စစ်မှန်သောနဂါးကျင့်စဉ် အဆင့်ရှစ်

ဂိုယွမ်၏ စကားကို ကြားလိုက်ရသည့်အခါ ယွမ်ချီလန်နှင့် ကူးလင်ဖန်တို့ မျက်လုံးချင်းဆုံကာ အသံမထွက်ဘဲ တစ်ဦးကိုတစ်ဦး ကြည့်နေကြသည်။

ဂိုယွမ်တစ်ဦးတည်း နားမလည်နိုင်သည်မဟုတ်။

သူတို့သည် လော့ချန်နှင့် အချိန်အတော်ကြာ သိကျွမ်းခဲ့ပြီးဖြစ်သည့်တိုင် ပို၍ပင် နားမလည်နိုင်ကြပေ။

လော့ချန်၏ စွမ်းအားတိုးတက်နှုန်းအပြင် စွမ်းအင်အဆင့်ကပါ သူတို့ လုံးဝမမျှော်မှန်းနိုင်သည့် ခံစားချက်ကို ဖြစ်ပေါ်စေသည်။ ထို့အပြင် သူတို့သည် ဤခံစားချက်ကို တဖြည်းဖြည်း အကျင့်ဖြစ်လာခဲ့ပြီဖြစ်သည်။

လော့ချန်က ဂိုယွမ်ကို ဂရုမစိုက်ဘဲ မှော်အိမ်တော်ဆီသို့ လှည့်ထွက်သွားသည်။

စွမ်းအင်ဆေးလုံး နှစ်ထောင်နီးပါး ရရှိထားပြီးဖြစ်သဖြင့် သူသည် နဝမမြောက် စွမ်းအင်လှိုင်းဝဲကို ပြည့်စုံအောင် ကျင့်ကြံရန် မစောင့်နိုင်တော့ပေ။

ချန်လင်းယူအပါအဝင် သုံးဦးသားလည်း နောက်မှ လိုက်လာကြသည်။

ချန်လင်းယူက မေးလိုက်သည်။

“မောင်လေး နောက်ထပ် ဘာလုပ်ဖို့ စီစဉ်ထားလဲ…”

လော့ချန်က ဖြေသည်။

“ငါ နှစ်ရက်လောက် သိုင်းကျင့်ကြံပြီးရင် လင်ကျန်းမြို့ကို သွားဖို့ စဉ်းစားထားတယ်… ထုံရွှမ်နယ်ပယ် ဒုတိယအဆင့်ကို တက်လှမ်းဖို့ ဝိညာဉ်ဆေးတွေ ဝယ်မယ်…”

ထိုစကားကို ကြားလိုက်ရသည့်အခါ ချန်လင်းယူ၏ မျက်လုံးများထဲတွင် အံ့အားသင့်မှု ဖြတ်ပြေးသွားသည်။

သာမန်လူတစ်ဦးအတွက် ထုံရွှမ်နယ်ပယ် ပထမအဆင့်နောက်ပိုင်းမှ ဒုတိယအဆင့်သို့ တက်လှမ်းရန် အနည်းဆုံး တစ်လခန့် သို့မဟုတ် သုံးလလေးလခန့် လိုအပ်တတ်သည်။

သို့သော် လော့ချန်၏ ပါးစပ်မှထွက်လာသည့်အခါ ဤအရာသည် ထမင်းစားရေသောက်ရသည့်အလား ရိုးရှင်းလှသည်။

စိတ်အစဉ်ကို တည်ငြိမ်အောင် ထိန်းလိုက်ပြီး ချန်လင်းယူက ဆက်ပြောသည်။

“ထုံရွှမ်နယ်ပယ် အဆင့်သုံးမှာ ကျင့်ကြံရတဲ့ အဓိကအချက်တွေ မတူညီဘူး… ပထမအဆင့်က စွမ်းအင်အိမ်တော်ကို ဖွင့်လှစ်ပြီး ချီစွမ်းအင်ကို သန့်စင်ရတာ… ဒုတိယအဆင့်က နှလုံးရဲ့ ကံကြမ္မာတံခါးကို ဖွင့်ပြီး သွေးစွမ်းအင်ကို သန်မာစေရတာ… တတိယအဆင့်ကတော့ နတ်စွမ်းအင်တံခါးကို ဖွင့်ပြီး ဝိညာဉ်စွမ်းအင်ကို ပြုစုပျိုးထောင်ရတာ…”

“အဲဒီအခါမှာ သွေးစွမ်းအင်ကို သန်မာစေမယ့် ဝိညာဉ်ဆေးတွေကို အများကြီး ဝယ်ထားလိုက်ရင် ထုံရွှမ်နယ်ပယ် ဒုတိယအဆင့်ကို တက်လှမ်းပြီးနောက် မင်းရဲ့ ကျင့်စဉ်နှုန်းကို သိသိသာသာ မြှင့်တင်ပေးနိုင်လိမ့်မယ်…”

“အစ်မကြီး လမ်းညွှန်ပေးတာ ကျေးဇူးတင်ပါတယ်…”

လော့ချန်က ခေါင်းညိတ်ပြသည်။

ရွှမ်ယွမ်ကျမ်းတွင် ထုံရွှမ်နယ်ပယ် အဆင့်သုံးအကြောင်း ဖော်ပြထားသော်လည်း ဤမျှ အသေးစိတ်မဟုတ်ပေ။

မှော်အိမ်တော်သို့ ရောက်ရှိသည့်အခါ လူလေးဦးသည် မိမိတို့နေထိုင်ရာနေရာသို့ ကိုယ်စီ လမ်းခွဲထွက်ခွာလိုက်ကြသည်။

အပြင်စည်းပြိုင်ပွဲကြီး နီးကပ်လာပြီဖြစ်သဖြင့် နောက်ဆုံးလတစ်လအတွင်း အားလုံးက အပြည့်အဝ ကျင့်ကြံအားထုတ်ကြရန် ဆုံးဖြတ်ထားကြသည်။

သိုင်းလေ့ကျင့်ကွင်းသို့ ပြန်ရောက်သည့်အခါ လော့ချန်သည် နက်ရှိုင်းစွာ အသက်ရှူသွင်းလိုက်ပြီး သူ၏ခန္ဓာပေါ်မှ စွမ်းအင်ဆေးလုံး တစ်ထောင့်ကိုးရာကို ထုတ်ယူလိုက်သည်။

“တကယ်ကို ရေငတ်နေတုန်း ရေတွင်းထဲ ကျသလိုပဲ... အခုဆို စွမ်းအင်လှိုင်းဝဲ ကိုးခုကို ပြည့်စုံအောင် လုပ်ဖို့ အချိန်ရောက်ပြီ…”

လော့ချန်သည် လင်ကျန်းမြို့သို့ သွားပြီး သူ၏ ထူးခြားရတနာများနှင့် ကြယ်အဆင့်လက်နက်များကို ရောင်းချကာ စွမ်းအင်ဆေးလုံးများ ဝယ်ယူပြီးမှသာ စွမ်းအင်လှိုင်းဝဲ ကိုးခုကို ပြည့်စုံအောင် ကျင့်ကြံနိုင်မည်ဟု ထင်ခဲ့သည်။

ယခုတော့ ထိုသို့လုပ်ရန် မလိုအပ်တော့ပေ။

တင်ပြင်ခွေထိုင်လိုက်ပြီး လော့ချန်သည် မျက်လုံးများကို မှိတ်လိုက်ကာ စွမ်းအင်ကျင့်စဉ်ကို အပြည့်အဝ အာရုံစိုက်လုပ်ဆောင်သည်။

“ဝမ်း…”

ရောင်စဉ်ကိုးသွယ်မှော်အလင်းက ထိန်လင်းတောက်ပလျက် လော့ချန်၏ နောက်ကျောမှ ရောင်စဉ်ကိုးသွယ်သိုင်းဝိညာဉ်ဥတစ်လုံး ထွက်ပေါ်လာပြီး လျင်မြန်စွာ လှည့်ပတ်ကာ အားကောင်းလှသည့် စုပ်ယူမှုစွမ်းအင်ကို ဖြန့်ထုတ်လျက် ပတ်ဝန်းကျင်ရှိ မိုးမြေချီစွမ်းအင်နှင့် စွမ်းအင်ဆေးလုံးများ၏ သန့်စင်သော စွမ်းအင်များကို အဆက်မပြတ် စုပ်ယူနေသည်။

အချိန်သည် ရေစီးကဲ့သို့ စီးဆင်းသွားသည်။

နဝမမြောက် စွမ်းအင်လှိုင်းဝဲကို ပြည့်စုံအောင် ကျင့်ကြံရန်မှာ ယခင်ကထက် ပို၍ ခက်ခဲသည်။

တစ်ရက်တစ်ညလုံး ကုန်လွန်သွားပြီး ဒုတိယမြောက်နေ့ မနက်ခင်းသို့ ရောက်ရှိလာသည်။

“ဘုန်း…”

ရုတ်တရက် လော့ချန်၏ ခန္ဓာအတွင်းမှ မိုးကြိုးပစ်သံကဲ့သို့ ပေါက်ကွဲသံတစ်ခု ထွက်ပေါ်လာပြီး နဂါးဟောက်သံများ ဝိုင်းဝိုင်းလည်လျက် ပဲ့တင်ထပ်နေသည်။

ထိုအခိုက်အတန့်တွင် ကြောက်မက်ဖွယ်ရာ စွမ်းအင်ထုတ်လွှတ်မှုသည် လှိုင်းလုံးကဲ့သို့ သောင်းကျန်းစွာ ဒလဟောထွက်ပေါ်လာသည်။

သိုင်းလေ့ကျင့်ကွင်းပတ်ဝန်းကျင်ရှိ မျက်နှာပြင်အတားအဆီးများသည် ပြင်းထန်စွာ လှုပ်ခတ်သွားသည်။

“စွမ်းအင်လှိုင်းဝဲ ကိုးခု ပြည့်စုံသွားပြီ… တကယ်ကို အားကောင်းလှတဲ့ ခံစားချက်ပဲ…”

စွမ်းအင်လှိုင်းဝဲတစ်ခုစီ ပြည့်စုံသွားသည့်အခါတိုင်း လော့ချန်သည် သူ၏စွမ်းအားတိုးတက်မှုကို ခံစားရသည်။

သို့သော် ယခင်က တစ်ကြိမ်မျှ ယခုအကြိမ်ကဲ့သို့ မဖြစ်ခဲ့ပေ။

ဤအကြိမ်သည် တိုးတက်မှုတစ်ခုမျှမဟုတ်ဘဲ ထူးကဲစွာ ခုန်တက်သွားခြင်းဖြစ်သည်။

“ဘာဖြစ်တာလဲ ကြည့်ကြည့်အုံးမယ်…”

လော့ချန်သည် တစ်ယောက်တည်း ရေရွတ်လိုက်ပြီး သူ၏စိတ်ဝိညာဉ်ကို ဒျန်တန်ထဲသို့ ထိုးဖောက်ကာ စူးစမ်းလိုက်သည်။

ဒျန်တန်အတွင်းတွင် ကြယ်တာရာပုံစံ စွမ်းအင်လှိုင်းဝဲ ကိုးခုသည် လျင်မြန်စွာ လှည့်ပတ်နေပြီး တစ်ခုနှင့်တစ်ခု အပြန်အလှန်သက်ရောက်မှုအောက်တွင် အားပြည့်ဝစွာ လည်ပတ်နေသည်။ စွမ်းအင်သည် အရည်အသွေးရော ပမာဏပါ အဆင့်တစ်ဆင့် မြင့်တက်သွားသည်။

ထို့အပြင် စွမ်းအင်လှိုင်းဝဲတစ်ခုစီ၏ ဗဟိုတွင် လက်မတစ်လုံးခန့်မြင့်သော ခရုပုံစွမ်းအင်အလင်းတိုင်တစ်ခု ရှိနေသည်။

ထိုခရုပုံအလင်းတိုင်သည် ရောင်စဉ်ကိုးသွယ်အလင်းရောင်ကို ဖြန့်ထုတ်လျက် သန့်စင်ပြီး လျှို့ဝှက်ဆန်းကြယ်လှသည်။

ဤမြင်ကွင်းကို စိတ်ဝိညာဉ်ဖြင့် စူးစမ်းကြည့်ရှုရင်း လော့ချန်၏ မျက်နှာပေါ်တွင် ဝမ်းမြောက်မှုအရိပ်အယောင် ပေါ်ထွက်လာသည်။

ထိုခရုပုံအလင်းတိုင်သည် စွမ်းအင်ဝိညာဉ်အလင်းပင်ဖြစ်သည်။

ဤစွမ်းအင်ဝိညာဉ်အလင်းသည် နှလုံးရှိ ကံကြမ္မာတံခါးကို ဖောက်ထွင်းနိုင်သည်နှင့်တစ်ပြိုင်နက် ၎င်းသည် သွေးကြောများကဲ့သို့ နှလုံးနှင့် ဆက်စပ်လျက် ဖြတ်တောက်မရ၊ ခွဲထုတ်မရသော အခြေအနေသို့ ရောက်ရှိသွားမည်ဖြစ်သည်။

ထိုအခါတွင် သိုင်းသမားတစ်ဦးသည် ချီစွမ်းအင်ဖြင့် သွေးစွမ်းအင်ကို သန်မာစေပြီး သွေးစွမ်းအင်ဖြင့် ချီစွမ်းအင်ကို ပြုစုပျိုးထောင်ကာ တစ်ကိုယ်လုံး၏ သွေးစွမ်းအင်နှင့် ချီစွမ်းအင်တို့ ရောယှက်ပေါင်းစည်းလျက် ခန္ဓာကိုယ်သည် အသွင်ပြောင်းလဲသွားပြီး သက်တမ်းသည်လည်း နှစ်ရာချီ တိုးလာမည်ဖြစ်သည်။

ထို့အပြင် စွမ်းအင်ကို အပြင်သို့ ထုတ်လွှတ်နိုင်ပြီး အကွာအဝေးမှ ရန်သူကို သတ်ဖြတ်နိုင်ကာ စွမ်းအားသည် နှစ်ဆတိုးတက်လာမည်ဖြစ်သည်။

“အဆင်ပြေတယ်… စွမ်းအင်ဝိညာဉ်အလင်းပေါ်လာပြီ… အခုမှ ငါဟာ ထုံရွှမ်နယ်ပယ် ပထမအဆင့်ရဲ့ အထွတ်အထိပ်ကို တကယ်ရောက်သွားပြီ… ဝိညာဉ်ဆေးနဲ့ ဆေးလုံးတွေ လုံလောက်ရင် ထုံရွှမ်နယ်ပယ် ဒုတိယအဆင့်ကို တက်လှမ်းဖို့ သိပ်မကြာတော့ဘူး…”

လော့ချန်၏ မျက်လုံးများထဲတွင် မျှော်လင့်ချက်အရိပ်အယောင်များ ထင်ဟပ်လာသည်။

ချက်ချင်းပင် သူ၏အကြည့်တစ်ချက် လှည့်လိုက်ပြီး လက်ထဲတွင် သစ်ကြားသီးအရွယ်ရှိ အလံပုံသဏ္ဍာန် ဝိညာဉ်ကျောက်တစ်လုံး ထွက်ပေါ်လာသည်။

ထိုအလံပုံကျောက်အတွင်းတွင် မည်းနက်သော မြူခိုးများ ဝေဆာလျက်ရှိပြီး ဦးချိုတစ်ချောင်းပါရှိသော ကြယ်သုံးပွင့်အဆင့် နတ်ဆိုးဝံပုလွေတစ်ကောင်သည် ထိုအတွင်း၌ မှိန်ဖျော့ဖျော့ ပေါ်လွင်နေသည်။

“ကြယ်သုံးပွင့်ဝိညာဉ်ကျောက်… ဒါက ငါ့ရဲ့ စစ်မှန်တဲ့နဂါးကျင့်စဉ်ကို အဆင့်ရှစ်အထိ တက်လှမ်းနိုင်စေမယ်…”

လော့ချန်သည် မူလက လင်ကျန်းမြို့မှ ပြန်လာမှသာ ဝိညာဉ်ကျောက်ကို စုပ်ယူရန် စီစဉ်ထားခဲ့သည်။

သို့သော် ဂိုယွမ်နှင့် တိုက်ပွဲတစ်ကြိမ်ပြီးဆုံးပြီးနောက် သူ၏အစီအစဉ်ပြောင်းလဲသွားသည်။

ယခုအခါ သူသည် မင်းသားတန်းမှ လူများအားလုံးကို ရန်သူအဖြစ် ပြောင်းလဲလိုက်ပြီဖြစ်သဖြင့် သူ့ကို သေစေလိုသူများသည် တစ်ဦးနှစ်ဦးမျှမဟုတ်ပေ။

စွမ်းအားအနည်းငယ်မျှ မြှင့်တင်နိုင်လျှင် အာမခံချက်တစ်ခု ပိုရှိလာမည်ဖြစ်သည်။ ကြိုတင်ပြင်ဆင်ထားခြင်းသည် အကောင်းဆုံးဖြစ်သည်။

နက်ရှိုင်းစွာ အသက်ရှူသွင်းလိုက်ပြီး လော့ချန်သည် သူ၏သိုင်းဝိညာဉ်ကို ဆင့်ခေါ်ကာ ရောင်စဉ်ကိုးသွယ်ရတနာကို လက်ဖဝါးထဲတွင် ထွက်ပေါ်လာစေပြီး စုပ်ယူမှုကို စတင်လိုက်သည်။

“အို့…”

စုပ်ယူမှုစတင်လိုက်သည်နှင့် လော့ချန်သည် ချက်ချင်းပင် ထူးခြားမှုတစ်ခုကို သတိပြုမိသည်။

ဤအကြိမ်စုပ်ယူမှုသည် ယခင်ကထက် ပို၍ချောမွေ့သည်။ ရောင်စဉ်ကိုးသွယ်ရတနာသည် သူ၏စိတ်ဝိညာဉ်နှင့် တစ်သားတည်းဖြစ်နေသယောင် ခွဲခြားမရနိုင်သည့်အလားဖြစ်နေသည်။

“စွမ်းအားအဆင့် မြင့်တက်လာလို့လား… ဘာပဲဖြစ်ဖြစ် အရင်ဆုံး ကျင့်ကြံလိုက်မယ်…”

အသေးစိတ်မစူးစမ်းဘဲ လော့ချန်သည် ကျင့်စဉ်ကို ဆက်လက်လုပ်ဆောင်သည်။

“ကျွီ…”

ခြိမ်းခြောက်မှုကို ခံစားမိသယောင်၊ ကြယ်သုံးပွင့်ဝိညာဉ်ကျောက်ထဲမှ နတ်ဆိုးဝံပုလွေသားရဲဝိညာဉ်သည် ကြောက်မက်ဖွယ်ရာ ရက်စက်မှုစွမ်းအင်ကို ထုတ်လွှတ်လျက် မိုးကောင်းကင်ဆီသို့ အော်ဟစ်နေသည်။

သို့သော် ရောင်စဉ်ကိုးသွယ်ရတနာ၏ စုပ်ယူမှုကို ရင်ဆိုင်ရသည့်အခါ ၎င်းသည် လုံးဝခုခံနိုင်စွမ်းမရှိပေ။

ရောင်စဉ်ကိုးသွယ်မှော်အလင်းက ဝိညာဉ်ကျောက်ကို လုံးလုံးလျားလျား ဖုံးလွှမ်းလိုက်သည်နှင့် အနက်ရောင်စွမ်းအင်များသည် ဖဲကြိုးများကဲ့သို့ ကျောက်ထဲမှ လျင်မြန်စွာ ထွက်ပေါ်လာသည်။

ဤအနက်ရောင်စွမ်းအင်များသည် နတ်ဆိုးဝံပုလွေ၏ သားရဲဝိညာဉ်အနှစ်သာရဖြစ်သည်။

လော့ချန်သည် ပေါ့ဆမနေဘဲ အပြည့်အဝ စုပ်ယူသည်။

အချိန်သည် တဖြည်းဖြည်း ကုန်လွန်သွားပြီး မည်မျှကြာသွားသည်ကို မသိရှိတော့သည့်အခါ ဝိညာဉ်ကျောက်ထဲမှ အနက်ရောင်မြူခိုးများ လုံးဝပျောက်ကွယ်သွားသည်။

“ကျွီ…”

ကျောက်တစ်လုံးသည် အမှုန့်အဖြစ်ပြိုကွဲသွားပြီး လေနှင့်အတူ လွင့်ပျံသွားသည်။

လော့ချန်သည် တင်ပြင်ခွေထိုင်လျက် ကျောက်တုံးကဲ့သို့ မလှုပ်မယှက်ဖြစ်နေပြီး မျက်နှာပေါ်တွင် အနက်ရောင်မြူခိုးများ ဖုံးလွှမ်းနေသည်။

ထပ်မံ၍ အချိန်အနည်းငယ်ကုန်လွန်သွားပြီးနောက်။

“အူး…”

လော့ချန်၏ ခန္ဓာအတွင်းမှ နဂါးဟစ်သံတစ်ခုသည် လှိုင်းလုံးကြီးသဖွယ် ထွက်ပေါ်လာသည်။

မရေမတွက်နိုင်သော ရှေးဟောင်းစွမ်းအင်လှိုင်းများသည် သိုင်းဝိညာဉ်ထဲမှ ဖောက်ထွက်လာပြီး ထိုစွမ်းအင်လှိုင်းများသည် နဂါးပုံသဏ္ဍာန်အဖြစ် ပြောင်းလဲလျက် လေဟာနယ်ထဲတွင် သောင်းကျန်းနေသည်။

သိုင်းလေ့ကျင့်ကွင်းတစ်ခုလုံးရှိ စွမ်းအင်အတားအဆီးများသည် နဂါးပုံသဏ္ဍာန်စွမ်းအင်လှိုင်းများ၏ ရိုက်ခတ်မှုကြောင့် မီးပုံးကြီးတစ်လုံးကဲ့သို့ ပြင်းထန်စွာ ဖောင်းကားလာပြီး အချိန်မရွေး ပေါက်ကွဲထွက်မည့်အလားဖြစ်နေသည်။

ထို့နောက်တစ်ခုသော အခိုက်အတန့်တွင်။

“ဝမ်း…”

မရေမတွက်နိုင်သော နဂါးအရိပ်များသည် လော့ချန်၏ ခန္ဓာအတွင်းသို့ ပြန်လည်ဝင်ရောက်သွားသည်။

အရာအားလုံး တည်ငြိမ်သွားသည့်အခါ လော့ချန်သည် မျက်လုံးများကို ဖွင့်လိုက်ပြီး တောက်ပလှသော စွမ်းအင်အလင်းတန်းသည် လျှပ်စီးကဲ့သို့ လေဟာနယ်ထဲတွင် သောင်းကျန်းနေသည်။

“စစ်မှန်သောနဂါးကျင့်စဉ် အဆင့်ရှစ်…”

လော့ချန်၏ မျက်နှာပေါ်တွင် ယုံကြည်မှုအပြည့်ရှိသော အပြုံးတစ်ခု ထွက်ပေါ်လာသည်။

ဝိညာဉ်ကျောက်ကို သန့်စင်မှု မလုပ်ဆောင်မီက သူသည် စစ်မှန်သောနဂါးကျင့်စဉ် အဆင့်ရှစ်သို့ တက်လှမ်းနိုင်ရန် ငါးဆယ်ရာခိုင်နှုန်းမျှသာ ယုံကြည်မှုရှိခဲ့သည်။

သို့သော် ဤကြယ်သုံးပွင့်ဝိညာဉ်ကျောက်ကို စုပ်ယူမှု၏ ရလဒ်သည် သူထင်ထားသည်ထက် ပို၍ကောင်းမွန်ခဲ့သည်။

စစ်မှန်သောနဂါးကျင့်စဉ်သည် ရေစီးကမ်းပေါက်သည့်အလား အဆင့်ရှစ်သို့ တက်လှမ်းသွားပြီး မည်သည့်အတားအဆီးမျှ မရှိခဲ့ပေ။

ဤအခိုက်အတန့်တွင် လော့ချန်၏ ဒျန်တန်အတွင်းရှိ နဂါးချီစွမ်းအင်သည် လုံးဝအသွင်ပြောင်းလဲသွားပြီဖြစ်သည်။

နဂါးချီစွမ်းအင်သည် ဒျန်တန်အတွင်း၌ ပျံသန်းလျက်၊ အကြေးခွံများသည် ကြယ်များကဲ့သို့ တောက်ပလျက်၊ တန်ခိုးမြင့်မားစွာ ကြီးကျယ်ခမ်းနားလျက်၊ မျက်လုံးများသည် မီးရှူးမီးပန်းများကဲ့သို့ လေဟာနယ်ကို ဖောက်ထွင်းနိုင်စွမ်းရှိပြီး အရှိန်အဟုန်သည် ကြီးကျယ်လှသဖြင့် မိုးမြေကိုပါ ချီမြှောက်နိုင်သည်။ ၎င်းသည် မိုးမြေကြားတွင် တကယ့်နဂါးတစ်ကောင်ကဲ့သို့ ပျံသန်းလျက် သတ္တဝါအားလုံးကို ဦးညွှတ်စေနိုင်သည့် နဂါးနတ်ဘုရားတစ်ပါးအလား ဖြစ်နေသည်။