အခန်း (၉၈)

ဖေးယီကျန့် ဗီလာမှာ နန်ယု ဗီလာနှင့် မြေပြင်ပုံစံ တူညီသော် လည်း အပြင်အဆင်နှင့် အခြား ကဏ္ဍများမှာမူ လုံးဝကွဲပြားသည်။

၎င်းမှာ အလွန် ဖေးယီကျန့်ဆန်သော ပုံစံဖြစ်သည်။ ဝင်ရောက်သည်နှင့် ၎င်းမှာ သူ့ဗီလာဖြစ်ကြောင်း ချက်ချင်းသိနိုင်သည်။

ပတ်ဝန်းကျင်တစ်ခုလုံးမှာ အေးစက်၍ လုံးဝဗလာနတ္တိ ဖြစ်နေသည်။ ကြီးမားသော စကျင်ကျောက်ပြားများမှာ အလွန်တောက်ပနေ၍ ကိုယ့်ပုံရိပ်ကိုယ်တောင် ပြန်လည်မြင်နေရသည်။ ဤသို့သော အပြင်အဆင်ကို ရိုးရှင်းသောပုံစံ (Minimalist) ဟု မကြာခဏဆိုသလို ခေါ်ဝေါ်လေ့ရှိသည်။

"ရှင့်ရဲ့ ဥယျာဉ်က ဘာလို့ ဗလာဖြစ်နေတာလဲ?"

နန်ယု ဥယျာဉ်အား ဖြတ်ကျော်ကာ ဧည့်ခန်းထဲရောက်သည် နှင့် မမေးဘဲမနေနိုင်ဖြစ်ခဲ့ရသည်။

သူမ ဗီလာ၏ အတွင်းအပြင်အဆင်အား မဝေဖန်ခဲ့ပါ။ လူတိုင်းတွင် ကိုယ်ပိုင် နှစ်သက်ရာရှိသော်လည်း ဖေးယီကျန့် သူ့ ဥယျာဉ်အား ပြုပြင်ဖို့ အလွန်ပျင်းရိနေသည့်တိုင် ဒီလိုမျိုးတော့ ထားခဲ့လို့ မဖြစ်ဘူး မဟုတ်လား? ဥယျာဉ်သည် လွန်စွာ ဗလာကျင်းနေပြီး ပေါင်းပင်များကိုပါ နှုတ်ထားကာ စိုက်ပျိုးရန် အသင့်ဖြစ်နေသည့် မြေကွက်အသစ်ကဲ့သို့ ဖြစ်နေသည်။

ဖေးယီကျန့် ဥယျာဉ်ဘက်သို့ တစ်ချက်မျှသာ ကြည့်လိုက်သည်။

"ကျွန်တော် ဥယျာဉ်စိုက်ပျိုးတာနဲ့ ပတ်သက်ပြီး သိပ်မသိပါဘူး"

"ဒါပေမဲ့ မင်းရဲ့ဥယျာဉ်ကတော့ တကယ်ကို ကောင်းတယ်၊ ကျွန်တော် သင်လို့ ရမလား ?"

နန်ယု ဥယျာဉ်အား အဓိကအားဖြင့် ဥယျာဉ်မှူးမှ ပြုစုပေးသော်လည်း၊ သူမသည် သူမ၏ ကိုယ်ပိုင် သက်တောင့်သက် သာရှိမှုအတွက် အဖိုးတန်အကြံပြုချက်များကို ပေးခဲ့သူဖြစ်သည်။

ဥပမာအားဖြင့် အလွန်သက်သောင့်သက်သာရှိသော တဲနှင့်ထိုင်ခုံအတွဲ— သူမ တစ်နေကုန် ထိုနေရာ၌ အချိန်ဖြုန်းနိုင်ပေသည်။

"ဒါပေါ့၊ ရှင် အကုန်လုံး ကူးယူလုပ်လို့ရပါတယ်"

နန်ယု သူမ၏ကိုယ်ပိုင်ဥယျာဉ်မှူးအား ငှားရမ်းရန် ရက်ရောစွာ ကမ်းလှမ်းခဲ့သော်လည်း ဖေးယီကျန့် ငြင်းပယ်ခဲ့သည်။

သူက သူ့ဥယျာဉ်မှာ အလွန်ကြီးမားလွန်းသဖြင့် နန်ယု၏ ဥယျာဉ်မှူးတစ်ဦးတည်းဖြင့် ဧရိယာနှစ်ခုအား ကြီးကြပ်ရန် လက်တွေ့မကျကြောင်း ရှင်းပြသည်။

"ကျွန်တော့်ဆီ တစ်ခါတလေ လာပြီး သူတို့ကို ဘယ်လိုလုပ်ရမယ်ဆိုတာ သင်ပြပေးရုံပါပဲ"

ဖေးယီကျန့် ကိုယ်ပိုင်အကြံဉာဏ်အား ကမ်းလှမ်းခဲ့သည်။

"ကျွန်တော် မင်းကို အနှောင့်အယှက် မပေးချင်လို့ပါ"

နန်ယု ဘာမှ မတုံ့ပြန်လိုက်ရခင်မှာပဲ ဖေးယီကျန့်က စကား ဆက်လိုက်သည်။

"တကယ်တော့ ဒီလိုအိမ်အလုပ်တွေကို အိမ်ထိန်းတစ်ယောက် လိုအပ်တာပေါ့ ဒါပေမဲ့ ကျွန်တော်နဲ့ သင့်တော်မယ့်သူကို ခုထိ ရှာမတွေ့သေးဘူး"

၎င်းမှာ အမှန်တကယ် ပြဿနာတစ်ခု ဖြစ်သည်။

နန်ယု ဖေးမိသားစု၏ ယခင်အိမ်တော်ထိန်းများမှာ "စနစ်တ ကျ လေ့ကျင့်မှု" ခံယူထားပြီး တင်းကျပ်ကာ အလေးအနက်ရှိကြောင်း သိသည်။ ထို့ကြောင့် သူတို့၏ စွမ်းရည်များမှာ အမှန်တကယ်ပင် အပြစ်ပြောစရာမရှိချေ။ သို့သော် သူတို့ကို ကြည့်ရသည်မှာ အိမ်သို့ ပြန်ရောက်သွားသလို ခံစားရသည်။

ဖေးယီကျန့် ထိုသို့ မဖြစ်လိုသည်မှာ သေချာသည်။

သို့သော် အိမ်တော်ထိန်းအသစ် ရှာဖွေခြင်းတွင် ငွေကြေးမှာ ပြဿနာမဟုတ်ပေ။ လိုက်လျောညီထွေရှိမှု၊ စရိုက်နှင့် အခြားအချက်များ အဓိကဖြစ်သည်။

ကောင်းမွန်သော အိမ်တော်ထိန်းတစ်ဦးအား ရှာဖွေရန် ခက်ခဲသည်။

"စိတ်မပူပါနဲ့"

မည်သို့ပင်ဆိုစေကာမူ သူတို့ ကံကြမ္မာအား အတူတကွ တိုက် ခိုက်နေသော မိတ်ဖက်များဖြစ်သည်။ ထို့ကြောင့် နန်ယု ဤမျှလောက် နှမြောတွန့်တိုခြင်း မရှိပေ။

"ရှင် လာချင်ရင် လာခဲ့ပါ၊ ရှင်ကလည်း စကားများတဲ့ အမျိုးအစား မဟုတ်ပါဘူး"

နန်ယုအနေဖြင့် သာမန်ဧည့်သည်တစ်ဦးအား ဧည့်ခံရန် လိုအပ်ပါက သူမ ရိုးသားစွာပင် စိတ်အနှောင့်အယှက် ဖြစ်လိမ့်မည်။ သို့သော် ဖေးယီကျန့်နှင့် သူမသည် အလွန်ရင်းနှီးပြီးသား ဖြစ်သောကြောင့် သူရှိနေခြင်းသည် နန်ယု၏ ပုံမှန်လုပ်ရိုးလုပ်စဉ်အား ပျက်စီးစေမည် မဟုတ်ပေ။ သူမ လုပ် ဆောင်ရန် လိုအပ်သည်များအား ဆက်လက် လုပ်ဆောင်နိုင်စွမ်းရှိသည်။

ထို့ကြောင့် နန်ယုကတော့ ဂရုမစိုက်ပါ။

သို့သော် နန်ယု ဂရုမစိုက်သော်လည်း ဘေးမှတိတ်ဆိတ်စွာ စောင့်ကြည့်နေသော ဖေးယွင်ကျင်းကမူ မရိုးသားသော အမူ အရာဖြင့် ပြုံးနေသည့် ဖေးယီကျန့်အား တစ်ချက်စောင်းငဲ့ကြည့်လိုက်သည်။

သူ့နှလုံးသားထဲတွင် အချက်ပေးသံများ ရုတ်တရက်ထွက်ပေါ်လာသည်။

ဖေးယီကျန့် ယခင်က အဝေးတွင်နေထိုင်ခဲ့ရာ သူတို့ မကြာ ခဏမတွေ့ရပေ။ သို့သော် ယခုအခါ သူတို့ အိမ်နီးချင်းများဖြစ်နေပြီ—ထိုမျှမက အရမ်းကိုနီးကပ်လွန်းနေသည်။

ပြီးတော့ သူက မကြာခဏလာချင်သည်ဟု ပြောသွားခြင်းလား ?

ဖေးယွင်ကျင်း ချက်ချင်းပင် ပုန်ကန်တတ်သောကြောင်မလေး ရှောင်မီအား တွေးမိတော့သည်။

ရှောင်မီသည် ဖေးယီကျန့်အား အကြိမ်အနည်းငယ်သာ တွေ့ဖူးသော်လည်း၊ ဤမျှ လျင်မြန်စွာပင် သူ့ရင်ခွင်ထဲသို့ ခုန်ဝင်ခဲ့သည် မဟုတ်လား? သူ့အန်တီအား နေ့တိုင်းတွေ့ရလျှင်ရော ထိုနည်းအတိုင်း လုပ်ဆောင်ဦးမည်လားဟု သူ တွေးလိုက်သည်။

ဖေးယွင်ကျင်း မိမိကိုယ်ကို အန်တီစွဲလမ်းသူ အမျိုးအစားမဟုတ်ဟု ယုံကြည်သည်။ နန်ယု၏အချစ်ရေး စိတ်ဝင်စားမှုမှန်သမျှကိုတော့ ဖြတ်တောက်ပစ်ချင်သည်။ အကယ်၍ ကောင်းမွန်သော လူတစ်ဦးသာ ဖြစ်ပါက သူ ကန့်ကွက်မည် မဟုတ်ပေ။

သို့သော် ဖေးယီကျန့်သည် ရွေးချယ်စရာမဟုတ်ပေ!

ဤလူသည် သူ့အန်တီအတွက် ပျော်ရွှင်မှုအားဘယ်သောအခါမှ ယူဆောင်လာမည် မဟုတ်!

"အန်တီ"

ဖေးယွင်ကျင်း နန်ယု အဝတ်အစားအားဆွဲလိုက်သည်။

"အိမ်တော်ထိန်းကျိုးမှာ အလုပ်ရှာနေတဲ့ အိမ်တော်ထိန်း သူငယ်ချင်း မရှိဘူးလား?"

"အိုး၊ ရှိတဲ့ပုံပဲနော်"

ဖေးယွင်ကျင်း သတိပေးချက်မှာ နန်ယုအား ချက်ချင်းပင် သတိရသွားစေသည်။ သူမ အိမ်တော်ထိန်းကျိုး ဖုန်းပြောနေသည်ကို ကြားခဲ့ရသည်။ သူ့အိမ်ထိန်းသူငယ်ချင်းမှာ အလုပ်ရှင် ဒေဝါလီခံသွားပြီးနောက် အလုပ်လက်မဲ့ ဖြစ်သွားခဲ့ကာ အလုပ်သစ်အခွင့်အရေးများ ရှာဖွေနေကြောင်း သူမ သိရှိခဲ့သည်။

အိမ်တော်ထိန်းကျိုး ပြုံးပြီး ရှင်းပြသည်။

"သခင်မလေး၊ ကျွန်တော့် သူငယ်ချင်းရဲ့ စွမ်းရည်တွေက အပြစ်ပြောစရာမရှိပါဘူး ဒါပေမဲ့ သူက အလုပ်ရှင်တွေကိုလည်း ရွေးတတ်တယ်၊ ဒါကြောင့် ကျွန်တော့်မှာ သင့်တော်တဲ့သူ ရှိ၊ မရှိ မေးတာပါ"

"ကောင်းမွန်တဲ့ အလုပ်ရှင်ကလည်း ကျွန်တော်တို့ အိမ်တော်ထိန်းတွေအတွက် အရမ်းအရေးကြီးတယ်"

မိသားစုတစ်စုသည် အိမ်တော်ထိန်းတစ်ဦးအား ခန့်အပ်ပြီးသည်နှင့် အထူးအခြေအနေများ မရှိပါက ပြောင်းလဲရန် စိတ်မပါကြတော့ပေ။ ကောင်းမွန်သော အိမ်တော်ထိန်းတစ်ဦးအား ရှာဖွေရန် ခက်ခဲသကဲ့သို့ ကောင်းမွန်သော အလုပ်ရှင်တစ်ဦးကိုလည်း ရှာဖွေရန် ခက်ခဲသည်။

မည်သို့ပင်ဆိုစေကာမူ သူတို့ ဆယ်စုနှစ်များစွာ အလုပ်လုပ်ခဲ့ကြသူများ ဖြစ်ကြသည်။ နန်ယု၏ အခြေအနေမျိုးတွင်မူ သူတို့ အိမ်တော်ထိန်းကျိုးအား မိသားစုကဲ့သို့ သဘောထားလာကြပြီး သူ့ကို ယုံကြည်အားထားကြသည်။

ထို့ကြောင့် နန်ယု အိမ်တော်ထိန်းကျိုး၏ ဆုံးဖြတ်ချက်အား ယုံကြည်သည်။ သူက ကောင်းသောလူဟု ပြောလျှင် မဆိုးနိုင်ပေ။

"ကျွန်မ အိမ်တော်ထိန်းကျိုးရဲ့ဖုန်းနံပါတ်ကို ပေးလိုက်မယ်၊ စကားပြောကြည့်"

နန်ယု စိတ်လှုပ်ရှားစွာဖြင့် သူမ ဖုန်းအား ထုတ်လိုက်သည်။

"ဒီလောက် ကြီးတဲ့ ဗီလာကို အိမ်တော်ထိန်း မရှိဘဲ စီမံခန့်ခွဲဖို့ဆိုတာ ပြဿနာပဲ၊ အိမ်တော်ထိန်းကျိုးကို ဘာမဆို မေးလို့ရတယ်၊ သူက အရမ်း အတွေ့အကြုံရှိတယ်"

"စိတ်မပူပါနဲ့၊ ကျွန်မ အိမ်တော်ထိန်းကျိုးကို ပြောလိုက်မယ်"

ဖေးယီကျန့်: "..."

ဘာကို စိုးရိမ်ရမှာလဲ ? ဒါက သူ စိုးရိမ်ခြင်း ရှိ၊ မရှိဆိုတဲ့ မေးခွန်းမျိုး ဖြစ်နေလို့လား?

သူ လိုချင်တာက နန်ယုနဲ့ ပုံမှန် အဆက်အသွယ်ရရှိဖို့ ဖြစ်ပြီး၊ အိမ်တော်ထိန်းကျိုး (သို့မဟုတ် အိမ်တော်ထိန်းတစ်ဦးဦး) နဲ့ မဟုတ်ပါဘူး!

ဖေးယီကျန့် ဖေးယွင်ကျင်းအား တစ်ချက်စောင်းကြည့်လိုက်သည်။ ဒီကောင်လေး တမင်သက်သက်လုပ်နေတာကို သူ သေချာပေါက်သိနေသည်။

တခြားသူများဆိုလျှင် ကလေးငယ်က ဘာကို နားလည်နိုင်မည်နည်း၊ သို့မဟုတ် ၎င်းသည် သူတို့၏ စိတ်ကူးသက်သက်သာ ဖြစ်သည်လားဟု တွေးမိနိုင်သည်။

ဖေးယီကျန့်ကတော့ ထိုသို့ မတွေးပေ။ သူသည် လေးနှစ် သို့မဟုတ် ငါးနှစ်အရွယ်တွင်ပင် များစွာသိနားလည်ခဲ့ပြီး တစ်ခါတစ်ရံတွင် လူကြီးတစ်ဦးထက်ပင် ပိုမိုထိုးထွင်းသိမြင်ခဲ့ဖူးသည်။

ဖေးယွင်ကျင်းမှာ ထက်မြက်သူ ဖြစ်ပုံရသည်၊ အထူးသဖြင့် သူသည် "အဓိက ဇာတ်ဆောင် အမျိုးသား" ဖြစ်သော ကြောင့်ပင်။

ဖေးယီကျန့် ဝတ္ထုများမဖတ်ဖူး၊ တီဗီမကြည့်ဖူးသော်လည်း အဓိကဇာတ်ဆောင်အမျိုးသားဖြစ်သူတွင် ထူးခြားသော အရာတစ်ခုရှိရမည်ကို သူသိသည်။

သို့သော် ဤအခြေအနေတွင် သူ စကားများများ မပြောသင့်ပေ။ ဖေးယွင်ကျင်း သူ့အမူအရာအား ထိန်းသိမ်းပြီး ပြုံးကာ နန်ယုအား ကျေးဇူးတင်ကြောင်း ခေါင်းညိတ်ပြလိုက်သည်။

"မစ္စတာဖေး"

ဖေးယီကျန့် လက်ထောက်မှ ရှေ့သို့ တိုးလာသည်။

"ညစာ ပြင်ဆင်ပြီးပါပြီ"

သူတို့တွင် အိမ်ထိန်းမရှိသောကြောင့် ဖေးယီကျန့် လက် ထောက်မှာ လက်ရှိတွင် ကိစ္စများစွာအား ကိုင်တွယ်နေရသည်။ ကြီးမားသော ပြဿနာများမရှိသော်လည်း လက် ထောက်နှင့် အိမ်တော်ထိန်းတို့အကြားတွင် ကွာခြားချက်ရှိနေသည်မှာ အမှန်ပင်။

ဖေးယီကျန့် အတွေးနယ်ချဲ့လိုက်သည်။ အကယ်၍အိမ်တော်ထိန်းအသစ်မှာ အိမ်တော်ထိန်းကျိုး၏သူငယ်ချင်း ဖြစ်ပါက၊ ထိုအိမ်တော်ထိန်းနာမည်အား သုံး၍ နန်ယုနှင့် သူ့မူလရည် ရွယ်ချက်နှင့်ဆင်တူသော ကိစ္စများအား ဆွေးနွေးရန် အခွင့် အရေးရနိုင်သေးသည်။

မျှော်လင့်ထားသည့်အတိုင်းပင် သူတို့က ကလေးများဖြစ် သည်။ သူတို့၏ အတွေးအခေါ်မှာ နည်းနည်း ရိုးရှင်းနေဆဲပင်။

"ဒါဆို အရင် စားကြမလား?"

"ဟုတ်ကဲ့"

နန်ယုသည်လည်း သူမ လက်ထဲမှ လက်ဆောင်အားပေး လိုက်သည်။ ဖေးယီကျန့် ယခင်က ကူညီမည်ဟု ကမ်းလှမ်းခဲ့ဖူးသော်လည်း ၎င်းမှာ ဓလေ့ထုံးတမ်းကိစ္စ ဖြစ်သည်ဟုဆိုကာ ငြင်းပယ်ခြင်းခံခဲ့ရသည်။

"ဖေးယီကျန့်၊ ရှင် အိမ်သစ်ရတာ ဂုဏ်ပြုပါတယ်၊ ပျော်ရွှင်စရာ ဘဝသစ်ကို စတင်နိုင်ပါစေလို့ မျှော်လင့်ပါတယ်!"

"ကျေးဇူးတင်ပါတယ်"

နန်ယု၏ ဆိုလိုရင်းအား ဖေးယီကျန့် သိသည်။ သူ အသစ် စက်စက် ဘဝကို ရရှိတော့မည်မှာ သေချာပါသည်။

ထို့နောက် သူတို့ သုံးဦးသား ထိုင်ခုံများတွင် နေရာယူလိုက်ကြတော့သည်။

"ရှောင်ကျင်းက မူလတန်းကျောင်း စောစောတက်ချင်တယ် ဟုတ်လား?"

ဖေးမိသားစုတွင် စားသောက်နေစဉ် သို့မဟုတ် အိပ်စက်နေစဉ် စကားမပြောရဟူသော စည်းမျဉ်းတစ်ခုရှိသော်လည်း ဖေးယီကျန့် ထိုစည်းမျဉ်းအား ဘယ်တော့မှ လိုက်နာခဲ့ခြင်းမရှိပေ။ သူတို့သုံးဦး စကားပြောဆိုနေရင်းမှပင် ဤအကြောင်း အရာသို့ ရောက်ရှိလာခြင်း ဖြစ်သည်။

နန်ယု ခေါင်းညိတ်ပြလိုက်ပြီးနောက် ဖေးယီကျန့် သူလည်း မူလတန်းကျောင်းကို စောစောတက်ခဲ့ဖူးကြောင်း ပြောပြခဲ့သည်။

"ကျွန်တော့်တုန်းက အတန်းပါကျော်ခဲ့ဖူးတယ်၊ မင်း စိတ်မရှိဘူးဆိုရင် ရှောင်ကျင်းကို ကျွန်တော် သင်ပေးလို့ရတယ်၊ သူ့အရည်အချင်းနဲ့ဆို ပုံမှန်ဆရာက သင့်တော်မှာ မဟုတ်ဘူး"

နန်ယု၏နှလုံးသားမှာ ထိုနောက်ဆုံးမှတ်ချက်ကြောင့် လှုပ် ရှားသွားသည်။ ဖေးမိသားစု၏တိုက်ရိုက်ဆင်းသက်လာသူများမှာ အမြဲတစေ အရည်အချင်းရှိပြီး ကလေးများအား ကောင်းစွာ သင်ကြားတတ်မြောက်ကြောင်း ဖေးယီကျန့် ပြောခဲ့ဖူးသည်ကို သူမ ကြားထားသည်။

သူမသည်လည်း ဖေးယွင်ကျင်းအတွက် သင့်တော်မည့် ဆရာများအား ရှာဖွေနေခဲ့သည်။ နန်ကျီ အန်းရီရန်ကို သင်ကြားပေးခဲ့သူအား အကြံပြုခဲ့သော်လည်း တစ်ကြိမ် တွေ့ဆုံမေး မြန်းပြီးနောက် နန်ယု ထိုဆရာ မသင့်တော်ကြောင်း တွေ့ရှိခဲ့သည်။

ပါရမီရှင်များသည်ပင်လျှင် တစ်ဦးနှင့်တစ်ဦးကွဲပြားကြသည်။ ထိုဆရာ၏ သင်ကြားမှုပုံစံမှာ ဖေးယွင်ကျင်းအတွက် ကောင်းစွာမသင့်တော်သည်မှာ ရှင်းနေသည်။

"ဒါပေမဲ့ ရှင့်မှာ အချိန်ရှိလို့လား ?"

"ကျွန်တော် ပိုက်ဆံမရှိတော့ဘူးဆိုတာ မင်း မသိဘူးလား၊ နန်ယု ?"

ဖေးယီကျန့်၏ ရယ်စရာမကောင်းသော နောက်ပြောင်မှုကြောင့် နန်ယု မပျော်မရွှင် ဖြစ်ခဲ့ရသည်။ သူမ မည်သည့်စကားမှ မဆိုဘဲ မျက်နှာသေဖြင့်သာ ကြည့်နေလိုက်တော့ သည်။

"ဒါဆို ရှင်က အခု ကျူရှင်ဆရာ အလုပ်လျှောက်နေတာလား? ကျွန်မက လစာ ဘယ်လောက် ပေးရမလဲ?"

နန်ယု ဖေးယီကျန့်၏ဒေဝါလီခံသည်ဟူသော စကားအား လုံးဝ မယုံကြည်သော်လည်း သူ အမှန်တကယ် လွတ်လပ်နေသည်ဟု ထင်ရသည်။ နန်ကျီ သို့မဟုတ် လီယွမ်မိုတို့နှင့် နှိုင်းယှဉ်လျှင်ပင် သူသည် စိတ်မချမ်းမသာ ဖြစ်လောက်အောင်ပင် ပိုမိုလွတ်လပ်နေပုံရသည်။

"ပိုက်ဆံအကြောင်း ပြောတာက အရမ်းရှက်စရာကောင်းတယ်၊ ကျွန်တော့်ကို နေ့စဉ် ထမင်းဖိုးပေးရင်ရပြီ"

ဖေးယီကျန့် ပြုံးပြီး ပြန်ဖြေလိုက်သည်။

ဖေးယွင်ကျင်း အရာအားလုံးအား ကြားလိုက်ရပြီးနောက် ပထမတွင် ငြင်းဆန်ရန် စိတ်ကူးပေါ်လာခဲ့သည်။ သို့သော် သူ့အန်တီမှာ ဆရာနှင့်ပတ်သက်၍ မကြာသေးမီက စိုးရိမ်ပူပန်မှုများ ရှိနေသည်ကို သတိရလိုက်သည်။ ထို့ပြင် ဤလူ (ဖေးယီကျန့်) နှင့် ပိုမို ဆက်ဆံရခြင်းဖြင့် သူ့အန်တီရှေ့တွင် အပုပ်ချရန် အခွင့်အရေး ရရှိလိမ့်မည်! ထို့အပြင် ဖေးယီကျန့် ကောင်းစွာမသင်ပေးပါက သူ့အန်တီ၏ မျက်လုံးများထဲ ဂုဏ်သိက္ခာကျဆင်းစေမည် မဟုတ်ပါလား!

ထိုသို့ တွေးပြီးနောက် နန်ယု ဖေးယွင်ကျင်းအား သူ့သဘော ထားကို မေးသောအခါ ကောင်လေးမှာ ပြုံးကာ ချက်ချင်းသဘောတူလိုက်သည်။

ထို့နောက် တစ်စက္ကန့်အတွင်းမှာပင် အကြီးစားမျက်လုံးနှင့် သေးငယ်သောမျက်လုံးတို့ ဆုံတွေ့ခဲ့ကြသည်။ သူတို့နှစ်ဦး၏အပြုံးများမှာ ပုံစံခွက်တစ်ခုတည်းဖြင့် ထုလုပ်ထားသကဲ့သို့ တူညီနေသည်။

ဘေးတွင် ရပ်နေသော နန်ယု သွေးသားဆက်နွယ်မှု၏ အံ့ဖွယ်အရာများအား တစ်ဖန် အံ့ဩမိပြန်သည်။

သူမ ရှေ့တွင် "နန်ယု စစ်ပွဲ"ဟု အမည်ပေးထားသော စစ်ပွဲတစ်ခု ဖြစ်ပွားနေသည်ကို သူမ လုံးဝပင် သတိမပြုမိခဲ့ပေ။

ဖေးယီကျန့် သို့မဟုတ် ဖေးယွင်ကျင်း မည်သူ အနိုင်ရမည်ကိုသာ မည်သူမျှမသိနိုင်တော့ပေ။

နန်မိသားစုသည် နောက်ထပ် မိသားစု အစည်းအဝေးတစ်ခုအား ကျင်းပခဲ့သည်။ ယခင်အစည်းအဝေးမှာ နန်ကျီနှင့် အန်းနင်၏ မင်္ဂလာပွဲအကြောင်း ဆွေးနွေးရန် ဖြစ်သော်လည်း ဤတစ်ကြိမ်တွင် လေထုမှာ ပို၍ လေးနက်နေသည်။

"ဒါက ကောကို စံနမူနာပြတာ မဟုတ်ဘူးလား?"

နန်ယု နန်ကျီနှင့် ထိုအဆင့်မြင့်ပုဂ္ဂိုလ်၏ စကားပြောဆိုမှုအား နားထောင်ပြီးနောက် လျင်မြန်စွာ အနှစ်ချုပ်လိုက်သည်။

"ဟုတ်တယ် ဒါပေမဲ့ ဒါက ကြီးမားတဲ့ အခွင့်အရေးပဲ"

နန်ကျီ ခေါင်းညိတ်လိုက်သည်။

နန်မိသားစု၏ မကြာသေးမီက ကြီးထွားမှုမှာ အမှန်တကယ် ထူးခြားခဲ့သည်။ နန်ကျီ ဘာလုပ်ရမည်ကို စိုးရိမ်နေရုံသာမက အပေါ်မှပုဂ္ဂိုလ်များသည်လည်း အလားတူ မေးခွန်းအား စဉ်းစားနေကြဖွယ် ရှိသည်။

သူတို့ တစ်ဦးတည်း လွှမ်းမိုးသော အင်အားစုကို သေချာ ပေါက် မလိုချင်ကြသော်လည်း နန်ကျီအား ယှဉ်ပြိုင်နိုင်သော အခြားမိသားစုများလည်း မရှိပေ။

"တိုက်ရိုက် ဖိနှိပ်ခြင်း" မှာ သေးနုပ်သည်ဟု ထင်ရပေမည်။ မည်သို့ပင်ဆိုစေ နန်မိသားစုသည် ဥပဒေအား အမြဲ လိုက်နာခဲ့သည်။ မိသားစုများစွာကို ဒုက္ခပေးနေသော အဂတိလိုက် စားမှုနှင့် ပြည်တွင်းပဋိပက္ခများနှင့် နှိုင်းယှဉ်ပါက နန်မိသားစုအား လေသစ်တစ်ခုအဖြစ် သတ်မှတ်နိုင်သည်။

ထို့ပြင် သူတို့ ပြင်ပပုံရိပ်မှာ အလွန်ကောင်းမွန်သည်။ အထူး သဖြင့် မကြာသေးမီက ဟိုင်မြို့ ငလျင်နှင့်အတူ နန်ကျီ၏ မူလရည်ရွယ်ချက် မည်သို့ပင်ရှိစေကာမူ သူ ထိခိုက်ခံရသော ပြည်သူများအား အကူအညီပေးရာတွင် အားထုတ်မှုနှင့် ငွေကြေးရင်းနှီးမြှုပ်နှံခဲ့သည်။ အဆင့်မြင့် ပုဂ္ဂိုလ်များမှာ ထိုအချက်အား ရှင်းရှင်းလင်းလင်းမြင်နိုင်ခဲ့သည်။

ထို့အပြင် နန်ကျီ၏မူလရည်ရွယ်ချက်မှာ သူ့မိသားစုအတွက် ဖြစ်သည်။ မိသားစုအား ဂရုစိုက်သူသည် မကောင်းသောလူ ဖြစ်နိုင်မည် မဟုတ်ပေ။

ထို့ကြောင့် တစ်ရက်တာ ဆွေးနွေးပြီးနောက် အဆင့်မြင့်ပုဂ္ဂိုလ်များမှာ နန်မိသားစုအား "စည်းရုံးသိမ်းသွင်းရန်" ဆုံး ဖြတ်ခဲ့သည်။ ရှေးခေတ်မှ ဧကရာဇ်ကုန်သည်များ သဘော တရားကဲ့သို့ပင် ယခုအခါ နန်မိသားစုသည် သူတို့၏နောက်ခံတွင် အစိုးရကို ရရှိနိုင်ပေသည်။

"ရှေ့လျှောက် ကျွန်တော့်ကို အများပြည်သူဝန်ဆောင်မှု ကြေ ငြာချက်အမျိုးမျိုးမှာ မြင်ရနိုင်တယ်"

နန်ကျီ လက်နှစ်ဖက်ကို ဖြန့်ကာပြောလိုက်သည်။ ထို့နောက် ညာလက်ဖြင့် ဖုန်းကို မှန်တစ်ချပ်လို ကိုင်ရင်း သူ့မျက်နှာအား ဘေးတိုက်တစ်ချက် ကြည့်လိုက်သည်။

"မေမေနဲ့ ဖေဖေကို ကျေးဇူးတင်ပါတယ်၊ ဒီလို ပြစ်မျိုးမထင်တဲ့ မျက်နှာကိုပေးခဲ့လို့၊ ဒီလောက် ရုပ်ရည်ပြေပြစ်နေတာကလည်း တကယ်တာဝန်ကြီးတာပဲ၊ နောက်ဆို ကျွန်တော် နန်ယုထက်တောင် ပရိသတ်တွေ ပိုပေါများလာမလား မသိဘူး!"

အခြားသူများ: "..."

နန်ယု လှောင်ပြောင်လိုက်သည်။

"အိုး၊ ကောက ကျွန်မတို့မိဘတွေပေးထားတဲ့ မျက်နှာကိုပဲ အားကိုးနေရတာ မဟုတ်လား?"

"ယုယု၊ နင် ဘာကို ဆိုလိုတာလဲ ?! ကောမှာ အဲ့ဒီမျက်နှာလိုပဲ ထူးချွန်တဲ့ ဉာဏ်ရည်လည်း ရှိတယ်လို့..."

"အဟမ်း"

အဘိုးနန်၏ချောင်းဟန့်သံကြောင့် နန်ကျီ စကားမှာ ချက် ချင်းပြတ်တောက်သွားသည်။ အဘိုးနန် သူ့မြေးအား မနှစ်သက်သော အကြည့်ဖြင့် တစ်ချက်ကြည့်ကာ စကားဝိုင်းကို စီးပွားရေးကိစ္စဘက်သို့ ပြန်လည် ဦးတည်လိုက်သည်။

"ဒါက အခွင့်အရေးတစ်ခု ဖြစ်သလို ငါတို့ နန်မိသားစုအတွက် စိန်ခေါ်မှုတစ်ခုလည်းဖြစ်တယ်"

စီးပွားရေးသမားများမှာ အရာရှိများနှင့် ပဋိပက္ခမဖြစ်ရဟူ သော ရှေးဟောင်းစည်းမျဉ်းမှာ ယနေ့ခေတ်တွင်လည်း အမှန်တကယ် အကျုံးဝင်နေဆဲ ဖြစ်သည်။ သူ တည်ထောင်ခဲ့သော နန်မိသားစုသည် တစ်နေ့တွင် ဤမျှမြင့်မားသည့် အဆင့်သို့ ရောက်ရှိလာလိမ့်မည်ဟု အဘိုးနန် တစ်ခါမျှ စိတ်ကူးမယဉ်ခဲ့ဖူးပေ။

သို့သော် နန်မိသားစု၏ လျင်မြန်သော ကြီးထွားမှုမှာ ၎င်း၏ အခြေခံအား အနည်းငယ် မတည်ငြိမ်ဖြစ်စေခဲ့သည်။ အဘိုးနန် ခေတ်ကာလအရ သြဇာရှိသော မိတ်ဆွေဟောင်းများစွာနှင့် ရင်းနှီးသော ဆက်ဆံရေးအား တည်ဆောက်ခဲ့သည်။

သို့သော် သူ သေဆုံးသွားပါက ဤဆက်သွယ်မှုများမှာ မလွဲ မသွေပြတ်တောက်သွားမည်ဖြစ်သည်။ နန်မိသားစုမှာ အလွန်သေးငယ်သည်။ လက်ရှိတွင် ထူးထူးခြားခြား ဩဇာရှိသော ဆွေမျိုးများမရှိသေးပေ။

မြင့်မြတ်သူတစ်ဦးအား မွေးထုတ်ရန် မျိုးဆက်သုံးဆက်ကြာသည်ဟု ဆိုကြရာ၊ နန်မိသားစုသည် ရင့်ကျက်ရန်နှင့်ခိုင်မာ သော အခြေခံ စုဆောင်းရန်အတွက် အချိန်လိုအပ်နေသေးသည်။

"နားလည်ပါတယ်"

သင် ပိုမြင့်သောနေရာတွင် ရှိလေလေ၊ တစ်ခုခု မှားယွင်းသွားပါက ပို၍ ပြင်းထန်စွာပြုတ်ကျလေလေ ဖြစ်သည်။ နိုင်ငံသည် နောက်ထပ် နန်မိသားစုဝင်တစ်ဦးအား အမြဲ ဖန်တီးပေးနိုင်သော်လည်း နန်မိသားစုမှာ နောက်ထပ် အခွင့်အရေးတစ်ခုအား ဘယ်တော့ရနိုင်မည်ကို မသိပေ။

"ကံကောင်းတာက ငါတို့ မိသားစုကသေးတယ်"

မားမားနန် ပြုံးပြီးပြောလိုက်သည်၊

"ပြီးတော့ သားပိုက်ကောင်တွေ မရှိဘူး"

(T/N: "သားပိုက်ကောင်များ" (袋鼠) ဆိုသည်မှာ မိသားစု၏ ချမ်းသာကြွယ်ဝမှုနှင့် အရင်းအမြစ်များကိုကိုယ်တိုင် အလုပ် မလုပ်ဘဲ မှီခိုပြီး ပြဿနာရှာသည့် သို့မဟုတ် အချောင်ခိုသည့် ဆွေမျိုးသားချင်းများကို ရည်ညွှန်းသည်။)

တကယ်တော့ မိသားစုသေးငယ်ခြင်းတွင် ၎င်း၏ အားသာချက်များ ရှိပါသည်။ အနည်းဆုံးအားဖြင့် တရားမဝင်ကလေးများနှင့် မယားငယ်များ များစွာရှိသော မိသားစုများကဲ့သို့ ရှုပ်ထွေးပွေလီသည့် ပြဿနာများ ဖြစ်ပေါ်စေပြီး မိသားစု၏စည်းလုံးညီညွတ်မှုအား ပျက်ပြားစေခြင်းမှ ရှောင်ရှားနိုင်ခြင်းပင်။

"ဘယ်လိုပဲဖြစ်ဖြစ် မင်း ရှေ့လျှောက် ပိုသတိထားရမယ်၊ ရည်ရွယ်ချက်ရှိရှိ ထောင်ချောက်ဆင်ထားသူတွေရဲ့ လှည့် ကွက်ထဲ မကျရောက်အောင် ရှောင်ကြဉ်ရမယ်"

အဘိုးနန် လျင်မြန်စွာ နိဂုံးချုပ်လိုက်သည်။

"ဒါပေမဲ့ အစိုးရိမ်လွန်ပြီး ကိုယ့်ကိုယ်ကိုယ် ထိန်းချုပ်ထားဖို့တော့ မလိုဘူး၊ နန်မိသားစု အခုချက်ချင်း ဒေဝါလီခံရရင် တောင် ငါတို့ မိသားစုကို ဘယ်သူမှလာပြီး အနိုင်ကျင့်တာကို ခံမှာမဟုတ်ဘူး!"

နန်ယု ထိုစကားအား ကြားသောအခါ နှုတ်ခမ်းကို မသိမသာတွန့်လိုက်သည်။ ဤသည်မှာ နွေးထွေးပြီး သဟဇာတဖြစ်သော နန်မိသားစု၏ပုံစံပင်။

၎င်းကြောင့် သူမ ယခင်ဘဝမှ မိသားစု၏ကံကြမ္မာအား မကျေနပ်ခဲ့ဘဲ ပြောင်းလဲလိုခဲ့ခြင်းဖြစ်သည်။

သို့သော် ယခုမူ ပြောင်းလဲမှုမှာ အလွန်ကောင်းမွန်လွန်းနေ သည် မဟုတ်ပါလော ?

ရေတိုတွင် နန်မိသားစုမှာ ပရဟိတလုပ်ငန်းများအတွက် သိသာထင်ရှားသော အမြတ်အစွန်းများ စွန့်လွှတ်ရမည်ဖြစ်ပြီး သူတို့ပုံရိပ်အား ထိန်းသိမ်းရန်နှင့် အဆင့်မြင့်ပုဂ္ဂိုလ်များကိုလည်း အချို့သော အမြတ်အစွန်းများ ပေးရမည်ဖြစ် သည်။ ၎င်းမှာ သူတို့အမြတ်အစွန်းအား မလွဲမသွေလျှော့ချမည် ဖြစ်သည်။

သို့သော် ရေရှည်တွင် နန်မိသားစု တည်ငြိမ်နေသရွေ့ လူတိုင်းအတွက် အကျိုးရှိစေမည့် အခြေအနေဖြစ်သည်။

သို့သော် ဤအခြေအနေမှာ ရှောင်ကျင်း၏ Flower နိုင်ငံတွင် အချမ်းသာဆုံးပုဂ္ဂိုလ်ဖြစ်လာရန် အခွင့်အရေးအား လျော့ပါး စေနိုင်သည်။

သူ့ဉာဏ်ရည်နှင့် အရင်းအမြစ်ကြွယ်ဝမှုတို့ကပင် ဆယ်စုနှစ်များစွာ ကြာမည့် ကွာဟချက်အား အလွယ်တကူ ပြန်လည်မဖြည့်ဆည်းနိုင်ပေ။

မူရင်းဝတ္ထုတွင် ဖေးမိသားစုနှင့် ပေထန်မိသားစုတို့ စောစီးစွာ အားနည်းကြောင်း လက္ခဏာများပြသခဲ့သည်။ နန်ကျီ ဇနီးနှင့် သားသမီး မရှိခြင်းက သူ့အား လှုံ့ဆော်မှု မပေးနိုင်သော ကြောင့်လားဟု တွေးမိခဲ့သည်။ သို့သော် နန်မိသားစု၏ ဖွံ့ဖြိုးတိုးတက်မှုမှာ အမြဲတစေ တည်ငြိမ်ပြီး ခိုင်မာခဲ့ကာ ဤဘဝတွင် ဖြစ်ခဲ့သကဲ့သို့ ထိုမျှလောက် အထင်ကြီးစရာ မကောင်းခဲ့သည်မှာ သေချာသည်။

နောက်ပိုင်းတွင် နန်ကျီ... နန်မိသားစု၏လုံးဝ ကျဆင်းမှုမှာ ဖေးယွင်ကျင်း ထင်ပေါ်ကျော်ကြားလာရန် အခြေအနေများ ဖန်တီးပေးခဲ့သည်။

သို့သော် ဤနှုန်းအတိုင်းဆိုလျှင် ဖေးယွင်ကျင်း၏ Flower နိုင်ငံတွင် အချမ်းသာဆုံးပုဂ္ဂိုလ် ဖြစ်လာရန် ရည်မှန်းချက်မှာ မျှော်လင့်ချက်ကင်းမဲ့ဖွယ်ရှိသည်။

ထိုအရာမှာ ကံကြမ္မာအား နောက်ထပ် အကြီးအကျယ် ထိုးနှက်မှုတစ်ခုပေးလိုက်ခြင်းလည်း ဖြစ်သည်။

နန်ယု ကံကြမ္မာ ထိတ်လန့်နေပုံအား မြင်ယောင်နိုင်သည်။ ၎င်းသည် နောက်ဆုံးအသက်ကြိုးမျှင်အား ဖက်တွယ်ထားပြီး မည်သည့်အချိန်တွင် လုံးဝ ပြတ်တောက်သွားမည်ကို မသိနိုင်ပေ။

"ဪ၊ ဟုတ်သား၊ နောက်ထပ် တစ်ခု ရှိသေးတယ်"

နန်ကျီ လူတိုင်း အခြေအနေအား နားလည်ကြောင်းမြင်သော အခါ အန်းနင်နှင့် အန်းရီရန်ကို ကြည့်လိုက်သည်။ သူတို့ သုံးဦး သဘောတူညီမှုဖြင့် ပြုံးလိုက်ကြသည်။

"ကျွန်တော် မနက်ဖြန် ရီရန်ကို သူ့နာမည်ပြောင်းဖို့ ခေါ်သွားမယ်၊ ဒီနေ့ကစပြီး သူက နန်ရီရန်ဖြစ်လာလိမ့်မယ်"

နန်ကျီနှင့် နန်မိသားစုမှာ အန်းရီရန်၏ မျိုးရိုးနာမည် ဘာဖြစ် သည်ကို ဂရုမစိုက်ခဲ့ပေ။ သူ့တွင် နန်သွေးစက်ပါရှိနေဆဲပင် ဖြစ်သော်လည်း အခြားကိစ္စရပ်များတွင် အနည်းငယ်ရှုပ် ထွေးသည်။

ဥပမာအားဖြင့် ယခင်က အန်းရီရန်သည် ထိုယွဲ့မျိုးရိုး လူဆိုးနှင့် ရန်ဖြစ်ခဲ့ရာတွင် ထိုလူမှ သူ့အား "အန်း" နာမည်ကြောင့် လှောင်ပြောင်ခဲ့သည်။ အဘယ်ကြောင့်ဆိုသော် နန်မိသားစုမှ သူ့အား အသိအမှတ် မပြုသောကြောင့်ဖြစ်ပြီး သူသည် နန်ကျီ၏ကလေး အမှန်တကယ် ဟုတ်၊ မဟုတ်ကိုပင် သံသယ ဝင်ခဲ့သည်။ နန်ကျီနှင့် အန်းရီရန်တို့ မည်မျှပင် ရုပ်ရည်တူညီနေစေကာမူ။

ပြင်ပလူတစ်ဦးမှာ နန်ကျီနှင့် အခြားသူများ၏ တွေးခေါ်ပုံအား မည်သို့ နားလည်နိုင်မည်နည်း? ပိုချမ်းသာသော မိသားစုများမှာ သူတို့ကလေးများ၏မျိုးရိုးကို ပို၍ တန်ဖိုးထားကြသည်။ အန်းရီရန်တွင် နန်မျိုးရိုးနာမည် မရှိခြင်းမှာ သူ့တွင် တစ်ခုခုမှားယွင်းနေသည်ကို ဆိုလိုသည်။ သူသည် အချစ်မခံရသူ ဖြစ်သည်။

ထို့အပြင် ညီမငယ်လေး မွေးလာပြီးနောက် သူမ အစ်ကိုနှင့် မျိုးရိုးနာမည် မတူခြင်းမှာ အဘယ်ကြောင့်လဲဟု သူမ တွေးမိနိုင်သည်အား ထည့်သွင်းစဉ်းစားသည်။ အန်းနင်နှင့် နန်ကျီတို့ သူတို့ ယခင်က ခံစားခဲ့ရသော နားလည်မှုလွဲမှားခြင်းများအား နောက်လာမည့် ကလေးကို မပြောပြလိုကြပေ။

ကလေးအား ပြောပြချင်လျှင်ပင် ကလေးအရွယ်ရောက်ပြီး မှန်ကန်သည်ကို မှားယွင်းသည်မှ ခွဲခြားနိုင်စွမ်းရှိသည့်အချိန်အထိ စောင့်ဆိုင်းကြမည် ဖြစ်သည်။

ထို့ကြောင့် အန်းရီရန်နှင့် တိုင်ပင်ပြီးနောက် နန်ကျီနှင့် အန်းနင်တို့ သူ့အား မျိုးရိုးနာမည်ပြောင်းဖို့ ခေါ်သွားရန် ဆုံးဖြတ်ခဲ့ကြသည်။

ဝိုး! နန်ယု မျက်တောင်ခတ်လိုက်သည်၊ နောက်ထပ် သတင်း ကောင်းတစ်ခုပဲ။

အန်းရီရန်၌ အန်းမျိုးရိုးနာမည် မရှိတော့သည့်နောက် သူ ဆက်လက်၍ ကြေကွဲဖွယ် ဒုတိယအမျိုးသားဇာတ်လိုက် ဖြစ်နေဦးမည်လား ?

သူ ထိုသတင်းကောင်းနှစ်ခုအား ဖေးယီကျန့်နှင့် မျှဝေရန် မစောင့်နိုင်တော့ပေ။