အခန်း (၁၀၀၀-၁၀၀၂)

အခန်း ၁၀၀၀ - ပူပန်စရာ မလိုတော့ပါ

ဆိုရော့စ်၏ ကံဆိုးမှုများလား။

ဖူကွမ်းဝေ၏ စကားကို ကြားသောအခါ ဖုန်းယွီနှင့် ဖူကွမ်းကျန့်တို့သည် တစ်ယောက်မျက်နှာ တစ်ယောက်ကြည့်ကာ ပြုံးလိုက်ကြသည်။ ဆိုရော့စ်သည် ဤတစ်ကြိမ်တွင် အလွန်ဆိုးရွားစွာ အရှုံးပေါ်ခဲ့သည်။

ရုရှားတွင် ဆုံးရှုံးခဲ့ခြင်းသည် ဖုန်းယွီကြောင့် ဖြစ်သည်။ သို့သော် မူလ အချိန်ကာလတွင်လည်း ဆိုရော့စ်သည် ထိုရုရှားမူဝါဒများကြောင့် အနည်းငယ် ဆုံးရှုံးခဲ့သည်။ ဖုန်းယွီသည် ဤမူဝါဒကို ပိုမိုသင့်တော်သော အချိန်တွင် ပေါ်ပေါက်စေခဲ့သဖြင့် ဆိုရော့စ်သည် လုံးဝ တုံ့ပြန်ရန် အချိန်မရခဲ့ပေ။

သို့သော်လည်း ဆိုရော့စ်၌ အမြတ်ပြန်ရှာနိုင်ရန် လုံလောက်သော ငွေကြေးပမာဏတော့ ကျန်ရှိနေသေးသည်။

သို့သော် ဖုန်းယွီသည် ဆိုရော့စ်ဘက်မှ ပွဲစားများကို စည်းရုံးကာ လစာများကို ကြိုတင်ထုတ်ယူစေခဲ့ပြီး ကွမ်တန်ဖန် (Quantum Fund) ၏ ဘဏ္ဍာရေး အကြပ်အတည်းကို ပေါ်ထွက်စေခဲ့သည်။ ကွမ်တန်ဖန်တွင် ရင်းနှီးမြှုပ်နှံရန် စီစဉ်နေသူများသည်လည်း ခြေလှမ်း ရပ်သွားကြသည်။

ဆိုရော့စ်က ဖုန်းယွီဘက်တွင် ထားရှိသော သူလျှိုများကို ဖုန်းယွီက အောင်မြင်စွာ စည်းရုံးနိုင်ခဲ့သဖြင့် သူတို့သည် ဆက်လက်၍ ကွမ်တန်ဖန်၏ မကောင်းသတင်းများကို ပြောကြားခဲ့ပြီး ကွမ်တန်ဖန်၏ ဂုဏ်သိက္ခာကို ပိုမိုကျဆင်းစေခဲ့သည်။

တစ်ချိန်တည်းတွင် ဖုန်းယွီတို့သည် ကွမ်တန်ဖန်က ရင်းနှီးမြှုပ်နှံသူများ၏ ပိုက်ဆံများကို ရှုံးနိမ့်စေခဲ့ကြောင်းနှင့် ဆိုရော့စ် အသက်ကြီးပြီဖြစ်ကြောင်း စသည့် အပြောအဆိုများကိုလည်း ဖြန့်ချိခဲ့သဖြင့် ဆိုရော့စ်သည် အမြတ်အများဆုံး ရယူနိုင်ခြင်း မရှိတော့ပေ။

ကွမ်တန်ဖန်မှ လူများသည် လစာယူပြီး အလုပ်မှ နုတ်ထွက်သွားကြသည်။ ရင်းနှီးမြှုပ်နှံသူများသည်လည်း ငွေပြန်ထုတ်ရန် တောင်းဆိုကြသည်။ ဆိုရော့စ်က ယခင်က သူတို့အတွက် အမြတ်များစွာ ရှာပေးခဲ့ခြင်းကိုမူ သူတို့သည် ရွေးချယ်ပြီး မေ့ထားလိုက်ကြသည်။

အမြတ်ရခြင်းသည် ဖြစ်သင့်သော်လည်း အရှုံးပေါ်ခြင်းကိုမူ သည်းခံနိုင်ခြင်း မရှိကြပေ။

ခေါင်းပူနေသော ဆိုရော့စ်သည် အခြေအနေကို ထိန်းချုပ်ရန် နည်းလမ်းမျိုးစုံ ရှာဖွေခဲ့သော်လည်း ပွဲစားများ နည်းပါးသွားသဖြင့် သူ၏ ရင်းနှီးမြှုပ်နှံမှုမှာ အပြင်းအထန် ကန့်သတ်ခံခဲ့ရသည်။

ထို့အပြင် သူ၏ မူလရင်းနှီးငွေမှာလည်း နည်းပါးသွားသဖြင့် ရရှိနိုင်သော အမြတ်မှာလည်း များစွာ သက်ရောက်မှု ရှိလာသည်။

ယခင်က ရုရှားတွင် ဒေါ်လာ ဘီလီယံ ၅၀၀ ကျော် ရင်းနှီးမြှုပ်နှံခဲ့သည်။ ၎င်းတွင် ရင်းနှီးငွေ ဒေါ်လာ ဘီလီယံ ၄၀၀ ကျော် ပါဝင်ပြီး ရင်းနှီးမြှုပ်နှံသူများ၏ ပိုက်ဆံများနှင့် ကွမ်တန်ဖန်က ဤနှစ်တွင် ရှာဖွေခဲ့သော အမြတ်များ ပါဝင်သည်။

တစ်ချိန်တည်းမှာပင် ရာခိုင်နှုန်း ရှစ်ဆယ်ကျော် အရှုံးပေါ်ခဲ့သည်။ သူ၏ ယခင်အမြတ်များသာမက ရင်းနှီးမြှုပ်နှံသူများ၏ မူလရင်းနှီးငွေပင် များစွာ ဆုံးရှုံးခဲ့သည်။

သို့သော်လည်း ဆိုရော့စ်သည် ဆိုရော့စ်ပဲ ဖြစ်သည်။ သူသည် အခြေအနေကို ပြောင်းလဲနိုင်သော နည်းလမ်းရှိသေးသည်။ ဥရောပနှင့် အမေရိကန် စတော့ဈေးကွက်များကို ရှယ်ယာအတုရောင်းချခြင်းဖြင့် သူသည် ပိုက်ဆံ အချို့ ပြန်ရလာခဲ့သည်။

၎င်းသည် သူ၏ ယခင် ရန်ပုံငွေနှင့် နှိုင်းယှဉ်လျှင် များစွာ နည်းပါးသော်လည်း အနည်းဆုံး ရင်းနှီးမြှုပ်နှံသူများ၏ မူလရင်းနှီးငွေကို ပြန်ရှာနိုင်ခဲ့သည်။

သို့သော် မူလရင်းနှီးငွေကို ပြန်ရှာနိုင်ရုံဖြင့် လုံလောက်မည်မဟုတ်ပေ။ သူသည် ရင်းနှီးမြှုပ်နှံသူများနှင့် ရာခိုင်နှုန်း ၁၀ အမြတ် ရရှိရေး စာချုပ် ချုပ်ဆိုထားသည်။ ဒေါ်လာ ဘီလီယံ ၂၀၀ ကျော်အတွက် အမြတ်တစ်ခုတည်းပင် ဒေါ်လာ ဘီလီယံ ၂၀ ကျော် ကုန်ကျမည် ဖြစ်သည်။ ထို့အပြင် ရင်းနှီးမြှုပ်နှံသူများသည် မကျေနပ်ကြပေ။ ယခင်က အမြတ်သည် ရာခိုင်နှုန်း သုံးဆယ်ကျော်ခဲ့သည် မဟုတ်လား။ မင်းသာ မစွန့်စားခဲ့ရင် ငါတို့ အမြတ် ဒီလောက် နည်းပါ့မလား။

ထို့အပြင် စိတ်ငြိမ်စေရန်အတွက် ပွဲစားများ၏ အပိုဆုကြေးများ၊ နတ်ဘုရားလေးပါး၏ အပိုဆုကြေးများမှာလည်း မနည်းလှပေ။

နောက်ပြီး သူ၏ ချေးငွေအတိုးများ၊ လုပ်ငန်းအချို့ကို ဈေးပေါပေါနှင့် ရောင်းချရခြင်းများ စသည့် အရှုံးများဖြင့် ဆိုရော့စ်သည် ဤနှစ်တွင် အကြီးအကျယ် ရှုံးနိမ့်ခဲ့သည်။

ယမန်နှစ်တွင် ဆိုရော့စ်၌ ဒေါ်လာ ဘီလီယံ ၆၀ ကျော်ရှိပြီး အများစုမှာ ငွေသားဖြစ်သည်။ အခုချိန်မှာကော။ ဆိုရော့စ်၏ ပိုင်ဆိုင်မှုသည် ဒေါ်လာ ဘီလီယံ ၃၀ပင် မရှိတော့ပေ။

ယမန်နှစ်တွင် သူသည် အရှေ့တောင်အာရှကို သိမ်းပိုက်ခဲ့ပြီး ဟောင်ကောင်တွင် အနည်းငယ် ရှုံးခဲ့သော်လည်း တောင်ကိုရီးယားတွင်မူ နောက်ဆုံးတွင် အမြတ်များစွာ ရခဲ့သည်။

သို့သော် ဤနှစ်တွင် သူသည် ပိုက်ဆံရှာနိုင်ခြင်း မရှိခဲ့ရုံသာမက ယမန်နှစ်က ကြီးမားသော အမြတ်များကို ဆုံးရှုံးခဲ့ရပြီး မူလရင်းနှီးငွေ၏ တစ်ဝက်ကိုပင် ဆုံးရှုံးခဲ့ရသည်။ သို့သော် ကွမ်တန်ဖန်၏ နောက်ဆုံး ဂုဏ်သိက္ခာကိုတော့ ထိန်းသိမ်းနိုင်ခဲ့သည်။ ကတိပေးထားသည်များကို လုံးဝ မပြောင်းလဲခဲ့ပေ။

သို့သော် ကွမ်တန်ဖန်သည် သူ၏ အမြင့်ဆုံး အခြေအနေမှ ပြိုလဲခဲ့သည်။ ဆိုရော့စ်က ဒီလို ကြီးမားတဲ့ အမှားမျိုး လုပ်ခဲ့ပြီးနောက် ဘယ်သူက သူ့ကို ယုံကြည်တော့မှာလဲ။ နောက်ပိုင်းတွင် သူ၏ ရင်းနှီးမြှုပ်နှံမှုများမှာ အမှားအယွင်းမရှိခဲ့သော်လည်း နောင်တွင် ဒီလိုမျိုး အမှားမျိုး ထပ်လုပ်ဦးမလားဆိုတာ ဘယ်သူမှ မသိနိုင်ပေ။

ဖူကွမ်းဝေသည် ကွမ်တန်ဖန်၏ ပြဿနာများ၊ ယုံကြည်မှု အကျပ်အတည်းများ၊ ဂုဏ်သိက္ခာကျဆင်းမှုများ စသည်တို့ကို တရစပ် ပြောနေသည်။ ဆိုရော့စ်၏ နတ်ဘုရားလေးပါးထဲမှ သုံးဦးပင် အလုပ်မှ နုတ်ထွက်သွားကြသည်။

သူတို့သည် ကိုယ်ပိုင် ရန်ပုံငွေများ သို့မဟုတ် ရင်းနှီးမြှုပ်နှံမှု ကုမ္ပဏီများ မတည်ထောင်ခဲ့ပေ။ ၎င်းအစား သူတို့သည် သူဌေးကြီးများ၏ ကိုယ်ပိုင် ရင်းနှီးမြှုပ်နှံမှု အကြံပေးများ ဖြစ်လာခဲ့သည်။ ထိုသူဌေးကြီးများသည် ယခင်က ကွမ်တန်ဖန်၏ အကြီးစား ဖောက်သည်များဖြစ်ပြီး သူတို့နှင့် တာဝန်ယူကာ ဆက်ဆံခဲ့ရသူများပင် ဖြစ်သည်။

ဒရက်ကင်မီလာတစ်ဦးတည်းသာ ကွမ်တန်ဖန်တွင် ကျန်ရှိနေပြီး ဆိုရော့စ်၏ နတ်ဘုရားလေးပါးသည် လုံးဝ ကွဲပြားသွားခဲ့သည်။ နတ်ဘုရားသုံးဦး ဆုံးရှုံးသွားသဖြင့် ကွမ်တန်ဖန်သည် ယခင်ကလို အောင်မြင်မှုမျိုး ထပ်မံရရှိနိုင်မည်မဟုတ်တော့ဟု ယူဆကြသည်။

ဆိုရော့စ် အသက်ကြီးလာပြီဖြစ်ပြီး သူ့တွင် စွမ်းအင်များ တဖြည်းဖြည်း နည်းပါးလာသည်။ ဤတစ်ကြိမ် ရုရှားတွင် ရင်းနှီးမြှုပ်နှံမှု ရှုံးနိမ့်ခဲ့ခြင်းသည် သက်သေပင်ဖြစ်သည်။

ဒရက်ကင်မီလာတစ်ဦးတည်းဖြင့် ကွမ်တန်ဖန်ကို ထိန်းချုပ်နိုင်မည်မဟုတ်ပေ။ ကွမ်တန်ဖန်သည် အကောင်းဆုံး အတားအဆီး ရန်ပုံငွေ (hedge fund) မဟုတ်တော့သလို ဆိုရော့စ်သည်လည်း အကောင်းဆုံး ရန်ပုံငွေ မန်နေဂျာ မဟုတ်တော့ဟု လုပ်ငန်းနယ်ပယ်တွင် အများအားဖြင့် ယူဆထားကြသည်။

“အစ်ကိုဖုန်း၊ ဟယ်ကျောင်းကျီကို တခြားလူတွေက ခေါ်နေတယ်ဆိုတာ သိလား” ဖူကွမ်းဝေက မေးသည်။

“သိတယ်၊ သူ ငါ့ကို ပြောပြတယ်။ ဒါပေမဲ့ ငါ ယုံကြည်တယ်၊ သူ သွားမှာ မဟုတ်ဘူး။ ပထမအချက်က သူတို့ ပေးနိုင်တဲ့ လစာကို ငါလည်း ပေးနိုင်တယ်။ ဒုတိယအချက်က ငါ သူ့အပေါ်မှာ ကျေးဇူးရှိတယ်။ ဒီအချက်က အရမ်းအရေးကြီးတယ်။ နောက်ဆုံးအချက်က သူက စိတ်ဓာတ်ဟောင်းတွေကို မြတ်နိုးတဲ့သူဖြစ်တယ်။ ဒီလုပ်ဖော်ကိုင်ဖက်တွေနဲ့ ဆက်လုပ်ရတာ ကြိုက်တယ်။ ဟောင်ကောင်ကိုလည်း သဘောကျတယ်။ ပတ်ဝန်းကျင် အသစ်ပြောင်းရင် သူ အဆင်ပြေမှာ မဟုတ်ဘူး”

ဖုန်းယွီ၏ Wind and Rainအကြံပေးကုမ္ပဏီသည် ဤအာရှဘဏ္ဍာရေး အကျပ်အတည်းတွင် အမြတ်များစွာ ရရှိခဲ့သဖြင့် ဖော်ဘီမဂ္ဂဇင်းတွင် ဖော်ပြခံရပြီးနောက် လူအများ၏ အာရုံစိုက်ခြင်းကို ခံရသည်။

လူအများစုသည် Wind and Rain အကြံပေးကုမ္ပဏီသည် အကောင်းဆုံး ရင်းနှီးမြှုပ်နှံမှု ကုမ္ပဏီဖြစ်သည်ဟုပင် ပြောကြသည်။ ကုမ္ပဏီ စတင်တည်ထောင်သည့် နေ့မှစ၍ ဖောက်သည်များကို တစ်ကြိမ်တစ်ခါမှ မရှုံးနိမ့်စေခဲ့ပေ။ ကော်မရှင် အချိုးအစား အလွန်မြင့်မားခြင်းနှင့် ရင်းနှီးမြှုပ်နှံမှု အဆင့်မြင့်မားခြင်းမှလွဲ၍ တခြား ချို့ယွင်းချက် မရှိပေ။

Wind and Rain အကြံပေးကုမ္ပဏီ၏ မန်နေဂျာဖြစ်သူ ဟယ်ကျောင်းကျီသည် Wind and Rain အကြံပေးကုမ္ပဏီ၏ အမြတ်ရရှိနိုင်သော အဓိက အကြောင်းအရင်း ဖြစ်သည်ဟု လူအများက ယူဆကြသည်။ Wind and Rain အကြံပေးကုမ္ပဏီကို ဖုန်းယွီက နောက်ကွယ်မှ ထိန်းချုပ်ထားသည်ဆိုသော အဆိုကိုမူ သူတို့က အထင်အမြင်သေးကြသည်။

ဖုန်းယွီက အသက် ဘယ်လောက်ရှိလို့လဲ။ ဟယ်ကျောင်းကျီက အသက် ဘယ်လောက်ရှိပြီလဲ။ ဖုန်းယွီသည် ဘဏ္ဍာရေးကို သင်ယူသော အချိန်ကို ထည့်တွက်ရင်တောင် ဟယ်ကျောင်းကျီ အလုပ်လုပ်ခဲ့သည့် အချိန်နှင့် ယှဉ်လျှင် နည်းပါးနေသေးသည်။

ဟယ်ကျောင်းကျီက Wind and Rain အကြံပေးကုမ္ပဏီ၏ အရေးကြီးသော ဆုံးဖြတ်ချက်များသည် ဖုန်းယွီက ချမှတ်ခဲ့ခြင်းဖြစ်ပြီး သူသည် အကူအညီနှင့် အကောင်အထည်ဖော်သူသာ ဖြစ်ကြောင်း သိသည်။ ထိုကုမ္ပဏီများသည် မြင့်မားသော လစာနှင့် ရှယ်ယာများကို ပေးအပ်ခဲ့သော်လည်း Wind and Rain အကြံပေးကုမ္ပဏီတွင်သာ ရှိနေခြင်းက အကောင်းဆုံးဖြစ်ကြောင်း သူ သိသည်။ ဖုန်းယွီကလည်း သူ့ကို ရှယ်ယာတွေ ပေးထားသည် မဟုတ်လား။

ထို့အပြင် သူသည် ဟောင်ကောင်ကို တကယ်မထွက်ခွာချင်ပေ။ ဤသည်မှာ သူ၏ အိမ်ဖြစ်သည်။

“အစ်ကိုကွမ်းကျန့်၊ ဆိုရော့စ်က ဒီလောက် အသက်ကြီးနေပြီ၊ ဒီလောက် ကြီးမားတဲ့ ရိုက်ခတ်မှုမျိုး ရုတ်တရက် ခံစားလိုက်ရတော့ သူ မခံနိုင်တော့ဘူးလို့ ထင်လား”

ဖူကွမ်းကျန့်သည် သူ့ညီဝမ်းကွဲကို မျက်လုံးလှန်ပစ်လိုက်သည်။ “မင်းက ရင်းနှီးမြှုပ်နှံသူတွေက စိတ်ဓာတ်ပျော့ညံ့တယ်လို့ ထင်နေတာလား။ အရင်တုန်းက သူ ဒေဝါလီနီးနီးဖြစ်ခဲ့တာတောင် သူ့ခန္ဓာကိုယ်မှာ ဘာပြဿနာမှ ရှိတယ်လို့ မကြားဖူးဘူး။ အခုက ဒေါ်လာ ဘီလီယံ အနည်းငယ်ပဲ ရှုံးတာ၊ ဘာမှ မဟုတ်ဘူး”

“ဒါဆို အနာဂတ်မှာ သူ ဘဏ္ဍာရေး လုပ်ငန်းတွေ ဆက်လုပ်နိုင်ဦးမှာပေါ့။ ဒါဆို သူ ဟောင်ကောင်ကို ပြန်တိုက်ခိုက်ဦးမလား၊ ဒါမှမဟုတ် နောင်မှာ ပြည်မကို တိုက်ခိုက်ဦးမလား”

ဖူကွမ်းကျန့်သည် မဖြေဘဲ ဖုန်းယွီကို ကြည့်လိုက်သည်။ ဖုန်းယွီသည် ယုံကြည်စွာ ပြန်ဖြေလိုက်သည်။ “ဆိုရော့စ် ထပ်ပြီး လာရဲတော့မှာ မဟုတ်ဘူး”

ယခင်ဘဝ၏ ဆိုရော့စ်ဆိုလျှင် အဖြေက သေချာသည်။ သို့သော် ဤဘဝ၏ ဆိုရော့စ်ကိုမူ ဖုန်းယွီက တရုတ်၏ နယ်မြေထဲတွင် လာပြီး ထပ်မံ ဂုဏ်ဖော်ရဲတော့မည် မဟုတ်ဟု ယူဆသည်။

ဆိုရော့စ်သည် ထိုလောက်များပြားသော ရန်ပုံငွေကို ထပ်မံ စုဆောင်းနိုင်မည် မဟုတ်သလို လူအများကလည်း သူ့နောက်သို့ လိုက်လာကြတော့မည် မဟုတ်ပေ။ ဆိုရော့စ် ကိုယ်တိုင်တွင်ပင် ပိုက်ဆံ မများတော့ပေ။ တဖြည်းဖြည်း ရင်းနှီးမြှုပ်နှံမယ်ဆိုရင် အမြတ်ကို သေချာပေါက် ရရှိနိုင်ပေမဲ့ ဒီလိုမျိုး အစိုးရတစ်ရပ်ရဲ့ ဘဏ္ဍာရေးစနစ်ကို ရက်ရက်စက်စက် တိုက်ခိုက်ဖို့တော့ မဖြစ်နိုင်တော့ပေ။

ယခုအချိန်တွင် ဆိုရော့စ်နှင့် ကွမ်တန်ဖန်သည် ဖုန်းယွီ၏ မျက်လုံးထဲတွင်… ပူပန်စရာ မလိုတော့ပေ။

******

အခန်း ၁၀၀၁ - ပြန်လည်ဖွဲ့စည်းမှု စတင်ခြင်း

မော်တုမြို့(ရှန်ဟိုင်း)တွင် အသစ်ပြင်ဆင်ထားသော ထိုက်ဟွာ အဆောက်အအုံ၏ အပေါ်ဆုံးထပ်ရှိ ခန်းမကြီးထဲတွင် လူဒါဇင်ပေါင်းများစွာ ထိုင်နေသည်။ ဤလူများသည် တရုတ်စီးပွားရေးလောကမှ ထင်ရှားသော ပုဂ္ဂိုလ်များဖြစ်ပြီး လုပ်ငန်းအမျိုးမျိုးမှ ပါဝင်ကြသည်။

သို့သော် သူတို့အားလုံးတွင် တူညီသော အချက်တစ်ခုရှိသည်။ ၎င်းမှာ သူတို့၏ ကုမ္ပဏီများတွင် ဖုန်းယွီ၏ ရှယ်ယာများ ပါဝင်ခြင်းဖြစ်ပြီး အချို့မှာ ရှယ်ယာဝင်ဖြစ်ပြီး အချို့မှာ အဓိကရှယ်ယာပိုင်ဆိုင်သူများ ဖြစ်သည်။ မည်သို့ပင်ဖြစ်စေ ဖုန်းယွီ၏ ဆုံးဖြတ်ချက်သည် ကုမ္ပဏီများ၏ ဆုံးဖြတ်ချက်များကို သက်ရောက်မှုရှိသည်။ ဖုန်းယွီ ဖုန်းဆက်လိုက်သည်နှင့် သူတို့အားလုံး ရောက်လာကြသည်။

ဖုန်းယွီသည် စင်မြင့်ပေါ်တွင် ထိုင်နေပြီး သူ့ဘေးတွင်မူ ကျုံးချင်းရှန်း၊ ဝေလ်ဆင်နှင့် ဝူကျစ်ကန်တို့ သုံးဦး ထိုင်နေသည်။

“အဖွဲ့ဝင်အားလုံးကို ဒီနေ့ ခေါ်ရတဲ့ ရည်ရွယ်ချက်က ဆုံးဖြတ်ချက်တစ်ခုကို အသိပေးဖို့ပါ။ ကျွန်တော် ပုဂ္ဂိုလ်ရေးအရ ပိုင်ဆိုင်တဲ့ ကုမ္ပဏီရှယ်ယာတွေကို ကုမ္ပဏီအသစ်တစ်ခုဖြစ်တဲ့ ထိုက်ဟွာ ဦးပိုင်လုပ်ငန်းစုကြီးထဲကို ထည့်သွင်းဖို့ စီစဉ်ထားပါတယ်။ ဒီလုပ်ငန်းစုကြီးရဲ့ ဥက္ကဋ္ဌက ကျုံးချင်းရှန်းဖြစ်ပြီး ဝူကျစ်ကန်ကတော့ အကြီးတန်း ဒုဥက္ကဋ္ဌဖြစ်ပါတယ်။ ဝေလ်ဆင်က ဥပဒေရေးရာ ဒါရိုက်တာပေါ့။ နောက်ပိုင်း လုပ်ငန်းဆိုင်ရာ ဆုံးဖြတ်ချက်တွေမှာ ပြဿနာ တစ်စုံတစ်ရာ ရှိလာခဲ့ရင် ကျုံးချင်းရှန်းနဲ့ တိုင်ပင်လို့ရသလို ကျွန်တော့်ကိုလည်း ဆက်ပြီး ရှာဖွေနိုင်ပါတယ်...”

ဖုန်းယွီသည် သူ၏ ဆုံးဖြတ်ချက်ကို အားလုံးကို ပြောပြလိုက်သည်။ သူ ပြောလိုက်သည်နှင့် ၎င်းသည် နောက်ထပ် ပြောင်းလဲတော့မည် မဟုတ်သော ဆုံးဖြတ်ချက်ပင် ဖြစ်သည်။

ကျုံးချင်းရှန်းနှင့် နှိုင်းယှဉ်ပါက ဖုန်းယွီသည် ဝူကျစ်ကန်ကို ပိုမိုယုံကြည်သည်။ ထို့ကြောင့် ဝူကျစ်ကန်ကို ရာထူးတိုးပေးခြင်းသည် ဝူကျစ်ကန်ကို ဆက်လက် လေ့ကျင့်ပေးရန်ဖြစ်ပြီး နောင်တွင် ထိုက်ဟွာ ဦးပိုင်လုပ်ငန်းစုကြီးကို လွှဲပြောင်းပေးရန် ရည်ရွယ်သည်။ ထို့အပြင် ကျုံးချင်းရှန်းကို ဤကုမ္ပဏီသည် ဖုန်းယွီ၏ ကုမ္ပဏီဖြစ်ကြောင်း သတိပေးလိုက်ခြင်းလည်း ဖြစ်သည်။

ထိုက်ဟွာ ကုန်သွယ်ရေးကုမ္ပဏီဘက်တွင်မူ အခြားသူများအား လွှဲပြောင်းပေးထားသည်။ ယခင်က ဖုန်းယွီနှင့် အတူပါခဲ့သော လူများကိုလည်း လေ့ကျင့်ပေးထားနှင့်ပြီး ဖြစ်သည်။ ဖုန်းယွီသည် သူတို့အားလုံးကို စီမံခန့်ခွဲရေး ရာထူးများတွင် ထားရှိကာ သူတို့၏ စွမ်းဆောင်ရည်ကို မြှင့်တင်ပေးသည်။ ပိုမိုမြင့်မားသော ရာထူးသို့ ရောက်နိုင်မလားဆိုသည်မှာမူ သူတို့အပေါ်တွင်သာ မူတည်သည်။

ဤဆုံးဖြတ်ချက်ကို ကြားသောအခါ လူတိုင်း အံ့အားသင့်သွားကြသည်။ သို့သော် ဖြစ်သင့်သည်ဟုလည်း ခံစားရသည်။ ဖုန်းယွီသည် ယခင်ကတည်းက သူတို့အား တိုးတက်ပြီး ရင့်ကျက်သော စီမံခန့်ခွဲမှုပုံစံများကို သင်ကြားပေးခဲ့ပြီးဖြစ်၍ ဖုန်းယွီသည် မကြာမီပင် ဦးပိုင်ကုမ္ပဏီတစ်ခု တည်ထောင်မည်ကို သူတို့ သိရှိကြသည်။ ဤမျှ မြန်လိမ့်မည်ဟုတော့ မမျှော်လင့်ထားကြပေ။

သူတို့ထဲမှ များစွာသောသူများသည် ကျုံးချင်းရှန်းနှင့် ဝူကျစ်ကန်ကို မနာလိုစွာ ကြည့်နေကြသည်။ ကျုံးချင်းရှန်းကိစ္စတွင်တော့ ပြောစရာမရှိပေ။ သူသည် လီဟဟ လုပ်ငန်းစုကို ကိုယ်တိုင်တည်ထောင်ခဲ့ပြီး အာရှ၏ အဖျော်ယမကာ လုပ်ငန်းတွင် ထိပ်တန်းနေရာ ရောက်ရှိနေပြီဖြစ်ပြီး ကျန်းလီပေါင်ကိုပင် ကျော်လွန်နေပြီဖြစ်သည်။ ထို့အပြင် ကျန်းလီပေါင်နှင့် ပူးပေါင်းပြီးနောက် နိုင်ငံခြားဈေးကွက်ကိုပါ လျင်မြန်စွာ ချဲ့ထွင်နေသည်။

ကျုံးချင်းရှန်းသည်လည်း သူ့ပိုင်ဆိုင်သော လီဟဟ ရှယ်ယာများကို ထိုက်ဟွာ ဦးပိုင်လုပ်ငန်းစုကြီးထဲသို့ ထည့်သွင်းခဲ့သဖြင့် သူ ဥက္ကဋ္ဌဖြစ်သည်ကို သူတို့ လက်ခံနိုင်ကြသည်။

သို့သော် ထို ဝူကျစ်ကန်ဆိုသည်က ဘာလဲ။ ငယ်ရွယ်ပြီး ကံကောင်းရုံမျှဖြင့် ဖုန်းယွီ လုပ်ငန်းစတင်ကတည်းက နောက်လိုက်ခဲ့သည်။ ယခုတွင် ထိုက်ဟွာ ဦးပိုင်လုပ်ငန်းစုကြီး၏ ဒုဥက္ကဋ္ဌ ဖြစ်လာပြီး သူတို့၏ အပေါ်ကို ရောက်လာသဖြင့် လူအများအပြား စိတ်ထဲတွင် မကျေမနပ် ဖြစ်နေကြသည်။

“ဖုန်းဥက္ကဋ္ဌ၊ ဒါဆို နောင်တွင် ကျွန်တော်တို့ ကုမ္ပဏီနဲ့ Aiwa အီလက်ထရောနစ်တို့ရဲ့ ပူးပေါင်းဆောင်ရွက်မှုတွေကိုလည်း ထိုက်ဟွာ ဦးပိုင်လုပ်ငန်းစုကို လွှဲပေးတော့မှာလား”

“ဟုတ်ပါတယ်။ ထိုက်ဟွာ ဦးပိုင်လုပ်ငန်းစုကြီး အောက်က အဓိကရှယ်ယာနှင့် ရှယ်ယာဝင် ကုမ္ပဏီတွေအားလုံးရဲ့ အားသာချက်ရှိတဲ့ အရင်းအမြစ်တွေကို အတူတူ သုံးစွဲနိုင်မယ်။ ဝယ်ယူမှု၊ ရောင်းချမှု၊ ပိုင်ဆိုင်တဲ့ နည်းပညာအသစ်တွေနဲ့ မူပိုင်ခွင့်တွေ အားလုံး ပါဝင်ပါတယ်။ နောက်ပြီး ကုမ္ပဏီအသီးသီးရဲ့ ဘဏ္ဍာရေးဆိုင်ရာ ရာထူးတွေကိုလည်း ထိုက်ဟွာ ဦးပိုင်လုပ်ငန်းစုကြီးကပဲ ပြောင်းလဲ တာဝန်ပေးမယ်”

အဓိကရှယ်ယာပိုင်ဆိုင်သော ကုမ္ပဏီဖြစ်စေ၊ ရှယ်ယာဝင် ကုမ္ပဏီဖြစ်စေ၊ ကုမ္ပဏီအားလုံး၏ ဘဏ္ဍာရေးကို ဖုန်းယွီက ထိန်းချုပ်ထားသည်။ အနည်းဆုံးတော့ ဖုန်းယွီသည် ဘဏ္ဍာရေးတွင် လှည့်စားခြင်းမရှိစေရန် ဘဏ္ဍာရေးတာဝန်ခံတစ်ဦးကို သေချာပေါက် စေလွှတ်ထားသည်။ ၎င်းတွင် သူ၏ မူလ ထိုက်ဟွာ ကုန်သွယ်ရေးကုမ္ပဏီနှင့် ရေခဲမြို့ ဆေးဝါးလုပ်ငန်းကုမ္ပဏီ စသည့် နိုင်ငံပိုင်ရှယ်ယာဝင် ကုမ္ပဏီများလည်း ပါဝင်သည်။

“ဒါဆို ဘယ်သူက ပူးပေါင်းဆောင်ရွက်မှုတွေ လုပ်ပေးမှာလဲ”

“ကျွန်တော်ပါ။ ကျောက်ဥက္ကဋ္ဌ” ဝူကျစ်ကန်က ပြန်ဖြေသည်။ ကျောက်ဥက္ကဋ္ဌသည် Aiwa လျှပ်စစ်ပစ္စည်းကုမ္ပဏီ၏ ဥက္ကဋ္ဌဖြစ်ပြီး ဖူကွမ်းကျန့်က နိုင်ငံခြားမှ ပြန်ခေါ်ခဲ့သော ဗြိတိသျှ-တရုတ် လူမျိုးဖြစ်သည်။

“ဖုန်းဥက္ကဋ္ဌ၊ ကျွန်တော့်ရဲ့ ပုဂ္ဂိုလ်ရေးအမြင်အရတော့ ဝူကျစ်ကန်က ဒီရာထူးအတွက် အရည်အချင်း မပြည့်မီဘူးလို့ ထင်ပါတယ်” ကျောက်ဥက္ကဋ္ဌက အသံကျယ်ကျယ်ဖြင့် ပြောလိုက်သည်။

“ဟုတ်လား။ ဒါဆို မင်းက ဘယ်သူက ဒီရာထူးအတွက် သင့်တော်တယ်လို့ ထင်လဲ။ မင်းလား” ဖုန်းယွီက အသံတိုးတိုးဖြင့် မေးလိုက်သည်။

ကျောက်ဥက္ကဋ္ဌက မရဲတရဲ ပြောလိုက်သည်။ “ဟုတ်ပါတယ်၊ ကျွန်တော်က သူ့ထက် ပိုသင့်တော်တယ်လို့ ထင်ပါတယ်။ ယခင်က ထိုက်ဟွာ အီလက်ထရောနစ်၊ ထိုက်ဟွာ လျှပ်စစ်ပစ္စည်း၊ Aiwa အီလက်ထရောနစ်၊ Aiwa လျှပ်စစ်ပစ္စည်းနဲ့ Aiwa ပိစိကွေးတို့ရဲ့ ပူးပေါင်းဆောင်ရွက်မှုတွေကို ကျွန်တော်ပဲ လုပ်ခဲ့တာ။ ဒီကဏ္ဍမှာ ကျွန်တော့် အတွေ့အကြုံက သူ့ထက် အများကြီး ပိုများပါတယ်”

ဖုန်းယွီက လီမင်တဲကို လက်ညှိုးထိုးပြလိုက်သည်။ “ကျောက်ဥက္ကဋ္ဌ၊ ဒီလူကို ခင်ဗျား သိလား”

ကျောက်ဥက္ကဋ္ဌ ခဏကြာအောင် ငြိမ်သက်သွားသည်။ “မသိဘူး”

“ဒါဆို ဒီလူရော” ဖုန်းယွီက လီကျင်းဝေ့ကို ထပ်ထိုးပြလိုက်သည်။

“ဒီလူကိုလည်း မသိဘူး”

ဖုန်းယွီသည် ဝူကျစ်ကန်ကို လှည့်ကြည့်သည်။ “ကျစ်ကန်၊ ဒီထဲမှာ မင်း မသိတဲ့ လူ ရှိလား”

ဝူကျစ်ကန်က ရည်ရွယ်ချက်ကို နားလည်ပြီး အသံကျယ်ကျယ်ဖြင့် ပြောလိုက်သည်။ “ဒီထဲက လူတိုင်းကို ကျွန်တော် သိပါတယ်။ သူတို့ ဘယ်အချိန်က ကုမ္ပဏီကို ဝင်ခဲ့လဲဆိုတာလည်း သိတယ်။ သူတို့ရဲ့ အလုပ်သမိုင်းကြောင်းတွေ၊ ကျောက်ဥက္ကဋ္ဌရဲ့ အလုပ်သမိုင်းကြောင်း အပါအဝင် အားလုံးကို သိပါတယ်”

ဝူကျစ်ကန်တွင် ဖုန်းယွီ အလွန် သဘောကျသော အချက်တစ်ခုရှိသည်။ ၎င်းမှာ အလုပ်ကို အလွန် ဂရုစိုက်ပြီး ကြိုးစားကာ အကောင်းဆုံးဖြစ်အောင် လုပ်ဆောင်ခြင်းပင်ဖြစ်သည်။ သူသည် ဖုန်းယွီနှင့် အတူရှိခဲ့သဖြင့် ဤလုပ်ငန်းပိုင်ရှင်များကို သိပြီးဖြစ်သည်။ ထို့အပြင် ဖုန်းယွီက သူ့ကို ဤမျှ အရေးကြီးသော ရာထူးပေးသည်ကို သိရှိပြီးနောက် အားလုံး၏ ကိုယ်ရေးအကျဉ်းများကို တမင်တောင်းကာ မှတ်သားထားခဲ့သည်။

ဖုန်းယွီသည် ကျောက်ဥက္ကဋ္ဌကို လှည့်ကြည့်သည်။ “အခု နားလည်ပြီလား။ ခင်ဗျား လူတွေတောင် အကုန်မသိဘဲနဲ့ ဘယ်လို ပူးပေါင်းဆောင်ရွက်မှုတွေ လုပ်မလဲ။ တိုးတက်လိုစိတ် ရှိတာ ကောင်းပါတယ်။ ဒါပေမဲ့ ကိုယ့်လူတွေရဲ့ ပခုံးပေါ် နင်းပြီး တက်တာကိုတော့ ကျွန်တော် မလိုချင်ဘူး။ ဒါက ပထမဆုံးအကြိမ်မို့ ခွင့်လွှတ်ပေးလိုက်မယ်။ နောက်တစ်ခါ ထပ်ဖြစ်ရင်တော့ ဗြိတိန်ကို ပြန်သွားတော့”

ဖုန်းယွီ၏စကားသံက ပေါ့ပေါ့ပါးပါးဖြစ်သော်လည်း ကျောက်ဥက္ကဋ္ဌသည် ကိုယ်အေးစက်လာသည်ဟု ခံစားလိုက်ရသည်။ သူသည် သူ့ကိုယ်သူ အရည်အချင်းရှိသည်ဟု ထင်ပြီး မောက်မာနေမိကြောင်း သဘောပေါက်လိုက်သည်။ ဖုန်းယွီသည် သူ၏ စီမံခန့်ခွဲမှုစွမ်းရည်ကို ချီးမွမ်းခဲ့သော်လည်း သူသည် ဖုန်းယွီ၏ လူရင်းမဟုတ်ပေ။ ရှေ့သို့ ဆက်တက်ချင်ပါက ဖုန်းယွီကို ပိုမိုကျေနပ်အောင် လုပ်ပြရမည်ဟု ထင်လာသည်။

“တခြားလူတွေရော ဘာပြဿနာရှိသေးလဲ”

ထိုအချိန်တွင် သွမ့်ယုံပင်းသည် လက်တစ်ဖက်ကို မြှောက်လိုက်သည်။ “ဖုန်းဥက္ကဋ္ဌ၊ ကျွန်တော်တို့ ထိုက်ဟွာ ဦးပိုင်လုပ်ငန်းစုကြီးမှာ အလုပ်လုပ်ဖို့ အခွင့်အရေး ရှိနိုင်လား”

သွမ့်ယုံပင်းသည် အမှန်တကယ်ပင် ရိုးရိုးသားသား မနေနိုင်သူဖြစ်သည်။ ယခင်ဘဝတွင် သူ ထွက်ခွာခဲ့ပြီးနောက် ကိုယ်ပိုင် ပူးပေါင်ရှန့် လုပ်ငန်းစုကြီးကို တည်ထောင်နိုင်ခဲ့သည်။ ဤဘဝတွင် မထွက်ခဲ့ဘဲ သူလိုချင်သော ရှယ်ယာများကိုလည်း ရရှိခဲ့သော်လည်း Aiwa ပိစိကွေးသည် ဖုန်းယွီ၏ အီလက်ထရောနစ်နှင့် လျှပ်စစ်ပစ္စည်းကုမ္ပဏီများထဲတွင် အရွယ်အစား အသေးဆုံး ဖြစ်နေသည်။

“အခွင့်အရေး ရှိတာပေါ့။ ဒီထိုက်ဟွာ ဦးပိုင်လုပ်ငန်းစုကြီးက စီမံခန့်ခွဲရေး အဖွဲ့ကို ရွေးချယ်တဲ့အခါမှာ ကျွန်တော်တို့ ကုမ္ပဏီတွေက ထိပ်တန်း အကြီးအကဲတွေကို ဦးစားပေး ရွေးချယ်သွားမှာပါ။ မင်း စိတ်ဝင်စားရင် ကျုံးအဘိုးနဲ့ သွားပြောကြည့်လို့ရတယ်။ မင်းတို့အားလုံး ကိုယ့်ရဲ့ ကုမ္ပဏီရှယ်ယာတွေကို ထိုက်ဟွာ ဦးပိုင်လုပ်ငန်းစုကြီးထဲ ထည့်သွင်းတာကိုလည်း ကြိုဆိုပါတယ်”

သွမ့်ယုံပင်းသည်လည်း အလွန်ထူးချွန်သော အရည်အချင်းရှိသူ ဖြစ်သည်။ စီမံခန့်ခွဲမှုနှင့် ဆုံးဖြတ်ချက်ချမှုတို့တွင် အလွန်ကောင်းမွန်သည်။ ဒုဥက္ကဋ္ဌ ရာထူးအတွက် ပြဿနာမရှိပေ။

ဖုန်းယွီ၏ စကားကို ကြားသောအခါ လူအချို့သည် အတွေးများ ဝင်လာသည်။ တစ်ခုက ဦးပိုင်လုပ်ငန်းစုဖြစ်ပြီး တစ်ခုက လက်အောက်ခံ ကုမ္ပဏီဖြစ်သဖြင့် အားသာချက်များ မတူညီပေ။ ကျန်ဝမ်မန်သည်မူ ဖုန်းယွီ အီလက်ထရောနစ်တွင် အကြီးအကဲအဖြစ် နေရသည်ကို သဘောကျနေသေးသည်။ သို့သော် ထိုက်ဟွာ ဘက်ထရီမှ ဝမ်ဥက္ကဋ္ဌသည် သွမ့်ယုံပင်းနှင့် အတွေးတူနေသည်။ အဓိက လုပ်ငန်းစုတွင် စမ်းသပ်ကြည့်ချင်သည်။ အကြောင်းမှာ ထိုက်ဟွာ ဘက်ထရီသည်လည်း Aiwa ပိစိကွေးလို အရွယ်အစား သေးငယ်နေခြင်းကြောင့် ဖြစ်သည်။

“နောက်လာမဲ့ တစ်လအတွင်းမှာ ပိုင်ဆိုင်မှုတွေကို ပြန်လည်ဖွဲ့စည်းမှာ ဖြစ်တယ်။ ကျွန်တော် စာရင်းစစ်ကုမ္ပဏီ အချို့ကို ခေါ်ယူပြီး ကုမ္ပဏီအသီးသီးကို စစ်ဆေးစေမယ်။ ဘာပြဿနာမှ ရှာမတွေ့ဖို့ မျှော်လင့်ပါတယ်”

******

အခန်း ၁၀၀၂ - မဖုံးကွယ်တော့ပါ

ထိုက်ဟွာ ဦးပိုင်လုပ်ငန်းစုကြီး တည်ထောင်ခြင်းကို ဖုန်းယွီသည် တိတ်တဆိတ် လုပ်ဆောင်ခဲ့သည်ဟု ထင်မှတ်ထားခဲ့သည်။ ကုမ္ပဏီအားလုံးသည် စတော့ဈေးကွက်သို့ မဝင်သေးသဖြင့် ပိုင်ဆိုင်မှုများ ပြန်လည်ဖွဲ့စည်းခြင်းကိုလည်း တိတ်တဆိတ် လုပ်ခဲ့သည်။ သို့သော် ယနေ့ ရုတ်တရက် ထွက်ပေါ်လာသော သတင်းတစ်ခုက ဖုန်းယွီကို အံ့အားသင့်စေခဲ့သည်။

သတင်းစာတွင် Forbes မဂ္ဂဇင်း၏ ဤနှစ်အတွက် အချမ်းသာဆုံးစာရင်းကို ပြန်လည်ဖော်ပြခဲ့သည်။ အထူးသဖြင့် ပြည်တွင်း၊ ဟောင်ကောင်၊ ပုကျင့် စသည့် ဒေသများမှ စာရင်းဝင်သူများကို အသားပေးဖော်ပြခဲ့ပြီး ထိုစာရင်း၏ ထိပ်ဆုံးတွင် ဖုန်းယွီ၏ နာမည် ပါဝင်နေသည်။

မူလက ဖုန်းယွီသည် ဤအချိန်တွင် Forbesကို ပြည်မတွင် သိရှိသူ နည်းပါးလိမ့်မည်ဟု ထင်မှတ်ခဲ့သော်လည်း ယခုလို သတင်းဖော်ပြခံရပြီးနောက် သူ၏ ဖုံးကွယ်ထားသော အချမ်းသာဆုံးပုဂ္ဂိုလ်ဘဝသည် အများသိ ဖြစ်လာတော့မည်။

ဖုန်းယွီ၏ ပိုင်ဆိုင်မှုများကို တရုတ်လူမျိုးများက ပထမဆုံးအကြိမ် သိရှိခဲ့ကြသည်။ သူတို့သည် ပြည်မတွင် ဤမျှ ငွေကြေးချမ်းသာသူ ရှိကြောင်း ရုတ်တရက် သိလိုက်ရသည်။ အမေရိကန်ဒေါ်လာ ၂၈ ဘီလီယံ ပိုင်ဆိုင်သည်ဟု ဆိုသည်။ သူတို့ထဲမှ လူအများစုသည် ယွမ် ၂.၈ သန်းပင် မမြင်ဖူးကြသေးပေ။

ကမ္ဘာ့အချမ်းသာဆုံး စာရင်းတွင် ဒုတိယနေရာတွင် ရှိနေပြီး အသက်အငယ်ဆုံး ဒေါ်လာ ၂၀ ဘီလီယံ ပိုင်ဆိုင်သူဖြစ်သည်။ သူသည် အသက်အငယ်ဆုံး ဒေါ်လာ ဘီလီယံ ၃၀ ပိုင်ဆိုင်သူလည်း ဖြစ်လာမည်ဖြစ်ပြီး ကမ္ဘာ့အချမ်းသာဆုံး ဖြစ်လာရန်ပင် မျှော်လင့်ထားသည်။

လျိုယုန်ဟောက်သည် သတင်းစာကို ဖတ်နေသည်။ ဖုန်းယွီသည် ဤမျှ ချမ်းသာနေသည်လား။

သူနှင့် ဖုန်းယွီသည် မင်ရှန့်ဘဏ်၏ ရင်းနှီးမြှုပ်နှံသူများ ဖြစ်သည်။ ယခင်ကလည်း စကားပြောဆိုဖူးပြီး ဖုန်းယွီသည် သူ ပူးတွဲတည်ထောင်သော ဂွမ်ချိုက်လုပ်ငန်းကိုလည်း အပြည့်အဝ ထောက်ခံခဲ့သည်။

ဖုန်းယွီသည် ချမ်းသာကြောင်း သူသိသော်လည်း ဖုန်းယွီကို တရုတ်၏ အချမ်းသာဆုံးအဖြစ်သာ သတ်မှတ်ခဲ့ဖူးသည်။ ဖုန်းယွီသည် အာရှ၏ အချမ်းသာဆုံး၊ ကမ္ဘာ့ ဒုတိယ အချမ်းသာဆုံးဖြစ်ပြီး ဒေါ်လာ ဘီလီယံ ၃၀ နီးပါး ပိုင်ဆိုင်သည်ဟု တစ်ခါမျှ မတွေးခဲ့ဖူးပေ။

သူ၏ မိသားစုသည် တရုတ်၏ အကြီးဆုံး နွားစာထုတ်လုပ်ဖြန့်ချိသူဖြစ်သည်။ ထုတ်ကုန်များကို အရှေ့တောင်အာရှရှိ နိုင်ငံအများအပြားသို့ပင် ရောင်းချနေသည်။ သို့သော် တရုတ်၏ ဒုတိယ အကြီးဆုံး နွားစာထုတ်လုပ်ဖြန့်ချိသူမှာ ထိုက်ဟွာ လယ်ယာထွက်ကုန်ကုမ္ပဏီဖြစ်ပြီး ဖုန်းယွီ၏ ဖခင်ပိုင်ဆိုင်သည်ဟု ဆိုကာ ထိုပုဂ္ဂိုလ်သည်လည်း အလွန်လျှို့ဝှက်ဆန်းကြယ်သည်။

ဖုန်းယွီ၏ ထိုက်ဟွာ လယ်ယာထွက်ကုန်ကုမ္ပဏီအပေါ် အလေးမထားမှုမှ ကြည့်ပါက ဤလုပ်ငန်းသည် ဖုန်းယွီ၏ အကြီးဆုံးလုပ်ငန်း မဟုတ်ကြောင်း သိနိုင်သည်။

လျိုယုန်ဟောက်တို့ မောင်နှမများသည် ဖုန်းယွီ အီလက်ထရောနစ်နှင့် ဖုန်းယွီ လျှပ်စစ်ပစ္စည်းလုပ်ငန်းများမှာ ဖုန်းယွီ၏ အကြီးဆုံး လုပ်ငန်းများဖြစ်သည်ဟု ယူဆခဲ့ကြသည်။ သို့သော် ဖုန်းယွီ၏ အကြီးဆုံးလုပ်ငန်း နှစ်ခုမှာ အမေရိကန်နှင့် ဟောင်ကောင်တွင် ရှိသည်ဟု တစ်ခါမျှ မတွေးခဲ့ဖူးပေ။

အမေရိကန်တွင် မိုက်ခရိုဆော့ဖ်၏ ရှယ်ယာများကို ပိုင်ဆိုင်ထားပြီး ဟောင်ကောင်တွင် Wind and Rainအကြံပေးကုမ္ပဏီတစ်ခု ရှိသည်။ သတင်းစာတွင်ပင် နိုင်ငံခြားမီဒီယာများစွာက Wind and Rainအကြံပေးကုမ္ပဏီကို ဤနှစ်၏ ရင်းနှီးမြှုပ်နှံမှုကုမ္ပဏီများထဲတွင် ထိပ်ဆုံးတွင် ထားရှိခဲ့ကြောင်းနှင့် Wind and Rainအကြံပေးကုမ္ပဏီသည် ကမ္ဘာ့အကောင်းဆုံး ရင်းနှီးမြှုပ်နှံမှုကုမ္ပဏီဖြစ်သည်ဟု ယူဆကြောင်းလည်း ဖော်ပြထားသည်။

ဖုန်းယွီ၏ မိုက်ခရိုဆော့ဖ် ရှယ်ယာများကိုလည်း Wind and Rainအကြံပေးကုမ္ပဏီမှတစ်ဆင့် ဝယ်ယူခဲ့ခြင်းဖြစ်ပြီး ဖုန်းယွီ၏ကိုယ်ပိုင်အမည်ဖြင့်သာ ထားရှိခဲ့ကြောင်းလည်း ဖော်ပြထားသည်။

ထိုWind and Rainအကြံပေးကုမ္ပဏီသည် တည်ထောင်ခဲ့သည်မှာ မကြာသေးသော်လည်း အံ့ဩဖွယ်ရာ အမြတ်များ ရရှိထားသည်။ ပိုင်ဆိုင်မှုများ နှစ်စဉ်တိုးတက်လာသည်သာမက အရေးကြီးသည်မှာ Wind and Rainအကြံပေးကုမ္ပဏီ၏ ရင်းနှီးမြှုပ်နှံမှုမှာ တစ်ကြိမ်တစ်ခါမျှ မရှုံးနိမ့်ခဲ့ခြင်းပင်ဖြစ်သည်။ Wind and Rainအကြံပေးကုမ္ပဏီကို ပိုက်ဆံ အပ်နှံခဲ့သူများထဲတွင် တစ်ဦးတစ်ယောက်မျှ အရှုံးမရှိခဲ့ပေ။

ဤကဲ့သို့ ရလဒ်မျိုးကို အံ့ဩဖွယ်ကောင်းသည်ဟုသာ ပြော၍မရဘဲ အံ့ဖွယ်ရာပင် ဖြစ်သည်ဟု ဆိုသင့်သည်။

လျိုယုန်ဟောက်သည် ပြီးခဲ့သည့်နှစ်က သူတို့ မောင်နှမများ အကောင်းဆုံး တက်နေသော ချန်ဟုန်၏ ရှယ်ယာအချို့ကို ဝယ်ခဲ့သော်လည်း ရုတ်တရက် ပြိုလဲသွားသဖြင့် အချို့ ဆုံးရှုံးခဲ့သည်ကို ပြန်တွေးလိုက်သည်။

ပြီးခဲ့သည့်နှစ်က ဟောင်ကောင် စတော့ဈေးကွက်သည်လည်း မကောင်းပေ။ ဖုန်းယွီက ဤမျှ ပိုက်ဆံများကို မည်သို့ ရှာခဲ့သည်ကို အမှန်တကယ် မသိပေ။

လျိုယုန်ဟောက်သည် တစ်နေ့တွင် ဖုန်းယွီနှင့် ပြန်တွေ့ရန် ဆုံးဖြတ်လိုက်သည်။ ဖုန်းယွီထံမှ များများ လေ့လာပြီး သူတို့၏ နွားစာလုပ်ငန်းများကို တစ်စိတ်တစ်ပိုင်း ပူးပေါင်းကာ အာရှမှ ထွက်ခွာပြီး ကမ္ဘာသို့ ချဲ့ထွင်နိုင်ရန် မျှော်လင့်သည်။

ရှီတာ့ကျူသည်လည်း သတင်းစာကို ဖတ်နေသည်။ ၁၉၉၅ ခုနှစ်တွင် သူသည် Forbesစာရင်းတွင် ပါဝင်ခဲ့သည်။ ထိုအချိန်တွင် သူသည် ပြည်မမှ အချမ်းသာဆုံး အဆင့် ၈ တွင် ရှိခဲ့သဖြင့် အရာအားလုံး အဆင်ပြေနေခဲ့သည်။

သို့သော် မကြာမီပင် အစိုးရစီမံကိန်းကြောင့် သူ၏ ကြီးမားသော အဆောက်အအုံသည် ကျန်းမာရေးထောက်ကူပစ္စည်းလုပ်ငန်း၏ ရန်ပုံငွေကို ပြတ်တောက်စေခဲ့ပြီး သူသည် အလွန်ဆင်းရဲသွားခဲ့သည်။ သို့သော် သူသည် ခံနိုင်ရည်ရှိခဲ့ပြီး ဒေဝါလီခံရန် လုံးဝ မလျှောက်ထားခဲ့ပေ။

လူအများအပြားသည် သူ့အား ဒေဝါလီခံရန် အကြံပေးခဲ့ကြပြီး ထိုသို့ဆိုလျှင် ကြွေးမြီများကို ပြန်ဆပ်ရန် မလိုအပ်တော့ဘဲ ဖိအားလည်း ပေါ့သွားလိမ့်မည်ဟု ပြောခဲ့ကြသည်။ သို့သော် ထိုအချိန်တွင် သူ၏ ရည်းစားသည် သူ့ကို အမြဲတမ်း တိတ်တိတ်ဆိတ်ဆိတ် ထောက်ခံပေးခဲ့သည်။

သူသည် ချေးငွေများဖြင့် ကျန်းမာရေးထောက်ကူပစ္စည်းအသစ်တစ်ခုကို သုတေသနပြုခဲ့ပြီး အောင်မြင်ခဲ့သည်။ ထိုပစ္စည်းသည် သူ့ကို လုပ်ငန်း ပြန်စနိုင်စေမည်ဟု သူ ယုံကြည်သည်။

သို့သော် ယခုအချိန်တွင် ကြော်ငြာရန်နှင့် ထုတ်လုပ်ရန်အတွက် လိုအပ်သော ငွေကြေးများ မရှိတော့ပေ။

သို့သော် သူသည် ကုမ္ပဏီတစ်ခု၏ ကြော်ငြာကို မြင်လိုက်သည်။ ထိုကုမ္ပဏီသည် ထိုက်ဟွာ အကြံပေးကုမ္ပဏီဖြစ်ပြီး လုပ်ငန်းအမျိုးမျိုးတွင် ဒေါ်လာ ဘီလီယံ ၁၀ ရင်းနှီးမြှုပ်နှံရန် အသင့်ရှိကြောင်း ကြော်ငြာထားသည်။

သို့သော် သူသည် မဆက်သွယ်ဖြစ်ခဲ့ပေ။ သူ၏ ကြိုးစားမှုများသည် တခြားလူ၏ ပိုက်ဆံများ ဖြစ်သွားသည်ကို မလိုချင်ပေ။ သို့သော် ဤအချိန်တွင် ထိုက်ဟွာ အကြံပေးကုမ္ပဏီ၏ ကြော်ငြာသည် ပြောင်းလဲသွားပြီး စွန့်ဦးတီထွင်လုပ်ငန်းများ ကူညီထောက်ပံ့ရေး အစီအစဉ် ပေါ်ထွက်လာသည်။

ဤကုမ္ပဏီကို ယုံကြည်သင့်မသင့် သူသည် တော်တော်ကြာအောင် ဆိုင်းတွနေခဲ့သည်။ သို့သော် အခုအချိန်တွင်တော့ စမ်းကြည့်သင့်ပြီဟု သူ ခံစားရသည်။ ထိုထိုက်ဟွာ အကြံပေးကုမ္ပဏီသည်လည်း ဖုန်းယွီ၏ ကုမ္ပဏီ ဖြစ်သည် မဟုတ်လား။ ပြောရမည်ဆိုလျှင် တီဗီဌာနတွင် သူတို့ တစ်ခါ တွေ့ခဲ့ဖူးသည်။ ထိုအချိန်က အတွေ့အကြုံ မရှိသေးသော လူငယ်လေးသည် ယခုတွင် တရုတ်၏ အချမ်းသာဆုံး၊ အာရှ၏ အချမ်းသာဆုံး၊ ကမ္ဘာ့ ဒုတိယ အချမ်းသာဆုံးဖြစ်နေသည်ကို မယုံကြည်နိုင်ပေ။

ထိုက်ဟွာ အကြံပေးကုမ္ပဏီသည် ဖုန်းယွီနှင့် သက်ဆိုင်နေသည်ဆိုပါက သူသည် ထိုစွန့်ဦးတီထွင်လုပ်ငန်းများ ကူညီထောက်ပံ့ရေး အစီအစဉ်ကို စမ်းကြည့်မည်ဟု ရှီတာ့ကျူ ဆုံးဖြတ်လိုက်သည်။ သူသည် Forbesစာရင်းသို့ ပြန်လာလိုသည်။ သူ ရှီတာ့ကျူသည် ဒီလောက် အလွယ်တကူ လက်လျှော့မည် မဟုတ်ပေ။

ကျန်းရွေ့ချန်၏ လက်ထဲတွင်လည်း သတင်းစာတစ်ခု ကိုင်ထားသည်။ ဖုန်းယွီ၏ ပိုင်ဆိုင်မှုသည် ဤမျှ ကြီးမားနေသည်လား။

သူသည် ဖုန်းယွီ၏ ချမ်းသာမှုကို စောစောဆုံး သိခဲ့ရသူများထဲမှ တစ်ဦးဖြစ်သည်။ ထို့အပြင် ဖုန်းယွီကို တရုတ်၏ အချမ်းသာဆုံးအဖြစ် အမြဲ သတ်မှတ်ခဲ့သည်။ တခြားကုမ္ပဏီများသည် အမြတ်အစွန်းရရှိပြီး လုပ်ငန်းလည်း ကြီးမားနိုင်သော်လည်း ဖုန်းယွီ၏ ကုမ္ပဏီများကဲ့သို့ လျင်မြန်စွာ တိုးတက်ပြီး ရေရှည်တည်တံ့သည်ကို တစ်ခါမျှ မမြင်ဖူးပေ။

ဖုန်းယွီတွင် ကုမ္ပဏီတစ်ခုသာ ကျန်ရှိနေရင်တောင် နှစ်အနည်းငယ်အတွင်း တရုတ်၏ ထိပ်ဆုံးသို့ ပြန်ရောက်နိုင်သည်ဟု ကျန်းရွေ့ချန် ထင်ခဲ့သည်။

သို့သော် ဖုန်းယွီသည် ယခုတွင် ကမ္ဘာ၏ ထိပ်ဆုံးသို့ ရောက်နေသည်ဟု သူ လုံးဝ မတွေးခဲ့ဖူးပေ။

ဖုန်းယွီ ကြီးထွားလာသည်ကို သူသည် တစ်ဆင့်ချင်း မြင်ခဲ့ရသည်။ ဖုန်းယွီ၏ တရုတ်ပြည်တွင်း ရင်းနှီးမြှုပ်နှံမှုများကိုလည်း သူ အားလုံးနီးပါး သိရှိသည်။ အီလက်ထရောနစ်၊ လျှပ်စစ်ပစ္စည်း၊ ဆေးဝါး၊ စက်ပစ္စည်း၊ အစားအသောက် စသည်ဖြင့် ဤကုမ္ပဏီများကို သူ အားလုံး သိသည်။

အသစ်ပေါ်ထွက်လာသော ကုမ္ပဏီများတွင် ထိုက်ဟွာ သို့မဟုတ် ဖုန်းယွီ အမည် ပါရှိပါက ၉၉ ရာခိုင်နှုန်းမှာ ဖုန်းယွီ၏ ကုမ္ပဏီများဖြစ်ပြီး တိုးတက်မှုနှုန်းမှာ အလွန်လျင်မြန်သည်။

ဖုန်းယွီ၏ ရေခဲမြို့တွင် ရင်းနှီးမြှုပ်နှံမှုများသည်ပင် ဖုန်းယွီကို တရုတ်၏ ထိပ်ဆုံးတွင် ရပ်တည်နိုင်စေရန် လုံလောက်နေပြီ။

ဒါကြောင့် ဒီကောင်လေးက ပိုက်ဆံလှူတဲ့အခါ လက်မနှေးတာကို အံ့ဩစရာ မဟုတ်တော့ပေ။ ထိုကောင်လေး၏ ပိုက်ဆံကို လုံးဝ သုံးလို့ကုန်မည် မဟုတ်ပေ။

ကျန်းရွေ့ချန်သည် ရုတ်တရက် ဖုန်းယွီ၏ အကြံပြုချက်ကို သတိရလိုက်သည်။ ပေတချန်း လုပ်ငန်းစုကြီးနှင့် ထိုက်ဟွာ လယ်ယာထွက်ကုန်ကုမ္ပဏီတို့ ပူးပေါင်းကာ တစ်ဦးချင်း ရှယ်ယာပိုင်ဆိုင်ရန် ဖြစ်သည်။ ထိုအကြံပြုချက်ကို ယခင်က လူအများအပြားက ဖုန်းယွီက နိုင်ငံပိုင်ပစ္စည်းကို အမြတ်ထုတ်သည်ဟု ယူဆကာ ကန့်ကွက်ခဲ့ကြသည်။

သို့သော် ယခုအချိန်တွင် အဆိုပြုပါက မည်သူမျှ ကန့်ကွက်တော့မည် မဟုတ်ပေ။ ပေတချန်း လုပ်ငန်းစုကြီးသည် တခြားသူများ၏ အမြင်တွင် ကြီးမားသော်လည်း ဖုန်းယွီရှေ့တွင်မူ ဘာမှ မဟုတ်တော့ပေ။

ဤကိစ္စကို မနက်ဖြန် အစည်းအဝေးတွင် တင်ပြသင့်ပြီ။

******