စိတ်ကူးယဉ်မနေနဲ့တော့၊ တိုက်ပွဲ စနေပြီ

ကောလိပ်ကို ကျောက်တုံးများဖြင့် တည်ဆောက်ထားသော်လည်း ၎င်း၏ အသွင်အပြင်အရ အခြား အဆောက်အအုံများနှင့် ကွာခြားမှု မရှိခဲ့ချေ။

အဖြူရောင် အရိုးများ မြေပြင်မှ ထိုးထွက်လာပြီး ဝိညာဉ်ကောလိပ်ကို ဝန်းရံ ထားခဲ့သည်။

ဝိညာဉ်ကောလိပ် အထက်တွင် ရာသီဥတုကို ပုံဖော်ရန် အသုံးပြုထားသော ကောင်းကင်သည် မီးခိုးရောင် တိမ်တိုက်များနှင့် လျှပ်စီးများဖြင့် ပြည့်နှက် နေခဲ့သည်။

ဝိညာဉ်ကောလိပ် တစ်ခုလုံးအမှောင်ထုဖြင့် ဖုံးလွှမ်း နေခဲ့သည်။ အလင်းရောင် သို့မဟုတ် အသံ တစ်စုံတစ်ရာမျှ မရှိခဲ့ချေ။

ကန့်သတ်ဒန်ဂျင်နယ်မြေ တွင်ကဲ့သို့ နောက်ခံတေးဂီတ မရှိခဲ့ဘဲ အထက် ကောင်းကင်မှ မိုးခြိမ်းသံများကိုသာ ကြားနေရသည်။ ၎င်းသည် ကြောက်မက်ဖွယ် ကောင်းသော ပတ်ဝန်းကျင် တစ်ခု ဖြစ်သည်။

ဂိမ်းမာများသည် ကြောက်မက်ဖွယ် ကောင်းသော လေထုကို ခံစား မိလိုက်ကြသည်။

"မြင်ကွင်းတွေက ပိုပြီး ကြောက်စရာ ကောင်းလာတယ်။ ဝိညာဉ်ကောလိပ်က ကြီးမားပုံပဲ။ တပ်ဖွဲ့ လေ့ကျင့်ရေးကွင်း ကန့်သတ်ဒန်ဂျင်နယ်မြေက ဘယ်မှာလဲ။" ဂနိုင်သား ဝိညာဉ်ကောလိပ်၏ နေရာရွှေ့ပြောင်း ဝင်ပေါက်မှ ထွက်လာပြီးနောက် ပတ်ဝန်းကျင်ကို ဝေ့ဝဲ ကြည့်ရှုကာ သူ ယခင်က မြင်တွေ့ဖူးသော မြေပုံ၏ အသွင်အပြင်များကို ခွဲခြားသိရှိရန် ကြိုးစား နေခဲ့သည်။

"မင်း မြင်မှာ မဟုတ်ဘူး။ ငါတို့ ငါးယောက်အဖွဲ့ ကန့်သတ်ဒန်ဂျင်နယ်မြေ ထဲမှာ ရှိနေတုန်းက ဝိညာဉ်ကောလိပ်ကို လှမ်းမြင်တွေ့ နိုင်သေးတယ်၊ ဒါပေမဲ့ အဲ့တုန်းက ဒီလောက် များတဲ့ အဖြူရောင် အရိုးတွေ မရှိခဲ့ဘူး။ အဲ့ဒါက အရမ်း ဝေးပြီး လေ့ကျင့်ရေးကွင်းရဲ့ ဝင်ပေါက်က သေးသေးလေးပဲ မြင်ရတယ်။ ဖြစ်နိုင်တာက ငါတို့ ခေါင်မိုးပေါ်ကို တက်ကြည့်ရင်တော့ မြင်ရနိုင်လောက်တယ်။" ရင်မွှေးမီးလောင် ဆို၏။

ဂိမ်းမာများ ပို၍ ပို၍ နေရာရွှေ့ပြောင်း ဝင်ပေါက်မှ ထွက်လာကြပြီး စုရုံးနေသော ဂိမ်းမာများ ပို၍ များပြား လာခဲ့သည်။

စိတ်မရှည်သော ဂိမ်းမာအချို့ ဝိညာဉ်ကောလိပ် ထဲသို့ ပြေးဝင်ကာ ရန်သူကို သတ်ဖြတ်စ ပြုလိုခဲ့ကြသည်။ သို့သော် သူတို့ ရှားလော့ခ်၏ ထိန်းချုပ်မှု အကွာအဝေးအတွင်း ရောက်ရှိ သွားသည်နှင့် သူ၏ ထိန်းချုပ်မှုမှ လွတ်မြောက်နိုင်ခြင်း မရှိခဲ့ကြချေ။ သူတို့ ဇာတ်လမ်းပိုင်း အန်နီမေးရှင်း ပုံစံသို့ ဝင်ရောက်သွားခဲ့ကြပြီး ရှားလော့ခ်၏ ရှေ့တွင် လေတံတိုင်း တစ်ခု ရှိနေ သကဲ့သို့ ခံစားလိုက် ကြရသည်။

ဇာတ်လမ်း ဆက်လက် ဖြစ်ပွား နေခဲ့သည်။

"စစ်သည်တော်တို့၊ ငါ ဗွိုင့်ဒ်စစ်တပ်ရဲ့ ဆိုးယုတ်တဲ့ စွမ်းအားကို ခံစား မိနေတယ်။ မြန်မြန် လုပ်ပြီး မင်းတို့ရဲ့ ကာကွယ်ရေး လိုင်းတွေကို တည်ဆောက်ကြ။ ရန်သူက ငါတို့ကို တိုက်ခိုက်ဖို့ အချိန်အကြာကြီး စောင့်နေပေးမှာ မဟုတ်ဘူး" ရှားလော့ခ်က ပတ်ဝန်းကျင် ဧရိယာတွင် မှော်အက္ခရာ မာနာပုံစံကွက်များ ဖန်တီးနေရင်း ဂိမ်းမာများ ထံသို့ အော်ပြော လိုက်သည်။

ဂိမ်းမာများသည် နေရာရွှေ့ပြောင်း မှော်အက္ခရာ ပုံစံကွက် အနားဘေး ပတ်လည်မှ ဧရိယာကို ခိုင်ခံ့အောင် ပြုလုပ်ရန် မစ်ရှင်များ ရရှိ ခဲ့ကြသည်။

ဂိမ်းမာများသည် ခံတပ်များ တည်ဆောက်ခြင်းနှင့် ရင်းနှီး ကျွမ်းဝင် နေခဲ့ကြပြီး ၎င်းကို အကြိမ်များစွာ ပြုလုပ်ခဲ့ ဖူးကြသည်။

သူတို့ ကျောက်တုံးများကို သယ်ဆောင်ကာ စခန်း ပတ်လည်တွင် စုပုံထား ခဲ့ကြသည်။

ဇာတ်လမ်းအရ သူတို့ ဝိညာဉ်ကောလိပ်သို့ မဝင်ရောက်မီ ခံတပ် တစ်ခုကို ဖန်တီး ရပေမည်။

ဤသည်မှာ ဂိမ်း တစ်ခု မဟုတ်ချေ၊ ဆိုလိုသည်မှာ ပရော်ဖက်ဆာ ဂေါ်ဖီထုပ်သည် ဂိမ်းမာများ သူတို့၏ ခံတပ်များကို ဆောက်လုပ် ပြီးသည်အထိ စောင့်ဆိုင်းနေမည် မဟုတ်ချေ။ ရှားလော့ခ် သူမ၏ အမှားအယွင်း မရှိသော အစီအစဉ်မှ လွတ်မြောက်သွားနိုင်သည့် အတွက် စိတ်ပျက်လက်ပျက် ဖြစ်နေခဲ့သည်။ သူမ မြေအောက်လောက၏ တိုက်ခိုက်မှုကို ခုခံ ကာကွယ်ရန်နှင့် ဝိညာဉ်ကောလိပ်ကိုပင် စတေးပစ်ရန် ပြင်ဆင်ထား ခဲ့သော်လည်း အချိန်တို အတွင်းမှာပင် ရှားလော့ခ် သူ၏ တပ်ဖွဲ့ဝင်များ နှင့်အတူ ပြန်လည် ရောက်ရှိ လာခဲ့သည်။

သူ အားဖြည့်အကူ တပ်ဖွဲ့များ တစ်စုံတစ်ရာမျှ ခေါ်ဆောင်လာခြင်း မရှိခဲ့ဘဲ ထာဝရတိုင်းပြည်မှ နိုင်ငံသားများကိုသာ ခေါ်ဆောင် လာခဲ့သည်။

ပရော်ဖက်ဆာ ဂေါ်ဖီထုပ် ရှားလော့ခ် ဘာလုပ်နေသည်ကို မသိခဲ့ချေ၊ သူမ ဤတစ်ကြိမ်တွင် ရှားလော့ခ်ကို သတ်ဖြတ် ရမည် ဖြစ်ကြောင်းသာ သိရှိနေခဲ့သည်။

သူမ နှစ်ထောင်ပေါင်း များစွာ အစီအစဉ် ဆွဲခဲ့ရသည်။ သူမ ရှားလော့ခ် သူမ၏ အစီအစဉ်ကို ဖျက်ဆီးမည်ကို ခွင့်မပြုနိုင်ခဲ့ချေ။

ဤတစ်ကြိမ်တွင် သူမ ရှားလော့ခ်နှင့် တစ်ယောက်တည်း တိုက်ခိုက်နေခြင်း မဟုတ်တော့ချေ။ သူမ၏ နောက်တွင် ပြန်လည် ရှင်သန်လာလု နီးပါး ဖြစ်သော ဖရန်ဂျီပန်နီနှင့် လစ်ခ်ျ ကျောင်းသားများ ရှိနေခဲ့သည်။

သူတို့ သဘောတူသည် ဖြစ်စေ၊ မတူသည် ဖြစ်စေ ကျောင်းသားများကို ခေတ်သစ် ဗွိုင့်ဒ်စစ်တပ်အဖြစ် ဆင့်ခေါ်ခြင်း ခံနေခဲ့ရသည်။

ပရော်ဖက်ဆာ ဂေါ်ဖီထုပ် မှော်ဖန်လုံးထဲမှ အလုပ်များနေသော ဂိမ်းမာများကို ကြည့်ရှု နေခဲ့သည်။ သူမ ထာဝရတိုင်းပြည်မှ ထို မိုက်မဲသော နိုင်ငံသားများ သူမ၏ အစီအစဉ်ကို ဖျက်ဆီးပြီး ဖရန်ဂျီပန်နီ၏ ပြန်လည် ရှင်သန်ရေးကို တားဆီးခြင်းကို ခွင့်မပြု နိုင်ကြောင်း စဉ်းစားရင်း သူမ၏ မျက်လုံးများကို မှေးမှိတ် လိုက်သည်။ သူတို့က သူတို့ ဘာကို ရင်ဆိုင်နေရသည်ကို နားမလည်ခဲ့ကြချေ။

...

ဂနိုင်သား အပြင်ဘက် တံတိုင်းကို ဖွဲ့စည်းရန် ကျောက်တုံးများကို သယ်ဆောင် နေခဲ့သည်။ သူ၏ ဘေးတွင် ကြိုးစားပမ်းစား မစ်ရှင်များကို ဆောင်ရွက်နေသော ဂိမ်းမာ များစွာ ရှိနေခဲ့သည်။

ဂိမ်းမာ အချို့ စကားပြောဆိုရင်း ရောက်ရှိလာ ခဲ့ကြသည်။

"Tencent ရဲ့ အွန်လိုင်းဂိမ်းဌာနက ‘ဒန်ဂျင်’ကို တစ်ဦးတည်း ထုတ်ဝေခွင့်နဲ့ ပူးပေါင်း ဆောင်ရွက်ရေး သဘောတူညီချက် ရယူဖို့ ဆက်သွယ်ခဲ့တယ်တဲ့။"

"အလိုလေး၊ Tencentက အရမ်း မိုက်တာပဲ။ ‘ဒန်ဂျင်’က ဒီလောက် လျှို့ဝှက်တဲ့ ဂိမ်းကုမ္ပဏီ တစ်ခုကြီးဟာ၊ သူတို့ ရအောင် ဆက်သွယ်နိုင်ခဲ့ကြတယ် တဲ့လား။ ဖောက်သည် ဝန်ဆောင်မှု မမနဂါးနက်နဲ့ ယာယီ ဖိုရမ်အက်မင်က လွဲရင် သူတို့ရဲ့ တရားဝင် ဝက်ဘ်ဆိုက်မှာ ဘာဆက်သွယ်ရေး လမ်းကြောင်းမှ ငါ မတွေ့မိဘူး။ သူတို့မှာ စာပို့လိပ်စာတောင်မှ မရှိဘူး။"

"သူတို့ကို လက်တွေ့မှာ ဆက်သွယ်လို့ မရဘူးလေ၊ ဘာလို့လဲဆိုတော့ စာတိုက်ပုံး ဒါမှမဟုတ် ရုံးခန်းလိပ်စာ မရှိလို့ပဲ။ Tencent ဝန်ထမ်းက ဆက်သွယ်ရမယ့် သူတွေကို ရယူဖို့ မမနဂါးနက်နဲ့ စကားပြောဖို့ ရည်ရွယ် ခဲ့တယ်။ ငါတို့ မီးတောင်နက်ကို တိုက်ခိုက်နေတုန်းက ဖောက်သည် ဝန်ဆောင်မှုက ခွင့်ယူထားခဲ့တယ်။ မကြာသေးမီက ဖောက်သည် ဝန်ဆောင်မှု အွန်လိုင်း ပြန်တက်လာခဲ့ပေမယ့် Tencent ဝန်ထမ်းက စကားပြောခွင့် ရဖို့ တန်းစီ နေရတုန်းပဲ။ ဟားဟားဟား။ သူတို့ ဆွေးနွေးခန်းဖိုရမ်မှာ ပူးပေါင်း ဆောင်ရွက်ရေးပို့စ် တစ်ခုလည်း ဖန်တီးခဲ့ကြတယ်၊ ဒါပေမဲ့ တရားဝင် ပြန်ကြားချက် မရှိသေးဘူး။ ဂိမ်းအရာရှိတွေအဖြစ် အယောင် ဆောင်ထားတဲ့ ဂိမ်းမာတွေကပဲ စာပြန် ခဲ့ကြတယ်။"

"Tencentအပြင် Tudouနဲ့ NetEase တို့ကလည်း ဆွေးနွေးခန်းဖိုရမ်မှာ ပို့စ်တွေ ဖန်တီးခဲ့ကြတယ်၊ ဒါပေမဲ့ တရားဝင် ပြန်ကြားချက်တွေ မရသေးဘူး။"

"စိတ်ဝင်စားစရာပဲ။ ငါတို့ ဂိမ်းကို တိုက်ရိုက် ထုတ်လွှင့်တဲ့ သူတွေ ရှိလာမှာလား။"

"ဒါကတော့ သေချာတယ်။ ဒီဂိမ်းက အရမ်း မိုက်တယ်လေ။ ဇာတ်လမ်းသွားက သိပ်မကောင်းပေမယ့် အကျိုးသက်ရောက်မှုတွေက ကောင်းတယ်။ တိုက်ရိုက် ထုတ်လွှင့်မှုသာ ရှိခဲ့ရင် ဂိမ်းက အရမ်း လူကြိုက်များသွားမှာပဲ။"

"ဖြစ်နိုင်တာက LoL လိုမျိုး ကမ္ဘာလုံးဆိုင်ရာ ပြိုင်ပွဲ တစ်ခုတောင် ရှိလာနိုင်တယ်။"

"အမေရိကန်နဲ့ ဥရောပဘက်မှာ ဖောက်သည် ဝန်ဆောင်မှု မရှိရင် အဲ့ဒါ မဖြစ်နိုင်ဘူး။ မဟုတ်ရင် ငါတို့ အများဆုံး နိုင်ငံတော်အဆင့် ပြိုင်ပွဲ တစ်ခုပဲ ရှိလိမ့်မယ်။"

"ဂိမ်းက နိုင်ငံတကာ ဂိမ်းမာတွေဆီ ဘယ်တော့ ရောက်လာမလဲ ဆိုတာ ငါ သိချင်တယ်။ ငါ မျှော်လင့်နေတယ်..."

"ငါလည်း မျှော်လင့်နေတယ်။ နိုင်ငံခြားသားတွေနဲ့ တွေ့ဆုံပြီး သူတို့ကို အပြင်းအထန် ရိုက်နှက်နိုင်မလား ဆိုတာ ငါ အရမ်း သိချင်တယ်။"

"ငါ ဒန်ဂျင်အရှင် တစ်ယောက် ဖြစ်လာဖို့ စဉ်းစား နေတယ်။"

"ငါလည်း ဒန်ဂျင်အရှင် တစ်ယောက် ဖြစ်ချင်တယ်။ စဉ်းစားကြည့်ရုံနဲ့တင် စိတ်လှုပ်ရှားစရာ ကောင်းတယ်။"

ဂိမ်းမာများ စကားပြောဆို နေကြသော်လည်း သတင်း အချက်အလက် အသစ် တစ်စုံတစ်ရာမျှ မရှိခဲ့ချေ။ ဂိမ်းမာများ ဆွေးနွေးခန်းဖိုရမ်တွင် ဂိမ်း၏ လမ်းကြောင်းကို ဆွေးနွေးခဲ့ကြပြီး ဖြစ်သည်။ သူတို့ ဒန်ဂျင်အရှင်များ ဖြစ်လာ လိုခဲ့ကြသော်လည်း ယခုအချိန်တွင်တော့ လက်တွေ့မကျပုံ ရ၏။

အကယ်၍ ပြိုင်ပွဲနှင့် တိုက်ရိုက် ထုတ်လွှင့်မှုသာ ရှိလာခဲ့လျှင်... ဂနိုင်သား စိတ်ကူးယဉ်စ ပြုလာခဲ့သည်။ သူ ဂိမ်းကို တိုက်ရိုက် ထုတ်လွှင့်နေစဉ် ချမ်းသာသော ပရိသတ်များစွာ သူ့ကို ဒုံးပျံ များစွာဖြင့် ဆုချီးမြှင့်ကြပုံကို သူ စိတ်ကူးယဉ် နေခဲ့သည်။ ပရိသတ်အမျိုးသမီးများ ဖိုရမ်တွင် သူ၏ အမည်ကို မန်းရှင်းခေါ်ပြီး သူ့အား အကြံဉာဏ်များ တောင်းဆိုကြ ပေလိမ့်မည်။ သူ Tencentတွင် ပြိုင်ပွဲကို စီစဉ်နေပြီး ဂိမ်းပြိုင်ပွဲတွင် ပရော်ဖက်ရှင်နယ် အသင်း တစ်သင်းကို ကိုယ်စားပြု နေပေလိမ့်မည်။ စင်အောက်တွင် သူ၏ ပရိသတ်များ အလင်းတုတ်များ ဝှေ့ယမ်းကာ စိတ်လှုပ်ရှားစွာ အော်ဟစ် နေကြ ပေလိမ့်မည်။ ပရိသတ်အချို့ မျက်ရည်များပင် ကျလာ ပေလိမ့်မည်။ သူမူ ဂိမ်းလှဲလျောင်း ထိန်းချုပ်ခန်း စက်ထဲသို့ ဝင်ရောက်သွားစဉ် ကျေနပ်စွာ ပြုံးနေ ပေလိမ့်မည်...

"ဂနိုင်သား၊ လာခဲ့ဟ၊ ဝင်ပေါက် ပွင့်နေပြီ။ မွန်းစတားကြီးတွေ အများကြီးပဲ။ တိုက်ပွဲ စနေပြီဟေ့။"

ဂနိုင်သား သူ၏ စိတ်ကူးယဉ်မှုများတွင် နစ်မြုပ်နေစဉ် မှာပင် သူ၏ ရဲဘော်များ သူ့ထံသို့ အော်ဟစ် လိုက်ကြသည်။