လူသားနှင့်ဓားပေါင်းစည်ခြင်း။ ဓား၏ အာရုံခံနိုင်စွမ်း။ (၁)

“ဒါဆိုရင် သံမဏိဓားဂိုဏ်းကို ခရီးထွက်ဖို့ အချိန်ရောက်ပြီ” စူးချန်ခုန်းက စာလိပ်ကို သိမ်းဆည်းရင်း ပြောလိုက်သည်။

ဟွမ်ဖူဟုန်လန်၏ သတင်းအချက်များးကို သူရထားပြီး သူ့ကိုယ်ပိုင်အစွမ်းက သူ့ထက်သာလွန်သည်ဟု ခံစားရသော်လည်း သတိထားဖို့ အမြဲတမ်း အရေးကြီးပါသည်။

ဒါက ထောင်ချောက်တစ်ခုဖြစ်နေရင်ခဲ့ရင်.. ဟွမ်ဖူဟုန်လန်က သူ့ရဲ့ စစ်မှန်တဲ့အစွမ်းသတ္တိကို ဖုံးကွယ်ထားခဲ့ရင်.. ဟွမ်ဖူဟုန်လန်ကို သတ်ပြီးနောက် သွေးမြူခိုးမျှော်စင်က ရှက်ရွံ့စွာ လုပ်ရပ်ကို ဝန်ခံဖို့ငြင်းဆိုခဲ့ရင်..

ထို့ကြောင့် အထူးသတိထားပါက မထိခိုက်နိုင်ပါ။ မည်သို့ပင်ဖြစ်စေ သူကိုယ်တိုင် စုံစမ်းစစ်ဆေးရန် သံမဏိဓားဂိုဏ်းသို့ အရင်သွားသင့်သည်။

တာ့ဖုန်းပြည်နယ်မြို့တော်၏ နယ်မြေအတွင်းတွင် တည်ရှိသော သံမဏိဓားဂိုဏ်းသည် နှစ်ပေါင်း နှစ်ရာမှ သုံးရာအထိ သမိုင်းကြောင်းရှိသည်။ ဟွမ်ဖူဟုန်လန် ပေါ်လာသည်အထိ ၎င်းသည် အမြဲတမ်း မထင်ရှားခဲ့ပေ။ သူဟာ အဖွဲ့ငယ်များစွာကို ဝါးမျိုခြင်းဖြင့် ဂိုဏ်းအတွက် မကောင်းသတင်းဖြင့် ကျော်ကြားမှုရရှိစေခဲ့ပြီး ကြောက်စရာကောင်းသောသူ ဖြစ်လာခဲ့သည်။

သံမဏိဂိုဏ်းရဲ့ အိမ်တော်ဟာ သံမဏိဓားတောင်ထိပ်မှာ တည်ရှိပါသည်။ တောင်တက်လမ်းတစ်လျှောက်မှာ ခြေလှမ်းဆယ်လှမ်းတိုင်း ဂိုဏ်းသားအများအပြားက စောင့်ကြပ်နေတဲ့ ကင်းတစ်ခုရှိသည်။ အားလုံးက ဓားကိုင်ဆောင်ထားပြီး ထက်မြက်တဲ့ အရှိန်အဝါတွေ ရှိကြသည်။

ရက်အနည်းငယ်အကြာမှာတော့ ညဉ့်နက်သန်းခေါင်အချိန်၌ သံမဏိဓားဂိုဏ်းထဲက သိုင်းပညာရှင် ၉၀ ရာခိုင်နှုန်းဟာ အနားယူနေကြပြီဖြစ်သည်။ မီးအိမ်ကိုင်ဆောင်ပြီး ညဘက်တာဝန်ကျတဲ့သူတွေပဲ လှည့်လည်သွားလာနေကြပြီး ညသန်းခေါင်ယံမှာ သံမဏိဓားဂိုဏ်းထဲကို မည်သူမှ မဝင်ရောက်နိုင်အောင် တားဆီးထားသည်။

“အရမ်းအေးတာပဲ။ ကျွန်တော့်ကိုယ်တွင်းအင်္ဂါတွေကို တောင့်ထားတာတောင် သိပ်မခံနိုင်ဘူး။” လို့ သံမဏိဓားဂိုဏ်းရဲ့ သိုင်းပညာရှင်ဝတ်စုံတွေ ဝတ်ဆင်ထားပြီး မီးအိမ်ကိုင်ဆောင်ထားတဲ့ လူနှစ်ယောက်ထဲမှ လူငယ်လေးတစ်ယောက်က တိုက်ခတ်လာသည့် အေးစက်တဲ့လေကြောင့် တုန်ယင်နေ၏။

ဒါဟာ ဆောင်းရာသီရဲ့ အအေးဆုံးအချိန်ဖြစ်ပြီး အထူးသဖြင့် အပူချိန်ဟာ ညဘက်မှာ အလွန်နိမ့်လေသည်။ ဝတ်ရုံပါးပါးလေး ဝတ်ဆင်ထားတဲ့ သိုင်းပညာရှင်တောင်မှ အအေးဒဏ်ကို သိသိသာသာ ခံစားရနိုင်ပါသည်။

“ချည်ထည်အဝတ်တွေကို အောက်မှာ ဝတ်ဖို့ ငြင်းနေပြီးတော့ အခုတော့ အေးနေပြီမလား” အသက်ကြီးတဲ့ သိုင်းပညာရှင် နောက်တစ်ယောက်က ခေါင်းခါပြီး ရယ်ရင်းပြောလိုက်သည်။

“မကြာသေးခင်က အာဏာရှင်ဓားဂိုဏ်းက ကျွန်တော်တို့ရဲ့ သံမဏိဓားဂိုဏ်းကို အကြိမ်ကြိမ် ရန်စခဲ့တယ်။ တစ်လ နှစ်လအတွင်း ကျွန်တော်တို့ရဲ့ ဂိုဏ်းခေါင်းဆောင်က သူ့ရဲ့ တံခါးပိတ်ကျင့်ကြံတာကနေ ထွက်လာလိမ့်မယ်လို့ ကြားထားတယ်။ အဲဒီအချိန်ကျရင် အာဏာရှင်ဓားဂိုဏ်း သေချာပေါက် ပေးဆပ်ရလိမ့်မယ်။”

ကင်းလှည့်နေတဲ့ သိုင်းသမားနှစ်ယောက်ဟာ ပျင်းရိနေတာကြောင့် အချင်းချင်း တီးတိုးပြောဆိုနေကြသည်။ အားကိုးတကြီးလေသံနှင့် နှစ်ယောက်စလုံးက သူတို့ရဲ့ ဂိုဏ်းခေါင်းဆောင်ရဲ့ နည်းလမ်းတွေကို မျှော်လင့်နေကြသည်။

သူတို့ ပိုဝေးတဲ့နေရာကို ရွေ့သွားတဲ့အခါ လူလုပ်တောင်ကုန်းတစ်ခုရဲ့ နောက်ကွယ်၌ သံမဏိဓားဂိုဏ်းဝတ်စုံဝတ်ထားတဲ့ လူတစ်ယောက်က သူတို့ရဲ့ စကားဝိုင်းကို ကြားလိုက်တာကြောင့် တိတ်တဆိတ် ရပ်နေ၏။

အနှီလူ၏ အသွင်အပြင်က သာမန်သာဖြစ်သည်။ အရပ်က ရှည်လည်း မရှည် ပုလည်း မပုပါ။ သို့သော် ထိုလူက စူးချန်ခုန်းကလွဲ၍ အခြားသူမဟုတ်ပေ။

လွန်ခဲ့တဲ့ရက်အနည်းငယ်ကတည်းက စူးချန်ခုန်းဟာ သံမဏိဓားဂိုဏ်းကို ရောက်နှင့်နေပြီဖြစ်သည်။ ထို့အပြင် သူက ဂရုတစိုက်နဲ့ သံမဏိဓားဂိုဏ်းသားတစ်ယောက်ရဲ့ ဝတ်စုံကို ဝတ်ဆင်ပြီး သူ့ရဲ့ အသွင်အပြင်ကို ပြောင်းလဲကာ သတင်းအချက်အလက်တွေ စုဆောင်းဖို့ ညတိုင်း ဂိုဏ်းထဲကို ခိုးဝင်သည်။

စူးချန်ခုန်းရဲ့ နဝမအဆင့် လိပ်အသက်ရှူနည်းပညာနဲ့ သူ့ရှိနေတာကို ဖုံးကွယ်နိုင်စွမ်းဟာ အလွန်တရာ ထူးခြားဆန်ပြားလှပါသည်။ ငြိမ်ငြိမ်လေးနေသရွေ့ သူဟာ သစ်တုံးတစ်တုံးနဲ့ ခွဲခြားလို့မရဘဲ အပြင်လူတွေက သူရှိနေတာကို သိနိုင်ဖို့ ခက်ခဲသည်။

ဒီရက်ပိုင်းအတွင်းမှာ စူးချန်ခုန်းဟာ အချက်အလက်တွေ အများကြီးရခဲ့သည်။

သံမဏိဓားဂိုဏ်းခေါင်းဆောင် ဟွမ်ဖူဟုန်လန်ဟာ ဂိုဏ်းထဲမှာ ရှိနေပြီး အနောက်ဘက်တောင်ပေါ်က တားမြစ်နယ်မြေတစ်ခုမှာ ဓားပညာကို နှစ်လလောက် ကျင့်ကြံနေ၏။

"အခု ငါလုပ်ရမှာက ဟွမ်ဖူဟုန်လန်ကို ရှာပြီး သူ့ကိုသတ်ဖို့ပဲ။" စူးချန်ခုန်းရဲ့အကြည့်က အေးစက်နေလေ၏။

ဟွမ်ဖူဟုန်လန်ဟာ တစ်ယောက်တည်းနေပေမယ့် အစားအစာနဲ့ အရက်ပါဘဲ မနေနိုင်ပါ။ ပြီးခဲ့တဲ့ညအနည်းငယ်အတွင်း စူးချန်ခုန်းရဲ့ လေ့လာတွေ့ရှိချက်တွေအရ သံမဏိဓားဂိုဏ်းသားတွေဟာ အနောက်ဘက်တောင်ပေါ်က တားမြစ်နယ်မြေကို အရက်နဲ့ အစားအစာတွေ ယူဆောင်ပေးခဲ့ပြီး အဲဒါတွေက ဟွမ်ဖူဟုန်လန်အတွက် ဖြစ်နိုင်ပါသည်။

စူးချန်ခုန်း၏ အစီအစဉ်က ရိုးရှင်းပါသည်။ သံမဏိဂိုဏ်းရဲ့ တပည့်တစ်ယောက်လို ဟန်ဆောင်လျက် ဟွမ်ဖူဟုန်လန်ထံ အစားအစာတွေ ယူဆောင်ကာ အဆိပ်ခတ်ပြီး သူ့ကို အငိုက်ဖမ်းကာ သတ်ပစ်ပြီး ထွက်သွားဖို့ပါပဲ။

“သူတို့ ရောက်လာပြီ။”

စူးချန်ခုန်းက တိတ်တဆိတ် ချောင်းမြောင်းနေပြီး မကြာခင်မှာပဲ သံမဏိဓားဂိုဏ်းရဲ့ တပည့်ဝတ်စုံဝတ်ထားတဲ့ လူနှစ်ယောက် လမ်းပေါ် လျှောက်လာတာကို မြင်လိုက်ရတဲ့အခါ သူ့မျက်လုံးတွေ အရောင်တောက်သွားလေ၏။

ထိုလူနှစ်ယောက်စလုံးဟာ အသက်နှစ်ဆယ်ကျော်အရွယ်တွေဖြစ်ပြီး ညီအစ်ကိုတွေလို့ ယူဆရကာ အသွင်အပြင်တွေ တူညီကြသည်။ တစ်ယောက်က အရက်အိုးတစ်လုံးကို ကိုင်ထားပြီး နောက်တစ်ယောက်က အစားအစာတွေ အေးမသွားအောင် ဝါးခြင်းတောင်းဖြင့် ဖုံးအုပ်ထားသော အရသာရှိသည့် အစားအစာတွေ ပြည့်နေတဲ့ သစ်သားပန်းကန်ကို ကိုင်ထားပြီး တစ်ယောက်က အဝေးကနေတောင် အနံ့ရနိုင်သည်။

သူတို့က ဟွမ်ဖူဟုန်လန်ကို အရက်နဲ့ အစားအစာတွေ ပို့ပေးရတဲ့ တာဝန်ကျ နှစ်ယောက်ဖြစ်သည်။

ဟွမ်ဖူဟုန်လန်မှာ ညဉ့်လယ်စာစားတတ်တဲ့ အကျင့်ရှိတဲ့အတွက် နှစ်ယောက်သား တိတ်တဆိတ် လမ်းလျှောက်ပြီး အစားအစာတွေ ပို့ပေးတဲ့ နေ့စဉ်လုပ်ငန်းဆောင်တာတွေကို လုပ်ဆောင်နေကြသည်။

ဝူးရှ်

ရုတ်တရက် သူတို့နောက်ကနေ လေပြင်းတစ်ချက်တိုက်လာပြီး ခေါင်းနောက်ကနေ ပြင်းထန်တဲ့ရိုက်ချက်တစ်ခု ခံစားလိုက်ရသည်။ သူတို့လက်ထဲက သစ်သားပန်းကန်နဲ့ အရက်ခွက်တွေ လွင့်ထွက်သွားပြီး မြေပြင်ပေါ် လဲကျသွားတဲ့အခါ သူတို့ရဲ့အမြင်အာရုံတွေ မှောင်မိုက်သွားလေ၏။ သို့ပေမယ့် လက်နှစ်ဖက်က သူတို့ကို ဖျတ်ကနဲ လွှဲရမ်းလိုက်ပြီး မြေပြင်ပေါ် တိတ်တဆိတ်ဖြင့် ထိခိုက်မှုမရှိအောင် ချလိုက်သည်။

သံမဏိဓားဂိုဏ်းရဲ့ တပည့်နှစ်ယောက်ဟာ အသံမထွက်ဘဲ သတိလစ်သွားကြသည်။ စူးချန်ခုန်းက သူတို့ရဲ့ပခုံးတွေကို ဆွဲပြီး လူလုပ်တောင်ကုန်းနောက်ကို ဆွဲခေါ်သွားခဲ့သည်။

"ဂျွတ် ဂျက် ဂျက်"

စူးချန်ခုန်းက အသက်ကြီးတဲ့ အဝတ်အစားတွေကို အမြန်ဝတ်ဆင်ပြီး သူ့မျက်နှာအသွင်အပြင်နဲ့ ခန္ဓာကိုယ်ပုံစံကို စစ်ဆေးကာ လိပ်အသက်ရှူနည်းပညာမှာ အရိုးပြောင်းလဲခြင်းနည်းစနစ်နဲ့ သူ့ခန္ဓာကိုယ်နဲ့ အရိုးဖွဲ့စည်းပုံကို ပြောင်းလဲပြီးနောက် သူ့မျက်နှာကို ပေါင်ဒါလိမ်းပြီး အသားအရေကြမ်းတမ်းအောင် လုပ်လိုက်သည်။

ပြီးသွားတဲ့အခါ စူးချန်ခုန်းနဲ့ အသက်ကြီးတဲ့ သိုင်းပညာရှင်က တစ်ထပ်တည်းမကျပေမယ့် တစ်ယောက်နဲ့တစ်ယောက် ခုနစ်ဆယ်ရာခိုင်နှုန်းကနေ ရှစ်ဆယ်ရာခိုင်နှုန်းလောက် ဆင်တူပြီး သေချာမကြည့်ရင် သူ့ကို မသိတဲ့သူတွေအတွက် သိပ်မသိသာပါ။

ထို့နောက် စူးချန်ခုန်းသည် အနံ့မရနိုင်အောင် အဪင်နှင့် အစားအစာနှစ်မျိုးလုံးထဲသို့ သွေးကွဲဆူပွက်ခြင်းအဆိပ်အနည်းငယ်ကို ထည့်လိုက်သည်။

“အနောက်ဘက်တောင်ကို သွားကြရအောင်။”

ပြင်ဆင်ပြီးသည်နှင့် စူးချန်ခုန်းသည် နှောင့်နှေးခြင်းမရှိဘဲ အစားအစာအပြည့်ထည့်ထားသော ဗန်းကိုကိုင်ကာ အရက်အိုးကို လက်မောင်းကြားညှပ်လျက် အနောက်ဘက်တောင်ရှိ တားမြစ်နယ်မြေသို့ ထွက်သွားခဲ့သည်။

အနောက်ဘက်တောင်၏ တားမြစ်နယ်မြေသည် သံမဏိဓားဂိုဏ်း၏ ဂိုဏ်းခေါင်းဆောင် ဟွမ်ဖူဟုန်လန် သီးသန့်နေထိုင်သည့်နေရာဖြစ်သည်။ ခွင့်ပြုချက်မရှိဘဲ မည်သူမျှ ဝင်ရောက်ခွင့်မရှိပေ။

သူနီးကပ်မလာမီ စူးချန်ခုန်းသည် အနောက်ဘက်တောင်၏ တားမြစ်နယ်မြေ ဝင်ပေါက်တွင် စူးရှသော အရှိန်အဝါများစွာကို ခံစားလိုက်ရသည်။ သူတို့က ဝင်ပေါက်ကို စောင့်ကြပ်နေသော သံမဏိဓားဂိုဏ်းမှ သိုင်းပညာရှင်များဖြစ်ကြပြီး သူတို့ထဲက အနည်းဆုံး နှစ်ဦးမှာ ချီသွေးနယ်ပယ်ရှိ နက်ရှိုင်းသော ချီနှင့်သွေးရှိသည့် သိုင်းပညာရှင်များဖြစ်ကြသည်။