အလုံးစုံ အောင်ပွဲ၊ အင်မော်တယ်ရှားဂိုဏ်းမှ ရွှေအမြုတေသုံးပါး

"ဘယ်သူလဲလို့ ကျွန်တော် မေးလို့ရမလား ဆရာကြီး.."

ကျိုးစွေ့သည် တောင်ကြားထဲသို့ ရုတ်တရက် ရောက်ရှိလာသော အင်မော်တယ်ရှားဂိုဏ်းမှ ကျင့်ကြံသူအုပ်စုကို ကြည့်လိုက်သည်။ သူတို့သည် လန်ယွဲ့ရှီက ဆင့်ခေါ်လိုက်ခြင်း ဖြစ်ရမည်ကို သူ သိလိုက်သည်။ အခြား မည်သူမျှ သူ ဤနေရာတွင် ရှိနေသည်ကို မသိပေ။

ထို့ကြောင့် သူသည် လုံးဝ တည်ငြိမ်နေပြီး မည်သည့် အန္တရာယ်ကိုမျှ စိုးရိမ်ပူပန်ခြင်း အလျင်းမရှိပေ။

"မခံယူဝံ့ပါဘူး.. မခံယူဝံ့ပါဘူး… ဒီအဖိုးကြီး နာမည်က ရန်ဟွေပါ.."

"ဂိုဏ်းချုပ်ရဲ့ အမိန့်အရ တာအိုရောင်းရင်းကျိုးကို ကျွန်တော်တို့ ဂိုဏ်းဆီ ကြိုဆိုဖို့ ကျုပ်တို့ ဒီကို ရောက်လာတာပါ…"

အသက်နှစ်ရာကျော်နေပြီ ဖြစ်သော အခြေတည်အဆင့်ကျင့်ကြံသူ ရန်ဟွေက မျက်နှာချိုသွေးကာ ပြုံးလိုက်သည်။

သူသည် အခြေတည်အဆင့် အဆင့်အတန်းကို အရေးစိုက်ပုံမရဘဲ၊ ကျိုးစွေ့အပေါ် သူ၏ သဘောထားမှာ အတော်လေး ဖော်ရွေလှသည်။

၎င်းသည် မျက်နှာလုပ် ဖားယားခြင်းထက်ပင် ကျော်လွန်နေသေးသည်။

ပုံမှန်အားဖြင့် ချီသန့်စင်ခြင်းအဆင့် ကျင့်ကြံသူများကသာ အခြေတည်အဆင့် ကျင့်ကြံသူများကို မြှောက်ပင့် ဖားယား လုပ်သင့်သည်။ သို့သော် ယခုမူ အခြေအနေက ပြောင်းပြန် ဖြစ်နေသည်။

မှန်ပေသည်၊ သူ၏သဘောထားအတွက် အကြောင်းပြချက် ရှိ၏။ အဘယ်ကြောင့်ဆိုသော် သူ၏ ရှေ့မှောက်တွင် ရပ်နေသော ဤချောမောသော ကောင်လေးသည် လက်ရှိ အင်မော်တယ်ရှားဂိုဏ်းချုပ် လန်ယွဲ့ရှီ၏ တာအိုလက်တွဲဖော် ဖြစ်သောကြောင့် ဖြစ်သည်။

ဤဆက်ဆံရေး တစ်ခုတည်းဖြင့်ပင် သူ လေးလေးစားစား ပြုမူရန်မှလွဲ၍ အခြား ရွေးချယ်စရာ မရှိပေ။

မည်သို့ပင်ဖြစ်စေ၊ ဤလူသည် ရွှေအမြုတေ ဆရာသခင်တစ်ဦး၏ ထောက်ခံမှုကို ရရှိထားသည်။ ၎င်းအား စော်ကားခြင်းသည် ရွှေအမြုတေ ဆရာသခင်တစ်ဦးကို စော်ကားခြင်းနှင့် အတူတူပင်ဖြစ်၏။

သူ၏သက်တမ်း များစွာမကျန်လျှင်တောင်မှ၊ သူ၏နောက်တွင် မိသားစုနှင့်မျိုးဆက်ငယ်များ ရှိနေသေးသည်။

ရန်မိသားစုတွင် အင်မော်တယ်ရှားဂိုဏ်းအဖွဲ့ဝင်များစွာ ရှိနေသေးသည်။

ထို့ကြောင့်ပင် သူသည် အင်မော်တယ်ရှားဂိုဏ်း၏ အနာဂတ် ဩဇာလွှမ်းမိုးမည့် ပုဂ္ဂိုလ်တစ်ဦးကို ဘယ်သောအခါမှ စော်ကားဝံ့မည် မဟုတ်ပေ။

"ဂိုဏ်းချုပ် ဟုတ်လား.. ယွဲ့ရှီက အင်မော်တယ်ရှားဂိုဏ်းရဲ့ ဂိုဏ်းချုပ် ဖြစ်သွားတာလား…"

ကျိုးစွေ့ မျက်ခုံး ပင့်လိုက်သည်.. ယင်းအား အတိုင်းအတာတစ်ခုအထိ မျှော်လင့်ထားခဲ့သော်လည်း၊ အဘိုးကြီး၏စကားကို ကြားသောအခါ သူ အံ့အားသင့်သွားဆဲ ဖြစ်သည်။

တစ်လဟူသော အချိန်အတွင်း လန်ယွဲ့ရှီသည် အင်မော်တယ်ရှားဂိုဏ်း၏ ဂိုဏ်းချုပ် ဖြစ်လာလိမ့်မည်ဟု သူ မမျှော်လင့်ထားခဲ့ပေ။

"ဟုတ်ပါတယ်.."

အဘိုးကြီး ရန်ဟွေက လေးလေးစားစား ခေါင်းညိတ်လိုက်ပြီး "ဒီတစ်ခေါက် ဂိုဏ်းချုပ်လန်က ရွှေအမြုတေအဆင့်ကို တက်လှမ်းသွားတော့.. ဂိုဏ်းကို ပြန်ရောက်တာနဲ့ အရင်ဂိုဏ်းချုပ်က ချက်ချင်းရာထူးဆင်းပေလိုက်တယ်လေ.. ဒါကြောင့် ဂိုဏ်းချုပ်လန်က ရာထူးကို ဆက်ခံပြီး အင်မော်တယ်ရှားဂိုဏ်းရဲ့ ဂိုဏ်းချုပ်အသစ် ဖြစ်လာခဲ့ပါတယ်…"

ဖြစ်ပျက်ခဲ့သည်များကို သူ အကျဉ်းချုံး ရှင်းပြလိုက်သည်။

သူတို့သည် လန်ယွဲ့ရှီ၏ တောင်းဆိုမှုအရ ဤနေရာသို့ ရောက်ရှိလာခြင်း ဖြစ်ပြီး၊ သူမက သူတို့ကို ကျိုးစွေ့နှင့် အခြားသူများကို အင်မော်တယ်ရှားဂိုဏ်းသို့ ပြန်ခေါ်ရန် အမိန့်ပေးခဲ့သည်။

"ဒါပေမဲ့ ခင်ဗျားတို့က တစ္ဆေမိစ္ဆာဂိုဏ်း.. မေပယ်ဝါတောင်ကြားနဲ့ တခြား ရွှေအမြုတေအင်အားစုတွေနဲ့ စစ်ပွဲ ဆင်နွှဲနေကြတာ မဟုတ်ဘူးလား.."

"အခု အခြေအနေ ဘယ်လို ဖြစ်နေပြီလဲ…"

ကျိုးစွေ့က စူးစမ်းစွာ မေးလိုက်သည်။

"ထုံးစံအတိုင်း.. ဒါက ကြီးကျယ်တဲ့ အောင်ပွဲတစ်ခုပါပဲ.."

ရန်ဟွေ၏ မျက်နှာပေါ်တွင် ပျော်ရွှင်သော အမူအရာတစ်ခု ပေါ်လာသည်။

"အစက ကျွန်တော်တို့ အင်မော်တယ်ရှားဂိုဏ်း.. ချင်မုဂိုဏ်းနဲ့ တန်တင်ဂိုဏ်းတို့ ပေါင်းရင် ရွှေအမြုတေဆရာသခင် ခြောက်ယောက်ပဲ ရှိခဲ့တယ်.. ဒါပေမဲ့ တစ္ဆေမိစ္ဆာဂိုဏ်း.. မေပယ်ဝါတောင်ကြားနဲ့ အိုးရန်မိသားစု.. တုန်ဖန်းမိသားစုနဲ့ တခြား ရွှေအမြုတေအင်အားစုတွေမှာ ရွှေအမြုတေဆရာသခင် ရှစ်ယောက် ရှိခဲ့တယ်… အခြေအနေအရ တစ္ဆေမိစ္ဆာဂိုဏ်းနဲ့ သူတို့ရဲ့ မဟာမိတ်တွေက အသာစီး ရနေခဲ့တာပေါ့…"

"ကျွန်တော်တို့ ဂိုဏ်းသုံးဂိုဏ်း မဟာမိတ်အဖွဲ့က အဆက်မပြတ် ဆုတ်ခွာနေခဲ့ရတယ်လေ.. ဒါပေမဲ့ အဲ့ဒီအချိန်မှာ ဂိုဏ်းချုပ်လန် ရုတ်တရက် ပေါ်လာခဲ့တယ်.. ဒါ့အပြင် သူက ရွှေအမြုတေအဆင့်ကို တက်လှမ်းသွားခဲ့ပြီဆိုတော့.. ကျွန်တော်တို့ဘက်မှာ အရေးပါတဲ့ အားသာချက်တစ်ခု တိုးလာခဲ့တယ်ဆိုပါတော့.."

"တိုက်ပွဲတစ်ခုမှာ ကျွန်တော်တို့ ရွှေအမြုတေဆရာသခင်တွေက ရဲရဲဝံ့ဝံ့ တိုက်ခိုက်ခဲ့ပြီး.. တစ္ဆေမိစ္ဆာဂိုဏ်းရဲ့ ရွှေအမြုတေဆရာသခင်တွေကို အနိုင်တိုက်ခဲ့တယ်… ဒီနေရာမှာ ဂိုဏ်းချုပ်လန်က ထိပ်တန်းအဆင့် မှော်ရတနာဖြစ်တဲ့ 'ရွှေနဂါးကတ်ကြေး'ကို သုံးပြီးတော့.. တစ်ဖက်က ရွှေအမြုတေအစောပိုင်းအဆင့် ဆရာသခင်သုံးယောက်ကို သတ်ဖြတ်ခဲ့ပြီး.. အရမ်းကြမ်းတဲ့ စွမ်းအားကို ပြသခဲ့တယ်လေ…"

"ရလဒ်ကတော့ ပြောနေစရာ မလိုတော့ပါဘူး.. တစ္ဆေမိစ္ဆာဂိုဏ်းက ရွှေအမြုတေ ဆရာသခင်တစ်ယောက် ဆုံးရှုံးခဲ့ရသလို.. မေပယ်ဝါတောင်ကြားကလည်း ရွှေအမြုတေ ဆရာသခင်တစ်ယောက်လည်း ဆုံးရှုံးခဲ့ရတယ်.. ပြီးတော့ တုန်ဖန်းမိသားစုကလည်း ရွှေအမြုတေ ဆရာသခင်တစ်ယောက် ဆုံးရှုံးခဲ့ရတယ်.. တခြား ရွှေအမြုတေဆရာသခင်တွေကတော့ အနည်းနဲ့အများ ဒဏ်ရာတွေ ရခဲ့ကြတယ်လေ…"

"ကျွန်တော်တို့ ဒီတိုက်ပွဲကို အပြတ်အသတ် အနိုင်ရခဲ့တယ်.. ဒါက တစ္ဆေမိစ္ဆာဂိုဏ်းရဲ့ မဟာမိတ်အဖွဲ့ကို အပြည့်အဝ ချေမှုန်းပစ်ခဲ့ပြီး သူတို့ကို ရှုံးနိမ့် ဆုတ်ခွာသွားစေခဲ့တယ်.. ကျွန်တော်တို့ သူတို့ကို ငြိမ်းချမ်းရေးစာချုပ် လက်မှတ်ထိုးခိုင်းခဲ့ရုံတင် မကဘူး.. တစ်ကိုယ်တော်ကျင့်ကြံသူတွေရဲ့ မြို့ ဆယ့်ငါးမြို့အပြင် စိတ်ဝိညာဉ်ကျောက်တုံး သွေးကြော ငါးခုနဲ့ ရွှေနီ သွေးကြော သုံးခုကိုပါ စွန့်လွှတ်ခိုင်းခဲ့တယ်…"

သူ၏မျက်နှာပေါ်တွင် ရွှင်လန်းပျော်ရွှင်မှုများ ထွက်ပေါ်လာသည်။

ရှင်းလင်းစွာပင်၊ ဤအောင်ပွဲသည် အင်မော်တယ်ရှားဂိုဏ်း၏ ဂုဏ်ကျက်သရေကို များစွာ မြှင့်တင်ပေးခဲ့သည်။

မူလက အင်မော်တယ်ရှားဂိုဏ်း၏ အခြေအနေများသည် မရေရာ မသေချာဘဲ၊ ပျက်စီးခြင်း နီးကပ်နေသည့် လက္ခဏာများ ပြသနေခဲ့သည်။ ၎င်းသည် အားလုံးအတွက် စိုးရိမ်တကြီး ဖြစ်ရသည့် အချိန် ဖြစ်ခဲ့သည်။

သို့သော် ယခုမူ လန်ယွဲ့ရှီသည် ကောင်းကင်ယံထက်မှကြယ်တစ်ပွင့်ကဲ့သို့ ပေါ်ထွက်လာခဲ့ပြီး မမျှော်လင့်ဘဲ ရွှေအမြုတေအဆင့်သို့ တက်လှမ်းသွားခဲ့သည်။ ဤတိုးတက်မှုသည် အင်မော်တယ်ရှားဂိုဏ်းရှိ ရွှေအမြုတေဆရာသခင် အရေအတွက်ကို သုံးယောက်အထိ တိုးမြှင့်ပေးခဲ့ပြီး ဂိုဏ်း၏ ဂုဏ်သိက္ခာကို အလွန်အမင်း တိုးမြှင့်ပေးခဲ့သည်။

အင်မော်တယ်ရှားဂိုဏ်းသည် ယခုအခါ မိုင်တစ်သိန်း ပတ်လည်အတွင်း နံပါတ်တစ် ဂိုဏ်းအဖြစ် သတ်မှတ်ခံရသည်ဟု ဆိုနိုင်သည်။ ချင်မုဂိုဏ်း၊ တန်တင်ဂိုဏ်း၊ တစ္ဆေမိစ္ဆာဂိုဏ်း၊ မေပယ်ဝါတောင်ကြားနှင့် အခြား ရွှေအမြုတေ ဂိုဏ်းများပင်လျှင် ဦးညွှတ်ကြရမည် ဖြစ်သည်။

"မှန်တာပေါ့.. ဒီတစ်ကြိမ် ငါတို့ အင်မော်တယ်ရှားဂိုဏ်းရဲ့ တကယ့်အစွမ်းကို ပြသနိုင်ခဲ့ပြီ.. ငါတို့ကို ဘယ်သူကများ အန္တရာယ်ပေးဝံ့ဦးမလဲ ကြည့်ကြသေးတာပေါ့…"

"ဂိုဏ်းချုပ်က အချိန်မီ လှုပ်ရှားခဲ့လို့ ငါတို့ ကံကောင်းသွားတာ.. မဟုတ်ရင် ငါတို့ အင်မော်တယ်ရှားဂိုဏ်း အန္တရာယ် ကျရောက်နေလောက်ပြီ…"

"တကယ်ပဲ.. ဂိုဏ်းချုပ်က ဒီတစ်ကြိမ် ငါတို့ အင်မော်တယ်ရှားဂိုဏ်းကို အမှန်တကယ် ကယ်တင်ခဲ့တာ.. မဟုတ်ရင် ငါတို့ထဲက နောက်ထပ်ဘယ်လောက်များ သေဆုံးရမယ်ဆိုတာ မသိနိုင်ဘူး…"

အင်မော်တယ်ရှားဂိုဏ်းမှ ချီသန့်စင်ခြင်းအဆင့် တပည့်များစွာသည် စိတ်လှုပ်ရှားမှုအပြည့်ဖြင့် အချင်းချင်း အားကြိုးမာန်တက် ဆွေးနွေးနေကြတော့သည်။

ယခင်က တစ္ဆေမိစ္ဆာဂိုဏ်းနှင့် အခြားသူများနှင့် စစ်ပွဲတွင် အင်မော်တယ်ရှားဂိုဏ်းသည် မရေမတွက်နိုင်သော တပည့်များကို ဆုံးရှုံးခဲ့ရသည်။

လူ့အသက်များသည် မြက်ပင်များသဖွယ် တန်ဖိုးမဲ့နေခဲ့သည်။ ကျင့်ကြံသူများအတွက်ပင် ဤသည်မှာ အမှန်ပင် ဖြစ်သည်။ ရက်စက်ကြမ်းကြုတ်သော စစ်ပွဲအောက်တွင် အသက်သည် တန်ဖိုးမရှိပေ။

စစ်မြေပြင်သည် အသားကြိတ်စက်တစ်ခုနှင့် တူပြီး မရေမတွက်နိုင်သော အသက်များကို ချွေယူခဲ့သည်။

ကံကောင်းစွာဖြင့် သူတို့ နောက်ဆုံးတွင် အောင်ပွဲ ရရှိခဲ့သည်၊ သို့မဟုတ်ပါက သူတို့ထဲမှ မည်မျှ အသက်ရှင် ကျန်ရစ်နိုင်မည်ကို မသိနိုင်ပေ။

"ငါတို့ တကယ် အနိုင်ရခဲ့တာလား…"

ဤသည်ကို ကြားသောအခါ ကျိပင်းယွီ၊ မုဇီယန်နှင့် ရှားကျင်းယန်တို့ အံ့အားသင့်သွားကြသည်။ သူတို့ ဤမျှ အလွယ်တကူ အောင်ပွဲ ရလိမ့်မည်ဟု မမျှော်လင့်ထားခဲ့ပေ။ ၎င်းသည် မမျှော်လင့်ထားသောအောင်င်ပွဲတစ်ခု ဖြစ်သည်။

၎င်းသည် လန်ယွဲ့ရှီ၏ စွမ်းအားကို လုံလောက်စွာ သက်သေပြနေသည်။ သူမသည် ရွှေအမြုတေအဆင့် အစောပိုင်းသို့ မကြာသေးမီကမှ တက်လှမ်းခဲ့သော်လည်း ကြောက်မက်ဖွယ် တိုက်ခိုက်ရေးခွန်အားကို ပြသခဲ့သည်။ သူမသည် အဆင့်တူများကြားတွင် ပြိုင်ဘက်ကင်း ဖြစ်နေသည်။

ယင်းကြောင့် လန်ယွဲ့ရှီကို မကြာသေးမီ နှစ်များအတွင်း အင်မော်တယ်ရှားဂိုဏ်း၏ ကြောက်မက်ဖွယ် အကောင်းဆုံး ဂိုဏ်းချုပ်များထဲမှ တစ်ဦး ဖြစ်စေခဲ့သည်။ မည်သို့ပင်ဖြစ်စေ၊ ရန်သူ့တပ်ဖွဲ့မှ ရွှေအမြုတေဆရာသခင် သုံးဦးကို သတ်ဖြတ်နိုင်သည့် စွမ်းအားသည် လန်ယွဲ့ရှီ၏ ခွန်အားကို သက်သေပြရန် လုံလောက်သည်။

"ဒီအမျိုးသမီး သုံးယောက်က ဘယ်သူတွေလဲလို့ ကျွန်တော် မေးလို့ရမလား…"

ဤအခိုက်အတန့်တွင် အကြီးအကဲ ရန်ဟွေသည် သူ၏အာရုံကို ကျိပင်းယွီနှင့် အခြား အခြေတည်အဆင့် ကျင့်ကြံသူ အမျိုးသမီး နှစ်ဦးထံသို့ လှည့်လိုက်သည်။

သူသည် သူတို့၏အားကောင်းသန်မာသော အရှိန်အဝါကို အာရုံခံမိကာ၊ သူတို့သည် ငယ်ရွယ်သော အသက်အရွယ်ဖြင့် အခြေတည်အဆင့်သို့ ရောက်ရှိခဲ့သော ကျင့်ကြံသူများ ဖြစ်ကြောင်း ရှင်းလင်းစွာသိလိုက်သည်။

လန်ယွဲ့ရှီမှလွဲ၍ ဤမျှငယ်ရွယ်သော အခြေတည်အဆင့် ကျင့်ကြံသူအမျိုးသမီးများကို သူတစ်ခါမျှ မမြင်ဖူးခဲ့ပေ။ ဤအမျိုးသမီးသုံးဦးသည် အခြားဂိုဏ်းများမှ အမျိုးသမီးကျင့်ကြံသူများ၏ ပုံစံနှင့်လည်း မတူညီချေ။

"ဪ.. သူတို့အားလုံးက ကျွန်တော့်ရဲ့ တာအိုလက်တွဲဖော်တွေပါ.."

"သူတို့နာမည်တွေက ကျိပင်းယွီ.. မုဇီယန်နဲ့ ရှားကျင်းယန်ပါ…"

"သူတို့က ဂိုဏ်းတပည့်တွေ မဟုတ်ကြဘူး.. သူတို့အားလုံးက တစ်ကိုယ်တော်ကျင့်ကြံသူတွေပါ.."

ကျိုးစွေ့က အမျိုးသမီးသုံးဦးကို မိတ်ဆက်ပေးလိုက်သည်။

ဘာရယ်…။

ဤသည်ကို ကြားသောအခါ အခြေတည်အဆင့် အကြီးအကဲ ရန်ဟွေသာမက၊ ရှိနေသော အင်မော်တယ်ရှားဂိုဏ်းမှ ချီသန့်စင်ခြင်းအဆင့် တပည့်များစွာပါ အံ့ဩတုန်လှုပ်သွားကြပြီး သူတို့၏ နားများကိုပင် မယုံကြည်နိုင် ဖြစ်သွားကြသည်။

‘ဘုရားရေ.. ဒါ တကယ်လား..’

‘ဒီကောင်လေးက လန်ယွဲ့ရှီရဲ့ တာအိုလက်တွဲဖော် မဟုတ်ဘူးလား..’

‘ဒီချောမောတဲ့ ကောင်လေးက ဘယ်လိုလုပ် ဇနီး သုံးယောက် ရှိနေရတာလဲ.. ပြီးတော့ အားလုံးက အခြေတည်အဆင့် ကျင့်ကြံသူတွေချည်းပဲ.’

‘ဒါကြီးက သောက်ရမ်းများလွန်းသွားပြီလေ..’

‘ဒီကောင် ဘယ်လောက်တောင် သတ္တိကောင်းရဲတာလဲဟ.. သူ ဝက်ဝံနှလုံး ဒါမှမဟုတ် ကျားသစ်သည်းခြေကိုများ စားထားလေရော့သလား.. ရွှေအမြုတေဆရာသခင်တစ်ဦးရှေ့မှာထားပြီး မိန်းမသုံးယောက်တောင် ထပ်ယူထားရဲတယ်.. ဒီကောင် အသက်ရှင်ရတာ ငြီးငွေ့နေပြီလား…’

‘ဒါမှမဟုတ် ဒီကောင်လေးက အရင်ကတည်းက မိန်းမသုံးယောက် ရှိနေခဲ့တာလား.. ပြီးတော့မှ ဒီကောင်လေးကို ဂိုဏ်းချုပ်က သဘောကျသွားလို့.. သူ့အချစ်ကို အတင်းအဓမ္မ လုယူဖို့ ကြံစည်နေတာများလား..’

‘ဒါမှမဟုတ်.. တခြားမိန်းမတွေဆီကနေ အတင်းဆွဲထုတ်လို့ အတင်းအကြပ် ချစ်ခိုင်းတဲ့ အဆုံးစွန်လုပ်ရပ်မျိုးလား…’

ရုတ်တရက် အင်မော်တယ်ရှားဂိုဏ်း ကျင့်ကြံသူအဖွဲ့သည် အတွေးများ ယောက်ယက်ခတ်သွားပြီး သူတို့နှလုံးသားများ တုန်လှုပ်ချောက်ချားသွားကြသည်။ သံသယဖြစ်ဖွယ်မရှိ ဤကိစ္စတွင် ကောင်းကင်ပင် ပြိုစေနိုင်သော လျှို့ဝှက်ချက်များစွာ ရှိနေချေသည်။

ပိုဆိုးသည်မှာ ၎င်းသည် သူတို့ဂိုဏ်းချုပ်နှင့် ပတ်သက်သော အတင်းအဖျင်းများ ပါဝင်နေသည်။

"အဟမ်း ရောင်းရင်းကျိုး.. ကျွန်တော်တို့ အင်မော်တယ်ရှားဂိုဏ်းကို အမြန် ပြန်သင့်ပြီ.."

"ဂိုဏ်းချုပ် စောင့်နေတာ အတော်ကြာလောက်ပြီ.."

အခြေတည်အဆင့် အကြီးအကဲ ရန်ဟွေ တုန်လှုပ်သွားသည်။ ဤကိစ္စများကို နက်ရှိုင်းစွာ တူးဆွလိုစိတ် သူ့တွင်မရှိတော့။ အဘယ်ကြောင့်ဆိုသော် ပြဿနာ၏ နက်ရှိုင်းမှုသည် အလွန်ကြီးမားသောကြောင့် ဖြစ်သည်။

တစ်ခါတစ်ရံတွင် များများသိခြင်းက ကောင်းမွန်သည်မဟုတ်ပေ။ သိတာများလေ၊ မြန်မြန်သေလေပင် ဖြစ်၏။ စပ်စုချင်စိတ်က ကြောင်ကို သေစေနိုင်သည် မဟုတ်လော..။