စဉ်ဆက်မပြတ်တိုးတက်မှု၊ ဆယ်နှစ်ကြာသော်၊ ကောင်းကင်တာအိုမုန်တိုင်းကမ္ဘာ။

"ကျေးဇူးတင်ပါတယ်။"

ချီမင်က ပြုံးလိုက်ကာ စိတ်ခံစားချက် ကောင်းမွန်နေ၏။

သူသည် စစ်တုရင်အဘိုးအိုအား လက်နှုတ်ဆက်လိုက်ပြီး မတ်တပ်ရပ်လိုက်ကာ ဆိုသည်။

"ကျွန်တော် အနိုင်ရသွားပြီ ဖြစ်တဲ့အတွက် တတိယအဆင့်ရဲ့ ဝင်ပေါက်ကို ဖွင့်ပေးပါဦး။"

စစ်တုရင်အဘိုးအို၏ အကြည့်သည် စစ်တုရင်ခုံပေါ်သို့ ကျရောက်နေကာ သူသည် ရုပ်တုတစ်ခုအဖြစ်သို့ ပြောင်းလဲသွားသကဲ့သို့ပင်။

သူ၏ ခန္ဓာကိုယ်နှင့် စိတ်တို့သည် ချီမင်၏ ကမ္ဘာဦးမဟာတာအိုထဲတွင် နစ်မြုပ်နေခဲ့ပြီး မိမိကိုယ်ကို လွတ်မြောက်အောင် မစွမ်းဆောင်နိုင်ခဲ့ပေ။

ဤအခိုက်အတန့်တွင် စစ်တုရင်အဘိုးအိုသည် စစ်မှန်သော မဟာတာအိုကို မျက်မြင်တွေ့ရှိလိုက်ရသကဲ့သို့ ထင်မှတ်နေမိ၏။

၎င်းသည် အလွန်တုန်လှုပ်စရာ ကောင်းလှသည်။

သူ၏ နှလုံးသားသည် နက်ရှိုင်းသော လေးစားမှုတို့ဖြင့် ပြည့်နှက်နေခဲ့သည်။

ခဏအကြာတွင် စစ်တုရင်အဘိုးအိုသည် သတိပြန်ဝင်လာပြီး တုန်ယင်သောလေငွေ့ကို ရှိုက်ထုတ်လိုက်ရာ တစ်စုံတစ်ခုကို ရရှိသွားတော့သည်။

သူသည် မတ်တပ်ထရပ်လိုက်ပြီး ချီမင်အား ဦးညွှတ်လိုက်ကာ ဆိုလေသည်။

"ငါ ရှုံးပါတယ်။ ငါရဲ့ အရှုံးကို ငါ ဝန်ခံပါတယ်။ မင်းနဲ့ နှိုင်းယှဉ်ရင် ငါ့ရဲ့ စစ်တုရင်တာအိုက ပိုးစုန်းကြူးအလင်းရောင်လေးလိုပါပဲ"

"မင်းကလွဲရင် ဒီလို မဟာတာအိုမျိုးကို လွန်ခဲ့တဲ့ အချိန်အကြာကြီးတုန်းက တစ်ခါပဲ မြင်ဖူးတယ်။

ဒါပေမဲ့ အချိန်တွေ အရမ်းကြာသွားတော့ ငါ့ရဲ့ မှတ်ဉာဏ်တွေက ဝေဝါးနေပြီ။"

"ဒါပေမဲ့..."

"မင်းနဲ့ နှိုင်းယှဉ်လိုက်ရင် အဲ့ဒီ မဟာတာအိုက နည်းနည်းလေး နိမ့်ကျနေသလိုမျိုး ငါ ခပ်ရေးရေး ခံစားနေရတယ်။"

ချီမင်က ပြုံးလိုက်ပြီး ဆို၏။

"အဘိုးရဲ့ ချီးကျူးမှုအတွက် ကျေးဇူးတင်ပါတယ်"

"မဖြစ်နိုင်တာ။"

အပြင်ဘက်ကမ္ဘာတွင်...

ဝမ်ရှန်း၏ အကြည့်သည် မှောင်မိုက်သွားပြီး သူ၏ မျက်နှာအမူအရာက အတော်လေး အရုပ်ဆိုးသွား၏။

သူသည် ချီမင်၏ ဘက်တွင် ဖြစ်ပျက်ခဲ့သည်များကို မြင်တွေ့ခဲ့ရပြီး စစ်တုရင်အဘိုးအို ပြောကြားခဲ့သည်များကို မြင်နိုင်ခဲ့သည်ကြောင့် ဆိုလိုက်သည်။

"ဒါ လုံးဝကို မဖြစ်နိုင်တာပဲ။"

"ဒါ ဆရာသခင်က မိုးမြေဝါနက်ထူးခြားစေတီထဲမှာ ချုပ်နှောင်ထားတဲ့ ပျက်စီးနေတဲ့ ဝိညာဉ်ခန္ဓာတစ်ခုပဲလေ။ အကြီးဆုံးစီနီယာအစ်ကို တည်ထောင်ခဲ့တဲ့ မဟာတာအိုကို ဒါက ဘယ်လိုလုပ် နားလည် သဘောပေါက်နိုင်မှာလဲ။"

"မင်းက အကြီးဆုံးစီနီယာအစ်ကိုရဲ့ မဟာတာအိုကို အသရေဖျက်ရဲတယ်ပေါ့။"

"ယုတ်မာတဲ့ကောင်။"

ဝမ်ရှန်း၏ လေသံသည် အေးစက်နေခဲ့သည်။

"စီနီယာအစ်ကို။"

ချင်ယွီက ဆို၏။

"စိတ်ထိန်းပါ။ စီနီယာအစ်ကို ပြောသလိုပဲ စစ်တုရင်အဘိုးအိုက ပျက်စီးနေတဲ့ ဝိညာဉ်ခန္ဓာတစ်ခုတည်းပဲဟာကို။ ဒီလို အခြေအနေမျိုးနဲ့ ဘာလို့ ကိုယ့်အဆင့်အတန်းကို ကိုယ့်ကိုယ်ကိုယ် နှိမ့်ချနေရတာလဲ"

"ပြီးတော့..."

"စစ်တုရင်အဘိုးအိုက အကြီးဆုံးစီနီယာအစ်ကိုပါလို့ မပြောခဲ့ပါဘူး‌နော်။"

"ချီမင်က အဖြူရောင်စစ်တုရင်လုံးတစ်လုံးကို ကစားလိုက်ပေမဲ့ စစ်တုရင်အဘိုးအိုက တစ်လုံးတောင် မကစားရဲခဲ့တဲ့အချက်ကနေ ကြည့်မယ်ဆိုရင် ချီမင်ရဲ့ တာအိုက တုန်လှုပ်စရာကောင်းပြီး အင်မတန် အစွမ်းထက်တယ်ဆိုတာကို မြင်နိုင်တယ်မလား။"

"သူက အခု အကြီးဆုံးစီနီယာအစ်ကိုထက် နိမ့်ကျနေနိုင်ပေမဲ့ နောက်ပိုင်းဆိုရင် ပိုတော်ရင် တော်လာနိုင်တာပဲနော့်။"

"ဟွန့်။"

ဝမ်ရှန်းသည် အေးစက်စွာ ဟမ့်ခနဲ နှာမှုတ်လိုက်သည်။

စေတီကမ္ဘာထဲတွင်...

စစ်တုရင်အဘိုးအိုသည် သူ၏ ညာလက်ကို ဝှေ့ယမ်းလိုက်ရာ အဖြူအမည်းလေးထောင့်စစ်တုရင်ခုံတစ်ခု သူ၏လက်ထဲတွင် ပေါ်လာခဲ့သည်။

၎င်းတွင် ကောင်းကင်နှင့်မြေကြီးမဟာတာအို၏ စွမ်းအားတို့ ရောယှက်နေခဲ့၏။

၎င်းသည် စစ်တုရင်ခုံတစ်ခုသာ ဖြစ်သော်လည်း စကြဝဠာကို ဆင့်ကဲပြောင်းလဲစေနိုင်သည်အလားနှယ်။

"ဒုတိယအဆင့်ရဲ့ စမ်းသပ်မှုကို ရှင်းလင်းနိုင်ခဲ့တဲ့အတွက် ဂုဏ်ယူပါတယ်။ တတိယအဆင့်ကို ဝင်ရောက်နိုင်ပါပြီ။ ဒုတိယအဆင့် စမ်းသပ်မှုကို ရှင်းလင်းတဲ့အတွက် သက်ဆိုင်ရာ ဆုလာဘ်ကိုလည်း ရရှိနိုင်ပါတယ်။"

"ဒါပေမဲ့ ငါ့အမြင်အရတော့ မင်းက ဒီဆုလဒ်ကို အလေးအနက်ထားမှာ မဟုတ်လောက်ဘူး။"

စစ်တုရင်အဘိုးအိုသည် ၎င်းကို ချီမင်အား လေးစားစွာ ပေးလိုက်သည်။

"ဒါက မိုးမြေစစ်တုရင်ခုံ။ ဖရိုဖရဲကောင်းကင်တာအိုရတနာကိုတောင် ကျော်လွန်တဲ့ မိုးမြေ မဟာတာအိုရတနာတစ်ခု ဖြစ်တယ်။ ပုံမှန်အားဖြင့် ပြောရရင် ကောင်းကင်နဲ့မြေကြီး မဟာတာအိုရတနာတွေရဲ့ မွေးရာပါ ပြုစုပျိုးထောင်မှုကလွဲရင် ထာဝရအထွတ်အထိပ်ကောင်းကင်အရှင်တွေကသာ သူတို့ကို သန့်စင်နိုင်တာ။ ပြီးတော့ ကောင်းကင်နဲ့မြေကြီးမဟာတာအိုကို တကယ် နားလည်သဘောပေါက်ပြီး သူ ဖန်တီးခဲ့တဲ့ တာအိုကို အခြေခံအဖြစ် အသုံးပြုတဲ့သူတစ်ယောက်တည်းကသာ ကောင်းကင်နဲ့မြေကြီး မဟာတာအိုရတနာတွေကို သန့်စင်နိုင်ပါတယ်။"

"ကောင်းကင်နဲ့မြေကြီး မဟာတာအိုရတနာရဲ့ စွမ်းအားက ဖရိုဖရဲကောင်းကင်တာအိုရတနာကို ကျော်နိုင်တယ်။"

ချီမင်က ကောင်းကင်နှင့်မြေကြီးစစ်တုရင်ခုံကို လက်ခံရရှိလိုက်ပြီး ၎င်းထဲတွင် ပါရှိသော ကောင်းကင်နှင့်မြေကြီးမဟာတာအို၏ စွမ်းအားကို အာရုံခံနိုင်ခဲ့၏။

ဖန်တီးသူသည် မဟာတာအိုစစ်မှန်အဆောင် (၁၀၈) ခုကို စုစည်းပြီး ၎င်းထဲသို့ ပေါင်းစပ်ထည့်သွင်းခဲ့သည်။

ကောင်းကင်နှင့်မြေကြီးစစ်တုရင်ခုံသည် တာအိုစစ်တုရင်အပေါ်တွင် အခြေခံထားဆဲ ဖြစ်သည်တည်း။

"မဆိုးပါဘူး။"

ချီမင်က ကောင်းကင်နှင့်မြေကြီးစစ်တုရင်ခုံထဲတွင် ပါရှိသော စွမ်းအားကို အာရုံခံပြီးနောက် ၎င်းကို သူ၏ ပစ္စည်းသိုလှောင်ခန်းထဲသို့ ထည့်လိုက်ပြီး ဆို၏။

"တတိယအဆင့်ရဲ့ ဝင်ပေါက်ကို မြန်မြန်ဖွင့်ပါ"

စစ်တုရင်အဘိုးအိုသည် သူ၏ ညာလက်ကို ဝှေ့ယမ်းလိုက်ရာ လျှို့ဝှက်ဆန်းကြယ်အရှိန်အဝါတစ်ခု ထုတ်လွှတ်နေသော ဝဲဂယက်ပုံစံအနက်ရောင်ဝင်ပေါက်တစ်ခု ကောင်းကင်တွင် ပေါ်လာခဲ့သည်။

"ကြွပါ။"

စစ်တုရင်အဘိုးအိုက ဦးညွှတ်လိုက်၏။

ချီမင်က အသိအမှတ်ပြု ခေါင်းညိတ်လိုက်ပြီး ရှေ့သို့ လျှောက်သွား၏။

အသင်္ချေတောင်နှင့် အခြားသူများက အနီးကပ် လိုက်ပါသွားကြသည်။

သူတို့သည် အလင်းတန်းငါးခုအဖြစ်သို့ ပြောင်းလဲသွားပြီး အနက်ရောင်ဝင်ပေါက်ထဲသို့ ဝင်ရောက်သွားကြ၏။

ချီမင်နှင့် အခြားသူများသည် ပျောက်ကွယ်သွားကြပြီး ဒုတိယအဆင့်မှ ထွက်ခွာသွားကြသည်။

ပတ်ဝန်းကျင်ရှိ နေရာလွတ်သည် ပြောင်းလဲသွားကာ စစ်တုရင်အဘိုးအိုသည် သူ၏ မူလထိုင်ခုံတွင် ပြန်ထိုင်လိုက်၏။

သူ၏ မျက်လုံးများသည် ရုပ်တုတစ်ခုကဲ့သို့ မှိတ်ထားလျက် အချိန်များ ရပ်တန့်သွားသကဲ့သို့ နောက်ထပ်ရောက်ရှိလာမည့်သူကို တိတ်ဆိတ်စွာ စောင့်ဆိုင်းနေတော့သည်။

တတိယအဆင့်တွင် ချီမင်က နဝမအဆင့် စည်းမျဉ်းကောင်းကင်အရှင် ဖရိုဖရဲသားရဲ ဆယ်ကောင်နှင့် တွေ့ဆုံခဲ့၏။

သူတို့ကား အလွန် ကြမ်းတမ်းကြကာ သူတို့၏ စွမ်းအားသည် ကြီးမားလှပြီး နေရာလွတ်ကို ချေမှုန်းရန်၊ ကောင်းကင်ကို ဖျက်ဆီးရန်နှင့် ကမ္ဘာကြီးကို ကြေမွစေရန် လုံလောက်ပေသည်။

"စီနီယာ။"

ချူးဝမ်တောက်သည် ရှေ့ဆုံးမှ တိုးထွက်လာကာ ဆို၏။

"ဒီတစ်ခါ ကျွန်တော် လုပ်မယ်။ အရှင်မာရ တိုက်ခိုက်ဖို့ မလိုပါဘူး"

"ကောင်းပြီ။"

ချီမင်က ခေါင်းညိတ်လိုက်သည်။

ချူးဝမ်တောက်သည် တိုက်ခိုက်လိုက်ပြီး အလင်းတန်းပေါင်း တစ်သောင်းအဖြစ်သို့ ပြောင်းလဲသွား၏။

၎င်းတို့သည် အလွန်တောက်ပပြီး အစွမ်းထက်လှသည်။

နဝမအဆင့် စည်းမျဉ်းကောင်းကင်အရှင် ဖရိုဖရဲသားရဲသည် ချူးဝမ်တောက်ထံမှ တိုက်ခိုက်မှု တစ်ချက်တည်းကိုပင် မခံနိုင်ခဲ့ပေ။

စုစုပေါင်းအားဖြင့် မိနစ်ဝက်မပြည့်မီတွင် နဝမအဆင့် စည်းမျဉ်းကောင်းကင်အရှင် ဖရိုဖရဲသားရဲ ဆယ်ကောင်လုံး ချူးဝမ်တောက်၏ သတ်ဖြတ်ခြင်းကို ခံလိုက်ရ၏။

တိုက်ပွဲ၏ အစမှ အဆုံးအထိ သူတို့ကာ လုံးဝ ကြေမွသွားခဲ့ရသည်။

"ဆုလာဘ်: ကောင်းကင်တာအို ကျွန်ပြုခြင်းလက်စွပ်။"

ချီမင်က နောက်ထပ် ဆုလဘ်တစ်ခုကို ရရှိခဲ့၏။

ဤဆုလာဘ်သည် ထာဝရအထွတ်အထိပ်ကောင်းကင်အရှင် နယ်ပယ်အောက်ရှိ မည်သည့်တည်ရှိမှုကိုမဆို ကျွန်ပြုနိုင်သော အထူး ဖရိုဖရဲကောင်းကင်တာအိုရတနာတစ်ခု ဖြစ်သည်။

၎င်းသည် အလွန် အစွမ်းထက်ပြီး မဆိုးလှချေ။

ဤအရာသည် ချီမင်အတွက်သာ အသုံးမဝင်ခြင်း ဖြစ်၏။

၎င်းကို လွှင့်ပစ်ရန် နှမြောစရာကောင်းသော်လည်း ၎င်းသည် သူ့ကို စိတ်ဝင်စားမှု မဖြစ်စေခဲ့ပေ။

အချိန်သည် တရွေ့ရွေ့ ကုန်ဆုံးသွား၏။

ချီမင်က စေတီကမ္ဘာကို တစ်ခုပြီးတစ်ခု ဖြတ်ကျော်ခဲ့ပြီး စမ်းသပ်မှုများကို တစ်ခုပြီးတစ်ခု ကျော်ဖြတ်ခဲ့သည်။

သူ၏ ကောင်းကင်နှင့်မြေကြီးမဟာတာအိုအပေါ် နားလည်သဘောပေါက်မှုကို စမ်းသပ်ခြင်း ဖြစ်စေ၊ ထူးဆန်းသော စမ်းသပ်မှုအမျိုးမျိုး ဖြစ်စေ၊ သို့မဟုတ် အင်အားပြိုင်ပွဲ ဖြစ်စေ ချီမင်က လွယ်ကူစွာ ကျော်ဖြတ်နိုင်ခဲ့သည်။

သူသည် မည်သည့်စိန်ခေါ်မှုမှ မကြုံတွေ့ရဘဲ အဆင့်များကို လျင်မြန်စွာ ရှင်းလင်းသွားခဲ့သည်။

ဆယ်နှစ်ကြာသော်...

ချီမင်က စေတီအတွင်းကမ္ဘာ၏ (၁၆၇) ခုမြောက်အဆင့်ကို ဖြတ်ကျော်ခဲ့ပြီး (၁၆၈) ခုမြောက်အဆင့်သို့ ရောက်ရှိလာခဲ့၏။

ဤစေတီအတွင်းကမ္ဘာသို့ ဝင်ရောက်လိုက်ချိန်၌ ချီမင်က ရင်းနှီးသော အရှိန်အဝါတစ်ခုကို ခပ်ရေးရေး အာရုံခံလိုက်မိသည်။

ထိုနေရာတွင် ရန်လိုမုန်းတီးမှုနှင့် စက်ဆုပ်ရွံရှာမှုတို့ ရှိနေ၏။

စေတီအတွင်းရှိ ကမ္ဘာကြီးသည် ကျယ်ပြန့်လှသည်။

အခိုက်အတန့်တိုင်းတွင် အလွန် ကြောက်မက်ဖွယ်ကောင်းသော မုန်တိုင်းတစ်ခု ရှိနေ၏။

ထို့အပြင် ၎င်းသည် ကောင်းကင်တာအိုကပ်ဘေး၏ စွမ်းအား ပါဝင်သော သာမန် မုန်တိုင်း မဟုတ်ပေ။

ဤနေရာရှိ ဆီးနှင်းပွင့်တိုင်းတွင် ကြောက်မက်ဖွယ်ကောင်းသော ကပ်ဘေးဒုက္ခစွမ်းအားနှင့် ကမ္ဘာငယ်တစ်ခုကို ဖျက်ဆီးနိုင်သည့် အလွန် ကြောက်မက်ဖွယ်ကောင်းသော စွမ်းအင်တို့ ပါဝင်နေသည်။

အရှင်နယ်ပယ်အောက်ရှိ တည်ရှိမှုများသာ ဤနေရာသို့ ဝင်ရောက်လာပါက မုန်တိုင်းထဲတွင် နစ်မြုပ်သွားပြီး လုံးဝ ခဲသွားကာ ဤကမ္ဘာ၏ အစိတ်အပိုင်းတစ်ခု ဖြစ်သွားပေလိမ့်မည်။

အရှင်နယ်ပယ်သို့ ရောက်ရှိပြီးသူများသာလျှင် ကောင်းကင်တာအို၏ ကပ်ဘေးဒုက္ခစွမ်းအား ပါဝင်သော ဤမုန်တိုင်းကို ခံနိုင်ရည်ရှိမည် ဖြစ်၏။

ထို့အပြင် ကောင်းကင်တာအို၏ စွမ်းအား ပါဝင်သော ဤမုန်တိုင်းတွင် အထူးနာမည်တစ်ခု ရှိပေသည်။

၎င်းကို ကောင်းကင်တာအိုမုန်တိုင်းဟု ခေါ်တွင်၏။

ချီမင်က ဤစေတီကမ္ဘာသို့ ဝင်ရောက်ပြီးနောက် သက်ဆိုင်ရာ သတင်းကို လက်ခံရရှိခဲ့သည်။

သူ၏ ရှေ့တွင် ပုံရိပ်ယောင်မျက်နှာပြင်တစ်ခု ပေါ်လာပြီး သက်ဆိုင်ရာ အချက်အလက်များကို ဖော်ပြခဲ့သည်။

"မိုးမြေဝါနက်ထူးခြားစေတီ၊ (၁၆၈) ခုမြောက်အဆင့်။"

"ကောင်းကင်တာအိုမုန်တိုင်းကမ္ဘာ။"

"ကျေးဇူးပြု၍ ကောင်းကင်တာအို သလင်းကျောက်မုန်တိုင်းကို ရှာဖွေပါ။"

ချီမင်က ဤနေရာကို ရှင်းလင်းလိုပါက သူသည် ကောင်းကင်တာအို သလင်းကျောက်မုန်တိုင်းကို ရှာဖွေရမည် ဖြစ်၏။

၎င်းသည် ဤမျှော်စင်၏ အလယ်ဗဟိုတွင် တည်ရှိရာ ထိုနေရာကို မုန်တိုင်းမျက်စိဟု ခေါ်တွင်၏။

မုန်တိုင်းမျက်စိထဲတွင် ကောင်းကင်အရှင်တစ်ပါးကို ခဲသွားစေရန် လုံလောက်သော ကောင်းကင်တာအိုမုန်တိုင်းအပြင် ကြောက်မက်ဖွယ်ကောင်းသော ကောင်းကင်တာအို သားရဲမုန်တိုင်းများလည်း ရှိနေ၏။

ဤတည်ရှိမှုများသည် ကောင်းကင်တာအိုမုန်တိုင်း၏ ပတ်ဝန်းကျင်နှင့် လုံးဝ လိုက်လျောညီထွေဖြစ်အောင် နေနိုင်ကြပြီး အလွန် အစွမ်းထက်သော ခွန်အားကိုလည်း ပိုင်ဆိုင်ကြသည်။

အနိမ့်ဆုံးအဆင့်ရှိသူသည် ဥပဒေသကောင်းကင်အရှင်တစ်ပါးနှင့် နှိုင်းယှဉ်နိုင်ပြီး အသန်မာဆုံးသည် ထာဝရအထွတ်အထိပ်ကောင်းကင်အရှင် နယ်ပယ်သို့ပင် ရောက်ရှိနေခဲ့သည်။

၎င်းသည် အလွန် ကြောက်မက်ဖွယ်ကောင်းလှသည်။

ကောင်းကင်တာအိုမုန်တိုင်းကမ္ဘာကို ဖြတ်ကျော်ရန် အခက်အခဲ အတိုင်းအတာတစ်ခုအထိ ရှိနေသေး၏။

ချီမင်အတွက်မူ ဤအခက်အခဲသည် အလွန် လွယ်ကူလွန်းလှသည်။

"ဖရိုဖရဲနတ်ဆိုးဘုရား။"

ချီမင်က ခဏမျှ အာရုံခံလိုက်ပြီး သူ၏ အံ့ဖွယ်စွမ်းအားကို လည်ပတ်လိုက်၏။

သူသည် သူ၏ ကမ္မနှင့် ကံကြမ္မာအရ တွက်ချက်လိုက်ရာ သူလိုချင်သော အဖြေကို လျင်မြန်စွာ ရရှိလိုက်ပြီး ဆိုလိုက်သည်။

"ငါ သိပြီ။"

"အရင်က လန်ယာ့အင်မော်တယ်မြို့မှာ ငါ့ကို တိုက်ခိုက်ခဲ့တဲ့ ဖရိုဖရဲနတ်ဆိုးဘုရားပဲ။"

"သူက ကောင်းကင်တာအိုမုန်တိုင်းကမ္ဘာထဲမှာ ရှိနေတာ။"

အတိတ်တုန်းက ချီမင်၏အဆင့် မလုံလောက်ခဲ့သောကြောင့် ရန်သူ မည်သူဖြစ်သည်ကို အံ့ဖွယ်စွမ်းအားများနှင့် တာအိုနည်းစနစ်များကို အားကိုး၍ မတွက်ချက်နိုင်ခဲ့ပေ။

သို့သော် ယခုအခါတွင် ချီမင်က နဝမအဆင့် စည်းမျဉ်းကောင်းကင်အရှင် ဖြစ်နေလေပြီ။

သူနှင့် ဆလိုင်ယွန်တို့သည် ကောင်းကင်တာအိုမုန်တိုင်းကမ္ဘာထဲတွင် ရှိနေကြသည့်အချက်နှင့် ပေါင်းစပ်လိုက်လျက် ကမ္မနှင့် ကံကြမ္မာတို့၏ ရောယှက်မှုအောက်တွင် ချီမင်က မမြင်နိုင်သော ကမ္ဘာထဲ၌ ၎င်းကို အာရုံခံမိခဲ့သည်။

အံ့ဖွယ်စွမ်းအားများနှင့် တာအိုနည်းစနစ်များမှတစ်ဆင့် သူသည် ရန်သူ၏ သရုပ်၊ နောက်ခံ နှင့် တိကျသော တည်နေရာကို တွက်ချက်နိုင်ခဲ့သည်။

"အဲ့ဒီဘက်မှာ..."

ချီမင်က သူ၏ ခေါင်းကို မော့လိုက်ပြီး အရှေ့တောင်ဘက် အရပ်သို့ ကြည့်လိုက်ကာ ဆို၏။

"မုန်တိုင်းမျက်စိ၊ ငါ့ရဲ့ ဒီရန်သူကလည်း မုန်တိုင်းမျက်စိဆီ သွားတဲ့လမ်းမှာ ရှိနေပုံပဲ"

"သွားကြစို့။"

ချီမင်၏ အကြည့်သည် အေးစက်နေပြီး ဆို၏။

"သွားကြစို့"

"ဟုတ်ကဲ့။"

လေဟာနယ်၊ အသင်္ချေတောင်နှင့် မာရတို့က ပြန်ဖြေကြသည်။

"စီနီယာ။"

ချူးဝမ်တောက်သည် ချီမင်၏ မျက်နှာအမူအရာ အနည်းငယ် ကွဲပြားနေသည်ကို အာရုံခံမိကာ မေးလိုက်၏။

"ကျွန်တော်တို့ ဘယ်ကို သွားကြမှာလဲ"

"မုန်တိုင်းမျက်စိဆီကို။"

ချီမင်က ပြန်ဖြေ၏။

"ငါ လမ်းမှာ 'မိတ်ဆွေဟောင်း' တစ်ယောက်ကို သတ်ပစ်လိုက်ဦးမယ်"

"မိတ်ဆွေဟောင်းတဲ့လား..."

ချူးဝမ်တောက် တွေဝေသွားသည်။

နောက်တစ်ခဏတွင် ချီမင်က အလင်းတန်းတစ်ခုအဖြစ်သို့ ပြောင်းလဲသွားပြီး လေထုကို ဖြတ်ခွဲသွားခဲ့တော့၏။

ကမ္ဘာဦးတာအိုအလင်းသည် သူ၏ ခန္ဓာကိုယ်ကို ဝန်းရံထားရာ ပတ်ဝန်းကျင်တွင် ကျဆင်းတိုက်ခတ်နေသော ကောင်းကင်တာအို ဆီးနှင်းမုန်တိုင်းများသည် သူ့အပေါ် လုံးဝ သက်ရောက်မှု မရှိခဲ့ပေ။

လေဟာနယ်နှင့် အသင်္ချေတောင်တို့သည် အလွန် အစွမ်းထက်ကြပြီး ဤနေရာရှိ မုန်တိုင်းကို မကြောက်ရွံ့ကြပေ။

ချူးဝမ်တောက်နှင့် မာရတို့သည် ပို၍ပင် မကြောက်ရွံ့ကြချေ။

အပြင်ဘက်ကမ္ဘာတွင်...

ခန်းမကိုးဆောင်ထဲ၌...

"မဖြစ်တော့ဘူး။"

ခိုင်ယာ့သည် တုန်လှုပ်သွားကာ။

"တစ်ခုခု ဖြစ်တော့မယ်။ ဆယ်နှစ်တည်းနဲ့ ချီမင်က (၁၆၈) ခုမြောက်အဆင့်ကို ဝင်သွားပြီး ဆလိုင်ယွန်ကို မီသွားပြီ။"

"အခု ကြည့်ရတာ လန်ယာ့အင်မော်တယ်မြို့မှာ အရင်တုန်းက တိတ်တဆိတ် တိုက်ခိုက်ခဲ့တဲ့ ရန်သူက ဆလိုင်ယွန်မှန်း ချီမင်က အာရုံခံမိသွားတဲ့ပုံပဲ။ ဒီလိုဆို သူ့ရဲ့ လက်ရှိ ခွန်အားအရ ဆလိုင်ယွန်က ချီမင်ရဲ့ ယှဉ်နိုင်တဲ့ ပြိုင်ဘက် ဖြစ်နိုင်မှာ မဟုတ်ဘူး။"

"ငါ့ရဲ့ ဒီတပည့်ကတော့ သေဖို့ များနေပြီ။"

ကောင်းကင်တာအိုမုန်တိုင်းကမ္ဘာထဲတွင်...

မုန်တိုင်းမျက်စိ၏ အပြင်ဘက်အစွန်အဖျားတွင်...

ကမ္ဘာလောကကြီးထဲတွင် ဆီးနှင်းပွင့်များ ကခုန်နေပြီး မုန်တိုင်းများ တဝုန်းဝုန်း မြည်ဟည်းနေ၏။

မျက်စိတစ်ဆုံး ကြည့်နိုင်သမျှ နေရာသည် ကောင်းကင်နှင့်မြေကြီးကို ဖုံးလွှမ်းထားသော အဆုံးမဲ့ ဆီးနှင်းပွင့်များဖြင့် ပြည့်နှက်နေသည်။

သူ၏ မျက်စိရှေ့တွင် မြင်တွေ့နေရသည်မှာ အဖြူရောင်များသာ ဖြစ်၏။

မုန်တိုင်းထဲတွင် ဆလိုင်ယွန်နှင့် အခြားသူများသည် အခက်အခဲအနည်းငယ်ဖြင့် ရှေ့သို့ လျှောက်လှမ်းနေကြ၏။

သူတို့သည် မုန်တိုင်းမျက်စိ၏ အပြင်ဘက်အစွန်အဖျားသို့ ရောက်ရှိနေကြပြီ ဖြစ်သည်။

သူတို့ လမ်းတစ်လျှောက်တွင် တိုက်ပွဲများစွာ ကြုံတွေ့ခဲ့ရသည့်အပြင် ၎င်းတို့အားလုံးကား အန္တရာယ်များလှသည့် တိုက်ပွဲများဖြစ်၏။

မကြာမီတွင် သူတို့ မုန်တိုင်းမျက်စိသို့ ရောက်ရှိနိုင်တော့မည် ဖြစ်၏။

"ဘာတွေ ဖြစ်နေတာလဲ။"

ဆလိုင်ယွန်က နက်ရှိုင်းသော အတွေးထဲသို့ ကျရောက်နေ၏။

"အစကတည်းက ငါ့မှာ ကပ်ဘေးတစ်ခု ကျရောက်တော့မယ့် ပုံစံမျိုးနဲ့ ကြောက်စရာ ခံစားချက်ကြီး အမြဲ ရှိနေခဲ့တာ၊ မုန်တိုင်းမျက်စိထဲမှာ သေစေနိုင်တဲ့ အန္တရာယ်တစ်ခု ပုန်းကွယ်နေတာ ဖြစ်နိုင်မလား။"

"ဒါမှမဟုတ် တခြား အကြောင်းများ ရှိနေတာလား။"

"ဖရိုဖရဲနတ်ဆိုးဘုရား ကောင်းကင်လျှို့ဝှက် နည်းစနစ်။"

ဆလိုင်ယွန်က ရပ်တန့်လိုက်၏။

သူသည် သူ၏ အံ့ဖွယ်စွမ်းအား တာအိုနည်းစနစ်ကို လည်ပတ်လိုက်ရာ တာအိုစွမ်းအားသည် သူ၏ ခန္ဓာကိုယ် ပတ်လည်တွင် လှည့်ပတ်သွားသည်။

ကံကြမ္မာနှင့် ကမ္မ၏ စွမ်းအားတို့ ရောယှက်သွားကာ ဆိုလိုက်၏။

"သူပဲ။"

နောက်တစ်ခဏတွင် ဆလိုင်ယွန်၏ မျက်လုံးများ ပြူးကျယ်သွားပြီး သူ၏ မျက်နှာသည် တုန်လှုပ်မှုနှင့် မယုံကြည်နိုင်မှုတို့ဖြင့် ပြည့်နှက်သွားချိန်၌ ရုတ်တရက် ပေါက်ကွဲသံကြီးတစ်ခု ထွက်ပေါ်လာသည်။

"မိုးမြေစစ်တုရင်ခုံ။"

ချီမင် ရောက်ရှိလာခဲ့ပြီး ဖြစ်၏။

သူ၏ ညာလက်ကို ဝှေ့ယမ်းလိုက်သည်နှင့် ကောင်းကင်နှင့်မြေကြီးစစ်တုရင်ခုံသည် ပျံသန်းထွက်သွားပြီး လျင်မြန်စွာ ကျယ်ပြန့်လာကာ ပတ်ဝန်းကျင် နေရာလွတ်ကို ဖုံးလွှမ်းသွားပြီး ဆလိုင်ယွန်နှင့် အခြားသူများကို ထောင်ချောက်ဆင်ဖမ်းလိုက်သည်။