ဒဏ္ဍာရီလာ ခန္ဓာကိုယ်၊ နှစ်တစ်ထောင်သက်တမ်း။

အချိန်ကာလသည် တရွေ့ရွေ့ဖြင့် နောက်ထပ်၃နှစ် ကုန်ဆုံးသွားခဲ့သည်။

အင်မော်တယ်ရှားတောင်ထွတ်ပေါ်ရှိ သိုင်းလေ့ကျင့်ရေး ကွင်းပြင်ကျယ်ကြီးထဲတွင်။

ကျိုးစွေ့တစ်ယောက် ဓားပျံတစ်လက်ကို ကိုင်ဆောင်ထားပြီး၊ သူ့ပတ်ပတ်လည်၌ ကြောက်မက်ဖွယ် ဓားချီလှိုင်းများက ဝန်းရံလျက် ရှိသည်။

မရေမတွက်နိုင်သော ဓားချီများ ပေါင်းစပ်ကာ ကောင်းကင်ယံ၌ စစ်မှန်သော နဂါးတစ်ကောင် ဝဲပျံနေသကဲ့သို့ပင်။

ကြောက်မက်ဖွယ် ဖိအားတစ်ခုက အရပ်လေးမျက်နှာသို့ ပျံ့နှံ့ထွက်ပေါ်နေပြီး မြင်ရသူတိုင်း၏ နှလုံးသားကို တုန်လှုပ်ခြောက်ခြားစေသည်။

မြေပြင်သည် ယင်းအရှိန်အဝါ၏ ဖိနှိပ်မှုကြောင့် အက်ကြောင်းများ ထင်လာပြီး တဖြောင်းဖြောင်းမြည်သံများ ထွက်ပေါ်နေသည်။

နောက်တစ်စက္ကန့်တွင် သူသည် ဓားကို ညင်သာစွာ ဝှေ့ယမ်းလိုက်ပြီး အဝေးရှိ နေရာတစ်ခုသို့ တိုက်ခိုက်လိုက်သည်။

လေထုထဲတွင် မည်သည့် လှိုင်းဂယက်မှ မဖြစ်ပေါ်စေဘဲ၊ အသံတိတ်ဓားချီလှိုင်းတစ်ခုက လေထဲသို့ ပျော်ဝင်သွားသော နဂါးအစစ်အမှန်တစ်ကောင်နှယ်၊ မီတာရာပေါင်းများစွာ ဝေးကွာသော တောင်ထွတ်တစ်ခုကို ချက်ချင်း ရိုက်ခတ်သွားသည်။

ဘန်း…။

တစ်ခဏအတွင်းမှာပင် ထိုတောင်ထွတ်သည် ဓားချက်ကြောင့် ထိုးဖောက်ခံလိုက်ရပြီး လက်သီးဆုပ်အရွယ် အပေါက်ကြီးတစ်ခု ဖြစ်ပေါ်သွားသည်။

လွင့်စဉ်သွားသော ကျောက်တုံး အပျက်အစီးများအားလုံးက အမှုန့်အဖြစ် ကြေမွသွားခဲ့သည်။

အစစ်အမှန်နဂါးဓားသိုင်း၏ တတိယပုံစံ၊ “နဂါးအမြီးလွှဲရမ်းခြင်း”။

"အောင်မြင်ပြီ…"

ဓားချက်၏ ထိရောက်မှုကို မြင်လိုက်ရသောအခါ ကျိုးစွေ့မျက်နှာပေါ်တွင် ကျေနပ်ပျော်ရွှင်သော အမူအရာတစ်ခု ထင်ဟပ်သွားသည်။

သုံးနှစ်တာ ကာလပတ်လုံး အပြင်းအထန် ကျင့်ကြံပြီးနောက်၊ နောက်ဆုံးတွင် အစစ်အမှန်နဂါးဓားသိုင်း ၏ တတိယပုံစံဖြစ်သော 'နဂါးအမြီးလွှဲရမ်းခြင်း'ကို ကျွမ်းကျင် ပိုင်နိုင်သွားခဲ့ပြီ ဖြစ်သည်။

၎င်းက သူ၏ ဓားသိုင်းပညာသည် ဒုတိယအဆင့် အထွတ်အထိပ်အဆင့်၊ 'ပုံရိပ်မဲ့ ဓားအလင်းတန်း'သို့ ရောက်ရှိသွားပြီ ဖြစ်ကြောင်း အတိအလင်း ပြသနေသည်။

သိထားရမည်မှာ၊ အခြေတည်အဆင့်သို့ ရောက်ရှိပြီးသော ဓားကျင့်ကြံသူများထဲတွင်ပင် ဤနယ်ပယ်သို့ ရောက်ရှိနိုင်သူ အလွန် ရှားပါးလှသည်။

အချို့ဆိုလျှင် ရွှေအမြုတေ ဆရာသခင်ဖြစ်လာပြီးနောက်မှသာ 'ပုံရိပ်မဲ့ ဓားအလင်းတန်း'နယ်ပယ်ကို နားလည် သဘောပေါက်သွားကြသည်။

ဤအချက်ကပင် ဤနယ်ပယ်သို့ ရောက်ရှိရန် မည်မျှ ခက်ခဲကြောင်း စိတ်ကူးကြည့်နိုင်ပေသည်။

ဤနယ်ပယ်သို့ ရောက်ရှိသွားသည်နှင့်တစ်ပြိုင်နက် ဓားအလင်းတန်း၏ အလျင်သည် အဆပေါင်းများစွာ ပိုမိုလျင်မြန်လာပြီး၊ မမြင်နိုင်မကြားနိုင်တော့ပေ။

ရံဖန်ရံခါတွင် ရန်သူသည် ဘာဖြစ်သွားမှန်း မသိလိုက်ခင်မှာပင် ဓားတစ်ချက်တည်းဖြင့် ထိုးဖောက်ခံရပြီး ချက်ချင်း သေဆုံးသွားနိုင်သည်။

အလယ်အလတ်အဆင့် ကာကွယ်ရေး ဝိညာဉ်လက်နက် ဝတ်ဆင်ထားလျှင်ပင် ၎င်းကို ခုခံနိုင်စွမ်း မရှိပေ။

ဤသည်မှာ ဓားကျင့်ကြံသူများကို ကျင့်ကြံသူအားလုံးထဲတွင် အစွမ်းထက်ဆုံး တိုက်ခိုက်ရေးသမားများအဖြစ် သတ်မှတ်ကြသည့် အကြောင်းရင်းပင် ဖြစ်သည်။

ထိုသို့သော တိုက်ခိုက်မှု စွမ်းအားတစ်ခုတည်းကိုပင် အခြားကျင့်ကြံသူ အမျိုးအစားများက ယှဉ်နိုင်စွမ်း မရှိကြပေ။

အစစ်အမှန်နဂါးဓားသိုင်း၏ တတိယပုံစံသည် သာမန် ပုံရိပ်မဲ့ ဓားအလင်းတန်းထက်ပင် ပိုမို ကြောက်မက်ဖွယ်ကောင်းလှသည်မှာ သံသယဖြစ်စရာမရှိချေ။

အစစ်အမှန် နဂါးတစ်ကောင် အမြီးလွှဲရမ်းလိုက်သကဲ့သို့၊ လေဟာနယ်ထဲသို့ ပျော်ဝင်သွားသည့်အလား မည်သည့်သတ်ဖြတ်လိုစိတ် အရိပ်အယောင်ကိုမျှ မထွက်ပေါ်စေဘဲ ကြောက်မက်ဖွယ် နဂါးစွမ်းအားကို သယ်ဆောင်ထားကာ သာမာန်ကျင့်ကြံသူများ လုံးဝ အာရုံခံနိုင်မည် မဟုတ်ချေ။

တစ်ချက်ထိမှန်သည်နှင့် ၎င်းသည် ရန်သူ၏အကာအကွယ်ကိုထိုးဖောက်ပြီး၊ ၎င်း၏ အတွင်းကလီစာများကိုပါ ထွင်းဖောက်ကာ စိတ်ကူးမယဉ်နိုင်သော ပျက်စီးဆုံးရှုံးမှုကို ဖြစ်စေသည်။

ဤအချက်ကြောင့်ပင် အစစ်အမှန်နဂါးဓားသိုင်းသည် ဤမျှ နာမည်ကြီးရခြင်း ဖြစ်သည်။

အတိတ်က အင်မော်တယ်ရှားဂိုဏ်းကို တည်ထောင်ခဲ့သော ဘိုးဘေးပင်လျှင် ဤဓားသိုင်းပညာကို အောင်မြင်စွာ မကျင့်ကြံနိုင်ခဲ့ပေ။

အဘယ်ကြောင့်ဆိုသော် ဓားသိုင်းပညာတွင် သူ၏ ပါရမီသည် နိမ့်ကျနေပြီး၊ ဤဓားသိုင်းပညာနှင့် ကိုက်ညီမှုမရှိသောကြောင့် ဖြစ်၏။

"မဆိုးဘူးပဲ.."

ကျိုးစွေ့ အလွန် ကျေနပ်သွားသည်။ ဓားသိုင်းပညာတွင် သုံးနှစ်တာ အပြင်းအထန်ကျင့်ကြံမှုသည် အချည်းနှီး မဖြစ်ခဲ့ဘဲ အတိုင်းအတာတစ်ခုအထိ တိုးတက်မှု ရရှိခဲ့သည်။

မှန်ပေသည်၊ သူသည် ဓားသိုင်းပညာသာမက အခြားသော ကျင့်ကြံခြင်းပညာရပ်များကိုလည်း လစ်လျူမရှုခဲ့ပေ။

ဤသို့ တွေးရင်း သူ၏အချက်အလက်ပြ မျက်နှာပြင်ကို ဖွင့်ကြည့်လိုက်သည်။

[ ပိုင်ရှင် - ကျိုးစွေ့၊ ကျင့်ကြံမှု - အခြေတည် အစောပိုင်းအဆင့် (တိုးတက်မှု ၉၇%)၊ သက်တမ်း - ၃၂ (နှစ် ၁၀၀၀) ]

[ ပင်ကိုပါရမီ - ဆဌမအဆင့် စိတ်ဝိညာဉ်အမြစ် (၈၀%) ]

[ ဓားသိုင်းပညာ - ဒုတိယအဆင့် အထွတ်အထိတ်အဆင့် (၁၀%) ]

[ အဆောင်ပညာ - ဒုတိယအဆင့် အောက်ခြေအဆင့် (၅၀%) ]

[ အစီအရင်ပညာ - ဒုတိယအဆင့် အောက်ခြေအဆင့် (၅၀%) ]

[ ဆေးဖော်စပ်ပညာ - ဒုတိယအဆင့် အလယ်အလတ်အဆင့် (၉၅%) ]

[ နတ်ဆိုးအသွင်ပြောင်း ပညာရပ် - အသေးစားအောင်မြင်မှုအဆင့် (၉၀%) ]

[ ဓာတ်ငါးပါး ဆေးဖော်စပ်ပညာရပ် - အကြီးစားအောင်မြင်မှုအဆင့် (၈၅%) ]

[အလင်းမျက်လုံးခုနစ်လုံး လျှို့ဝှက်ပညာရပ် - နှလုံးသားမျက်လုံး အသိအမှတ်ပြုခြင်း၊ နှလုံးသားမျက်လုံး အမြင်၊ နှလုံးသားမျက်လုံး ဘာသာစကား (၂၀%)]

[ မီးလုံးပညာရပ် - မဟာဆရာသခင်အဆင့် (၈၀%)၊ လေဓားသွားပညာ - ကျွမ်းကျင်အဆင့်၊ ရွှေအလင်းပညာ - ကျွမ်းကျင်အဆင့်၊ ရေခဲနှင်းပညာ - ကျွမ်းကျင်အဆင့်၊ နွေလေမိုးပညာ - ကျွမ်းကျင်အဆင့်၊ လျှပ်စီးဆင့်ခေါ်ခြင်းပညာ - ကျွမ်းကျင်အဆင့်၊… ]

[ ‘ချစ်ခြင်းမေတ္တာကူ’ - အဆင့်သုံး အောက်ခြေအဆင့်၊ ‘ကိုယ်ပွားကူ’ - အဆင့်နှစ် အောက်ခြေအဆင့်၊ ‘အရက်ကူ’ - အဆင့်နှစ် အောက်ခြေအဆင့်၊ ‘ရွှေစားကူ’ - အဆင့်နှစ် အောက်ခြေအဆင့်၊ 'စာအုပ်ကူ' - အဆင့်နှစ် အောက်ခြေအဆင့်၊ ‘အိပ်မက်ဝိညာဉ်ကူ’ - အဆင့်နှစ် အလယ်အလတ်အဆင့်၊ ‘နဂါးဆင်ကူ’ - အဆင့်နှစ် အောက်ခြေအဆင့်၊ ‘ရွှေအလင်းတစ်ထောင်ကူ’ - အဆင့်နှစ် အောက်ခြေအဆင့်၊ ‘တည်နေရာပြောင်းကူ’ - အဆင့်နှစ် အောက်ခြေအဆင့်။ ]

ချက်ချင်းဆိုသလိုပင်၊ သူ၏ကျင့်ကြံမှုအဆင့်နှင့် သူကျွမ်းကျင်ပိုင်နိုင်ခဲ့သော ပညာရပ်များအားလုံး သူ၏ ရှေ့မှောက်တွင် ရှင်းရှင်းလင်းလင်း ပေါ်လာသည်။

'စာအုပ်ကူ'၏ အကူအညီသည် ပို၍ သိသာထင်ရှားလာသည်ဟု ဆိုနိုင်သည်။

၎င်း၏ အကူအညီသာ မရှိခဲ့ပါက၊ သူ၏လက်ရှိ ရုပ်ပိုင်းဆိုင်ရာ အခြေအနေနှင့် ကျင့်ကြံခြင်း တိုးတက်မှုကို ဤမျှ တိတိကျကျ သူ သိရှိနိုင်မည် မဟုတ်ချေ။

"ကြည့်ရတာ ငါ့ရဲ့ ကျင့်ကြံမှုက အခြေတည် အစောပိုင်းအဆင့်ရဲ့ အဆုံးသတ်.. ၉၇%တောင် ဖြစ်နေပြီပဲ"

"အဲ့ဒီအခါကျရင် ငါ ချိုးဖြတ်မှုတစ်ခု ပြုလုပ်ပြီး အခြေတည် အလယ်အလတ်အဆင့်ကို တက်လှမ်းနိုင်တော့မယ်…"

ကျိုးစွေ့၏ မျက်လုံးများတွင် ဆုံးဖြတ်ချက်ခိုင်မာသော အလင်းတချို့ လက်သွားသည်။

အခြေတည် အစောပိုင်းအဆင့်သို့ တက်လှမ်းခဲ့သည့် အချိန်မှစ၍၊ သူသည် ရှစ်နှစ်ခန့် လုံ့လဝီရိယဖြင့် ကျင့်ကြံခဲ့ပြီး ဖြစ်သည်။

သို့သော်ငြား၊ အခြေတည် အလယ်အလတ်အဆင့်သို့ သူမတက်လှမ်းနိုင်သေးပေ။ သို့သော် ဤသည်မှာ မျှော်လင့်ထားပြီးသား ကိစ္စတစ်ခုသာ ဖြစ်သည်။

သာမန်အားဖြင့်၊ အခြေတည် အစောပိုင်းအဆင့်မှ ကျင့်ကြံသူများသည် ဆယ်စုနှစ်များစွာ ကြာအောင် အပြင်းအထန် ကျင့်ကြံလျှင်ပင် ချိုးဖြတ်နိုင်မည်မှာ မသေချာပေ။

အများစုသည် ဤအဆင့်တွင်သာ တစ်သက်လုံး ပိတ်မိနေပြီး ချိုးဖြတ်မှု မပြုလုပ်နိုင်တော့ပေ။

လန်ယွဲ့ရှီကဲ့သို့ ပထမအဆင့် စိတ်ဝိညာဉ်အမြစ်ရှိသော ပါရမီရှင်တစ်ဦးပင်လျှင် ချိုးဖြတ်မှုတစ်ခု ပြုလုပ်နိုင်ရန် ဆယ်နှစ်တိတိ လုံ့လဝီရိယဖြင့် ကျင့်ကြံခဲ့ရသည်။

ကျိပင်းယွီ၊ မုဇီယန်နှင့် ရှားကျင်းယန်တို့အတွက်မူ ယခုအချိန်အထိ ၎င်းတို့၏ တိုးတက်မှုသည် အခြေတည် အစောပိုင်းအဆင့်၏ ၄၀% သို့သာ ရောက်ရှိသေးပြီး၊ အခြေတည် အလယ်အလတ်အဆင့်သို့ ရောက်ရှိရန် အလှမ်းဝေးနေသေးသည်။

အခြေတည် အလယ်အလတ်အဆင့်သို့ အမှန်တကယ် ချိုးဖြတ်တက်လှမ်းနိုင်ရန် သူတို့ နောက်ထပ် ဆယ်နှစ်ခန့် အပြင်းအထန် ကြိုးစားအားထုတ်ရန် လိုအပ်ဦးမည် ဖြစ်သည်။

ဤကျင့်ကြံမှု အရှိန်နှုန်းသည်ပင် လျင်မြန်လှသည်ဟု သတ်မှတ်ရမည် ဖြစ်သည်။

မည်သို့ပင်ဆိုစေကာမူ၊ နှစ်၂၀ အတွင်း အခြေတည် အလယ်အလတ်အဆင့်သို့ ချိုးဖြတ်တက်လှမ်းခြင်းသည် မရေမတွက်နိုင်သော အခြေတည်အဆင့် ကျင့်ကြံသူများ အိပ်မက်မက်ရသော ကျင့်ကြံမှုအရှိန်နှုန်းတစ်ခု ဖြစ်၏။

ယင်းသည် သူတို့၏ သက်တမ်း မကုန်ဆုံးမီ၊ အခြေတည် အထွတ်အထိတ်အဆင့်သို့ တက်လှမ်းရန် အခွင့်အလမ်းကောင်း ရစေပြီး၊ ထို့နောက်တွင် အမြုတေ ဖွဲ့စည်းခြင်းအား ကြိုးစားနိုင်မည်ဟု ဆိုလိုသည်။

"ငါ့ရဲ့ သက်တမ်းက အခုဆို နှစ်တစ်ထောင်ကို ရောက်နေပြီပဲ…"

မှန်ပေသည်၊ ကျိုးစွေ့ကို အံ့အားသင့်ဆုံး ဖြစ်စေသည့်အရာမှာ သူ၏ သက်တမ်း တိုးလာခြင်းပင် ဖြစ်သည်။

လွန်ခဲ့သော သုံးနှစ်အတွင်း၊ 'နဂါးဆင်ကူ'၏ စဉ်ဆက်မပြတ် သန့်စင်ပေးမှုနှင့် ကြီးမားလှသော လျှို့ဝှက်ဆန်းကြယ်သည့် သွေးစွမ်းအင်များ စီးဝင်လာခြင်းကျေးဇူးကြောင့်၊ သူ၏ ကာယကြံ့ခိုင်မှုကို မြှင့်တင်ပေးရုံသာမက သက်တမ်းကိုပါ တိုးပွားစေခဲ့သည်။

လက်ရှိ သူ၏သက်တမ်းသည် နှစ်၈၀၀မှ နှစ်၁၀၀၀ အထိ တိုးမြင့်လာခဲ့သည်။

ရိုးရိုးသားသားဆိုရလျှင်၊ ဤသက်တမ်းသည် သာမန် ဝိညာဉ်သန္ဓေသားအဆင့် ကျင့်ကြံသူတစ်ဦး၏ သက်တမ်းနှင့်ပင် နှိုင်းယှဉ်နိုင်နေပြီ ဖြစ်သည်။

သူသည် ယခုမှ အခြေတည်အဆင့် ကျင့်ကြံသူတစ်ဦးသာ ဖြစ်သေးသော်လည်း၊ သာမန် ဝိညာဉ်သန္ဓေသားအဆင့် ကျင့်ကြံသူများလည်း ဤမျှလောက်သာ အသက်ရှင်သန်နိုင်ကြောင်းကို သိထားရပေမည်။

ဤအကြောင်းကိုသာ လူသိရှင်ကြား ထုတ်ဖော်ကြေညာလိုက်ပါက၊ မရေမတွက်နိုင်သော ကျင့်ကြံသူများကို သေချာပေါက် တုန်လှုပ်သွားစေပေမည်။

"နဂါးဆင်ခန္ဓာကိုယ် ဆိုတဲ့ နာမည်နဲ့ တကယ်ထိုက်တန်တာပဲ.. အခု ငါ့ရဲ့ ရုပ်ခန္ဓာက သာမန် လူသားတစ်ယောက် မဟုတ်တော့ဘူး…"

"တစ်နည်းပြောရရင် ငါက ထူးခြားဆန်းကြယ်တဲ့ သက်ရှိပုံစံတစ်ခု ဖြစ်လာနေပြီ.."

"ဒါကြောင့်ပဲ ငါ့ရဲ့ သက်တမ်းက စိတ်ကူးနိုင်တာထက် ကျော်လွန်ပြီး ဒီလောက် ရှည်ကြာနေတာပဲ…"

ကျိုးစွေ့က သူ့မေးစေ့ကို ပွတ်သပ်လိုက်သည်။ အတွင်းထဲမှ တက်ကြွလန်းဆန်းသော အသက်စွမ်းအင်အား သူ ခံစားနေရသည်။

လက်တွေ့တွင် မတူညီသော မျိုးစိတ်များ၏ သက်တမ်းများသည် ကွဲပြားခြားနားကြသည်။

သာမန်လူသားများသည် ကျင့်ကြံခြင်းမရှိပါက အများဆုံး နှစ်တစ်ရာသာ နေနိုင်ကြသည်။

သို့သော် နတ်ဆိုးမျိုးနွယ်များ သို့မဟုတ် ယောင်သားရဲများတွင်မူ၊ ၎င်းတို့ အဆင့်တစ်တွင်ရှိနေလျှင်ပင် နှစ်၂၀၀၊ ၃၀၀ခန့် နေနိုင်ကြသည်။

အကယ်၍ အဆင့်နှစ်သို့ တက်လှမ်းနိုင်ပါက၊ နှစ်၅၀၀ သို့မဟုတ် ၆၀၀ခန့် နေထိုင်နိုင်ခြင်းသည် သာမန်သာ ဖြစ်သည်။

အကယ်၍ လိပ်မျိုးနွယ်စုများ ဖြစ်ပါက၊ သူတို့တွင် နှစ်ထောင်ချီ သို့မဟုတ် နှစ်သောင်းချီ သက်တမ်းပင် ရှိနေနိုင်သည်။

အတိုချုပ်ရလျှင်၊ သက်တမ်းအရှည်သည် မတူညီသော မျိုးစိတ်များကြားတွင် ကွဲပြားခြားနားသည်။

လက်ရှိသူသည်လည်း အတူတူပင် ဖြစ်သည်။ 'နဂါးဆင်ကူ'မှ ရရှိသော သန့်စင်ခြင်းစွမ်းအားဖြင့် သူသည် လူသားတို့၏ သက်တမ်းကန့်သတ်ချက်ကို လွယ်ကူစွာ ချိုးဖျက်နိုင်ခဲ့ပြီး၊ စစ်မှန်သော နတ်နဂါးတစ်ကောင် သို့မဟုတ် ဆင်နတ်ဘုရားတစ်ပါး၏ သက်တမ်းကို ပိုင်ဆိုင်ထားသည်။

ဤသတ္တဝါများသည် ဒဏ္ဍာရီလာ သတ္တဝါများကဲ့သို့ မွေးဖွားလာစဉ်ကတည်းက မယုံနိုင်လောက်အောင် ရှည်လျားသော သက်တမ်းများကို ပိုင်ဆိုင်ထားကြသည်။

သူတို့သည် ထာဝရသက်တမ်းကို မပိုင်ဆိုင်နိုင်သော်လည်း၊ ၎င်းတို့၏သက်တမ်းများသည် သာမန် သတ္တဝါများ စိတ်ကူးနိုင်သည်ထက် သေချာပေါက် ပိုမိုရှည်လျားကြသည်။

ကျိုးစွေ့သည် ယခုအခါ ထိုလက္ခဏာများထဲမှ အချို့ကို ရရှိပိုင်ဆိုင်နေပြီဟု ဆိုရပေမည်။