ကျန်းကျွင့်လန်နှင့် တိုက်ပွဲ

~‘…ဒီလူ တကယ်ပဲ အထင်ကြီးစရာ နောက်ခံရှိတာပဲ…’ ဖုန်းဝူချန် မျက်မှောင် အနည်းငယ် ကြုတ်လိုက်မိသည်။

အဖြူရောင်ဝတ် လူငယ် ထုတ်လွှတ်လိုက်သည့် ခွန်အားမှာ မှတ်သားလောက်အောင် အားကောင်းလှသောကြောင့်တည်း။

"ဒီလူ သန်မာလိုက်တာ.. သူ ဒီလောက် မောက်မာတာ အံ့ဩစရာ မရှိတော့ဘူး.." လျိုချင်းယန် ကြီးစွာ တုန်လှုပ်သွားသည်။

"သတိထားနော်၊ အစ်ကိုဖုန်း.."

မြောင်ချင်းချင်းက သူမ၏ စိုးရိမ်မှုကို ထုတ်ဖော်ပြောဆိုသည်။

‘…အင်ပါယာမှာ စတုတ္ထအဆင့် လက်နက်သန့်စင်သူ လူငယ်တစ်ယောက် ဘယ်တုန်းက ပေါ်လာခဲ့တာလဲ။ သူက မင်းသားရဲ့ ... တပည့်တော့ မဖြစ်နိုင်ဘူး…’ ဖုန်းဝူချန် စိတ်ထဲမှ တွေးတောနေမိသည်။

ဤမျှ ငယ်ရွယ်သည့် အသက်အရွယ်မှာပင် စတုတ္ထအဆင့် လက်နက်သန့်စင်သူ အဆင့်သို့ ခြေချနိုင်ခဲ့ပြီး၊ ကျင့်ကြံမှုမှာလည်း အသွင်ပြောင်းဘုံ သတ္တမအလွှာသို့ ရောက်ရှိနေခဲ့ရာ၊ အဖြူရောင်ဝတ် လူငယ်မှာ အမှန်ပင် ထူးခြားထက်မြက်သည့် ပါရမီရှင် ဖြစ်ကြောင်း ပြသနေလေသည်။

‘…သူ့အစွမ်းက အသွင်ပြောင်းဘုံ အဋ္ဌမအလွှာနဲ့ ယှဉ်နိုင်တယ်။ အစွမ်းထက်တဲ့ ... သိုင်းပညာတွေသာ ကျင့်ကြံထားရင်၊ နဝမအလွှာနဲ့တောင် ယှဉ်ပြိုင်နိုင်လောက်တယ်။ တကယ်ပဲ မရိုးရှင်းဘူးပဲ…’

ဖုန်းဝူချန် စိတ်ထဲမှ သုံးသပ်မိရင်း၊ အဖြူရောင်ဝတ် လူငယ်အပေါ် စူးစမ်းလိုစိတ် ဖြစ်ပေါ်လာခဲ့သည်။

...

"ဘုန်း.."

အဖြူရောင်ဝတ် လူငယ်က ရုတ်တရက် မြေပြင်ကို ပေါက်ကွဲသံတစ်ခုနှင့်အတူ ဆောင့်နင်းလိုက်ပြီး၊ ကြောက်မက်ဖွယ် အမြန်နှုန်းဖြင့် ပြေးထွက်သွားရာ၊ ဖုန်မှုန့်များစွာ လွင့်စဉ်တက်သွားလေသည်။

သူက ဖုန်းဝူချန်ထံသို့ လက်သီးတစ်ချက်ဖြင့် ပြေးဝင်လာပြီး၊ လွှမ်းမိုးနိုင်စွမ်းရှိသော လက်သီးအရှိန်ကို ပြသလျက်၊ တောင်များနှင့် မြစ်များကိုပင် ချေမှုန်းနိုင်သည့် အရှိန်အဝါမျိုး သယ်ဆောင်လာ၏။

သို့သော် ဖုန်းဝူချန်မှာ မလှုပ်မယှက် ရပ်နေဆဲဖြစ်ပြီး၊ သူ၏ အကြည့်များမှာ အဖြူရောင်ဝတ် လူငယ်ကို ကြည့်နေရင်း လုံးဝ မတုန်လှုပ်ပေ။

"အစ်ကိုဖုန်း၊ သတိထား.."

လျိုချင်းယန် ထိတ်လန့်တကြား ဟစ်အော်လိုက်သည်။

ဖုန်းဝူချန် မလှုပ်မယှက် ရပ်နေသည်ကို မြင်လျှင် လူငယ်၏ မျက်မှောင်များ အနည်းငယ် ကြုတ်သွားပြီး၊ သူ၏ လွှမ်းမိုးနိုင်စွမ်းရှိသော လက်သီးမှာလည်း ဖုန်းဝူချန်၏ ရှေ့မှောက်တွင် ရပ်တန့်သွားခဲ့၏။

သို့သော် ၎င်းမှ ထုတ်လွှတ်လိုသည့် ပြင်းထန်သော လေအရှိန်ကြောင့် ဖုန်းဝူချန်၏ ဆံပင်များ နောက်သို့ ရမ်းခါလွင့်စဉ်သွားရ၏။

"မင်း ဘာသဘောလဲ။ ဘာလို့ ပြန်မတိုက်ခိုက်တာလဲ။" အဖြူရောင်ဝတ် လူငယ်က မျက်မှောင်ကြုတ်ရင်း မေးမြန်းသည်။

ဖုန်းဝူချန်က အေးစက်စွာ ပြန်ဖြေ၏။ "မင်းရဲ့ ... လက်သီးမှာ သတ်ဖြတ်လိုစိတ် မပါဘူး၊ ပြီးတော့ မင်း နာမည်ကိုလည်း ငါ့ကို မပြောရသေးဘူး။"

“ကျန်းကျွင့်လန်.. ကျေနပ်ပြီလား။ ငါ့လက်သီးကိုတော့ ငါ ချုပ်တည်းထားမှာ မဟုတ်ဘူးကွ”

ကျန်းကျွင့်လန်က မျက်မှောင်ကြုတ်ရင်း အသိပေးလိုက်ပြီး၊ သူ၏ အရှိန်အဝါများ နောက်တစ်ကြိမ် ပေါက်ကွဲထွက်လာကာ ချုပ်တည်းမှုမရှိဘဲ လက်သီး တစ်ချက် ထိုးချလိုက်တော့သည်..။

"ဘုန်း.."

ဖုန်းဝူချန်က သူ၏ ညာလက်ကို မြှောက်လိုက်ရာ၊ တိုးညှင်းသော ပေါက်ကွဲသံတစ်ခုနှင့်အတူ ကျန်းကျွင့်လန်၏ လက်သီးကို ဖမ်းဆုပ်လိုက်သည်။

ပြိုင်ဘက်၏ အလွန် ကြောက်မက်ဖွယ်ကောင်းသော လက်သီးအရှိန် ရှိလင့်ကစား၊ ဖုန်းဝူချန်ကို ခြေတစ်လှမ်းမျှပင် နောက်သို့ ဆုတ်သွားအောင် မလုပ်နိုင်ခဲ့ပေ..

‘…သူ ဒါကို လွယ်လွယ်ကူကူ တားဆီးလိုက်နိုင်တယ်ပေါ့။ သူလည်း အသွင်ပြောင်းဘုံ သတ္တမအလွှာပဲ၊ ဒါပေမဲ့ သူ့အစွမ်းက ငါ့အထက်မှာ ရှိနေပုံပဲ..’

ကျန်းကျွင့်လန် စိတ်ထဲမှ တွေးတောမိရင်း အတော်လေး တုန်လှုပ်သွားသည်။

"ငါ့နာမည် ဖုန်းဝူချန်။"

ဖုန်းဝူချန်က ကျန်းကျွင့်လန်၏ အစွမ်းကြောင့် လုံးဝ သက်ရောက်မှုမရှိဘဲ တည်ငြိမ်စွာ ပြန်ဖြေသည်။

ကျန်းကျွင့်လန်က ဖုန်းဝူချန်ကို သေချာစွာ အကဲခတ်ကြည့်ရှုလိုက်သည်။ သူနှင့် ကျင့်ကြံမှုအဆင့် တူညီပြီး သူ့ကို ယှဉ်နိုင်သည့် တစ်စုံတစ်ယောက်ကို သူ ဘယ်တုန်းကမှ မကြုံတွေ့ခဲ့ဖူးပေ။

ဖုန်းဝူချန်က ပထမဆုံးပင်..။

"ဖုန်းဝူချန်၊ မင်းရဲ့ ... အစွမ်းက အထင်ကြီးစရာပဲ။ ဒီလောက် သေးငယ်တဲ့ ... အင်ပါယာလေးထဲမှာ မင်းလို ပါရမီရှင် တစ်ယောက် ရှိနေလိမ့်မယ်လို့ ငါ မထင်ခဲ့ဘူး။" ကျန်းကျွင့်လန်က ဆိုလိုက်ရာ၊ သူ၏ မျက်ဝန်းများထဲတွင် လေးနက်သည့် အရိပ်အယောင်တစ်ခု ပေါ်ထွက်လာသည်။

"မင်း အင်ပါယာက မဟုတ်တာ သေချာတယ်။" ဖုန်းဝူချန်က ကျန်းကျွင့်လန်၏ စကားများမှ ကောက်ချက်ချလိုက်သည်။

"ငါ ရင်ဆိုင်ခဲ့ဖူးတဲ့ ... ပြိုင်ဘက်အားလုံးထဲမှာ၊ အသွင်ပြောင်းဘုံ အဋ္ဌမအလွှာက လူတွေတောင် ငါ့ပြိုင်ဘက် မဟုတ်ဘူး။ မင်းက ငါ့ကို ယှဉ်နိုင်တဲ့ ... ပထမဆုံးလူပဲ။" ကျန်းကျွင့်လန်က ဆိုလိုက်ရာ၊ သူ၏ မျက်ဝန်းများ ပြင်းထန်စွာ လင်းလက်သွားသည်။

ကျန်းကျွင့်လန်၏ အစစ်အမှန်ယွမ်မှာ ပို၍ပို၍ အားကောင်းစွာ ပေါက်ကွဲထွက်လာပြီး၊ ဖုန်းဝူချန်အပေါ်သို့ ပြင်းထန်သော တိုက်ခိုက်မှုတစ်ခုကို စတင်လိုက်လေသည်။

"ဘုန်း ဘုန်း ဘုန်း.."

ပြင်းထန်လှသော နှစ်ယောက်ချင်း တိုက်ပွဲကြီး တောင်ကြားအတွင်း၌ ပေါက်ကွဲထွက်ပေါ်လာ၏။

တဒုန်းဒုန်း မြည်ဟည်းသံများနှင့်အတူ ကြမ်းတမ်းလှသော ချီစွမ်းအားများ အဝေးသို့ ပျံ့နှံ့ထွက်သွားသည်။ သူတို့၏ အစွမ်းအရှိန်ကြောင့် တိုက်ခိုက်နေသူ နှစ်ဦး၏ ခြေထောက်အောက်မှ မြေပြင်မှာ ကွဲအက်ကြေမွ လာခဲ့တော့သည်။

"ကျန်းကျွင့်လန်က တကယ်ပဲ အားကောင်းတာပဲ.."

လျိုချင်းယန် လုံးဝ အံ့အားသင့်သွားပြီး၊ ပြင်းထန်လှသော တိုက်ပွဲက သူ၏ အတွင်းစိတ်ထဲမှ အစွမ်းအပေါ် ပြင်းပြသော တောင့်တမှုကို လှုံ့ဆော်ပေးလိုက်သည်။

သို့သော် ကျန်းကျွင့်လန်မှာ တိုက်ခိုက်လေလေ ပို၍ တုန်လှုပ်လာလေလေ ဖြစ်တော့သည်။

သူ၏ တိုက်ကွက်များ မည်မျှပင် ပြင်းထန်ပါစေ၊ လှည့်ဖြားတတ်ပါစေ၊ လက်သီး၊ လက်ဝါး၊ တံတောင်၊ လက်သည်း ကုတ်ခြစ်၊ ဒူး—အားလုံး အသုံးမဝင်ခဲ့ဘဲ၊ ဖုန်းဝူချန်ကို လုံးဝ ထိမှန်အောင် မလုပ်နိုင်ခဲ့ပေ။

အစွမ်းသက်သက်ဖြင့် ဖုန်းဝူချန်ကို လွှမ်းမိုးရန် ကြိုးစားရာတွင်လည်း၊ ကျန်းကျွင့်လန် မကြာခင်မှာပင် ဖုန်းဝူချန်က ပို၍ပင် ကြမ်းတမ်းရက်စက်ကြောင်း တွေ့ရှိလိုက်ရသည်။

ပြင်းထန်သော ယှဉ်ပြိုင်မှုများ ဆက်တိုက် ဖြစ်ပွားပြီးနောက်၊ ကျန်းကျွင့်လန်မှာ အနည်းငယ်မျှသော အသာစီးပင် မရရှိခဲ့ဘဲ၊ ဆန့်ကျင်ဘက်အနေဖြင့် သူ၏ ခြေလက်များတွင် ထုံကျင်ကိုက်ခဲမှုကို စတင်ခံစားလာရတော့သည်။

‘…သိပ်ကို သန်မာတာပဲ.. ငါနဲ့ ဘာမှမခြားနားဘူး..’

ကျန်းကျွင့်လန် စိတ်ထဲမှ ညည်းညူလိုက်မိပြီး၊ သူ၏ မျက်နှာအမူအရာ ပို၍ပို၍ လေးနက်လာခဲ့သည်။

ဤမျှ သေးငယ်သော အင်ပါယာလေးထဲတွင် ဒီလောက် ပုံမှန်မဟုတ်သည့် ပါရမီရှင်တစ်ဦးကို တွေ့ရှိရလိမ့်မည်ဟု ကျန်းကျွင့်လန် အမှန်တကယ် မမျှော်လင့်ခဲ့ပေ..။

အချိန်ကြာလာသည်နှင့်အမျှ၊ ကျန်းကျွင့်လန် ယိမ်းယိုင်စပြုလာပြီး၊ သူ၏ ခြေလက်များမှ စူးရှသော နာကျင်မှုမှာ ပို၍ ထင်ရှားလာကာ သူ တဖြည်းဖြည်း အရေးနိမ့်သည့် အခြေအနေသို့ ကျရောက်လာခဲ့သည်။

ဖုန်းဝူချန်က သေလောက်အောင် တိကျပြီး အလွန်လျင်မြန်စွာ တိုက်ခိုက်သည်။ ကျန်းကျွင့်လန် ခြေကုပ်ပျက်စပြုလာသည့် အခိုက်အတန့်မှာပင်၊ ဖုန်းဝူချန်က အခွင့်အရေးကို ဆုပ်ကိုင်လိုက်ပြီး၊ သူ့အပေါ်သို့ လက်သီးချက်ပေါင်းများစွာကို ဆက်တိုက် သက်ရောက်စေကာ သူ့ကို နောက်သို့ လွင့်စဉ်သွားအောင် ပစ်ထုတ်လိုက်လေသည်။

ကျန်းကျွင့်လန်၏ ခြေထောက်များ မြေပြင်ကို ခြစ်တိုက်သွားပြီး၊ ခြောက်မီတာ သို့မဟုတ် ခုနစ်မီတာခန့် လျှောတိုက်သွားပြီးမှ ရပ်တန့်သွားကာ၊ သူ၏ ရင်ဘတ်မှ စူးရှသော နာကျင်မှုတစ်ခု ပျံ့နှံ့ထွက်လာသည်။

‘…မြန်နှုန်း၊ အစွမ်း၊ ကာကွယ်မှု၊ အားလုံး ထူးကဲစွာ အားကောင်းတယ်၊ အသုံးချစရာ အားနည်းချက် လုံးဝမရှိဘူး။ ငါ့ရဲ့ ... တိုက်ကွက်တွေ တစ်ခုမှ အရာမထင်ခဲ့ဘူး၊ ပြီးတော့ သူ့ရဲ့ ... ရုပ်ခန္ဓာက မယုံနိုင်လောက်အောင် ကြံ့ခိုင်တယ်၊ သူက တကယ့်ကို မိစ္ဆာတစ်ကောင်ပဲ..’

ကျန်းကျွင့်လန် စိတ်ထဲမှ ထိတ်လန့်သွားသည်။ သူ ဖုန်းဝူချန်နှင့် လက်ရည်ယှဉ်ကြည့်ပြီးမှသာ ဖုန်းဝူချန် ဘယ်လောက် ကြောက်မက်ဖွယ် ကောင်းကြောင်း နားလည်ခဲ့ရသည်။

ကျန်းကျွင့်လန်၏ ပြင်းထန်သော တိုက်ကွက်များသာဆိုလျှင် အခြားမည်သူ့ကိုမဆို ကြာမြင့်စွာကတည်းက အနိုင်ယူပြီးလောက်ပေပြီ။

ကျန်းကျွင့်လန်အတွက် ကံဆိုးစွာပင်၊ ထိုတိုက်ကွက်များမှာ ဖုန်းဝူချန်အပေါ်တွင် အသုံးမဝင်ခဲ့ပေ။ အကြောင်းမှာ ဖုန်းဝူချန်က ကျန်းကျွင့်လန်၏ နောက်တစ်ကွက်ကို မပြုလုပ်မီကပင် ကြိုတင်ခန့်မှန်းနိုင်သောကြောင့်တည်း။

ဤသည်မှာ မကောင်းဆိုးဝါး နဂါးနတ်ဘုရား၏ အတွေ့အကြုံပင်.. ၎င်းမှာ မရေမတွက်နိုင်သော တိုက်ပွဲများမှ စုဆောင်းရရှိခဲ့သည့် တိုက်ခိုက်ရေးအတွေ့အကြုံပင်..

"ဘယ်လောက်ပဲ အားကောင်းကောင်း၊ ဘယ်သူမှ အစ်ကိုဖုန်းရဲ့ ... ပြိုင်ဘက် မဟုတ်ဘူး.. သူက ဒုက္ခရှာနေတာပဲ။" လျိုချင်းယန်က သူတစ်ပါး၏ ဒုက္ခကို ဝမ်းသာအားရ ကြည့်ရင်း မှတ်ချက်ချသည်။

သို့သော် မြောင်ချင်းချင်းကတော့ အခြားတစ်မျိုး တွေးမြင်ကာ၊ သူမ၏ အသံမှာ လေးနက်နေ၏။

"ဒီ ကျန်းကျွင့်လန်က တကယ်ပဲ အားကောင်းတယ်။ အစ်ကိုဖုန်း သူ့ကို အထင်သေးလို့မရဘူး။"

ရုပ်ပိုင်းဆိုင်ရာ တိုက်ခိုက်မှု ပြိုင်ပွဲတွင် ကျန်းကျွင့်လန်မှာ ဖုန်းဝူချန်၏ ပြိုင်ဘက် လုံးဝ မဟုတ်ခဲ့ပေ။ ဖုန်းဝူချန်၏ မယုံနိုင်လောက်အောင် ကြမ်းတမ်းသော ရုပ်ခန္ဓာအပြင်၊ သူ၏ တိုက်ခိုက်ရေးအတွေ့အကြုံ တစ်ခုတည်းကပင် ကျန်းကျွင့်လန်၏ နည်းစနစ်များကို ထွင်းဖောက်မြင်နိုင်ရန် လုံလောက်ခဲ့သည်။

"မင်းလို ကြောက်မက်ဖွယ် ပြိုင်ဘက်မျိုးနဲ့ ကြုံတွေ့ရတာ၊ ဒီခရီးစဉ်က အလဟဿ မဖြစ်ခဲ့ဘူးပဲ.." ကျန်းကျွင့်လန်က ဟစ်ကြွေးလိုက်ရင်း၊ သူ၏ အရှိန်အဝါ နောက်တစ်ကြိမ် ပြောင်းလဲသွားပြန်သည်။

ကျန်းကျွင့်လန်၏ လက်များက နားလည်ရခက်သော လှုပ်ရှားမှုများဖြင့် တံဆိပ်များကို ဖန်တီးလိုက်ရာ၊ အလွန်အားကောင်းလှသော စွမ်းအားတစ်ခု စုစည်းလာပြီး သူ့ကို လွှမ်းခြုံသွားသည်။ သူ၏ တစ်ကိုယ်လုံးမှာ တလက်လက် တောက်ပသော အပြာရောင် အလင်းတန်းများ လွှမ်းခြုံလာပြီး သူ၏ အရှိန်အဝါမှာ ထိတ်လန့်ဖွယ် အမြင့်သို့ လျင်မြန်စွာ တက်လာခဲ့သည်။

"မြေကမ္ဘာအဆင့် သိုင်းပညာ.. ဘယ်လောက် ကြောက်ဖို့ ကောင်းတဲ့

ကောင်းတဲ့ ... အစွမ်းလဲ.." လျိုချင်းယန် တုန်လှုပ်စွာ ဟစ်အော်လိုက်သည်။

‘…မြေကမ္ဘာအဆင့် အလယ်အလတ် သိုင်းပညာ။

သူ တိုက်ကြီးပေါ်က အင်အားကြီး အဖွဲ့အစည်း တစ်ခုခုက ဖြစ်ရမယ်၊

သူ့နောက်ခံက မသေးဘူးပဲ…’

ဖုန်းဝူချန် စိတ်ထဲမှ ကောက်ချက်ချလိုက်သည်။

"ဖုန်းဝူချန်.. မင်းရဲ့ ... တကယ့် အရည်အချင်းကို ပြစမ်း.." ကျန်းကျွင့်လန်က ဟိန်းဟောက်လိုက်သည်။

"မြေကမ္ဘာအဆင့် သိုင်းပညာ.. ဝိညာဉ်တစ်ထောင် ချေမှုန်းခြင်း လက်ဝါး.."

ကျန်းကျွင့်လန် အမြင့်သို့ ခုန်တက်လိုက်ပြီး၊ ဖုန်းဝူချန်ထံသို့ အဝေးမှ လက်ဝါးဖြင့် ရိုက်ချလိုက်လေသည်။

"ဝှစ်.."

ပေသုံးဆယ်ခန့် ကြီးမားသော အပြာရောင် စွမ်းအင်လက်ဝါးပုံရိပ်တစ်ခု၊ ကြမ်းတမ်းလှသော အရှိန်အဝါ သယ်ဆောင်လျက်၊ ပတ်ပတ်လည်တွင် လေပြင်းများ တိုက်ခတ်စေကာ အောက်သို့ ထိုးဆင်းလာသည်။ ၎င်း၏ ခံ့ညားထည်ဝါသော တည်ရှိမှုမှာ အလွန်အမင်း ဖိနှိပ်မှုအားကောင်းလှ၏။

ဖုန်းဝူချန် အထင်မသေးဝံ့ဘဲ ချက်ချင်းပင် နဂါးနတ်ဘုရား၏ စွမ်းအားကို လှည့်ပတ်လိုက်ရာ၊ ရွှေရောင်အလင်းတန်းများ ပေါက်ကွဲထွက်လာပြီး၊ အလွန်ကြမ်းတမ်းသော စွမ်းအားတစ်ခု ရူးသွပ်စွာ တိုးပွားလာခဲ့သည်။

"မြေကမ္ဘာအဆင့် သိုင်းပညာ.. လောကပျက် ကောင်းကင်ဘုံအပြစ်ဒဏ် ဓားချက်.."

ဖုန်းဝူချန်က တိုးဖွစွာ ရေရွတ်လိုက်ပြီး၊ ကြမ်းတမ်းလှသော စွမ်းအားများ သူ၏ ညာလက်မောင်းအတွင်း စုစည်းလိုက်၏။ မျက်စိကျိန်းလောက်အောင် တောက်ပသော ရွှေရောင်

အလင်းတန်းများ လင်းလက်နေပြီး၊ ကြောက်မက်ဖွယ် စွမ်းအား တစ်ခု ပျံ့နှံ့နေလေသည်။

‘…မြေကမ္ဘာအဆင့် သိုင်းပညာ၊ သေးငယ်တဲ့ ... အင်ပါယာလေး တစ်ခုမှာ မြေကမ္ဘာအဆင့် သိုင်းပညာတွေ ရှိတယ်လား။ ပြီးတော့ သူ့ရဲ့ ... အရှိန်အဝါက အရမ်း ထူးခြားတယ်၊ ဒီအစွမ်းက အစစ်အမှန်ယွမ် မဟုတ်တာ သေချာတယ်.. သူ အတိအကျ ဘယ်သူလဲ…’

ဖုန်းဝူချန်၏ အလွန် ကြမ်းတမ်းသော စွမ်းအားကို ခံစားမိရင်း ကျန်းကျွင့်လန် စိတ်ထဲမှ တုန်လှုပ်သွားသည်။ သို့သော် ဖုန်းဝူချန်၏ အရှိန်အဝါကို အာရုံခံမိလိုက်သည့်အခါတွင်တော့ သူ၏ မျက်နှာအမူအရာ အနည်းငယ် ကြောင်ငေးသွားသကဲ့သို့ ဖြစ်သွားသည်။

"ဝှစ်.."

ဖုန်းဝူချန်က သူ၏ ညာလက်မောင်းကို ဝှေ့ယမ်းလိုက်ရာ၊ ဝှစ်ခနဲ ပေါက်ကွဲသံတစ်ခုနှင့်အတူ၊ ကြီးမားလှသော ရွှေရောင် စွမ်းအင်ဓားချက်ကြီး ပစ်လွှတ်ထွက်သွားသည်။ အံ့ဩဖွယ် တန်ခိုးအရှိန်အဝါ ထုတ်လွှတ်လျက် ကောင်းကင်နှင့် မြေကြီးကိုပင် ထွင်းဖောက်သွားနိုင်သည့်အလား၊ လူတစ်ဦး၏ နှလုံးသားကို ကြောက်ရွံ့တုန်လှုပ်စေခဲ့၏။

မျက်စိတစ်မှိတ်အတွင်းမှာပင် အလွန်ကြမ်းတမ်းသော စွမ်းအားနှစ်ခု တိုက်မိကြပြီး၊ ချက်ချင်း ပေါက်ကွဲထွက်သွား၏။ ကြီးမားလှသော အသံက တောင်ကြားတစ်ခုလုံးကို ပဲ့တင်ထပ်သွားသည်။

"ဘုန်း.."

"ဝှစ်.."

ပြင်းထန်လှသော စွမ်းအင်လှိုင်းဂယက်များ ထိန်းချုပ်မရဘဲ ပျံ့နှံ့ထွက်သွားကာ၊ တောင်ကြားမှ တိုးညှင်းသော တုန်ခါသံတစ်ခုကိုပင် ဖြစ်ပေါ်စေခဲ့သည်။

မီးခိုးငွေ့ ထူထပ်စွာ လှိမ့်တက်လာပြီး တောင်ကြားကို ပြည့်နှက်သွားစေသည်။

အားကောင်းလှသော တိုက်မိမှုတစ်ခု ဖြစ်ပြီး၊ သူတို့နှစ်ဦးလုံး နောက်သို့ တွန်းထုတ်ခံလိုက်ရသည်။

"ကျိုရှောင်ကျူရီ.."

(ဘာသာပြန်သူမှတ်ချက်။ ။ သိုင်းကွက်အမည် ဖြစ်ပါတယ်။) သူ့ကိုယ်သူ တည်ငြိမ်အောင် ထိန်းလိုက်သည်နှင့်၊ ကျန်းကျွင့်လန်က နောက်တစ်ကြိမ် ဟိန်းဟောက်လိုက်ပြီး ပို၍ပင် ကြောက်မက်ဖွယ်ကောင်းသော အမြန်နှုန်းဖြင့် ပြေးဝင်လာရာ၊ သူ၏ လှုပ်ရှားမှု သိုင်းပညာမှာ အလွန် ကြောက်မက်ဖွယ်ကောင်းကြောင်း ပြသနေလေသည်။

"နဂါး နတ်ဘုရားအရိပ်သိုင်း.."

တိုက်ခိုက်မှုကို အာရုံခံမိသည်နှင့်၊ ဖုန်းဝူချန် ချက်ချင်းပင် သူ၏ လှုပ်ရှားမှု သိုင်းပညာကို အသုံးပြုကာ ရှောင်တိမ်းလိုက်သည်။

"ဘုန်း.."

ပြေးဝင်လာသည့် ကျန်းကျွင့်လန်က ဖုန်းဝူချန် ယခင်က ရှိနေခဲ့သည့် နေရာအတိအကျကို လက်ဝါးဖြင့် ရိုက်ချလိုက်ရာ၊ ပေါက်ကွဲသံတစ်ခုနှင့်အတူ မြေပြင်တွင် ကြီးမားသော ချိုင့်ခွက်ကြီးတစ်ခု ဖြစ်ပေါ်သွားလေ၏။ အပျက်အစီးများ အရပ်မျက်နှာ အားလုံးဆီသို့ လွင့်စဉ်ထွက်သွားသည်။

‘…သူ့ရဲ့ ... လှုပ်ရှားမှု သိုင်းပညာက တကယ်ပဲ ထူးချွန်တယ်၊ သူ့အမြန်နှုန်းက ငါ့ထက် မနိမ့်ဘူး..’

ကျန်းကျွင့်လန် စိတ်ထဲမှ သုံးသပ်မိသည်။

"ဝှစ် ဝှစ် ဝှစ်.."

ဖုန်းဝူချန် အလွန်လျင်မြန်စွာ လှုပ်ရှားလိုက်၏။ ပတ်ပတ်လည် လျင်မြန်စွာ ပြေးလွှားပြီးနောက်၊ မျက်စိတစ်မှိတ်အတွင်းမှာပင် ကျန်းကျွင့်လန်၏ ဘယ်ဘက်သို့ ထွက်ပေါ်လာကာ လက်ဝါးဖြင့် ရိုက်သွင်းလိုက်သည်။

ကျန်းကျွင့်လန်၏ မျက်နှာ အနည်းငယ် ပြောင်းလဲသွားသည်။

သူ လက်ဝါးဖြင့် ရိုက်ချပြီး ပြန်ဆုတ်ခါစမှာပင် ဖုန်းဝူချန်က တိုက်ခိုက်လာခဲ့ပြီ။ ဒါ ဘယ်လောက် ကြောက်မက်ဖွယ်ကောင်းသည့် အမြန်နှုန်းပါနည်း။

သို့သော် ကံကောင်းစွာပင် ကျန်းကျွင့်လန်မှာ လျင်မြန်သော တုံ့ပြန်မှု ရှိပြီး၊ အလောတကြီးဖြင့် သူ၏ ဘယ်ဘက်လက်ဝါးကို မြှောက်ကာ တိုက်ခိုက်မှုကို ရင်ဆိုင်လိုက်နိုင်ခဲ့သည်။

"အုန်း.."

လက်ဝါးချင်း တိုက်မိသွားပြီး၊ အုန်းခနဲ မြည်သံတစ်ခုနှင့်အတူ ကျန်းကျွင့်လန် နောက်တစ်ကြိမ် ဖုန်းဝူချန်၏ တွန်းထုတ်ခြင်းကို ခံလိုက်ရပြန်သည်။

ဖုန်းဝူချန်၏ အံ့မခန်း အမြန်နှုန်းရှိနေသည့်တိုင်၊ ဤမျှ အရေးကြီးသည့် အခြေအနေတွင် ပထမဆုံး အခိုက်အတန့်မှာပင် လက်ဝါးဖြင့် တုံ့ပြန်နိုင်ခဲ့သည့် ကျန်းကျွင့်လန်၏ စွမ်းရည်က ဖုန်းဝူချန်ကို အံ့အားသင့်စေခဲ့သည်။

"ဟမ့်.. မင်း တကယ်ပဲ အထင်ကြီးစရာ အစွမ်းရှိတာပဲ။"

ကျန်းကျွင့်လန်က အေးစက်စက် အပြုံးတစ်ခုဖြင့် ဆိုလိုက်သည်။ သူ၏ မျက်ဝန်းများ ယခု ပြောင်းလဲမှု တစ်ခုကို ပြသနေလေပြီ။

ပြင်းပြသော စိတ်ဓာတ်ဖြင့်၊ အားမာန်ပြည့်ဝပြီး ကြမ်းတမ်းလှသော စွမ်းအားတစ်ခု ကျန်းကျွင့်လန်၏ အတွင်းမှ ပျံ့နှံ့ထွက်လာရာ၊ သူ၏ အရှိန်အဝါမှာ ယခင်နှင့် လုံးဝ ကွဲပြားခြားနားနေတော့သည်။

"ချွင်..."

"သွေးနီရောင် မီးလျှံလှံ.."

လက်ကို ဝှေ့ယမ်းလိုက်ကာ ကျန်းကျွင့်လန်က ငွေရောင် လှံရှည်တစ်ချောင်းကို ဆင့်ခေါ်လိုက်ရာ၊ အားကောင်းလှသော အရှိန်အဝါ တစ်ခု လှံမှ ပျံ့နှံ့ထွက်လာသည်။

၎င်းမှာ အလယ်အလတ်တန်းစား ဝိညာဉ်လက်နက်တစ်ခုပင်..။

ဤအခိုက်အတန့်တွင် ကျန်းကျွင့်လန်၏ တိုက်ခိုက်ရေးစွမ်းအားမှာ အထွတ်အထိပ် အသစ်တစ်ခုသို့ တက်လှမ်းသွား၏။ ကြောက်မက်ဖွယ် အားကောင်းလှကာ၊ အသွင်ပြောင်းဘုံ နဝမအလွှာမှ တိုက်ခိုက်ရေး

သမားတစ်ဦးနှင့်ပင် ယှဉ်နိုင်လောက်ပေသည်။

"ဒီလောက် ကြမ်းတမ်းတဲ့ ... အရှိန်အဝါ.." လျိုချင်းယန် ထိတ်လန့်တကြား ရေရွတ်လိုက်မိသည်။

‘…ပင်ကိုယ်စွမ်းအား.. သူက ပင်ကိုယ်ခန္ဓာ အခြေအနေကို ပိုင်ဆိုင်ထားတာပဲ.. ဒီလူရဲ့ ... နောက်ခံက သေချာပေါက် မရိုးရှင်းဘူး..’

ဖုန်းဝူချန် စိတ်ထဲမှ အံ့အားသင့်စွာ တွေးလိုက်မိပြီး၊ ကျန်းကျွင့်လန် သူ၏ စွမ်းအားကို အသက်သွင်းလိုက်ပုံအရ ၎င်းမှာ ပင်ကိုယ်စွမ်းအား ဖြစ်ကြောင်း နားလည်လိုက်သည်..။

"ငါ့ကို ဒီအခြေအနေအထိ တွန်းပို့နိုင်တာ၊ မင်းက ပထမဆုံးပဲ။"

ကျန်းကျွင့်လန်က သွေးနီရောင်မီးလျှံလှံကို ဖုန်းဝူချန်ထံသို့ ချိန်ရွယ်ရင်း မောက်မာစွာ ကြေညာလိုက်ရာ၊ သူ၏ မျက်ဝန်းများ ယုံကြည်မှုနှင့် ဂုဏ်ယူမှုတို့ဖြင့် ပြည့်နှက်နေ၏။

“မင်းရဲ့ ... စတုတ္ထအဆင့် လက်နက်သန့်စင်သူ အဆင့်နဲ့ဆိုရင်၊ မင်းလက်ထဲက အဲ့ဒီ သွေးနီရောင်မီးလျှံလှံကို မင်း ကိုယ်တိုင် မဖန်တီးနိုင်လောက်ဘူး”

ဖုန်းဝူချန်က ခပ်ဖွဖွ ပြုံးရင်း မှတ်ချက်ချလိုက်သည့် တစ်ချိန်တည်းမှာပင်၊ သူ၏ မီးလျှံဓားကိုလည်း ထုတ်ယူလိုက်သည်။

"အိုး.. မင်းက ငါ့ကို စတုတ္ထအဆင့် လက်နက်သန့်စင်သူမှန်း တကယ် သိနေတာလား။" ကျန်းကျွင့်လန်က အံ့အားသင့်စွာ မေးလိုက်သည်။

ဖုန်းဝူချန်က ခပ်ဟဟ ရယ်မောလိုက်ကာ…

"မင်းရဲ့ ... လက်ရှိအသက်အရွယ်နဲ့ စတုတ္ထအဆင့် လက်နက်သန့်စင်သူ အဆင့်ကို ရောက်ရှိတာက တော်တော်လေး မှတ်သားလောက်စရာပဲ။ တိုက်ကြီးတစ်ခုလုံးမှာ၊ မင်းကို ယှဉ်နိုင်တဲ့ ... သူ လက်တစ်ဆုပ်စာတောင် မရှိလောက်ဘူးလို့ ငါ စိုးရိမ်မိတယ်၊ ဒါက မင်းက လက်နက်သန့်စင်ခြင်း ပါရမီရှင် တစ်ယောက် ဖြစ်ကြောင်း ပြနေတာပဲ။"

ခေတ္တရပ်နားပြီးနောက် ဖုန်းဝူချန်က ဆက်ပြော၏။

“မင်းက ကျင့်ကြံခြင်း ပါရမီရှင်တစ်ယောက်လည်း ဖြစ်တယ်၊ ပင်ကိုယ်ခန္ဓာ၊ ပင်ကိုယ်စွမ်းအားနဲ့၊ တစ်သောင်းမှာ တစ်ယောက်ပဲ။ မင်းမှာ ဒါတွေ ပိုင်ဆိုင်ထားတာက သက်သေအလုံအလောက်ပဲ..”

“အိုး…၊ မယုံနိုင်စရာပဲ။ မင်းက ငါ့ဗိုက်ထဲက သံကောင်များလားကွာ၊ ဘယ်လိုလုပ် အရာအားလုံးကို သိနေရတာလဲ။"

ကျန်းကျွင့်လန်က လုံးဝ မယုံကြည်နိုင်သည့် မျက်နှာဖြင့် ပြန်ပြောလိုက်ပြီး၊ ဖုန်းဝူချန်၏ အသိပညာကြောင့် အံ့အားသင့်နေမိသည်။

"ခစ်.."

ဤစကားကို ကြားသော် တိုက်ပွဲကို ကြည့်ရှုနေသည့် မြောင်ချင်းချင်းမှာ တိုတောင်းသော ရယ်သံတစ်ခုကို မထိန်းနိုင်ဘဲ ထုတ်လွှတ်လိုက်မိသည်။

ဖုန်းဝူချန်က ခပ်အေးအေးပင် ပြန်ဖြေလိုက်သည်။

"ရှေးဟောင်းကျမ်းတွေထဲမှာ ငါ မြင်ဖူးတာပါ။"

"ဟမ့်.. မင်း ဒီလောက်အများကြီး သိနေမှတော့၊ ငါ့ရဲ့ ... တကယ့် စွမ်းအားကို ကြည့်လိုက်ဦး.. လှံကို ရှုစား.." ကျယ်လောင်စွာ ဟစ်ကြွေးလိုက်ပြီး၊ ကျန်းကျွင့်လန်က သွေးနီရောင်မီးလျှံလှံကို ခဏတာ ဝှေ့ယမ်းလိုက်ပြီးနောက်၊ အထက်မှ မြေပြင်ဆီသို့ ထိုးစိုက်ချလိုက်လေသည်။

အားကောင်းပြီး လျင်မြန်လှသော လှံအလင်းတစ်ခု မြေပြင်တစ်လျှောက် ပစ်လွှတ်ထွက်သွားရာ၊ ၎င်း၏ အစွမ်းမှာ အားမာန်ပြည့်ဝပြီး ကြံ့ခိုင်လှသည်။ အကယ်၍သာ တစ်စုံတစ်ယောက် ထိမှန်သွားခဲ့ပါက၊ သူတို့ နှစ်ပိုင်း ပြတ်သွားဖွယ် ရှိလေသည်..