အကြိုနတ်ဘုရားနယ်မြေ

သေခြင်းကျောက်တုံးက အဆုံးမှာတော့ အကန့်အသတ်ရှိတယ်လေ။ ဆယ်နှစ်ပြည့်တိုင်း  သေခြင်းကျောက်တုံးတစ်တုံးကို ဖလှယ်နိုင်တာကတင်  လီဖူချန်းအတွက် အတော်လေးအဆင်ပြေတယ်လို့ဆိုရပါမယ်။

သေမင်းနတ်ဘုရားလိုဏ်ဂူကို ထပ်မံသွားရောက်ပြီး အထွတ်အထိပ်အဆင့်အကြိုနတ်ဘုရားအသုံးအဆောင်ပစ္စည်းတွေဒါမှအဟုတ်အဆင့်မြင့်စကြာဝဠာရတနာတွေကို မရရှိတော့တဲ့အတွက် လီဖူချန်းက အကြိုနတ်ဘုရားနယ်မြေကို ဦးတည်ဖို့ ဆုံးဖြတ်လိုက်တယ်။

စကြာဝဠာမှာ အကြိုနတ်ဘုရားအသုံးအဆောင်ပစ္စည်းတွေရှိတဲ့အပျက်အစီးအချို့ရှိတယ်၊ ဒါပေမယ့် အချို့က အကြိုနတ်ဘုရားတွေကို ဝင်ရောက်ခွင့်မပြုဘူး၊ အချို့က အကြိုနတ်ဘုရားတွေကို ဝင်ရောက်ခွင့်ပြုတယ်။

အကြိုနတ်ဘုရားတွေကို ဝင်ရောက်ခွင့်မပြုတဲ့နေရာတွေကတော့ ရေနတ်ဘုရားအုတ်ဂူလို အကြိုနတ်ဘုရားသင်္ချိုင်းတွေပေါ့။ ဒီနေရာတွေက အကြိုနတ်ဘုရားစွမ်းအားတွေကို အလွန်တုံ့ပြန်လွယ်တယ်။ သူတို့က အကြိုနတ်ဘုရားစွမ်းအားတွေကို အာရုံခံမိတာနဲ့ တိုက်ခိုက်ဖို့ စွမ်းအားတွေကို ချက်ချင်း ပေါ်ထွက်စေလိုက်တယ်။ အထွတ်အထိပ်အဆင့်အကြိုနတ်ဘုရားတစ်ယောက်က ဝင်ရောက်လာပြီး အဲဒါကို မဖျက်ဆီးနိုင်ရင် သူ့ဟာသူဖျက်ဆီးပစ်ပြီး အထွတ်အထိပ်အဆင့်အကြိုနတ်ဘုရားနဲ့အတူ ပျောက်ကွယ်သွားပါလိမ့်မယ်။

သေမင်းနတ်ဘုရားရေကန်၊ စကြာဝဠာမဟာချောက်နဲ့ အင်းဆက်နတ်ဘုရားစစ်မြေပြင်တို့လို အကြိုနတ်ဘုရားတွေကို ဝင်ရောက်ခွင့်ပြုတဲ့အပျက်အဆီးတွေအားလုံးက အလွန်အမင်းအန္တရာယ်များတယ်။

သေမင်းနတ်ဘုရားရေကန်အတွက်အဓိကအကြောင်းပြချက်ကတော့ သေမင်းနတ်ဘုရားက အားကောင်းလွန်းပြီး သူချန်ထားတဲ့စွမ်းအားက အထွတ်အထိပ်အဆင့်အကြိုနတ်ဘုရားတစ်ယောက်ရဲ့အသက်ကို ခြိမ်းခြောက်ဖို့ လုံလောက်တယ်။

စကြာဝဠာမဟာချောက်က အကြိုနတ်ဘုရားနယ်မြေရဲ့အပြင်ဘက်ပိုင်းနဲ့ တူတယ်။ ၎င်းက စကြာဝဠာရဲ့အနက်ရှိုင်းဆုံးဒဏ်ရာဖြစ်ပြီး တစ်ယောက်ယောက်က ဒီဒဏ်ရာက ထွက်နိုင်ရင် သူတို့က ဒီစကြာဝဠာမှ ထွက်နိုင်လိမ့်မယ်။

ဒါ မှန်သလားကိုတော့ တစ်ယောက်မှ မသိပါဘူး။

အင်းဆက်နတ်ဘုရားစစ်မြေပြင်က စကြာဝဠာမဟာချောက်ထက် အများကြီးပိုအန္တရာယ်များတယ်။ လက်ရိအချိန်အထိ အင်းဆက်မျိုးနွယ်ရဲ့ဇာစ်မြစ်ကို မသိဘူး၊ အထဲမှာ ဘာအန္တရာယ်တွေ ဖုန်းကွယ်ထားသလဲကို မသိဘူး။

လီဖူချန်းက သေမင်းနတ်ဘုရားလိုဏ်ဂူထဲမှာ ရတနာများစွာကို ရရှိခဲ့တယ်။ သူက အခြားနေရာတွေကို သွားရင် အန္တရာယ်များပြီး သူက ဘာတစ်ခုမှ ရရှိမှာမဟုတ်ဘူး။ အဲတာအစား သူက အကြိုနတ်ဘုရားနယ်မြေသို့ ဦးတည်‌တာက ပိုကောင်းပါတယ်။ သူ့ရဲ့လက်ရှိခွန်အားနဲ့ဆိုရင်  ပြိုင်ဘက်ကင်းအကြိုနတ်ဘုရားတစ်ယောက်ကို မရင်ဆိုင်သရွေ့ သူက သူ့ကိုယ်သူ ကာကွယ်နိုင်ပါလိမ့်မယ်။

သူက လူတိုင်းကို အကြိုနတ်ဘုရားနယ်မြေသို့ ခေါ်ဆောင်သွားသင့်လားလို့ လီဖူချန်းက စဉ်းစားနေတယ်။

ပလိန်းနှလုံးသားနဲ့ဆိုရင် သူ လုပ်နိုင်တယ်ဆိုတာ သံသယရှိစရာမလိုပါဘူး။

"လူတစ်‌ယောက် တာအိုကို အောင်မြင်တဲ့အခါ သူ့ရဲ့ခွေးတွေကြက်တွေကတောင် သူ့နောက်ကို လိုက်လာတယ်။ ထားလိုက်ပါ‌၊ သူတို့ဆန္ဒရှိသလားကို ငါ မေးကြည့်ရတာပေါ့"

လူတိုင်းကို ခေါ်သွားဖို့ လီဖူချန်းက ပိုအာသီသရှိနေတယ်။

ဘာကြောင့်လဲ‌တော့ မသိပေမယ့် နှစ်ပေါင်းမရေမတွက်များစွာကြာရင်တောင် သူက ပြန်မလာနိုင်ဘူးလို့ သူက ကြိုတင်သိနေတယ်။ ဒီလိုဆိုရင် လူတိုင်းကို ခေါ်သွားတာ ပိုကောင်းတယ်။

ဒါပေမယ့် သူတို့က ဆန္ဒမရှိရင် သူက သူတို့ကို ဖိအားပေးမှာမဟုတ်ပါဘူး။

တကယ်တော့ ဓားဂိုဏ်းမှာ လူပေါင်းမရေမတွက်နိုင်စွာရှိပြီး မသွားချင်တဲ့သူအချို့ရှိမှာပါပဲ။

လီဖူချန်းမျှော်လင့်ထားသလိုပဲ၊ နက်ပြာပလိန်းနဲ့သူတို့ရဲ့မွေးရပ်မြေကနေ မထွက်သွားချင်တဲ့လူတွေ ရှိတယ်။ ဒါပေမယ့် ဒီလိုလူတွေက အနည်းစုဖြစ်ပြီး တစ်သောင်းပုံတစ်ပုံတောင် မရှိပါဘူး။ ဒါ့ပြင် လူအများစုက ဓားဂိုဏ်းကို သူတို့ရဲ့မွေးရပ်မြေအဖြစ် သတ်မှတ်ထားကြတယ်။ ဓားဂိုဏ်းက ကမ္ဘာတစ်ခုဖြစ်ပြီး သူတို့က ဓားဂိုဏ်းမှာ ရှိနေနိုင်သရွေ့ သူတို့ဘယ်နေရာကိုပဲသွားသွား ကိစ္စမရှိပါဘူး။

မထွက်သွားခင် လီဖူချန်းက စီစဉ်မှုအချို့ကို ပြုလုပ်ပေးခဲ့တယ်။

ဥပမာအားဖြင့် ကန့်လန့်ဖြတ်မြစ်ဘိုးဘေးကို အဆင့်နိမ့်စကြာဝဠာရတနာတစ်ခုကို ပေးခြင်း။

အရင်က သူက ကန့်လန့်ဖြတ်မြစ်ဘိုးဘေးကို  ကမ္ဘာသစ်သီးထဲမှာ နှစ်တစ်သိန်းနားလည်ခွင့်ပေးဖို့ ကတိပေးခဲ့တယ်။ အခု သူ ထွက်သွားတော့မှာဆိုတော့ သူ့ကို အဆင့်နိမ့်စကြာဝဠာရတနာတစ်ခုပေးရမှာပေါ့။

အသင်္ချေပန်းအမျိးသမီးနဲ့နဂါးသွဲ့ပန်းကောင်းကင်ဘုံအရှင်မတို့အတွက်လည်း အတူတူပါပဲ။ လီဖူချန်းက သူတို့တစ်ယောက်စီကို အဆင့်နိမ့်စကြာဝဠာရတနာတစ်ခု ပေးခဲ့တယ်။ ကန့်လန့်ဖြတ်မြစ်ကြယ်ပိုင်နက်မှာ မွေးဖွားခဲ့သူတစ်ယောက်အနေနဲ့ ကန့်လန့်ဖြတ်မြစ်ကြယ်ပိုင်နက်က ပိုသန်မာလာစေဖို့ သူက မျှော်လင့်ထားတယ်လေ။

…

အဆုံးမဲ့ချောက်နက်တစ်ခုရဲ့အရှေ့မှာ ပုံရိပ်လေးခုက ထွက်ပေါ်လာတယ်။

"ဒါ စကြာဝဠာချောက်နက်လား" ခရမ်းရင့်ရောင်ချီတည်ရှိမှုကိုထုတ်လွှတ်နေတဲ့စကြာဝဠာချောက်နက်ကို ကြည့်ပြီး ရန်ချင်းဟူက မေးငေါ့လိုက်တယ်။

ဝူကျောက ပြောလိုက်တယ်"ဒီချီတည်ရှိမှုက ရှေးဦးမူလဖရိုဖရဲချီတည်ရှိမှုထက် ပိုရှေးကျတာပဲ"

လီဖူချန်းက ပြောလိုက်တယ်"ဒါက ကမ္ဘာဦးခရမ်းရောင်ချီနဲ့အကြိုနတ်ဘုရားနယ်မြေချီတည်ရှိမှုတို့ကို ပေါင်းစည်းထားတာပဲ"

ဒီနေရာရဲ့ကမ္ဘာဦးခရမ်းရောင်ချီက အလွန်ပါးလွှာပြီး သန့်စင်မှုက ကမ္ဘာဦးဘူးသီးထဲရှိ ကမ္ဘာဦးခရမ်းရောင်ချီထက် အများကြီးနိမ့်ကျတယ်၊ ဒါပေမယ့် အမြောက်အများရှိပြန်တယ်။ သို့ပေမယ့် လီဖူချန်းကို ၎င်းကို မစုပ်ယူနိုင်ပါဘူး၊ ၎င်းက အကြိုနတ်ဘုရားနယ်မြေချီတည်ရှိမှုနဲ့ ပေါင်းစပ်ထားလို့ပဲလေ။

"သွားကြစို့"

လီဖူချန်းနဲ့သမန်းဝံပုလွေလူဝင်စားတို့က စကြာဝဠာချောက်နက်ထဲသို့ ချက်ချင်း ပြေးဝင်သွားပြီး ရန်ချင်းဟူနဲ့ဝူကျောက အနောက်မှ အနီးကပ်လိုက်လာတယ်။

ဖရိုဖရဲအပျက်အဆီးထဲမှာ နေရာလပ်နဲ့အချိန်သဘောတရားမရှိပါဘူး။ စကြာဝဠာချောက်နက်ထဲမှာလဲ နေရာလပ်နဲ့အချိန်သဘောတရားမရှိပါဘူး။

အချိန်ဘယ်လောက်ကြာသလဲကိုတောင် မသိခဲ့ရပါဘူး၊ သူတို့လေး‌ယောက်က စကြာဝဠာချောက်နက်ကို ဖြတ်ကျော်ပြီး ပျက်ဆီးယိုယွင်းပြီးကြောက်စရာကောင်းတဲ့လှပဆန်းကြယ်တဲ့ကမ္ဘာတစ်ခုကို ရောက်ရှိလာတယ်။

"လုံးဝကို မတူညီတဲ့ချီတည်ရှိမှုဥပဒေသတွေပဲ"

ဒါက အကြိုနတ်ဘုရားနယ်မြေဆိုတာ သူတို့လေးယောက်က ခန့်မှန်းစရာမလိုပါဘူး။

သဘာဝကျုံးရဲ့အခြားတစ်ဖက်ရှိစကြာဝဠာနဲ့နှိုင်းယှဉ်ရင် အကြိုနတ်ဘုရားနယ်မြေရဲ့ဥပဒေသက သူတို့အတွက် ဆန်းသစ်လွန်းတယ်။ ဥပဒေသတွေက သိပ်သည်းလွန်းတယ်။ စကြာဝဠာရဲ့ဥပဒေသက အမျှင်တန်းတွေဆိုရင် အကြိုနတ်ဘုရားနယ်မြေရဲ့ဥပဒေသတွေက သံဆူးကြိုးတွေပမာပါပဲ။ မာကျောမှုအဆင့်က အဆများစွာ ပိုတိုးလာတယ်။

ဒါ့အပြင် စကြာဝဠာရဲ့ဥပဒေသတွေနဲ့ နှိုင်းယှဉ်ရင် ဒီနေရာရဲ့ဥပဒေသက အများကြီးပိုဆန်းကြယ်တယ်။

သူ့ရဲ့ဓားတာအိုနဲ့မီးတာအိုက အလုံးစုံတတ်သိနားလည်ခြင်းအဆင့်မှာ ရောက်ရှိနေမှန်း လီဖူချန်းက ယုံကြည်ထားတယ်။ ဒါပေမယ့် အကြိုနတ်ဘုရားနယ်မြေထဲမှာ သူ့ရဲ့ဓားတာအိုနဲ့မီးတာအိုက ကြီးထွားဖို့အခန်းရှိသေးတယ်ဆိုတာ သူက သိလာရတယ်။

"နတ်ဘုရားနယ်‌ပယ်"

လီဖူချန်းရဲ့မျက်လုံး‌တွေက အလင်းတွေ တောက်ပလာတယ်။

ဒီလိုကိုး။ နတ်ဘုရားနယ်ပယ်ကို တက်ဖို့ အကြိုနတ်ဘုရားနယ်မြေမှာပဲ ဖြစ်နိုင်တယ်ဆိုတာ သူ နားလည်လာခဲ့တယ်။ ဒါမှမဟုတ် နတ်ဘုရားနယ်ပယ်ကို တက်ဖို့ ပိုလွယ်ကူလာစေတယ်လို့ ပြောလို့ရပါတယ်။

"ဒါက တကယ်ကို ကြီးကျယ်ခမ်းနားတဲ့နေရာတစ်ခုပဲ......."

အကြိုနတ်ဘုရားတွေက ပြန်လာဖို့ ဘာကြောင့် ဆန္ဒမရှိကြမှန်း လီဖူချန်းက နောက်ဆုံးတော့ နားလည်လာခဲ့တယ်။

အကြိုနတ်ဘုရားနယ်မြေက အလွန်အန္တရာယ်များတယ်။ ပြိုင်ဘက်ကင်းအရှင်တွေအတွက် ဒီနေရာက အန္တရာယ်တွေနဲ့ ပြည့်နေတယ်။ လေပြင်းတစ်ချက်တိုက်ခတ်လာတဲ့အခါ သာမန်ပြိုင်ဘက်ကင်းအရှင်တစ်ယောက်က ခုခံမှုတစ်ခုမှ မပြုလုပ်နိုင်တော့ဘဲ သူတို့က ဖုန်မှုန့်တွေအဖြစ် ပြောင်းလဲသွားလိမ့်မယ်လို့ လီဖူချန်းက ယူဆထားတယ်။

ဒါပေမယ့် သူတို့လေးယောက်က အကြိုနတ်ဘုရားတွေဖြစ်တာကြောင့် အကြိုနတ်ဘုရားနယ်မြေက သူတို့အတွက် အန္တရာယ်သိပ်မရှိပါဘူး။

အကြိုနတ်ဘုရားနယ်မြေကို အတွင်းနယ်မြေနဲ့ အပြင်နယ်မြေဆိုပြီး ခွဲခြားထားတယ်။

အတွင်းနယ်‌မြေက နတ်ဘုရားစစ်မြေပြင်နဲ့ နီးကပ်ပြီး ပြိုင်ဘက်ကင်းအရှင်တွေအတွက် တားမြစ်ဧရိယာတစ်ခုဖြစ်တယ်။ ထိုနေရာမှာ အကြိုနတ်ဘုရားတွေပဲ နေထိုင်ကြတယ်။

အပြင်နယ်‌မြေက ပြိုင်ဘက်ကင်းအရှင်တွေနေထိုင်ရာဖြစ်တယ်။

အတွင်းနယ်မြေကို ရောက်ရှိလာပြီးနောက် ဒီနေရာရဲ့သဘာဝပတ်ဝန်းကျင်က ပိုကြမ်းတမ်းတာကို လီဖူချန်းက ခံစားမိတယ်။ သာမန်ပြိုင်ဘက်ကင်းအရှင်တွေက ဆယ့်ငါးမိနစ်ကြာအောင် အသက်ရှင်နိုင်မှာမဟုတ်ဘူး။ အထွတ်အထိပ်ပြိုင်ဘက်ကင်းအရှင်တွေက‌တောင် ထိန်းနိုင်ရုံမျှသာ ဖြစ်ပေလိမ့်မယ်။

အုန်း.......ဖြောက်.......

ကောင်းကင်မှာ မိုးကြိုးတွေ မြည်ဟည်းနေပြီး မိုးကြိုးသွားတစ်ခုက လီဖူချန်းတို့ထံ ရုတ်တရက် ကျဆင်းလာတယ်။

ဝှစ်.....

ဝူကျောက ဓားချီတစ်ခုကို ထုတ်လွှတ်ကာ မိုးကြိုးသွားကို ဖျက်ဆီးပစ်လိုက်တယ်။

"ဒီလိုစွမ်းအား၊ ဒါက တကယ်ကို အကြိုနတ်ဘုရားစွမ်းအားပဲ" ဝူကျောက အံ့အားသင့်သွားတယ်။

လီဖူချန်းက ပြောလိုက်တယ်"ဥပ‌ဒေသတွေက သဘာဝပတ်ဝန်းကျင်ရဲ့ခွန်အားကို ဆုံးဖြတ်တယ်။ အကြိုနတ်ဘုရားနယ်မြေက စကြာဝဠာထက် တကယ်ကိုသာလွန်တာပဲ"

အပြင်နယ်မြေမှာ သူတို့လေးယောက်က အကြိုနတ်ဘုရားတစ်ယောက်တစ်လေတောင် မမြင်ခဲ့ရဘူး။ အတွင်းပိုင်းနယ်မြေကို ရောက်ရှိပြီးနောက် အကြိုနတ်ဘုရားတစ်ယောက်က ဖြတ်သန်းလာရာ လီဖူချန်းက တားဆီးလိုက်တယ်။

အဆင့်မြင့်အကြိုနတ်ဘုရားက ဒေါသမထွက်ရဲဘဲ ရိုသေလေးစားစွာ မေးလိုက်တယ်"အရှင်တို့ ဘာကိစ္စများရှိလို့ပါလဲ"

ဝူကျောက ပြောလိုက်တယ်"ငါတို့တွေ အကြိုနတ်ဘုရားနယ်‌မြေကို အခုပဲ ရောက်ရှိလာတာ၊ ဒီနေရာအနေအထားနဲ့ မရင်းနှီးသေးဘူးဖြစ်နေတယ်။ ငါတို့ကို ပြောပြပါ။ ဟုတ်ပြီ၊ မင်းရဲ့နာမည်ကရော...."

"ငါ့နာမည်က စကွမ်း" စကွမ်းက လည်ချောင်းရှင်းကာ ပြောလိုက်တယ်"အကြိုနတ်ဘုရားနယ်မြေကို အတွင်းနယ်မြေနဲ့အပြင်နယ်မြေဆိုပြီး ခွဲခြားထားတယ်။ အရှင်တို့တွေ ဒါကို သိမယ်လို့ ငါ ထင်တယ်"

"

"အပြင်နယ်မြေကို မေ့ထားလိုက်ပါ။ အတွင်းနယ်မြေက ကြီးမားလွန်းတယ်။ ဘယ်လောက်ကြီးသလဲကို ဘယ်သူမှ မသိဘူး၊ အကြောင်းကတော့ ငါတို့နေတဲ့နေရာတွေကလွဲပြီး နေရာတော်တော်များများကို ထူထဲတဲ့မြူတွေနဲ့ ဖုံးအုပ်ထားတာလေ။ မြူတွေက အချိန်နဲ့အမျှ ကြီးလိုက်၊ ကျုံ့လိုက် ဖြစ်နေလျက်ပဲ။ဒါကြောင့် အတွင်းနယ်မြေရဲ့နေထိုင်လို့ရတဲ့နေရာတွေက အဆက်မပြတ်ပြောင်းလဲနေရတာပေါ့။ ဒီနေ့မှာ နေသာတဲ့နေရာတစ်ခုဖြစ်မယ်၊ နောက်တစ်နေ့ကျတော့ မြူထူတွေနဲ့ ဖုံးလွှမ်းသွားပြန်တယ်။ ဒီနေ့မှာ မြူထူတွေပြည့်နေတဲ့ရှာဖွေမဖော်ထုတ်ရသေးတဲ့နေရာတွေဖြစ်ပေမယ့် နောက်တစ်နေ့မှာ နေထိုင်ရာအသစ်ဖြစ်သွားပြန်ရော"

"မြူထူထဲမှာ အန္တရာယ်တစ်ခုခုရှိလား" ရန်ချင်းဟူက မေးလိုက်တယ်။

စကွမ်းက ပြောလိုက်တယ်"မြူထူထဲမှာ အကြိုနတ်ဘုရားသားရဲတွေ နေထိုင်တယ်။ အကြိုနတ်ဘုရားသားရဲတွေက အရမ်းကြောက်စရာကောင်းတယ်။ လက်ရှိမှာ အားအနည်းဆုံးအကြိုနတ်ဘုရားသားရဲတွေက အကြိုနတ်ဘုရားနယ်ပယ်ရဲ့အထွတ်အထိပ်မှာရှိတယ်။ အားကောင်းတဲ့အကြိုနတ်ဘုရားသားရဲတွေက ပြိုင်ဘက်ကင်းအကြိုနတ်ဘုရားတွေထက် ပိုသန်မာတယ်။ ဒါပေမယ့် အဲဒီအကြိုနတ်ဘုရားသားရဲတွေက ပုံမှန်အားဖြင့် မြူထူမရှိဘဲ ထွက်ပေါ်လာလေ့မရှိဘူး"

"အကြိုနတ်ဘုရားသားရဲတွေလား"

လီဖူချန်းရဲ့မျက်လုံးတွေက အံ့အားသင့်ခြင်းတွေ လင်းလက်သွားတယ်။

လီဖူချန်းက လေးယောက်ထဲမှာ ခေါင်းဆောင်ဆိုတာကို စကွမ်းက မြင်နိုင်တယ်။ သူက ရှင်းပြလိုက်တယ်"အကြိုနတ်ဘုရားသားရဲတွေက အကြိုနတ်ဘုရားနယ်မြေရဲ့ဒေသခံတွေပဲ။ သူတို့က နတ်ဘုရားသားရဲတွေမှ ဆင်းသက်လာပြီး သူတို့မှာ နတ်ဘုရားစွမ်းအားအရိပ်အယောင်တွေရှိတယ်လို့ လူအချို့က သံသယရှိတယ်။ ဒါက ဘာကြောင့် သူတို့က သာမန်အကြိုနတ်ဘုရားတွေထက် ပိုသန်မာနေတယ်ဆိုတာပဲ"

"ငါ သိပြီ" လီဖူချန်းက ခေါင်းညိတ်လိုက်တယ်"ဆက်ပြော"

"အကြိုနတ်ဘုရားနယ်မြေကို လက်ရှ်ိမှာ စကြာဝဠာရဲ့ဂိုဏ်းကြီးရှစ်ဂိုဏ်းနဲ့မဟာမိတ်ငါးဖွဲ့ဆိုပြီး ဆယ့်သုံးဖွဲ့ခွဲထားတယ်။ ဒီဆယ့်သုံးဖွဲ့က အတွင်းနယ်မြေရဲ့အကောင်းဆုံးနေရာတွေကို ပိုင်ဆိုင်ထားတယ်။ ဂိုဏ်းငယ်တွေအတွက်ကတော့ သူတို့က ထောင့်တွေမှပဲ နေရပြီး မြူထူတွေတိုးချဲ့လာတာကို အမြဲတမ်းစောင့်ကြပ်နေရတယ်။ သူတို့အထဲမှာ နတ်ဘုရားခန်းမက အသန်မာဆုံးပဲ။ သူတို့က အတွင်းပိုင်းနယ်မြေရဲ့နေထိုင်ရာဒေသတွေရဲ့အလယ်ဗဟိုကို အမြဲတမ်းသိမ်းပိုက်ထားတယ်"

စကြာဝဠာမှာ ဂိုဏ်းကြီးကိုးဂိုဏ်းရှိတယ်။ ဒီနေရာမှာ ရှစ်ခုပဲ ရှိတယ်လို့ ဆိုရခြင်းက ထာဝရစစ်တပ်ကို ဖယ်ထားလို့ပဲ။

စကြာဝဠာရဲ့ဂိုဏ်းကြီးကိုးဂိုဏ်းထဲက တစ်ခုအနေနဲ့ ထာဝရစစ်တပ်က သူတို့ရဲ့အနေအထားအပေါ် အနည်းငယ်အရှက်ရမိတယ်။ သူတို့မှာ ထာဝရအရှင်ဘုရင်လို့ခေါ်တဲ့ အကြိုနတ်ဘုရားတစ်ယောက်သာရှိတယ်။

ဒါပေမယ့် ထာဝရဘုရင်က သေချာပေါက် ဒဏ္ဍာရီတစ်ယောက်ဖြစ်တယ်။ သူက အသန်မာဆုံးအရှင်ဖြစ်ရုံသာမက ပြိုင်ဘက်ကင်းအကြိုနတ်ဘုရားတစ်ယောက်လည်း ဖြစ်တယ်။

ဒါ‌ပေမယ့် လွန်ခဲ့တဲ့တစ်ချိန်က ထာဝရဘုရင်က နက်နက်ရှိုင်းရှိုင်းအိမ်မောကျသွားခဲ့ပြီး ထာဝရစစ်တပ်အတွက် အကြိုနတ်ဘုရားလက်နက်တစ်ခုမှ မရရှိခဲ့ဘူး။ ဒီလိုနဲ့ ထာဝရစစ်တပ်က လူအင်အားကင်းမဲ့နေပြီး အကြိုနတ်ဘုရားအသစ်တွေတစ်ယောက်မှ မရှိလာခဲ့ဘူး။

ဒါပေမယ့် ဘယ်လိုပဲပြောပြော၊ ထာဝရဘုရင် မပျောက်ကွယ်သွားသရွေ့ ဂိုဏ်းကြီးတစ်ဂိုဏ်းကမှ ထာဝရစစ်တပ်ကို မဖိနှိပ်ရဲပါဘူး။ ပြိုင်ဘက်ကင်းအကြိုနတ်ဘုရားတစ်ယောက်ရဲ့ဒေါသက သာမန်လူတွေ ခုခံနိုင်တဲ့အရာမျိုးမဟုတ်ဘူးလေ။

"ဓားမော့မဟာမိတ်ရဲ့တည်နေရာက ဒီနေရာပတ်လည်မှာ ရှိတယ်။ ဓားသမားအစည်းအရုံးရဲ့တည်နေရာက ဒီနေရာပတ်လည်မှာ ရှိတယ်......" စကွမ်းက အတွင်းပိုင်းနယ်မြေရဲ့မြေပုံတစ်ခုကို ယူထုတ်ကာ ညွှန်ပြလိုက်တယ်။

" ဒီနေရာကတော့"

နောက်ဆုံးမှာ စကွမ်းရဲ့လက်က မြေပုံရဲ့ထိပ်ပိုင်းကို ညွှန်ပြလိုက်တယ်"ဒါက နတ်ဘုရားစစ်‌မြေပြင်ကိုဦးတည်တဲ့နတ်ဘုရားတံတားပဲ"