တိုးချဲ့ခြင်း

Vol. 28 Ch. 408

ဟန်ရှောင်း၏မျက်လုံးများ တောက်ပသွားသည်။

နဂါးဧကရာဇ်၏လွှမ်းမိုးမှုကြောင့် ဘလက်စတား၏နာမည်သည် ယခုအခါတွင် လူသိများနေပြီဖြစ်သည်။ ကြေးစားလုပ်ငန်းတွင် ဆက်ဆံရေးများ ပိုမိုတည်ဆောက်ခြင်းသည် ငှားရမ်းသည့်အခွင့်အရေးများ ပိုမိုရရှိခြင်း၊ ထို့အပြင် ပိုမိုမြင့်မားသည့် ဆုလာဘ်များကိုပါ ရရှိခြင်းနှင့် တူညီသည်။ ကြေးစားတစ်ဦးဖြစ်လာရန် ရွေးချယ်သူအများစုသည် ငွေကြေးအတွက်သာဖြစ်ပြီး ဤသည်မှာ ပုံမှန်ကြေးစားများအတွက် အလွန်ဆွဲဆောင်မှုရှိသည့်အရာပင်။

“အကယ်၍ ငါ ကြေညာချက်တစ်ခုထုတ်ပြီး အဖွဲ့ဝင်ခေါ်ယူတဲ့အကြောင်း ကြော်ငြာတွေ ပို့မယ်ဆိုရင် အောက်ဆုံးအဆင့်ကြေးစား ထောင်ပေါင်းများစွာ တုံ့ပြန်လာလိမ့်မယ်။ တိုးချဲ့တာက ငါ့အတွက် အခုအကျိုးရှိပေမဲ့ အလျင်လိုဖို့ မလိုပါဘူး။ ငါ့မှာ အုတ်မြစ်တစ်ခုရှိနေပြီ - ငါလုပ်ဖို့ လိုအပ်တာက ဘလက်စတားရဲ့အနေအထားကို ခိုင်မာအောင် လုပ်ဖို့ပဲ။ မြန်မြန်ဆန်ဆန်တိုးချဲ့ဖို့ မလိုဘူး။ တည်ငြိမ်တဲ့တိုးတက်မှုရှိဖို့က ပိုအရေးကြီးတယ်”

အပြင်လူများသည် ယုံကြည်စိတ်ချရသူများ မဟုတ်သလို သူ့၏နာမည်သည် အရေးကြီးဆုံးဖြစ်သည်။ ဟန်ရှောင်း၏ပစ်မှတ်သည် အနာဂတ်ကစားသမားများ ဖြစ်သည်။ သူသည် နောက်ဗားရှင်းစတင်ရန်အတွက်သာ စောင့်ဆိုင်းနေခြင်းဖြစ်ပြီး ထို့နောက်တွင်တော့ သူသည် ကစားသမားထောင်ပေါင်းများစွာကို ခေါ်ယူနိုင်မည်ဖြစ်ကာ သူ၏အရွယ်အစားသည် တပ်ဖွဲ့ကြီး သုံးခု၏အဆင့်သို့ ရောက်ရှိသွားမည်ဖြစ်သည်။ သူ့တွင် လူအင်အားမရှားပါးသည့်အတွက် အလျင်စလို တိုးချဲ့ရန် မလိုအပ်ပေ။

မည်သို့ပင်ဆိုစေကာမူ ဆူနီများသည် အလွန်အရည်အသွေးမြင့်မားသည့် တိုက်ခိုက်ရေးစွမ်းအားပင်။ သူတို့ ကွဲထွက်သွားသည့်အချိန်မှစ၍ သူတို့၏အခြေအနေသည် ပိုမိုဆိုးရွားလာသည့်အတွက် ငွေရှာလိုသည့်ဆန္ဒသည်လည်း ပိုမိုအားကောင်းလာကြသည်။

“ဘယ်နှစ်ယောက် လာချင်တာလဲ” ဟန်ရှောင်းက မေးလိုက်သည်။

“၁၀၀လောက်ပေါ့။ သူတို့ သတင်းကိုမြင်တော့ ငါ့ကို ဆက်သွယ်ပြီး ဘလက်စတားမှာ ဝင်ချင်တဲ့ဆန္ဒကို ပြောပြကြတယ်။ ”

လူတစ်ရာသည် ဆူနီစစ်သည်များအားလုံး၏ တစ်စိတ်တစ်ပိုင်းမျှသာ ဖြစ်သည်။ သူတို့သည် ကွဲအက်ကြယ်စင်ကွင်း အိတ်စ်ပရက်နယူးကို တွေ့သည့်အခါ သူတို့လူမျိုးစု၏ အဆင့် B စူပါဖြစ်သည့် ဟားလပ်စ်သည် ဘလက်စတားတွင် ရှိနေသည်ကို သတိရသွားသည်။ ထို့ကြောင့် တစ်ယောက်က အကြံဥာဏ်ပေးခဲ့ပြီး ဆူနီကြေးစားတစ်ရာခန့်ကို စုစည်းကာ ဟန်ရှောင်းထံ လာရောက်ပူးပေါင်းခဲ့ကြသည်။

“ငါ သူတို့နဲ့ ကိုယ်တိုင်စကားပြောလိုက်မယ်” ဟန်ရှောင်းက ပြောလိုက်သည်။

ဟားလပ်စ်က သူတို့ကို ဆက်သွယ်လိုက်သည်။ ဆက်သွယ်ရေးစက်၏ မျက်နှာပြင်တွင် ရင်းနှီးသည့်မျက်နှာတစ်ခု ပေါ်လာသည်။ သူသည် ဟန်ရှောင်း ယခင်က တွေ့ခဲ့ဖူးသည့် လာဒင်ဖြစ်သည်။ သူသည် ဟန်ရှောင်းကို ပုဂ္ဂိုလ်ရေးအရ သိကျွမ်းသည့်အတွက် ကိုယ်စားလှယ်အဖြစ် ရွေးချယ်ခံရသည်။

“ပြန်တွေ့ရတာ ဝမ်းသာပါတယ် ဘလက်စတား” လာဒင်က ပြောလိုက်သည်။

ဟန်ရှောင်းသည် ခေါင်းညိတ်ပြီး အဓိကအချက်ကို တိုက်ရိုက်ပြောလိုက်သည်။ “မင်းတို့ ငါ့ကြေးစားအဖွဲ့မှာ ဝင်ချင်တာလား”

“ဟုတ်ကဲ့၊ ကျွန်တော်တို့ ပြောချင်တာက ခင်ဗျားနာမည်အောက်မှာ ဘလက်စတားရဲ့မစ်ရှင်တွေကို လုပ်ဆောင်ချင်ပြီး အဲ့ဒါအတွက် ကျွန်တော်တို့ရဲ့ကော်မရှင် ဆယ့်ငါးရာခိုင်နှုန်းကို ပေးဖို့ ဆန္ဒရှိပါတယ်” လာဒင်က ပြောလိုက်သည်။ သူတို့သည် ကော်မရှင်အတွက် သတ်မှတ်ထားသည့်ပမာဏကို ပေးရသော်လည်း ဘလက်စတား၏ အဆက်အသွယ်များဖြင့် ပိုမိုကောင်းမွန်သည့်ဆက်ဆံရေးကို ရရှိမည်ဖြစ်ပြီး ပိုမိုလုံခြုံမည်ဖြစ်သည်။ သူတို့သည် နောက်ဆုံးတွင် ဝင်ငွေပိုမိုရရှိမည်သာ ဖြစ်သည်။

“ဒါဆို ဒါက ပူးပေါင်းတဲ့ နည်းဗျူဟာပဲ”

ဟန်ရှောင်း၏ မျက်လုံးများ လင်းသွားသည်။ သူက အရင်းအမြစ်များကို ထောက်ပံ့ပေးပြီး ဆူနီများက လုပ်အားကို ထောက်ပံ့ပေးကာ နှစ်ဦးစလုံးသည် သူတို့လိုချင်သည်ကို ရနိုင်ကြသည်။

ထို့အပြင် အရာရှိ အဖွဲ့ခေါင်းဆောင်များ ပိုများလေလေ ပိုကောင်းလေလေဖြစ်သည်။ ဤသည်မှာ ကွန်ပျူတာဇာတ်ကောင်အရင်းအမြစ်များပင်။

သဘာဝကျကျပင် ဆူနီများသည် ဟန်ရှောင်း ဘာစဥ်းစားနေသည်ကို မသိကြပေ။ သူတို့၏ရှုထောင့်မှကြည့်လျှင် ဤသဘောတူညီချက်မှ အကျိုးအမြတ်ပိုမိုရရှိကြသည်။ ထို့ကြောင့် ဤအချိန်တွင် ဟားလပ်စ်နှင့် လာဒင်တို့နှစ်ဦးစလုံးသည် ဟန်ရှောင်းကို စိုးရိမ်တကြီးနှင့် ကြည့်နေကြ၏။

ဟန်ရှောင်းသည် စဥ်းစားနေသည့်မျက်နှာထားကို ပြုလုပ်ပြီး ခဏမျှ တိတ်ဆိတ်နေသည်။ ထိုနှစ်ဦး၏ စိုးရိမ်တကြီးမျက်နှာများကို ကြည့်လိုက်ပြီးနောက် လက်နှစ်ချောင်းထောင်လိုက်သည်။ “ငါက ရာခိုင်နှုန်း နှစ်ဆယ်လိုချင်တယ်”

ဟန်ရှောင်းသည် သူ၏ သတ်မှတ်ချက်ကို ပြောလိုက်သောအခါ လာဒင်သည် သက်ပြင်းချလိုက်ပြီး သဘောတူလိုက်သည်။ ဆွေးနွေးမှုအချို့အပြီးတွင် သူတို့သည် ပူးပေါင်းဆောင်ရွက်မှုအစီအစဥ်များကို ဆုံးဖြတ်ခဲ့ကြသည်။ ဤ ဆူနီကြေးစားတစ်ရာခန့်သည် ဘလက်စတားတွင် ပူးပေါင်းပြီး သူတို့ကိုယ်ပိုင်အဖွဲ့တစ်ခုကို ဖွဲ့စည်းလိုက်ကြသည်။

ကြေးစားအဖွဲ့ မျက်နှာပြင်တွင် လျှောက်လွှာတင်သည့်တောင်းဆိုချက်တစ်ခု ပေါ်လာသည်။ မကြာမီတွင် အဖွဲ့ဝင်စာရင်းတွင် နာမည်တစ်ရာခန့် ထပ်မံပေါ်လာသည်။ ဟန်ရှောင်းသည် သူတို့ကို တစ်ဦးချင်းစီ ကြည့်လိုက်သည်။ ဤ ဆူနီများသည် အတွေ့အကြုံရှိပြီးသား ကြေးစားများဖြစ်ပြီး မစ်ရှင်မှတ်တမ်းများစွာ ရှိကြသည်။

“ဒီ ဆူနီကြေးစားတွေက အတော်လေး အရည်အချင်းရှိတယ်။ အခုလို စုပေါင်းပြီးပြီဆိုတော့ ဒါက အတော်ကောင်းတဲ့ အင်အားတစ်ခုပဲ”

သူ့စိတ်ထဲတွင် ခေါင်းညိတ်လိုက်သည်။ ဤအဖွဲ့သည် ဘလက်စတား၏ ပထမဆုံးတပ်ဖွဲ့ခွဲ၊ ဆူနီတပ်ဖွဲ့ခွဲပင်။ အရည်အချင်းမြင့်ကစားသမားများနှင့် သူကိုယ်တိုင်သည် တိုက်ရိုက်အဖွဲ့ဝင်များဖြစ်သည်။ ကြေးစားအဖွဲ့၏ အရွယ်အစားသည် ချက်ချင်း နှစ်ဆမှ သုံးဆအထိ တိုးလာသည်။

ဆူနီတပ်ဖွဲ့ခွဲသည် ဝန်ထမ်းများကဲ့သို့ဖြစ်ပြီး ဟန်ရှောင်းသည် ငွေကို လက်ခံရရှိရုံသာ လိုသည်။

သူဌေးဖြစ်ရတာက တကယ်ကို ပိုအဆင်ပြေသည်။

အဆက်အသွယ်များနှင့် အရင်းအမြစ်များရှိသည့်အခါတွင် သင့်အတွက် ဆန္ဒအလျောက် လုပ်ကိုင်ပေးလိုသူများ ရှိလာမည်သာဖြစ်သည်။

ဟန်ရှောင်းသည် ဘလက်စတားကြေးစားအဖွဲ့ စာမျက်နှာကို ဖွင့်လိုက်သည်။ ၎င်း၏အချက်အလက်များကို အဆင့်မြှင့်ထားပြီးဖြစ်သည်။

ဘလက်စတားကြေးစားအဖွဲ့

ယုံကြည်စိတ်ချရမှု: ၁၉၈

အဆင့်: အဖွဲ့ဝင် ၁၇၃ ဦး

အဆင့် D: ၄၁

အဆင့် C: ၅၂

အဆင့် B: ၂

ပြီးစီးသည့်ငှားရမ်းမှုများ: ၂

အဓိကလှုပ်ရှားမှုနယ်မြေ: ဂါတွန် နဂါးငွေ့တန်း

မှတ်တမ်းများ:

• [ဆူနီကာကွယ်ရေးတိုက်ပွဲ (ချဲ့ရန်/ပိတ်ရန်)]

• [ဆေးလ်ဗားကယ်ဆယ်ရေးစစ်ဆင်ရေး (ချဲ့ရန်/ပိတ်ရန်)]

ဖန်တီးသူ: ဘလက်စတား– ဟန်ရှောင်း

ဖန်တီးသည့်ရက်စွဲ: ဂလက်ဆီပြက္ခဒိန်နှစ် ၆၈၈၊ အောက်တိုဘာ ၂ ရက်

အနှစ်ချုပ်: အသေးစား-အလတ်စား ကြေးစားအဖွဲ့၊ နာမည်ကောင်းရှိသည်။ ကောင်းကင်ကြိုးဝိုင်း၊ ဓါးသွားများ၊ ခရမ်းရောင်ရွှေနှင့် အခြားကြီးမားသည့်ကြေးစားအဖွဲ့များနှင့် ပူးပေါင်းဆောင်ရွက်မှုရှိသည်။ ဤကြေးစားအဖွဲ့သည် နဂါးဧကရီနှင့် သက်ဆိုင်သည်။

ထင်ထားသလိုပဲ ကြေးစားစစ်သား မဟာမိတ်က ငါက မျောလွင့်နဂါးကျွန်း၏ အဖွဲ့ဝင်တစ်ဦးဆိုတဲ့အကြောင်း အချက်အလက်ထဲမှာ ရေးထားတယ်၊ ဟန်ရှောင်း တွေးမိသည်။ ဤသည်မှာ သူ အချိန်တိုအတွင်း ဖယ်ရှားနိုင်မည်မဟုတ်သည့် အမှတ်တံဆိပ်တစ်ခုဖြစ်သည်။

သတင်းများသည် သူ့အတွက် ကွဲအက်ကြယ်စင်ကွင်း၏နေရာအချို့တွင် နာမည်ကျော်ကြားမှုများစွာကို ရရှိစေခဲ့သည်။ သူ့အဖွဲ့၏ စုစုပေါင်းနာမည်ကျော်ကြားမှုသည် ၆၇ ဖြစ်ပြီး ယခင်ကထက် အဆများစွာ ပိုများသည်။

စုစုပေါင်းသည် နည်းပါးသည့်အရေအတွက်မဟုတ်သော်လည်း တစ်ဦးချင်းရေတွက်သည့်အခါ အခြားကြယ်ဇုန်များရှိ သူ၏နာမည်ကျော်ကြားမှုသည် တစ်မှတ်မှ နှစ်မှတ်သာ ရှိသည်။ နဂါးငွေ့တန်းထဲမှ လူအများစုအတွက် သူတို့သည် ဘလက်စတားအကြောင်းကို ကြားရုံသာကြားဖူးကြသည်။ ကောင်းမွန်သည့်အချက်မှာ အဖွဲ့အင်တာဖေ့စ်သည် စုစုပေါင်းနာမည်ကျော်ကြားမှုကိုသာ ရေတွက်သည်။ အကယ်၍ သူသည် ပုံမှန်နည်းလမ်းဖြင့် ဤအရေအတွက်သို့ ရောက်ရှိလိုပါက ဤနေရာတစ်ခုစီတွင် အနည်းဆုံး ငှားရမ်းမှုတစ်ခုမှ နှစ်ခုအထိ လုပ်ဆောင်ရမည်ဖြစ်သည်။ ဤအခြေအနေသည် သူ့ကို ငှားရမ်းမှု အခုနှစ်ဆယ်မှ သုံးဆယ်အထိ လုပ်ဆောင်ရန်လိုသည့်အခြေအနေမှ ကယ်တင်နိုင်ခဲ့သည်။

ဟန်ရှောင်းသည် လာဒင်နှင့် ခဏတာ စကားပြောပြီး ဆူနီစစ်သည်များကို ဂျူဘာလီ အာကာသစခန်းတွင် စုဝေးရန် ပြောကြားလိုက်သည်။

ဟားလပ်စ်သည် အလွန်ပျော်ရွှင်နေသည်။ သူမြင်သည့်အတိုင်း ဘလက်စတားသည် သူ၏လူများကို လက်ခံရန် ဆန္ဒရှိခြင်းသည် သူတို့၏ခက်ခဲသည့်အချိန်များတွင် အကူအညီပေးခြင်းပင်ဖြစ်သည်။ ဘယ်လောက်တောင် ဖြောင့်မတ်မှန်ကန်လိုက်လဲ။

ဟားလပ်စ်နှင့် လက်စသတ်ပြီးနောက် ဟန်ရှောင်းသည် သူအလွန်ကြာအောင် မဝင်ရောက်ခဲ့သည့် ကစားသမားဖိုရမ်များကို ဖွင့်လိုက်သည်။

ရေတွက်လို့မရသည့် ပို့စ်များ ပေါ်လာသည်။ ဤပို့စ်များ တင်ထားသည့်အချိန်သည် အလွန်တိုသည့်အတွက် ၎င်းသည် အလွန်တက်ကြွသည့် ဖိုရမ်တစ်ခုဖြစ်သည်ကို ဆိုလိုသည်။

သူသည် ခပ်သွက်သွက်ကြည့်လိုက်သည်။ ပစ္စည်းများကြွားခြင်း၊ တစ်ဦးချင်းတိုက်ခိုက်မှုများ ဆွေးနွေးခြင်း၊ ပစ္စည်းများရောင်းချခြင်း၊ အဖွဲ့ဖွဲ့ရန် တောင်းဆိုခြင်း၊ ငြင်းခုံခြင်း၊ ဇာတ်လမ်းများပြောပြခြင်းနှင့် အခြားများစွာသော ပို့စ်များအားလုံး ရှိသည်။

အစောပိုင်းကစားသမားများ၏အသုတ်သည် ဂိမ်းနှင့် ရင်းနှီးပြီးသားဖြစ်သည်။ သူတို့သည် ဇာတ်လမ်းကို ပိုမိုနက်နဲစွာ နားလည်ရန်နှင့် သူတို့၏ကျွမ်းကျင်မှုများကို လေ့ကျင့်ရန် စတင်ခဲ့ကြသည်။ ရေပင်လယ်ဂြိုလ်မှလွဲ၍ အခြားအစဦးဂြိုလ်များ၏ အဓိကဇာတ်ကြောင်းများသည် ဆက်လက်ဖြစ်ပေါ်နေသည်။ အခြားဂြိုလ်များတွင် သူကဲ့သို့ အရာအားလုံးကို ဂြိုလ်မွှေမည့်သူ မရှိသည့်အတွက် သူတို့၏ဂိမ်းအတွေ့အကြုံသည် အလွန်ပုံမှန်ဖြစ်သည်။

ထို့အပြင် ကစားသမားအသစ်များစွာသည် မကြာသေးမီကမှ ဂိမ်းစဆော့ကြသည့်အတွက် အကူအညီတောင်းခံသည့် ဤကစားသမားအသစ်များ၏ ပို့စ်များစွာ ဖိုရမ်များတွင် ရှိသည်။

“ကိုဩဒိနိတ် ဝင်းတားဖရို့စ်ဂြိုလ် အရိုးရေကန်၊ [ဆီးနှင်းနှစ်ခြင်း] ဒန်ဂျင်ကို ကစားရန်အတွက် ပရိုတစ်ဦး လိုအပ်ပါသည်။ စျေးနှုန်းကို ဆွေးနွေးနိုင်သည်” ဤသည် ပေးချေရန်ဆန္ဒရှိသူတစ်ဦးထံမှဖြစ်သည်။

“နောက်ဆုံးသီချင်းဂြိုလ်က ရွာသားတစ်ယောက်ပါ။ ဓါးပြတောင်ကြားကို တိုက်ပေးဖို့ ကူညီပေးပါဦး။ ကျွန်တော် နောက်ဆုံးထိုးနိုင်ပြီး ‘တော်တယ်’ လို့ အော်နိုင်ပါတယ်!” ဤသည်မှာ အပျော်တမ်းကစားသမားတစ်ဦးထံမှဖြစ်သည်။

“ချစ်စရာကောင်းတဲ့အသံ၊ ပျော့ပျောင်းတဲ့ကိုယ်ခန္ဓာ၊ မျက်နှာ ၈/၁၀ မှတ်ရှိတဲ့ မိန်းကလေးတစ်ဦးက အမျိုးသားဆရာတစ်ဦးကို ရှာနေပါတယ်။ တွေးခေါ်တတ်ဖို့၊ ချောမောဖို့၊ နူးညံ့သိမ်မွေ့ဖို့၊ ဂရုစိုက်ဖို့၊ သံလိုက်အသံပိုင်ဆိုင်ဖို့၊ နှစ်သိမ့်မှုပေးရာတွင် အတွေ့အကြုံရှိဖို့ လိုပါတယ်။ အမျိုးသမီးများကို အထင်သေးသူများနှင့် ရုပ်ဆိုးသူများ မလိုပါဘူး။ ကျေးဇူးတင်ပါတယ်” ဤသည် တစ်မူထူးခြားသည်။ အကြောင်းအရာမရှိဘဲ ဤသည်မှာ အွန်လိုင်းချိန်းတွေ့သည့် ပရိုဖိုင်ဟု လူများက ထင်မြင်ကြမည်။

ဟန်ရှောင်းသည် ရေပင်လယ်ဂြိုလ်မှ ထွက်ခွာခဲ့သည်မှာ သုံးလနီးပါး ရှိနေပြီဖြစ်သည်။ ကစားသမားအသစ်များစွာသည် ဂိမ်းတွင် ပူးပေါင်းခဲ့ကြသည်။ ရေပင်လယ်ဂြိုလ်၏ အခြေအနေသည် များစွာမပြောင်းလဲဘဲ ခိုလှုံရေးစခန်း Three သည် ကစားသမားများ၏ ပုံမှန်စုဝေးရာနေရာတစ်ခု ဖြစ်လာခဲ့သည်။

ခိုလှုံရေးစခန်း (၃)၏ နာမည်ရှေ့ရှိ ‘Black Phantom’ ဟူသောအမည်သည် ကစားသမားအသစ်အချို့၏ စူးစမ်းလိုစိတ်ကို နှိုးဆွပေးခဲ့သည်။ သူတို့က ဟန်ရှောင်း မည်သူဖြစ်သည်ကို မေးမြန်းခဲ့ကြသည်၊ ထိုသို့မေးမြန်းစူးစမ်းမှုက ကစားသမားဟောင်းများအတွက် စီနီယာကျမှုကို ကြွားဝါနိုင်သည့် အခွင့်အရေး ဖြစ်သွားသည်။ ကစားသမားဟောင်းများက ဟန်ရှောင်း၏အတိတ်ကို စိတ်လှုပ်ရှားမှုများစွာဖြင့် ရှင်းပြပြီး ကစားသမားအသစ်များကို ဤဒဏ္ဍာရီလာပုဂ္ဂိုလ်ရှိကြောင်း ပြောပြကြသည်။ ဟန်ရှောင်း၏နာမည်သည် ပိုမိုလူသိများလာသည်။

အခု ကစားသမားတွေ ပိုများလာပေမယ့် ငါ့အရင်ဘဝက ဂလက်စီရဲ့ အမြင့်ဆုံးအခြေအနေနဲ့ဆိုရင် အရမ်းကွာခြားနေသေးတယ်… ဘယ်လိုပဲဖြစ်ဖြစ် ဒါက ပထမဆုံးဗားရှင်းပဲ ရှိသေးတာကိုး။ ဒီကစားသမားတွေက ဗားရှင်းအနည်းငယ်ကြာပြီးရင် စီနီယာအကျဆုံးကစားသမားတွေ ဖြစ်လာလိမ့်မယ်။ ဗားရှင်းတွေကို အဆင့်မြှင့်လာတာနဲ့အမျှ ကစားသမားတွေရဲ့ အဆင့်ကန့်သတ်ချက်လည်း မြင့်လာလိမ့်မယ်၊ ပတ်ဝန်းကျင်ကလည်း အန္တရာယ်ပိုများလာမယ်။ ဒါပေမယ့်လည်း ဒါက နှစ်ဖက်သွားဓားလိုပဲ၊ ဘာလို့လဲဆို‌တော့ ကစားသမားတွေရဲ့ အကူအညီနဲ့ ငါအမြဲတမ်းဦးဆောင်နေနိုင်မည်ဆိုရင် စကြဝဠာထဲမှာ ငါ့အနေအထားကို ခိုင်မာအောင် လုပ်နိုင်လိမ့်မယ်… ပြောရလျှင် ဗားရှင်းအဆင့်မြှင့်တင်နေတဲ့အချိန်အတွင်းမှာ အချိန်က တစ်ပြေးတည်းဖြစ်နေမှာမဟုတ်ဘူး၊ ကစားသမားတွေကလည်း ပျောက်ကွယ်သွားမှာ။ တစ်နှစ်ကျော်အတွင်းတွင်မှာ ပထမဆုံးဗားရှင်း အဆင့်မြှင့်တင်မှု ရောက်လာတော့မယ်။

သူ ဖိုရမ်များကို နောက်ဆုံးဝင်ရောက်ခဲ့သည်မှာ အချိန်အတော်ကြာခဲ့ပြီဖြစ်သည်။ သူ၏လက်ရှိလှုပ်ရှားမှုနယ်မြေသည် ကစားသမားများနှင့် လုံးဝကို မသက်ဆိုင်သည့်အတွက် သူသည် ကစားသမားများ၏ အခြေအနေတစ်ခုလုံးကို သိပ်ဂရုမစိုက်ခဲ့ပေ။

ဆန့်ကျင်ဘက်အားဖြင့် ကစားသမားများသည် သူ၏လုပ်ရပ်များကို အလွန်ဂရုစိုက်ကြသည်။ Bun-Hit-Dog ၏ ဗီဒီယိုများသည် နဂါးငွေ့တန်းအကြောင်း သတင်းအချက်အလက်များအတွက် တစ်ခုတည်းသော အရင်းအမြစ်ဖြစ်သည့်အတွက် အပိုင်းတစ်ပိုင်းစီ ထုတ်လွှင့်တိုင်း အလွန်ရေပန်းစားနေသည်။

Bun-Hit-Dog သည် သူ၏ဗီဒီယိုများကို ဇာတ်လမ်းတစ်ခုကဲ့သို့ တည်းဖြတ်သည်။ ပထမဆုံးအပိုင်းမှာ ဂျူဘာလီ အာကာသစခန်းသို့ ရောက်ရှိလာပြီး ကြေးစားအဖွဲ့ဖွဲ့စည်းသည်။ ဒုတိယအပိုင်းမှာ ဆူနီကာကွယ်ရေးတိုက်ပွဲဖြစ်သည်။ နောက်ဆုံးထွက်ရှိသည့် တတိယအပိုင်းမှာ ဘလက်စတား မျောလွင့်နဂါးကျွန်းသို့ ပူးပေါင်းခြင်းဖြစ်သည်။ အမ်ဘာ ပေါ်မလာသေးပေ - ထိုအပိုင်းသည် အဓိကအားဖြင့် တပ်ဖွဲ့ကြီးသုံးခုနှင့် မျောလွင့်နဂါးကျွန်းအကြောင်း မိတ်ဆက်ခြင်း၊ ထို့အပြင် ဆေးလ်ဗား အကျဉ်းသားများကို ကယ်ဆယ်ရန်အတွက် ဆိပ်ကမ်းတွင် ရုန်းရင်းဆန်ခတ်ဖြစ်မှု၊ ထို့နောက်တွင်တော့ မျောလွင့်နဂါးကျွန်းတွင် ပူးပေါင်းပြီး အစောင့်တပ်ဖွဲ့အဖြစ် သူခိုးများကို ဖမ်းမိခဲ့သည့် အရည်အချင်းမြင့် ကစားသမားများအကြောင်းပင်။

ယခင်ထွက်ရှိခဲ့သည့် အပိုင်းနှစ်ပိုင်းနှင့်နှိုင်းယှဥ်လျှင် ဤအပိုင်း၏ရေပန်းစားမှုသည် စံချိန်အသစ်တစ်ခုကို ထပ်မံဖန်တီးခဲ့သည်။ ဟန်ရှောင်းသည် ထိုအပိုင်းကို မကြည့်ရသေးပေ။

သူသည် ဗီဒီယိုကို ဖွင့်လိုက်သည်နှင့် နိဒါန်းပိုင်းကို မှတ်ချက်ပေါင်းများစွာဖြင့် ဖုံးအုပ်ထားသည်။ သူသည် အနီးကပ်ကြည့်လိုက်တော့ ဤမှတ်ချက်များအားလုံးသည် အလွန်ဆင်တူသည်ကို သဘောပေါက်သွားသည်။

“၄၇:၃၅၊ မျက်နှာပြင်တစ်ခုလုံး ခြေထောက်ရှည်ကြီးတွေနဲ့ ဖုံးနေပြီ!”

“အာ့! ကျေးဇူးပြု၍ ကျွန်တော့်ကို လက်ထပ်ပါ၊ နဂါးဧကရီ!”

“အေးမီစ်က ငါ့ဟာ! မင်းရဲ့ဓားကို ထုတ်လိုက်!”

ဟန်ရှောင်း၏ပါးစပ် တွန့်ကွေးသွား၏။ နောက်ဆုံးတော့ သူသည် ဤအပိုင်း ဘာကြောင့် ဒီလောက်ရေပန်းစားသည်ကို နားလည်သွားပြီဖြစ်သည် - ပရိသတ်၏ အနည်းဆုံးတစ်ဝက်လောက်က အေးမီစ်ကို ကြည့်ရန် လာကြခြင်းဖြစ်သည်။