စတင်ပွဲထွက်ခြင်း

"နိုင်ငံတကာ ပြိုင်ပွဲ စတင်တော့မှာ ဖြစ်ပါတယ်။ ဒီနေ့မှာ ကပ္ပတိန်အချို့နဲ့ ပြိုင်ပွဲဝင်တွေကို ရိုးရှင်းတဲ့ ပြိုင်ပွဲမတိုင်မီ အင်တာဗျူးတစ်ခုအတွက် ဖိတ်ခေါ်ထားပါတယ်ခင်ဗျာ။"

ဗီဒီယိုရိုက်ကူးသည့် နေရာမှာ ဂျူဘာလီ အာကာသစခန်းရှိ ဟန်ရှောင်း၏ ခံတပ်ဖြစ်သည်။ ပရော်ဖက်ရှင်နယ် ကစားသမား လေးဦးသည် ဆိုဖာပေါ်တွင် ထိုင်ကာ Bun-Hit-Dog ၏ အင်တာဗျူးကို လက်ခံခဲ့ကြသည်။ ၎င်းတို့လေးဦးမှာ ရေတပ်ဗိုလ်ချုပ်ကြီး၊ ဟောက်ထျန်း၊ လီကဲနှင့် ဓါးရူးတို့ဖြစ်ပြီး အရည်အချင်းပြည့်မီသော အသင်းများ၏ ကပ္ပတိန်များ သို့မဟုတ် တစ်ကိုယ်တော် ပြိုင်ပွဲဝင်များ ဖြစ်ကြသည်။ တစ်ကိုယ်တော် ပြိုင်ပွဲတွင် ဒုတိယရရှိခဲ့သည့် နှင်းပန်းသည် ဟန်ရှောင်း၏ နဂါးငွေ့တန်းအဖွဲ့သို့ မဝင်ရောက်သေးဘဲ ရေပင်လယ်ဂြိုလ်ပေါ်တွင် ရှိနေသေးသဖြင့် အင်တာဗျူးတွင် ပါဝင်ခဲ့ခြင်းမရှိပေ။

၎င်းတို့လေးဦးသည် ပရိသတ်ကို နှုတ်ဆက်ပြီးနောက် ပုံမှန် အင်တာဗျူး စတင်ခဲ့သည်။ Bun-Hit-Dog သည် သူ၏ ပုံမှန်ဟန်နှင့် မတူဘဲ ဂလက်ဆီ သတင်း၏ အစီအစဉ်မှူး ဖြစ်သွားသကဲ့သို့ ထိုင်ခုံတွင် မတ်မတ်ထိုင်ကာ မျက်နှာသည် အလွန်တည်ကြည်နေသည်။ သို့သော် သူ၏ လုပ်ဆောင်ချက်များသည် မည်မျှပင် တရားဝင်ဟန်ဆောင်နေပါစေ သူ၏ ခပ်မိုက်မိုက် စရိုက်ကို ဖုံးကွယ်၍ မရနိုင်ပေ။

အင်တာဗျူးမှ မေးခွန်းများအားလုံးသည် ပုံမှန်မေးခွန်းများသာဖြစ်ပြီး သူတို့၏ ယုံကြည်မှု၊ ပြင်ဆင်မှုများနှင့် ပန်းတိုင်များကို မေးမြန်းခြင်းဖြစ်သည်။ သူတို့သည် သာမန်မေးခွန်းများသာ ဖြစ်သည်။

ယုံကြည်မှုရှိ၊ မရှိ မေးသောအခါ၊ ဤမျှကြီးမားသော ပရိသတ်ရှေ့တွင် မည်သူက 'မရှိ' ဟု ပြောဝံ့မည်နည်း။ မင်းကလပ်ကို ပိတ်ပစ်ချင်နေတာလား။

သူတို့ မည်သို့ ပြင်ဆင်ခဲ့ကြသနည်း။ မည်သူက ထိုသို့ လျှို့ဝှက်အချက်အလက်များကို တိုက်ရိုက် ဖော်ထုတ်မည်နည်း။ ပြိုင်ဘက်များ မြင်ပါက သူတို့ ခံရမည့် ဆူပူခြင်းမှာ အဆုံးသတ်မည် မဟုတ်ပေ။

မည်သည့်အရာက ပြိုင်ပွဲ၏ ပန်းတိုင်လဲ။ မည်သည့်ကလပ်က ချန်ပီယံ မဖြစ်ချင်ဘူးဟု ပြောမည်နည်း။ သူတို့၏ ပန်းတိုင်မှာ ထိပ်ဆုံးလေးသင်း သို့မဟုတ် ထိပ်ဆုံးရှစ်သင်းသာ ဖြစ်သော်လည်း ထိုအကြောင်းကို ပွင့်ပွင့်လင်းလင်း မည်သို့ ပြောနိုင်မည်နည်း။ ပရော်ဖက်ရှင်နယ် ကစားသမားများအားလုံးသည် ချန်ပီယံ ဖြစ်ချင်ကြသည်။

ပရော်ဖက်ရှင်နယ် ကစားသမားလေးဦးသည် ဤမေးခွန်းများကို ပုံမှန်တုံ့ပြန်မှုများဖြင့် အလွယ်တကူ ဖြေဆိုခဲ့ကြသည်။ ဤမေးခွန်းများ ပြီးဆုံးသောအခါ Bun-Hit-Dog သည် ၎င်းတို့လေးဦးနှင့် ပေါ့ပေါ့ပါးပါး စကားစမြည် စတင်ပြောဆိုသည်။ ဤကဲ့သို့သော တရားမဝင် အင်တာဗျူးမျိုးတွင် ခေါင်းစဉ်သည် ပိုမို ပေါ့ပေါ့ပါးပါး ဖြစ်နိုင်သည်။ Bun-Hit-Dog က သူတို့အား အတော်ကောင်းသော နိုင်ငံခြားကစားသမားများအချို့ကို မှတ်ချက်ပေးရန် ပြောဆိုခဲ့ပြီး လေထုမှာ အတော်လေး ငြိမ်းချမ်းနေသည်။

"ဒီပြိုင်ပွဲမှာ ခင်ဗျားတို့ အာရုံစိုက်ဖို့ လိုအပ်တဲ့ ခက်ထန်တဲ့ ပြိုင်ဘက်တွေက ဘယ်သူတွေလို့ ထင်ပါသလဲ" Bun-Hit-Dog က မေးလိုက်သည်။

လီကဲသည် စဉ်းစားပြီး "ပြင်သစ်က ကျူးလစ်ကလပ်၊ အမေရိကန်က နတ်ဆိုးအသင်း၊ မိုးကြိုးမြွေအသင်းနဲ့ သော့ချက်အသင်း၊ ယူကေက နှင်းဆီစစ်သည်၊ ဂျပန်က ဟိုက်ဒရာအသင်း၊ ကိုရီးယားက ကင်မ်ချီကလပ် စသည်ဖြင့်ပေါ့။ ကျွန်တော် ဒီအသင်းတွေနဲ့ ကစားသမားတွေနဲ့ တိုက်ခိုက်ရဖို့ မျှော်လင့်နေပါတယ်။ ပြိုင်ဘက်တွေက အရမ်းအားကောင်းပေမဲ့ ကျွန်တော့်မှာ ယုံကြည်မှုရှိပါတယ်"

ထိုအသင်းများအားလုံးသည် ၎င်းတို့၏ သက်ဆိုင်ရာနိုင်ငံများရှိ ထိပ်တန်းအသင်းများဖြစ်ကြသည်။ ၎င်းတို့၏ နိုင်ငံများရှိ အဆင့်အတန်းမှာ တရုတ်နိုင်ငံရှိ အကြီးဆုံး ကလပ်လေးခု၏ အဆင့်အတန်းနှင့် အတူတူပင်ဖြစ်သည်။

Bun-Hit-Dog က ခေါင်းညိတ်ပြီး ကျန်သုံးဦးကို ကြည့်ကာ မေးလိုက်သည်။ "ခင်ဗျားတို့ကော? ဘယ်သူတွေကို ပိုပြီး အလေးအနက်ထားဖို့ လိုအပ်ပါသလဲ"

"ဘယ်သူမှ မရှိဘူး" ဟု ရေတပ်ဗိုလ်ချုပ်ကြီးက ပြောလိုက်သည်။

"ကျွန်တော့်ရဲ့ ပြိုင်ဘက်က ကျွန်တော်ကိုယ်တိုင်ပဲ" ဟောက်ထျန်းက ဆိုသည်။

ဓါးရူးသည် သူ၏ ဘေးရှိ ယုံကြည်ချက်ရှိပြီး မာနကြီးသော နတ်ဘုရားကစားသမားများကို ဘယ်ညာကြည့်ကာ တံတွေးမျိုချပြီး သတိကြီးစွာဖြင့် "ကျွန်တော်... ကျွန်တော် လီကဲပြောတာ ကောင်းတယ်လို့ ထင်ပါတယ်..."

ဟောက်ထျန်းနှင့် ရေတပ်ဗိုလ်ချုပ်ကြီးတို့သည် သူ့ကို 'ငယ်ပါသေးတယ်၊ အရမ်းရိုးသားလွန်းတယ်' နှင့် 'မင်းကို ဒီထက် ပိုကောင်းမယ်လို့ မျှော်လင့်ခဲ့တာ' ဟူသော အကြည့်များဖြင့် ကြည့်လိုက်ကြသည်။ ဓါးရူးသည် ထိုအကြည့်များကြောင့် လည်ပင်းကို ကျုံ့လိုက်သည်။

လီကဲသည် အလွန်တင်းမာသော အပြုံးတစ်ခု ပြုံးလိုက်သည်။ သူသည် ဖိနပ်ချွတ်ပြီး ဤကပ္ပတိန်နှစ်ဦးကို ပစ်ပေါက်ချင်စိတ် ပြင်းပြနေသည်။ ခင်ဗျားတို့ ပြောနေတဲ့ စကားလုံးတွေရဲ့ နောက်ကွယ်က အဓိပ္ပာယ်ကို ကျွန်တော် မသိဘူးလို့ ထင်နေလား!

အင်တာဗျူးသည် ပျော်ရွှင်ပျော်ရွှင် ဆက်လက်သွားနေပြီး မှတ်ချက်ပေးကဏ္ဍသည် အလွန် လှုပ်လှုပ်ရှားရှား ရှိနေသည်။

ဆော်လမွန်၏သော့သည် တရုတ်အင်တာဗျူးကို လျင်မြန်စွာ ကြည့်ရှုပြီး အခြားနိုင်ငံများ၏ အင်တာဗျူးများသို့ ပြောင်းလိုက်သည်။

ပြင်သစ်တွင် ကျူးလစ်ကလပ်၏ ကပ္ပတိန် [ပျောက်ဆုံးအိန်ဂျယ်] သည် အင်တာဗျူးကို လက်ခံခဲ့သည်။

"ကျွန်တော် ပိုပြီး အာရုံစိုက်ရမယ့် ပြိုင်ဘက်တွေက ဘယ်သူတွေလဲ။ အင်း... တရုတ်နိုင်ငံက အသင်းသုံးသင်းလို့ ထင်ပါတယ်။ သူတို့က အရမ်းအားကောင်းတဲ့ ပြိုင်ဘက်တွေပါ။ အသင်းအများစုကလည်း အဲဒါကို သဘောတူမယ်လို့ ကျွန်တော် ထင်ပါတယ်။ ဟားဟား။ ပြီးတော့ ရေတပ်ဗိုလ်ချုပ်ကြီးနဲ့ ကျွန်တော်က ပြိုင်ဘက်ဟောင်းတွေလေ"

ပျောက်ဆုံးအိန်ဂျယ်သည် အတွေ့အကြုံရင့် ကစားသမားဖြစ်သဖြင့် ပြုံးရွှင်သော မျက်နှာဖြင့် မေးခွန်းများကို ပြန်ဖြေခဲ့ပြီး သူ၏ အသံမှာ နူးညံ့ပြီး နွေးထွေးသည်။

ဆော်လမွန်၏သော့သည် အခြားနိုင်ငံများမှ အင်တာဗျူးများကိုလည်း ကြည့်ရှုခဲ့သည်။ အစီအစဉ်မှူးက မည်သည့် ပြိုင်ဘက်များသည် ခြိမ်းခြောက်မှုရှိကြောင်း မေးမြန်းတိုင်း တရုတ်နိုင်ငံ၏ အမည်သည် စာရင်းတွင် အမြဲပါဝင်နေသည်။ အသင်းတိုင်းသည် တရုတ်အသင်းများကို အလွန် အလေးအနက်ထားနေကြသည်။

တရုတ်နိုင်ငံ၏ E-Sports စံနှုန်းသည် မဆိုးလှဘဲ ပထမအဆင့်ဟု သတ်မှတ်နိုင်သည်။ သို့သော် ဤသည်မှာ သူတို့သည် အသင်းအားလုံးထံမှ ဤမျှလောက် အာရုံစိုက်မှုကို ပထမဆုံးအကြိမ် ရရှိခြင်းဖြစ်သည်။ ၎င်းသည် သူတို့ရရှိသော အခွင့်အရေးများမှ လာခြင်းဖြစ်သည်။ တရုတ်နိုင်ငံသည် ပြိုင်ပွဲဝင် ကစားသမားများကို အာကာသစင်မြင့်သို့ ကြိုတင်ဝင်ရောက်ခွင့်ပေးခဲ့သော တစ်ခုတည်းသော နိုင်ငံဖြစ်သည်။ ဤနိုင်ငံခြားကလပ်များသည် ဘလက်စတား ကြေးစားတပ်ဖွဲ့ရှိ တရုတ်ကစားသမားများ၏ အတွေ့အကြုံကို အမြဲတမ်း အာရုံစိုက်နေခဲ့ကြသည်။ သူတို့ကို အလွန်အားကောင်းသော ပြိုင်ဘက်များအဖြစ် သတ်မှတ်ထားသည်။

ဖိုရမ်များမှ ထွက်လာပြီးနောက် ဆော်လမွန်၏သော့သည် အခန်းထဲရှိ သူ၏ အသင်းဖော်များကို ကြည့်ကာ တည်ငြိမ်စွာဖြင့် ပြောလိုက်သည်။ "ထင်ရှားတာက အခြားအသင်းတွေလည်း ငါတို့လိုပဲ တွေးနေကြတယ်။ တရုတ်အသင်းတွေက ပြဿနာပဲ"

အိမ်အပြင်ဘက်တွင် နှင်းများသည် မိုးကုတ်စက်ဝိုင်းကို ကျော်လွန်သည်အထိ ဖုံးလွှမ်းနေသည်။ နတ်ဆိုးအသိုက် စစ်စခန်းများသည် မြေပြင်တစ်လျှောက် ပြန့်ကျဲနေပြီး နတ်ဆိုးတပ်များသည် အချိန်မှန် လှည့်လည်သွားလာနေသည်။ ဤအိမ်သည် စစ်စခန်းတစ်ခုလည်း ဖြစ်သည်။ ဆော်လမွန်၏သော့အပါအဝင် ထိုနေရာရှိ ကစားသမားများအားလုံးသည် နတ်ဆိုးမျိုးနွယ်၏ ပုံပန်းသဏ္ဍာန်များ ရှိကြသည် - သူတို့၏ ဂိမ်းမျက်နှာပြင်များတွင် ပြသထားသော မျိုးနွယ်စုမှာ လူငယ် နတ်ဆိုးဖြစ်သည်။ သူတို့သည် နှစ်မီတာကျော်မြင့်ပြီး နဖူးမှ တိုတောင်းသော သိုးချိုများ ထွက်နေကာ၊ နောက်ကျောတွင် အမြီးတစ်ခု၊ ထူထဲပြီး သန်မာသော ခြေထောက်များ၊ ခန္ဓာကိုယ်ပေါ်တွင် အနက်ရောင် နတ်ဆိုးအကြေးခွံများ ရှိကြသည်။ သူတို့သည် သံချပ်ကာများနှင့် လက်နက်များ တပ်ဆင်ထားသည်။ သူတို့၏ မျက်နှာများသည် ကြမ်းတမ်းသော်လည်း သူတို့သည် တစ်ဦးနှင့်တစ်ဦး ကွဲပြားသော လူသားဆန်သော အသွင်အပြင်အချို့ ရှိနေသေးသည်။

ဤသည်မှာ အမေရိကန်က ရွေးချယ်ထားသော အခြေစိုက်စခန်း၊ အမြစ်ဖြတ်တပ်မတော်၏ ဂြိုဟ်များထဲမှ တစ်ခုဖြစ်သော ဆောင်းနှင်းဖုံးဂြိုဟ် (ဝင်းတားဖရို့စ်ဂြိုလ် လို့ အရင်က ရေးခဲ့ပါတယ်) ဖြစ်သည်။ သူတို့အားလုံးသည် သော့ချက်ကလပ်၏ နာမည်ကျော် ပရော်ဖက်ရှင်နယ် ကစားသမားများဖြစ်သည်။

ရေပင်လယ်ဂြိုလ်ပေါ်နှင့် အဝေးတွင်ရှိနေသော အီလက်ထရိုလက်စ်သည် သော့ချက်ကလပ်မှ အငြိမ်းစားယူထားသော ကစားသမားဖြစ်သည်။ သော့ချက်ကလပ်သည် ထောက်လှမ်းရေးသမားများ အသုံးပြုရာတွင် အလွန် စိတ်အားထက်သန်သည်။ အမှန်တကယ်အားဖြင့် သူတို့တွင် အချက်အလက်နှင့် အကူအညီများအားလုံးကို ပံ့ပိုးပေးသည့် ရင့်ကျက်သော အဖွဲ့တစ်ခု ရှိနေသည်။

ကပ္ပတိန် ဆော်လမွန်၏သော့သည် ကလပ်မှ တရားဝင် မှတ်ပုံတင်ထားသော အကောင့်ဖြစ်ပြီး ကပ္ပတိန်တိုင်းသည် အမည်တူကို အသုံးပြုကြသည်။ ယခင် ကပ္ပတိန် အငြိမ်းစားယူပြီးနောက် ဤမျိုးဆက်၏ 'ဆော်လမွန်၏သော့' ကို ပြီးခဲ့သည့်နှစ်တွင် ရာထူး ပေးအပ်ခဲ့သည်။ သူသည် ရွေးချယ်ရေး လုပ်ငန်းစဉ်မှတဆင့် အသင်းရှိ ကစားသမားများအားလုံးကို အနိုင်ယူခဲ့သည်။ သော့ချက်ကလပ်မှ အကြီးအကဲများသည် သူ့တွင် ထူးခြားသော အလားအလာကို တွေ့မြင်ခဲ့သဖြင့် သူတို့သည် ချွင်းချက်အနေဖြင့် သူ့ကို ကပ္ပတိန် ဖြစ်စေခဲ့ပြီး အချိန်ကြာမြင့်စွာ လေ့ကျင့်ပေးရန် ဆုံးဖြတ်ခဲ့ကြသည်။ သူတို့သည် သူ့အပေါ် အလွန်မြင့်မားသော မျှော်လင့်ချက်များ ထားရှိကြသည်။ သော့ချက်ကလပ်၏ အကြီးအကဲများသည် ရာသီတစ်ခုမှ နှစ်ခုအထိ အသုံးပြု၍ သူနှင့် စီနီယာအဖွဲ့ဝင်အချို့ကို ဗဟိုပြုကာ ထိပ်တန်းအသင်းတစ်ခု တည်ဆောက်ရန် စီစဉ်ထားသည်၊ သူတို့၏ အနာဂတ်ကို အလောင်းအစားလုပ်၍ ချန်ပီယံ သုံးကြိမ်ဆက်တိုက် ရယူရန် မျှော်လင့်နေကြသည်။ ဤသည်မှာ အသင်းတိုင်း၏ အိပ်မက်လည်း ဖြစ်သည်။

ဤမျိုးဆက်၏ ဆော်လမွန်၏သော့သည် သက်ကြီးကစားသမားများကဲ့သို့ တည်ငြိမ်ခြင်း မရှိပေ။ သူသည် သူ၏ တိုက်ခိုက်မှုဟန်နှင့် အမိန့်ပေးမှုဟန် နှစ်မျိုးလုံးတွင် မြန်ဆန်ပြီး ပြင်းထန်သူအဖြစ် လူသိများသည်။ အကြီးအကဲများက သူ့အပေါ် အလွန်မြင့်မားသော မျှော်လင့်ချက်များ ထားရှိသော်လည်း သူ၏ စွမ်းရည်ကြောင့် သူ ရထိုက်သည်ဟု ခံစားရသည်။ သူသည် မာနကြီးသော်လည်း ထိုသို့ပြုရန် အခွင့်အရေးရှိသည်။ သူ၏ အသင်းဖော်များ၊ ပရိသတ်များနှင့် အထက်အရာရှိများအားလုံးသည် သူ၏ ပြတ်သားမှုကို ချီးကျူးကြသည်။

ကျိုးနွံမှုသည် တရုတ်နိုင်ငံတွင် ကောင်းမြတ်သော ဂုဏ်သတ္တိဖြစ်သော်လည်း အမေရိကန်တွင် မဟုတ်ပေ။ တိုက်ရိုက်ဆန်ခြင်းနှင့် မာနကြီးခြင်းတို့သည် အမေရိကန် ကစားသမားများ၏ စရိုက်လက္ခဏာများဖြစ်သည်။

ပထမဆုံး လိဂ်ရာသီတွင် ကလပ်အများစုသည် အခြေအနေကို လေ့လာရန်၊ ၎င်းတို့၏ အသင်းကို လေ့ကျင့်ရန်နှင့် ပြိုင်ပွဲကို ရင်းနှီးစေရန်သာ စီစဉ်ထားပြီး ရလဒ်များအတွက် အလွန်အကျွံ ဆန္ဒမရှိကြပေ။ သို့သော် ဆော်လမွန်၏သော့သည် အခြားသူများနှင့် မတူပေ။ သူသည် ပန်းတိုင်တစ်ခုသာ ရှိသည်—ချန်ပီယံ!

"ပြိုင်ဘက်တွေ အများကြီး ရှိပေမဲ့ ငါတို့ကို တားဆီးနိုင်တဲ့ အားကောင်းတဲ့သူတွေက နည်းနည်းလေးပဲ ရှိတယ်။ တရုတ်နိုင်ငံက နန်းဆက်အသင်းက သူတို့ထဲက တစ်ခုပဲ။ ဒီအတားအဆီးကလွဲရင် အခြားအသင်းတွေက ခြိမ်းခြောက်မှု မဟုတ်ဘူး၊ သူတို့က ရမှတ်တွေ ရဖို့အတွက် ငါတို့ရဲ့ သားကောင်တွေပဲ..."

ဆော်လမွန်၏သော့သည် သူ၏ ခြေထောက်များကို စားပွဲပေါ် တင်လိုက်ပြီး သူ၏ အသင်းဖော်များကို ဖြတ်ခနဲ ကြည့်လိုက်သည်။ သူ၏ မျက်နှာပေါ်တွင် ယုံကြည်မှုနှင့် မထီမဲ့မြင်ဟန်ရှိသော အပြုံးရှိနေသည်။

"ကဲကိုယ့်လူတို့၊ ချန်ပီယံ ဖြစ်ဖို့ ငါ ခင်ဗျားတို့ကို ဦးဆောင်ပါရစေ!"

...

သုံးရက်သည် လျင်မြန်စွာ ကုန်ဆုံးသွားသည်။

ဟန်ရှောင်းသည် ကြေးစားတပ်ဖွဲ့၏ ကိစ္စရပ်များကို ရှင်းလင်းခဲ့သည်။ သူသည် ယာယီအားဖြင့် မည်သည့် တောင်းဆိုမှုများကိုမှ မလက်ခံဘဲ အချိန်ကာလတစ်ခု အနားယူမည်ဖြစ်ကြောင်း ကြေညာခဲ့သည်။ နိုင်ငံတကာ ပြိုင်ပွဲသည် သုံးလမှ လေးလအထိ ကြာမြင့်မည်ဖြစ်ပြီး ဟန်ရှောင်းသည် ကစားသမားများကို အစပိုင်းတွင် တစ်လခန့် အားလပ်ရက်ပေးရန် စီစဉ်ထား၏။ သူသည်လည်း သူ၏ အတန်းအစား တိုးမြှင့်မှု လိုအပ်ချက်များနှင့် မျိုးခွဲအတန်းအစားများကို လုပ်ဆောင်ရန် အချိန်အချို့ အနားယူတော့မည်ဖြစ်သည်။

ယနေ့သည် နိုင်ငံတကာလိဂ် စတင်သည့်နေ့ဖြစ်သည်။ ဟန်ရှောင်းသည် သူ၏ အခန်းထဲတွင်နေကာ ဖိုရမ်များကို ဖွင့်လိုက်သည်။ ၎င်း၏ ထိပ်ဆုံးတွင် နိုင်ငံတကာလိဂ်၏ တိုက်ရိုက်ထုတ်လွှင့်မှုတစ်ခု ရှိနေပြီး စတင်ခြင်း မရှိသေးပေ။

ခံတပ်၏ ခန်းမတွင် ဘလက်စတား ကစားသမားများအားလုံး စုဝေးနေကြသည်။ ပြိုင်ပွဲဝင် ကစားသမားများသည် အလယ်တွင် ဝိုင်းရံခံထားရပြီး စုဝေးခြင်းခရစ်စတယ်များကို စတင်ရောင်းချမည့် စတိုးဆိုင်ကို စောင့်ဆိုင်းနေကြသည်။

ဓါးရူးသည် သူ၏ လက်များကို ပွတ်သပ်နေသည်။ နိုင်ငံအသီးသီးမှ ပရော်ဖက်ရှင်နယ် ကစားသမားများနှင့် တိုက်ခိုက်ရမည့် အတွေးသည် သူ့ကို စိတ်လှုပ်ရှားစေသည်။ သူသည် ဤမျှကြီးမားသော စင်မြင့်ကို တစ်ခါမှ မရောက်ဖူးပေ။

"ဒေသတွင်း ပြိုင်ပွဲမှာ ငါ နာမည်ရခဲ့တယ်၊ ဒါပေမဲ့ နိုင်ငံတကာပြိုင်ပွဲမှာ ကောင်းကောင်း မလုပ်နိုင်ဘူးဆိုရင် အရင်က ကြိုးစားခဲ့တာတွေရဲ့ တစ်ဝက်ကျော်ဟာ အချည်းနှီး ဖြစ်သွားလိမ့်မယ်။ နိုင်ငံတကာ ပြိုင်ပွဲမှာ ကောင်းကောင်း လုပ်နိုင်မှပဲ ငါ့ရဲ့ နာမည်ကောင်းကို ထိန်းထားနိုင်မယ် ဒါမှမဟုတ် ပိုတောင် တိုးလာနိုင်မယ်!" ဓါးရူးသည် သူ၏ ရင်ထဲတွင် အားမာန်အပြည့် ရှိနေသည်။ သူသည် စွမ်းဆောင်ရည် ညံ့ဖျင်းမှု မဖြစ်စေရန် သူ့ကိုယ်သူ ဆုတောင်းနေ၏။

အခြားတစ်ဖက်တွင် ဟောက်ထျန်း၊ ရေတပ်ဗိုလ်ချုပ်ကြီးနှင့် လီကဲတို့သည် အချင်းချင်း စကားပြောနေကြသည်။

"ကျွန်တော်တို့ထဲက တစ်ယောက်ယောက် ကံမကောင်းစွာနဲ့ အုပ်စုတူ ဖြစ်ခဲ့ရင် ပူးပေါင်းဆောင်ရွက်တာ အကောင်းဆုံးပဲ။ အသင်းတစ်သင်းက အရည်အချင်းပြည့်မီဖို့ လုံးဝ အခွင့်အရေးမရှိတဲ့ အခြေအနေမျိုး ဖြစ်သွားရင် အဲဒီအသင်းက အုပ်စုတူ နောက်အသင်းကို ကူညီပေးနိုင်တယ်။ တစ်ယောက်နဲ့တစ်ယောက် တွေ့ရင် အစွမ်းကုန် မထုတ်သုံးကြရအောင်" လီကဲက ပြောလိုက်သည်။

ဟောက်ထျန်းက ဖြတ်ပြောပြီး တည်ငြိမ်စွာဖြင့် "ပြိုင်ဘက် ဘယ်သူဖြစ်ဖြစ် အစွမ်းကုန် ထုတ်သုံးမှာပဲ။ ကျွန်တော့်ရဲ့ ပရော်ဖက်ရှင်နယ် စိတ်ဓာတ်က နောက်ဆုတ်ဖို့ ခွင့်မပြုဘူး"

ရေတပ်ဗိုလ်ချုပ်ကြီးက သမ်းဝေပြီး ပျင်းရိစွာဖြင့် "ငါ နောက်ဆုတ်ထားရင်တောင် မင်း ငါ့ကို မနိုင်ဘူး"

လီကဲသည် ဒေါသထွက်သွားသည်။ သူတို့နှစ်ယောက် ဘာလို့ အမြင်ကျယ်ကျယ် မမြင်နိုင်ကြတာလဲ!

ငါတို့က အခု တရုတ်နိုင်ငံကို ကိုယ်စားပြုနေတာ၊ နေရာကောင်းတွေ မရရင် ဘာပဲဖြစ်ဖြစ် မှားတာပဲ။ အသင်းတွေရဲ့ နာမည်ကို ကြီးမားတဲ့ ဆိုးကျိုး သက်ရောက်စေလိမ့်မယ်။ ပြိုင်ပွဲတွေမှာ ရလဒ်က တစ်ခုတည်းသော အရေးကြီးဆုံးအရာပဲ။ ပိုကောင်းတဲ့ ရလဒ်တွေရဖို့အတွက် သင့်လျော်တဲ့ ညှိနှိုင်းမှုအချို့ လုပ်တာ ဘာများမှားလို့လဲ။

ငါတို့က ပြောင်းလွယ်ပြင်လွယ် ရှိရမယ်လေ!

ထိုအချိန်တွင် ပြိုင်ပွဲဝင်များ၏ မျက်နှာပြင်ပေါ်၌ သတိပေးချက်တစ်ခု ပေါ်လာသည်။ သူတို့သည် စတိုးဆိုင်ကို အလျင်အမြန် ဖွင့်လိုက်ကြသည်။ စုဝေးခြင်းခရစ်စတယ်ကို ဝယ်ယူရန် ရရှိနေပြီ ဖြစ်သည်။

သူတို့သည် ဝယ်ယူပြီးသည်နှင့် တပြိုင်နက် ခရစ်စတယ်ကို ချိုးဖဲ့လိုက်ကြသည်။ မြူခိုးများသည် ကျောက်စိမ်းမှ ထွက်လာပြီး သူတို့ကို ဖုံးအုပ်သွားသည်။ မြူခိုး ပျောက်ကွယ်သွားသောအခါ ပြိုင်ပွဲဝင်များ ပျောက်ကွယ်သွားကြသည်။ ဒန်ဂျင်သလင်းကျောက်၏ သက်ရောက်မှုများကဲ့သို့ပင် သူတို့သည် ပွားထားသော မြင်ကွင်းထဲသို့ ဝင်ရောက်သွားကြသည်။

ဓါးရူး၏ မျက်လုံးများ လက်ခနဲဖြစ်သွားပြီး ဘေးပတ်လည်ရှိ ပတ်ဝန်းကျင်သည် လုံးဝ ပြောင်းလဲသွားသည်။ သူသည် ကြီးမားသော ကွင်းတစ်ခုထဲသို့ ရောက်ရှိနေပြီး သူ၏ ဘေးတွင် အခြား တရုတ်ပြိုင်ပွဲဝင်များ ရှိနေကြသည်။ လှမ်းကြည့်လိုက်ရာ ကစားသမားများသည် လူမျိုးများအလိုက် တစ်ဦးပြီးတစ်ဦး ရုတ်တရက် ပေါ်လာကြသည်။

နိုင်ငံအသီးသီးမှ ကစားသမားများ ပေါ်လာကြသည်။ သူတို့သည် အုပ်စုများအလိုက် ရပ်နေကြပြီး တစ်ဦးနှင့်တစ်ဦး အကဲခတ်နေကြသည်။ ၎င်းတို့၏ ခေါင်းပေါ်ရှိ အကောင့်အမည်များအရ သူတို့သည် နာမည်ကြီးများ ဖြစ်ကြသည်။

"ပြင်သစ် ကျူးလစ်များ၊ ယူကေ နှင်းဆီစစ်သည်များ၊ အမေရိကန် နတ်ဆိုးများ၊ မိုးကြိုးမြွေများ၊ ဆွီဒင် တိုမာဟော့ခ်များ..." ဓါးရူးသည် တစ်ဦးချင်းစီ စစ်ဆေးလိုက်သည်။ သူတို့အားလုံးသည် ကမ္ဘာကျော် အသင်းများဖြစ်သည်။ ဤအခိုက်အတန့်တွင် သူသည် ဤနိုင်ငံတကာ ပွဲတော်သည် မည်မျှ အမှန်တကယ်ဖြစ်ကြောင်း နောက်ဆုံးတွင် ခံစားလိုက်ရသည်။ စိတ်လှုပ်ရှားမှုနှင့် မျှော်လင့်ချက်တို့ကြောင့် အနည်းငယ် တုန်ယင်သွား၏။

သူ၏ ဘေးတွင် ရေတပ်ဗိုလ်ချုပ်ကြီးသည် ပုံမှန်အတိုင်း ပေါ့ပေါ့ပါးပါးနှင့် ပျင်းရိနေပုံရပြီး ဝေးလံသော နိုင်ငံခြားကစားသမားများကို လက်ဝှေ့ယမ်းပြနေသည်။ သူတို့ထဲမှ များစွာသောသူများသည် အချင်းချင်း သိကျွမ်းနေကြသည်။

ဤမြင်ကွင်းသည် ဖိုရမ်များရှိ တိုက်ရိုက်ဗီဒီယိုတွင် ပေါ်လာသည်။ ဆူညံသိုက်မြိုက်သော လေထုသည် လူသန်းပေါင်းများစွာ၏ ပွဲတော်ကဲ့သို့ ဖြစ်နေသည်။

အစီအစဉ်မှူးသည် ကွင်းအလယ်တွင် ပေါ်လာပြီး ပြိုင်ပွဲဝင်များ၏ မျက်လုံးများကို ဆွဲဆောင်လိုက်သည်။ သူသည် ပထမဦးစွာ နိုင်ငံတကာလိဂ်အတွက် အရည်အချင်းပြည့်မီသော ပြိုင်ပွဲဝင်များကို ဂုဏ်ပြုပြီးနောက် ပြိုင်ပွဲကို စပွန်ဆာပေးသူများနှင့် အလားတူ တရားဝင် ကိစ္စများနှင့်ပတ်သက်၍ ဖွင့်ပွဲမိန့်ခွန်းကို စတင်ပြောဆိုသည်။ ငါးမိနစ်ကြာပြီးနောက် သူသည် ဖွင့်ပွဲမိန့်ခွန်းကို အဆုံးသတ်ကာ ပြိုင်ပွဲစနစ်အကြောင်း စတင်ပြောဆိုခဲ့သည်။

"စုစုပေါင်း ဌာနခွဲ ၁၃ခု ရှိပါတယ်။ ကမ္ဘာတစ်ဝှမ်းမှ စုစုပေါင်း အသင်း ၃၉သင်းနှင့် တစ်ကိုယ်တော် ကစားသမားတွေဟာ နိုင်ငံတကာလိဂ်အတွက် အရည်အချင်းပြည့်မီခဲ့ကြပါတယ်။ ပြိုင်ပွဲပုံစံမှာ ဒေသတွင်း ပြိုင်ပွဲ၏ ဆက်လက်လုပ်ဆောင်မှု ဖြစ်ပါတယ်။ အသင်းပြိုင်ပွဲမှာ အသင်းလိုက်တိုက်ပွဲနဲ့ စိန်ခေါ်ပွဲတို့ ပါဝင်ပြီး၊ တစ်ကိုယ်တော်တွင် အလွတ်တိုက်ပွဲ ပါဝင်ပါတယ်..."

ဟန်ရှောင်းသည် အစီအစဉ်မှူး၏ စကားကို နားထောင်ရင်း ခေါင်းညိတ်လိုက်သည်။ ပထမဆုံး လိဂ်ရာသီတွင် အမျိုးအစား အလွန်နည်းသည်။ သူ၏ ယခင်ဘဝတွင် နောက်ပိုင်း ရာသီများ၌ မြေအောက်ခန်း၊ ရှင်သန်ခြင်း၊ အမဲလိုက်ခြင်း၊ ပြိုင်ပွဲနှင့် ထူးဆန်းသော နည်းလမ်းများအားလုံးကဲ့သို့ ယှဉ်ပြိုင်နိုင်သည့် ပြိုင်ပွဲအမျိုးအစားများ ပိုများလာသည်။ ပိုမိုဖျော်ဖြေမှုရှိစေရန်အတွက် ပြိုင်ပွဲများသည် ပို၍ ပို၍ ကွဲပြားလာသည်။

အစီအစဉ်မှူးက ဆက်လက်၍ "အသင်း ၃၉နှင့် ကစားသမားများကို အုပ်စု သုံးစု—A၊ B၊ C အဖြစ် ပိုင်းခြားပါမယ်။ သူတို့ဟာ အုပ်စုများအတွင်း ယှဉ်ပြိုင်ကြမှာ ဖြစ်ပြီး အနိုင်ရရှိသူများကို ရမှတ်များ ချီးမြှင့်ပါမယ်။ ချီးမြှင့်တဲ့ ရမှတ်အရေအတွက်ဟာ အနိုင်ရတဲ့ အသင်းက ပြိုင်ပွဲမှာ ခံခဲ့ရတဲ့ ထိခိုက်မှုပေါ် မူတည်ပါတယ်။ ထိပ်ဆုံးအသင်း ၈သင်းနဲ့ တစ်ကိုယ်တော် ကစားသမား ၁၆ဦးဟာ နောက်ဆုံးအဆင့်သို့ ဝင်ရောက်ကြမှာ ဖြစ်ပါတယ်..."

သူသည် ပတ်ပတ်လည် ကြည့်လိုက်သည်။ ပရော်ဖက်ရှင်နယ် ကစားသမားများသည် အမျိုးမျိုးသော မျက်နှာအမူအရာများ ရှိနေကြသည်။ အချို့မှာ စိတ်လှုပ်ရှားနေကြပြီး အချို့မှာ လေးနက်နေကြကာ အချို့မှာ ယုံကြည်မှုရှိနေကြသည်။

"မဲနှိုက်ခြင်းကို စတင်ကြပါစို့!"

စာစဉ် (၂၉)၊ အခန်း (၄၂၃) ပြီး၏။

လင်းဆက်

+++++