဝေ့ယမ်းလိုက်သည်။

အမှန်တကယ်တွင် လန်ယွဲ့ရှီ ရွှေအမြုတေဆရာသခင်တစ်ဦး ဖြစ်လာရန် တက်လှမ်းခြင်းသည် အရေးကြီးဆုံးကိစ္စဖြစ်သည်ဟု သူယုံကြည်သည်။

လက်ရှိတွင် သူသည် ချီသန့်စင်ခြင်းအဆင့်(၉)တွင်သာ ရှိသေးပြီး၊ ရွှေအမြုတေအဆင့် ကျင့်ကြံသူတစ်ဦး ဖြစ်လာရန် နှစ်ပေါင်းများစွာ ကြာမြင့်ဦးမည်ဖြစ်သည်။

ဤအချိန်အတောအတွင်း သူ မည်သို့သော အန္တရာယ်များနှင့် ကြုံတွေ့ရနိုင်သည်ကို မည်သူသိနိုင်မည်နည်း။

သူ့ကို အကာအကွယ်ပေးရန် ရွှေအမြုတေအဆင့် လက်တွဲဖော်တစ်ဦးရှိခဲ့ပါက၊ သူသည် လက်တွေ့တွင် ရင်ကော့ခေါင်းမော့ပြီး လျှောက်သွားနိုင်ပေမည်။

အနည်းဆုံးအားဖြင့် သူသည် အပြင်လောကမှ အန္တရာယ်များကို စိုးရိမ်နေစရာမလိုဘဲ၊ ရွှေအမြုတေနယ်ပယ်ထိတိုင် ကျင့်ကြံနိုင်ပေမည်။

ထို့အပြင် လန်ယွဲ့ရှီသာ ရွှေအမြုတေအဆင့် ကျင့်ကြံသူတစ်ဦး ဖြစ်လာပြီးနောက်၊ 'ချစ်ခြင်းမေတ္တာကူ'၏ အာနိသင် ပျက်ပြယ်သွားမည်ကို သူ မစိုးရိမ်ပေ။

'ချစ်ခြင်းမေတ္တာကူ'မှာ ထိုမျှ အလွယ်တကူ ဖယ်ရှား၍မရပေ။

၎င်း ပေါင်းစပ်ပြီးသည်နှင့်တစ်ပြိုင်နက်၊ အခြားတစ်ဖက်၏ ကျင့်ကြံမှုအဆင့် မည်သို့ပင်ဖြစ်စေ ခွဲထုတ်ရန်မှာ လက်တွေ့တွင် မဖြစ်နိုင်ပေ။

အမှန်တကယ်တွင် ကျင့်ကြံမှုအဆင့် မြင့်မားလေလေ၊ ပေါင်းစပ်မှုမှာ ပို၍နက်ရှိုင်းလေလေပင်ဖြစ်သည်။

၎င်းသည် 'ချစ်ခြင်းမေတ္တာကူ'၏ ဆင့်ကဲပြောင်းလဲမှုကို အထောက်အကူဖြစ်စေပြီး၊ အဆင့်သုံးသို့ ဝင်ရောက်နိုင်ရန်ပင် ကူညီပေးနိုင်သည်။

အကောင်းအဆိုးများကို ထည့်သွင်းစဉ်းစားပြီးနောက်၊ သူသည် လန်ယွဲ့ရှီအား ရွှေအမြုတေဖွဲ့စည်းရာတွင် အောင်မြင်ပြီး ရွှေအမြုတေဆရာသခင်တစ်ဦး ဖြစ်လာစေလိုသည်မှာ သဘာဝပင်ဖြစ်သည်။

"ကျေးဇူးတင်ပါတယ် ယောက်ျား..."

လန်ယွဲ့ရှီက ကျိုးစွေ့ကို ခံစားချက်ဖြင့် ကြည့်လိုက်ပြီး သူမ၏နှလုံးသားမှာ ချစ်ခင်မြတ်နိုးမှုဖြင့် ပြည့်နှက်နေသည်။

အမှန်တကယ်သူမ ရွေးချယ်ခဲ့သောယောက်ျားပီသစွာ ချစ်ခင်မြတ်နိုးမှု၊ကိုယ်ကျိုးမဖက်မှုတို့ဖြင့် ပြည့်နှက်ကာ ရွှေရည်ကျောက်စိမ်းပြန်လည်ရှင်သန်ခြင်းဆေးလုံးကဲ့သို့သော အဖိုးတန်ဆေးလုံးများကိုပင် မည်သည့်တွန့်ဆုတ်မှုမျှမရှိဘဲ ပေးရန် အသင့်ဖြစ်နေသည်။

ဤဆေးလုံးသည် ရွှေအမြုတေဂိုဏ်းများအကြားတွင်ပင် စစ်ပွဲတစ်ခုကို လှုံ့ဆော်ရန် လုံလောက်သည်ကို သိရှိထားသင့်သည်။

၎င်းမှာ မည်သည့် ဝိညာဉ်ကျောက်တုံးသတ္တုတွင်း သို့မဟုတ် ရွှေနီသတ္တုတွင်းထက်မဆို ပို၍ပင် အဖိုးတန်သည်။

မည်သို့ပင်ဖြစ်စေ၊ ထိုသတ္တုတွင်းများသည် အချိန်အတိုင်းတာတစ်ခုအထိသာ၊ ဂိုဏ်းတစ်ခု၏ အခြေခံအုတ်မြစ်နှင့် အာဏာကို အနည်းငယ်သာ တိုးမြင့်စေနိုင်သည်။

သို့သော် ရွှေရည်ကျောက်စိမ်းပြန်လည်ရှင်သန်ခြင်းဆေးလုံးတစ်လုံးသည် ဂိုဏ်းတစ်ခုသို့ နောက်ထပ် ရွှေအမြုတေဆရာသခင်တစ်ဦးကို ချက်ချင်း ထပ်ပေါင်းထည့်ပေးစေနိုင်ပြီး၊ ၎င်း၏အာဏာကို ချက်ချင်း နှစ်ဆတိုးစေသည်။ ဤတတိယအဆင့် ဆေးလုံး မည်မျှ တန်ဖိုးရှိသည်မှာ ထင်ရှားသည်။

၎င်းမှာ မရေမတွက်နိုင်သော ကျင့်ကြံသူများကို ရူးသွပ်စေနိုင်သည့် မဟာဗျူဟာမြောက် အရင်းအမြစ်တစ်ခုဖြစ်၏။

နောက်ထပ် ရွှေအမြုတေဆရာသခင်တစ်ဦး ပေါ်ထွက်လာခြင်းက ဒေသတစ်ခုလုံးရှိ အာဏာမျှခြေကို လုံးဝ ပျက်ပြားစေပေလိမ့်မည်။

ထို့ကြောင့် ဤဆေးလုံး၏ တန်ဖိုး မည်မျှ အံ့ဩဖွယ်ကောင်းသည်ကို စိတ်ကူးကြည့်နိုင်ပေသည်။ ဤသို့သော ဆေးလုံးမျိုးသည် လေလံပွဲများတွင်ပင် ပေါ်လာမည်မဟုတ်ပေ။

အကြောင်းမှာ ၎င်း ပေါ်လာသည်နှင့်တစ်ပြိုင်နက် ဂိုဏ်းများအကြားတွင် အရူးအမူးတိုက်ခိုက်မှုကို ချက်ချင်း ဖြစ်ပေါ်စေမည်ဖြစ်ပြီး၊ မရေမတွက်နိုင်သော ကျင့်ကြံသူများ အသတ်ခံရသည်အထိ မည်သူမျှ တိုက်ခိုက်ခြင်းကို ရပ်တန့်မည်မဟုတ်သောကြောင့် ဖြစ်သည်။

ဤသည်မှာ ဝိညာဉ်ကျောက်တုံးများဖြင့်ပင် တိုင်းတာ၍မရနိုင်သော ရတနာ ဖြစ်သည်။

"အင်း.. မင်းတို့လည်း စိတ်ပူစရာမလိုဘူး..မင်းတို့ရဲ့ကျင့်ကြံမှုက ပြီးပြည့်စုံတဲ့ အခြေတည်အဆင့်ကို ရောက်တာနဲ့ ..ငါက မင်းတို့အတွက် သကြားလုံးတွေလို စားလို့ရအောင်.. ရွှေရည်ကျောက်စိမ်းပြန်လည်ရှင်သန်ခြင်းဆေးလုံးတွေကို ဖော်စပ်ပေးမယ်..."

ကျိုးစွေ့သည် သဘာဝအတိုင်း မျက်နှာလိုက်မည်မဟုတ်ပေ။ သူသည် ကျိပင်းယွီ၊ မုဇီယန်နှင့် ရှားကျင်းယန်တို့ကို ချစ်ခင်စွာ ကြည့်ရင်း ကတိပေးလိုက်သည်။

သူ၏ ကြီးကြီးကျယ်ကျယ် ကတိပေးနိုင်စွမ်းက ဩချရလောက်ပေသည်။

အနာဂတ်တွင်၊ ဖြစ်နိုင်မဖြစ်နိုင်ထက် ကြီးကျယ်သောကတိသာ ပေးလိုက်သည်။

မည်သို့ပင်ဖြစ်စေ၊ အမျိုးသမီးများသည် ရင်ခုန်ဖွယ်ကတိစကားများဖြင့် အလွယ်တကူ စိတ်လှုပ်ရှားတတ်သည့် သတ္တဝါများ ဖြစ်ကြသည်။