ထူးဆန်းအံ့ဖွယ်တိုက်ပွဲ

လန်ဆလော့သည် ‘ရှားလော့ခ်နဲ့အတူ ထိုညအတွက်’ အစည်းအရုံး၏ ဝင်ပေါက်တွင် စိတ်ရှည်သော ဂိမ်းမာ အုပ်စု တစ်စု နှင့်အတူ ထိုင်နေခဲ့သည်။ သူ ဝင်ပေါက်တွင် နာရီ အနည်းငယ်ကြာ ထိုင်နေခဲ့ပြီး ဖြစ်သည်။

မိန်းကလေးငယ်ကို ကုသပေးပြီး နောက်တွင် လန်ဆလော့ သူ၏ အတွင်း၌ တစ်စုံတစ်ခု ပြောင်းလဲ သွားသည်ကို ခံစားလိုက် ရသည်။

လန်ဆလော့သည် လူပျိုစင် တစ်ဦး မဟုတ်ချေ။ သူရဲကောင်း တစ်ဦး အနေဖြင့် သူ အမျိုးသမီး တစ်ဦးကို ထိတွေ့ဖူးခြင်းမှာ ဒါက ပထမဆုံး အကြိမ် မဟုတ်ချေ။

အမှန်တကယ်တွင် သူ ယခင်က အမျိုးသမီး တစ်ဦးကြောင့် နယ်နှင်ဒဏ် ပေးခြင်းကိုပင် ခံခဲ့ရဖူးသည်။

သူ ဂလာမော်ဂန်၏ လက်အောက်ငယ်သား တစ်ဦး အဖြစ် ရှိနေစဉ်က သူ ဂလာမော်ဂန်မြို့စား၏ ဇနီးနှင့် တစ်ညတာ အတူတူ အခန်း တစ်ခန်းထဲတွင် နေထိုင်ခဲ့ရ ဖူးသည်။ သူ နိုးလာသော အခါတွင် သူ၌ အဝတ်အစားများ မရှိတော့ဘဲ ဂလာမော်ဂန်မြို့စား၏ ဇနီးက သူ၏ အဝတ်အစားများကို လျှော်ဖွပ်ပေးရင်း သူ့ကို အထာပေး ပိုးပန်း နေခဲ့သည်။

ဂလာမော်ဂန်မြို့စား အခန်းထဲသို့ ဝင်လာပြီး အရာအားလုံးကို မြင်တွေ့ သွားခဲ့သည်။

လန်ဆလော့ သူ အရက် အလွန်အကျွံ သောက်မိသောကြောင့် စတင်ခဲ့ခြင်း ဖြစ်ကြောင်း ကျိန်ဆိုခဲ့သည်။

သူ ထိုအကြောင်းကို စဉ်းစားကြည့်သော အခါတွင် တစ်စုံတစ်ယောက်က သူ့ကို ထောင်ချောက် ဆင်ခဲ့ခြင်း ဖြစ်နိုင်သည်ဟု သူ ခံစားမိလိုက်သည်။

လန်ဆလော့ သူ၏ နာကျင်ဖွယ် အတွေ့အကြုံများကို ပြန်လည် အမှတ်ရလိုက်ပြီး သူ အိပ်ရာပေါ်တွင် ရှိနေကာ ဂလာမော်ဂန်မြို့စား၏ အမူအရာကို ကြည့်နေရ သကဲ့သို့ ခံစားလိုက် ရသည်။ ရယ်စရာ ကောင်းသည့် အချက်မှာ သူ ယခုမူ ဂလာမော်ဂန်မြို့စား ဖြစ်နေပြီး သူ၏ ပိုင်နက်နယ်မြေကို ဗစ်တိုးရီးယားမြို့မှ နိုင်ငံသားများက မြေပြင်ပေါ်တွင် စက်ဝိုင်း ခြစ်ထားခြင်းပင်။

လီလိုနှင့် ဗစ်တိုးရီးယားမြို့မှ နိုင်ငံသားများသည် မှူးမတ်များ၊ သူတို့၏ ဘွဲ့ထူးဂုဏ်ထူးများနှင့် သူတို့၏ ပိုင်နက်နယ်မြေများကို ကစားပွဲ တစ်ခု ကဲ့သို့သာ ပေါ့တန်တန် သဘောထား ကြသော်လည်း သူတို့ နောက်ပြောင်နေခြင်း မဟုတ်ကြောင်းကိုတော့ သူ သိရှိနေခဲ့သည်။

ပြန်လည် ရှင်သန်ခြင်းသည် မည်သို့ ဟာသ တစ်ခု ဖြစ်နိုင်မည်နည်း။

သူ၏ မှတ်ဉာဏ်များက လန်ဆလော့အား လူသားတို့၏ နှလုံးသား၏ ဆိုးယုတ်မှုကို ခံစားစေခဲ့ပြီး သူ့အား စိတ်ဓာတ် ကျဆင်းမှုကို ပေးအပ်ခဲ့သည်။

သို့သော် ယနေ့တွင် ဒဏ်ရာရ မိန်းကလေး၏ အပြစ်ကင်းစင်သော မျက်နှာနှင့် ပြားချပ်သော ရင်ဘတ်ကို မြင်တွေ့လိုက် ရသော အခါတွင်မူ ရိုးသားဖြူစင်သော ခံစားချက်များက လန်ဆလော့အား သူ၏ လူငယ်ဘဝနှင့် အိမ်နီးချင်း မိန်းကလေးထံသို့ ပြန်လည် ရောက်ရှိသွားစေခဲ့သည်...

လန်ဆလော့ ခေါင်းခါလိုက်သည်။ ဤသည်မှာ သူ မိန်းကလေးငယ်နှင့် ပထမဆုံး အကြိမ် တွေ့ဆုံခြင်း ဖြစ်သည်။ သူ မည်သို့ ဤသို့သော အတွေးများ ရှိနိုင် မည်နည်း။

တံခါး ကျွီကနဲ ပွင့်လာခဲ့သည်။ မထိမတို့နိုင်သောသူ သူ၏ လက်များကို သန့်စင်ရင်း လျှောက်ထွက် လာခဲ့သည်။

လန်ဆလော့ ခုန်ထလိုက်ပြီး အက်လ်ဖ်အား စိုးရိမ်တကြီး မေးလိုက်သည်။ "ဘယ်လိုလဲ။ အထဲက အခြေအနေက...။"

"ကံကောင်းစွာနဲ့ပဲ မင်း ရှေးဦးသူနာပြုစုပေးခဲ့လို့ပေါ့။ မဟုတ်ရင် သူ ငါ မရောက်ခင်မှာ သေဆုံးသွားလောက်ပြီ။ သူ အခု အဆင်ပြေပါတယ်၊ ငါ သူ့ ဒဏ်ရာတွေကို ကုသဖို့ မာနာစွမ်းရည်ကို သုံးပေးခဲ့တယ်။ ငါတို့ အဲ့လူငယ်လေး သတိပြန်လည် လာဖို့ စောင့်ဆိုင်းရလိမ့်မယ်။ သူက စိတ်ဓာတ် ကြံ့ခိုင်သားပဲ။" မထိမတို့နိုင်သောသူ ဆို၏။

"ကောင်းလိုက်တာ..."

လန်ဆလော့ စိတ်အေးလက်အေး ဖြစ်သွားခဲ့သည်။

ဂိမ်းမာ အုပ်စု တစ်စု အခန်းထဲသို့ ပြေးဝင်ရန် ပြင်ဆင် နေကြသော်လည်း မထိမတို့နိုင်သောသူက သူတို့ကို တားဆီး လိုက်ပြီး ဆို၏။ "အခန်းထဲကို မဝင်ကြနဲ့။ ဒဏ်ရာရလူနာက အနားယူမှု အများကြီး လိုအပ်တယ်။ အကယ်၍ မြားက စင်တီမီတာ အနည်းငယ် လွဲချော်သွားခဲ့ရင် သူ့ နှလုံးကို ထိုးဖောက် သွားလောက်ပြီ။ ဒါက ဘုရားမတာပဲ။ ငါ လူငယ်လေးကို ပြုစုစောင့်ရှောက်ဖို့ သန့်ရှင်းတဲ့ လူငယ်လေး နှစ်ယောက်ကို စီစဉ်ထား ပေးတယ်၊ ဒါကြောင့် ဘာပြဿနာမှ ရှိနေမှာ မဟုတ်ဘူး။"

ဂိမ်းမာများ ချက်ချင်း မကျေမနပ် ဖြစ်သော အသံများ ပြုလုပ်ကြသည်။ လန်ဆလော့မှာမူ အက်လ်ဖ်၏ စကားများကြောင့် သူ၏ ဦးခေါင်းကို တူဖြင့် ထုခံလိုက်ရ သကဲ့သို့ ခံစားလိုက် ရသည်။

"နေဦး၊ ခင်ဗျားက လူငယ်လေးလို့ ပြောလိုက်တာလား။"

"အာ၊ မိန်းကလေးတွေက ပိုပြီး စေ့စပ်သေချာတယ် ဆိုတာတော့ ငါလည်း သိတာပေါ့။ ဒါပေမဲ့ ဒဏ်ရာရ လူငယ်လေးက LGBT မဟုတ်နိုင်ဘူးလို့ မင်း ဘယ်လို သိလဲ။ အကယ်၍ သူက LGBT ဆိုရင် မိန်းကလေးတွေကို သူ့ကို ပြုစုစောင့်ရှောက် ခိုင်းတာက အရမ်း ရက်စက်လွန်းရာ ကျတယ်။ သူ LGBT မဟုတ်နေရင်တောင် သူ ယောက်ျားလေးတွေရဲ့ ပြုစု စောင့်ရှောက်မှုကို ငြင်းပယ်မှာတော့ မဟုတ်ဘူး။" အက်လ်ဖ် မထိမတို့နိုင်သောသူ ကျယ်လောင်စွာ ဆို၏။

ဂိမ်းမာများ သူ့ကို ချက်ချင်း ပြန်လည် ချေပကြသည်။

"မဟုတ်ဘူး၊ သာမန်လူတစ်ယောက်လိုပဲ ငါ ယောက်ျားလေးတွေရဲ့ ပြုစု စောင့်ရှောက်မှုကို ငြင်းပယ်တယ်။"

"ပေါ်လာပြီ။ နှစ်မျိုးနှစ်စား စံနှုန်းတွေ ပေါ်လာပြီ။"

"ငါ အဲ့ဒါကို ဆန့်ကျင်တယ်။ ငါ LGBTကို ပြင်းပြင်းထန်ထန် ထောက်ခံတယ်။"

"ငါတော့ သူပြောသွားတာ မှန်တယ်လို့ ထင်တယ်။"

လန်ဆလော့ သူတို့၏ စကားပြောဆိုမှုကို မခံမရပ်နိုင်ဖြစ် သွားခဲ့သည်။ သူ၏ ရင်ခုန်စေခဲ့သော အနှီး ပုဂ္ဂိုလ်မှာ လူငယ်လေး တစ်ဦး ဖြစ်နေသည်ကို သူ မယုံနိုင်ခဲ့ချေ။

"သောက်ကျိုးနည်း။"

အပြင်ဘက်တွင် ဆူညံနေစဉ်မှာပင် အိမ်အတွင်းမှ အာမေဋိတ်ပြုသံ တစ်သံ ထွက်ပေါ် လာခဲ့သည်။ ဂိမ်းမာ တစ်ဦး ပြေးထွက်လာပြီး အော်ပြော လိုက်သည်။ "အဲ့ဒီ လူငယ်လေးက ယော့ခ်နယ်စားကြီးရဲ့ သူရဲကောင်း ၃,၀၀၀... သုံးရက်အကြာက ဂိုးလ်ရှိုင်းယားမြို့ကို ရောက်ရှိလာခဲ့တယ်လို့ ပြောတယ်။ သူတို့ ငါတို့ကို တိုက်ခိုက်ဖို့ လာနေကြတာတဲ့။"

"ဘာလဲ။ ဒီလောက်တောင် မြန်တာလား။"

လန်ဆလော့ တုန်လှုပ် သွားခဲ့သည်။ သူ လှည့်ထွက်သွားပြီး ရဲတိုက်ဆီသို့ ပြေးသွားခဲ့သည်။ ဒဏ်ရာရ လူငယ်လေး လိမ်လည်ရန် အကြောင်း မရှိချေ။ သူ အဘယ်ကြောင့် ဗစ်တိုးရီးယားမြို့ကို ကူညီနေသည်ကို မသိရသော်ငြား အရေးကြီးသည့် အချက်မှာ ဗစ်တိုးရီးယားမြို့ကို ကာကွယ်ရန် ဖြစ်သည်။

ဂိမ်းမာအချို့ လန်ဆလော့နောက်သို့ လိုက်ပါ သွားကြပြီး အချို့မှာမူ ဇာတ်လမ်း၏ အဖြစ်အပျက် တစ်စုံတစ်ရာ ရှိ၊ မရှိ ကြည့်ရှုရန် ကျန်ရစ် ခဲ့ကြသည်။

ဗစ်တိုးရီးယားမြို့တွင် ပျော်ရွှင်မှု အငွေ့အသက်များဖြင့် ပြည့်နှက် နေခဲ့သည်။

...

"ဘုန်း၊ ဘုန်း၊ ဘုန်း။"

ဗစ်တိုးရီးယား တောအုပ်နှင့် မလှမ်းမကမ်းရှိ တောင်ကုန်းငယ် တစ်ခု ပေါ်တွင် မြင်းများ ပြေးလွှားသံများကို ကြားလိုက် ရသည်။

ယော့ခ်ပိုင်နက်မှ သူရဲကောင်း ၃,၀၀၀ ထိုနေရာသို့ ရောက်ရှိရန် တစ်ရက်တာ ကြာမြင့်ခဲ့ပြီး သူတို့ သူတို့၏ တိုက်ပွဲအစီအစဉ် အတွက် နေရာ တစ်ခုကို လျင်မြန်စွာ ရွေးချယ် ခဲ့ကြသည်။

မြေပြင်မှာ တောင်ကုန်း ထူထပ်ပြီး တပ်ဖြန့်ရန် သင့်တော်ကာ ဘေးနှစ်ဖက်တွင် သစ်ပင်များလည်း မရှိနေချေ။ ဗစ်တိုးရီးယားမြို့၏ အဓိကတပ်ဖွဲ့များကို ဆွဲဆောင်ရန် အတွက် သူရဲကောင်း ၅၀၀သာ လိုအပ် ခဲ့သည်။ သူရဲကောင်းများ အမြင့်မှ ချီတက် တိုက်ခိုက်ပြီး ခြေလျင်တပ်သားများ ရှေ့သို့ ချီတက် တိုက်ခိုက်ခြင်းဖြင့် အနိုင်ရရှိမည့် အခြေအနေ တစ်ခု ဖြစ်သည်။

ဗစ်တိုးရီးယားမြို့၌ တပ်ဖွဲ့ဝင် ၃၀,၀၀၀ ရှိနေခဲ့လျှင်ပင် သူတို့ ရှုံးနိမ့်ရ ပေလိမ့်မည်။

ရွှေရောင် ဆံပင်နှင့် တပ်မှူး သူ၏ မြင်းကို စီးနင်းကာ သူ၏ သူရဲကောင်းများကို စစ်ဆေးကြည့်ရှု နေခဲ့သည်။ သူရဲကောင်းများ၏ နောက်တွင် သူရဲကောင်းများ၏ အစေခံများလည်း ဖြစ်ကြသော ခြေလျင်တပ်သား ၁၀,၀၀၀ ခန့် ရှိနေခဲ့သည်။ သူတို့သည် တိုက်ပွဲ မရှိသည့် အခါတွင် သူရဲကောင်းများကို အမှုထမ်း ကြသည်။ တိုက်ပွဲ အတွင်းတွင်မူ သူတို့သည် မြင်းစီးတပ်သား၊ ခြေလျင်တပ်သား သို့မဟုတ် အရန်တပ်ဖွဲ့များ ဖြစ်လာကြသည်။

ရွှေရောင် ဆံပင်နှင့် တပ်မှူး ရေနွေးငွေ့စွမ်းအင်သုံး လက်နက်များ တစ်စုံတစ်ရာမျှ ယူဆောင်လာခြင်း မရှိခဲ့ချေ။ ဤသည်မှာ သတ်ဖြတ်ပွဲ တစ်ခု ဖြစ်လာမည် ဖြစ်သောကြောင့် ပစ္စည်းကြီးများကို ယူဆောင်လာရန် မလိုအပ်ခဲ့ချေ။

"ဂျွန်။" ရွှေရောင် ဆံပင်နှင့် တပ်မှူးက သူ၏ မြင်းကို ရှေ့သို့ စီးနင်းလာပြီး တပ်မှူးကို ကြည့်နေသော အနက်ရောင် ဆံပင်နှင့် သူရဲကောင်း တစ်ဦး ထံသို့ အော်ပြော လိုက်သည်။

"မင်း ဒီမှာ တပ်ဖြန့်ရမယ်။ ငါ သူရဲကောင်း ၅၀၀ကို ဦးဆောင်ပြီး သူတို့ကို မျှားခေါ်မယ်။"

"ဆာဂျော့ချ်။ ခင်ဗျားက တပ်မှူး တစ်ယောက်ပါ။ မျှားခေါ်သူအဖြစ် သွားတာက အရမ်း အန္တရာယ် များလွန်းပါတယ်။ ကျွန်တော့်ကို သွားခွင့်ပြုပါ။" ဂျွန်က ဖြောင့်မတ်စွာ ဆို၏။ သူ စကား မဆုံးမီမှာပင် အနီးအနားမှ သူရဲကောင်းအချို့ ပြေးလာကြပြီး အော်ဟစ် လိုက်ကြသည်။ "တပ်မှူး။ တောအုပ်ထဲကနေ ရန်သူ အုပ်စုကြီး တစ်စု ချီတက် လာနေပါတယ်။"

"ဘာလဲ။ မင်း ဘာပြောလိုက်တာလဲ။" ဂျော့ချ် သူ၏ နားကိုပင် မယုံနိုင်ဖြစ် သွားခဲ့သည်။ သူရဲကောင်းများ ပို၍ ပို၍ တောအုပ်ထဲမှ ပြေးထွက် လာကြပြီး ငှက်များ ကြောက်လန့်တကြား ပျံတက် သွားကြသည်။ အမှန်တကယ်ပင် တောအုပ် အတွင်းတွင် လူအုပ်စုကြီး တစ်စု လှုပ်ရှား နေခဲ့သည်။

"အားလုံးပဲ၊ တိုက်ပွဲ အတွက် ပြင်ဆင်ကြ။"

ဂျော့ချ်က သူတို့၏ နောက်တွင် အနားယူနေသော သူရဲကောင်းများကို အမိန့်ပေး လိုက်သည်။

သူရဲကောင်းများက လျင်မြန်ကြ၏။ တစ်ချိန်တည်းမှာပင် အစေခံများက သူတို့၏ အဝေးပစ် လက်နက်များကို ထုတ်ယူ လိုက်ကြသည်။ ဗစ်တိုးရီးယားမြို့မှ စစ်သည်တော်များသည် မြားမိုး ရွာသွန်းခြင်းကို ကြုံတွေ့ရ ပေလိမ့်မည်။

ယော့ခ်နယ်စားကြီး၏ အမိန့်မှာ ဗစ်တိုးရီးယားမြို့မှ နိုင်ငံသားများကို ကျွန်ပြုရန် ဖြစ်သည်။ သို့သော် တိုက်ပွဲရှုထောင့်မှ ကြည့်လျှင် သူတို့သည် ရန်သူကို အနိုင်ယူ ခြိမ်းခြောက်ပြီးမှ ဖမ်းဆီး ရပေမည်။

သူရဲကောင်းများသည် သူတို့၏ ပုံစံကွက် အတွင်းသို့ ဝင်ရောက်ရန် အချိန်အနည်းငယ်သာ ကြာမြင့်ခဲ့သည်။

အစေခံများက သူတို့၏ လေးတိုများကို ထုတ်ယူကာ ရှေ့တန်းတွင် ရပ်နေ ခဲ့ကြသည်။ နောက်တန်းများတွင် ခြေလျင်တပ်သားများ ရှိနေခဲ့ပြီး အလယ်တန်းများနှင့် ဘေးတောင်ပံများတွင် သူရဲကောင်း ၁,၀၀၀ ရှိနေခဲ့သည်။

တိုက်ပွဲ စတင်သောအခါတွင် သူရဲကောင်းများသည် ရန်သူကို လားရာ အမျိုးမျိုးနှင့် အချိန်အခါ အမျိုးမျိုးမှ တိုက်ခိုက်ကြ ပေလိမ့်မည်။ ဒါပေါ့၊ အကယ်၍ ရန်သူသည် အဓိကတပ်ဖွဲ့ ဖြစ်ခဲ့လျှင်ပေါ့။

ဂျော့ချ်သည် ဗစ်တိုးရီးယားမြို့နှင့် တိုက်ပွဲကို မကြောက်ရွံ့ ခဲ့ချေ။ သူ၏ စိုးရိမ်မှုမှာ ရန်သူ ထွက်ပြေး လွတ်မြောက် သွားမည်ကို ဖြစ်သည်။ ရန်သူက သတင်း အချက်အလက် ရရှိသောကြောင့်သာ ပထမဆုံး စတိုက်ခိုက်ခဲ့ခြင်း ဖြစ်သည်။ ကံကောင်းသည့် အချက်မှာ ရန်သူဘက်မှ ကြိုတင်တိုက်ခိုက် ခဲ့သောကြောင့် ထွက်ပြေး လွတ်မြောက်ရန် အခွင့်အလမ်း နည်းပါးခြင်းပင်။

စခန်းသို့ ပြန်ရောက်ပြီးသော အကြံပေး အရာရှိသည် ဆူညံသံများကို ကြားသောအခါ သူ၏ တဲထဲမှ ထွက်လာခဲ့သည်။ အစေခံအချို့ ချက်ချင်း သူ၏ နေရာသို့ မြင်းတစ်ကောင်ကို လမ်းညွှန် ခေါ်ဆောင် လာခဲ့သည်။ အကြံပေး အရာရှိသည် သူရဲကောင်းများကို စစ်ဆေးကြည့်ရှုရန် အတွက်သာ ရှိနေခြင်း ဖြစ်ပြီး တိုက်ပွဲထဲတွင် ကိုယ်တိုင်ကိုယ်ကျ ပါဝင်ရန် မဟုတ်ချေ။ ထို့ကြောင့် သူ ချက်ချင်း သူ၏ မြင်းကို ထိန်းချုပ်ကာ စခန်းမှ ထွက်ခွာ သွားခဲ့သည်။

ဂျွန် သူ၏ မြင်းကို စီးနင်းကာ ဂျော့ချ်၏ ဘေးတွင် လျှောက်လှမ်း နေခဲ့သည်။ သူ တောအုပ်အတွင်းမှ လှုပ်ရှားမှုကို အကဲခတ် ကြည့်လိုက်ပြီး ပြုံးလျက် ဆို၏။ "သူတို့က သတ္တိကောင်းတဲ့ ကောင်တွေပဲ။ သူတို့ဘက်က ငါတို့ကို အရင် တိုက်ခိုက်ရဲကြတယ်။ သူတို့မှာ ထောက်လှမ်းရေး သတင်း ရရှိလိမ့်မယ်လို့ ငါ မမျှော်လင့်ထားခဲ့ဘူး။ ဒါက ဂိုးလ်ရှိုင်းယားမြို့က မြို့သား တစ်ယောက်ရဲ့ လက်ချက် ဖြစ်ရမယ်။"

"ငါတို့ နောက်ကျရင် သူလျှိုကို ဖော်ထုတ်ဖမ်းဆီး ကြတာပေါ့။ ရန်သူတွေ အများကြီးပဲ။ တိုက်ပွဲ အတွက် ပြင်ဆင် ထားပါ၊ ဂျွန်။" ဂျော့ချ် ဆို၏။

ဂျွန် ခေါင်းညိတ် လိုက်ပြီး သူ၏ ရွှေရောင် မျက်နှာဖုံးကို ဆွဲချလိုက်ကာ သူ၏ မြင်းကို ဘယ်ဘက်တောင်ပံမှ သူရဲကောင်းများဆီသို့ စီးနင်း သွားခဲ့သည်။

သူတို့၏ ရှေ့တွင် ဗစ်တိုးရီးယား တောအုပ်မှ ချီတက် တိုက်ခိုက်သံများကို ကြားလိုက် ရသည်။ ကြေမွနေသော ချပ်ဝတ်များနှင့် ဖရိုဖရဲ ဖြစ်နေသော ဆံပင်များဖြင့် အရိုင်းအစိုင်း အုပ်စု တစ်စု ပြေးထွက် လာခဲ့သည်။ သူတို့သည် အချိုးအစား ကျသော ကိုယ်ခန္ဓာများဖြင့် ခန့်ညားကြ၏။ အချို့မှာ အရပ်ရှည်ကြပြီး အချို့မှာ အရပ်ပုကြကာ အချို့မှာမူ ရုပ်ဆိုး၍ ပုံပျက်ပန်းပျက် ဖြစ်နေသူများပင် ရှိနေခဲ့သည်။ အချို့မှာ မြင်းစီးသူရဲများ ဖြစ်ကြသော်လည်း သူတို့ အများစုမှာ အလွန် လျင်မြန်စွာ မပြေးနိုင်ခဲ့ကြချေ။

ဤသို့သော ရယ်စရာ ကောင်းသော တပ်ဖွဲ့များကို ကြည့်ရင်း သူတို့ ဂျော့ချ်၏ ကောင်းမွန်စွာ လေ့ကျင့်ထားသော တပ်မတော်ကို ချီတက်တိုက်ခိုက် နေကြသည်မှာ မယုံနိုင်စရာပင်။

ဂျော့ချ် သူ၏ နောက်မှ ထွက်ခွာသွား နေသော အကြံပေး အရာရှိကို မကြည့်ဘဲ မနေနိုင်ဖြစ် သွားခဲ့သည်။ သူ အကြံပေး အရာရှိအပေါ် အထင်အမြင်သေးမှု များဖြင့် ပြည့်နှက် နေခဲ့သည်။ အကြံပေး အရာရှိ ယော့ခ်ရဲတိုက်သို့ ကြောက်လန့်တကြား ထွက်ပြေး ပြန်သွားသော အခါတွင် သူ ဗစ်တိုးရီးယားမြို့ကို သတိကြီးစွာ ထားနေခဲ့သည်။ သို့သော် ယခုမူ စစ်ပုံမကျသော ရန်သူ၏ လှုပ်ရှားမှုများကို ကြည့်ရင်း သူ၏ တပ်ဖွဲ့ ပုံစံကွက်များက သူတို့ကို သတ်ဖြတ်ပစ်တော့မည် ဖြစ်ကြောင်း သူ သိရှိ နေခဲ့သည်။

ရန်သူ နီးကပ်လာသော အခါတွင် ဂျော့ချ် သူ၏ လက်ကို ဝှေ့ယမ်း လိုက်ရာ အချက်ပြ အရာရှိ ကျယ်လောင်စွာ အော်ပြော လိုက်သည်။ "လေးတွေ ပြင်ဆင်ထား။ ပြင်ဆင်—။"

ဂျော့ချ်၏ ဘေးတွင် ဆွဲထားသော လေးညှို့များ၏ တိကျသော အသံများ ထွက်ပေါ် လာခဲ့သည်။ ထို့နောက် အော်ဟစ်သံ တစ်သံ ထွက်ပေါ် လာခဲ့သည်။ "ပစ်—။"

"ဝှစ်—။"

မြားထောင်ပေါင်း များစွာ မိုးကုတ်စက်ဝိုင်းကို ဖြတ်ကျော် ပျံသန်း သွားပြီးနောက် ချီတက် တိုက်ခိုက်နေသော ရန်သူများ အပေါ်သို့ ရွာသွန်း ကျရောက် လာခဲ့သည်။

ရန်သူများ၏ တစ်စိတ်တစ်ပိုင်း မြေပြင်ပေါ်သို့ လဲကျ သွားကြပြီး ကျန်ရှိသော သူများမှာမူ သူတို့၏ ကိုယ်ပေါ်တွင် မြားများ စိုက်ဝင်နေလျက် ချီတက် တိုက်ခိုက် နေကြဆဲ ဖြစ်သည်။ သာမန်အခြေအနေတွင်ဆို သူတို့ မြေပြင်ပေါ်တွင် နာကျင်စွာ အော်ဟစ် လူးလိမ့်နေသင့်သည် မဟုတ်လော။

ဂျော့ချ် သူတို့၏ တိုက်ခိုက်ရေး စိတ်ဓာတ် ဤမျှ ပြင်းထန်လိမ့်မည်ဟု မမျှော်လင့် ထားခဲ့ချေ။ အချက်ပြ အရာရှိ ဒုတိယအကြိမ် ပစ်ခတ်ရန် အမိန့်ပေး လိုက်သည်။ ဤတစ်ကြိမ်တွင် ရန်သူများ ပို၍ လဲကျ သွားကြသည်။ သို့သော် ရန်သူများ ပစ်ခတ် ခံနေရစဉ် မှာပင် ဆက်လက်၍ ချီတက်တိုက်ခိုက် နေကြဆဲ ဖြစ်သည်။

ဂျော့ချ် သူ၏ ကိုယ်ပေါ်တွင် မြားများစွာ စိုက်ဝင်နေသော ချီတက်တိုက်ခိုက် နေသည့် ရန်သူ တစ်ဦးကိုပင် တွေ့မြင်ခဲ့ရသည်။

အချက်ပြအရာရှိ တတိယအကြိမ် ပစ်ခတ်ရန် အမိန့်ပေးရန် ပြင်ဆင်နေစဉ် မှာပင် ဂျော့ချ် သူ၏ လက်ကို မြှောက်ကာ သူ့ကို တားဆီး လိုက်သည်။ သူ သူတို့ကို သတ်ဖြတ်ပစ်ခြင်းထက် ကျွန်များ ပို၍ ရရှိ လိုခဲ့သည်။ မြားများဖြင့် ပစ်ခတ်ခံရသော ရန်သူများသည် တိုက်ပွဲပြီးဆုံးပြီး နောက်တွင် ဒဏ်ရာဖြင့် သေဆုံးသွား ပေလိမ့်မည်။ အကယ်၍ ရန်သူ အားလုံး သေဆုံးသွားခဲ့ပါက ဂျော့ချ် ကျွန် အနည်းငယ် မျှဖြင့် မည်သို့ ပြန်နိုင်မည်နည်း။

"ငါ့ နောက်ကို လိုက်ဖို့ ပြင်ဆင်ကြ။"

ရွှေရောင် ဆံပင်နှင့် ဂျော့ချ်သည် သူ၏ ကြံ့ခိုင်သော မြင်းနက်ကြီးကို ခန့်ညားစွာ စီးနင်းကာ သူရဲကောင်းများ၏ ရှေ့သို့ ရောက်ရှိလာပြီး သူ၏ ဓားရှည်ကို မြှောက်ကာ သူတို့ကို စုစည်းလိုက်သည်။

သူရဲကောင်းများ တိုက်ပွဲဝင် စိတ်ဓာတ် မြင့်မားနေခဲ့ကြသည်။ ဂျော့ချ် သူ၏ မျက်နှာဖုံးကို ဆွဲချလိုက်ပြီး ရှေ့ဆုံးမှ ချီတက် တိုက်ခိုက်ရာ သူရဲကောင်းများ သူ၏ နောက်မှ လိုက်ပါ သွားကြသည်။ မြေပြင်သည် မကြာမီ မြင်းများ ပြေးလွှားသံများဖြင့် တုန်ခါ သွားတော့သည်။

ဗစ်တိုးရီးယားမြို့မှ ချီတက် တိုက်ခိုက်နေသော စစ်သည်တော်များသည် ခန့်ညားသော မြင်းများနှင့် ကောင်းမွန်စွာ လက်နက် တပ်ဆင်ထားသော သူရဲကောင်းများကို မြင်တွေ့ လိုက်ရသော အခါတွင် စိတ်လှုပ်ရှား လာကြသည်။ သူတို့ သားရဲကောင်များ ကဲ့သို့ပင် ဟိန်းဟောက်ကြသော်လည်း ဂျော့ချ် ဂရုမစိုက်ခဲ့ချေ။ သူ ထိုအရိုင်းအစိုင်းများသည် ပထမဆုံး တိုက်ခိုက်မှု လှိုင်းကိုပင် ရှင်သန်နိုင်မည် မဟုတ်ကြောင်း ယုံကြည် နေခဲ့သည်။

၎င်းသည် ဂျော့ချ် မျှော်လင့်ထားသည့် အတိုင်းပင် ဖြစ်ခဲ့သည်။

သူရဲကောင်းများသည် ဗစ်တိုးရီးယား စစ်သည်တော်များကို ခုတ်ပိုင်း ဖြတ်တောက် သွားခဲ့ကြသည်။ ၎င်းသည် သတ်ဖြတ်ပွဲ တစ်ခုအလားပင်။

ဗစ်တိုးရီးယား စစ်သည်တော်များ၏ ပြင်းထန်သော စိတ်ဓာတ်သည် စစ်မြင်းများ၏ ထိခိုက်စေမှုနှင့် လက်နက်များ၏ လျင်မြန်သော ခုတ်ပိုင်းမှုကို မခံနိုင် ခဲ့ကြချေ။

သို့သော် ဂိမ်းမာများ၏ တိုက်ခိုက်ရေး စိတ်ဓာတ်မှာ သာမန် စိတ်ဓာတ် တစ်ခု မဟုတ်ခဲ့ချေ။

ဂျော့ချ် စက္ကူတစ်စ ကဲ့သို့သော ခုခံမှုကို ဖြတ်ကျော် ချီတက် သွားခဲ့သော်လည်း သူ၏ အရှိန်သည် ဗစ်တိုးရီးယား စစ်သည်တော်များ ကြားတွင် နစ်မြုပ် သွားသည်နှင့် အမျှ တဖြည်းဖြည်း နှေးကွေး သွားခဲ့သည်။ မြင်း ပြေးလွှားနေစဉ်မှာပင် သူ ထူးဆန်းသော ခံစားချက် တစ်ခုကို ခံစား လိုက်ရသည်။

တပ်မှူး တစ်ဦး အနေဖြင့် သူ၏ တိုက်ခိုက်ရေး ဉာဏ်ပညာ၊ ရဲစွမ်းသတ္တိ၊ တိုက်ခိုက်ရေး နည်းစနစ်များနှင့် တိုက်ပွဲ အတွေ့အကြုံများမှာ ထူးချွန်လှ၏။ သူ မည်သို့သော တိုက်ပွဲမျိုးကို မကြုံတွေ့ဖူး ခဲ့သနည်း။ သူ ခေါင်းငုံ့ ကြည့်လိုက်သော အခါတွင် သူ အံ့ဩတကြီး အသက်ရှူမှား သွားခဲ့သည်။

သူ ဤသို့သော အခြေအနေမျိုးကို တစ်ခါမျှ မမြင်တွေ့ ဖူးခဲ့ချေ။

သူ သူ၏ မြင်းခြေထောက်ကို ဖက်တွယ် ထားသော ပုံရိပ် တစ်ခုကို တွေ့မြင်လိုက် ရသည်။

၎င်းသည် အက်လ်ဖ် တစ်ဦးပင်။

အက်လ်ဖ်၏ ဦးခေါင်း အထက်တွင် ထူးဆန်းသော သင်္ကေတများ ရှိနေခဲ့ပြီး သူ မြင်းခြေထောက်ကို တင်းတင်းကြပ်ကြပ် ဆုပ်ကိုင် ထားခဲ့သည်။ မြင်း ပြေးလွှားသော အခါတွင် ၎င်းသည် အက်လ်ဖ်ကို ဆွဲယူသွားခဲ့ပြီး ကြောက်မက်ဖွယ် ကောင်းသော သွေးစွန်းနေသည့် အပျက်အစီးများကို ချန်ထားခဲ့သည်။

အက်လ်ဖ် သေဆုံးခြင်း မရှိသေးဘဲ "ဒီမြင်းက ငါ့ ဟာ၊ ဒီမြင်းက ငါ့ ဟာ..." ဟု တိုးတိုးလေး ရေရွတ် နေခဲ့သည်။

အကယ်၍ သူသာ တိုက်ပွဲ အလယ်တွင် မရှိခဲ့ပါက ဂျော့ချ် မြင်းပေါ်မှ ဆင်းသက်ပြီး ဤရူးသွပ်နေသော အက်လ်ဖ်၏ အသက်ကို နုတ်ယူ ပစ်လောက်ပြီ ဖြစ်သည်။

ဂျော့ချ် သူ၏ မြင်းကို လှည့်ကြည့်လိုက်သော အခါတွင် အခြား လူသား တစ်ဦးက မြင်း၏ နောက်ခြေထောက်ကို ဖက်တွယ် ထားခဲ့သည်။

ထိုလူသားသည်လည်း အက်လ်ဖ်နှင့် တူညီ နေခဲ့သည်။ သူ၏ ဦးခေါင်း အထက်တွင် ထူးဆန်းသော အစိမ်းရောင် သင်္ကေတများ ရှိနေခဲ့ပြီး သူ "အလိုလေး။ ဒီမြင်းက အရမ်း မိုက်တာပဲ။" ဟု အော်ဟစ် နေခဲ့သည်။

သူ၏ ကိုယ်ခန္ဓာ မြေပြင်ပေါ်တွင် တရွတ်တိုက် ဆွဲယူခံနေရပြီး သေစေနိုင်သော ဒဏ်ရာများ ရရှိနေသည်ကို သူ လျစ်လျူရှု ထားခဲ့သည်။

ဂျော့ချ်၏ မြင်းသည် အက်လ်ဖ် တစ်ဦးက ၎င်း၏ ခြေထောက် တစ်ဖက်ကို ဖက်တွယ်ထားပြီး နောက်တွင်ပင် ခက်ခဲစွာ ပြေးလွှား နိုင်ခဲ့သေးသည်။ သို့သော် လူသား တစ်ဦးက ၎င်း၏ နောက်ခြေထောက် ကိုပါ ဖက်တွယ် ထားသော အခါတွင်မူ မြင်း ဆက်ပြေးလွှားနိုင်ခြင်း မရှိတော့ချေ။

ဂျော့ချ်၏ စစ်မြင်း ခလုတ်တိုက် လဲကျသွားခဲ့ပြီး ဂျော့ချ်အား မြင်းဇက်ကြိုးကို လွှတ်ချကာ ခုန်ချရန် တွန်းအား ပေးခဲ့သည်။ သူ၏ ရဲဘော်များ သူ၏ နောက်တွင် ရှိနေသေးသောကြောင့် သူ ထိတ်လန့်သွားခြင်း မရှိခဲ့ချေ။

ဂျော့ချ် ခေါင်းလှည့် ကြည့်လိုက်ရာ သူရဲကောင်း များစွာ သူတို့၏ မြင်းများပေါ်မှ ဆွဲချ ခံနေရသည်ကို တွေ့မြင်လိုက် ရသည်။ သို့သော် ၎င်းသည် အရေအတွက် အနည်းငယ် မျှသာ ဖြစ်ပြီး မြင်းပေါ်တွင် ရှိနေသေးသော သူရဲကောင်း များစွာ ရှိနေခဲ့သည်။

ဤအခိုက်အတန့်တွင် ဘယ်ဘက်နှင့် ညာဘက်တောင်ပံမှ သူရဲကောင်းများ တိုက်ခိုက် လာကြပြီး နောက်မှ ခြေလျင် တပ်သားများလည်း ချီတက် တိုက်ခိုက် လာကြသည်။ သို့သော် ဂျော့ချ် ရန်သူတပ်ဖွဲ့အတွင်း နက်ရှိုင်းစွာ ထိုးဖောက် ရောက်ရှိ နေသောကြောင့် ဤအရာကို မသိခဲ့ချေ။ သူ သူ၏ ဓားရှည်ကို ထုတ်ယူလိုက်ရာ နေရောင်ခြည်ကို ရောင်ပြန်ဟပ် သွားခဲ့သည်။ သူ၏ အဖိုးတန်ဓား၏ တောက်ပသော ရောင်ပြန်ဟပ်မှုသည် သာမန်အားဖြင့် သူ၏ ရန်သူများကို ကြောက်စိတ် ဝင်သွားစေရန် လုံလောက်သော်လည်း သူ၏ ဘေးမှ ဂိမ်းမာများ မည်သည့် ကြောက်ရွံ့မှုကိုမျှ မပြသ ခဲ့ကြချေ။ အမှန်တကယ်တွင် သူတို့၏ မျက်လုံးများ လောဘကြီးမှုဖြင့် အရောင်လက် လာခဲ့ကြသည်။

...

သိမ်းငှက် တစ်ကောင် သူ၏ တောင်ပံများကို ခတ်လိုက်ပြီး သူ၏ မျက်လုံးများက မာနာ ရောင်ခြည်များဖြင့် လင်းလက် နေခဲ့သည်။ ၎င်းသည် ဗစ်တိုးရီးယား တောအုပ်၏ နယ်နိမိတ်ကို ဖြတ်ကျော် ပျံသန်း သွားခဲ့သည်။ ထိုနေရာတွင် အနက်ရောင် ထူထပ်သော အစုအဝေး တစ်ခု ရှိနေခဲ့သည်။ ရက်စက် ကြမ်းကြုတ်သော တိုက်ပွဲ တစ်ခု ဖြစ်ပွား နေခဲ့သည်။

စစ်မြင်းများ၏ သုံးဖက်ညှပ် တိုက်ခိုက်မှုက ဗစ်တိုးရီးယား စစ်သည်တော်များကို ထောင့်ချိုးကျ စေခဲ့ပြီး ခြေလျင်တပ်သား ထောင်ပေါင်း များစွာက ရှေ့သို့ ချီတက် တိုက်ခိုက်ကာ အရေအတွက် နည်းပါးသော ဗစ်တိုးရီးယား စစ်သည်တော်များကို လွှမ်းမိုး သွားခဲ့သည်။

ဗစ်တိုးရီးယား စစ်သည်တော်များ သေဆုံးသွား ခဲ့ကြသော်လည်း အားဖြည့် အကူတပ်ဖွဲ့များ တောအုပ်ထဲမှ ဆက်လက်၍ ထွက်ပေါ်လာ နေခဲ့သည်။ အချို့မှာ တစ်ယောက်တည်း၊ အချို့မှာ ဆယ်ဂဏန်း၊ အချို့မှာမူ ရာဂဏန်း ဖြစ်ကြသည်။ သို့သော် သူတို့သည် ဗစ်တိုးရီးယား စစ်သည်တော်များ လုံးဝ ပျက်စီးသွားခြင်းမှ ကာကွယ်ပေးရန် လုံလောက်ခဲ့သည်။

ဂျွန် တိုက်ပွဲအတွင်း သေဆုံး သွားခဲ့သည်။ ဂျော့ချ် သူ၏ အလောင်းကို တွေ့ရှိသော အခါတွင် သူ၏ ပစ္စည်း ကိရိယာများ အားလုံး ချွတ်ယူ ခံထားရပြီး သူ၏ မြင်းပင် ပျောက်ဆုံး နေခဲ့သည်။ မှူးမတ် သူရဲကောင်း တစ်ဦးက ဤသို့သော အရှက်ရဖွယ် သေဆုံးမှု မျိုးကို ကြုံတွေ့ ခဲ့ရသည်။

တိုက်ပွဲထဲတွင် ကရုဏာ တရားဟူ၍ မရှိချေ။ သူရဲကောင်းများသည် တိုက်ပွဲတွင် အသတ်ခံရရန် ပြင်ဆင် ထားခဲ့ကြရသည်။ ၎င်းသည် စစ်ပွဲ၏ အမှန်တရားပင်။

ဂျော့ချ် သူ၏ မိတ်ဆွေဟောင်း၏ သေဆုံးမှု အတွက် ဝမ်းနည်း ပူဆွေးရန် အချိန် မရှိခဲ့ချေ။ ဘေးတွင် သူ၏ သူရဲကောင်း တစ်ဦးက ရုန်းကန်နေသော ဗစ်တိုးရီးယား တစ်ဦးကို ကြိုးဖြင့် ချည်နှောင် နေခဲ့သည်။ သူ နှိမ်နင်းခြင်း မခံရမီ သူ၏ လက်များ ဖြတ်တောက် ခံခဲ့ရသည်။

ဂျော့ချ် သူရဲကောင်းကို တွန်းဖယ်လိုက်ပြီး အော်ပြော လိုက်သည်။ "သူတို့ကို မဖမ်းဆီးနဲ့၊ သတ်ပစ်လိုက်။ သူတို့မှာ အားဖြည့် အကူတပ်ဖွဲ့တွေ အများကြီး ရှိနေတယ်။"

သူရဲကောင်း တုန်လှုပ်သွား ခဲ့သော်လည်း လျင်မြန်စွာဖြင့် သူ၏ လက်နက်ကို ထုတ်ယူလိုက်ပြီး မျှော်လင့်ချက် မဲ့နေသော ချည်နှောင် ခံထားရသည့် အကျဉ်းသား ထံသို့ ချိန်ရွယ် လိုက်သည်။ အကျဉ်းသား လက်နက်ကို မြင်တွေ့လိုက် ရသောအခါတွင် သူ စိတ်လှုပ်ရှားစွာ အော်ပြော လိုက်သည်။ "အလိုလေး။ ငါ့ကို ချက်ချင်း သတ်ပစ်လိုက်ပါတော့။ ငါ ချည်နှောင်ခံထားရတာ ဆယ်မိနစ်လောက် ရှိနေပြီ။"

သူရဲကောင်း သူ့ကို ကရုဏာမဲ့စွာ သတ်ဖြတ် ပစ်လိုက်သည်။

ဂျော့ချ် သတ်ဖြတ်မှုကို မျက်မြင် တွေ့ရှိ ခဲ့သည်။ ဤသို့သော ဗစ်တိုးရီးယား တစ်ဦးမှာ အလွန် ကြောက်မက်ဖွယ် ကောင်းလှ၏။

ဂျော့ချ် အတွေးနက်နေစဉ် အနက်ရောင် ပုံရိပ် တစ်ခု လျှပ်တပြက် ဖြတ်သန်း သွားသည်ကို မြင်တွေ့လိုက် ရသည်။ သူ ရှောင်တိမ်းရန် ဘေးသို့ ပစ်လဲလိုက်သည်။ ထို့နောက် သူ ပုံပျက်ပန်းပျက် ဖြစ်နေသော လူသား တစ်ဦးကို တွေ့မြင်လိုက် ရသည်။ ၎င်းသည် လူဆိုးလေးပင်။

ဂျော့ချ် စစ်သည်တော် ပြိုင်ကွင်းတွင် ထင်ရှားကျော်ကြား ခဲ့သော ထိုလူကို မှတ်မိ သွားခဲ့သည်။ လူဆိုးလေးသည် ဓားတို နှစ်လက်ကို ကိုင်စွဲထားခဲ့ပြီး သူ၏ ပါးစပ်ထဲတွင်လည်း ဓားတို တစ်လက် ရှိနေခဲ့သည်။

ဓားသုံးလက်ဖြင့် လူဆိုးလေး၏ ဓားရေးမှာ နတ်ဘုရား အဆင့်သို့ ရောက်ရှိ နေခဲ့သည်။