အခန်း (၁၅၅၃)

အပြင်ဘက်၌ ဟန်မူယဲ့၏ ခန္ဓာကိုယ်ပေါ်တွင် နတ်ဘုရားအင်းသင်္ကေတများက ပိုမိုများပြားလာနေသည်။ တစ်ချိန်တည်းမှာ သူ၏ အရှိန်အဝါက ဆက်လက် မြင့်တတ်သွားနေသည်။

သူ၏ ခန္ဓာကိုယ်က ထိန်းချုပ်မှုကင်းလွတ်တော့မည့်အလား တဖြည်းဖြည်း ကြီးမားလာသည်။

သူ၏ ခန္ဓာကိုယ်က စတင်အသွင်ပြောင်းလဲသွားသည်။

နဂါးအကြေးခွံများ၊ ဖီးနစ်ငှက်မွှေးများ၊ ကျားလက်သည်းများ၊ လိပ်နက်သံချပ်ကာ၊ အနီရောင်မီးတောက်မျက်လုံးနှင့် မိုးပြာရောင်ဦးချို…

အစရှိသော သားရဲအစိတ်အပိုင်းများက သူ၏ ခန္ဓာကိုယ်ပေါ်မှာ စတင်စုဝေးသွားကြသည်။

သို့သော်လည်း ဟန်မူယဲ့က ထိုသို့အသွင်ပြောင်းလဲမှုကို ခွင့်မပြုပေ။ ထိုသားရဲအစိတ်အပိုင်းများ ထွက်ပေါ်လာသည်နှင့်ချက်ချင်း သူက ယင်းတို့ကို အတင်းအဓမ္မ ဖိနှိပ်လိုက်သည်။

ဟင်းလင်းပြင်ထဲတွင် အဆုံးမဲ့သော နတ်ဘုရားအလင်းက ပေါ်လျှိုးလာသည်။

နောက်ဆုံးမှာတော့ ကမ္ဘာဦးမူလစွမ်းအားက သွမ့်ဟူရေကန်၏ အတားအဆီးများကို ဖြတ်ကျော်သွားပြီး ဟန်မူယဲ့၏ ခန္ဓာကိုယ်ထဲသို့ ဒလဟော ဝင်ရောက်လာသည်။

သူ၏ ခန္ဓာကိုယ်ပေါ်တွင် နတ်ဘုရားအင်းသင်္ကေတများက ပိုမိုများပြားလာသည်။

“ ပုရွက်ဆိတ်တွေကများ ”

ဒေါသတကြီး ဟိန်းသံက ဟန်မူယဲ့၏ စိတ်နယ်ပယ်ထဲမှ ခုနစ်ရောင်ခြယ်အလင်းထံမှ ထွက်ပေါ်လာသည်။ ထို့နောက် ခုနစ်ရောင်ခြယ်အလင်းက ရုတ်တရက် ပေါက်ကွဲသွားသည်။ ထိုပေါက်ကွဲမှုက နတ်သားရဲဝိညာဉ်များကို အက်ကွဲသွားစေသည်။

ထို့နောက် ခုနစ်ရောင်ခြယ်အလင်းက နတ်သားရဲဝိညာဉ်များနှင့် ပေါင်းစပ်လိုက်သည်။ ထို့ပြင် ဟန်မူယဲ့၏ ဝိညာဉ်နှင့် ချိတ်ဆက်ထားသော ဓားဝိညာဉ်များသည်လည်း အရည်ပျော်သွားကြပြီး ခုနစ်ရောင်ခြယ်အလင်းနှင့် ပေါင်းစပ်သွားသည်။

အပြင်ဘက်တွင် ခရမ်းနေမင်းမီးပြင်းဖိုထဲမှ ဘီလူး၏ ခန္ဓာကိုယ်သည်လည်း ခုနစ်ရောင်ခြယ်အလင်း ထွန်းလင်းတောက်ပလာသည်။ သူက လက်သီးတစ်လုံး ထိုးလွှတ်လိုက်လေရာ နတ်ဘုရားမီးတောက်အားလုံးက ပြိုကွဲသွားကြသည်။

သူ၏ ခွန်အားက အလွန်သန်မာလေရာ ခရမ်းနေမင်းမီးပြင်းဖိုသည်ပင် သူ့ကို မထိန်းချုပ်နိုင်ပေ။

“ သူ့ကို အတွင်းကိုယ်ပွားအဖြစ် တိုက်ရိုက် မသန့်စင်နိုင်မှတော့ အပြင်ကိုယ်ပွားအဖြစ်ပဲ သန့်စင်ပစ်တော့မယ် ”

ဟန်မူယဲ့က ခရမ်းနေမင်းမီးပြင်းဖိုထဲမှ ထွက်လျှောက်လာသော ဘီလူးကို ကြည့်နေရင်း တီးတိုးရေရွတ်လိုက်သည်။

သူလက်မြှောက်လိုက်သည့်အခါ ခရမ်းနေမင်းမီးပြင်းဖိုက ပျောက်ကွယ်သွားသည်။ ကျန်ရှိသော နတ်ဘုရားမီးတောက်များက သူ၏ ခန္ဓာကိုယ်ပေါ်သို့ ကျဆင်းလာကြပြီး တိုက်ပွဲချပ်ဝတ်တစ်စုံကို ဖွဲ့စည်းပေးလိုက်သည်။

နတ်ဘုရားအင်းသင်္ကေတများက သူ၏ ခန္ဓာကိုယ်တစ်ခုလုံး၌ ပြည့်နှက်နေစဉ် သူက ပေတစ်သောင်းရှည်လျားသော ဘီလူးတစ်ကောင်အဖြစ် အသွင်ပြောင်းလဲသွားသည်။

“ ဗုန်း ”

သူက ခရမ်းနေမင်းမီးပြင်းဖိုထဲမှ ထွက်လာသော ဘီလူးကို လက်သီးဖြင့် ထိုးချလိုက်သည်။

ထို့နောက် ဟန်မူယဲ့က လက်မြှောက်လိုက်လေရာ ဧရာမတူတစ်လက်က သူ၏ လက်ဖဝါးထဲမှာ ထွက်ပေါ်လာသည်။

ကောင်းကင်အေးခဲတူ… ။

ထိုတူက အထွတ်အမြတ်ရတနာခုနစ်ပါးအနက် တစ်ခုဖြစ်ပြီး ရေခဲမူလစွမ်းအားကို ပိုင်ဆိုင်ထားသည်။ ထို့ပြင် တူထဲမှာ ကြယ်စင်စုစကြာဝဠာ၏ ရတနာနယ်မြေလျှို့ဝှက်ချက်များကိုလည်း ချိပ်ပိတ်ထားသည်။

တူဖြင့် တစ်ချက်ထုရိုက်လိုက်သည့်အခါ မိုးမြေက တုန်ယင်သွားသည်။

ခေါင်းမော့လိုက်သော ဘီလူးက ကောင်းကင်ရေခဲတူဖြင့် ထုရိုက်ခံလိုက်ရပြီး မြေပြင်ပေါ်သို့ လဲကျသွားသည်။

“ ဘန်း ”

ဘီလူး၏ ခန္ဓာကိုယ်က ယဇ်ပလ္လင်ပေါ်သို့ ပြုတ်ကျသွားသည်။ ထိုစဉ် ရွှေရောင်အလင်းက ယဇ်ပလ္လင်ထံမှ ထွက်ပေါ်လာပြီး ဘီလူး၏ မူလစွမ်းအားကို ဆွဲထုတ်လိုက်သည်။

ထို့ကြောင့် ဘီလူး၏ ခန္ဓာကိုယ်က ပိုပြီးတုန်ယင်သွားသည်။ သူက အမြန်မတ်တတ်ရပ်ရန် ကြိုးစားလိုက်သည်။

သို့သော်လည်း မဟာပန်သွန်ဘုံမှ ထိုဘီလူးက အထွတ်အထိပ်စွမ်းအားကို မပိုင်ဆိုင်ထားတော့ကြောင်း ဟန်မူယဲ့ သိလိုက်သည်။

သူ၏ ဝိညာဉ်သည်သာ ကြောက်မက်ဖွယ်ကောင်းစွာ အစွမ်းထက်ပေသည်။ သူ၏ ရုပ်ခန္ဓာကိုယ်သည်တော့ ထိုမျှမသန်မာတော့ပေ။ ယခု သူ့မှာ ခန္ဓာကိုယ်ကို ဆက်ပြီး ထိန်းသိမ်းပေးနိုင်သော မူလစွမ်းအားပမာဏသာလျှင် ရှိသည်။

ထိုသို့ခန္ဓာကိုယ်က ပြင်ပကိုယ်ပွားတစ်ခုအဖြစ် သန့်စင်ရန် အထူးသင့်တော်ပေသည်။

“ ဒီလိုဆိုမှတော့… ကျုပ်က ဝမ်းမြောက်ဝမ်းသာ လက်ခံပေးရတာပေါ့ ”

ဟန်မူယဲ့က တီးတိုးရေရွတ်လိုက်ပြီး အရှေ့သို့ ခြေတစ်လှမ်း လှမ်းလိုက်သည်။

“ မင်းလုပ်ရဲလား ”

ဒေါသတကြီး ဟိန်းသံက ဟန်မူယဲ့၏ စိတ်နယ်ပယ်ထဲမှ ထွက်ပေါ်လာသည်။

ခုနစ်ရောင်ခြယ်အလင်းက ပေါက်ကွဲလုနီးပါး အားကောင်းလာသည်။ ဤသည်မှာ ခုနစ်ရောင်ခြယ်အလင်းက သူ၏ ခန္ဓာကိုယ်ကို ဖောက်ထွင်းရန် ကြိုးစားချင်နေသည့်အလားပင်။

“ ထွက်ပြေးဖို့ ကြိုးစားနေတာလား ”

“ မင်းကို ငါအစွမ်းကုန် တိုက်ခိုက်မယ် ”

မိုးပြာရောင်နဂါးက ကျယ်လောင်စွာ ဟိန်းဟောက်လိုက်သည်။ ထို့နောက် ၎င်းက အပြာရောင်မီးခိုးငွေ့အဖြစ် ပြောင်းလဲသွားပြီး ခုနစ်ရောင်ခြယ်အလင်းနှင့် ရောယှက်သွားသည်။

“ ကောင်လေး… ရှေးဦးအပျက်အစီးကုန်းမြေက အခု မင်းရဲ့ လက်ထဲမှာပဲ ”

ကျားဖြူပုံရိပ်သည်လည်း မိုးပြာရောင်နဂါးနည်းတူ မီးခိုးငွေ့အဖြစ် ပြောင်းလဲသွားသည်။

ဟန်မူယဲ့၏ စိတ်နယ်ပယ်ထဲတွင် ကြုံးဝါးသံများ ပဲ့တင်ထပ်လာသည်။ ထို့နောက် နတ်သားရဲဝိညာဉ်အားလုံးက ဟင်းလင်းပြင်ထဲမှာ ပျောက်ကွယ်သွားကြပြီး ခုနစ်ရောင်ခြယ်အလင်းကို ချုပ်နှောင်လိုက်ကြသည်။

ဟန်မူယဲ့က နောက်ထပ် တုံ့ဆိုင်းမနေပေ။ သူက လက်မြှောက်လိုက်ပြီး အောက်သို့ ဖိချလိုက်လေရာ လျှပ်စီးက သွမ့်ဟူရေကန်တစ်လျှောက် ပျံ့နှံ့သွားသည်။

လျှပ်စီးတန်းများက သူ၏ ခန္ဓာကိုယ်နှင့် ဘီလူး၏ ခန္ဓာကိုယ်ကို လွှမ်းခြုံသွားသည်။

အစောနက ရုန်းကန်နေသော ဘီလူး၏ ခန္ဓာကိုယ်ကို လျှပ်စီးတန်းများ ရစ်ပတ်သွားသည့်အခါ သူက ပိုပြီးပြင်းထန်စွာ တုန်ယင်သွားသည်။ သူက နောက်ထပ် မတောင့်ခံနိုင်တော့ပေ။

သူ၏ ခန္ဓာကိုယ်ပေါ်မှ နတ်ဘုရားအင်းသင်္ကေတများက သူ၏ အသွေးအသားထဲသို့ စတင်နစ်မြုပ်သွားကြသည်။

မျက်စိတစ်မှိတ်အတွင်းမှာ ဘီလူး၏ ခန္ဓာကိုယ်က ကျုံ့သွားသည်။

ရှေးဦးအပျက်အစီးကုန်းမြေ၏ မူလစွမ်းအားနှင့် မိုးမြေစွမ်းအားက ဘီလူး၏ ခန္ဓာကိုယ်ကို ရစ်ပတ်ချုပ်နှောင်လိုက်သည်။

ဘီလူး၏ ခန္ဓာကိုယ်က ဟန်မူယဲ့၏ အရွယ်အစားထိ ကျုံ့သွားသည်။ တစ်ချိန်တည်းမှာ ဘီလူး၏ အသွင်သဏ္ဍာန်က ဟန်မူယဲ့နှင့် တူညီလာသည်။

“ မင်းက ဒီအင်မော်တယ်ဘုရင်ရဲ့ ခန္ဓာကိုယ်ကို သန့်စင်ချင်တယ်လား ”

“ မင်းက ဘယ်သူ့အားကိုးနဲ့လဲ ”

ဟန်မူယဲ့၏ စိတ်နယ်ပယ်ထဲတွင် ခုနစ်ရောင်ခြယ်အလင်းက ဘီလူးပုံရိပ်အဖြစ် ပြန်ပြောင်းလဲသွားသည်။ သို့သော်လည်း ၎င်းက မရေမတွက်နိုင်သော သံကြိုးများဖြင့် ချည်နှောင်ခံထားရသည်။

ဤအခိုက်အတန့်မှာ ဘီလူးက ဒေါသတကြီး ဟိန်းအော်လိုက်လေရာ သံကြိုးများက အက်ကွဲသွားကြသည်။ ထို့နောက် သူက ဟန်မူယဲ့၏ ခန္ဓာကိုယ်ကို ခုနစ်ရောင်ခြယ်အလင်းအဖြစ် ပြောင်းလဲပစ်လိုက်သည်။

“ ဒီအင်မော်တယ်ဘုရင်က ဝိညာဉ်စွမ်းအားကို တိုးမြှင့်ဖို့ မင်းရဲ့ ခန္ဓာကိုယ်ကို ဝါးမျိုပစ်မယ် ”

ခုနစ်ရောင်ခြယ်နတ်ဘုရားအလင်းက ဟန်မူယဲ့၏ ခန္ဓာကိုယ်ကို ချုပ်နှောင်လိုက်လေရာ သူက နည်းနည်းမှ မလှုပ်ရှားနိုင်တော့ပေ။

ဟန်မူယဲ့က ဘီလူး၏ ခန္ဓာကိုယ်ကို သန့်စင်ချင်သည်။ သို့သော်လည်း ယခု တစ်ဖက်လူက သူ၏ ခန္ဓာကိုယ်ကို ဝါးမျိုရန် ကြိုးစားနေသည်။

“ ဝီး ”

ထိုအခိုက်အတန့်မှာ ဟန်မူယဲ့၏ ခန္ဓာကိုယ်က စတင်တုန်ယင်သွားသည်။

အနက်ရောင်ဓားရှည်တစ်လက် ဖွဲ့စည်းသွားသည်။

ထိုဓားထွက်ပေါ်လာသည်နှင့် ခုနစ်ရောင်ခြယ်အလင်းက တုန်ယင်သွားပြီး ဟန်မူယဲ့၏ ခန္ဓာကိုယ်ထဲမှ ထွက်ပြေးရန် ကြိုးစားလိုက်သည်။

ဖရိုဖရဲအခြေအနေကြားတွင် ဟန်မူယဲ့၏ ခန္ဓာကိုယ်က ဟင်းလင်းပြင်အဖြစ် ပြောင်းလဲသွားပြီး အနက်ရောင်ဓားရှည်နှင့် တွယ်ကပ်သွားသည်။

ခုနစ်ရောင်ခြယ်နတ်ဘုရားအလင်းသည်လည်း ဓားနှင့် တွယ်ကပ်သွားသည်။

ယင်းက ဟန်မူယဲ့၏ အစစ်အမှန်ခန္ဓာကိုယ်ဖြစ်သော မူလဝိညာဉ်ဓား ဖြစ်သည်။

အတိတ်မှာ သူ၏ ဝိညာဉ်က ဓားအဖြစ်သို့ ပြောင်းလဲသွားခဲ့သလို သူ၏ ရုပ်ခန္ဓာကိုယ်သည်လည်း ဓားအဖြစ်သို့ ဖွဲ့စည်းသွားခဲ့သည်။

ယခု ခုနစ်ရောင်ခြယ်နတ်ဘုရားအလင်း၏ ကြိုးစားမှုမှန်သမျှက အချည်းနှီးဖြစ်သွားသည်။

သူဝါးမျိုချင်သောအရာက ဓားတစ်လက်ဖြစ်နေမည်ဟု မမျှော်လင့်ထားခဲ့ပေ။

“ ဝီး ”

သူ့အရှေ့မှာ ရပ်နေသော ပုံရိပ်က မျက်လုံးဖွင့်လိုက်ပြီး အနက်ရောင်ဓားကို ဖမ်းဆုပ်လိုက်သည်။

“ မလုပ်နဲ့ ”

ကြောက်လန့်သော အော်သံက ခုနစ်ရောင်ခြယ်နတ်ဘုရားအလင်းထဲမှ ပေါ်လျှိုးလာသည်။

သို့သော်လည်း ဘီလူး၏ ခန္ဓာကိုယ်မှ အသွင်ပြောင်းလဲသွားသော ဟန်မူယဲ့၏ ကိုယ်ပွားက တုံ့ဆိုင်းမနေပေ။ သူက ဓားရိုးကို တင်းကျပ်စွာ ဆုပ်ကိုင်လိုက်သည်။ တစ်ချိန်တည်းမှာ သွေးချီစွမ်းအားနှင့် လျှပ်စီးစွမ်းအားက ဒီရေသဖွယ် ပေါ်လျှိုးလာသည်။

ပြင်ပကိုယ်ပွားတစ်ခုနှင့် ဓားခန္ဓာကိုယ်၏ စွမ်းအားက အတူတကွ ပေါင်းစပ်သွားသည့်အခါ ဟန်မူယဲ့၏ ဝိညာဉ်က ဓားတစ်လက်အဖြစ် ပြန်ဖွဲ့စည်းသွားသည်။ ဓားက ခုနစ်ရောင်ခြယ်အလင်းကို အပိုင်းပိုင်း ခုတ်ပိုင်းလိုက်သည်။

“ ရွှတ် ”

ထို့နောက် အနက်ရောင်ဓားရှည်က ခန္ဓာကိုယ်အဖြစ် ပြန်ပြောင်းလဲသွားပြီး အရှေ့သို့ ပျံသန်းသွားကာ ပြင်ပကိုယ်ပွားနှင့် ပေါင်းစပ်လိုက်သည်။

ထိုအခိုက်အတန့်မှာ သွမ့်ဟူရေကန်တစ်ခုလုံး တုန်ယင်သွားပြီး အောက်ဘက်မှ ယဇ်ပလ္လင်က စတင်လှုပ်ခါလာသည်။

ဟန်မူယဲ့၏ ခန္ဓာကိုယ်က ယဇ်ပလ္လင်ပေါ်သို့ ဆင်းသက်သွားသည်။ သူက သွေးချီစွမ်းအားကို ထုတ်လွှတ်လိုက်ပြီး ပြင်းထန်စွာ လှုပ်ခါနေသော ယဇ်ပလ္လင်ကို ဖိနှိပ်လိုက်သည်။

…..

တစ်ရက်ကြာပြီးနောက်…

ဟန်မူယဲ့၏ ခန္ဓာကိုယ်က ယဇ်ပလ္လင်၏ အပြင်ဘက်မှာ ထွက်ပေါ်လာသည်။ သူက ယဇ်ပလ္လင်ပေါ်မှ ခန္ဓာကိုယ်ကို မော့ကြည့်လိုက်သည်။

မဟာပန်သွန်ဘုံမှ ဘီလူး၏ ခန္ဓာကိုယ်က ယခု သူ့ကိုယ်ပိုင် ပြင်ပကိုယ်ပွားတစ်ခု ဖြစ်လာသည်။ ထိုပြင်ပကိုယ်ပွားက သူ့ခန္ဓာကိုယ်၏ အစိတ်အပိုင်းတစ်ခုလည်း ဟုတ်သည်။

ထိုနည်းစနစ်ကြောင့် သူ့မှာ ခန္ဓာကိုယ်နှစ်ခု ရှိသွားသည်။

သို့သော်လည်း ထိုကိုယ်ပွားက အလွန်သန်မာလေရာ ၎င်းကို သန့်စင်ရန် အချိန်အများကြီး သူလိုအပ်လိမ့်မည်။

ကံကောင်းစွာဖြင့် တစ်ဖက်လူ၏ ဝိညာဉ်ကို သူဝါးမျိုပြီးသွားသောကြောင့် ထိုကိုယ်ပွား သူ၏ ထိန်းချုပ်မှုအောက်မှ လွတ်မြောက်သွားမည်ကို စိုးရိမ်စရာမလိုတော့ပေ။

ထို့ပြင် ဝိညာဉ်ထဲမှ မှတ်ဉာဏ်များကြောင့် ထိုခန္ဓာကိုယ်ကို ဖြည်းဖြည်းချင်း သူသန့်စင်နိုင်ပေသည်။

“ ဒီယဇ်ပလ္လင်က ရှေးဦးအပျက်အစီးကုန်းမြေရဲ့ ကမ္ဘာဦးစွမ်းအားကို စုပ်ယူနိုင်သလို မဟာပန်သွန်ဘုံဆီ ပို့ဆောင်ပေးနိုင်တဲ့ ဂိတ်တံခါးတစ်ခုလည်း ဟုတ်တယ် ”

“ တကယ်လို့ ငါ့မှာ အခွင့်အရေးရှိမယ်ဆိုရင် မဟာပန်သွန်ဘုံဆီ တစ်ခါလောက် သွားကြည့်ရမယ် ”

“ စိတ်မကောင်းစရာက အခု ငါ့ရဲ့ စွမ်းအားက မလုံလောက်သေးဘူး ”

သူက မဟာပန်သွန်ဘုံမှ ဘီလူး၏ ခန္ဓာကိုယ်ကို ကိုယ်ပွားတစ်ခုအဖြစ် သန့်စင်နိုင်ခဲ့သော်လည်း ယင်းက ကံကောင်းမှုကြောင့်သာ ဖြစ်သည်။

အကယ်၍ ထိုနတ်သားရဲဝိညာဉ်များ၏ အကူအညီမပါလျှင် သူ့မှာ ဘီလူး၏ ခန္ဓာကိုယ်ကို သန့်စင်ရန် အချိန်အလုံအလောက် ရှိလိမ့်မည် မဟုတ်ချေ။

ထို့ပြင် တစ်ဖက်လူက အထွတ်အထိပ်အခြေအနေမှာ ရှိမနေပေ။ သူက မူလစွမ်းအားအများကြီးကို ဆုံးရှုံးထားသည်။ သို့မဟုတ်လျှင် ဟန်မူယဲ့က ဘီလူး၏ ခန္ဓာကိုယ်ကို ကိုယ်ပွားတစ်ခုအဖြစ် သန့်စင်နိုင်လိမ့်မည် မဟုတ်ချေ။

မဟာပန်သွန်ဘုံမှ အစွမ်းထက်ပုဂ္ဂိုလ်၏ အထွတ်အထိပ်စွမ်းအားက အလွန်ကြောက်စရာကောင်းသည်။ သူ၏ အထွတ်အထိပ်အခြေအနေမှာ ဟန်မူယဲ့ဆယ်ယောက်သည်ပင် သူ့ကို ယှဉ်ပြိုင်နိုင်လိမ့်မည် မဟုတ်ချေ။

ယင်းကို ကြည့်ခြင်းအားဖြင့် မဟာပန်သွန်ဘုံ၏ အင်အားက မည်မျှအံ့ဖွယ်ကောင်းကြောင်း စိတ်ကူးကြည့်နိုင်သည်။

ဟန်မူယဲ့သည် ထိုပြင်ပကိုယ်ပွားကို ယဇ်ပလ္လင်အား ဖိနှိပ်ရန် ဤနေရာမှာ နေထိုင်စေသည်။ သို့မှသာ ကမ္ဘာဦးစွမ်းအားကို အသုံးပြု၍ ကုန်ခမ်းသွားသော သူ၏ ခန္ဓာကိုယ်ထဲမှ မူလစွမ်းအားကို အမြန်ပြန်အားဖြည့်နိုင်လိမ့်မည်။

ဟန်မူယဲ့က ဘေးဘီကို စစ်‌ဆေးကြည့်လိုက်လေရာ သူ၏ မျက်လုံးက ဝင်းလက်သွားသည်။

မရေမတွက်နိုင်သော နတ်သားရဲဝိညာဉ်များ လွတ်မြောက်သွားကြသည့်အခါ အရေအတွက်များပြားသော အရိုးစုများက ဖုန်မှုန့်ဖြစ်သွားကြသည်။

“ အေးချမ်းစွာ အနားယူကြပါ… ရှေးဦးအပျက်အစီးကုန်းမြေကို ကျုပ်ကာကွယ်ပေးပါ့မယ် ”

ဟန်မူယဲ့က သူ့ဘာသာ တီးတိုးရေရွတ်လိုက်လေရာ သွေးချီစွမ်းအားက သူ၏ ခန္ဓာကိုယ်ထဲမှ ပေါ်လျှိုးလာသည်။

မည်သည့်လောကတွင်မဆို အများအကျိုးအတွက် အသက်စတေးဝံ့သော သူရဲကောင်းများ ရှိကြပေသည်။

သူက ကမ္ဘာဦးလောက၏ မျက်နှာသာပေးမှုကို ရရှိထားမှတော့ ကမ္ဘာဦးလောကကို ကာကွယ်ပေးခြင်းက သူ၏ တာဝန်ပင်ဖြစ်သည်။

သွမ့်ဟူရေကန်တွင် ကျဆုံးသွားခဲ့သော ဘီလူးက ထိုတစ်ကောင်တည်း မဟုတ်ပေ။ တခြားဘီလူးများက အလုံအလောက် မသန်မာသောကြောင့် ဒဏ်ရာပြင်းထန်စွာရရှိပြီး သေဆုံးသွားခဲ့ကြသည်။ သို့သော်လည်း ကမ္ဘာဦးစွမ်းအားက ထိုအလောင်းများကို အပြည့်အဝ မဖျက်ဆီးနိုင်ပေ။ သို့ဖြစ်၍ ဘီလူးများ၏ အကြွင်းအကျန်များက ရေကန်အောက်မှာ ကျန်ရှိနေကြဆဲပင်။

ကောင်းကင်ရင်းမြစ်စုဝေးပွဲသည် အင်အားစုအသီးသီးမှ အစွမ်းထက်ပုဂ္ဂိုလ်များ သွမ့်ဟူရေကန်ထဲသို့ ဆင်း၍ မဟာပန်သွန်ဘုံမှ ဘီလူးများ၏ အကြွင်းအကျန်များကို လိုက်လံရှာဖွေရသော ပွဲတော်ဖြစ်သည်။ ထိုအကြွင်းအကျန်များထဲမှ မူလစွမ်းအားကို စုပ်ယူနိုင်မည်ဆိုလျှင် သူတို့၏ ကျင့်ကြံခြင်းစွမ်းအားက အုပ်ချုပ်သူအဆင့်သို့ တိုးမြှင့်သွားလိမ့်မည်။

ယခု ဟန်မူယဲ့က မဟာပန်သွန်ဘုံမှ အစွမ်းထက်ပုဂ္ဂိုလ်တစ်ယောက်၏ မှတ်ဉာဏ်များနှင့် ပြင်ပကိုယ်ပွားတစ်ခုကို ပိုင်ဆိုင်သွားပြီး မဟာပန်သွန်ဘုံမှ ကျင့်ကြံခြင်းနည်းစနစ်ကို ကျင့်ကြံထားလေရာ ထိုဘီလူးများ၏ အကြွင်းအကျန်များကို ပိုပြီးရှင်းလင်းစွာ အာရုံခံနိုင်သွားသည်။

သူက ရေကန်၏ အနက်ပိုင်းထဲမှာ လျှင်မြန်စွာ ရွေ့လျားနေရင်း ပြန့်ကျဲနေကြသော ရွှေရောင်ကျောက်တုံးများကို လိုက်လံရှာဖွေနေသည်။

ကျောက်တုံးတစ်တုံးစီက ဝိညာဉ်ကျောက်တုံးတစ်သောင်း၏ အရွယ်အစားနှင့် နှိုင်းယှဉ်နိုင်သည်။ ထိုထက် ပိုသေးငယ်သော ကျောက်တုံးများကိုတော့ ဟန်မူယဲ့ စိတ်မဝင်စားပေ။

ယင်းတို့က မဟာပန်သွန်ကျောက်တုံးများဖြစ်ကြပြီး သေဆုံးသွားကြသော မဟာပန်သွန်ဘီလူးများ၏ အလောင်းများမှ ပြောင်းလဲသွားသောအရာ ဖြစ်သည်။

ထိုကျောက်တုံးများက ၎င်းဘာသာ ပြန်ကောင်းမွန်နိုင်သည်ဟု ဆိုကြသည်။

ဟန်မူယဲ့က မြန်ဆန်စွာ ရွေ့လျားနေရင်း မဟာပန်သွန်ကျောက်တုံးတစ်သိန်းကို ရှာတွေ့သွားသည်။ ယင်းတို့အားလုံးကို သိမ်းဆည်းပြီးနောက် သူက သွမ့်ဟူရေကန်ထဲမှ ပြန်ထွက်သွားသည်။