ကမ္ဘာကြီး၏ အခြေအနေ

ဝမ်ဝေ့က မာမျိုးနွယ်ဝင်များကို ပြန်လွှတ်လိုက်ပြီးနောက် ယန်းအိုက်နှင့် ခဏတာ စကားပြောပြီး တောင်ထိပ်သို့ ပြန်လာခဲ့သည်။ မျိုးနွယ်ခေါင်းဆောင် ရှဲ့ဟွမ်းက သူ့ကို စောင့်နေနှင့်လေ၏။

"ဝမ်ချီရော ဘယ်မှာလဲ"

"သူက ထာဝရဘုရင် အတိဒုက္ခစမ်းသပ်ချက်ကို ရင်ဆိုင်ဖို့ ပြင်ဆင်နေပါတယ်" သူမက ပြန်ဖြေသည်။

"ဒါဆို သူ ငါ့စကားကို နားထောင်ပြီး ကျင့်ကြံရေးအပေါ် အလေးထားလာပြီပေါ့" ဝမ်ဝေ့က ရေရွတ်လိုက်သည်။

"ငါ့နောက်လိုက်ခဲ့"

သူက ငါးမျှားကန်ဆီသို့ ဦးတည်သွားကာ ကံကြမ္မာငါးမျှားတံကို ဆွဲထုတ်၍ သူ့ကံကို စမ်းသပ်ခဲ့သည်။ ဝူဟုန်သည် မေတ္တယျနှင့် ပြန်လည်ဆုံစည်းနေဆဲ ဖြစ်၍ သူ့အတွက် အချိန်ရနေသေးသည်။

"ဘာတွေ အစီရင်ခံစရာရှိလဲ"

"ပထမဆုံးက မီးတောက်ပန်းပဲဆရာ အကြောင်းပါ" ရှဲ့ဟွမ်းက ပြောသည်။ "သူ့မှတ်ဉာဏ်ကို လုံးဝဖျက်ပစ်ခဲ့ပါတယ်။ သူက သူ့အဖွဲ့အစည်းဆီ မပြန်ခင် စာတစ်စောင် ချန်ထားခဲ့ပါတယ်"

ဝမ်ဝေ့က စာကို ယူလိုက်သည်။ အဓိကအားဖြင့် သူ့အတွက် လုပ်ပေးခဲ့သမျှအားလုံးကို ကျေးဇူးတင်ကြောင်း ရေးထားသည်။ မီးတောက်ပန်းပဲဆရာက ၎င်းတို့နှစ်ဦး၏ မဟာမိတ်ဆက်ဆံရေးကို ဆက်လက်ထိန်းသိမ်းထားပြီး သက်ဆိုင်ရာဂိုဏ်းအသီးသီးအထိ တိုးချဲ့ရန်လည်း အကြံပြုထားသည်။

"အဲ့ဒီပစ္စည်းက ငါ့လက်ထဲမှာ ရှိနေတယ်ဆိုတာ သူ သိရင် ဒီလိုခံစားရပါ့မလား မသိဘူး"

သူသည် စာကို သိမ်းဆည်းလိုက်ပြီးနောက် မေးလိုက်သည်။

"ကျောက်စာပြား ကူးယူတာ ဘယ်လိုဖြစ်နေပြီလဲ"

"မသိဘူး … ဒါပေမဲ့ လူကြီးမင်းဝမ်ပေါ်က ခေါင်းဆောင် အပြင်ရောက်တာနဲ့ သူ့ဆီ လာတွေ့ဖို့ ပြောထားပါတယ်"

"ခဏနေရင် သွားတွေ့လိုက်မယ်" ဝမ်ဝေ့က ခေါင်းငြိမ့်ပြသည်။

"ဆက်ပါဦး"

"ခေါင်းဆောင် သီးသန့်ကျင့်ကြံနေတုန်း အဓိကဖြစ်ရပ် သုံးခု ဖြစ်ပျက်ခဲ့ပါတယ်။ ပထမတစ်ခုကတော့ နတ်ဆိုးတွေနဲ့ ပင်ကိုနတ်ဆိုးနတ်ဘုရားတွေကြား တိုးလာနေတဲ့ ထိပ်တိုက်ရင်ဆိုင်မှု အကြောင်းပါ။ အထွတ်အမြတ်တောင်က ကောင်းကင်ယွမ်ထီအားလုံးကို လူသိရှင်ကြား သတ်ဖြတ်ပြီးနောက် ဗိမာန်ကို သစ္စာဖောက်တွေ ဖုံးကွယ်ထားတယ်လို့ စွပ်စွဲခဲ့ပါတယ်။ ပြီးတော့ သူတို့က ကမ္ဘာလောကကြီးကို ဗိမာန်အပေါ် ဆန့်ကျင်လာအောင် စည်းရုံးလှုံ့ဆော်မှု စတင်ခဲ့ပါတယ်"

"စိတ်ဝင်စားစရာပဲ။ ဗိမာန်က သူတို့ရဲ့ ယွမ်ထီတွေကို သတ်ခဲ့တာလား ဒါမှမဟုတ် ပြည်တွင်းပဋိပက္ခထဲ ကျရောက်ခဲ့တာလား"

ဝမ်ဝေ့က မေးလိုက်သည်။ သူက ငါးမျှားချိတ်တွင် သူတော်စင်အဆင့်အတွက် အသုံးမဝင်သော ပစ္စည်းအချို့ကို မိ၍ ထပ်မံကြိုးစားလိုက်သည်။

"ပြည်တွင်းပဋိပက္ခပါ"

ရှဲ့ဟွမ်းက ပြန်ဖြေသည်။ "သူတို့ရဲ့ ကောင်းကင်ယွမ်ထီတွေကို သတ်ဖို့ ငြင်းဆန်ခဲ့တာကနေ အတွင်းရေးပဋိပက္ခ ဖြစ်လာတာပါ"

"ဘယ်လောက်တောင် ဆိုးရွားခဲ့တာလဲ"

"လွန်ခဲ့တဲ့ ယွမ်ခေတ် ၃၀၀၀ လောက်က ဗိမာန်ထဲမှာ စံပြနှစ်ဦးနဲ့ ကောင်းကင်ယွမ်ထီတွေကြားမှာ အကြီးစား တိုက်ပွဲတစ်ခု ဖြစ်ခဲ့လို့ တစ်ယောက်ယောက်က အတင်းအကျပ် ကြားဝင်ရပ်တန့်ခဲ့ရပါတယ်"

"ဒါက လူအများအထင်မှားအောင် လုပ်တဲ့ ဟန်ပြပွဲ မဟုတ်ဘူးလို့ ယုံကြည်စိတ်ချရဲ့လား" ဝမ်ဝေ့က မေးသည်။

"ကျွန်မတို့ သတင်းအချက်အလက်တွေအရ ဒီတိုက်ပွဲဟာ တကယ်ဖြစ်ဖို့ ၉၅% သေချာပါတယ်"

"ဒီစည်းရုံးလှုံ့ဆော်မှုအပေါ် လူအများရဲ့ တုံ့ပြန်မှုက ဘယ်လိုရှိလဲ" ဟု ဝမ်ဝေ့က မေးသည်။

"လေလွင့်ကျင့်ကြံသူတွေကတော့ ဆူပူနေကြပေမဲ့ ဒါကို ရှုပ်ထွေးမှုနဲ့ လုယက်ဖို့ အခွင့်အရေးအဖြစ် ပိုမြင်ကြတယ်။ အများစုကတော့ ဗိမာန်ရဲ့ အရင်းအမြစ် ဌာနတွေကိုတောင် တိုက်ခိုက်ခဲ့ကြပါတယ်။ အဆုံးမဲ့လဲလှယ်ရေးခန်းမက ဒီလူတွေရဲ့ လုပ်ရပ်ကို လူသိရှင်ကြား ရှုတ်ချခဲ့ပါတယ်"

"ကျန်တဲ့ အာဏာရှင်တွေရော"

"အဲ့ဒီမှာပဲ ဒုတိယ အရေးကြီးတဲ့ ဖြစ်ရပ်က ဝင်လာတာပါ" ရှဲ့ဟွမ်းက ပြန်ဖြေသည်။

"မျိုးနွယ်စု အထွတ်အမြတ်တောင်က မဟာညီလာခံကို ခေါ်ယူခဲ့ပြီး ဗိမာန်က တာဝန်ပျက်ကွက်မှု ဖြစ်နိုင်ခြေရှိ၊ မရှိ ဆွေးနွေးဖို့ အာဏာရှင်အားလုံးကို ဖိတ်ခေါ်ခဲ့ပါတယ်"

ဝမ်ဝေ့က မျက်မှောင်ကြုတ်လိုက်သည်။ မဟာညီလာခံသည် အာဏာရှင်အားလုံးနှင့် ရှေးဦးစံပြရှိထားသည့် မျိုးနွယ်စုများ၏ အစည်းအဝေး ဖြစ်ပေသည်။ ထိုညီလာခံသည် အာဏာရှင် တစ်ဆယ့်သုံးဦးထဲမှ ခုနစ်ဦး သဘောတူမှသာ ဖြစ်မြောက်နိုင်ခြင်း ဖြစ်၏။

"အခုထိ ဘယ်နှယောက် သဘောတူပြီးပြီလဲ"

"ငါးယောက်ပါ" ရှဲ့ဟွမ်းက ပြန်ဖြေသည်။

"နှစ်အနည်းငယ်တိုင်း တစ်ယောက်ယောက်က ဒီကိစ္စကို ဆွေးနွေးဖို့ ဆန္ဒရှိကြောင်း လူသိရှင်ကြား ကြေညာနေပါတယ်"

"ဒါဆို သူတို့က ဗိမာန်အပေါ် ဖိအားပေးပြီး ဒီကိစ္စကို အတွင်းရေးမှာ ဖြေရှင်းခိုင်းဖို့ ကြိုးစားနေတာပေါ့" ဝမ်ဝေ့က သုံးသပ်သည်။

"ငါတို့ဘက်ကရော ဘာပြောပြီးပြီလဲ"

"မပြောရသေးပါဘူး။ ဒါပေမဲ့ နတ်ဆိုးမျိုးနွယ်က ဘိုးဘေးယန်းအိုက်နဲ့ လာရောက် စကားပြောခဲ့ပါတယ်။ ဒါပေမဲ့ နောက်ဆုံးဆုံးဖြတ်ချက်က ဘာလဲဆိုတာတော့ ကျွန်မ မသိပါဘူး"

ဝမ်ဝေ့က သူ၏ ရှေးဦးမျိုးစေ့ အမှတ်အသားပြားကို ထုတ်ယူပြီး ယန်းအိုက်၏ ဆုံးဖြတ်ချက်ကို စစ်ဆေးရန် အကြီးအကဲခန်းမသို့ ဝင်ရောက်ခဲ့သည်။ မျှော်လင့်ထားသည့်အတိုင်း ဝမ်ဝေ့ မှန်ကန်နေသည်။ သဘောတူညီချက်မှာ ဗိမာန်အနေဖြင့် ဤကိစ္စကို အတွင်းမှာ ဖြေရှင်းခြင်းက အကောင်းဆုံးဖြစ်သော်လည်း လိုအပ်ပါက ဝင်ရောက်စွက်ဖက်သင့်၊ မသင့် ဆွေးနွေးရန် မဟာညီလာခံကို ကျင်းပမည် ဖြစ်သည်။

"ကိစ္စတွေက ဒီလောက်မရိုးရှင်းဘူး" ဝမ်ဝေ့က ရေရွတ်သည်။

"ညီလာခံမှာ အင်အားစုတစ်ခုရဲ့ ကိစ္စတွေကို ဝင်ရောက်စွက်ဖက်နိုင်တဲ့ အခွင့်အာဏာရှိတယ်။ ဒါပေမဲ့ အင်အားစုရဲ့ကိစ္စတွေက တခြားသူအားလုံးအတွက် လုံခြုံရေးခြိမ်းခြောက်နေပြီဆိုမှသာ အများစုက အမိန့်ကို အကောင်အထည်ဖော်ဖို့ ဆုံးဖြတ်နိုင်မှာလေ "

"ဒီကပ်ဘေးကြီး နီးလာပြီဆိုတော့ ယွမ်ထီတွေရဲ့ တည်ရှိမှုကို ခြိမ်းခြောက်မှုအဖြစ် ငြင်းခုံနိုင်တယ်ဆိုတာ ဗိမာန်က သိပါတယ်။ ဒါဆို ဘာလို့ သူတို့ အခုထိ ပြဿနာကို မဖြေရှင်းရသေးတာလဲ"

ဗိမာန်အနေနှင့် ကောင်းကင်ယွမ်ထီတွေကို ယာယီချိတ်တံဆိပ်ပိတ်ပြီး အခြေအနေကို အလွယ်တကူ လျော့ပါးအောင် လုပ်ဆောင်နိုင်ခဲ့သည်။

"သူတို့ရဲ့ ဗိမာန်သခင်တွေက ရှေးဦးစံပြတွေ ဖြစ်နေတာတောင် ဘာလို့ အခြေအနေကို အတင်းအကျပ် မနှိမ်နင်းရတာလဲ … ထူးဆန်းတယ်" ရှဲ့ဟွမ်းက ခေါင်းညိတ်သည်။

"မဖြစ်နိုင်လို့ မဟုတ်ရင်တော့... အနည်းဆုံးတော့ အဖိုးအခ မပေးရဘဲ မလုပ်နိုင်လို့ ဖြစ်လိမ့်မယ်" ဝမ်ဝေ့က မျက်လုံးမှေးစင်းလျက် ပြောသည်။

"ဘယ်လိုလုပ် ဖြစ်နိုင်မှာလဲ"

"သူတို့ရဲ့ ဂိုဏ်းကို ယွမ်ထီမူလဗိမာန်လို့ ခေါ်ပေမဲ့ ဧကရာဇ်လမ်းစဉ် ကျင့်ကြံသူတွေက အာဏာ ၉၀% ကို ထိန်းချုပ်ထားတာ။ ဒါဆို ပင်ကို နတ်ဆိုးနတ်ဘုရားဗိမာန်လို့ ဘာလို့ မပြောင်းလဲကြတာလဲ"

"ကံကောင်းမှုကြောင့် မဟုတ်ဘူးလား" ရှဲ့ဟွမ်းက မေးသည်။

"ကောင်းကင်ယွမ်ထီတွေရဲ့ ကံကောင်းမှုဟာ ရှေးကျပြီး လောကကြီး စတင်ကတည်းက ရှိနေခဲ့တာ။ ဧကရာဇ်လမ်းစဉ်အထက်မှာ အုပ်စိုးခဲ့တဲ့အချိန်က စတင်ခဲ့တာဖြစ်လို့ ဒါကို ထိန်းသိမ်းထားတာက သူတို့အတွက် ပိုအကျိုးရှိမယ်လို့ ထင်ပါတယ်"

"ဒီလောက်ကြာပြီးနောက် အဲ့ဒီကံကောင်းမှုက ဘယ်လောက် ကျန်နေသေးလို့လဲ။ ပင်ကို-ဟော်သဲ့ စစ်ပွဲမှာ သူတို့ ရှုံးနိမ့်ပြီးနောက်မှာရော"

ဝမ်ဝေ့က မေးလိုက်သည်။

"လက်ရှိခေတ်မှာ သူတို့အတွက် နာမည်ပြောင်းပြီး ယွမ်ထီတွေရဲ့ ကျန်ရှိနေတဲ့ ကံကောင်းမှုကနေ ဆက်လက်အကျိုးခံစားဖို့ ဒုတိယကံကောင်းမှုလက်နက်ကို သန့်စင်မွမ်းမံလိုက်တာက ပိုအကျိုးရှိတယ်"

"ခေါင်းဆောင် ပြောတာ မှန်ချင်မှန်ပါလိမ့်မယ်၊ ဒါပေမဲ့ ဗိမာန်သခင်တွေက နာမည်ကို မပြောင်းလဲရတဲ့ တစ်ခုတည်းသော ကျိုးကြောင်းဆီလျော်တဲ့ အကြောင်းပြချက်က သူတို့အတွက် ဆိုးကျိုးဖြစ်စေမှာမို့လို့ပါ။ အဲ့ဒါက ယွမ်ထီတွေမှာ ရှေးဦးစံပြတစ်ဦးကို ထိခိုက်စေနိုင်တဲ့ တစ်ခုခု ရှိတယ်လို့ ဆိုလိုတာလား။ မဟုတ်ဘူး … အဲ့ဒါက အဓိပ္ပာယ်မရှိဘူး။"

"နတ်ဆိုးမျိုးနွယ်က သွေးမျိုးဆက် သတ်ဖြတ်ရေးအဆောင်ကို ဖန်တီးသန့်စင်ပြီးတဲ့နောက်မှာ အတော်လေး အသာစီးရခဲ့ပါတယ်။ ဗိမာန်မှာ အဲ့ဒီလို ပစ္စည်းတစ်ခု ရှိခဲ့ရင် ဟိုးကတည်းက အသုံးပြုခဲ့ပြီးလောက်ပြီ"

နတ်ဆိုးမျိုးနွယ်မှာ ရှေးဦးစံပြနှစ်ဦး မဟုတ်ဘဲ နှစ်ဦးခွဲ ရှိသည်ဟု ဆိုနိုင်သည်။ သွေးမျိုးဆက် သတ်ဖြတ်ရေး စမ်းသပ်ချက်က ထိပ်သီးစံပြတစ်ဦးအား ရှေးဦးစံပြ၏ စွမ်းအားအစစ်အမှန်ကို ရရှိစေနိုင်သော်လည်း မျိုးနွယ်စုအထွတ်အမြတ်တောင်၏ ပင်မနယ်မြေမှ မထွက်ခွာနိုင်ဟူသော ကန့်သတ်ချက် ရှိနေပြန်သည်။ ထိုအဆောင်သည် အထွတ်အမြတ်ခေါင်းဆောင်များအား သူတို့၏ အခြေစိုက်စခန်းများသို့ တစ်စုံတစ်ဦးက ထိုးဖောက်ဝင်ရောက်မည်ကို စိုးရိမ်စရာမလိုဘဲ ဗိမာန်ကို တိုက်ခိုက်ခွင့်ပြုခဲ့သည်။

ရှဲ့ဟွမ်း မှန်ကန်ကြောင်း ဝမ်ဝေ့ သိသည်။ ဗိမာန်တွင် အမှန်တကယ် ထိရောက်သော ရှေးဦးစံပြအဆင့် စွမ်းအားအရံများ ရှိခဲ့ပါက သူတို့ကို အသုံးပြုခဲ့ပြီးလောက်လေပြီ။ သူသည် အဝေးကို ကြည့်လိုက်ပြီး ကံကြမ္မာ၏ စွမ်းအားကို အသုံးပြုလိုက်သည်နှင့် သူ့မျက်လုံးများက ခဲဖြူရောင်သို့ ပြောင်းလဲသွားသည်။

"ဒါက ကျိန်စာပဲ" ဝမ်ဝေ့က ထုတ်ဖော်လိုက်သည်။

"ပင်ကိုနတ်ဆိုး နတ်ဘုရားတိုင်းက ကောင်းကင်အလိုဆန္ဒကို မစုပ်ယူမီ သစ္စာပြုရလိမ့်မယ်။ ဒီသစ္စာကို ဖောက်ဖျက်ခြင်းရဲ့ နောက်ဆက်တွဲ ပြစ်ဒဏ်က သူတို့ရဲ့ တည်ရှိမှုနဲ့ ဗိမာန်ရဲ့ ကံကောင်းမှုကနေတဆင့် ရစ်ပတ်ထားတဲ့ အငြိုးအတေး ကျိန်စာပဲ”

"အဲဒီယွမ်ထီတွေက မတုံးဘူး။ သူတို့တွေက ဧကရာဇ်လမ်းစဉ်က အနာဂတ်ဖြစ်ပြီး နောက်ဆုံးမှာ သူတို့ရဲ့ဗိမာန်ကို အုပ်စိုးလိမ့်မယ်ဆိုတာ သိခဲ့တယ်။ ဒါကြောင့် သူတို့ရဲ့ မျိုးနွယ်အဖွဲ့ကို ကာကွယ်ဖို့ ပြင်ဆင်မှုတွေ လုပ်ခဲ့ကြတာ"

ရှဲ့ဟွမ်းက သူ့ကို ကြည့်လိုက်သည်။ ထိုသို့သော လျှို့ဝှက်ချက်များကို တွက်ချက်၍ မရနိုင်ပေ။ တစ်စုံတစ်ဦးက အောင်မြင်ခဲ့လျှင်ပင် ထိုသို့သော ဟောကိန်းအတွက် နောက်ဆက်တွဲ ပြစ်ဒဏ်က သူတို့ကို သတ်ပစ်လိမ့်မည်။ သို့သော် သူမ၏ ခေါင်းဆောင်က ပေါ့ပေါ့ပါးပါး ပြုလုပ်ခဲ့ပြီး မည်သည့် ထိခိုက်မှု လက္ခဏာမှ မပြခဲ့ပေ။

တကယ်ကို ကံကြမ္မာတာအို ကျင့်ကြံသူပဲ

"ကျိန်စာလား" ရှဲ့ဟွမ်းက ပြောသည်။

"ရှေးဦးစံပြတွေတောင် ဖြေရှင်းနည်း မရှိလောက်အောင် ဘယ်လောက်တောင် ကြောက်စရာကောင်းလိုက်လဲ"

"ဒါက တကယ်ကို ထူးချွန်တယ်။ သစ္စာဆိုထားတာကို ဖောက်ဖျက်လိုက်တာနဲ့ ဗိမာန်ရဲ့ ချီကံကောင်းမှု တစ်ခုလုံးဟာ ချက်ချင်း ပျက်စီးသွားလိမ့်မယ်။ ပြီးတော့ နောက်ဆက်တွဲပြစ်ဒဏ်က သူတို့ရဲ့ ကျင့်ကြံသူအားလုံးရဲ့ ၇၀% ကို သေစေလောက်တယ်။ ပိုဆိုးတာက ကျင့်ကြံဆင့် မြင့်မားလေ၊ နောက်ဆက်တွဲ ပြစ်ဒဏ်က ပိုကြီးလေပဲ"

"ဒါပေမဲ့ ဒါက မပြီးပြည့်စုံသေးဘူး"

"ညီလာခံလား" ရှဲ့ဟွမ်းက မေးသည်။

"မှန်တယ်။ နတ်ဆိုးတွေရဲ့ လှုပ်ရှားမှုက ထူးချွန်တယ်။ ဒါပေမဲ့ ဒါက ရှေးဦးစံပြတွေအတွက် အခွင့်အရေးတစ်ခုလည်း ပေးခဲ့တယ်။ အာဏာရှင်တွေက ယွမ်ထီတွေကို ခြိမ်းခြောက်မှုအဖြစ် သတ်မှတ်လိုက်ပြီး ဖျက်ဆီးဖို့ ဆုံးဖြတ်လိုက်ရင် သူတို့ရဲ့ သစ္စာကို ဖြည့်ဆည်းပြီး လွတ်လပ်ခွင့်ကို ရဖို့အတွက် အနည်းငယ် ခုခံပြသဖို့ပဲ လိုအပ်တယ်"

"ဒါဆိုရင် သူတို့ရဲ့ လက်မခံနိုင်မှုကို ရှင်းပြနိုင်ပြီ" ရှဲ့ဟွမ်းက ခေါင်းညိတ်သည်။

"ဒါပေမဲ့ ဒီအစီအစဉ်က အန္တရာယ် မများဘူးလား။ သူတို့မှာ ယွမ်ထီ အရေအတွက် အများအပြားရှိပြီး သူတို့ သေဆုံးတာက အင်အားစုကို အားနည်းစေလိမ့်မယ်"

"သူတို့ရဲ့ မျက်လုံးထဲမှာ ယွမ်ထီတွေဟာ ဗိမာန်အတွက် အမြဲတမ်း တာဝန်ခံရသူတွေ၊ သူတို့ရဲ့ ထိန်းချုပ်မှု ဒါမှမဟုတ် ဗိမာန်ရဲ့ သာယာဝပြောမှုအတွက် ကပ်ရောဂါတစ်ခု ဖြစ်နေခဲ့တာ ဖြစ်နိုင်တယ်။ တစ်ခါတစ်ရံ ခန္ဓာကိုယ် ပြန်လည်ကောင်းမွန်ဖို့အတွက် ကင်ဆာဖြစ်နေတဲ့ အစိတ်အပိုင်းကို ဖြတ်တောက်တာ အကောင်းဆုံးပဲ"

"ခေါင်းဆောင် မှန်ချင်မှန်ပါလိမ့်မယ်။ ဒါပေမဲ့ ကျွန်မအတွက်တော့ အန္တရာယ် အရမ်းများတယ်လို့ ထင်ပါတယ်"

ရှဲ့ဟွမ်းက ပြောသည်။

"အဲ့ဒါက မင်းရဲ့ အတွေးအခေါ်က အရမ်းကျဉ်းမြောင်းနေလို့ပဲ"

ဝမ်ဝေ့က ပြောသည်။

"ကပ်ဘေးမှာ ဘယ်သူမှ လုံခြုံနေမှာ မဟုတ်ဘူး။ ဘယ်အင်အားစုကမှ မလိုချင်တဲ့ ဒါမှမဟုတ် မလိုအပ်တဲ့အရာက တာဝန်ခံရမှုတွေ ဒါမှမဟုတ် အတားအဆီးတွေပဲ"

"ဒီလှုပ်ရှားမှုက သူတို့ရဲ့ရန်သူနတ်ဆိုးတွေနဲ့ ဆန့်ကျင့်ဖို့ အားနည်းသွားစေနိုင်ပေမဲ့ အကောင်းဘက်ကလည်း ရှိပါတယ်။ ကပ်ဘေး စတင်ချိန်အထိ သူတို့ အချိန်အလုံအလောက် ဆွဲနိုင်ရင် နတ်ဆိုးတွေက သူတို့ရဲ့ ဒုက္ခကို အခွင့်ကောင်းယူဖို့ အခွင့်အရေး ရတော့မှာ မဟုတ်ဘူး"

"ဒါပေမဲ့ ကပ်ဘေး ဘယ်တော့ လာမယ်ဆိုတာ ဘယ်သူမှ မသိနိုင်ဘူး။ သူတို့ အမှားလုပ်မိပြီး နတ်ဆိုးတွေက သူတို့ရဲ့အခြေအနေကို အခွင့်ကောင်းယူလိုက်ရင် ဘယ်လိုလုပ်မလဲ"

"ဘယ်အစီအစဉ်မှ အောင်မြင်မယ်လို့ အာမခံချက် မရှိဘူး။ ပြီးတော့ ကပ်ဘေး ရောက်လာဖို့ သူတို့ စောင့်ဆိုင်းရမယ်ဆိုတဲ့ အယူအဆအောက်မှာ မင်း လုပ်ဆောင်နေပုံရတယ်"

"သူတို့က အတင်းအကျပ် ဆွဲထုတ်လာလိမ့်မယ်လို့ ဆိုလိုတာလား" ရှဲ့ဟွမ်းက အံ့သြစွာ မေးသည်။

"ဟုတ်တယ်။ သူတို့ စိတ်အားထက်သန်နေရင် ဖြစ်နိုင်ပါတယ်။ ဒါပေမဲ့ ဒါက သူတို့ကို သစ္စာဖောက်တွေ ဖြစ်စေမှာ မဟုတ်ဘူးလား"

"သူတို့ကို ဖမ်းမိမှသာ ဖြစ်လိမ့်မယ် ဒါမှမဟုတ် ပိုကောင်းတာက သူတို့ဟာ အရာအားလုံးကနေ လက်ရှောင်ဖို့ တစ်ယောက်ယောက်ကို စတေးဖို့ပဲ လိုတယ်"

ဝမ်ဝေ့က လှောင်ပြုံးပြုံးလိုက်သည်။

ကောင်းကင်တာအိုက ဤကပ်ဘေးကို လိုလားနေသည့်ဆိုသည့် အချက်လည်း ရှိသည့်အပြင် ညစ်ပတ်သည့် အလုပ်ကိုလုပ်ဖို့ ပင်ကိုနတ်ဆိုးနတ်ဘုရားတွေ၏ လက်တွေကို ဌားရမ်းအသုံးပြုနိုင်လေသည်။