တောင်ထွတ်ရွေးချယ်ပွဲအခမ်းအနား

Vol. 40 Ch. 547

များပြားလှသော တပည့်များမှ နဂါးကောင်းချီးအား ခံယူနေကြသည်မှာ အလွန်ပင် ရင်သက်ရှုမောဖွယ်ကောင်းသော မြင်ကွင်းတစ်ခုပင် ဖြစ်လေသည်။ မူလရေကန်ဖွင့်လှစ်ခြင်း အခမ်းအနားမှာ ကလန်၏ ကြီးကျယ်သော ပွဲအခမ်းအနားတစ်ခုဖြစ်သောကြောင့် ထိုနဂါးကောင်းချီးခံယူရရှိခြင်းသည်ပင် ရက်အတော်ကြာမြင့်ပေ၏။

အနိမ့်ဆုံးအဆင့်အား ရရှိခဲ့ကြသည့် ဓားကပ်ဘေးတောင်ထွတ်မှ တပည့်များအားလုံး နဂါးကောင်းချီးခံယူရရှိရန်အတွက်ပင် ရက်အနည်းငယ် ကြာမြင့်ခဲ့သည်။

ဤသို့ဖြင့် တောင်ထွတ်တစ်ခုပြီးတစ်ခု နဂါးကောင်းချီးအား ခံယူနေကြသည်မှာ ရက်အတော်ကြာမျှပင် ကြာမြင့်ခဲ့သည်။ ရွေးချယ်ခံများနှင့် တပည့်ခေါင်းဆောင်များ နဂါးကောင်းချီးခံယူရသည့်အချိန်သည် တစ်လနီးပါးမျှပင် ကြာမြင့်၏။

သို့သော် နဂါးကောင်းချီးခံယူသည့်ပွဲမှာ မပြီးဆုံးသေးပေ။ ကောင်းချီးယဇ်ပုလ္လင်၏ အမြင့်တစ်နေရာပေါ်၌ နဂါးကောင်းချီးအား လက်ခံရယူခြင်းမပြီးဆုံးသေးသည့် ပုံရိပ်တစ်ခု ရှိနေလေသည်။ ထိုပုံရိပ်မှာ နဂါးကိုးကောင်ကောင်းချီးအား လက်ခံရယူနေသော ဇူယွမ်ပင် ဖြစ်သည်။

နဂါးကိုးကောင်ကောင်းချီးအတွက် ရရှိသော ချီစွမ်းအင်များမှာ များပြားလွန်းလှသည်။ ထို့အတွက်ကြောင့်ပင် ဇူယွမ်မှာ လက်ခံရယူခြင်း မပြီးဆုံးသေးသည်ဖြစ်၏။

နဂါးကောင်းချီးများအား လက်ခံရယူကြပြီးသည့်နောက်တွင် တပည့်များမှာ အသီးသီး ပြန်လည်ထွက်ခွာသွားကြသည်။ ကလန်ခေါင်းဆောင်ချင်းယန်နှင့် တောင်ထွတ်ဆရာသခင်များမှာလည်း ဇူယွမ်အား ကြည့်ရှုရန်အတွက် အကြီးအကဲတစ်ဦးကိုသာထားရှိ၍ ပြန်လည်ထွက်ခွာသွားကြလေသည်။ ဤသို့ဖြင့် ဇူယွမ်တစ်ဦးသည်သာလျှင် ကောင်းချီးယဇ်ပုလ္လင်စင်မြင့်ပေါ်၌ ကျန်ရစ်တော့သည်။

အချိန်များစွာ ကုန်ဆုံးသွားပြီးနောက် ကန်ရွှမ်းကလန်မှာ အေးချမ်းငြိမ်သက်နေလျက် ရှိသည်။ သို့သော် တပည့်များမှာ မူလရေကန်ဖွင့်လှစ်ခြင်း အခမ်းအနားအကြောင်းအား စကားစမြည် ပြောဆိုကြတိုင်းတွင် ကောင်းချီးယဇ်ပုလ္လင်စင်မြင့်ထက်၌ရှိနေသောပုံရိပ်တစ်ခုအား အဝေးမှ ငေးမောကြည့်ရှုနေကြရဆဲသာ ဖြစ်၏။

ထိုသို့ ငေးမောကြည့်ရှုစဉ်တိုင်းတွင်လည်း ၎င်းတို့၏ မျက်ဝန်းများမှာ အားကျမနာလိုမှုနှင့် လေးစားမှု အငွေ့အသက်များ ရောပြွန်းနေကြရသည်။

"မူလသူတော်စင်တောင်ထွတ်ရဲ့ တပည့်ခေါင်းဆောင်ဇူယွမ်က ကောင်းချီးကိုလက်ခံတာ အရမ်းကိုကြာနေပြီနော်။"

"နဂါးကိုးကောင်ကောင်းချီးမို့ကြာတာလည်း ဖြစ်ချင်ဖြစ်မှာပေါ့။ ငါတို့မှ နဂါးကိုးကောင်ကောင်းချီးကို မမြင်ဖူးတာ။"

"ကောင်းချီးလက်ခံပြီးသွားရင် ဇူယွမ်ဘယ်လောက်ထိ သန်မာလာမလဲ မသိဘူးနော်။ စိတ်ဝင်စားစရာပဲ။"

"ဇူယွမ်ကတော့ ကျင့်ကြံရေးအဆင့်နိမ့်နေလို့ မပြောတက်ဘူး။ တခြားတပည့်ခေါင်းဆောင်တွေကတော့ အခုတစ်ခေါက် မူလရေကန်ဖွင့်လှစ်တဲ့ အခမ်းအနားပြီးလို့ ကောင်းချီးတွေကို လက်ခံပြီးသွားတဲ့အချိန်မှာ မူလစဦး နဝမအဆင့်ကို ရောက်ကုန်ကြပြီတဲ့။ သူတို့ရဲ့ ချီစွမ်းအင်အခြေခံအုတ်မြစ်က ရွေးချယ်ခံတွေလောက်တော့ မသန်မာဘူးပေါ့ကွာ။"

"ဟီးဟီး....ဓားကပ်ဘေးတောင်ထွတ်ရဲ့ တပည့်ခေါင်းဆောင် ပိုင်လီချွီးကတော့ အဆင့်တက်သွားပြီးတဲ့အချိန် မြောက်ကြွမြောက်ကြွတောင် ဖြစ်သွားတာကွ။ အခုချိန် သူနဲ့ဇူယွမ်ချရင်တောင် တစ်ချက်တည်းနဲ့ ပွဲသိမ်းနိုင်ပြီဘာညာဆိုပြီး ပြောနေတာ။"

"အဟက်...ပိုင်လီချွီးရဲ့စကားကို ဘယ်သူက ယုံမှာတဲ့လဲ။ ဇူယွမ်က သူ့ကိုတစ်ခါချနိုင်မှတော့ နောက်တစ်ခါလည်း နိုင်မှာပဲလေ။"

"........"

ဤသို့ဖြင့် နဂါးကိုးကောင်ကောင်းချီးအား ဇူယွမ်ခံယူနေသည်မှာ နှစ်လမျှပင် ရှိလာပြီဖြစ်သည်။ ဇူယွမ်မှ နဂါးကောင်းချီးအား ခံယူနေဆဲပင်ဖြစ်သော်လည်း ကန်ရွှမ်းကလန်မှာမူ ပုံမှန်အတိုင်းသာ ဆက်လက်လည်ပတ်နေဆဲ ဖြစ်လေသည်။ ယခုဆိုလျှင် မူလရေကန်ဖွင့်လှစ်ခြင်း အခမ်းအနား ကျင်းပပြီးစီးခဲ့သည်မှာ အချိန်နှစ်လမျှ ကြာမြင့်ခဲ့ပြီဖြစ်သောကြောင့် တပည့်အသစ်များအား လက်ခံရမည့် တောင်ထွတ်ရွေးချယ်ပွဲအခမ်းအနားအား ကျင်းပရန် အချိန်ရောက်လာပြီပင် ဖြစ်သည်။

...........

တောင်ထွတ်ရွေးချယ်ပွဲအခမ်းအနားနေ့၌

ကြီးမားလှသော ကွင်းပြင်ကျယ်ကြီးတစ်ခွင်လုံးတွင် အော်ဟစ်အားပေးသံများစွာဖြင့် ပြည့်နှက်နေလေသည်။

ထိုကွင်းပြယ်ကျယ်ကြီး၏ အလယ်ဗဟို၌ ငယ်ရွယ်ကာ အတွေ့အကြုံနည်းဟန်ရှိသော လူငယ်များစွာ ရပ်နေကြ၏။ ထိုလူငယ်လေးများ၏ မျက်ဝန်းများမှတဆင့် အလွန်ပင် စိတ်လှုပ်ရှားနေကြကြောင်း သိရှိနိုင်ပေသည်။

ထိုလူငယ်လေးများ၏ရှေ့၌ ကန်ရွှမ်းကလန်၏ တောင်ထွတ်ခုနစ်ခုအား ကိုယ်စားပြုသော ကျောက်တုံးစင်မြင့်ခုနစ်ခု ရှိနေသည်။

ထိုကျောက်တုံးစင်မြင့်တစ်ခုစီတွင် သက်ဆိုင်ရာတောင်ထွတ်မှ တပည့်ခေါင်းဆောင်များ ရှိနေကြ၏။ မူလသူတော်စင်တောင်ထွတ်၏ တပည့်ခေါင်းဆောင်နေရာတွင်မူ ဇူထိုက်၊ ကျန်းယန်နှင့် လုယန်းတို့ကသာ ဦးဆောင်ထားလျက် ရှိလေသည်။

"ကံမကောင်းတာပဲ ဒီနှစ်တော့ ကလန်ခေါင်းဆောင်နဲ့ တောင်ထွတ်ဆရာသခင်တွေက တပည့်အသစ်တွေကို ကိုယ်တိုင်လာမရွေးပဲ တပည့်ခေါင်းဆောင်တွေကိုပဲ တာဝန်ပေးပြီး လွှတ်လိုက်တယ်။ ဒါပေမယ့် ဂျူနီယာညီတော်ဇူယွမ်ကမှ အခုချိန်ထိ နဂါးကောင်းချီးကို ခံယူလို့မှ မပြီးသေးတာ။ ငါတို့မူလသူတော်စင်တောင်ထွတ်ကို ဘယ်တပည့်ခေါင်းဆောင်က ဦးဆောင်ပြီး တပည့်အသစ်တွေ ခေါ်ပေးမှာလဲ။" ဇူယွမ်မှာ ကွင်းပြင်ကျယ်ကြီးအတွင်းမှ များပြားလှသော တပည့်အသစ်လေးများအားကြည့်ကာ ရေရွတ်လိုက်သည်။

လုယန်းမှာလည်း ခါးသက်စွာ ရယ်မောလိုက်မိ၏။ ဇူယွမ်သည် ကောင်းချီးယဇ်ပုလ္လင်စင်မြင့်ပေါ်၌ပင် ရှိနေဆဲဖြစ်သောကြောင့် ယောင်ယောင်မှာလည်း ဤနေရာသို့လာကာ ဦးဆောင်ဦးရွက်ပြုပေးလိမ့်မည် မဟုတ်ပေ။ ထို့ကြောင့် အခြားသော စင်မြင့်များပေါ်၌ တပည့်ခေါင်းဆောင်များအသီးသီးဖြင့် ခမ်းနားထည်ဝါနေပါသော်လည်း မူလသူတော်စင်တောင်ထွတ်၏ စင်မြင့်အနေအထားမှာမူ ဦးဆောင်မည့်သူမရှိပဲ အနည်းငယ် ကြည့်ရဆိုးနေရသည်။

ထိုအချိန်၌ပင် ကလန်၏ ကြီးကြပ်ရေးမှူးတစ်ဦး ရောက်ရှိလာကာ တည်ကြည်သောအသံဖြင့် စကားဆိုလိုက်၏။ "ကလန်ခေါင်းဆောင်ချင်းယန်က မျှမျှတတ ဖြစ်စေလိုတဲ့အတွက် အခုကစပြီး တောင်ထွတ်ရွေးချယ်ပွဲအခမ်းအနားကို အောင်မြင်သွားတဲ့ တပည့်တွေက ကိုယ်နှစ်သက်ရာ တောင်ထွတ်တွေဆီကို သွားလို့ရပါပြီ။"

ကြီးကြပ်ရေးမှူး၏စကားကြောင့် ကွင်းပြင်အတွင်းရှိ တပည့်များမှာ အလွန်ပင် ပျော်ရွှင်သွားကြ၏။

"အော်....အခုလာတဲ့ တပည့်အသစ်တွေများ ကံကောင်းလိုက်တာ။ သူတို့နှစ်သက်ရာတောင်ထွတ်ကို လွတ်လွတ်လပ်လပ် ရွေးချယ်လို့တောင် ရနေပြီ။ အရင်တုန်းကဆိုရင် တောင်ထွတ်ရွေးချယ်ပွဲမှာ ထူးထူးချွန်ချွန် လုပ်ဆောင်ခဲ့တဲ့ တပည့်တချို့ကလွဲလို့ ကျန်တဲ့သူတွေကို ကလန်ခေါင်းဆောင်နဲ့ တောင်ထွတ်ဆရာသခင်တွေကပဲ အလျဉ်းသင့်သလို ခွဲယူလိုက်ကြတာ။" ဇူထိုက်မှ သက်ပြင်းချကာ စကားဆိုလိုက်သည်။

လုယန်းမှ ပြောလိုက်သည်။ "အရင်တုန်းကဆိုရင် တခြားတောင်ထွတ်က မလိုချင်တဲ့သူတွေကိုပဲ ငါတို့မူလသူတော်စင်တောင်ထွတ်က ရွေးချယ်စရာမရှိပဲ လက်ခံခဲ့ရတာ။ အခုဆိုရင် ငါတို့မူလသူတော်စင်တောင်ထွတ်က ချိပ်စည်းပြယ်သွားပြီဆိုတော့ အဲ့လိုလုပ်စရာ မလိုတော့ပဲ တပည့်အသစ်တွေခေါ်ဖို့အတွက် အခွင့်အရေး ရှိလာပြီလေ။"

သို့သော် လုယန်းမှ စိုးရိမ်ပူပန်နေဟန်ဖြင့် ဆက်လက်စကားဆိုလိုက်၏။ "ဒါပေမယ့် တခြားတောင်ထွတ်ခြောက်ခုက လက်ရှိအမြင်တင်ကို ငါတို့ထက်သာနေပြီ။ သူတို့တွေရဲ့ ရွေးချယ်ခံတွေ မရှိနေဘူးဆိုပေမယ့် တပည့်ခေါင်းဆောင်တွေ ရှိနေတယ်လေ။ ငါတို့ကတော့ လူအင်အားကလည်း အရမ်းနည်းနေတယ်။ ဦးဆောင်မယ့် တပည့်ခေါင်းဆောင်လည်း လောလောဆယ် ရှိမနေဘူး။ တပည့်အသစ်တွေက အမြင်နဲ့တင် ငါတို့ဆီမလာတော့ရင် ဒုက္ခပဲ။"

ဇူထိုက်မှာ ခါးသက်စွာဖြင့်သာ ရယ်မောလိုက်ရ၏။ ဇူယွမ်သည် နဂါးကိုးကောင်ကောင်းချီးအား လက်ခံရယူနေသည်မှာ နှစ်လခန့်ပင် ရှိနေပြီဖြစ်ပါသော်လည်း ယခုအချိန်ထိ မပြီးဆုံးသေးပါချေ။

ဇူထိုက်တို့ တစ်ဦးနှင့်တစ်ဦး ဆွေးနွေးကြစဉ်မှာပင် ကွင်းပြင်အတွင်းရှိနေသော တပည့်အသစ်များမှ စတင်ဆွေးနွေးကြလေတော့သည်။

"ကန်ရွှမ်တောင်ထွတ်က ကလန်ခေါင်းဆောင်ကိုယ််တိုင် ကြီးကြပ်တဲ့နေရာပဲ။ ရွေးချယ်ခံထဲက နံပါတ်တစ်ကလည်း ကန်ရွှမ်းတောင်ထွတ်ကပဲတဲ့။ အဲ့ဒါကြောင့် အဲ့ကိုသွားရင်တော့ ငါတို့အနာဂတ်တွေ ကောင်းမှာသေချာတယ်။"

"ကန်ရွှမ်းတောင်ထွတ်က ကောင်းတယ်ဆိုပေမယ့် ထူးချွန်တဲ့ တပည့်တွေ သိပ်များလို့ အပြိုင်အဆိုင်များလွန်းတယ်။ အဲ့ကိုသွားရင် ငါတို့အသေအလဲ ပင်ပန်းရလိမ့်မယ်။"

"ငါကတော့ နှင်းပဒုမ္မာတောင်ထွတ်ကို စိတ်ဝင်စားတယ်။ ကလန်ရဲ့ အလှဆုံးမိန်းကလေးတပည့် စီနီယာအမတော်လီချင်းချန်က အဲ့တောင်ထွတ်ကတဲ့။"

"နှင်းပဒုမ္မာတောင်ထွတ်ကိုများ စိတ်ကူးယဉ်နေသေးတယ်။ ကိုယ့်ရုပ်ကိုအရင် ပြန်ကြည့်လိုက်ဦး။ အဲ့ကတောင်ထွတ်ဆရာသခင်မက ရုပ်ရည်ချောမောခန့်ညားတဲ့သူတွေကိုပဲ သဘောကျတာ။"

"ဓားကပ်ဘေးတောင်ထွတ်ဆိုရင်လည်း မဆိုးပါဘူး။ ဒီနှစ်တွေအတွင်း ဓားကပ်ဘေးတောင်ထွတ်က အများကြီး တိုးတက်လာတယ်တဲ့။"

"မူလသူတော်စင်တောင်ထွတ်ကရော တိုးတက်လာတယ် မဟုတ်ဘူးလား။ ငါကြားဖူးတာ မူလသူတော်စင်တောင်ထွတ်က မျိုးနွယ်စုခေါင်းဆောင်ကန်ရွှမ်း နေထိုင်ခဲ့တဲ့နေရာတဲ့။"

"မူလသူတော်စင်တောင်ထွတ်က ချိပ်စည်းပြယ်သွားတာတောင် မကြာသေးဘူး။ သူတို့ဆီမှာ တောင်ထွတ်ဆရာသခင်တောင် မရှိဘူးကွ။ အဲ့ကိုသွားရင် မင်းမှာအနာဂတ် ရှိတော့မှာ မဟုတ်ဘူး။"

"အဲ့လိုတော့ မဖြစ်နိုင်ဘူးကွ။ အခုတစ်ခေါက်ကျင်းပတဲ့ မူလရေကန်ဖွင့်လှစ်တဲ့ အခမ်းအနားမှာ မူလသူတော်စင်တောင်ထွတ်က လူအင်အားအနည်းဆုံးပေမယ့် ပထမနေရာကို ရခဲ့တယ်လို့ပြောတယ်။ သူတို့ရဲ့ တပည့်ခေါင်းဆောင်က တအားကိုတော်တာတဲ့။"

"ဟုတ်လား။ အခုကြတော့ အဲ့မူလသူတော်စင်တောင်ထွတ်ရဲ့ တပည့်ခေါင်းဆောင်က ဒီနေရာကို ဘာလို့မလာတာလဲ။"

"အဲ့ဒါတော့ ငါဘယ်သိမလဲ။"

"........"

ဆွေးနွေးခြင်းများ ပြီးဆုံးသွားပြီးသည့်နောက် တပည့်အချို့မှာ ကျောက်တုံးစင်မြင့်များပေါ်သို့ စတင်ပျံသန်းလာကြပြီပင် ဖြစ်သည်။

သို့သော် ဇူထိုက်၊ ကျန်းယန်နှင့် လုယန်းတို့၏ အမူအရာမှာ ပျက်ယွင်းနေရ၏။ အခြားသော တောင်ထွတ်ခြောက်ခုမှာ ပုံရိပ်များစွာဖြင့် စည်ကားနေပါသော်လည်း မူလသူတော်စင်တောင်ထွတ်၏ စင်မြင့်ထက်တွင်မူ တပည့်အသစ် အနည်းငယ်မျှသာ ရှိနေသည်။ ထို့အပြင် မူလသူတော်စင်တောင်ထွတ်သို့ ရောက်ရှိလာကြသော တပည့်အသစ်များသည် သာမန်မျှသာ အရည်အချင်းရှိသူများ ဖြစ်နေ၏။

အနီးတွင်ရှိနေသော ဓားကပ်ဘေးတောင်ထွတ်၏ တပည့်များမှာ မူလသူတော်စင်တောင်ထွတ်၏ အနေအထားအားကြည့်ရှုကာ အားရကျေနပ်စွာဖြင့် လှောင်ပြောင်ရယ်မောနေကြလေသည်။

မူလရေကန်ဖွင့်လှစ်ခြင်း အခမ်းအနား၌ ဓားကပ်ဘေးတောင်ထွတ်မှ ရှုံးနိမ့်ခဲ့ရသော်လည်း မူလသူတော်စင်တောင်ထွတ်၏ အခြေခံအုတ်မြစ်သည် အားနည်းနေရဆဲပင် ဖြစ်သည်။ ထို့ကြောင့် ယခုကဲ့သို့ တပည့်အသစ်ရွေးချယ်ခြင်း အခမ်းအနားမျိုး၌ ဓားကပ်ဘေးတောင်ထွတ်အား ယှဉ်ပြိုင်နိုင်ရန် အရည်အချင်း မရှိပါချေ။

ဓားကပ်ဘေးတောင်ထွတ်၏ စင်မြင့်ပေါ်တွင် ပိုင်လီချွီးမှာ ခန့်ညားထည်ဝါသော အနေအထားဖြင့် ရှိနေ၏။ သူ၏ အသွင်သဏ္ဍာန်သည် လွန်ခဲ့သောနှစ်လကထက် များစွာတောက်ပနေသည်။ ၎င်းသည် မူလရေကန်ဖွင့်လှစ်ခြင်း အခမ်းအနား၌ နဂါးကောင်းချီးအား ခံယူရရှိပြီးသည့်နောက် မူလစဦး နဝမအဆင့်သို့ တက်လှမ်းနိုင်ခဲ့ပြီလည်း ဖြစ်သည်။

"ဟီးဟီး တပည့်ခေါင်းဆောင်ပိုင်လီချွီး ကြည့်ရတာ မူလသူတော်စင်တောင်ထွတ်က တပည့်အသစ်နည်းနည်းလောက်ကိုပဲ ရမှာသေချာတယ်။ သူတို့ရဲ့ ထူးချွန်ပြောင်မြောက်လွန်းတဲ့ တပည့်ခေါင်းဆောင်ကြီးက ဒီလိုပွဲမျိုးကို မလာနိုင်တာ သူတို့အတွက်တော့ သနားစရာပဲ။ ဒီလိုပုံစံနဲ့များ ကျွန်တော်တို့ ဓားကပ်ဘေးတောင်ထွတ်ကို ဘယ်လိုယှဉ်နိုင်မှာလဲ။" ဓားကပ်ဘေးတောင်ထွတ်၏ တပည့်တစ်ဦးမှ လှောင်ပြောင်သရော်လိုဟန်ဖြင့် ပျက်ရယ်ပြုစကားဆိုလိုက်သည်။

သို့သော် ပိုင်လီချွီး၏အမူအရာမှာ အေးစက်ခက်ထန်သွားရ၏။ "မင်းပြောချင်တဲ့သဘောက ဇူယွမ်ဒီနေရာမှာ ရှိနေရင်တော့ အနေအထားတွေက ပြောင်းလဲသွားမယ်ပေါ့လေ ဟုတ်လား။"

ပိုင်လီချွီးမှာ မူလရေကန်အတွင်း ဇူယွမ်အား ရှုံးနိမ့်ခဲ့ရခြင်းအပေါ် ယခုအချိန်ထိ အခဲမကြေနိုင် ဖြစ်နေရဆဲပင် ဖြစ်၏။ ၎င်းမှ အသက်ပြင်းပြင်းတစ်ချက်အား ရှူထုတ်လိုက်ပြီးနောက် အေးစက်စွာ ဆက်လက်စကားဆိုလိုက်သည်။ "အခုငါက အရင်ကနဲ့ မတူတော့ဘူး။ အခုချိန်မှာသာ ဇူယွမ်နဲ့တိုက်ရမယ်ဆိုရင် သူ့ကိုတစ်ချက်တည်းနဲ့ ပွဲသိမ်းပေးလိုက်မှာကွ။"

ထိုတပည့်မှ လျင်မြန်စွာ စကားဆိုလိုက်သည်။ "ဒါပေါ့ ဒါပေါ့။ စီနီယာအကိုတော်ပိုင်လီချွီးက မူလစဦး နဝမအဆင့်ကိုတောင် ရောက်နေပြီလေ။ အရင်တစ်ခါတုန်းက ဇူယွမ်က ကံစွတ်သွားတာပါ။ အနာဂတ်မှာ ထပ်ပြီးတိုက်ခိုက်ခဲ့ရရင် စီနီယာအကိုတော်ပဲ နိုင်မယ်ဆိုတာ ကျွန်တော်တို့ သိပြီးသားပါ။"

ပိုင်လီချွီးမှာ ထိုတပည့်အား လျစ်လျုရှုလိုက်ပြီးနောက် လူအင်အား အနည်းငယ်မျှသာရှိသော မူလသူတော်စင်တောင်ထွတ်အား ကြည့်ရှုလိုက်သည်။ မူလသူတော်စင်တောင်ထွတ်၏ ဆိုးရွားနေသော အနေအထားကြောင့် သူ၏စိတ်ထဲတွင် လွန်စွာကျေနပ်အားရနေမိသည်။

ဇူယွမ်....ဇူယွမ်....မူလရေကန်ဖွင့်လှစ်တဲ့ အခမ်းအနားမှာ နည်းနည်းလေး အဆင်ပြေသွားရုံနဲ့ အရာအားလုံးကို ပြောင်းပစ်နိုင်ပြီများ ထင်နေလားကွ.. ဟမ်....

မူလသူတော်စင်တောင်ထွတ်က ဓားကပ်ဘေးတောင်ထွတ်ထက် အဆပေါင်းများစွာ နိမ့်ပါးနေတုန်းပဲ....ဟားဟား......

တောင်ထွတ်ရွေးချယ်ပွဲအခမ်းအနား

Vol. 40 Ch. 547

"........"

...........

တောင်ထွတ်ရွေးချယ်ပွဲအခမ်းအနားနေ့၌

"အဲ့ဒါတော့ ငါဘယ်သိမလဲ။"

"........"