အစစ်အမှန် နဂါးဓားသိုင်း၊ ငါက ဓားတာအိုရဲ့ ပြိုင်ဘက်ကင်းပါရမီရှင်။

ထိုအခိုက်အတန့်တွင် ကျိုးစွေ့သည် တိတ်ဆိတ်သော အခန်းထဲမှ ခြေလှမ်းကျဲကြီးများဖြင့် ထွက်ခွာလာပြီး အင်မော်တယ်ရှားတောင်ထွတ်၏ အပြင်ဘက်၊ လူသူရှင်းလင်းသော သိုင်းလေ့ကျင့်ရေးကွင်းပြင်တစ်ခုဆီသို့ ရောက်ရှိလာသည်။

သူ့လက်ထဲတွင် ထိပ်တန်းအဆင့် မှော်လက်နက်ဖြစ်သော ဓားပျံတစ်လက်ကို ကိုင်ဆောင်ထားသည်။ သူ့ကိုယ်အတွင်းမှ မှော်စွမ်းအားများကို ၎င်းထဲသို့ ပို့လွှတ်လိုက်ပြီးနောက် ညင်သာစွာ တစ်ချက် ဝှေ့ယမ်းလိုက်သည်။

ဝှစ်…။

ရုတ်တရက်၊ ဓားအလင်းတန်းတစ်ခု ပေါက်ကွဲထွက်လာပြီး ပျံသန်းနေသော ငန်းတစ်ကောင်ပမာ လျင်မြန်စွာပင် မြေပြင်ပေါ်တွင် တုန်လှုပ်စဖွယ် အက်ကြောင်းကြီးတစ်ခု ထင်ကျန်ရစ်စေခဲ့သည်။

ဤသည်ကား ဒုတိယအဆင့် အောက်ခြေအဆင့် ဓားသိုင်းပညာဖြစ်သည့် ဓားချီအသွင်ပြောင်းခြင်း၏ စွမ်းအားပင်။

သူ၏ အရည်အချင်းကိုစမ်းကြည့်ရုံမျှသာ စမ်းသပ်လိုက်သော်လည်း၊ ဓားကျင့်ကြံသူတစ်ဦး၏ စွမ်းအားကို သက်သေပြရန် လုံလောက်နေချေသည်။

ဓားကို လက်နက်အားလုံး၏ ဘုရင်ဟု သတ်မှတ်ကြသည်မှာ အံ့ဩစရာ မရှိပေ။ ကျင့်ကြံသူများစွာထဲတွင် ဓားကျင့်ကြံသူများ၏ စွမ်းအားသည် အမြဲတစေ အသိအမှတ်ပြုခံရပြီး လေးစားအားကျခံရဆုံး ဖြစ်သည်။

သို့သော် ဓားတာအိုသည် သင်ယူရန် လွယ်ကူသော်လည်း ကျွမ်းကျင်ရန်မူ ခက်ခဲလှ၏။

ကျင့်ကြံသူအများစုမှာ အပေါ်ယံအခြေခံမျှသာ သင်ယူနိုင်ကြသည်။ အကယ်၍ တစ်စုံတစ်ယောက်သည် ဓားသိုင်းပညာတွင် ပင်ကိုပါရမီ မရှိဘဲ ရှေ့ဆက်တိုးတက်လိုပါက၊ ၎င်းသည် လုံးဝ မဖြစ်နိုင်သလောက်ပင်။

"အင်မော်တယ်ရှားဂိုဏ်းက ကျမ်းစာဆောင်မှာ ‘အစစ်အမှန် နဂါးဓားသိုင်း’ ဆိုတဲ့ စတုတ္ထအဆင့် ဓားပညာရပ်တစ်ခု ရှိတယ်"

"ဒါက အင်မော်တယ်ရှားဂိုဏ်းရဲ့ ဝိညာဉ်သန္ဓေသားအဆင့် ဘိုးဘေးတစ်ပါး ရရှိခဲ့တဲ့ မပြည့်စုံတဲ့ ဓားပညာရပ်လို့ ဆိုကြတယ်.. ဒါက အရမ်းကို နက်နဲတယ်"

"မပြည့်စုံတဲ့ ပညာရပ် ဖြစ်နေရင်တောင် စတုတ္ထအဆင့်ထိ ကျင့်ကြံလို့ ရနိုင်သေးတယ်"

"နှမြောစရာကောင်းတာကတော့.. အခုမှစတင်ကျင့်ကြံသူတွေအတွက်တော့ အရမ်း ခက်ခဲတဲ့အဆင့် ဖြစ်နေလို့ ဒီပညာရပ်ကို အောင်အောင်မြင်မြင် သင်ယူနိုင်ခဲ့တဲ့ ကျင့်ကြံသူတွေ အရမ်းကိုနည်းတယ်.."

"ဒီဓားပညာရပ်က ငါနဲ့ တော်တော်လေး ကိုက်ညီတယ်…"

ကျိုးစွေ့၏ စိတ်အတွင်းပိုင်းထဲမှ အသိပညာဗဟုသုတ အမြောက်အမြား ထွက်ပေါ်လာသည်။ ၎င်းအားလုံးမှာ 'စာအုပ်ကူ'၏ ကျေးဇူးများသာ ဖြစ်သည်။

ယနေ့အချိန်ထိ လန်ယွဲ့ရှီ၏ အကူအညီဖြင့် 'စာအုပ်ကူ'သည် အမွေအနှစ် ကျောက်စိမ်းမှတ်တမ်းပေါင်းများစွာကို စားသုံးခဲ့ပြီး ဖြစ်သည်။ ကျိုးစွေ့သည် အင်မော်တယ်ရှားဂိုဏ်းတွင် အသိပညာ အကြွယ်ဝဆုံးလူဟုပင် သတ်မှတ်၍ ရနိုင်နေပြီ ဖြစ်သည်။

သူကိုယ်တိုင်က ကြီးမားသော ကျမ်းစာဆောင်ကြီးတစ်ခုလို ဖြစ်နေပြီး၊ အချိန်မရွေး ဗဟုသုတ အမြောက်အမြားကို ဆွဲထုတ်သုံးစွဲနိုင်စွမ်း ရှိနေသည်။

အင်မော်တယ်ရှားဂိုဏ်းသည် ၎င်း၏အထွတ်အထိပ်ခေတ်တွင် ဝိညာဉ်သန္ဓေသားအဆင့်ဂိုဏ်းဟူသော ဘွဲ့ထူးနှင့် အမှန်တကယ် ထိုက်တန်ခဲ့ကြောင်း ဝန်ခံရပေမည်။

ယခင်က ကြီးမားသောကပ်ဘေးများနှင့် ကြုံတွေ့ခဲ့ရပြီး၊ တစ်ဖန်ပြန်လည် တည်ဆောက်ခဲ့ရသဖြင့် အမွေအနှစ်များအများအပြား ဆုံးရှုံးခဲ့ရသည့်တိုင်၊ ‘ဆင်ပိန်လျှင်တောင် ကျွဲလောက်တော့ ကျန်သေးသည်’ဟု ဆိုသည့်အတိုင်း အင်မော်တယ်ရှားဂိုဏ်း၏ စုဆောင်းမှုများသည် အခြားရွှေအမြုတေ ဂိုဏ်းများနှင့် နှိုင်းယှဉ်၍ပင် မရနိုင်ပေ။

'အစစ်အမှန် နဂါးဓားသိုင်း'သည် အင်မော်တယ်ရှားဂိုဏ်း၏ အခြေခံအုတ်မြစ်များထဲမှ တစ်ခု ဖြစ်သည်။

"ဒီအစစ်အမှန် နဂါးဓားသိုင်းက စတင်ကျင့်ကြံသူတွေအတွက် ခက်ခဲရတဲ့အကြောင်းရင်းက.. ဒါကို သင်ယူဖို့ဆိုရင် နဂါးအစစ်အမှန်ရဲ့ စွမ်းအားကို နားလည် သဘောပေါက်ရမှာမို့လို့ပဲ…"

"ပြဿနာက ဒီလောကမှာ အစစ်အမှန်နဂါးမပြောနဲ့.. ရေနဂါးတောင် မရှိဘူး"

"လေထဲမှာ အိမ်ဆောက်သလို စိတ်ကူးနဲ့ပဲ မှန်းဆနေရုံနဲ့.. နဂါးအစစ်အမှန်ရဲ့ စွမ်းအားကို ဘယ်လိုလုပ် နားလည်နိုင်မှာလဲ"

"ဒါပေမဲ့ ငါက မတူဘူး.. ငါ့ခန္ဓာကိုယ်ထဲမှာ 'နဂါးဆင်ကူ'ရှိတယ်.."

"ငါက နဂါးဆင်ရဲ့ စွမ်းအားကို အချိန်မရွေး နားလည်ဆင်ခြင်နိုင်တယ်..ဒါက နဂါးအစစ်အမှန်ရဲ့ စွမ်းအားကို အာရုံခံနိုင်စေတယ်"

"ဒါကြောင့် ဒီဓားပညာရပ်က ငါ့အတွက် သီးသန့်ဖန်တီးထားသလိုပဲ.. ငါ ဒါကို လွယ်လွယ်ကူကူ ကျွမ်းကျင်သွားမှာ သေချာတယ်.."

ကျိုးစွေ့၏ မျက်လုံးများ တောက်ပသွားသည်။

အစစ်အမှန် နဂါးဓားသိုင်းသည် မပြည့်စုံသော အခြေအနေတွင် ရှိပြီး စတုတ္ထအဆင့်အထိသာ ကျင့်ကြံနိုင်သည် ဆိုသော်လည်း၊ ၎င်းသည် လုံးဝ လုံလောက်နေပါပြီ ဖြစ်သည်။

ဤသည်မှာ ဝိညာဉ်သန္ဓေသားအဆင့်အထိ ကျင့်ကြံနိုင်သော ဓားပညာရပ်တစ်ခု ဖြစ်သည်။

ဤလောကကြီးတွင် အခြေတည်အဆင့် သို့မဟုတ် ရွှေအမြုတေနယ်ပယ်အထိသာ ကျင့်ကြံနိုင်သော ကျင့်စဉ်ပညာရပ်များ မရေမတွက်နိုင်အောင် ရှိသည်။

ဝိညာဉ်သန္ဓေသားအဆင့်အထိ ကျင့်ကြံနိုင်ခြင်းကပင် အလွန်တရာ ထူးခြားနေပြီ ဖြစ်၏။

မည်သည့်အချိန်မှ သူ ဝိညာဉ်သန္ဓေသားအဆင့် ဘိုးဘေးဖြစ်လာမည်ကို မသိနိုင်ပေ။

အနာဂတ်တွင် အခွင့်အရေးရပါက အစစ်အမှန် နဂါးဓားသိုင်း၏ ပြီးပြည့်စုံသော ပညာရပ်ကိုပင် ရှာတွေ့နိုင်သေးသည်။

ယခုအချိန်တွင် စတုတ္ထအဆင့် ဓားပညာရပ်တစ်ခုသည် လုံးဝ လုံလောက်နေပြီ ဖြစ်သည်။

ဝူးရှ်…။

ထိုအခိုက်အတန့်တွင် ကျိုးစွေ့က 'စာအုပ်ကူ'၏စွမ်းရည်ကို အသက်သွင်းလိုက်သည်။ အစစ်အမှန် နဂါးဓားသိုင်းအကြောင်း သတင်းအချက်အလက် ပမာဏအများအပြားက မီးခိုးရောင် အခိုးအငွေ့များနှင့်အတူ သူ၏သိစိတ်ပင်လယ် အနက်ပိုင်းထဲသို့ စီးဝင်သွားသည်။

သူ၏ နားလည်သဘောပေါက်နိုင်စွမ်းက ဒုံးပျံတစ်စင်းလို ထိုးတက်သွားသည်အား ခံစားလိုက်ရပြီး၊ ရုတ်တရက်ဆိုသလို သူသည် ပြိုင်ဘက်ကင်း ဓားသိုင်းပါရမီရှင်တစ်ယောက်အဖြစ် ပြောင်းလဲသွားသလိုပင်။

သာမာန်အားဖြင့်၊ ဤစတုတ္ထအဆင့် ဓားပညာရပ်သည် သဘာဝအတိုင်း ထူးကဲသော ဓားသိုင်းပညာပါရမီရှင်တစ်ယောက်မှသာ နားလည်သဘောပေါက်နိုင်ပေသည်။

သို့သော် ဤအခိုက်အတန့်တွင် သူသည် ချက်ချင်းဆိုသလို ဆင်ခြင်နားလည်နိုင်သွားတော့သည်။

[ 'အစစ်အမှန် နဂါးဓားသိုင်း'၊ ဓားချီဖြင့် နဂါးကိုထိန်းချုပ်ခြင်း၊ နဂါး၏ တန်ခိုးအာဏာကို ထုတ်လွှတ်ခြင်း။

လှုပ်ရှားမှုတိုင်းတွင် နဂါးအစစ်အမှန်တစ်ကောင် တိုက်ခိုက်နေသကဲ့သို့၊ မည်သည့်အခြေအနတွင်မဆို ရှုံးနိမ့်ခြင်း အလျင်းမရှိ။

ဤဓားသိုင်းပညာသည် နဂါးတန်ခိုးနဲ့ မွေးဖွားလာခြင်း ဖြစ်သည်။ ကြီးကျယ်ခမ်းနား၍ ဖြောင့်မတ်သည်။ သာမာန်လူများ မယှဉ်နိုင်သည့် ဘုရင့်တကာဘုရင်တို့ရဲ့ အရှင်သခင်။

၎င်းသည် ဒုတိယအဆင့် ဓားသိုင်းပညာအဖြစ် စတင်သည်။

'အစစ်အမှန် နဂါးဓားသိုင်းပညာ'၏ ပထမဆုံး လှုပ်ရှားမှု၊ 'နဂါးလက်သည်း'၊ ၎င်းကို လေ့ကျင့်ရန် အနိမ့်ဆုံး 'ဓားချီ အသွင်ပြောင်းခြင်း'နယ်ပယ်သို့ ရောက်ရှိထားရန် လိုအပ်သည်။ ]

ဤအခိုက်အတန့်တွင် ကျိုးစွေ့ (Zhou Sui) သည် အစစ်အမှန် နဂါးဓားသိုင်းကို လည်ပတ်နေပြီး၊ သူ့ကိုယ်ထဲမှ မှော်စွမ်းအားကို ၎င်း၏ လည်ပတ်မှုအတိုင်း ဖြန့်ကျက်လိုက်သည်။

သူ၏ အတွင်းသွေးကြောများထဲတွင် နဂါးအစစ်အမှန်တစ်ကောင် လူးလွန့်ကူးခတ်နေသည့်အလား ခံစားလိုက်ရသည်။

၎င်းသည် နဂါးအစစ်အမှန်တစ်ကောင်က မြစ်ကြီးတစ်စင်းထဲသို့ ဝင်ရောက်သွားပြီး နောက်ဆုံးတွင် ကျယ်ပြောသော ပင်လယ်ကြီးထဲ၌ ပေါ်ထွက်လာသကဲ့သို့ပင်။

သူ့ခန္ဓာကိုယ်ထဲမှ 'နဂါးဆင်ကူ'သည် တဆတ်ဆတ် တုန်ခါနေပြီး၊ သူ့အတွင်းမှ နဂါးဆင်သွေးများ ပွက်ပွက်ဆူလာတော့သည်။

သူ့အတွင်းမှ နဂါးအစစ်အမှန်တစ်ကောင်က ကောင်းကင်ကို မျက်နှာမူ၍ ဟိန်းဟောက်ကြုံးဝါးနေသကဲ့သို့ ခံစားနေရသည်။

ဘန်း…။

နောက်တစ်စက္ကန့်တွင် သူသည် ဓားပျံကို ကိုင်လျက် ရှေ့သို့ ခုတ်ပိုင်းချလိုက်သည်။

ဓားအလင်းတန်းတစ်ခု ပေါက်ကွဲထွက်လာသော်လည်း၊ ထိုဓားအလင်းတန်းသည် နဂါးလက်သည်းအဖြစ်သို့ အသွင်ပြောင်းသွားသည်။

နဂါးလက်သည်းဆိုသည်မှာ နဂါးအစစ်အမှန်၏ အစွမ်းထက်ဆုံး တိုက်ခိုက်ရေး နည်းလမ်းများထဲမှ တစ်ခုပင် ဖြစ်၏။

ထုတ်လွှတ်လိုက်သည်နှင့် ၎င်းသည် အလွန်အမင်း ကြောက်မက်ဖွယ်ကောင်းကာ၊ နိယာမအားလုံးကို ဖျက်ဆီးခြင်းဟူသော လေးနက်သည့်အဓိပ္ပာယ်ကို သယ်ဆောင်ထားသည်။

နဂါးလက်သည်းအောက်တွင် သတ္တဝါပေါင်းမည်မျှ အသက်ပျောက်ခဲ့ရသည်ကို မည်သူ သိနိုင်မည်နည်း။

အစစ်အမှန် နဂါးဓားသိုင်းပညာ၏ ပထမဆုံး လှုပ်ရှားမှုသည် 'နဂါးလက်သည်း'၏ စွမ်းအားကို အတုယူထားခြင်း ဖြစ်သည်။

မူလက ကြောက်မက်ဖွယ်ဓားချီသည် ယခုအခါ နဂါးလက်သည်းအဖြစ် အသွင်ပြောင်းသွားပြီး၊ အကောင်အထည်ဖြစ်တည်လာစေကာ နဂါးအစစ်အမှန်တစ်ကောင် လောကကြီးထဲ ပေါ်လာပြီး လက်သည်းဆန့်တန်းလိုက်သကဲ့သို့ ဖြစ်သွားသည်။

အုန်း…။

ရုတ်တရက်၊ အဝေးရှိ လေ့ကျင့်ကွင်းပေါ်မှ လူတစ်ရပ်စာခန့်မြင့်သော ဧရာမ ကျောက်တုံးကြီးတစ်တုံးသည် ချက်ချင်းဆိုသလို မရေမတွက်နိုင်သော အပိုင်းအစများအဖြစ် ကြေမွသွားတော့သည်။

နဂါးအစစ်အမှန်၏ ဧရာမ လက်သည်းကြီးက အသာအယာ ဆုပ်ကိုင်လိုက်သကဲ့သို့၊ ကျောက်တုံးကြီးမှာ အပိုင်းပိုင်းအစစ ကြေမွသွားပြီး ဓားအလင်းတန်းများစွာ တစ်ပြိုင်နက်တည်း ပေါက်ကွဲထွက်လာသည်။

ဤသည်မှာ အရာရာအား ဖျက်ဆီးပစ်နိုင်သော လုံးဝရပ်တန့်မရနိုင်သည် အစွမ်းပင် ဖြစ်ချေသည်။

"ဒါ... ဒါ အရမ်း အစွမ်းထက်လွန်းတယ်"

ကျိုးစွေ့ အံ့ဩတကြီး ရေရွတ်လိုက်မိသည်။ စတုတ္ထအဆင့် အစစ်အမှန် နဂါးဓားသိုင်းပညာသည် စိတ်ကူးမယဉ်နိုင်လောက်အောင် အစွမ်းထက်မှန်း သူ ကြိုတင်သိထားသော်လည်း၊ ဤမျှလောက်ထိ ကြောက်မက်ဖွယ်ကောင်းလိမ့်မည်ဟု သူ ဘယ်တုန်းကမှ မတွေးထားခဲ့မိပေ။

ဓားသိုင်းပညာတစ်ခုကို ကျွမ်းကျင်ပိုင်နိုင်ခြင်းနှင့် မည်သည့်ဓားသိုင်းပညာကိုမှ မသိရှိခြင်းသည် လုံးဝ ကွဲပြားခြားနားသော ကိစ္စရပ်များဟု ဆိုနိုင်သည်။

၎င်းသည် ရုပ်ပိုင်းဆိုင်ရာ အရည်အသွေးတူညီသော လူနှစ်ယောက်နှင့် တူသည်။

တစ်ယောက်က ကိုယ်ခံပညာရပ် မျိုးစုံတွင် ကျွမ်းကျင်ပြီး၊ နောက်တစ်ယောက်ကမူ သာမန်ကြံ့ခိုင်ရေးနည်းပြ တစ်ယောက်မျှသာ ဖြစ်သည်။

ပထမလူက ဒုတိယလူအား အသာအယာ အလဲသိပ်နိုင်ပေသည်။ သူတို့သည် တူညီသောအဆင့်အတန်းတွင် မရှိချေ။

လက်ရှိသည်လား အလားတူ နိယာမပင် ဖြစ်သည်။

အစစ်အမှန် နဂါးဓားသိုင်းပညာကို သင်ယူပြီးနောက်၊ သူသည် ဒုတိယအဆင့် ဓားသိုင်းပညာ၏ အောက်ခြေအဆင့်တွင်သာ ရှိနေသေးသော်လည်း၊ အစစ်အမှန် နဂါးဓားသိုင်းပညာမှ ထုတ်လွှတ်လိုက်သော ဓားအလင်းတန်းသည် သူ၏တိုက်ခိုက်ရေး စွမ်းအားကို အနည်းဆုံး ငါးဆမက တိုးမြှင့်ပေးလိုက်သည်။

အဘယ်ကြောင့်ဆိုသော အစစ်အမှန် နဂါးဓားသိုင်းပညာသည် ဓားချီလည်ပတ်ပုံ မတူညီသောကြောင့် ဖြစ်သည်။ ၎င်းသည် ထိရောက်မှုပိုမိုပြင်းထန်ပြီး စွမ်းအား ယိုစိမ့်မှု လုံးဝမရှိဘဲ၊ စွမ်းအားအလုံးစုံအား တစ်စုတစ်စည်းတည်း စုစည်းပေးကာ ပိုမို ကြောက်မက်ဖွယ်ကောင်းသော ဖျက်ဆီးစွမ်းအားကို ဖန်တီးပေးသည်။

အကယ်၍ ထိုတိုက်ကွက်သာ အခြေတည် အစောပိုင်းအဆင့်မှ အခြား ကျင့်ကြံသူတစ်ဦးကို သွားထိမိခဲ့လျှင်၊ သူ တွေးကြောက်မိသည်မှာ တစ်ချက်ဝှေ့ယမ်းလိုက်ရုံဖြင့် ရန်သူသည် အစိတ်စိတ်အမွှာမွှာ ကြေမွသွားပြီး၊ နဂါးအစစ်အမှန်တစ်ကောင်၏ ကြိတ်ချေခြင်းကို ခံလိုက်ရသကဲ့သို့ အပိုင်းပိုင်းအစစ ဖြစ်သွားလိမ့်မည် ဖြစ်သည်။

"မဖြစ်နိုင်တာ.. ငါ... ငါ ဒုတိယအဆင့် အလယ်အလတ်ဖြစ်တဲ့ ဓားချီ မိုးခြိမ်းသံနယ်ပယ်ကို ရောက်သွားသလိုပဲ.."

ဤအခိုက်အတန့်တွင် ကျိုးစွေ့၏ မျက်လုံးများ ပြူးကျယ်သွားသည်။

ထိုဓားချက်ကို ထုတ်ဖော်လိုက်ပြီးနောက်၊ မရေမတွက်နိုင်သော ထိုးထွင်းသိမြင်မှုများက သူ၏ သိစိတ်ပင်လယ် အနက်ရှိုင်းဆုံးအပိုင်းထဲသို့ စီးဝင်လာသည်ကို ခံစားလိုက်ရသည်။

သူ့ဦးနှောက်၏အတွင်းပိုင်းထဲတွင် ပုံရိပ်ယောင် နဂါးအစစ်အမှန် အများအပြား ပေါ်လာပြီး၊ လေဟာနယ်ထဲတွင် လှည့်လည်သွားလာရင်း သူတို့၏ဟန်ပန်ကို ပြသနေသကဲ့သို့ ထင်ရသည်။

အစစ်အမှန် နဂါးဓားသိုင်းသည် သူ့အတွက် သီးသန့်ဖန်တီးထားသည့်အလား အလွန်အမင်း လိုက်ဖက်ညီမှု ရှိနေသည်ကို ခံစားလိုက်ရသည်။

မူလတွင် တာအိုလက်တွဲဖော် ကျိပင်းယွီကြောင့် သူ၏ဓားသိုင်းပညာသည် ဒုတိယအဆင့် အောက်ခြေအဆင့်သို့ ရောက်ရှိနေခဲ့သည်။

ဒုတိယအဆင့် အလယ်အလတ်နယ်ပယ်နှင့် အနည်းဆုံး ၆၀% ကွာဟချက် ရှိနေသေးသည်။

သို့သော် ယခုမူ၊ သူ၏ ဒုတိယအဆင့် ဓားသိုင်းပညာသည် အံ့ဩစရာကောင်းသော အရှိန်ဖြင့် တိုးတက်လာနေသည်ကို ခံစားလိုက်ရသည်။

၅၀%၊ ၆၀%၊ ၇၀%... နောက်ဆုံးတွင် ၁၀၀% အထိ ပြည့်သွားတော့သည်။

ဒုတိယအဆင့် ဓားသိုင်းပညာ အလယ်အလတ်နယ်ပယ်၊ 'ဓားချီ မိုးခြိမ်းသံ'။

ဤအခိုက်အတန့်တွင် သူ၏ဓားသိုင်းပညာသည် ကျိပင်းယွီ၏နယ်ပယ်ကို ကျော်လွန်ကာ ဒုတိယအဆင့်၏ အလယ်အလတ်နယ်ပယ်သို့ ရောက်ရှိသွားသည်ကို ရုတ်တရက် သိလိုက်ရသည်။