ဓားတစ်ချက်၊ မွေးရာပါဝိညာဉ်စွမ်းရည်

အကြီးအကဲချင်ယွမ်၏ အသံဖြင့် အပြင်စည်း ထိပ်တန်းတပည့်တစ်ဆယ်ဦးပြိုင်ပွဲသည် တဟုန်းထိုးစတင်လိုက်သည်။

လူစွမ်းကောင်းများအတွက် သတ်မှတ်ထားသော ပြိုင်ပွဲစင်မြင့်များပေါ်တွင် ဒိုင်လူကြီးအဖြစ် အကြီးအကဲများက မဲနှိုက်ဆုံးဖြတ်ရန် တပည့်များကို ထုတ်နှုတ်ရာ လူအုပ်ကြီး၏ အကြည့်များသည် လော့ချန်နှင့် ချီဂူးယွမ်တို့ဆီသို့ တညီတညွတ်တည်း ရောက်ရှိလာသည်။ အကြည့်များသည် စိတ်အားထက်သန်မှုဖြင့် တောက်လောင်နေသည်။

ချီဂူးယွမ်သည် အပြင်စည်းမှ ထိပ်သီးတပည့်ဖြစ်သည်။ အပြင်စည်းမှ လူငယ်မျိုးဆက်တွင် ဘုရင်ဟု ဆိုနိုင်သည်။ ယခင်တုန်းက ရာပေါင်းများစွာ အကွာအဝေးတွင် ဓားတစ်ချက်ဖြင့် လော့ချန်ကို နောက်ဆုတ်စေခဲ့သည်။ ထိုဓားချက်သည် သူ၏ စစ်မှန်သောစွမ်းအားမဟုတ်သေးသည်မှာ ထင်ရှားသည်။ သူ၏ အမှန်တကယ် တိုက်စွမ်းအား မည်သူမျှ မသိကြပေ။

လော့ချန်ကား ဤအပြင်စည်းပြိုင်ပွဲတွင် အကြီးမားဆုံး မထင်မှတ်ထားသူဖြစ်သည်။ လူအများ၏ မျှော်လင့်ချက်နည်းပါးမှုကို ဖြတ်ကျော်ကာ တစ်ဆင့်ပြီးတစ်ဆင့် အောင်မြင်မှုများရယူခဲ့ပြီး တစ်ကြိမ်မျှ ရှုံးနိမ့်ခြင်းမရှိခဲ့ပေ။

လူအများကို အံ့အားသင့်စေသည်မှာ သူ့ကို အဆုံးစွန်သောစွမ်အားအဆင့်သို့ ရောက်ရှိပြီဟု ထင်မြင်လိုက်တိုင်း ထိုအဆင့်ကို ထပ်မံဖြတ်ကျော်နိုင်ခဲ့ပြီး အဆင့်တစ်ရာစာရင်းတွင် အဆင့်တစ်ဆယ့်လေးနေရာရှိ ရမ်ရှောင်ကွမ်ကို တစ်ချက်တည်းဖြင့် အနိုင်ယူခဲ့သည်။ ဤအချက်က လူအချို့ကို သူ၏စစ်မှန်သောစွမ်းအားသည် ယခုထက်ပိုမိုရှိနိုင်သည်ဟု ယုံကြည်စေသည်။

ထိုနှစ်ဦးပေါ်ရှိ အမြင်များက လူအများ၏ အာရုံစူးစိုက်မှုကို ဖမ်းစားထားသည်။ ထို့အပြင် သူတို့နှစ်ဦးသည် သေခြင်းရှင်ခြင်းတိုက်ပွဲ သဘောတူညီချက်ကိုပါ ချုပ်ဆိုထားသည်။

လူအုပ်ကြီးသည် သူတို့နှစ်ဦး ပြိုင်ပွဲစင်မြင့်ပေါ်တွင် တွေ့ဆုံမည်ကို မျှော်လင့်စောင့်စားနေကြသည်။ အပြင်စည်း၏ဘုရင်နှင့် အကြီးမားဆုံးမထင်မှတ်ထားသူတို့၏ ထိပ်တိုက်တွေ့ဆုံမှုကို မြင်တွေ့လိုကြသည်။

သို့ရာတွင် ပထမအဆင့်တွင် သူတို့နှစ်ဦး မတွေ့ဆုံခဲ့ပေ။

လော့ချန်၏ပြိုင်ဘက်မှာ ချန်လင်းယူဖြစ်သည်။

ချန်လင်းယူသည် အလွန်ရိုးရှင်းစွာ အလျှင်အမြန်ရှုံးနိမ့်ကြောင်း ဝန်ခံလိုက်သည်။

ချီဂူးယွမ်၏ပြိုင်ဘက်မှာ အပြင်စည်းတပည့်တစ်ဆယ်ဦးစာရင်းတွင် နောက်ဆုံးနေရာရှိ ဟန်ဖီးယူဖြစ်သည်။

ဟန်ဖီးယူသည် လူအများထင်ထားသည့်အတိုင်း အလျှင်အမြန်ရှုံးနိမ့်ကြောင်း ဝန်ခံမည့်အစား ချီဂူးယွမ်နှင့် တပြိုင်နက်တည်း စင်မြင့်ပေါ်သို့ တက်လာသည်။

“မင်းက အတော်လေးသန်မာတယ်... ဒါပေမဲ့ ငါ့ကို အနိုင်ယူဖို့ဆိုတာ ဒီလောက်လွယ်ကူမှာ မဟုတ်ဘူး...”

ဟန်ဖီးယူသည် ချီဂူးယွမ်ကို ကြည့်ရင်း မျက်နှာထားတင်းမာစွာ ပြောလိုက်သည်။

“ဓားတစ်ချက်...”

ချီဂူးယွမ်သည် ခါးတွင်ချိတ်ထားသော ဓားကို ဆွဲထုတ်လိုက်ရင်း အေးစက်ပြီး ဟိန်းဟောက်သောလေသံဖြင့် ပြောလိုက်သည်။

ပုံမှန်အခါဆိုလျှင် သူသည် အနည်းငယ်ဆော့ကစားလိုစိတ်ရှိသေးသော်လည်း ယခုအခါတွင် ရင်ထဲမှ ပြည့်နှက်နေသော ဒေါသမီးလျှံကို လွှတ်ထုတ်လိုရုံသာ စိတ်အားထက်သန်နေသည်။

“ဓားတစ်ချက်...”

ဟန်ဖီးယူ၏ မျက်နှာထားသည် အနည်းငယ်မည်းမှောင်သွားသည်။

သူသည် လက်ရှိ အပြင်စည်းတပည့်တစ်ဆယ်ဦးထဲမှ တစ်ဦးဖြစ်ပြီး ထိပ်သီးတပည့်ဖြစ်သည့် ချီဂူးယွမ်က ဤမျှအထင်သေးပြီး မထီမဲ့မြင်ပြုခြင်းခံရသည်မှာ လက်ခံနိုင်စရာမရှိပေ။

“မင်းရဲ့ ဓားတစ်ချက်နဲ့ ငါ့ကို ဘယ်လိုအနိုင်ယူမလဲဆိုတာ ကြည့်ရအောင်...”

အေးစက်စွာ အော်ဟစ်လိုက်ရင်း ဟန်ဖီးယူသည် သူ၏သိုင်းဝိညာဉ်ကို လွှတ်ထုတ်လိုက်သည်။ ကြယ်ခုနှစ်ပွင့်ဖြင့် တောက်ပလျက်ရှိသော ထူးဆန်းသည့် အပြာရောင်ငှက်ကြီးတစ်ကောင်သည် လေထဲတွင် ပျံဝဲလျက် သူ၏အရှိန်အဟုန်ကို တစ်ဆင့်ပြီးတစ်ဆင့် မြင့်တက်စေသည်။

“ဓားရေတံခွန်...”

ချီဂူးယွမ်သည် အချိန်ဖြုန်းလိုစိတ်မရှိသဖြင့် အကြည့်တစ်ချက်ဖြင့် ဓားကို အားပြင်းစွာ လှမ်းခုတ်လိုက်သည်။

“ဘုန်း...”

ဓားတစ်ချက်အောက်တွင် ငြိမ်သက်နေသော လေထုသည် ရုတ်တရက် လှုပ်ခတ်သွားပြီး အဆုံးစွန်ထိ ဆွဲဆုတ်ခံလိုက်ရသည်။ စင်မြင့်တစ်ခုလုံးတွင် ဓားလှိုင်းများဟိန်းဟောက်ကာ ဓားစွမ်းအင်များ ပြည့်နှက်ဖြစ်ပေါ်လာသည်။

ဟန်ဖီးယူ၏ မျက်နှာထားသည် ချက်ချင်းပြောင်းလဲသွားသည်။ ဤဓားချက်သည် ဓားတောင်တစ်လုံးကဲ့သို့ ဖိအားပေးလာသည်ဟု ခံစားရသည်။ ထွက်ပြေးရန်လည်း မဖြစ်နိုင်၊ ခုခံရန်လည်း မဖြစ်နိုင်ပေ။

“ရေလှိုင်းလုံးဖုံးအုပ်လက်ဖဝါး...”

ဒေါသတကြီး အော်ဟစ်လိုက်ရင်း ဟန်ဖီးယူသည် လက်ဖဝါးနှစ်ဖက်ကို ထုတ်သုံးလိုက်သည်။ လက်ဖဝါးအရှိန်သည် လှိုင်းလုံးကြီးများကဲ့သို့ ဖုံးအုပ်လာပြီး ပတ်ဝန်းကျင်ရှိ စင်မြင့်ကို တစွန်းတစ ပြိုကွဲစေသည်။

“ဘုန်း...”

လှိုင်းလုံးကြီးနှင့် ဓားစွမ်းအင်တို့သည် ချက်ချင်းထိတွေ့တိုက်မိသွားသည်။

လူအုပ်ကြီး၏ အာရုံစူးစိုက်မှုအောက်တွင် လက်ဖဝါးအရှိန်သည် ချက်ချင်းဆွဲဆုတ်ခံလိုက်ရပြီး ဟန်ဖီးယူသည် စင်မြင့်ပေါ်မှ လွင့်ထွက်သွားကာ နှုတ်ခမ်းထောင့်မှ သွေးစီးကျလာသည်။ သူ၏ ဘယ်ဘက်လက်မောင်းတွင် ရှည်လျားသော ဓားရာတစ်ခုထင်ရှားနေသည်။

“ဟမ်း...”

ချီဂူးယွမ်သည် ဟန်ဖီးယူကို တစ်ချက်ကြည့်လိုက်ပြီး အကြည့်တစ်ချက်ဖြင့် လော့ချန်ကို အေးစက်စွာ လှမ်းကြည့်ကာ နှာခေါင်းထဲမှ အေးစက်စွာ ဟွှမ့်ခနဲ အသံထွက်ပြီး စင်မြင့်မှ ထွက်ခွာသွားသည်။

“အရမ်းသန်မာတယ်... ဓားတစ်ချက်နဲ့ ဟန်ဖီးယူကို အနိုင်ယူလိုက်တယ်...”

“အပြင်စည်းတပည့် ထိပ်သီးတစ်ဆယ်ဦးဆိုတာ အမှန်ပဲ... အပြင်စည်းတပည့် တစ်ဆယ်ဦးထဲက တစ်ဦးဖြစ်တဲ့ ဟန်ဖီးယူကို ဓားတစ်ချက်နဲ့ အနိုင်ယူလိုက်တယ်...”

“ဒီလိုဆိုရင် လော့ချန်က ချီဂူးယွမ်ကို ရင်ဆိုင်ရင်း အနိုင်ရဖို့ လုံးဝမဖြစ်နိုင်ဘူး... ကြက်ဥနဲ့ ကျောက်ခဲကိုပေါက်နေသလိုပဲ...”

ချီဂူးယွမ်သည် ဓားတစ်ချက်ဖြင့် ဟန်ဖီးယူကို အနိုင်ယူလိုက်သည်ကို မြင်တွေ့ရသောအခါ လူအုပ်ကြီးသည် အံ့အားသင့်သွားသည်။

အပြင်စည်းတပည့်တစ်ဆယ်ဦးထဲမှ တစ်ဦးစီသည် လူငယ်မျိုးဆက်တွင် ထူးချွန်သူများဖြစ်ပြီး အခြားအပြင်စည်းတပည့်များထက် သာလွန်သော စွမ်းအားရှိသည်။ ထိုသို့သော တပည့်တစ်ဦးကို ဓားတစ်ချက်ဖြင့် အနိုင်ယူနိုင်သည့်စွမ်းအားသည် စိတ်ကူးဖြင့်ပင် မထင်မှတ်နိုင်ပေ။

ပရိသတ်ထိုင်ခုံများပေါ်တွင် အဋ္ဌမမင်းသား ကျင်းမင်၏ အေးစက်နေသော မျက်နှာပေါ်တွင် ရှားရှားပါးပါး အပြုံးတစ်ခုပေါ်ထွက်လာသည်။

“ဒီကောင်က အရမ်းသန်မာတယ်...”

ချန်လင်းယူသည် ချီဂူးယွမ်၏ ကျောပေးပုံကို ကြည့်ရင်း မျက်ခုံးများ တွန့်ကွေးသွားကာ စိုးရိမ်မှုဖြည့်နှက်နေသော လေသံဖြင့် ပြောလိုက်သည်။

အခန်း (၂၉၇) ပြီးပါပြီ။