လူသားရွှယ်ယုက နဂါးငွေ့တန်းကြယ်သခင်....

နဂါးငွေ့တန်းကြယ်သခင်က အလွှာတစ်ဆယ်သာ ဖြစ်ပြီး နတ်ဘုရင်နှင့် အခြားအလွှာဆယ့်တစ် အထွတ်အထိပ်များကို ဘယ်လိုလုပ် အနိုင်ယူနိုင်မှာလဲ။ ထို့အပြင် နတ်ဘုရင်က သူနှင့် ပြည့်စုံစွာလိုက်ဖက်နေသော ကြီးမြတ်သူအဆင့် လက်နက်ကို ပိုင်ဆိုင်ထားသည်။

သို့သော် နဂါးငွေ့တန်းကြယ်သခင် ပြသခဲ့သော လက်ရှိခွန်အားအပေါ် အခြေခံ၍ သူက အလွှာဆယ့်တစ်သို့ တက်လှမ်းပြီးချိန်တွင် အထွတ်အထိပ်မျိုးနွယ်များမှ အသန်မာဆုံး အလွှာဆယ့်တစ်များကို အနိုင်ယူနိုင်ခဲ့သည်။

ထို့အပြင် အဖြူရောင်စာရွက်ဆင်းသက်လာချိန်တွင် နဂါးငွေ့တန်းကြယ်သခင်လည်း အထဲသို့ ကျရောက်ခဲ့သည်။ ရွှယ်ယုနှင့် နဂါးငွေ့တန်းကြယ်သခင်တို့က တစ်ချိန်တည်း တစ်နေရာတည်းတွင် တစ်ခါမှ မပေါ်လာဖူးပေ။ ထို့အပြင် အဖြူရောင်စာရွက်ထွက်သွားပြီးနောက် နဂါးငွေ့တန်းကြယ်သခင်က အလွှာဆယ့်တစ်သို့ လျင်မြန်စွာ တက်လှမ်းခဲ့သည်။

ယေဘုယျအားဖြင့် ဒိုင်မန်းရှင်းနှစ်ခုကမ္ဘာထဲတွင် အခြေခံဆုံးရှုံပြီးလျှင် လူသားမျိုးနွယ်က တန်ဖိုးတစ်ခုပေးဆပ်လျှင်တောင် နဂါးငွေ့တန်းကြယ်သခင်က ထိုမျှမြန်မြန် အဆင့်တက်နိုင်မည်မဟုတ်ပေ။

တစ်ခုတည်းသော ရှင်းပြချက်မှာ နဂါးငွေ့တန်းကြယ်သခင်က ဒိုင်မန်းရှင်းနှစ်ခုကမ္ဘာ၏ မသေဆုံးခဲ့ခြင်း ဖြစ်သည်။ ၎င်းမှာ ရွှယ်ယုက ဒိုင်မန်းရှင်းနှစ်ခုကမ္ဘာမှ လွတ်မြောက်ခဲ့သည်ဟူသော အချက်နှင့် ကိုက်ညီနေသည်။

သဲလွန်စအားလုံးက ဖြစ်နိုင်ခြေတစ်ခုတည်းကိုသာ ရည်ညွှန်းနေသည်။ ၎င်းမှာ ဒိုင်မန်းရှင်းနှစ်ခုကမ္ဘာကို လွှမ်းမိုးခဲ့သော လူသားရွှယ်ယုက နဂါးငွေ့တန်းကြယ်သခင်ဖြစ်သည်။

" ဟမ် ပြီးတော့ရော " ကြီးမြတ်သူရှချင်က ဂရုမစိုက်ဘဲ ပြောလိုက်သည်။

လင်းယွမ်က စစ်မြေပြင်သို့ ဝင်ရောက်ပြီး သူ၏ စွမ်းအားအချို့ကို ထုတ်ဖော်ခဲ့လျီင် လူသားရွှယ်ယု၏ သဲလွမ်စ ထွက်ပေါ်လာနိုင်သည်ကို ကြီးမြတ်သူရှချင်က ကြိုတင်ခန့်မှန်းခဲ့ပြီးဖြစ်သည်။

သို့သော် ဘာဖြစ်လဲ။ ထွက်ပေါ်သွားလျှင်တောင် ဒိုင်မန်းရှင်းနှစ်ခုကမ္ဘာတွင် လူသားရွှယ်ယု သတ်ဖြတ်ခဲ့သော မျိုးနွယ်အမျိုးမျိုးမှ အင်အားကြီးသူများက ဘာလုပ်နိုင်မှာမလို့လဲ။

" ကောင်းတယ်။ " ကြယ်စကြာဝဠာမဟာမိတ်မှ ကြီးမြတ်သူက တိတ်ဆိတ်နေပြီး စိတ်ထဲမှ တုန်လှုပ်မှုကို ခံစားလိုက်ရသည်။

ဒိုင်မန်းရှင်းနှစ်ခုကမ္ဘာတွင် လူသားရွှယ်ယုက နတ်ဘုရင်ကို သတ်ဖြတ်သည်ကို မြင်ရချိန်တွင် သူက များစွာ အံ့ဩခြင်းမရှိခဲ့ပေ။ အထူးသဖြင့် လူသားရွှယ်ယုက လူသားမျိုးနွယ်မှ ပေးအပ်ထားသော ရတနာများရှိနိုင်သည်ဟု ယူဆရသည်။ သို့သော် လူသားရွှယ်ယုက နဂါးငွေ့တန်းကြယ်သခင်ဟု ခန့်မှန်းမိသောအခါ သူ၏ စိတ်ထဲတွင် မငြိမ်မသက် ဖြစ်လာမိသည်။

" လူသားရွှယ်ယုက နဂါးငွေ့တန်းကြယ်သခင်လား။ "

" ဘယ်လိုလုပ်ဖြစ်နိုင်မှာလဲ။ အဲ့ဒီအချိန်တုန်းက နဂါးငွေ့တန်းကြယ်သခင်က အလွှာတစ်ဆယ်ပဲ ရှိသေးတာမဟုတ်လား။ "

" အလွှာတစ်ဆယ်က အလွှာဆယ့်တစ် အထွတ်အထိပ်တွေကို ရှင်းပစ်နိုင်တာလား။ "

ကြီးမြတ်သူများက နဂါးငွေ့တန်းကြယ်သခင်ကို လူသားရွှယ်ယုနှင့် ဆက်စပ်တွေးနေကြသည်။ အလွှာတစ်ဆယ်တစ်ယောက်က အလွှာဆယ့်တစ်များကို ရှင်းပစ်နိုင်ခြင်းက ဒိုင်မန်းရှင်းနှစ်ခုကမ္ဘာမှာပင် အဓိပ္ပါယ်မရှိပေ။ ကပ်ဘေးမျိုးနွယ်၏ အဖွဲ့ဝင်များပင် မလုပ်နိုင်လောက်ပေ။

ကပ်ဘေးမျိုးနွယ်က အဆင့်တူအတွင်း မရှုံးနိမ့်နိုင်ခြင်းဖြစ်သည်။ ပို၍ အဆင့်မြင့်လာသည်နှင့် အဆင့်ကျော်တိုက်ခိုက်ရန် မဖြစ်နိုင်လုနီးပါး ဖြစ်သည်။

လူသားရွှယ်ယုက နဂါးငွေ့တန်းကြယ်သခင်ဖြစ်သည်ဟူသော ယူဆချက်က ကြီးမြတ်သူများကြား ပျံ့နှံ့သွားပြီး မကြာမီ အောက်မှ အလွှာဆယ့်တစ် အင်အားကြီးသူများကလည်း ၎င်းကို သိရှိလာကြသည်။ အထူးသဖြင့် မဟာစစ်မြေပြင်အတွင်းမှ လင်းယွမ်ကို ပစ်မှတ်ထားသူများက သူ၏ အကြောင်း အချက်အလက်များကို အဆက်မပြတ် စုဆောင်းနေကြသည်။

" လူသားရွှယ်ယုက နဂါးငွေ့တန်းကြယ်သခင်လား။ "

" ကြီးမြတ်သူကိုယ်တိုင် ငါ့ကို ပြောတာပဲ။ မင်းဘယ်လိုထင်လဲ။ "

အထွတ်အထိပ်မျိုးနွယ်များမှ အလွှာဆယ့်တစ် အင်အားကြီးသူများက မယုံကြည်နိုင်ဖြစ်နေကြသည်။ သူတို့ထဲမှ အများစုက ဒိုင်မန်းရှင်းနှစ်ခုကမ္ဘာသို့ ကျရောက်ခဲ့ပြီး လူသားရွှယ်ယု၏ လွှမ်းမိုးမှုကို ခံစားနေရဆဲ ဖြစ်သည်။ ထိုအချိန်တွင် နဂါးငွေ့တန်းကြယ်သခင်က အလွှာတစ်ဆယ်သာ ဖြစ်ပြီး အသက်က ရာစုနှစ်အနည်းငယ်သာ ရှိသေးသည်။

" နဂါးငွေ့တန်းကြယ်သခင် " ကြယ်စကြာဝဠာမဟာမိတ်၏ စစ်စခန်းတွင် နတ်ဘုရင်က ခြေချိတ်ထိုင်နေပြီး သူ၏ အမူအရာက လေးနက်နေသည်။

လူသားမျိုးနွယ်၏ အရိပ်က သူ့အပေါ်တွင် ကြီးမားစွာ လွှမ်းမိုးနေဆဲ ဖြစ်ပြီး ယခု လူသားရွှယ်ယု၏ သရုပ်မှန်ကို သိရသောအခါ နတ်ဘုရင်၏ စိတ်က လစ်ဟာသွားသည်။

လူသားမျိုးနွယ်မဟာမိတ် စစ်စခန်း။

ရွှမ်ယွမ်ယိုနှင့် လူသားဆင့်ကဲပြောင်းလဲသူများက စိတ်အားထက်သန်စွာ ဆွေးနွေးနေကြသည်။

" နဂါးငွေ့တန်းကြယ်သခင်က ရွှယ်ယုလား။ "

" အဲ့ဒါကြောင့် နဂါးငွေ့တန်းကြယ်သခင်က ဒီစစ်ပွဲမှာ ဗိုလ်ချုပ်တစ်ယောက်ဖြစ်လာတာလား။ "

" အလွှာတစ်ဆယ်မှ ဒီလိုခွန်အားမျိုး.... ငါ နှစ်ပေါင်းများစွာ အချိန်ဖြုန်းခဲ့တယ်လို့ ခံစားရတယ်။ "

အလွှာဆယ့်တစ် ဆင့်ကဲပြောင်းလဲသူများက စိတ်လှုပ်ရှားစွာ ပြောလိုက်ကြသည်။ အခြားမျိုးနွယ်များနှင့် ယှဉ်လျှင် လူသားမျိုးနွယ်မှ ဆင့်ကဲပြောင်းလဲသူများက နဂါးငွေ့တန်းကြယ်သခင်မှာ နဂါးငွေ့တန်းကြယ်သခင်ဖြစ်သည်ကို သိရသောအခါ တုန်လှုပ်မှုကိုသာမက ဂုဏ်ယူမှုကိုပါ ခံစားခဲ့ရသည်။

မည်သို့ပင်ဖြစ်စေ ထိုလူက သူတို့၏ လူသားမျိုးနွယ်မှ ပြိုင်ဘက်ကင်း ပါရမီရှင်တစ်ယောက်ဖြစ်သည်။ အစတွင် သူတို့၏ အမြင်မှာ လူသားရွှယ်ယုက လူသားဆင့်ကဲပြောင်းလဲသူတစ်ယောက်ဖြစ်သော်လည်း နဂါးငွေ့တန်းကြယ်သခင်မဟုတ်ပေ။

လူသားရွှယ်ယုက အစွမ်းထက်သော်လည်း သူကျင့်ကြံခဲ့သည်မှာ နှစ်ပေါင်းမည်မျှဖြစ်သည်ကို မသိရသောကြောင့် ကျိုးကြောင်းဆီလျော်မှုရှိနေဆဲ ဖြစ်သည်။ သို့သော် နဂါးငွေ့တန်းကြယ်သခင်၏ တိုးတက်မှုက လျို့ဝှက်ချက်မဟုတ်ဘဲ အနည်းငယ် စုံစမ်းကြည့်သည်နှင့် သိနိုင်သည်။

" နဂါးငွေ့တန်းကြယ်သခင်က လူသားရွှယ်ယုလား။ " နာလန်က အနည်းငယ် ထိတ်လန့်သွားသည်။ သူက ဒိုင်မန်းရှင်းနှစ်ခုကမ္ဘာတွင် လင်းယွမ်ကို လူသားရွှယ်ယုနှင့် တွေ့ဆုံရန် အကြိမ်ကြိမ် ဖိတ်ခေါ်ခဲ့သော်လည်း အောင်မြင်ခြင်းမရှိခဲ့ပေ။ ယခု နဂါးငွေ့တန်းကြယ်သခင်က လူသားရွှယ်ယုဖြစ်နေသည်။

" နဂါးငွေ့တန်းကြယ်သခင်က လူသားရွှယ်ယု ဟုတ်ဟုတ် မဟုတ်ဟုတ် လာမယ့်စစ်ပွဲမှာ ငါတို့ မရှုံးနိမ့်နိုင်​တော့ဘူး။ " ရွှမ်ယွမ်ယိုက အလားတူ တုန်လှုပ်နေသော်လည်း တည်ငြိမ်စွာဖြင့် ပြောလိုက်သည်။

" ကြီးမြတ်သူက နဂါးငွေ့တန်းကြယ်သခင်ကို အလွှာဆယ့်နှစ် တက်လှမ်းဖို့ မျှော်လင့်ချက်အရှိဆုံးလို့ ပြောတာ အံ့ဩစရာမရှိဘူး။ အလွှာတစ်ဆယ်မှာ ဒီလိုအရည်အချင်းမျိုးနဲ့ဆို ငါ့ထက် အများကြီး ပိုအစွမ်းထက်တယ်။ " ရွှမ်ယွမ်ယိုက တွေးလိုက်သည်။

အချိန်များက တဖြည်းဖြည်း ကုန်လွန်လာခဲ့သည်။ နဂါးငွေ့တန်းကြယ်သခင်က လူသားရွှယ်ယုဖြစ်သည်ဟူသော သတင်းက ရုတ်ရုတ်သဲသဲ ဖြစ်စေခဲ့သော်လည်း မကြာမီနီးကပ်လာသော စစ်ပွဲကြောင့် ဖိနှိပ်ခံလိုက်ရသည်။

မဟာစစ်မြေပြင်၏ အဓိကဧရိယာတွင် အထွတ်အထိပ်မျိုးနွယ် ဆယ့်နှစ်ခုမှ အင်အားကြီးသူများက အဆက်မပြတ် စုစည်းနေကြသည်။ သူတို့က လေဟာနယ်ထဲတွင် ရပ်နေကြပြီး ကြီးမြတ်သူအဆင့် လက်နက်များ၏ အော်ရာများက ထွက်ပေါ်နေကြသည်။

" လူသားမျိုးနွယ် " အင်းဆက်မျိုးနွယ်အသိုက်များက လေထဲတွင် ပျံဝဲနေပြီး အင်းဆက်မျိုးနွယ်စစ်သည်များ ထွက်ပေါ်လာကြသည်။

ကြီးမားသော စစ်ပွဲအတွင်း အထွတ်အထိပ်မျိုးနွယ်များက လှည့်ပတ် တိုက်ခိုက်နေကြပြီး လူသားမျိုးနွယ်မဟာမိတ်နှင့် အင်းဆက်မျိုးနွယ်မဟာမိတ်တို့က အဓိကရန်သူများဖြစ်ကြသည်။

အခြားမျိုးနွယ်ဆယ်ခုကလည်း သတ်ဖြတ်ခြင်းတွင် ပါဝင်ခဲ့ကြသည်။ စစ်မြေပြင်၏ အလယ်တွင် အချိန်လေဟာနယ်လှိုင်းများ ထွက်ပေါ်နေပြီး ကြောက်စရာကောင်းသော အော်ရာများက ပေါက်ကွဲလာသည်။

" စိတ်ဝိညာဉ်တိုက်ခိုက်မှုကို သတိထားကြ။ " ရွှမ်ယွမ်ယိုက ဦးဆောင်ပြီး အကြီးဆုံး အင်းဆက်မျိုးနွယ်အသိုက်ဆီသို့ တိုက်ခိုက်သွားနေသည်။

ဝုန်း ဝုန်း....

လေဟာနယ်က တွန့်လိမ်သွားပြီး ကြောက်စရာကောင်းသော စိတ်ဝိညာဉ်တိုက်ခိုက်မှုများက ဆင်းသက်လာသည်။ အလွှာဆယ့်တစ် အင်းဆက်မျိုးနွယ်စစ်သည်များက တစ်ချိန်တည်းတွင် တိုက်ခိုက်လိုက်ကြသည်။

အင်းဆက်မျိုးနွယ်အသိုက်များက တိုက်ရိုက်တိုက်ခိုက်မှုတွင် မကျွမ်းကျင်သော်လည်း သူတို့ကိုသူတို့ ကာကွယ်နိုင်စွမ်းမရှိဟု မဆိုလိုပေ။ အင်းဆက်မျိုးနွယ်အသိုက်၏ စိတ်ဝိညာဉ်တိုက်ခိုက်မှုများက ထူးခြားလှသည်။

အင်းဆက်မျိုးနွယ်အသိုက်များက အင်းဆက်မျိုးနွယ်စစ်သည်များစွာကို တစ်ချိန်တည်းတွင် ထိန်းချုပ်ရန် ကြီးမားသော စိတ်စွမ်းအားကို လိုအပ်သည်။ စိတ်စွမ်းအား အားကောင်းသည်နှင့်အမျှ စိတ်ဝိညာဉ်တိုက်ခိုက်မှုတွင် ပို၍ ကျွမ်းကျင်ကြသည်။

" မကောင်းတော့ဘူး။ " ရွှမ်ယွမ်ယိုက အမြင်များ ဝေဝါးလာသည်ကို ခံစားလိုက်ရသည်။ တစ်ချိန်တည်းတွင် ရွှေရောင်အလင်းတစ်ခုက သူ၏ နဖူးပေါ်တွင် ထွက်ပေါ်လာပြီး စိတ်ဝိညာဉ်တိုက်ခိုက်မှုများကို ခုခံသွားသည်။

" မမျှော်လင့်ဘဲ မင်းတို့ အင်းဆက်မျိုးနွယ်ရဲ့ ဘုရင်မက အဲ့ဒီရတနာကို ယူလာခဲ့တာပဲ။ " ရွှမ်ယွမ်ယို၏ အမူအရာက လေးနက်သွားပြီး အဝေးရှိ ကြီးမားသော အင်းဆက်မျိုးနွယ်အသိုက်ကို စိုက်ကြည့်လိုက်သည်။

အင်းဆက်မျိုးနွယ်အသိုက်မှ စိတ်ဝိညာဉ်လှိုင်းများက ပတ်ဝန်းကျင်သို့ ပျံ့နှံ့လာပြီး လူသားမျိုးနွယ်မဟာမိတ်၏ အလွှာဆယ့်တစ် အင်အားကြီးသူများပေါ်သို့ ကျရောက်လာသည်။

" အိပ်မက်ဆိုးနယ်မြေ " ရွှမ်ယွမ်ယိုက ကြီးမားသော အင်းဆက်မျိုးနွယ်အသိုက်၏ ထိပ်မှ နန်းတော်သဏ္ဍန် လက်နက်ကို ကြည့်လိုက်သည်။

အိပ်မက်ဆိုးနယ်မြေက အင်းဆက်မျိုးနွယ်၏ မျိုးနွယ်ကာကွယ်ရေးလက်နက်ဖြစ်ပြီး စိတ်ဝိညာဉ်တိုက်ခိုက်မှုတွင် အလွန်အစွမ်းထက်သည်။ ထိုလက်နက်က လူသားမျိုးနွယ်၏ ကြီးမြတ်သူယုတိုင်ကို အကြိမ်များစွာ ဒုက္ခပေးခဲ့ဖူးသည်။