လုချန်း၏ စွမ်းဆောင်ချက်

ပိုင်ဝမ်ပင်းသည် သူ၏ဓားကို တင်းတင်းဆုပ်ထားပြီး သူ၏ခန္ဓာကိုယ်မှာ အထိန်းအကွပ်မဲ့ တုန်ယင်နေသည်။

အကယ်၍ ခုနကလို နတ်ဆိုးဒီရေမျှသာ ဖြစ်ခဲ့ပါက သူခေါ်ဆောင်လာခဲ့သော စစ်သားသောင်းဂဏန်းဖြင့် ခုခံနိုင်စွမ်း ရှိနိုင်မည်။

သို့သော် လက်ရှိအခြေအနေများအရ သူခေါ်ဆောင်လာသော စစ်သားများနှင့် လနက်မြို့မှ စစ်သားများ ပူးပေါင်းလျှင်တောင် ထိုဒီရေကို လုံးဝ တားဆီးနိုင်စွမ်း မရှိချေ။

မိစ္ဆာကောင်များ၏ အရေအတွက်မှာ အလွန်များပြားလှပြီး ၎င်းတို့သည် မြို့ရိုးများကဲ့သို့ မြင့်မားအောင် စုပုံနေကြသည်။

သူတို့ခုခံနိုင်မည့် အခွင့်အရေး မရှိတော့ပေ။

သူ ဤနေရာတွင် သေ၍ မဖြစ်ချေ။

သူသည် ရှေ့ရေး အလားအလာ ကောင်းများ ရှိနေသည့် ချူးမင်းဆက်၏ ဗိုလ်ချုပ်တစ်ဦး ဖြစ်သည်။

သူသည် ကျိချိုးယုအား အလွန် နှစ်သက်သော်လည်း သူမ၏ အလှကိုသာ တပ်မက်ခဲ့ခြင်း ဖြစ်သည်။

ကမ္ဘာပေါ်တွင် လှပသော အမျိုးသမီးများ များစွာ ရှိ၏။ သူ မအိပ်စက်ဖူးသေးသော အမျိုးသမီးတစ်ဦးအတွက် သူ၏ အသက်ကို မစတေးလိုချေ။

ထိုသို့ စိတ်ထဲတွင် တွေးလိုက်ပြီး ပိုင်ဝမ်ပင်း ချက်ချင်း လှည့်၍ ထွက်ပြေးတော့သည်။ စကားတစ်ခွန်းမှပင် ပြောမသွားခဲ့ပေ။

သူ ကျိချိုးယု၏ စရိုက်ကို သိ၏။ ဤအချိန်တွင် ကျိချိုးယု ထွက်သွားမည် မဟုတ်‌ပေ။

ထို့ကြောင့် ကျိချိုးယုအား ထွက်ပြေးဖို့ စည်းရုံးရန် အချိန်အနည်းငယ် ယူရဦးမည်ဖြစ်ပြီး ထိုအချိန်တွင် နတ်ဆိုးဒီရေ ဝါးမြိုသွားပြီး ဖြစ်နိုင်သည်။

သူ ယခု မထွက်သွားပါက နောက်ပိုင်းတွင် လွတ်မြောက်ရန် ပို၍ပင် မဖြစ်နိုင်တော့ပေ။

ထိုအခိုက်တွင် ပိုင်ဝမ်ပင်း ထွက်ပြေးသွားသည်ကို ကျိချိုးယု သတိမပြုမိသေးချေ။

သူမသည် လက်ထဲမှ ဓားကို ဆုပ်ကိုင်ထားပြီး မိစ္ဆာကောင်များကို ရဲရင့်စွာ ဆက်လက် သတ်ဖြတ်နေသည်။

သို့သော် မိစ္ဆာကောင်များ၏ အရေအတွက်မှာ အလွန် များပြားလှပြီး မကြာမီ မြို့ရိုးမျှော်စင် တစ်ခုလုံးသည် ၎င်းတို့နှင့် ပြည့်နှက်သွားသည်။

လနက်မြို့၏ မြို့ရိုးများပေါ်တွင် အသက်ရှင်ကျန်ရစ်သော စစ်သားအရေအတွက်မှာ လျင်မြန်စွာ လျော့နည်းလာနေသည်။

လနက်မြို့တွင် မူလက စစ်သား တစ်သိန်းငါးသောင်းခန့်သာ ရှိပြီး ပိုင်ဝမ်ပင်း ခေါ်ဆောင်လာသော စစ်သား သောင်းဂဏန်း ပေါင်းထည့်လိုက်လျှင်ပင် စုစုပေါင်း နှစ်သိန်းခန့်သာ ရှိသည်။

သို့သော် မိစ္ဆာကောင်များ၏ အရေအတွက်မှာ နှစ်သိန်းထက် ကျော်လွန်နေသည်မှာ ထင်ရှားသည်။ တစ်သန်းအထိပင် ရှိနိုင်သည်။

ထို့ပြင် မြို့ရိုးများဆီသို့ ပြေးဝင်လာသော မိစ္ဆာကောင်များ၏ တစ်ဦးချင်း အင်အားမှာ များစွာ တိုးမြင့်လာခဲ့ပြီး ၎င်းတို့သည် ကောင်းကင်လူသားအဆင့် စစ်သားများ မခုခံနိုင်သည့် ပြိုင်ဘက်များ ဖြစ်လာကြသည်။

ထိုစဉ် ဧရာမ မိစ္ဆာကောင်ကြီးတစ်ကောင်က ကျိချိုးယုထံသို့ ပြေးဝင်လာသဖြင့် သူမလည်း ပြန်လည် တိုက်ခိုက်ရန် သူမ၏ ဓားစွမ်းအားကို လျင်မြန်စွာ ထုတ်ဖော်လိုက်သည်။

သို့သော် မိစ္ဆာကောင်က မယုံနိုင်လောက်အောင် အစွမ်းထက်နေသည်။ ကျိချိုးယု၏ ဓားစွမ်းအားသည် ၎င်းကို မဆိုစလောက်သာ ထိခိုက်စေနိုင်ခဲ့၏။ ၎င်းတွင် ကျင့်ကြံသူတစ်ဦး၏ စိတ်ဝိညာဉ် စွမ်းအားကို ဖိနှိပ်သည့် စွမ်းအားတစ်ခုလည်း ပူးကပ်နေသည်။

ကျိချိုးယု ချက်ချင်းပင် ကြောက်ရွံ့စိတ်တစ်ခုကို ခံစားလိုက်ရ၏။ ဒါက ကျင့်ကြံသူများကို ပြင်းထန်စွာ ဖိနှိပ်နိုင်သည့် စွမ်းအားတစ်ခုဖြစ်သော ကောင်းကင်နတ်ဆိုး၏ စွမ်းအား ဖြစ်သည်။

အမှန်စင်စစ် ဤအရာအားလုံးကို ချိပ်ပိတ်နယ်မြေအတွင်း ချိပ်ပိတ်ခံထားရသော ကောင်းကင်နတ်ဆိုးက စီစဉ်ခိုင်းစေခဲ့ခြင်း ဖြစ်ရမည်။

ကောင်းကင်နတ်ဆိုးအား ချိပ်ပိတ်မှုက ပြေလျော့နေပြီ ဖြစ်နိုင်သည်။

သို့သော် ယခုအချိန်သည် ထိုအတွေးများ တွေးတောနေရမည့် အချိန် မဟုတ်ချေ။

အကယ်၍ အခြေအနေများ ဤအတိုင်း ဆက်ဖြစ်နေပါက လနက်မြို့မှ သာမန်ပြည်သူအားလုံးသည် မိစ္ဆာကောင်များအတွက် အစာ ဖြစ်သွားကြပေမည်။

လနက်မြို့ ကျဆုံးသည်နှင့် မိစ္ဆာကောင်များသည် ချူးနိုင်ငံ၏ အခြားအစိတ်အပိုင်းများသို့ လျင်မြန်စွာ ပျံ့နှံ့သွားမည် ဖြစ်သည်။

အကယ်၍ မိစ္ဆာကောင်များ လနက်မြို့မှ လွတ်မြောက်သွားပါက ၎င်းတို့ကို တားဆီးရန် လွယ်ကူတော့မည် မဟုတ်ပေ။

ဤအခိုက်တွင် ကျိချိုးယု သူမ၏ ငွေသွားများဖြင့် အံကြိတ်လိုက်သည်။

ချူးဧကရာဇ်သည် တကယ့် လူမိုက်တစ်ယောက် ဖြစ်သည်။ ဤမျှ အရေးကြီးသော နေရာကို စောင့်ကြပ်ရန် သူမအား စစ်သား တစ်သိန်းငါးသောင်းသာ ချထားပေးပြီး မြို့၏ တစ်ဦးတည်းသော မူလအစ ကမ္ဘာနယ်ပယ် အဆင့် ကျင့်ကြံသူအဖြစ် သူမအား နေရာချထားခဲ့သည်။

သူမတစ်ယောက်တည်း ဒါကကို မည်သို့ ခုခံကာကွယ်ရမည်နည်း။

ကျိချိုးယုက မိစ္ဆာကောင်၏ ထိုးနှက်မှုကို ရှောင်တိမ်းလိုက်စဉ်မှာပင် အခြားအလားတူ မိစ္ဆာကောင်တစ်ကောင်သည် သူမ၏ နောက်တွင် ရုတ်တရက် ပေါ်လာသည်။

ကျိချိုးယု သူမ၏ နောက်ကျောမှ အန္တရာယ်ကို ချက်ချင်း အာရုံခံမိလိုက်သည်။

“မကောင်းတော့ဘူး။”

ကျိချိုးယု ရှောင်တိမ်းရန် အချိန်နှောင်းသွားခဲ့ပြီ ဖြစ်၏။ အဘယ်ကြောင့်ဆိုသော် ဒုတိယ မိစ္ဆာကောင်၏ လက်သည်းများက သူမအပေါ်သို့ ရိုက်ချတော့မည်ကို သူမ တွေ့လိုက်ရသောကြောင့် ဖြစ်သည်။

မရေမတွက်နိုင်သော အတိတ်ပုံရိပ်များ သူမ၏ စိတ်ထဲတွင် ဖြတ်ပြေးသွားသည်။

သို့သော် ကျိချိုးယု၏ စိတ်ထဲမှ ကြောက်ရွံ့မှုသည် ထိုအခိုက်တွင် ရုတ်တရက် ပျောက်ကွယ်သွားပြီး မယုံနိုင်လောက်အောင် တည်ငြိမ်သွားသည်။

လနက်မြို့ကို ကာကွယ်ခြင်းသည် နောက်ဆုံးတွင် သေခြင်းဟူ‌သော နိဂုံးသို့ ဦးတည်သွားမည်ကို သူမ သိထားခဲ့တာ ကြာပြီဖြစ်သည်။

သို့သော် သူမ သေရမှာ သေချာပြီဟု ကျိချိုးယု ယုံကြည်လိုက်စဉ်မှာပင် စိတ်ဝိညာဉ် စွမ်းအင် စီးကြောင်းများ အဝေးမှ ပျံ့သန်းလာသည်။

ဤစွမ်းအင်များ ၎င်းတို့၏ ခန္ဓာကိုယ်များကို ထိတွေ့လိုက်သည်နှင့် မိစ္ဆာကောင်များ ထိတ်လန့်တကြား ပြေးလွှားကြတော့သည်။

သူမ၏ ဘေးမှ မိစ္ဆာကောင် နှစ်ကောင် ထိတ်လန့်တကြား ထွက်ပြေးသွားသည်ကို မြင်သောအခါ ကျိချိုးယု ချက်ချင်း ကြက်သေသေသွား၏။ ထိုသို့သော မြင်ကွင်းမျိုးကို ယခင်က သူမ တစ်ခါမှ မမြင်တွေ့ခဲ့ဖူးပေ။

ထို့နောက် ပျံ့နှံ့လာသော စိတ်ဝိညာဉ် စွမ်းအင်၏ မြစ်ဖျားခံရာဆီသို့ သူမ၏ ဦးခေါင်းကို လှည့်လိုက်စဉ် လုချန်းအား မြင်သောအခါ နောက်တစ်ကြိမ် ထပ်မံ ကြက်သေသေသွားသည်။

သူ ဖြစ်နိုင်ပါ့မလား။

လုချန်းသည် သူ၏ ဓားကို ပစ်ထုတ်လိုက်ပြီးဓားစွမ်းအားကို အသက်သွင်းလိုက်သည်။

ရေခဲရှစ်ဆင့် ဓားသိုင်း။

နောက်တစ်ခဏတွင် မရေမတွက်နိုင်သော ဓားစွမ်းအား စီးကြောင်းများ နတ်ဆိုးဒီရေဆီသို့ တဟုန်ထိုး ပြေးဝင်သွားပြီး ဓားစွမ်းအား ရောက်ရှိသွားသည့် နေရာတိုင်းရှိ နတ်ဆိုးများ ထိုနေရာ၌ပင် ခဲသွားကြသည်။

စက္ကန့်ပိုင်းမျှ အချိန်အတွင်း နတ်ဆိုး သိန်းပေါင်းများစွာ လျင်မြန်စွာ ပျက်စီးသွားကြသည်။

ထိုမြင်ကွင်းကို မြင်သောအခါ မြို့ရိုးပေါ်မှ စစ်သားများနှင့် ကျိချိုးယုတို့အားလုံး ကြက်သေသေသွားကြသည်။

မျက်တောင်တစ်ခတ်အတွင်း နတ်ဆိုးများစွာကို သတ်ဖြတ်နိုင်စွမ်းရှိသူ တစ်ဦးအား ယခု ပထမဆုံး မြင်တွေ့ဖူးခြင်း ဖြစ်သည်။

ဤနတ်ဆိုးများသည် ကောင်းကင်နတ်ဆိုး၏ လွှမ်းမိုးမှုအောက်တွင် စိတ်ဝိညာဉ် စွမ်းအားကို အတိုင်းအတာတစ်ခုအထိ ခုခံနိုင်စွမ်း ရှိကြသည်။

ထို့ကြောင့် ကျိချိုးယု၏ ဓားသိုင်းပညာအကုန် အသုံးပြုခဲ့‌တာတောင် နတ်ဆိုးများကို အကြီးအကျယ် ချေမှုန်းရန် ခက်ခဲခဲ့ခြင်းဖြစ်သည်။

နတ်ဆိုးများကို သုတ်သင်ရှင်းလင်းရန် ကျင့်ကြံသူတို့၏ တစ်ဦးချင်း စွမ်းအားကိုသာ အားကိုးခြင်းက အလွန် ထိရောက်မှုနည်းသည်။ သူတို့သည် အခြေခံအားဖြင့် ရွှေနက်လက်နက်များကိုသာ အားကိုးနိုင်ကြသည်။

သို့သော် ယခု ဤလူသည် ဓားသိုင်းပညာ တစ်မျိုးဖြင့် နတ်ဆိုးများစွာကို ချေမှုန်းနိုင်ခဲ့၏။

သူဘယ်လိုလုပ်ခဲ့တာလဲ။

သူသည် နတ်ဆိုးများ၏ သဘာဝ ရန်သူတော်ကြီး ဖြစ်နေပုံရသည်။

ထိုအခိုက်တွင် နတ်ဆိုးဒီရေ၏ တိုက်ခိုက်မှုသည် အနည်းငယ် အားပျော့သွားပြီး အချို့ နတ်ဆိုးများလည်း ဆုတ်ခွာရန် အတွေးများ စတင် ဝင်လာကြသည်။

စောစောက မြင်ကွင်းသည် လူတိုင်းကို အံ့အားသင့်စေရုံသာမက ရှိနေသော နတ်ဆိုးများကိုလည်း ဟန့်တားလိုက်သည်။

ကျိချိုးယု၏ လှပသော မျက်လုံးများထဲတွင် အံ့အားသင့်မှု အရိပ်အယောင်တစ်ခု ဖြတ်ပြေးသွားသည်။

ဤလူ မည်သူနည်း။

အဘယ်ကြောင့် ဒီလို စွမ်းအားကို ပိုင်ဆိုင်ထားသနည်း။

ကျိချိုးယု အတွေးထဲ နစ်မြောနေစဉ် လုချန်း ဒုတိယအကြိမ် လှုပ်ရှားလိုက်သည်။

ရေခဲရှစ်ဆင့် ဓားသိုင်း။

နောက်တစ်ကြိမ် လုချန်း၏ အနီးအနားမှ နတ်ဆိုးများအားလုံး ရေခဲအဖြစ် ချက်ချင်း အေးခဲသွားကြပြီးနောက် ရေခဲစများအဖြစ်သို့ ပြောင်းလဲသွားကြသည်။

ကောင်းကင်အဆင့် ဓားသိုင်းပညာဖြစ်သော ရေခဲရှစ်ဆင့် ဓားသိုင်းကို လက်တွေ့ တိုက်ပွဲတွင် လုချန်း အသုံးပြုဖူးခြင်းမှာ ဒါကပထမဆုံးအကြိမ် ဖြစ်သည်။

အကျိုးသက်ရောက်မှု ဤမျှ ထူးခြားလိမ့်မည်ဟု သူ မမျှော်လင့်ထားခဲ့ပေ။

ဟုတ်ပါသည်။ ဒါက အဓိကအားဖြင့် သူ နတ်ဆိုးမြေမြုပ်ကျင့်စဉ်ကို ကျင့်ကြံထားခဲ့သောကြောင့် ဖြစ်ပြီး ၎င်းက သူ၏ ဓားစွမ်းအားအား နတ်ဆိုးစွမ်းအားကို ရှင်းထုတ်နိုင်စေကာ နတ်ဆိုးများအတွက် သေစေနိုင်သော ခြိမ်းခြောက်မှုတစ်ခု ဖြစ်စေခဲ့သည်။

လုချန်း လှုပ်ရှားလိုက်သည်နှင့် နတ်ဆိုးများလည်း တစ်စုံတစ်ခု မှားယွင်းနေသည်ကို ရှင်းလင်းစွာ သဘောပေါက်သွားကြပြီး ၎င်းတို့ထဲမှ အချို့သည် နတ်ဆိုးချိပ်ပိတ်နယ်မြေများဆီသို့ စတင် ထွက်ပြေးကြတော့သည်။

ထို့နောက် လုချန်း နောက်တစ်ကြိမ် ထပ်မံ လှုပ်ရှားလိုက်ပြန်သည်။ ဆယ်ငါးမိနစ် မပြည့်မီတွင် နတ်ဆိုးဒီရေကို လုံးဝ ဖြိုခွင်းလိုက်နိုင်သည်။

ရှိနေသူများသည် အိပ်မက်မက်နေသကဲ့သို့ ခံစားလိုက်ရ၏။ နတ်ဆိုးဒီရေကို ရင်ဆိုင်ရာတွင် ဒီလောက် အားစိုက်ထုတ်စရာ မလိုသည့် နေ့တစ်နေ့ ရောက်လာလိမ့်မည်ဟု သူတို့ တစ်ခါမှ စိတ်ကူးမယဉ်ခဲ့ဖူးပေ။

ဒီလူ ဘယ်သူလဲ။

သူ၏ အင်အားက ကြီးမားလှပေသည်။

ကျိချိုးယုလည်း လုချန်းအား အဝေးမှ ကြည့်နေခဲ့ပြီး သူမ၏ ခံစားချက်များ အနည်းငယ် ရှုပ်ထွေးနေခဲ့သည်။

အစပိုင်းတွင် လုချန်းအား သာမန် မူလအစ ကမ္ဘာနယ်ပယ် အဆင့် ကျင့်ကြံသူတစ်ဦး အဖြစ်သာ သူမ မြင်ခဲ့ပြီး တိုက်ခိုက်ရေး အင်အားအကူတစ်ခုအဖြစ် သူ့အား ခေါ်ထားခဲ့ခြင်း ဖြစ်သည်။

သူက အခြေအနေကို ပြောင်းလဲပေးမည့် အဓိက ပုဂ္ဂိုလ် ဖြစ်လာလိမ့်မည်ဟု သူမ မမျှော်လင့်ထားခဲ့ပေ။

ဤမျှ အစွမ်းထက်သော ပုဂ္ဂိုလ်တစ်ဦးအကြောင်း အဘယ်ကြောင့် သူမ ယခင်က တစ်ခါမှ မကြားဖူးခဲ့ရသနည်း။

ယုတ္တိတန်စွာ နတ်ဆိုးများကို အလွယ်တကူ သတ်ဖြတ်နိုင်သော သူကဲ့သို့သော လူတစ်ဦး၏ ကျင့်စဉ်အဆင့် အထူးတလည် မမြင့်မားလျှင်ပင် အသိအမှတ် အပြုမခံရပဲ မနေသင့်ပေ။

သူ့ပတ်ဝန်းကျင်မှ လူများ၏ အကြည့်များကို လုချန်း သတိမပြုမိခဲ့ချေ။

သူသည် မြို့ရိုးမျှော်စင်ပေါ်တွင် ရပ်လျက် အဝေးရှိ နတ်ဆိုးချိပ်ပိတ်နယ်မြေ အထက်မှ နတ်ဆိုးစွမ်းအားများဆီသို့ ကြည့်ရှုနေသည်။

နတ်ဆိုးချိပ်ပိတ်နယ်မြေ အထက်မှ နတ်ဆိုးစွမ်းအားများသည် အလွန် သိပ်သည်းနေဆဲ ဖြစ်သော်လည်း သူ၏ ကြားဝင် နှောင့်ယှက်မှုကြောင့်လားမသိ ထိုနတ်ဆိုးများသည် နတ်ဆိုးချိပ်ပိတ်နယ်မြေ အတွင်း၌သာ နေရဲကြပြီး အပြင်သို့ ထွက်မလာရဲကြချေ။

ဤမြင်ကွင်းသည် မယုံနိုင်လောက်အောင် ဆန်းကြယ်သည်ဟု ခံစားရ၏။ လူတစ်ဦးတည်းက နတ်ဆိုးဒီရေအား နတ်ဆိုးချိပ်ပိတ်နယ်မြေကို ကျော်လွန်ပြီး ခြေတစ်လှမ်းမှ မထွက်စေရန် တားဆီးနိုင်သည်။

သူတို့ အိပ်မက်မက်နေကြတာလား။

အကယ်၍ ဤလူသာ လနက်မြို့တွင် ဆက်နေမည်ဆိုပါက နတ်ဆိုးများ နောင်တွင် နတ်ဆိုးချိပ်ပိတ်နယ်မြေမှ ထွက်လာရဲတော့မည် မဟုတ်ပေ။

ဒါဆို နတ်ဆိုးဒီရေ၏ အဆုံးသတ်ပြီဟု ဆိုလိုနေခြင်း မဟုတ်ပါလား။