ကောင်းကင်ဒေသအတွက်လား။

Vol. 161 Ch. 2291

"လူတိုင်းပဲ ကြိုဆိုပါတယ်။" ရီဖူရှင်းက ကျယ်လောင်စွာ ပြောလိုက်သည်။ သူ၏ အသံက လေဟာနယ်ကို ဖြတ်သန်းကာ ပဲ့တင်ထပ်သွားသည်။ ကောင်းကင်အာဏာစက်ကျောင်းတော် အပြင်ဘက်မှ ထိပ်သီးအင်အားစုအမျိုးမျိုး၏ ကျင့်ကြံသူများစွာသည် ထိုစကားကို ကြားပြီးနောက် ကျောင်းတော်ထဲသို့ တဖြေးဖြေး ဝင်ရောက်လာကြသည်။ သူတို့က အဓိကခန်းမအတွင်း စုဝေးလာသည်။

ရီဖူရှင်းသည် လူအုပ်ကြီးအား ဝေ့ကြည့်လိုက်သည်။ ရှန်ချင်းနယ်မြေမှ ရင်းနှီးနေသော မျက်နှာများလည်း ပါဝင်သည်။ နယ်မြေသခင်အိမ်တော်မှ ဒုနယ်မြေသခင် ကျိုးမုဟွမ်နှင့် မင်းသမီးကျိုးလင်ရှီးတို့လည်း ရောက်လာကြသည်။

ကျိုးမုဟွမ်က အဓိကခန်းမရှေ့၌ ရပ်နေသည့် ရီဖူရှင်းကို ကြည့်လိုက်သည်။ သူသည် ကံတရား၏ အရူးလုပ်မှုကို ခံလိုက်ရသလို ခံစားမိပေသည်။ အတိတ်တွင် သူက ရှန်ချင်းနယ်မြေသခင်အိမ်တော်၌ အရည်အချင်းရှိ ပါရမီရှင်များကို စုစည်းရာ၌ ရီဖူရှင်းကိုပါ သိမ်းသွင်းရန် ရည်ရွယ်ခဲ့သည်။ သူသည် ရီဖူရှင်းအား နယ်မြေသခင်အိမ်တော်သို့ သိမ်းသွင်းချင်ခဲ့ပြီး သို့မှသာ ရီဖူရှင်းက သူ့အမိန့်အောက်တွင် ရှိနေမည် ဖြစ်သည်။ ထိုအချိန်တွင် ရီဖူရှင်းက ထူးခြားသော အရည်အချင်းရှိသည့် ရန်ဟောင်တစ်ပါးမျှသာ ဖြစ်သည်။

သို့သော် လက်ရှိအခြေအနေကို ဆုံးဖြတ်ရလျှင် ရီဖူရှင်း၏ အဆင့်အတန်းသည် ယခု သူ၏ ရှန်ချင်းနယ်မြေသခင်အိမ်တော်မှ ဒုနယ်မြေသခင်ဟူသည့် အဆင့်အတန်းထက် နည်းနည်းမှ နိမ့်ကျနေခြင်း မရှိတော့ပေ။

ထို့ပြင် ရီဖူရှင်းက သူ့ထက်ပင် ပို၍ မြင့်မားနေပေသည်။

အဆုံးမှာတော့ နယ်မြေသခင်အိမ်တော်၏ လက်အောက်၌ တိုက်ရိုက်အမိန့်ပေးနိုင်သော အင်အားစုတစ်ခုသာ ရှိသည်။ အခြားတစ်ဖက်တွင် ရီဖူရှင်း ဦးဆောင်သည့် ကောင်းကင်အာဏာစက်ကျောင်းတော်သည် မူလဘုံမှ အင်အားစုများအားလုံးကို ထိန်းချုပ်ထားနိုင်ခဲ့သည်။ စီဝေ့ကြယ်ကမ္ဘာသည်လည်း သူ့အမိန့်အောက်၌ ရှိနေခဲ့သည်။ ထို့ပြင် လေးမျက်နှာကျေးရွာမှ ကျင့်ကြံသူများအားလုံးကလည်း သူ့နောက်မှ လိုက်ရန် ဆန္ဒရှိကြပေသည်။ ထိုအင်အားစုများအားလုံးကို ပေါင်းစည်းလိုက်လျှင် ရီဖူရှင်းက အစွမ်းထက်သော အင်အားစုကြီးတစ်ခုကို ဦးဆောင်သူဖြစ်လာမည်မှာ သိသာပေသည်။

ထို့ပြင် ရီဖူရှင်းထံ၌ ထို လျှို့ဝှက်ဆန်းကြယ်သော ဆရာသခင်၏ ထောက်ပံ့ကူညီပေးမှုလည်း ရှိနေသေးသည်။ ထို့ကြောင့် ရီဖူရှင်း၏ လက်ရှိ အဆင့်အတန်းက ကျိုးမုဟွမ်၏ အထက်၌ ရှိနေပေသည်။ ကျိုးမုဟွမ်က ကောင်းကင်အာဏာစက်ကျောင်းတော်သို့ ရောက်လာသောအခါ သူသည် ဂုဏ်ပြုစကားပြောရန် အခွင့်အရေးမရခင်တွင် အိမ်ရှင်၏ ခွင့်ပြုချက်အား စောင့်ဆိုင်းရန် လိုအပ်ပေသည်။

သူ့အပြင် ကောင်းကင်ဒေသမှ အင်အားစုများစွာလည်း ဤတစ်ကြိမ် ကျောင်းတော်သို့ ဝင်ရောက်ရန် ရီဖူရှင်း၏ ခွင့်ပြုချက်အား စောင့်ဆိုင်းရန် လိုအပ်သည်။ ဖိတ်ခေါ်ချက်မရှိဘဲ မည်သူကမှ ထိုနေရာကို ကျူးကျော်ရန် မဝံ့ရဲကြပေ။

သိပ်မကြာသေးခင်က ရီဖူရှင်းနှင့် သူ၏ အဖွဲ့က မော့ခယ်နှင့် ကလန်၏ မဟာအကြီးအကဲအပါအဝင် နတ်ဆိုးတိမ်လွှာကလန်မှ ကျင့်ကြံသူများစွာကို သတ်ဖြတ်ခဲ့သည်။ ရှန်ချင်းနယ်မြေသခင်အိမ်တော်၏ အုပ်ချုပ်သူ ကျိုးမုဟွမ်သည်ပင် ဤကိစ္စနှင့် ပတ်သတ်ပြီး မှတ်ချက်မချရဲခဲ့ပေ။ ယခု ကောင်းကင်ဒေသ၏ မည်သူကမှ ရီဖူရှင်းကို အထက်စီးမှ မဆက်ဆံရဲကြတော့ချေ။

ထို့ကြောင့် ရီဖူရှင်း၏ ကိုယ်ရေးကိုယ်တာ ရန်ငြိုးကို စွက်ဖက်ရဲရန်မှာ ဝေးစွပင်။ အပြင်လူများသည် မျက်မမြင်ထျယ်နှင့် နတ်ဆိုးတိမ်လွှာကလန်ကြားမှ ရန်ငြိုးများအကြောင်း မသိကြပေ။

"ခင်ဗျားတို့အားလုံး အဝေးကြီးကနေ ကောင်းကင်အာဏာစက်ကျောင်းတော်ကို လာခဲ့ရတာ။ စောစော မကြိုဆိုမိတဲ့အတွက် ကျုပ်ကို ခွင့်လွှတ်ပေးကြပါ။" ရီဖူရှင်းက အနည်းငယ် အရိုအသေပေးပြီး ပြောလိုက်သည်။ သူက ယဥ်ကျေးကာ နှိမ့်ချစွာ ပြောဆိုခဲ့သည်။ သို့သော် သူ၏ နှိမ့်ချလှသော စကားပြောဆိုမှုက လူအများကို အလှမ်းကွာသွားသလို ခံစားမိစေရန် ပြုလုပ်နေသည်။

ကျိုးမုဟွမ် ဘေးတွင် ရပ်နေသည့် ကျိုးလင်ရှီးသည် စိတ်ထဲမှ ဝမ်းနည်းသွားမိသည်။ ယခင်က နယ်မြေသခင်အိမ်တော်သည် သူမကို အသုံးပြုကာ ရီဖူရှင်းကို ထိန်းသိမ်းထားရန် ရည်ရွယ်ခဲ့သည်။ သို့သော် သူက သူမအပေါ် အနည်းငယ်မျှ စိတ်ဝင်စားမှု မပြသခဲ့ပေ။ နယ်မြေသခင်အိမ်တော်က ပို၍ ရိုးသားစွာဖြင့် ရီဖူရှင်းနှင့် မိတ်ဆွေဖြစ်စေရန် ကြိုးစားခဲ့လျှင် သူတို့သည် အနည်းဆုံး ယခုအချိန်၌ သူနှင့် ကောင်းမွန်သည့် ဆက်ဆံရေး ရှိနေပေလိမ့်မည်။

သို့ဆိုလျှင် သူတို့အိမ်တော်အတွက် ကြယ်ကောင်းကင် ကျင့်ကြံရေးနယ်မြေ၌ ကျင့်ကြံရန်မှာ ပြဿနာတစ်ခု ဖြစ်လိမ့်မည် မဟုတ်ပေ။ ရှေးဟောင်းတော်ဝင် သွမ့်မိသားစုသည် ထိုနေရာ၌ အစောပိုင်းကတည်းက ကျင့်ကြံနေခဲ့ပြီ ဖြစ်သည်။

"ရန်ဟောင်ရီ ယဥ်ကျေးလွန်းနေပါပြီ။ ကျုပ်တို့က မျက်နှာပေးဖို့အတွက် လာတောင်းဆိုကြည့်တာပါ။" ထိပ်သီးပုဂ္ဂိုလ်တစ်ယောက်က ပြောလိုက်သည်။ ရီဖူရှင်းအပေါ်ထားသည့် သူတို့၏ သဘောထားက အပြည့်အဝ ပြောင်းလဲသွားသည်။ ထိပ်သီးအဆင့် ပုဂ္ဂိုလ်ကြီးများသည်ပင် ယဥ်ကျေးစွာ ပြောဆိုရပြီး ရိုင်းစိုင်းစွာ မပြုမူရဲကြပေ။ အဆုံးမှာတော့ ယခု ရီဖူရှင်းသည် ထိုထိပ်သီးအဆင့် ပုဂ္ဂိုလ်ကြီးများ ရှင်မလားသေမလား ဆုံးဖြတ်နိုင်သည့် စွမ်းအားကို ပိုင်ဆိုင်ထားပေသည်။

"အိုး" ရီဖူရှင်းက မျက်ခုံးအနည်းငယ်ပင့်ရင်း မေးလိုက်သည်။ "စီနီယာက ဘာကို ပြောချင်တာများလဲ။"

သူက သိသာနေသည့် မေးခွန်းကို ရှင်းလင်းစွာ ထပ်မေးခဲ့သည်။

လူတိုင်းသည် ရီဖူရှင်းက သူတို့ ဤနေရာသို့ ရောက်လာရသည့် ရည်ရွယ်ချက်ကို ကောင်းစွာ သတိပြုမိကြောင်း သိရှိကြသည်။

"ကျုပ်တို့က ကြယ်ကောင်းကင်ကျင့်ကြံရေးနယ်မြေမှာ ကျင့်ကြံချင်လို့ ခွင့်ပြုပေးဖို့ မျှော်လင့်ပါတယ်။ ထိပ်သီးပုဂ္ဂိုလ်တစ်ယောက်က ပြောလိုက်သည်။ "အခု ရန်ဟောင်ရီက ကြယ်ကောင်းကင်ကျင့်ကြံရေးနယ်မြေကို ထိန်းချုပ်ထားပြီး မဟာအင်ပါယာရဲ့ စွမ်းအားတွေကို ငှားသုံးနိုင်တယ်။ ခင်ဗျားသာ ကောင်းကင်ဒေသက အင်အားစုတွေကို အဲဒီမှာ ကျင့်ကြံခွင့်ပြုခဲ့ရင် ကောင်းကင်ဒေသ တစ်ခုလုံးရဲ့ စွမ်းအားကို မြှင့်တင်နိုင်လိမ့်မယ်။ ခင်ဗျားရဲ့ ထောက်ပံ့မှုက အရေးပါပါတယ်။ ကျုပ်တို့က ကြယ်ကောင်းကင် ကျင့်ကြံရေးနယ်မြေကို အလကားအသုံးပြုမှာ မဟုတ်ပါဘူး။ အဲဒါနဲ့ တူညီတဲ့ အဖိုးအခကို ပြန်ပေးမှာပါ။ ရန်ဟောင်ရီက အဖိုးအခကို သတ်မှတ်နိုင်ပါတယ်။ ဘယ်လိုလဲ။"

ရီဖူရှင်းက ပြုံးကာ တစ်ဖက်လူကို မေးလိုက်သည်။ "စီနီယာ၊ စီနီယာတို့ ကလန်ရဲ့ ကျင့်ကြံခြင်းသန့်စင်မြင့်မြတ်နယ်မြေကို တခြားလူတွေအတွက် ဖွင့်ပေးဖူးလား။ ဒါမှမဟုတ် ပြင်ပလောကနဲ့ ကောင်းကင်ဒေသရဲ့ တခြားကျင့်ကြံသူတွေက စီနီယာတို့ကို ဖိအားပေးဖူးလား။ အဲဒီ တခြားအင်အားစုက လူတွေလည်း အဲဒီလို အဖိုးအခမျိုး ပေးဖို့ ဆန္ဒရှိမယ်ဆိုတာ သေချာပါတယ်။"

လက်ရှိတွင် ကြယ်ကောင်းကင် ကျင့်ကြံရေးက သူ့ ထိန်းချုပ်မှုအောက်၌ ရှိနေခဲ့သည်။ ထိုနေရာက သူ၏ ကိုယ်ပိုင် သန့်စင်မြင့်မြတ်နယ်မြေဟု သတ်မှတ်နိုင်ပေသည်။ သူက အခြားသူများ ကျင့်ကြံရန် မည်သို့ ခွင့်ပြုနိုင်ပါမည်နည်း။

ရီဖူရှင်းက ထိုမျှ ကိုယ်ကျိုးမငဲ့သော သူမျိုး မဟုတ်ပေ။

သူသည် ကောင်းကင်အာဏာစက်ကျောင်းတော်၏ တိုက်ပွဲအတွင်း ကြယ်ကောင်းကင် ကျင့်ကြံရေးနယ်မြေအား အသုံးပြုရန် အင်အားစုအားလုံးကို အသုံးပြုခဲ့သည်။ တိုက်ပွဲတွင် ပါဝင်ပြီး ကောင်းကင်အာဏာစက်ကျောင်းတော်အတွက် တိုက်ခိုက်ပေးရန် ဆန္ဒရှိသည့် အင်အားစုတိုင်း ကြယ်ကောင်းကင်၌ အချိန်မရွေး ကျင့်ကြံနိုင်ရန် ခွင့်ပြုလိမ့်မည် ဖြစ်သည်။ သို့သော် အဓိကအင်အားစုထဲရှိ မည်သူမှ သူတို့အတွက် ရပ်တည်ရန် ဆန္ဒမရှိခဲ့ကြပေ။ သို့သော်လည်း သူတို့သည် ကြယ်ကောင်းကင်ကျင့်ကြံရေးနယ်မြေကို လောဘတကြီး မျက်စိကျနေသေးသည်။ သူတို့အားလုံးက မြေနိမ့်ရာလှံစိုက်ချင်ကြသူများ ဖြစ်သည်။ သူ့ကို သတ်၍ ကောင်းကင်အာဏာစက်ကျောင်းတော်ကို ဖျက်ဆီးခြင်းက သူတို့ကို စီဝေ့မဟာအင်ပါယာနှင့် ကြယ်ကောင်းကင် ကျင့်ကြံရေးနယ်မြေအား သူတို့ ရရှိပိုင်ဆိုင် လာပေလိမ့်မည်။

ယခု ထိုအခြေအနေက ပြောင်းလဲသွားပြီး သူတို့က ဤကြယ်ကောင်းကင် ကျင့်ကြံရေးနယ်မြေ၌ ကျင့်ကြံရန် အခွင့်အရေးကို လိုချင်နေကြသည်။ ဤသည်က အလွန် လွယ်ကူလွန်းနေသည်မဟုတ်ပါလား။

ထိပ်သီးအဆင့် ပုဂ္ဂိုလ်က ဆက်ပြောလိုက်သည်။ "ရန်ဟောင်ရီက ဘယ်နေရာက လာတယ်ဆိုတာ နားလည်ပါတယ်။ ဒါက တကယ့်ကို တောင်းဆိုချက်ကြီး ဖြစ်နေမှာပဲ။ ကျုပ်တို့အားလုံးက ကောင်းကင်ဒေသရဲ့ အစိတ်အပိုင်းတွေချည်းပဲ။ အခု အရှုပ်အထွေးတွေက နေရာအနှံ့မှာ ဖြစ်နေပြီး ကောင်းကင်ဒေသက အင်အားစုတွေရဲ့ စွမ်းရည်ကို မြှင့်တင်နိုင်တာက ပြင်ပက ကျူးကျော်လာတဲ့ အင်အားစုတွေကို ရင်ဆိုင်နိုင်လိမ့်မယ်။ ဒါဆို ရန်ဟောင်ရီက အကြီးမားဆုံး အထောက်အပံ့လုပ်ပေးခဲ့တယ်လို့ သတ်မှတ်လို့ရတယ်။ ပြီးတော့လည်း ကျုပ်တို့အားလုံးက ဒီကိစ္စအတွက်နဲ့ မြင့်မားတဲ့ အဖိုးအခကို ပေးအပ်ဖို့ ဆန္ဒရှိကြပါတယ်။" အခြားသူများကလည်း ခေါင်းညိတ်ကာ သဘောတူလိုက်ကြသည်။

"အနာဂတ်မှာ ရန်ဟောင်ရီက အကူအညီတစ်ခုခု လိုအပ်ရင် အမိန့်ပေးလိုက်ရုံနဲ့ ရပါတယ်။ ကောင်းကင်ဒေသမှာ ရှိတဲ့ အင်အားစုတွေက အကူအညီပေးဖို့ ဆန္ဒရှိကြမှာ အသေအချာပဲ။ အဲဒါက ပြည့်စုံမနေဘူးလား။" တစ်စုံတစ်ယောက်က ထပ်ပေါင်း ပြောလိုက်ကာ ထိုသို့သော ကိစ္စမျိုးကိုပင် ကတိပြုလာသည်။

သို့သော် ထိုကဲ့သို့သော အချိန်မျိုး အမှန်တကယ် ရောက်လာခဲ့လျှင် တစ်ဖက်လူက သူတို့၏ အကူအညီကို ပေးအပ်လိမ့်မလားဆိုသည်မှာ မရှင်းလင်းပေ။

ရီဖူရှင်းက ပြုံးလိုက်သည်။ သူတို့က ကောင်းကင်ဒေသ ကောင်းကျိုးအတွက်ဟူသော အကြောင်းပြချက်နှင့် သူ့ကို ဖိအားပေးရန် ကြိုးစားနေသည်လား။

"ကောင်းပြီလေ။" ရီဖူရှင်းက ပြန်ဖြေလိုက်သည်။ သူက ထိုအကြောင်းကို တွေးမိသည့်အခါ အမှန်တကယ် ခေါင်းညိတ်၍ သဘောတူခဲ့သည်။ ဤသည်မှာ အားလုံးသော ကျင့်ကြံသူများကို အံ့သြမှင်တက်သွားစေသည်။ သူတို့ထဲမှ အချို့က ရီဖူရှင်းကို သံသယအကြည့်များ ပေးလိုက်သည်။ ရီဖူရှင်းက သဘောတူလိုက်သည်မှာ အလွန် လွယ်ကူလွန်းနေသည်။ ထိုသည်မှာ သူတို့၏ မူလရည်ရွယ်ချက် ဖြစ်သော်လည်း သူတို့သည် ရီဖူရှင်းက အလွယ်တကူ သဘောတူလိမ့်မည်ဟု မည်သည့်အခါကမှ တွေးထင်ထားခဲ့ခြင်း မရှိပေ။

ကိစ္စများက သူတို့ ထင်ထားသကဲ့သို့ မဟုတ်တော့ချေ။

မျှော်လင့်ထားသလိုပင် ရီဖူရှင်းက သူတို့ကို အပြုံးနှင့် ကြည့်ကာ ပြောလိုက်သည်။ "လူတိုင်းက ဒါကို တောင်းဆိုနေမှတော့ ကျုပ်က အကြံဉာဏ်ကို ကန့်ကွက်ဖို့ ဆန္ဒမရှိတော့ပါဘူး။ အရာအားလုံးက ကောင်းကင်ဒေသအတွက်ပဲလေ။ ဒါပေမယ့် မူလဘုံကလည်း ကောင်းကင်ဒေသရဲ့ တစ်စိတ်တစ်ပိုင်းပဲ။ လူတိုင်းမှာ တူညီတဲ့ ရည်မှန်းချက်ရှိတယ်ဆိုမှတော့ အခုတလော ဘာတွေဖြစ်နေလဲဆိုတာ လူတိုင်းကြားမယ်လို့ ထင်ပါတယ်။ မှော်နက်လောကရဲ့ အင်အားစုတစ်ခုက မူလဘုံမှာ အစုလိုက်အပြုံလိုက် သတ်ဖြတ်တာတွေ ကျူးလွန်နေတယ်။ သူတို့က လုံးဝ လူမဆန်ကြဘူး။ ဒါကြောင့် ကျုပ် မူလဘုံကနေ မှော်နက်လောကက လူတွေကို မောင်းထုတ်ဖို့ ဆုံးဖြတ်ထားတယ်။ စီနီယာတို့ ကျုပ်နဲ့ လိုက်ပြီး မှော်နက်လောကကို ဆန့်ကျင်တိုက်ခိုက်ဖို့ ဆန္ဒရှိကြလား။"

ရီဖူရှင်းက ပြောလိုက်ပြီးနောက် သူက လူအုပ်ကြီးကို ဝေ့ကြည့်ကာ နိဂုံးချုပ်လိုက်သည်။ "ဒါကလည်း ကောင်းကင်ဒေသကြီးရဲ့ ကောင်းကျိုးအတွက်ပါပဲ။"

ရီဖူရှင်း၏ စကားများကို ကြားသောအခါ ကျင့်ကြံသူများက အံ့သြမှင်တက်သွားခဲ့သည်။ ထို့နောက် သူတို့အားလုံးက တိတ်ဆိတ်သွားခဲ့၏။ ကောင်းကင်ဒေသ၏ ကောင်းကျိုးအတွက်လား။

သူတို့သည် သေချာပေါက် မှန်ကန်ခြင်းမရှိဘဲ ကိုယ့်အကျိုးအတွက် ကိုယ် လုပ်ဆောင်နေကြခြင်း ဖြစ်သည်။

မှော်နက်လောကမှ အင်အားစုများက အလွန် အစွမ်းထက်လှသည်။ လက်ရှိတွင် မှော်နက်လောကမှ ပို၍များပြားသော ထိပ်သီးကျင့်ကြံသူများက မူလဘုံသို့ ရောက်ရှိလာကြပေသည်။ ကျင့်ကြံသူများက သူတို့ကို ချက်ချင်း စစ်ကြေညာလိုက်လျှင် ၎င်းသည် သေခြင်းရှင်ခြင်း တိုက်ပွဲ ဖြစ်လာပေလိမ့်မည်။ ၎င်းက မြင့်မားလှသည့် တန်ကြေးကို ပေးအပ်ရလိမ့်မည် ဖြစ်သည်။ ထိုတန်ကြေးက သူတို့၏ အသက်ပင် ဖြစ်နိုင်သည်။

ထို့ကြောင့် မည်သူကမှ အလွယ်တကူ သဘောမတူရဲကြပေ။ အဆုံးမှာတော့ သူတို့သည် နောက်ဆုံးတိုက်ပွဲ၌ မှော်နက်စစ်တပ်က ရီဖူရှင်းအား သတိထားနေကြောင်း သိရှိကြသည်။ အကယ်၍ ကောင်းကင်ဒေသမှ အင်အားစုများက အစပျိုးကာ စစ်ကြေညာခဲ့လျှင် မှော်နက်လောကမှ ကျင့်ကြံသူများက သူတို့ကို အရင် ရင်ဆိုင်ပေလိမ့်မည်။