အလယ်အလတ် ဝိညာဉ်ကျောက်တုံးငါးသောင်းရှိ ရိတ်သိမ်းမှု၊ ကြည်လင်သစ်သား ဆေးလုံးအား သန့်စင်ချေဖျက်ခြင်း။

"ဪ ဟုတ်သား.. ဟိုအခြေတည်အဆင့် ကျင့်ကြံသူ လေးယောက်ရဲ့ သိုလှောင်အိတ်တွေလည်း ရှိသေးတယ်…"

ထိုအချိန်တွင် ကျိုးစွေ့သည် သိုလှောင်အိတ် ငါးလုံးကို ထုတ်ယူလိုက်သည်။ တစ်လုံးမှာ ချီသန့်စင်ခြင်းအဆင့် ကျင့်ကြံသူတစ်ဦး၏ အိတ်ဖြစ်၍ ၎င်းသည် အရေးမပါလှပေ။

သူသည် နတ်ဘုရားအာရုံဖြင့် ၎င်းတို့အပေါ် ပေါ့ပေါ့ပါးပါး ဖြတ်သန်းကြည့်လိုက်ပြီး၊ တစ်ချိန်တည်းမှာပင် နှလုံးသားမျက်လုံး အသိအမှတ်ပြုခြင်းကို အသုံးပြုလိုက်သည်။ ချက်ချင်းဆိုသလိုပင်၊ ကြီးမားလှသော သတင်းအချက်အလက်များက သိစိတ်ပင်လယ်၏ အနက်ပိုင်းထဲသို့ စီးဝင်သွားသည်။

ဝိညာဉ်ကျောက်တုံးများ၊ စိတ်ဝိညာဉ်ဆေးဝါးများ၊ မှော်ပစ္စည်းများ၊ ဆေးလုံးများနှင့် အခြား ရတနာများစွာ၏ သတင်းအချက်အလက်အားလုံး သူ၏ မျက်စိရှေ့တွင် ပေါ်လာသည်။

"သူတို့က တကယ့်ငမွဲမိစ္ဆာကောင်တွေပဲ…"

ကျိုးစွေ့က မျက်တောင်ခတ်လိုက်ပြီး စကားမပြောနိုင် ဖြစ်သွားသည်။

မူလက ထူးခြားသော ရတနာအချို့ ရှာတွေ့နိုင်မည်ဟု ထင်ထားခဲ့သော်လည်း၊ ၎င်းတို့သည် သာမန် အရင်းအမြစ်များသာ ဖြစ်နေသည်။ သူ့အား ဖမ်းစားနိုင်မည့်အရာ တစ်ခုမျှ မတွေ့ရချေ။

သို့သော်ငြား၊ ဤသိုလှောင်အိတ်ငါးလုံးထဲမှ ရတနာများပေါင်းလိုက်လျှင် အလယ်အလတ် ဝိညာဉ်ကျောက်တုံး လေးသောင်း တန်ဖိုးရှိသည်။

ဤသည်မှာ အခြေတည်အဆင့် ကျင့်ကြံသူတစ်ဦးအတွက် တကယ်တမ်းတွင် တော်တော်လေး များပြားသော ကြွယ်ဝမှု ဖြစ်သည်။

အလယ်အလတ် ဝိညာဉ်ကျောက်တုံး လေးသောင်းသည် အခြေတည်အဆင့် ကျင့်ကြံသူတစ်ဦး၏ ကျင့်ကြံမှုကို လျင်မြန်စွာ မြှင့်တင်ပေးနိုင်သော ဒုတိယအဆင့် ဆေးလုံး အမြောက်အမြားကို ဝယ်ယူရန် အသုံးပြုနိုင်သည်။

ထို့အပြင်၊ အလယ်အလတ် ဝိညာဉ်ကျောက်တုံး တစ်သောင်း တန်ဖိုးရှိသော 'လေမဲ့မြက်'လည်း ပါသေးသည်။

စုစုပေါင်း၊ သူသည် အလယ်အလတ် ဝိညာဉ်ကျောက်တုံး ငါးသောင်း ရရှိခဲ့ပြီး၊ ၎င်းကို မမျှော်လင့်ဘဲ ရသည့် ကံကောင်းမှုဟု ယူဆနိုင်သည်။

"ထားလိုက်တော့.. ငါ့ကျင့်ကြံမှုကိုပဲ ဆက်လုပ်ပြီး ငါ့ရဲ့ မှော်စွမ်းအားကို မြှင့်တင်သင့်တယ်.."

ကျိုးစွေ့က သိုလှောင်အိတ်များကို ဘေးဖယ်ထားလိုက်ပြီး မြေပြင်ပေါ်တွင် ခြေချိတ်ထိုင်လိုက်သည်။ သူသည် ကြည်လင်သစ်သား ဆေးလုံးတစ်ပုလင်းကို ထုတ်ယူပြီး ချက်ချင်း တစ်လုံး မျိုချလိုက်သည်။

ဟူးလား..။

သူသည် ကြည်လင်သစ်သား ဆေးလုံးကို မြန်မြန်ဆန်ဆန် သန့်စင်ချေဖျက်ရန် ကူနတ်ဘုရားကျင့်စဉ်ကို လည်ပတ်လိုက်ရာ၊ ၎င်းသည် ကြီးမားလှသော စွမ်းအင် ပမာဏအဖြစ်သို့ ပြောင်းလဲသွားသည်။

ကြည်လင်သစ်သား ဆေးလုံး၏ စွမ်းအင်သည် မယုံနိုင်လောက်အောင် သိမ့်မွေ့ပြီး သူ၏ သွေးကြောတစ်ခုစီတိုင်းမှ စီးဆင်းကာ သူ၏ ခန္ဓာကိုယ်ကို စဉ်ဆက်မပြတ် အားကောင်းစေသည်။

ဤအခိုက်အတန့်တွင်၊ သူ၏ ခန္ဓာကိုယ်ထဲမှ မှော်စွမ်းအားသည် တဖြည်းဖြည်း တိုးပွားလာသည်။

"အရမ်း နှေးလွန်းတယ်…"

ကျိုးစွေ့ စိတ်ထဲမှ သက်ပြင်းချလိုက်သည်။ ဒုတိယအဆင့် ကြည်လင်သစ်သား ဆေးလုံး၏ အကူအညီ ရှိနေသည့်တိုင်၊ သူသည် မှော်စွမ်းအားအရည် တစ်စက်ကို စုစည်းရန် အနည်းဆုံး တစ်လ လိုအပ်နေသေးသည်။ ထို့ကြောင့် မှော်စွမ်းအားစုစည်းခြင်း ဖြစ်စဉ်သည် မည်မျှ နှေးကွေးသည်ကို စိတ်ကူးကြည့်နိုင်သည်။

အကယ်၍ ဒုတိယအဆင့် ဆေးလုံးများသာ မရှိပါက၊ သူသည် မှော်စွမ်းအား အရည် တစ်စက်ကို စုစည်းရန် ခြောက်လခန့် လိုအပ်ပေမည်။

သူ၏ လက်ရှိ ကျင့်ကြံနှုန်းအရ၊ အခြေတည် ပြီးပြည့်စုံမှုအဆင့်သို့ ရောက်ရှိရန်၊ သူသည် နှစ်ပေါင်း ရာနှင့်ချီ၍ အပြင်းအထန် ကျင့်ကြံရမည်ဟု ခန့်မှန်းမိသည်။

သူ၏ စိတ်ဝိညာဉ်အမြစ်သည် အလယ်အလတ်တန်းစား စိတ်ဝိညာဉ်အမြစ်နှင့် ညီမျှသော ဆဌမအဆင့်သို့ ရောက်ရှိနေပြီ ဖြစ်သည်ကို သတိပြုသင့်သည်။

သို့တိုင်၊ သူ၏တိုးတက်မှုသည် ခရုတစ်ကောင်ကဲ့သို့ နှေးကွေးနေဆဲ ဖြစ်၏။

အကယ်၍ သာမန် ဆဌမအဆင့် စိတ်ဝိညာဉ်အမြစ်ရှိသော အခြေတည်အဆင့် ကျင့်ကြံသူတစ်ဦး ဖြစ်ပါက၊ သက်တမ်းကုန်ဆုံးသွားသည့်တိုင် အခြေတည် ပြီးပြည့်စုံမှုအဆင့်သို့ တက်လှမ်းနိုင်မည် မဟုတ်သလို အမြုတေဖွဲ့စည်းနိုင်မည် မဟုတ်ပေ။ အများစုသည် ၎င်းတို့၏ တစ်သက်တာလုံး အခြေတည် အစောပိုင်းအဆင့်တွင်သာ ရပ်တန့်နေရပေမည်။

"နယ်ပယ် ပိုမြင့်လေ.. ကျင့်ကြံခြင်း ပင်ကိုပါရမီက ပိုအရေးကြီးလာလေပဲ…"

"အဆင့်နိမ့် စိတ်ဝိညာဉ်အမြစ်က ကံကောင်းမှုတချို့နဲ့ အခြေတည်အဆင့် ကျင့်ကြံသူတစ်ယောက် ဖြစ်လာနိုင်သေးတယ်…"

"ဒါပေမဲ့.. ရွှေအမြုတေ ဆရာသခင်တစ်ယောက် ဖြစ်လာဖို့ အိပ်မက်မက်တာကတော့ စိတ်ကူးယဉ်သက်သက်ပဲ…"

"မှော်စွမ်းအားအရည် စုစည်းရတဲ့ အလျင်နှုန်းတစ်ခုတည်းကတောင် အဆင့်နိမ့်နဲ့ အလယ်အလတ် စိတ်ဝိညာဉ်အမြစ်ရှိတဲ့ ကျင့်ကြံသူတွေကို မျှော်လင့်ချက်မဲ့စေဖို့ လုံလောက်တယ်…"

"ထိပ်တန်း စိတ်ဝိညာဉ်အမြစ်ရှိတဲ့ ကျင့်ကြံသူတွေပဲ အသက်၂၀၀မတိုင်ခင် အခြေတည် ပြီးပြည့်စုံမှုအဆင့်ကို ရောက်ဖို့ မျှော်လင့်နိုင်တယ်…"

"ဒါမှသာ ရွှေအမြုတေအဆင့်ကို တက်လှမ်းဖို့ မျှော်လင့်ချက် ရှိမယ်.."

ကျိုးစွေ့၏ မျက်လုံးများ အရောင်လက်သွားသည်။ စိတ်ဝိညာဉ်အမြစ် ပင်ကိုပါရမီသည် အမှန်တကယ် မယုံနိုင်လောက်အောင် အရေးကြီးကြောင်း သူခံစားမိသည်။

အထူးသဖြင့် အခြေတည်အဆင့် သို့မဟုတ် ရွှေအမြုတေအဆင့်များအထိ ကျင့်ကြံအားထုတ်သည့်အခါတွင် အလယ်အလတ် စိတ်ဝိညာဉ်အမြစ်ရှိ ကျင့်ကြံသူတစ်ဦး၏ ကျင့်ကြံမှု တစ်နှစ်စာသည် ထိပ်တန်းအဆင့် စိတ်ဝိညာဉ်အမြစ်ရှိ ကျင့်ကြံသူ၏ တစ်လတာကျင့်ကြံမှုနှင့် ညီမျှသည်။ ထိရောက်မှု ကွာဟချက်က အလွန်ကြီးမားသည်။

အချိန်ကြာလာသည်နှင့်အမျှ၊ ကွာဟမှုသည် ပို၍ပင် ကြီးမားလာသည်။

ကံကောင်းစွာဖြင့်၊ သူ့တွင် ‘ချစ်ခြင်းမေတ္တာကူ'၏ အကူအညီနှင့် တာအိုလက်တွဲဖော်များ၏ အကူအညီ ရှိနေသည်။

များမကြာမီ သူ၏ စိတ်ဝိညာဉ်အမြစ် ပင်ကိုပါရမီသည် ထပ်မံ တိုးတက်လာတော့မည် ဖြစ်သည်။ သူ၏ စိတ်ဝိညာဉ်အမြစ်ကို ပဉ္စမအဆင့်သို့ တိုးမြှင့်ပြီးသည်နှင့်၊ သူ၏ကျင့်ကြံမှု စွမ်းဆောင်ရည်သည် သိသိသာသာ တိုးတက်လာမည်မှာ သေချာသည်။

ဤသို့ တွေးမိသောအခါ၊ ကျိုးစွေ့သည် ထိုကိစ္စများအား လျစ်လျူရှုလိုက်ပြီး ကြည်လင်သစ်သား ဆေးလုံး၏ ဆေးအစွမ်းကို ချေဖျက်ရင်း လုံ့လဝီရိယဖြင့် ဆက်လက်ကျင့်ကြံနေလိုက်တော့သည်။

…

ထိုအချိန်တွင်၊ အင်မော်တယ်ရှားဂိုဏ်း၏ အခြေတည်အဆင့် အကြီးအကဲ အများအပြား အတူတကွ စုရုံးနေကြသည်။

သူတို့သည်လည်း ကျိုးစွေ့ တစ္ဆေမိစ္ဆာဂိုဏ်းမှ အခြေတည်အဆင့် အကြီးအကဲများ၏ ချုံခိုတိုက်ခိုက်ခြင်းကို ခံရသည့် တုန်လှုပ်ဖွယ်သတင်းကို ကြားသိထားကြသည်။

"တစ္ဆေမိစ္ဆာဂိုဏ်း ဂိုဏ်းချုပ်လော့ဟွာက လက်စားချေလိုစိတ် ဒီလောက် ပြင်းထန်လိမ့်မယ်လို့ ဘယ်သူ ထင်ထားမှာလဲ.. သူက ငါတို့ ဂိုဏ်းချုပ်ရဲ့ တာအိုလက်တွဲဖော်ကို ကိုင်တွယ်ဖြေရှင်းဖို့ အခြေတည်အဆင့် အကြီးအကဲ လေးယောက်ကိုတောင် လွှတ်လိုက်တယ်.. တကယ်ကို အကွက်ကြီး ချလိုက်တာပဲ.."

"သနားစရာကတော့.. တစ္ဆေမိစ္ဆာဂိုဏ်းရဲ့ ဂိုဏ်းချုပ်က ငါတို့ဂိုဏ်းချုပ် ဟိုကောင်ချောလေးအပေါ် ဘယ်လောက်တောင် ချစ်ခင်တွယ်တာလဲ ဆိုတာကို လျှော့တွက်မိတာပဲ.. သူမက သူ့ကို တတိယအဆင့် အဆောင်တစ်ခုတောင် ပေးထားခဲ့တ်… သူမက ဟိုကောင်ချောလေး သေတာကို တကယ် မြင်ချင်မှာ မဟုတ်ဘူး…"

"ဒီကောင်လေးက ငါတို့ဂိုဏ်းချုပ်ရဲ့ မျက်နှာသာပေးမှုကို အမှန်အကန်ရထားတာလို့ပဲ ပြောရမယ်.. သူက တကယ် ကံကောင်းတဲ့ကောင်ပဲ.. ဂိုဏ်းချုပ်ရဲ့ အကူအညီသာ မရှိခဲ့ရင်.. ဒီကောင်လေး ဒီတစ်သက် အခြေတည်အဆင့်ကို ဘယ်တော့မှ ရောက်နိုင်မှာမဟုတ်ဘူး"

"ဒါပေမဲ့.. အခု တစ္ဆေမိစ္ဆာဂိုဏ်းက အခြေတည်အဆင့် အကြီးအကဲ လေးယောက် ဆုံးရှုံးသွားပြီ.. သူတို့ရဲ့ အင်အားက သိသိသာသာ လျော့ကျသွားပြီ.. ဒါက ငါတို့အတွက် တကယ်ကို အခွင့်ကောင်းပဲ.. သူတို့ရဲ့ ဈေးတွေ.. သတ္တုတွင်းတွေ အများကြီးကို သိမ်းပိုက်ပြီး အကျိုးအမြတ်ထုတ်နိုင်တဲ့ အခွင့်အရေးပဲ.."

"ရိုးရိုးသားသား ပြောရရင်တော့ ဒါက တကယ်တော့ မပြောပလောက်တဲ့ကိစ္စပါ.. ပိုအရေးကြီးတဲ့ကိစ္စက ဟိုရုတ်တရက် ပေါ်လာတဲ့ ဝိညာဉ်သန္ဓေသားအဆင့် လိုဏ်ဂူပဲ.. အဲ့ဒါကမှ ငါတို့ရဲ့ တာအိုခရီးလမ်းအတွက် တကယ် အရေးကြီးတာ.."

အင်မော်တယ်ရှားဂိုဏ်း အခြေတည်အဆင့် အကြီးအကဲ အများအပြား ဆူညံစွာ ဆွေးနွေးနေကြသည်။

ဤတစ်ကြိမ် စုရုံးရခြင်း၏ အဓိကအကြောင်းရင်းမှာ ကျိုးစွေ့ကြောင့် မဟုတ်ဘဲ၊ အင်မော်တယ်ရှားဂိုဏ်းနယ်မြေအတွင်း ရုတ်တရက် ပေါ်ပေါက်လာခဲ့သော ဝိညာဉ်သန္ဓေသားအဆင့် လိုဏ်ဂူကြောင့် ဖြစ်၏။

ထိုဝိညာဉ်သန္ဓေသားအဆင့် လိုဏ်ဂူ၏ ပေါ်ထွက်လာမှုသည် ရွှေအမြုတေအင်အားစုများစွာ၏ အာရုံစိုက်မှုကို ချက်ချင်း ဆွဲဆောင်ခဲ့သည်။

“ကျွတ်..ကျွတ်.. ဒီဝိညာဉ်သန္ဓေသားအဆင့် လိုဏ်ဂူက လွန်ခဲ့တဲ့ နှစ်ပေါင်းသုံးထောင်က နာမည်ကျော် သွေးအရိပ်ဘိုးဘေး ပိုင်ဆိုင်ခဲ့တာ.. သူက အဲ့ဒီခေတ်အခါတုန်းက အင်အားစုအများအပြားကို သတ်ဖြတ်ခဲ့ပြီးတော့ ရတနာ အမြောက်အမြားကို လုယက်ခဲ့တယ်လို့ ဆိုကြတယ်.."

"အထဲမှာ လျှို့ဝှက်ရတနာတွေ ဘယ်လောက်တောင် ရှိနေမလဲဆိုတာ ဘယ်သူမှမသိနိုင်ဘူး…"

"ရွှေအမြုတေ ဆိုင်ရာပစ္စည်းတချို့နဲ့ ဖြစ်နိုင်ရင် ဝိညာဉ်သန္ဓေသားအဆင့် ပစ္စည်းတွေတောင် ရှိနိုင်တယ်…"

ဆုပေးဒဏ်ပေးခန်းမမှ ဆရာသခင် ရှုချီယန်က တက်ကြွစွာ ရေရွတ်လိုက်သည်။

"မဖြစ်နိုင်တာ.. ဒါက နည်းနည်း လွန်လွန်းမနေဘူးလား.. တကယ်လို့ ဝိညာဉ်သန္ဓေသားအဆင့် ပစ္စည်းတွေသာ တကယ် ရှိနေရင် ဝိညာဉ်သန္ဓေသားအဆင့် အင်အားစုတွေတောင် ဆွဲဆောင်ခံရနိုင်တယ်.. ငါတို့ အင်မော်တယ်ရှားဂိုဏ်းက ဒါကို ခံနိုင်ရည်ရှိပါ့မလား.."

ဆေးလုံးတောင်ထွတ်မှ တောင်ထွတ်သခင် မာချန်ကျွင်းက သူ၏ စိုးရိမ်မှုများကို ထုတ်ဖော် ပြောလိုက်သည်။

သူ ခံစားရသည်မှာ ဤရုတ်တရက် ပေါ်ပေါက်လာသော ဝိညာဉ်သန္ဓေသားအဆင့် လိုဏ်ဂူသည် ကံကြမ္မာကောင်းတစ်ခုမဟုတ်ဘဲ၊ ဆန့်ကျင်ဘက်အနေဖြင့် အင်မော်တယ်ရှားဂိုဏ်းအတွက် ကြီးမားသော ဘေးအန္တရာယ်တစ်ခုကို ယူဆောင်လာနိုင်သည် ဟူ၍ ဖြစ်သည်။

မည်သို့ပင်ဖြစ်စေ၊ ဤအခွင့်အရေးမျိုးသည် ကိုင်တွယ်ရန် အမှန်တကယ် ပူလောင်လွန်းသည်။

၎င်းသည် လက်ရှိ အင်မော်တယ်ရှားဂိုဏ်း ကိုင်တွယ်နိုင်သော အရာမဟုတ်ချေ။

အကယ်၍ ထိုလိုဏ်ဂူထဲတွင် ဝိညာဉ်သန္ဓေသားအဆင့် ပစ္စည်းများ အမှန်တကယ် ရှိနေပါက၊ ကျွန်းအပြင်ဘက်မှ ဝိညာဉ်သန္ဓေသားအဆင့် အင်အားစုများ သေချာပေါက် အုံလိုက်ကျင်းလိုက် ရောက်လာကြလိမ့်မည်။

အင်မော်တယ်ရှားဂိုဏ်း၏ အစွမ်းဖြင့် မည်သို့မျှ တွန်းလှန်နိုင်မည်မဟုတ်ပေ။ အဆင်အခြင်မဲ့ လှုပ်ရှားမှု တစ်ခုက ဂိုဏ်းတစ်ခုလုံးအား ပျက်စီးသွားစေနိုင်သည်။

"ဒါက ယူဆချက်သပ်သပ်ပါ.. တကယ်ဟုတ်ချင်မှလည်း ဟုတ်မှာပေါ့…"

"ဒါ့အပြင် အဲ့ဒီအချိန်ကတည်းကဆို နှစ်ပေါင်းသုံးထောင် ကြာသွားပြီ.. တကယ်လို့ မှန်ကန်တဲ့ ထိန်းသိမ်းမှုနည်းလမ်းတွေသာ မရှိခဲ့ရင်.. ဝိညာဉ်သန္ဓေသားအဆင့် ပစ္စည်းဆိုရင်တောင် အခုအချိန်မှာ ပျက်စီးသွားလောက်ပြီ.. တစ်ခုတစ်လေ ကျန်ရှိနေဦးမှာတောင် မဟုတ်ဘူး.. ခင်ဗျား အရမ်းကြီး စိုးရိမ်နေစရာ မလိုပါဘူး.."

ရွှေအဆောင်တောင်ထွတ်မှ ဆရာသခင် ချန်လိန်က လေးနက်စွာ ပြောလိုက်သည်။

သူသည် ထိုလိုဏ်ဂူထဲတွင် ဝိညာဉ်သန္ဓေသားအဆင့် ပစ္စည်းများ ရှိနိုင်လိမ့်မည်ဟု မထင်ပေ။

အဘယ်ကြောင့်ဆိုသော် ဝိညာဉ်သန္ဓေသားအဆင့် ဘိုးဘေးတစ်ဦးအတွက်ပင်လျှင် ဝိညာဉ်သန္ဓေသားအဆင့် ပစ္စည်းတစ်ခု ရှာဖွေတွေ့ရှိရန်မှာ မလွယ်ကူဘဲ၊ ၎င်းတို့ကို လွန်စွာတန်ဖိုးရှိသည့် ပစ္စည်းများအဖြစ် သတ်မှတ်နိုင်သောကြောင့် ဖြစ်သည်။ အတိတ်က သွေးအရိပ် ဘိုးဘေးပင်လျှင် တစ်ခုတစ်လေ ရရှိထားရန် မသေချာပေ။

"ဝိညာဉ်သန္ဓေသားအဆင့် ပစ္စည်းတွေ မရှိရင်တောင်.. ရွှေအမြုတေ ပစ္စည်းတွေ ရှိနေနိုင်သေးတယ်"

"ဘာပဲဖြစ်ဖြစ် ဒါက ဝိညာဉ်သန္ဓေသားအဆင့် ဘိုးဘေးတစ်ယောက်ရဲ့ လိုဏ်ဂူ.. အထဲမှာ ဘယ်လို ရတနာတွေ ရှိနေမလဲဆိုတာ ဘယ်သူသိနိုင်မှာလဲ.."

"ဘယ်လိုပဲဖြစ်ဖြစ်.. ငါတို့ ဒီဝိညာဉ်သန္ဓေသားအဆင့် လိုဏ်ဂူကို လုံးဝ လက်လွှတ်လို့ မဖြစ်ဘူး.. ဒါက တစ်သက်မှာ တစ်ခါရတဲ့ အခွင့်အရေး ဖြစ်နိုင်တယ်…"

"အနာဂတ်နှစ်တစ်ရာက အရမ်းဝေးလွန်းတယ်.. ငါတို့ ဆုပ်ကိုင်ရမှာက လက်ရှိဒီနေ့ပဲ.."

ဆုပေးဒဏ်ပေးခန်းမမှ ဆရာသခင် ရှုချီယန်က လက်သီးဆုပ်လိုက်သည်။ ဘာပဲဖြစ်ဖြစ် သူသည် ဤအခွင့်အရေးကို လက်လွှတ်ခံမည် မဟုတ်ပေ။