အခန်း (၅၁၃-၅၁၄)

အခန်း (၅၁၃) ဗီဇပြောင်းလဲခြင်း ဘေးအန္တရာယ်၏ အမှန်တရား

ဘန်းနက်၏ မျက်လုံးများ အရောင်လက်သွားပြီး အတိုင်းမသိ ဝမ်းသာသွားသည်။

"ဒါပေမဲ့ အချိန်ယူရလိမ့်မယ်၊ ပြီးတော့ ကျွန်တော် တခြားသူတွေကို ဖိတ်ခေါ်ဖို့ လိုတယ်။ ကျွန်တော်တို့ ဖြည်းဖြည်းချင်းပဲ လုပ်လို့ရမယ်" ဟန်ရှောင်းက ပြောသည်။ "ကျွန်တော် ဒီဗိုင်းရပ်စ်ရဲ့ အမှန်တရားနဲ့ သူ့ရဲ့ သီအိုရီကို စုံစမ်းစစ်ဆေးခဲ့ပြီးပြီ။"

"ခင်ဗျားတို့က ဒါကို ဗိုင်းရပ်စ်လို့ ခေါ်ပေမယ့်၊ သူ့ရဲ့ တရားဝင်နာမည်က သန္ဓေပြောင်းလဲခြင်း အရင်းအမြစ်ပဲ။ ဒါက အထူး ဇီဝလက်နက်တစ်ခုဖြစ်ပြီး အရမ်းရှားပါးတယ်။ ‌ရေပင်လယ်ဂြိုလ်ပေါ် ရောက်နေရတဲ့ အကြောင်းရင်းက တစ်စုံတစ်ယောက်က ဒီ သန္ဓေပြောင်းလဲခြင်း အရင်းအမြစ်ကို ဂြိုလ်ပေါ်မှာ တမင်တကာ လာချထားခဲ့လို့ပဲ။"

ထိုစကားများ ပြောလိုက်သည်နှင့် ဘန်းနက် လန့်ဖျပ်သွားသည်။

ဗီဇပြောင်းလဲခြင်း ဘေးအန္တရာယ်က တကယ်တော့ လူတွေ ဖန်တီးခဲ့တာလား။

ဒါက မယုံနိုင်စရာပဲ။

ဘယ်လိုအဖွဲ့အစည်းမျိုးက ‌ရေပင်လယ်ဂြိုလ်ကို ဒီလိုမျိုး လုပ်ချင်ရတာလဲ။ ဒီလိုအင်အားမျိုးနဲ့ဆိုရင်၊ သူတို့ဟာ ဂလက်ဆီထဲမှာ အင်အားကြီးတဲ့ အဖွဲ့အစည်းတစ်ခု ဖြစ်ရမယ်၊ ပြီးတော့ ‌ရေပင်လယ်ဂြိုလ်က သူတို့အတွက် ခေတ်နောက်ကျကျန်နေတဲ့ ဂြိုလ်တစ်ခုထက် မပိုဘူး။ ဘာလို့ သူတို့က ဒီလို ဇီဝလက်နက်မျိုးကို ဂြိုလ်ပေါ်မှာ လာချထားရတာလဲ။

"ခင်ဗျားတို့ရဲ့ သံသယတွေအားလုံးကို ကျွန်တော်သိတယ်၊ အဲဒီနောက်ကွယ်က အကြောင်းပြချက်က တော်တော် ရှုပ်ထွေးတယ်။ အကြောင်းပြချက်ကို စကားနည်းနည်းနဲ့ ရှင်းပြဖို့ မဖြစ်နိုင်ဘူး။ ခင်ဗျားတို့ သိထားဖို့ လိုတာက ‌ရေပင်လယ်ဂြိုလ်ဟာ ဂလက်ဆီ အဖွဲ့အစည်းနှစ်ခုရဲ့ တိုက်ပွဲကြားမှာ အပြစ်မဲ့ နယ်ရုပ်တစ်ခု ဖြစ်လာခဲ့တယ် ဆိုတာပါပဲ။"

ထို့နောက် ဟန်ရှောင်းသည် ခဏတာ ရပ်တန့်လိုက်ပြီး ဘန်းနက်နှင့် အခြားရှိနေသူများကို ထိုအချက်အလက်ကို အပြည့်အဝ နားလည် သဘောပေါက်စေရန် အချိန်ပေးပြီးမှ ဆက်ပြောသည်။

"မျိုးဗီဇပြောင်း ဗိုင်းရပ်စ် ပေါ်လာတာက ခင်ဗျားတို့အားလုံးကို သန္ဓေပြောင်းလဲခြင်း အရင်းအမြစ်က လူတွေရဲ့ စိတ်ထဲမှာ အလုပ်လုပ်တယ်လို့ ယုံကြည်သွားစေတာ ကျွန်တော်သိတယ်။ ခင်ဗျားတို့အားလုံး လုံးဝမှားနေတယ်။ သန္ဓေပြောင်းလဲခြင်း အရင်းအမြစ်က သာမန်ဗိုင်းရပ်စ် မဟုတ်ဘူး၊ သူ့မှာ အသိစိတ်ရှိတယ်။ သူ့ကို အထူးသက်ရှိပုံစံတစ်ခုလို့တောင် မှတ်ယူလို့ရတယ်။ သူ့ရဲ့ စွမ်းရည်က တစ်ခုတည်းပဲ၊ အဏုဇီဝသက်ရှိတွေကို လွှမ်းမိုးနိုင်တယ်။”

"အဏုဇီဝသက်ရှိတွေ ဟုတ်လား။" ဘန်းနက် ခဏတာ ကြောင်သွားသည်။ ဟန်ရှောင်း၏ မျိုးဗီဇပြောင်း ဗိုင်းရပ်စ်အပေါ် ရှင်းပြချက်သည် သူ၏ မျှော်လင့်ချက်များထက် အမှန်တကယ် ကျော်လွန်နေသည်။ ကူးစက်ခံရသူအားလုံးသည် သူတို့၏ စရိုက်နှင့် လုပ်ဆောင်ချက်များတွင် ပြောင်းလဲမှုကို ပြသခဲ့ကြသော်လည်း၊ ၎င်းသည် အမှန်တကယ်တွင် သူတို့၏ စိတ်များနှင့် မသက်ဆိုင်ဘူးလား။

ဟန်ရှောင်းသည် ခဏတာ စဉ်းစားပြီးမှ မေးလိုက်သည်၊ "ဦးလေး ဗိုက်ဆာတဲ့အခါ၊ အဲဒါက ဦးလေးက စားချင်တာလား၊ ဒါမှမဟုတ် ဦးလေးရဲ့ ခန္ဓာကိုယ်က စားချင်တာလား။"

"ဒါက ငါ့ခန္ဓာကိုယ်က ဖြစ်သင့်တယ်။ ဗိုက်မဆာရင် ငါ ဘာလို့ စားမှာလဲ။" ထို့နောက် ဘန်းနက်သည် ခဏတာ ကြောင်သွားပြီး တစ်စုံတစ်ခုကို နားလည်သွားပုံရသည်။

"အဲဒီသဘောတရားပဲ။ မကြာခဏဆိုသလို၊ ဦးလေးရဲ့ အတွေးတွေရဲ့ အရင်းအမြစ်က အမှန်တော့ ဦးလေးရဲ့ ခန္ဓာကိုယ် လိုအပ်ချက်တွေပဲ၊ ဦးလေးလိုချင်တာ မဟုတ်ဘူး။ ဒါက ဦးလေးရဲ့ ခန္ဓာကိုယ်ထဲက အဏုဇီဝသက်ရှိတွေက သူတို့ ဘာလိုချင်လဲဆိုတာကို ဦးလေးကို ပြောပြနေတာ။ ဦးလေးရဲ့ ခန္ဓာကိုယ်ထဲက အဏုဇီဝသက်ရှိတွေက ဟော်မုန်းတွေ ထုတ်လွှတ်ဖို့ လုပ်ဆောင်ချက်တစ်ချို့ကို လုပ်ဆောင်ပြီး၊ ဦးနှောက်က အချက်ပြမှုကို လက်ခံရရှိတယ်။ စားချင်စိတ်၊ အသက်ရှူချင်စိတ်နဲ့ တခြား အခြေခံဆန္ဒတွေအားလုံးက ဒီကနေ လာတာပဲ။"

"ဦးလေးအနေနဲ့ ဦးလေးရဲ့ အတွေးတွေက ဦးလေးရဲ့ ခန္ဓာကိုယ်ကို ထိန်းချုပ်နေတယ်လို့ ထင်ပေမယ့်၊ အကြိမ်ပေါင်းများစွာမှာတော့၊ ဦးလေးရဲ့ အတွေးတွေကို ထိန်းချုပ်နေတာက ဦးလေးရဲ့ ခန္ဓာကိုယ်ထဲက အဏုဇီဝသက်ရှိတွေပဲ။"

"ကျွန်တော်တို့ ခန္ဓာကိုယ်ထဲမှာ ဖြစ်ပျက်နေတဲ့ ဇီဝကမ္မဆိုင်ရာ ပဋိပက္ခများစွာဟာ ကျွန်တော်တို့ ခန္ဓာကိုယ်ထဲက အဏုဇီဝသက်ရှိတွေနဲ့ ဘက်တီးရီးယားတွေရဲ့ လိုအပ်ချက်တွေကြားက ပဋိပက္ခကြောင့်ပဲ။ လူတစ်ယောက်ရဲ့ ခန္ဓာကိုယ် ကျန်းမာရေးကလည်း ကျွန်တော်တို့ ခန္ဓာကိုယ်ထဲက ဘက်တီးရီးယားတွေရဲ့ တုံ့ပြန်မှုအပေါ် မူတည်နေတယ်။ သူတို့ အဆင်ပြေနေရင်၊ ကျွန်တော်တို့ရဲ့ ခန္ဓာကိုယ်တွေကလည်း အဆင်ပြေနေလိမ့်မယ်။ ဒါပေမဲ့၊ အဏုဇီဝသက်ရှိတွေမှာ ဘာအသိစိတ်မှ မရှိဘူး။ ကျွန်တော်တို့ရဲ့ လုပ်ဆောင်ချက်တွေကလည်း အဏုဇီဝသက်ရှိတွေကို လွှမ်းမိုးလိမ့်မယ်။ ကျွန်တော်တို့က ကျွန်တော်တို့ ခန္ဓာကိုယ်ရဲ့ ဆန္ဒတွေကို ဖိနှိပ်ဖို့ ရွေးချယ်နိုင်ပြီး အဆုံးမှာတော့ ကျန်းမာရေးမကောင်း ဖြစ်သွားလိမ့်မယ်။ ကျွန်တော်တို့က သီးခြားလူတစ်ယောက်လို ထင်ရပေမယ့်၊ ကျွန်တော်တို့က အမှန်တကယ်တော့ ပြီးပြည့်စုံတဲ့ စနစ်တစ်ခုပဲ။"

"သန္ဓေပြောင်းလဲခြင်း အရင်းအမြစ်က ကျွန်တော်တို့ ခန္ဓာကိုယ်ထဲက အဏုဇီဝသက်ရှိတွေကို ထိန်းချုပ်တယ်၊ ဒီလိုနဲ့ ကျွန်တော်တို့ရဲ့ အခြေခံဆန္ဒတွေကို ထိန်းချုပ်တာပဲ။ ဒါက ကျွန်တော်တို့ ဦးနှောက်ကို ပြင်းထန်တဲ့ လှုံ့ဆော်မှုတစ်ခု ပေးဖို့ ပုံမှန်ထက် အဆပေါင်း ဒါဇင်နဲ့ချီတဲ့ အင်ဇိုင်းပမာဏကို ထုတ်လွှတ်တယ်။ ဒါက ကျွန်တော်တို့ရဲ့ အတွေးတွေနဲ့ လုံးဝမသက်ဆိုင်သလို၊ ကျွန်တော်တို့ရဲ့ အတွေးတွေကိုလည်း ထိန်းချုပ်နိုင်စွမ်း မရှိဘူး။ ဒါပေမဲ့၊ ဒါက ဖျက်ဆီးလိုစိတ်၊ လိင်ပိုင်းဆိုင်ရာ ဆန္ဒ၊ ဆာလောင်မှု၊ ဝမ်းနည်းပူဆွေးမှုနဲ့ တခြား စိတ်ခံစားမှုများစွာကို အသုံးပြုပြီး ကျွန်တော်တို့ရဲ့ အတွေးတွေကို ညွှန်ကြားတယ်၊ အကျင့်စရိုက်ပိုင်းမှာ ကြီးမားတဲ့ ပြောင်းလဲမှုတစ်ခု ဖြစ်စေပြီးတော့ ဇီဝဗေဒအဆင့်မှာ ကျွန်တော်တို့ကို လွှမ်းမိုးနိုင်တယ်။ ဗိုင်းရပ်စ် ပေါက်ကွဲထွက်နေချိန်အတွင်းမှာတောင် ခင်ဗျားတို့က ခင်ဗျားရဲ့ သာမန်အတိုင်းပဲ ဖြစ်နေသေးလို့ ဒီအတွေးတွေက ကိုယ့်ဆီက လာတာလို့တောင် အဆုံးသတ်မှာ ထင်သွားနိုင်တယ်။"

"ကူးစက်ခံရသူဆီကနေ ဗိုင်းရပ်စ်ကို ရှာမတွေ့နိုင်ရတဲ့ အကြောင်းရင်းက ဗိုင်းရပ်စ်က မရှိလို့ပဲ။ 'ဗိုင်းရပ်စ်' လို့ ခေါ်နေတာက လူတစ်ယောက် အသက်ရှင်သန်ဖို့အတွက် မရှိမဖြစ် လိုအပ်တဲ့ အဏုဇီဝသက်ရှိတွေပဲ။"

ဟန်ရှောင်းသည် သန္ဓေပြောင်းလဲခြင်း အရင်းအမြစ်ကို နားလည်သည်။ ဘာပဲဖြစ်ဖြစ်၊ သူက သူ့ယခင်ဘဝမှာ ဒီမစ်ရှင်ကို ဖြတ်သန်းခဲ့ဖူးပြီး ဒီအဖြစ်အပျက်အပေါ် နက်နက်ရှိုင်းရှိုင်း စွဲမှတ်ထားခဲ့သည်။ သူ၏ လက်ရှိအဆင့်တွင်၊ သူ၏ အသိစိတ်သည် သီးခြား လွတ်လပ်စွာ တည်ရှိနေနိုင်ပြီဖြစ်သော်လည်း၊ သူ၏ အသိစိတ်ကို ထိန်းချုပ်ရန် အသုံးပြုသော အင်္ဂါအစိတ်အပိုင်းများကတော့ သက်ရောက်မှု ရှိနေဦးမည် ဖြစ်သည်။ သူက သန္ဓေပြောင်းလဲခြင်း အရင်းအမြစ်ကို ခုခံကာကွယ်ချင်တယ်ဆိုရင် ဘယ်လိုလုပ်ရမလဲ။ အလွန်ရိုးရှင်းသည်။ သူက သူ၏ အသိစိတ်ကို စက်တစ်ခုထဲသို့ လွှဲပြောင်းပြီး သူ၏ ခန္ဓာကိုယ်နှင့် အာရုံခံစားမှုများကို စွန့်လွှတ်လိုက်ရုံသာ ဖြစ်သည်။ သူ၏ အသိစိတ်ကို ခွဲထုတ်ပြီး စက်တစ်လုံး၏ ဦးနှောက်ထဲတွင် နေထိုင်ခြင်းဖြင့်၊ ထိုစက်သည် သန္ဓေပြောင်းလဲခြင်း အရင်းအမြစ်၏ သက်ရောက်မှု ခံရရန် မဖြစ်နိုင်တော့ပေ။

ဟီလာအပါအဝင်၊ ‌ရေပင်လယ်ဂြိုလ်မှ လူများသည် တုန်လှုပ်သွားကြသည်။

"ဒါဆို၊ ဒါက မျိုးဗီဇပြောင်း ဗိုင်းရပ်စ်ရဲ့ နောက်ကွယ်က သီအိုရီပဲပေါ့၊" ရီရယ့်ချင်းက တီးတိုးရေရွတ်လိုက်သည်။ "ဒါနဲ့၊ 'ရုတ်ဒ်စ် ယပ်တောင်ရွက်' က ဘာထူးခြားလို့လဲ။ ဘာလို့ ဒါက မျိုးဗီဇပြောင်း ဗိုင်းရပ်စ်ကို ခုခံကာကွယ်နိုင်ရတာလဲ။"

ဟန်ရှောင်း လက်ဖျောက်တစ်ချက်တီးပြီး ဗော်ဂါ ညီအစ်ကိုများကို လှမ်းခေါ်လိုက်သည်။ "သူတို့ကို အဲ့ဒီအရွက်ရဲ့ ဓာတ်ပုံတစ်ပုံ ပြလိုက်ပါ။"

ရီရယ့်ချင်းက ဓာတ်ပုံတစ်ပုံကို ဖွင့်ပြလိုက်ပြီး၊ ၎င်းကို တစ်ချက်ကြည့်ပြီးနောက်၊ ဗော်ဂါ ညီအစ်ကိုများထဲမှ အကြီးဆုံးက တည်ငြိမ်သော လေသံဖြင့် ပြန်ဖြေလိုက်သည်၊ "ဒါက ' စိတ်ကြည်မြက်' မဟုတ်ဘူးလား။ ဒါက 'အာရုံစူးစိုက်ဆေးလုံး' အတွက် ကုန်ကြမ်းတစ်ခုပဲ။"

ရီရယ့်ချင်းကြောင်သွားသည်။ "သူ ဘာကို ဆိုလိုတာလဲ။"

"သူ ဆိုလိုတာက၊ ဒီ 'ရုတ်ဒ်စ် ယပ်တောင်ရွက်' က မှော်ဆရာတွေ အသုံးပြုတဲ့ ပါဝင်ပစ္စည်းတစ်ခုပဲ။ 'အာရုံစူးစိုက်ဆေးလုံး' ရဲ့ အာနိသင်က မှော်ဆရာ တစ်ယောက်ကို အလွန်အမင်း တည်ငြိမ်အေးချမ်းတဲ့ အထူးအခြေအနေတစ်ခုထဲ ဝင်ရောက်စေတယ်။ သူတို့ရဲ့ စိတ်ခံစားမှုအားလုံးကို ဖိနှိပ်ထားပြီး၊ စိတ်ခံစားမှုနဲ့ ပတ်သက်တဲ့ ဦးနှောက်ရဲ့ အစိတ်အပိုင်းအမျိုးမျိုးကို ယာယီ ဖြတ်တောက်ထားလိုက်တယ်။ ဒါက သူ့ရဲ့ ခုခံကာကွယ်နိုင်စွမ်းရဲ့ အကြောင်းရင်းပဲ။ မျိုးဗီဇပြောင်း ဗိုင်းရပ်စ်က ဟော်မုန်းတွေ ဘယ်လိုပဲ ပို့လွှတ်ဖို့ ကြိုးစားပါစေ၊ ဦးနှောက်က ဘာဆန္ဒမှ ခံစားရမှာ မဟုတ်ဘူး။ အဲ့ဒါက မင်းတို့ရဲ့ ဖိနှိပ်ဆေး နောက်ကွယ်က သီအိုရီပဲ။"

လူတိုင်း ချက်ချင်းပင် သဘောပေါက်သွားကြသည်။ ခဏအကြာတွင်၊ အော်ရိုရာက ရုတ်တရက် ထူးဆန်းသော လေသံဖြင့် မေးလိုက်သည်၊ "ဒီကမ္ဘာပေါ်မှာ မှော်ပညာက တကယ် ရှိတာလား။"

ဟန်ရှောင်းသည် ကူကယ်ရာမဲ့သော မျက်နှာအပြည့် ဖြစ်သွားသော်လည်း မျက်လုံးလှန်မပစ်ချင်တော့ပေ။ ဤအရာသည် ဂလက်ဆီထဲတွင် အလွန်သာမန်ဖြစ်သော သတင်းအချက်အလက်တစ်ခုဟု သတ်မှတ်ထားသည်။ နည်းပညာ လူမှုအဖွဲ့အစည်းတစ်ခု၏ အရာသစ်များကို လက်ခံနိုင်စွမ်းသည် အမှန်တကယ် အားနည်းလှသည်။ သူတို့၏ ကမ္ဘာကြီးအပေါ် ရှုမြင်ပုံသည် အလွန်ကျဉ်းမြောင်းလှပြီး၊ သူတို့၏ အမြင်များကို အမှန်တကယ် ချဲ့ထွင်ရန် လိုအပ်နေသည်။

ခဏတာ ရပ်တန့်ပြီးနောက်၊ ဟန်ရှောင်း သူ၏ ရှင်းပြချက်ကို ဆက်လက်ပြောကြားသည်။

"အမှန်တော့၊ သန္ဓေပြောင်းလဲခြင်း အရင်းအမြစ်က ပျံ့နှံ့မှာ မဟုတ်ဘူး။ သူ့မှာ ပင်မခန္ဓာကိုယ်တစ်ခု ရှိပြီး ဂြိုလ်ပေါ်က ဘယ်နေရာမှာမဆို ပုန်းအောင်းနေနိုင်တယ်။ ပင်မခန္ဓာကိုယ်ကို အဓိကထားပြီး၊ သူ့ရဲ့ အသိစိတ်က ကြီးမားတဲ့ ဒေသတစ်ခုကို လွှမ်းခြုံထားနိုင်လိမ့်မယ်။ ဒီဒေသထဲမှာ၊ သူက ဘယ်လို သက်ရှိပုံစံမျိုးကိုမဆို ထောက်လှမ်းနိုင်ပြီး သူတို့ရဲ့ အဏုဇီဝသက်ရှိတွေကို ထိန်းချုပ်နိုင်တယ်။ ဒါက ကျယ်ပြန့်တဲ့ အကွာအဝေးတစ်ခုကို သက်ရောက်နိုင်တဲ့ အက်စ်ပါ စွမ်းရည်တစ်ခုလိုပါပဲ။ ကုန်းမြေပေါ်က သက်ရှိတွေအပြင်၊ သမုဒ္ဒရာထဲက သက်ရှိတွေတောင်မှ သူ့ရဲ့ ထိန်းချုပ်မှုအောက် ရောက်သွားလိမ့်မယ်။ နောက်ပြီး၊ စူပါတွေက သူ့ရဲ့ ထိန်းချုပ်မှုကို ခံနိုင်ရည်ရှိပြီး အလွယ်တကူ သက်ရောက်မှု မခံရဘူး။ ဒါပေမဲ့၊ သန္ဓေပြောင်းလဲခြင်း အရင်းအမြစ် ကြီးထွားလာတာနဲ့အမျှ သူ့ရဲ့ လွှမ်းခြုံနိုင်စွမ်းနဲ့ ထိန်းချုပ်နိုင်စွမ်းက တိုးလာလိမ့်မယ်။"

"သန္ဓေပြောင်းလဲခြင်း အရင်းအမြစ်ရဲ့ ထိန်းချုပ်မှုဒေသက အမှန်တကယ်တော့ သက်ရှိစနစ် အသစ်တစ်ခုပဲ။ ထိန်းချုပ်မှုဒေသတစ်ခုလုံးက ကြီးမားတဲ့ ခန္ဓာကိုယ်ကြီးတစ်ခုလိုပဲ။"

"ပထမဆုံး ဗိုင်းရပ်စ် ပေါက်ကွဲထွက်ခဲ့တာကနေ အခုထိ တစ်လလောက်ပဲ ရှိသေးတယ်။ သန္ဓေပြောင်းလဲခြင်း အရင်းအမြစ်က သူ့ရဲ့ မွေးကင်းစအဆင့်ကနေ လမ်းလျှောက်စ ကလေးအဆင့်ကိုပဲ ဝင်ရောက်လာသေးတယ်။ ကမ္ဘာတစ်ခုလုံးမှာ ဖြစ်နေတဲ့ ရှုပ်ထွေးနေတဲ့ အကြမ်းဖက်မှုတွေက ဘာရည်ရွယ်ချက်၊ ဘာလှုံ့ဆော်မှုမှ မရှိဘဲ သူ့ရဲ့ မသိစိတ်က လုပ်ဆောင်နေတာတစ်ခုပဲ။ သူ ကြီးပြင်းရင့်ကျက်လာတဲ့အခါ၊ သူက ပိုပြီး ဉာဏ်ရည်ထက်မြက်လာလိမ့်မယ်၊ ပြီးတော့ သူ့ရဲ့ လုပ်ဆောင်ချက်တွေက တဖြည်းဖြည်း ရည်ရွယ်ချက်ရှိလာလိမ့်မယ်။ အဲ့ဒါကမှ တကယ့် ကပ်ဘေးအစစ်ဖြစ်လာမှာ၊ ပြီးတော့ ကျွန်တော်လည်း ကူကယ်ရာမဲ့ ဖြစ်သွားလိမ့်မယ်။ ဒါကြောင့် အချိန်က ကျပ်တည်းနေပြီ။"

ဟန်ရှောင်း နောက်ထပ် စကားတစ်ခွန်းမှ မပြောတော့ပေ။ ထိုစကားများသည် ပြဿနာ၏ ကြီးလေးမှုကို လူတိုင်း နားလည်စေရန် လုံလောက်နေပြီဖြစ်သည်။ ဘန်းနက်၏ အမူအရာသည် တင်းမာသွားပြီး၊ သူက လေးနက်သော လေသံဖြင့် ပြောလိုက်သည်၊ "ဒါဆို ငါတို့ ဘာလုပ်သင့်လဲ... မဟုတ်ဘူး၊ မင်း ဘာလုပ်ဖို့ စီစဉ်ထားလဲ။"

သူ့ကိုယ်ပိုင် အဖွဲ့အစည်းဖြင့် ပြဿနာကို ဖြေရှင်းနိုင်မည် မဟုတ်ကြောင်း သူသိပြီး၊ တစ်ခုတည်းသော ရွေးချယ်မှုမှာ သူ၏ မျှော်လင့်ချက်များကို အနက်ရောင်တစ္ဆေ ... အာ၊ သူ့ကို အခု ဘလက်စတား လို့ ခေါ်သင့်ပြီ၊ သူ့အပေါ်တွင် ထားရှိရန်သာ ဖြစ်သည်။

"ကျွန်တော့်မှာ ကိုယ်ပိုင်အစီအစဉ်တွေ ရှိပါတယ်။ ဒါပေမယ့် ကျွန်တော့်အစီအစဉ်ကို မစတင်ခင်၊ အရင်ဆုံး လုပ်ရမယ့် ကိစ္စတစ်ခု ရှိတယ်။ ကျွန်တော် အရင်ဆုံး ကျွန်တော့် လက်အောက်ငယ်သားတွေကို ဖိနှိပ်ဆေးရဲ့ ကုန်ကြမ်းတွေ စိုက်ပျိုးတဲ့ နေရာကို ခေါ်သွားမယ်။ ကျွန်တော့်လက်အောက်က မှော်ဆရာတွေကို ခင်ဗျားတို့အားလုံး နေရာမှာ အစားထိုးပြီး ကုန်ကြမ်းတွေ စိုက်ပျိုးခိုင်းလိုက်ပါ။ သူတို့က အထွက်နှုန်းကို အများကြီး တိုးမြှင့်ပေးနိုင်လိမ့်မယ်။" ဟန်ရှောင်း ပြုံးလိုက်သည်။ "ငါတို့ မေ့လဲသွားအောင် လုပ်ထားတဲ့ ဒုက္ခသည်တွေကိုလည်း ဖြေရှင်းဖို့ လိုသေးတယ်။ ဒါ့အပြင်၊ အနာဂတ်မှာ နောက်ထပ် လာဦးမယ့်သူတွေ ရှိနိုင်သေးတယ်။ ကျွန်တော် ဦးလေးကို နားလည်တယ်၊ ဦးလေးက သူတို့ကို လျစ်လျူရှုဖို့ မဖြစ်နိုင်ဘူးဆိုတာ ကျွန်တော် သိတယ်။"

"မင်း ငါ့ကို နားလည်လိမ့်မယ်လို့ ငါသိပြီးသားပါ။ ငါတို့က အမျိုးအစားတူတွေပဲ မဟုတ်လား။" ဘန်းနက် ပြုံးလိုက်ပြီး သူ၏ နှလုံးသားပေါ်မှ လေးလံသော ကျောက်တုံးကြီးတစ်ခုကို ပစ်ချလိုက်သလို ခံစားလိုက်ရသည်။ သူတို့နှစ်ဦးကြားမှ ရင်းနှီးနေသော နားလည်မှု ခံစားချက်သည် ပြန်လည်ရောက်ရှိလာခဲ့သည်။

တစ်ဖက်တွင်၊ ဟန်ရှောင်းသည် ခိုလှုံရေးစခန်း အတွင်းရှိ လူများကို ဗီဇပြောင်းလဲခြင်း ဘေးအန္တရာယ် အကြောင်း ရှင်းပြနေစဉ်၊ သူ၏ ပြန်လာခြင်းကို နိုင်ငံ၆နိုင်ငံ၏ ဂြိုလ်တုများမှ ထောက်လှမ်းမိခဲ့သည်။ သူ၏ ပြန်လာခြင်း ပုံရိပ်များအားလုံးကို ဘာတစ်ခုမှ မလွတ်ကျန်စေဘဲ ပြန်လည် ပေးပို့ခဲ့သည်။

နိုင်ငံ၆နိုင်ငံ၏ အထက်ပိုင်း အရာရှိကြီးများ တုန်လှုပ်သွားကြသည်။

သူတို့ လုံးဝ တုန်လှုပ်သွားကြသည်။

စာစဉ် (၃၄)၊ အခန်း (၅၁၃) ပြီး၏။

လင်းဆက်

+++++

အခန်း (၅၁၄) ရိတ်သိမ်းချိန်

ဂျာမီနယ်အဖွဲ့အစည်း အဖြစ်အပျက်ကြောင့်၊ အနက်ရောင်တစ္ဆေနှင့် သက်ဆိုင်သော သတင်းအချက်အလက်များသည် အရေးကြီးအဆင့်ဖြစ်ခဲ့ပြီး၊ အမျိုးမျိုးသော ထောက်လှမ်းရေးအဖွဲ့အစည်းများရှိ လူတိုင်းသည် အနက်ရောင်တစ္ဆေကို မှတ်မိနေကြသည်။ ဂြိုလ်တုပုံရိပ်ကို ပထမဆုံး လက်ခံရရှိခဲ့သည့် ထောက်လှမ်းရေးအရာရှိသည် သူ အမြင်မှားနေသည်ဟုပင် ထင်မိလုနီးပါး ဖြစ်သွားသည်။ လွန်ခဲ့သော နှစ်နှစ်က ဂလက်ဆီသို့ ထွက်သွားခဲ့သော ဟန်ရှောင်းသည် ရုတ်တရက် ပြန်ရောက်လာသည်။ ထို့အပြင်၊ သူသည် ဤမျှ ထိတ်လန့်တုန်လှုပ်ဖွယ်ရာ ပုံစံဖြင့် ပြန်လည်ရောက်ရှိလာခဲ့သည်။ ဒါက ဘာတွေ ဖြစ်ကုန်တာလဲ။

နိုင်ငံ၆နိုင်ငံ၏ အင်အားထက်ဝက်ကျော်သည် ကပ်ဘေးကြောင့် လျော့နည်းသွားခဲ့သော်လည်း၊ သူတို့၏ ထောက်လှမ်းရေးကွန်ရက်များကို ဆက်လက်ထိန်းသိမ်းထားဆဲဖြစ်သည်။ သတင်းအချက်အလက်များကို လျင်မြန်စွာ ပေးပို့ခဲ့ပြီး၊ မကြာမီအချိန်တွင်၊ နိုင်ငံ၆နိုင်ငံ၏ အထက်ပိုင်းအရာရှိကြီးများ အစည်းအဝေးတွင် ပြီးပြည့်စုံသော မှတ်တမ်းတစ်ခုကို ဖွင့်ပြနေသည်။ ထိုမှတ်တမ်းကို ကြည့်ရှုပြီးနောက်၊ တက်ရောက်လာသော အထက်ပိုင်းအရာရှိကြီးများအားလုံးသည် တိတ်ဆိတ်ငြိမ်သက်နေပြီး နေရာတစ်ခုလုံးတွင် လေးလံသော လေထုတစ်ခု ကြီးစိုးနေသည်။

သူတို့သည် ဂိုဒိုရာသာလျှင် သူတို့ကို ကယ်တင်ရန် လာလိမ့်မည်ဟု အမြဲတမ်း ထင်မြင်ခဲ့ကြသည်။ သို့သော်၊ ဟန်ရှောင်းသည် ယာဉ်တန်းတစ်စီးလုံးနှင့်အတူ ဘယ်ကမှန်းမသိ ရောက်ရှိလာသည်။ နိုင်ငံ၆နိုင်ငံက မည်သည့်ပြင်ဆင်မှုမှ မလုပ်ရသေးခင် ဟန်ရှောင်းက ပေါ်လာ၏။ နိုင်ငံ၆နိုင်ငံ၏ အထက်ပိုင်းအရာရှိကြီးများသည် အမှန်တကယ် ဘာစကားမှ မပြောနိုင်အောင် ဖြစ်သွားကြသည်။

"အနက်ရောင်တစ္ဆေ ပြန်လာပြီ၊ သူနဲ့အတူ ယာဉ်တန်းတစ်ခုလုံး ပါလာတယ်!"

လွန်ခဲ့သော နှစ်နှစ်က ဂလက်ဆီထဲသို့ ထွက်သွားပြီးနောက်၊ သူတို့သည် အနက်ရောင်တစ္ဆေနှင့် ပတ်သက်၍ ဘာသတင်းမှ မကြားခဲ့ရပေ။ သို့သော်၊ သူတို့သည် ဟန်ရှောင်း အသက်ရှင်နေသေးမည်ဟု ဘယ်တုန်းကမှ မတွေးခဲ့မိသလို၊ သူ့လက်ထဲတွင် ဤမျှ အံ့ဩဖွယ်ရာ အင်အားမျိုး ရှိနေလိမ့်မည်ဟုလည်း မထင်ထားခဲ့ပေ။ ဟန်ရှောင်း လက်အောက်ရှိ ကြေးစားစစ်သားများသည် နိုင်ငံ၆နိုင်ငံ၏ အထက်ပိုင်းအရာရှိကြီးများကို အမှန်တကယ် ထိတ်လန့်တုန်လှုပ်စေခဲ့သည်။ သူတို့၏ အကန့်အသတ်ရှိသော ကမ္ဘာအမြင်ဖြင့်၊ အနက်ရောင်တစ္ဆေ တစ်ချိန်က ပြသခဲ့သော အင်အားသည် ကမ္ဘာ၏ အထွတ်အထိပ်တွင် ရှိနေပြီဟု သူတို့ ခံစားခဲ့ရသည်။ သို့သော်၊ ဟန်ရှောင်းသည် ဂြိုလ်အပြင်ဘက်မှ ကျွမ်းကျင်သူ ရာပေါင်းများစွာကို ခေါ်ဆောင်လာပြီး 'အင်အား' ဟူသော စကားလုံးအပေါ် သူတို့၏ နားလည်သဘောပေါက်မှုကို နောက်တစ်ကြိမ် ပြောင်းလဲစေခဲ့မည်ဟု သူတို့ ဘယ်တုန်းကမှ မတွေးခဲ့မိပေ။ ထို့အပြင်၊ သူသည် သူနှင့်အတူ အာကာသယာဉ် ၁၀စီးထက်မနည်းပင် ခေါ်ဆောင်လာခဲ့သည်။

ဤအင်အားတစ်ခုတည်းဖြင့်ပင်၊ သူတို့၏ နိုင်ငံ၆နိုင်ငံလုံးကို အလွယ်တကူ ရှင်းလင်းပစ်ရန်မှာ လုံလောက်သည်ထက် ပိုနေသည်။

ထိုစဉ်က ဟန်ရှောင်း ဂလက်ဆီထဲသို့ ဝင်သွားချိန်တွင်၊ သူတို့သည် တစ်ခါ မှင်သက်မိခဲ့ပြီးသား ဖြစ်သည်။ နိုင်ငံ၆နိုင်ငံကလည်း ဂလက်ဆီထဲသို့ ဝင်ရောက်လိုသော်လည်း၊ ထိုသို့ပြုလုပ်ရန် သူတို့တွင် နည်းပညာ မရှိခဲ့ပေ။ သူတို့သည် အာကာသယာဉ်တစ်စီးကို မတည်ဆောက်နိုင်ခဲ့ဘဲ၊ ဂိုဒိုရာကလည်း ထိုသို့သော တောင်းဆိုမှုအားလုံးကို လျစ်လျူရှုခဲ့သည်။ ထို့ကြောင့်၊ သူတို့သည် အံကြိတ်ပြီး မနာလိုစွာ ကြည့်နေရုံသာ တတ်နိုင်ခဲ့သည်။

ဟန်ရှောင်း ဂလက်ဆီထဲတွင် ဘာလုပ်ခဲ့သည်ကို သူတို့ မသိကြပေ။ သို့သော်၊ နိုင်ငံ၆နိုင်ငံ၏ အထက်ပိုင်းအရာရှိကြီးများသည် အချက်တစ်ချက်ကိုမူ အလွန် ရှင်းရှင်းလင်းလင်း သိနေသည်။ အနက်ရောင်တစ္ဆေ၏ နယ်ပယ်သည် သူတို့ထက် များစွာကျော်လွန်သွားခဲ့ပြီ ဖြစ်သည်။

နိုင်ငံ၆နိုင်ငံသည် ဂျာမီနယ်အဖွဲ့အစည်းကို ဖျက်ဆီးရာတွင် သူ၏ ပံ့ပိုးကူညီမှုကြောင့် ယခင် အနက်ရောင်တစ္ဆေကို အလွန်အရေးထားခဲ့သော်လည်း၊ သူတို့သည် အနက်ရောင်တစ္ဆေက သူတို့နှင့် အဆင့်အတန်းတူ တစ်ယောက်အဖြစ် ခံစားနေရဆဲ ဖြစ်သည်။ ဥပမာတစ်ခုပေးရလျှင်၊ ၎င်းသည် သူတို့အားလုံး အတန်းတစ်တန်းတည်းရှိ အတန်းဖော်များ ဖြစ်နေသလိုပင်။ နိုင်ငံ၆နိုင်ငံသည် အမြဲတမ်း အမှတ် ၉၀ အထက် ရရှိသော ကျောင်းသားများကဲ့သို့ ဖြစ်ပြီး၊ အနက်ရောင်တစ္ဆေကမူ အမြဲတမ်း အမှတ်ပြည့် ရရှိသော ထိပ်တန်းကျောင်းသားတစ်ဦး ဖြစ်သည်။ သို့သော်၊ သူတို့သည် အတန်းတစ်တန်းတည်းတွင် ရှိနေဆဲ ဖြစ်သည်။

သို့သော် ယခုမူ၊ အနက်ရောင်တစ္ဆေသည် အဆင့်ကျော်တက်နိုင်သော ဉာဏ်ကြီးရှင် ကျောင်းသားလေးတစ်ဦး ဖြစ်နေချေပြီ။ သူသည် နဂါးဂိတ်တံခါးကို ကျော်ဖြတ်ခုန်လွှားသွားသော ငါးတစ်ကောင်ကဲ့သို့ ဖြစ်ပြီး အဆင့်အတန်းတစ်ခုတည်းတွင် မရှိတော့ပေ။

လွန်ခဲ့သော ရက်အနည်းငယ်က၊ သူတို့သည် ခိုလှုံရေးစခန်း ၃ ကို တိုက်ခိုက်သင့်၊ မသင့် ချီတုံချတုံ ဖြစ်နေခဲ့ကြသည်။ ယခု၊ သူတို့ ဤကိစ္စအပေါ် ဆက်လက် စဉ်းစားဆင်ခြင်ရန် မလိုအပ်တော့ပေ။ အမှန်တကယ်တွင်၊ နိုင်ငံ၆နိုင်ငံ၏ အထက်ပိုင်းအရာရှိကြီးများသည် ယင်းအစား သက်ပြင်းချလိုက်ကြသည်။

တော်သေးသည်၊ ဒီလူ အချိန်မီ ပြန်လာခဲ့သည်။ အကယ်၍ သူတို့သာ သူတို့၏ သွေးဆောင်မှုများကို မထိန်းချုပ်နိုင်ခဲ့ဘဲ သူ ပြန်လာခဲ့မည်ဆိုလျှင်၊ သူတို့သည် အမြစ်ပြတ် သုတ်သင်ခံရနိုင်ဖွယ် ရှိသည်။

နိုင်ငံ၆နိုင်ငံ၏ အထက်ပိုင်းအရာရှိကြီးများသည် ဖိနှိပ်ဆေးအပေါ် ဘာအတွေးမှ မရှိရဲကြတော့သော်လည်း၊ အခြားအတွေးတစ်ခု သူတို့၏ စိတ်ထဲသို့ ဝင်ရောက်လာသည်။ အကယ်၍ သူတို့က အနက်ရောင်တစ္ဆေ၏ အကူအညီကို တောင်းခံလျှင်ရော။

ဂိုဒိုရာက မရောက်လာသေးပေ၊ သို့သော် အနက်ရောင်တစ္ဆေက ယာဉ်တန်းတစ်ခုနှင့်အတူ ပြန်လည်ရောက်ရှိလာခဲ့သည်။ နိုင်ငံ၆နိုင်ငံ၏ အမြင်တွင်၊ ဟန်ရှောင်းနှင့် ဂိုဒိုရာ နှစ်ဦးစလုံးသည် ‌ရေပင်လယ်ဂြိုလ်ထက် များစွာသာလွန်သော ဂလက်ဆီအဖွဲ့အစည်းများ ဖြစ်ကြသည်။ ထို့အပြင်၊ ‌ရေပင်လယ်ဂြိုလ်သည် သူ၏ဇာတိမြို့ဖြစ်ပြီး၊ ကူညီပေးနိုင်ဖွယ် ရှိသည်။

သူတို့က ဂိုဒိုရာကို အားမကိုးနိုင်တော့သည့်အတွက်၊ အနက်ရောင်တစ္ဆေကို ကြိုးစားကြည့်လျှင်ရော...

…

တစ်ချိန်တည်းမှာပင်၊ ခိုလှုံရေးစခန်း အတွင်းရှိ ကစားသမားများသည် သူတို့၏ မှတ်တမ်းတင်ထားသော ဗီဒီယိုများကို ဖိုရမ်များပေါ်တွင် စိတ်လှုပ်ရှားစွာ မျှဝေနေကြသည်။ ‌ရေပင်လယ်ဂြိုလ်ဘုတ်သည် လျင်မြန်စွာ ပြန်လည်ဆန်းသစ်နေပြီး၊ ဘလက်စတား၏ အမည်သည် ရေပန်းအစားဆုံး သော့ချက်စကားလုံးများထဲမှ တစ်ခု ဖြစ်နေသည်။

မှတ်တမ်းဗီဒီယိုများတွင် မတူညီသော ဗားရှင်းများစွာ ရှိနေပြီး၊ ၎င်းတို့သည် မတူညီသော ရှုထောင့်အားလုံးမှ လာကြသည်။ ‌ရေပင်လယ်ဂြိုလ်ပေါ်တွင် မရှိသော အခြားကစားသမားများ ဟန်ရှောင်း၏ ခမ်းနားထည်ဝါသော ပေါ်ထွက်လာမှုကို မျက်မြင်တွေ့လိုက်ရသောအခါ၊ သူတို့သည် ချက်ချင်းပင် ဗီဒီယိုထဲသို့ စွဲဆောင်ခံလိုက်ရပြီး ခိုလှုံရေးစခန်း အတွင်းရှိ ကစားသမားများ၏ ခံစားချက်များကို တွေ့ကြုံခံစားလိုက်ကြရသည်။

ဟန်ရှောင်း ဗားရှင်း ၁.၀ တွင် ယူဆောင်လာခဲ့သော အကျိုးကျေးဇူးများသည် သူတို့၏ စိတ်ထဲတွင် စွဲထင်ကျန်ရစ်နေဆဲ ဖြစ်သည်။ ဗားရှင်းအသစ် စတင်လိုက်ပြီး ဟန်ရှောင်းက ဂလက်ဆီမှ ပြန်လာခဲ့သောအခါ၊ သူသည် ဗားရှင်းအသစ်မှ အရင်းအမြစ်များကို ယူဆောင်လာနိုင်ဖွယ် ရှိသည်။ ဤသည်မှာ သူတို့ လိုအပ်နေသော အရာဖြစ်သည်။ ဘလက်စတားက သူတို့အတွက် ဘယ်လို အကျိုးကျေးဇူးအသစ်တွေ ယူဆောင်လာပေးမလဲ။ ဤအကြောင်းကို တွေးကြည့်ရုံမျှဖြင့် ကစားသမားများအားလုံး စိတ်လှုပ်ရှားနေကြသည်။

အခြားဒေသများတွင် အွန်လိုင်းတက်လာသော ကစားသမားများသည် လက်ထဲရှိ မစ်ရှင်များကို ချက်ချင်း ပစ်ချလိုက်ပြီး ခိုလှုံရေးစခန်းဆီသို့ အပြေးအလွှား လာနေကြသည်။ ခိုလှုံရေးစခန်းဆီသို့ လာနေသော လမ်းပေါ်ရှိ လူအားလုံးသည် ပို၍ပင် အရှိန်မြှင့်တင်လိုက်ကြသည်။

ခရီးသွားနေကြသော ဓါးရူးနှင့် အခြားသူများ ထိုပို့စ်အားလုံးကို မြင်လိုက်ရသောအခါ၊ သူတို့သည် ဟန်ရှောင်း၏ ဘေးသို့ ချက်ချင်း မပြန်နိုင်သည့်အပေါ် မကျေမနပ် ဖြစ်နေကြပြီး အလွန် ကူကယ်ရာမဲ့ ဖြစ်နေကြသည်။

ငါတို့အားလုံး ဘလက်စတား နောက်ကို ဗားရှင်း ၁.၀ ကတည်းက လိုက်ခဲ့ကြတာ။ ငါတို့က ပထမဆုံး ဖြစ်ရမှာလေ။

ဘန်ဟစ်ဒေါ့၏ ဗီဒီယိုများသည် ဖိုရမ်များတစ်လျှောက် လျင်မြန်စွာ ချက်ချင်း မျှဝေခံလိုက်ရပြီး၊ အခြား အစပျိုးဂြိုလ်များမှ ကစားသမားများကလည်း ပွဲလာကြည့်ကြသည်။

"သူ ပေါ်လာပုံက တကယ်ကို ငါ့သွေးတွေကို ဆူပွက်စေတယ်။ ဒီမြင်ကွင်းက ဗားရှင်းအသစ်ရဲ့ ကြော်ငြာအတွက် ရွေးချယ်ခံရဖို့ အခွင့်အလမ်း ရှိတယ်လို့ ငါခံစားရတယ်။"

"ဂလက်ဆီတိုင်းမ် သတင်းက မှန်တယ်။ ဒီဇာတ်ကောင်အတွက် ဇာတ်ကြောင်းမစ်ရှင်တွေ ပိုများလာပြီး၊ သူက ဗားရှင်း ၂.၀ မှာ တကယ် ပေါ်လာပြီ။"

"ပရော်ဖက်ရှင်နယ် ကစားသမားတွေလို တခြားသူတွေရော ဘလက်စတား ကြေးစားတပ်ဖွဲ့ထဲ ဝင်လို့ရမလား မသိဘူး။"

ကစားသမားများ ဖိုရမ်ပေါ်တွင် မကြာသေးမီက အဖြစ်အပျက်များကို ဆွေးနွေးနေကြစဉ်၊ တစ်စုံတစ်ယောက်က ခန့်မှန်းချက်တစ်ခု ပြုလုပ်လိုက်သည်။

"ဗားရှင်း ၂.၀ မှာ၊ အစပျိုးဂြိုလ်တိုင်းက ဂလက်ဆီနဲ့ ချိတ်ဆက်သွားလိမ့်မယ်။ ဘလက်စတားက ငါတို့ကို ဂလက်ဆီထဲကို လမ်းညွှန်ပေးမယ့် ကွန်ပျူတာဇာတ်ကောင်ဖြစ်နိုင်မလား။"

လူအနည်းငယ် ထိုဖြစ်နိုင်ခြေအပေါ် စဉ်းစားဆင်ခြင်လိုက်ကြပြီး ၎င်းသည် အလွန် ဖြစ်နိုင်ခြေများကြောင်း သဘောပေါက်သွားကြသည်။

လေထဲရှိ အာကာသယာဉ် ဆယ်စီးခန့်သည် သူတို့ထဲမှ လူအများအပြားကို ဂြိုလ်မှ ခေါ်ထုတ်သွားရန် အကောင်းဆုံး သယ်ယူပို့ဆောင်ရေးယာဉ် ဖြစ်လိမ့်မည်။

ဤခန့်မှန်းချက်သည် ဟန်ရှောင်းက သူတို့ကို ဂလက်ဆီထဲသို့ ခေါ်ဆောင်သွားမည့် အဓိကဇာတ်ကောင်ဖြစ်သည်ဟု ထင်မြင်ကြသော ကစားသမားပေါင်း များစွာထံမှ ကြီးမားသော ထောက်ခံမှုကို ချက်ချင်း ရရှိခဲ့သည်။

…

ခိုလှုံရေးစခန်း ၃ ၏ အဓိကဒေသတွင်၊ ဟန်ရှောင်းသည် မှော်ပညာ တတ်ကျွမ်းသော ကြေးစားစစ်သားများကို ဖိနှိပ်ဆေး၏ ကုန်ကြမ်းများ ကြီးထွားမှုကို ကူညီရန် စေခိုင်းလိုက်သည်။ သူတို့၏ အကူအညီဖြင့်၊ ဖိနှိပ်ဆေး၏ ထုတ်လုပ်မှုသည် အလွန် တိုးတက်လာ၏။

လက်ရှိတွင်၊ သန္ဓေပြောင်းလဲခြင်း အရင်းအမြစ်သည် ငယ်ရွယ်နေသေးပြီး၊ ဖိနှိပ်ဆေး၏ အာနိသင်များသည် သုံးလခန့်အထိ တာရှည်ခံနိုင်သည်။ သန္ဓေပြောင်းလဲခြင်း အရင်းအမြစ်သည် နောက်တစ်ဆင့်သို့ ဝင်ရောက်သောအခါ၊ တူညီသော ခံနိုင်ရည်ကို ရရှိရန်အတွက် ဖိနှိပ်ဆေး အကြိမ်အနည်းငယ် သောက်သုံးရန် လိုအပ်လာမည် ဖြစ်သည်။ ထို့ကြောင့် သူတို့တွင် အရင်းအမြစ်များ အလွန် ချို့တဲ့နေသည်။

ဒုက္ခသည်များကို ကယ်တင်ခြင်းသည် စုစုပေါင်း မစ်ရှင်တိုးတက်မှုအတွက် အထောက်အကူ ဖြစ်စေမည်ဖြစ်ပြီး၊ ဟန်ရှောင်း၏ မစ်ရှင်သည်လည်း ကစားသမားများ စုဆောင်းရရှိခဲ့သော မစ်ရှင်တိုးတက်မှုကို ခံစားခွင့် ရရှိသည်။ သို့သော်၊ အကယ်၍ သူတို့က လူအများအပြားကို ခိုလှုံရေးစခန်း ၃ တွင် နေထိုင်ခွင့်ပြုလိုက်ပါက၊ နေရာသည် လူများဖြင့် ပြည့်ကျပ်သွားရုံသာမက၊ ဖိနှိပ်ဆေး၏ အာနိသင် ဆုံးရှုံးသွားသည့်အခိုက်အတန့်တွင် နေရာသည် ကြီးမားသော ရှုပ်ထွေးမှုတစ်ခုအဖြစ်သို့ ရောက်သွားလိမ့်မည်။

ဟန်ရှောင်းသည် ဒုက္ခသည် အများအပြားကို ခိုလှုံရေးစခန်း ၃ တွင် နေထိုင်စေလိုခြင်း မရှိသော်လည်း၊ ဘန်းနက်ကမူ သေချာပေါက် စိတ်မအေးနိုင် ဖြစ်နေမည်။ ဟန်ရှောင်း မြင်တွေ့ပုံအရ၊ နိုင်ငံ၆နိုင်ငံတွင် ကြီးမားသော နယ်မြေရှိပြီး ဒုက္ခသည်များစွာကို သေချာပေါက် ဂရုစိုက်နိုင်လိမ့်မည် ဖြစ်သည်။

နိုင်ငံ၆နိုင်ငံက ငါပြန်လာတာကို သေချာပေါက် သိရှိနေလောက်ပြီ။ ဂိုဒိုရန်တွေ မရောက်လာသေးတော့၊ သူတို့က ငါ့အကူအညီကို တောင်းခံဖို့ ငါ့ကို ဆက်သွယ်လာနိုင်ခြေများတယ်။ သူတို့ လာမယ့် ရက်အနည်းငယ်အတွင်း ငါ့ကို ဆက်သွယ်လိမ့်မယ်၊ ဟန်ရှောင်း သူ့ဘာသာသူ ခန့်မှန်းလိုက်သည်။

ဖိနှိပ်ဆေးကို နိုင်ငံ၆နိုင်ငံနှင့် မျှဝေခြင်းသည် ပိုမိုကြီးမားသော ရည်မှန်းချက်အတွက် အကျိုးရှိသည်။ သူသည် ကြယ်နဂါးနိုင်ငံမှလွဲ၍ အခြား နိုင်ငံငါးနိုင်ငံကို မကြိုက်သော်လည်း၊ ‌ရေပင်လယ်ဂြိုလ်၏ နိုင်ငံများကို ကာကွယ်ခြင်းသည် သူ့အတွက် အကျိုးကျေးဇူးများ ရှိနေသည်။ သူ၏ ယခင်ဘဝတွင်၊ ရီရယ့်ချင်း တစ်ဦးတည်းသာ ရှိခဲ့သည်။ သူ၏ လက်အောက်ငယ်သားများစွာသည် ဖိနှိပ်ဆေး၏ ကုန်ကြမ်းများကို စိုက်ပျိုးနိုင်စွမ်း ရှိနေသဖြင့်၊ ဟန်ရှောင်းသည် သူတို့ကို နိုင်ငံ၆နိုင်ငံအား ဖိနှိပ်ဆေး ဖော်စပ်ရာတွင် ကူညီရန် ခွင့်ပြုနိုင်သည်။ ဤအရာသည် ခိုလှုံရေးစခန်း ၃ ကို အလွန် ထင်ပေါ်နေခြင်းမှ ကာကွယ်ပေးပြီး ၎င်း၏ ဘေးကင်းလုံခြုံမှုကို သေချာစေမည်ဖြစ်သည်။

ဟုတ်ပါonf၊ နိုင်ငံ၆နိုင်ငံက သူ၏အကူအညီကို တောင်းခံမှသာ သူက အကူအညီပေးမည်ဖြစ်သည်။ သူက သူတို့ကို ကူညီရန် ချဉ်းကပ်ခြင်းသည် သူ၏ အဆင့်အတန်း ကျဆင်းသွားစေမည်ဖြစ်ပြီး၊ ၎င်းသည် နိုင်ငံ၆နိုင်ငံက သူ့အပေါ် ထားရှိသော လေးစားမှုကို လျော့ကျစေလိမ့်မည်။ ဤသည်မှာ သူ၏ အစီအစဉ်များနှင့် ကိုက်ညီမှုမရှိပေ၊ နိုင်ငံ၆နိုင်ငံက သူ့ထံ ချဉ်းကပ်ရန် ကြိုးစားလာမည်ကို သူယုံကြည်မှုရှိသည်။

သို့သော်၊ ရီရယ့်ချင်း၏ ဖိနှိပ်ဆေးသည် ဗီဇပြောင်းလဲခြင်း ဘေးအန္တရာယ်ကို ခုခံတွန်းလှန်ရန် တစ်ခုတည်းသော နည်းလမ်း မဟုတ်ပေ။ ဂိုဒိုရာသည်လည်း မှော်ပညာ လူမှုအဖွဲ့အစည်း တစ်ခုဖြစ်ပြီး၊ သူတို့တွင် ကိုယ်ပိုင်ဆေးဝါး ရှိသည်။ သို့သော် ဂိုဒိုရာ၏ ဆေးဝါးသည်လည်း ရောင်းလိုအား နည်းပါးနေသည်။ ဘာပဲဖြစ်ဖြစ်၊ သူတို့နှင့် မသက်ဆိုင်သော ခေတ်နောက်ကျဂြိုလ်များမှ သန်းပေါင်းများစွာသော နေထိုင်သူများကို ကာကွယ်ရန် ဆေးဝါး ဖြုန်းတီးခြင်းသည် သူတို့၏ အရင်းအမြစ်များကို ဖြုန်းတီးရာ ကျသည်။ ထို့အပြင်၊ ဂိုဒိုရာသည် ဂြိုလ်တစ်ခုထက်မကကို ဂရုစိုက်နေရသည်။

သူ၏ ယခင်ဘဝ ဇာတ်ကြောင်းတွင်၊ ဂိုဒိုရာသည် အကန့်အသတ်ရှိသော ဆေးဝါးပမာဏကိုသာ ပေးအပ်ခဲ့ပြီး၊ ဒုက္ခသည်အများစုသည် ၎င်းကို မသုံးစွဲခဲ့ကြရပေ။ ကစားသမားများသည်လည်း ဂိုဒိုရာ၏ မစ်ရှင်များမှတစ်ဆင့် ငွေရှာနိုင်ပြီး ထိုငွေကို ဆေးဝါးများ ဝယ်ယူရန် အသုံးပြုနိုင်သည်။ ထိုမှတစ်ဆင့်၊ သူတို့သည် အချို့သော ဒုက္ခသည်များ၏ တောင်းဆိုမှုများကို ဖြည့်ဆည်းပေးနိုင်ပြီး စုစုပေါင်း မစ်ရှင်တိုးတက်မှုကို မြှင့်တင်နိုင်မည် ဖြစ်သည်။

သို့သော်၊ ဟန်ရှောင်း၏ လွှမ်းမိုးမှုဖြင့်၊ ရီရယ့်ချင်း၏ ဖိနှိပ်ဆေး ထောက်ပံ့မှုသည် အလွန် တိုးတက်လာခဲ့ပြီး၊ ၎င်းကို အလကားနီးပါး ဖြန့်ဝေပေးခဲ့သည်။ ထို့ကြောင့်၊ ဂိုဒိုရာ၏ ဆေးဝါးသည် ထင်သလောက် အရေးပါတော့မည် မဟုတ်ပေ။ ဤသည်မှာ အလွန် အရေးမကြီးဟု ထင်ရသော်လည်း၊ ၎င်းသည် ဟန်ရှောင်း၏ အစီအစဉ်များတွင် အဓိကကျသော အချက်တစ်ချက် ဖြစ်သည်။

အဘယ်ကြောင့်ဆိုသော် ဤသည်မှာ ငွေကြေးလဲလှယ်မှုနှင့် သက်ဆိုင်နေသောကြောင့် ဖြစ်သည်။

‌

ရေပင်လယ်ဂြိုလ်၏ ကစားသမားများသည် လက်ရှိတွင် စကြဝဠာတွင် အသိအမှတ်မပြုသော ပြည်တွင်းငွေကြေးကို အသုံးပြုနေကြပြီး၊ ဟန်ရှောင်းက အီနက်စ် လိုအပ်သည်။ ကစားသမားများ၏ ငွေများအားလုံးသည် ကွန်ပျူတာဇာတ်ကောင်မစ်ရှင်များမှ ရရှိထားခြင်းဖြစ်ပြီး၊ သူတို့သည် ဂလက်ဆီနှင့် မချိတ်ဆက်ရသေးသောကြောင့်၊ သူတို့တွင် ယခုအချိန်တွင် ဘာအီနက်စ်မှ မရှိပေ။ ထို့ကြောင့်၊ ဟန်ရှောင်း၏ ပစ်မှတ်သည် အမှန်တကယ်တွင် ဂိုဒိုရာ ဖြစ်သည်။

ဂိုဒိုရာသည် ကစားသမားများကို မစ်ရှင်များ ထုတ်ပေးမည်ဖြစ်ပြီး၊ ဆုလာဘ်မှာ အီနက်စ် ဖြစ်လိမ့်မည်။ ကစားသမားများသည် ဂိုဒိုရာ၏ ဆေးဝါးကို ဝယ်ယူရန် သူတို့၏ ငွေကို သုံးစွဲရန် မလိုအပ်သောကြောင့်၊ ဤငွေကို ချွေတာနိုင်မည် ဖြစ်သည်။ ကစားသမားများသည် ဟန်ရှောင်း၏ စတိုးဆိုင်တွင် စက်ယန္တရားများစွာနှင့် အဆင့်မြင့် အသိပညာများကို တွေ့မြင်ရသောအခါ၊ ငွေသုံးစွဲခြင်းသည် သူ၏အဖွဲ့ နှင့် သူတို့၏ ဆက်ဆံရေးကို တိုးမြှင့်ပေးမည်ဟူသောအချက်နှင့် ပေါင်းစပ်လိုက်လျှင်၊ ဤကစားသမားများ သူတို့၏ ငွေကို ဘယ်နေရာတွင် သုံးစွဲကြမည်မှာ အလွန် ရှင်းလင်းနေသည်။

ထို့ကြောင့်၊ ဟန်ရှောင်းသည် ဂိုဒိုရာ မရောက်လာမီ မည်သည့် စက်ယန္တရားကိုမျှ ရောင်းချရန် အစီအစဉ် မရှိခဲ့ဘဲ၊ သူသည် အတွေ့အကြုံအမှတ်များ ရရှိရန် ကျွမ်းကျင်မှုများနှင့် အသိပညာများကိုသာ သင်ကြားပေးမည် ဖြစ်သည်။

ဂိုဒိုရာက သန္ဓေပြောင်းလဲခြင်း အရင်းအမြစ်ဟာ အမှောင်ကြယ်ရဲ့ အကြံအစည်တွေရဲ့ တစ်စိတ်တစ်ပိုင်း ဖြစ်နေမှန်း မသိသေးဘူး။ ငါသာ အဲ့ဒီအချက်ကို ထုတ်ဖော်လိုက်ရင်၊ ဂိုဒိုရာက ဒီကိစ္စကို ချက်ချင်း ပိုအရေးထားလာပြီး လူတွေကို ချက်ချင်း လွှတ်လိုက်လိမ့်မယ်...

သူသည် မှော်ဆရာများ ကုန်ကြမ်းများ ဖန်တီးနေသည်ကို ကြည့်ရင်း သူ၏ နောက်တစ်လှမ်းကို စဉ်းစားနေသည်။

အမှောင်ကြယ်က သန္ဓေပြောင်းလဲခြင်း အရင်းအမြစ်ကို မဟာဗျူဟာ အစီအစဉ်တစ်ခုကြောင့် ချထားခဲ့တာ။ ဂိုဒိုရာသာ မပေါ်လာသရွေ့၊ အမှောင်ကြယ်က ပေါ်လာမှာ မဟုတ်ဘူး။ ငါသာ ဂိုဒိုရာကို အခု အကြောင်းကြားပြီး သူတို့ အပြေးအလွှား ရောက်လာခဲ့ရင်၊ သူတို့ စခန်းနှစ်ခုကြားက တိုက်ပွဲက ပေါက်ကွဲထွက်လာလိမ့်မယ်၊ ပြီးတော့ သူတို့က ငါ့ဆီကနေ ကစားသမားတွေကို လုယူမယ့် ပြိုင်ဘက်တွေ ဖြစ်လာလိမ့်မယ်။ ငါသာ ဂိုဒိုရာကို အခုလောလောဆယ် အကြောင်းမကြားသေးဘူးဆိုရင်၊ ငါက အစပျိုးသူ ဖြစ်လာပြီး ဒီအချိန်ကို အသုံးချပြီး ကစားသမားတွေအတွက် ငါ့အဖွဲ့ရဲ့ ဆွဲဆောင်မှုကို တိုးမြှင့်နိုင်လိမ့်မယ်...

အဖွဲ့နှစ်ဖွဲ့စလုံး ပါဝင်လာသည်နှင့် တပြိုင်နက်၊ တိုက်ပွဲတစ်ခု သေချာပေါက် ပေါက်ကွဲထွက်လာမည် ဖြစ်သည်။ ထိုအချိန်မတိုင်မီကာလသည် ဟန်ရှောင်းအတွက် အကျိုးအရှိဆုံး ဖြစ်သည်။ သူသည် ဖိုရမ်များပေါ်မှ လှုပ်ရှားမှုများကိုလည်း မျက်မြင်တွေ့ခဲ့ရသည်။ သူ မျှော်လင့်ထားသည့်အတိုင်း၊ သူ၏ ပြန်လာခြင်း၏ လွှမ်းမိုးမှုသည် ကစားသမားများကြားတွင် ဖြည်းညှင်းစွာ ပျံ့နှံ့နေပြီး၊ ၎င်းသည် သူ့အတွက် အလွန် အကျိုးရှိသည်။

ဟန်ရှောင်း ခဏတာ စဉ်းစားလိုက်ပြီး သူ၏ ကိုယ်ပိုင် သတင်းအချက်အလက်များကို မထုတ်ဖော်သေးဘဲ ဂိုဒိုရာ သူတို့ဘာသာသူတို့ လာမည့်အချိန်ကို စောင့်ဆိုင်းရန် ဆုံးဖြတ်လိုက်သည်။ သူ၏ လက်ထဲတွင် ဗီဇပြောင်းလဲခြင်း ဘေးအန္တရာယ်၏ အမှန်တရားအပြင် မူလ သန္ဓေပြောင်းလဲခြင်း အရင်းအမြစ်၏ မိတ္တူတစ်ခုလည်း ရှိနေသည်။ သူသည် အကြီးမားဆုံး အကျိုးကျေးဇူးများ ရရှိရန်အတွက် ၎င်းကို ဂိုဒိုရာထံ လက်ဆင့်ကမ်းရန် မှန်ကန်သော အချိန်ကို ရှာဖွေရန် လိုအပ်သည်။ ဤသည်မှာ အကောင်းဆုံး အချိန် မဟုတ်သေးဘဲ၊ သူ ဤမျှလောက် စိုးရိမ်ပူပန်နေရန် မလိုအပ်ပေ။

ငါ့ရဲ့ ပန်းတိုင်က ဖြစ်နိုင်သမျှ ကစားသမား အများကြီးကို ငါ့ရဲ့ ကြေးစားအဖွဲ့ထဲ ဝင်လာစေဖို့ပဲ။ ဒါပေမဲ့၊ ကြိုက်သလို ဝင်ခွင့်ပေးလို့ မရဘူး။ ဝင်ခွင့်အတားအဆီးတစ်ခု သတ်မှတ်ဖို့ လိုတယ်။ မဟုတ်ရင်၊ ငါက အရမ်း လိုအပ်နေတဲ့ပုံ ပေါက်သွားလိမ့်မယ်။ အရမ်းလွယ်လွယ်ကူကူ ရတဲ့အရာတွေကို တန်ဖိုးထားမှာ မဟုတ်ဘူး။

ဒါပေမဲ့၊ ငါသာ ကစားသမား အလုံအလောက် လိုချင်တယ်ဆိုရင်၊ သင့်တော်တဲ့ ဝင်ခွင့်လိုအပ်ချက်တစ်ခု သတ်မှတ်ဖို့ လိုတယ်။ ငါ သေချာသိနိုင်တဲ့ တစ်ခုတည်းသောအရာက ကစားသမားတွေ အများကြီးက အခုအချိန်မှာ ငါ့အဖွဲ့ထဲ ဝင်ချင်နေကြတယ် ဆိုတာပဲ။ ငါသာ ပြိုင်ဆိုင်မှုတစ်ခု ဖန်တီးနိုင်ရင် အကောင်းဆုံးပဲ။ ဘာပဲဖြစ်ဖြစ်၊ အောင်နိုင်သူတွေက အမြဲတမ်း မနာလိုအားကျခံရလေ့ရှိတယ်၊ ပြီးတော့ ငါ့အဖွဲ့ထဲ ဝင်ခွင့်ရတာကို အောင်နိုင်သူတွေပဲ ခံစားနိုင်တဲ့ အခွင့်ထူးတစ်ခု ဖြစ်အောင် ငါလုပ်နိုင်လိမ့်မယ်။ ဒါက ကစားသမားတွေကို ဒီအခွင့်အရေးကို အလေးအနက်ထားစေမယ့် အကောင်းဆုံး နည်းလမ်းပဲ။

ခဏတာ စဉ်းစားပြီးနောက်၊ ဟန်ရှောင်းသည် တော်တော်လေး ကောင်းမွန်သော အစီအစဉ်တစ်ခုကို ရရှိခဲ့သည်။ ဗားရှင်း ၂.၀ စတင်လိုက်သည်နှင့်အမျှ၊ သူ လုပ်ဆောင်ရန် အရာများစွာ ရှိလာသည်။

သို့သော်၊ ဤကိစ္စများအားလုံးကို အကောင်အထည် မဖော်မီ၊ သူလုပ်ဆောင်ရန် နောက်ထပ် အရေးကြီးသော အရာတစ်ခု ရှိနေသည်။ သူ၏ ခွန်အားကို လျင်မြန်စွာ တိုးမြှင့်ရန်အတွက် အတွေ့အကြုံအမှတ် အမြောက်အမြားကို ရိတ်သိမ်းရန် လိုအပ်နေသည်။

ဟန်ရှောင်းသည် လက်ရှိတွင် အဆင့် ၁၁၆ ဖြစ်ပြီး၊ သူ၏ အင်တာဖေ့စ်ပေါ်ရှိ အတွေ့အကြုံအမှတ်သည် ၁၀၀,၀၀၀,၀၀၀ အောက်တွင် ရှိနေသည်။ သူ၏ အဆင့်ကို မမြှင့်တင်ခဲ့သည်မှာ တစ်နှစ်ရှိနေပြီဖြစ်ပြီး၊ သူ၏ အင်တာဖေ့စ်ပေါ်ရှိ ဒီဇိုင်းပုံစံ အရေအတွက်သည် ရာဂဏန်း အနည်းငယ် တိုးလာခဲ့သည်။ သူသည် ယခုအချိန်တွင် အတွေ့အကြုံအမှတ်ကို အမှန်တကယ်ကြီး လိုအပ်နေသည်။

သူကစားသမားများကို နောက်ဆုံးရိတ်သိမ်းခဲ့သည်မှာ အလွန် ကြာမြင့်နေပြီဖြစ်ပြီး၊ သူသည် စိတ်လှုပ်ရှားမှုဖြင့် မယိုးမယွ ဖြစ်နေတော့သည်။

စာစဉ် (၃၄)၊ အခန်း (၅၁၄) ပြီး၏။

လင်းဆက်

+++++