ကျိယန်ကမ္ဘာ ရှုံးနိမ့်ခြင်း

နတ်ဆိုးနှင်အလံမှ ထွက်ပေါ်လာသော အလင်းရောင်သည် ကောင်းကင်နတ်ဆိုး၏ ကိုယ်ပေါ်သို့ ကျရောက်သည့်အခါ ၎င်း၏ ကောင်းကင်နတ်ဆိုး စွမ်းအားများမှာ မြင်သာထင်သာစွာပင် လျင်မြန်စွာ ပျက်ပြယ်လာခဲ့သည်။

ဤမြင်ကွင်းကို မျက်ဝါးထင်ထင် မြင်တွေ့လိုက်ရသောအခါ ကျိယန်ကမ္ဘာမှ ကျင့်ကြံသူများအားလုံး အံ့အားသင့်ကာ ကြက်သေသေသွားကြသည်။

ဘယ်လိုဖြစ်ရတာလဲ။

ယခု ကောင်းကင်နတ်ဆိုးသည် တခြားကမ္ဘာမှ ကျူးကျော်သူကို ကြောက်ရွံ့၍ ထွက်ပြေးခဲ့ရရုံမျှမက ပြင်းထန်စွာ ဖိနှိပ်တိုက်ခိုက်ခြင်းကိုပင် ခံနေရပေပြီ။

သူ၏ခန္ဓာကိုယ် တဖြည်းဖြည်း ပျက်စီးလာသည်ကို ခံစားမိသည်နှင့်အမျှ ကောင်းကင်နတ်ဆိုးသည် အလျင်အမြန် နောက်လှည့်ကာ ပိုမို နက်ရှိုင်းသော တောင်တန်းများအတွင်းသို့ ထွက်ပြေးတိမ်းရှောင်သွားလေသည်။

ယခုအချိန်တွင် ကောင်းကင်နတ်ဆိုးတစ်ယောက် ကျိယန်ကမ္ဘာမှ ချက်ချင်း ထွက်ခွာသွားလိုစိတ် ပြင်းပြနေပြီ ဖြစ်သည်။ ဤလူသား ကျင့်ကြံသူက ထူးဆန်းလွန်းလှသည်။ ဤကမ္ဘာတွင် ကောင်းကင်နတ်ဆိုး၏ စွမ်းအားကို ထိန်းချုပ်နိုင်သော ရွှေနက်ကဲ့သို့ အရာများ အမှန်တကယ် ရှိနေသော်လည်း ရွှေနက်၏ အစွမ်းက အကန့်အသတ် ရှိသည်။

ကောင်းကင်နတ်ဆိုး စွမ်းအားများကို ဤကဲ့သို့ တိုက်ရိုက် ပျက်ပြယ်စေနိုင်သည့် အရာနှင့် ကြုံတွေ့ရခြင်းက သူ့အတွက် ပထမဆုံးအကြိမ်ပင် ဖြစ်သည်။

စကြဝဠာထဲတွင် ဤကဲ့သို့သော အစွမ်းထက် အရာမျိုး ရှိနေသည်ဟု ယခင်က သူ တစ်ခါမှ မကြားသိခဲ့ဖူးပေ။ ဤလူသား ကျင့်ကြံသူက ထိုအရာကို မည်သည့်နေရာကများ ရရှိခဲ့ပါသနည်း။

အလွန်တရာ ကြောက်မက်ဖွယ်ကောင်းလှသည်။

ကောင်းကင်နတ်ဆိုးကြီး တခြားကမ္ဘာမှ လူသားတစ်ဦးကို ကြောက်လန့်၍ ထွက်ပြေးသွားသည်ကို မြင်တွေ့လိုက်ရသောအခါ ကျိယန်ကမ္ဘာမှ ကျင့်ကြံသူများအားလုံး နောက်တစ်ကြိမ် ထိတ်လန့်တုန်လှုပ်သွားကြပြန်သည်။

၎င်းသည် ကောင်းကင်နတ်ဆိုးတစ်ကောင် ဖြစ်သည်။

ကောင်းကင်နတ်ဆိုး တစ်ကောင်က လူသား ကျင့်ကြံသူတစ်ဦးကို ဒီလောက် ကြောက်ရွံ့နေရသည်ဆိုလျှင် ၎င်းကို ကောင်းကင်နတ်ဆိုးတစ်ကောင်ဟု ခေါ်ထိုက်သော အရည်အချင်း မရှိတော့ချေ။

ကောင်းကင်နတ်ဆိုး၏ ကြောက်ရွံ့တုန်လှုပ်နေသော အပြုအမူများအရ ကျိယန်ကမ္ဘာမှ ကျင့်ကြံသူများလည်း ဖြစ်လာမည့် အဆုံးသတ်ကို အနည်းနှင့်အများ ခန့်မှန်းမိနေကြပြီ ဖြစ်သည်။

လူသား ကျင့်ကြံသူတစ်ဦးကို ထိုမျှ ကြောက်လန့်နေရသည့် ကောင်းကင်နတ်ဆိုး၏ အခြေအနေအရ ဤကျူးကျော်သူတွင် လုံးဝ အသာစီးရ လွှမ်းမိုးနိုင်သော အစွမ်းအစများ ပိုင်ဆိုင်ထားကြောင်းကို ရှင်းလင်းစွာ ညွှန်ပြနေသည်။

ကောင်းကင်နတ်ဆိုးကို အသုံးချ၍ ၎င်းနှင့် ကျူးကျော်သူတို့ နှစ်ဦးစလုံး ထိခိုက်သွားစေမည့် သူတို့၏ မူလ အစီအစဉ်မှာ လုံးဝ ပျက်စီးသွားခဲ့ပြီ ဖြစ်သည်။

ကျူးကျော်သူ ပြသခဲ့သည့် ကြောက်မက်ဖွယ် စွမ်းအားကို ထည့်သွင်းစဉ်းစားကြည့်လျှင် ၎င်းအနေနှင့် ကောင်းကင်နတ်ဆိုးကို ကျိယန်ကမ္ဘာမှ မောင်းထုတ်ပြီးသည့်တိုင်အောင် အင်အားများစွာ သုံးစွဲလိုက်ရလိမ့်မည် မဟုတ်သည်မှာ သေချာသည်။

ထိုအခါ ကျိယန်ကမ္ဘာ၏ အင်အားစုများအားလုံး စည်းလုံး ပူးပေါင်း၍ ဤကျူးကျော်သူကို ရင်ဆိုင်တိုက်ခိုက်လျှင်ပင် သူတို့ဘက်၌ အနိုင်ရရန် အခွင့်အလမ်း လုံးဝ ရှိတော့မည် မဟုတ်ပေ။ ထိုသို့ တွေးမိသည်နှင့် ချက်ချင်းပင် ကျိယန်ကမ္ဘာရှိ အချို့သော အင်အားစုများက ထွက်ပြေးရန် စတင် စဉ်းစားဆုံးဖြတ်လိုက်ကြသည်။

ယခုအချိန်တွင် ကောင်းကင်နတ်ဆိုးက ကျူးကျော်သူ၏ အာရုံကို လွှဲထားနိုင်ဆဲဖြစ်သည်။ သူတို့အတွက် ကမ္ဘာကူး လမ်းကြောင်း တစ်ခု တည်ဆောက်ရန် အချိန်အနည်းငယ် ရရနိုင်သေးသည်။

ကောင်းကင်နတ်ဆိုးကို ကျူးကျော်သူက ကျိယန်ကမ္ဘာမှ အပြီးတိုင် မောင်းထုတ်ပြီးသည်အထိ စောင့်ဆိုင်းနေမည်ဆိုလျှင် ကျူးကျော်သူ၏ အာရုံစိုက်မှုသည် သူတို့အပေါ်သို့ ကျရောက်လာမည်ဖြစ်၏။ ထိုအခါ ကမ္ဘာကူး လမ်းကြောင်း တည်ဆောက်ရန် အချိန် နောက်ကျသွားဖွယ် ရှိသည်။

ကောင်းကင်နတ်ဆိုးသည် ကမ္ဘာ့အတားအဆီး၏ အက်ကွဲကြောင်းဆီသို့ ရောက်ရှိရန် လက်တစ်ကမ်းအလို ဖြစ်နေစဉ်လုချန်းက သူ၏ နတ်သတ်ဓားကို လျင်မြန်စွာ ထုတ်ယူလိုက်ပြီး စိတ်ဝိညာဉ် စွမ်းအားများအားလုံးကို ဓားထံသို့ စုစည်းထည့်သွင်းလိုက်သည်။

ရေခဲရှစ်ဆင့် ဓား။

ချက်ချင်းပင် နတ်ဆိုး ချိပ်ပိတ်နယ်မြေ တစ်ခုလုံး ရုတ်တရက် အေးခဲသွားခဲ့ပြီး ကောင်းကင်ကြီးတစ်ခုလုံးပင်လျှင် ထူထဲသော ရေခဲလွှာဖြင့် ဖုံးလွှမ်းသွားသည့်အလား ထင်မှတ်ရသည်။ ခဏငယ်ခန့် အချိန်လေးအတွင်းမှာပင် နတ်ဆိုး ချိပ်ပိတ် နယ်မြေ၏ တောင်တန်းများအားလုံးသည် နှင်းဖြူများဖြင့် ဖုံးလွှမ်းသွားကာ အေးစက်မာကြောလှသော နှင်းကမ္ဘာတစ်ခုအဖြစ်သို့ ပြောင်းလဲသွားခဲ့သည်။

ထို့ပြင် ကောင်းကင်နတ်ဆိုး ကိုယ်တိုင်သည်လည်း လေထုထဲတွင်ပင် ကြီးမားသော ရေခဲတုံးအဖြစ် ခဲနေခဲ့၏။ ထိုအေးခဲတောင့်တင်းနေသော အခြေအနေမှ ကောင်းကင်နတ်ဆိုး ရုန်းကန်လွတ်မြောက်ရန် ကြိုးစားခဲ့သော်လည်း လုချန်းက ၎င်းအား ထိုသို့ပြုလုပ်ရန် အခွင့်အရေး လုံးဝ မပေးခဲ့ချေ။

နောက်တစ်ခဏတွင် ပြင်းထန်သော ဓားစွမ်းအင်ရှစ်ခုက ကောင်းကင်နတ်ဆိုး၏ ခန္ဓာကိုယ်ကို ထွင်းဖောက် ဖြတ်သန်းသွားသည်။

ကောင်းကင်နတ်ဆိုး၏ ခန္ဓာကိုယ်သည် ချက်ချင်းဆိုသလို သေးငယ်သော ရေခဲအမှုန်အမွှားများအဖြစ်သို့ ပြောင်းလဲသွားခဲ့ပြီး ၎င်း၏ နတ်ဆိုးအငွေ့အသက်နှင့် ကောင်းကင်နတ်ဆိုး စွမ်းအားများမှာလည်း ချက်ချင်း ပျောက်ကွယ်သွားကာ နောက်တစ်ကြိမ် ပြန်လည် စုစည်းနိုင်စွမ်း မရှိတော့ပေ။

ကောင်းကင်နတ်ဆိုးများမှာ ပုံမှန်အားဖြင့် သတ်ဖြတ်၍မရနိုင်သော သတ္တဝါများ ဖြစ်ကြသည်။ အများဆုံး ချိပ်ပိတ်ထားခြင်းသာ ပြုလုပ်နိုင်ပြီး ကောင်းကင်နတ်ဆိုးတစ်ကောင်ကို မရေမတွက်နိုင်သော အပိုင်းအစများအဖြစ် ခုတ်ပိုင်းလိုက်လျှင်ပင် ၎င်းသည် သေခြင်းတရားမှ ပြန်လည် ရှင်သန်ထမြောက်လာနိုင်သေးသည်။

သို့သော် နတ်ဆိုးမြေမြုပ်ကျင့်စဉ်နှင့် နတ်ဆိုးနှင်အလံတို့နှင့် ထိတွေ့ခဲ့ရသောကြောင့် ကောင်းကင်နတ်ဆိုး၏ စွမ်းအားမှာ အလွန်အမင်း ဖိနှိပ်ခံထားရသည်။ အကယ်၍ ၎င်း၏ ပုံစံအမှန် ကို သတ်ဖြတ်နိုင်ခဲ့လျှင် ကောင်းကင်နတ်ဆိုးထံ၌ တည်ရှိနေသော စွမ်းအားများ ချက်ချင်း ပျက်ပြယ်သွားမည်ဖြစ်ပြီး ၎င်း၏ နတ်ဆိုးခန္ဓာကိုယ်တစ်ခုကို နောက်တစ်ကြိမ် ပြန်လည် စုဖွဲ့နိုင်တော့မည် မဟုတ်ပေ။

ကောင်းကင်နတ်ဆိုး၏ ခန္ဓာကိုယ်ကြီး ဤကဲ့သို့ လေထုထဲတွင်ပင် ပြိုကွဲပျက်စီးသွားသည်ကို မျက်ဝါးထင်ထင် မြင်တွေ့လိုက်ရသောအခါ ကျိယန်ကမ္ဘာရှိ တန်ခိုးကြီး အင်အားစုကြီးများအားလုံးမှ ကျင့်ကြံသူများလည်း သူတို့၏ မိုးပျံလှေများပေါ်တွင်ပင် အံ့အားသင့်ကာ ကြက်သေသေသွားခဲ့ကြပြန်သည်။

ဓားတစ်ချက်တည်းဖြင့်ပင် ကောင်းကင်နတ်ဆိုးကို အပြီးတိုင် အနိုင်ယူ ချေမှုန်းလိုက်ပါလား။

သူတို့၏ ဘိုးဘေးများက အသက်ပေါင်းများစွာ ရင်း၍ ကြီးမားသော ပေးဆပ်မှုများဖြင့် အနိုင်နိုင် ချိပ်ပိတ်ခဲ့ရသော ကောင်းကင်နတ်ဆိုးကို တခြားကမ္ဘာမှ ကျူးကျော်သူတစ်ဦးက ဤသို့ ဓားတစ်ချက်တည်းဖြင့် အပြီးတိုင် သတ်ဖြတ်သွားခဲ့ခြင်း ဖြစ်သည်။

ဒါက....

ဤတခြားကမ္ဘာမှ ကျူးကျော်သူက ဘယ်လောက်အထိတောင် အစွမ်းထက်နေပါသနည်း။

ကုန်းရယ်လျှံဖုန်းသည်လည်း ပြင်းထန်စွာ ထိတ်လန့်တုန်လှုပ်နေသော မျက်နှာထားဖြင့် သူ၏ နေရာတွင်ပင် ကြက်သေသေကာ ရပ်တန့်နေခဲ့သည်။

ကုန်းရယ်လျှံဖုန်း၏ ထိတ်လန့်ကြောက်ရွံ့နေသော မျက်နှာအမူအရာကို မြင်လိုက်ရသောအခါ နန်းကုန်းယွဲ့ဟွာ၏ မျက်ခုံးများမှာ အနည်းငယ် တွန့်သွားသည်။ သူမက တစ်စုံတစ်ခု ပြောရန် ကြံရွယ်လိုက်စဉ်မှာပင် ဂိုဏ်းတစ်ခုမှ ဂိုဏ်းချုပ်တစ်ဦးက ကုန်းရယ်လျှံဖုန်းအား

“ကုန်းရယ် ရဲတိုက်သခင်။ ကျွန်တော့်မှာ အရေးကြီးတဲ့ ကိစ္စတစ်ခုရှိတာ ရုတ်တရက် သတိရသွားလို့ အရင် သွားခွင့်ပြုပါဦး။”

ဟု လာရောက် ပြောဆိုသည်ကို သူမ မြင်တွေ့လိုက်ရသည်။

ထိုဂိုဏ်းချုပ်သည် စကားဆုံးသည်နှင့် ချက်ချင်းပင် သူ၏ဂိုဏ်းမှ အကြီးတန်း တပည့်များကို ဦးဆောင်လျက် သူတို့၏ မိုးပျံလှေကို အလျင်အမြန် ထိန်းချုပ်ကာ ထွက်ပြေးလွတ်မြောက်ရန် ကြိုးပမ်းလေတော့သည်။

ကောင်းကင်နတ်ဆိုးကြီးပင်လျှင် တခြားကမ္ဘာမှ ကျူးကျော်သူ၏ လက်ချက်ဖြင့် အသတ်ခံခဲ့ရပြီးမှတော့ သူတို့လို လူများအနေဖြင့် ထိုကျူးကျော်သူကို မည်ကဲ့သို့ ရင်ဆိုင်နိုင်စွမ်း ရှိပါတော့မည်နည်း။

ထို့ပြင် ကောင်းကင်နတ်ဆိုးကို ချိပ်ပိတ်မှုမှ လွှတ်ပေးခဲ့သည်မှာလည်း ဤအင်အားစုများ ကိုယ်တိုင်ပင် ဖြစ်သည်။ ဤသတင်းသည် မကြာမီ ကျိယန်ကမ္ဘာ တစ်ခုလုံးသို့ ပျံ့နှံ့သွားပေတော့မည်။ ထိုအချိန်ကျလျှင် သူတို့ အင်အားစုကြီးများ၏ ဂုဏ်သတင်းများလည်း လုံးဝ ပျက်စီးတော့မည်။

တခြားကမ္ဘာမှ ရန်သူများက အရေးယူ တိုက်ခိုက်ခြင်း မပြုရသေးမီမှာပင် ဤကမ္ဘာမှ ကျင့်ကြံသူများက သူတို့ကို ဦးစွာ ဆန့်ကျင် တိုက်ခိုက်ကြပေလိမ့်မည်။

ကျိယန်ကမ္ဘာတွင် သူတို့အတွက် ရပ်တည်စရာ နေရာ မရှိတော့ချေ။

ယခုချက်ချင်း သူတို့၏ သက်ဆိုင်ရာ ဌာနချုပ်များဆီ ပြန်သွားပြီး ခံစစ်ပုံစံ အမြန်ဆုံး ဖွင့်ကာ ထွက်ပြေးရန် ကမ္ဘာ့တံခါး တစ်ခု တည်ဆောက်ပါက အချိန်မီကောင်း မီနိုင်သေးသည်။

သူတို့ ခဏခန့် နှောင့်နှေးကြန့်ကြာသွားပြီး တခြားကမ္ဘာမှ ကျူးကျော်သူက သူတို့နောက်သို့ လိုက်လာမိပါက ထွက်ပြေးလွတ်မြောက်ရန် အခွင့်အရေး လုံးဝ ရှိတော့မည် မဟုတ်ပေ။

တစ်စုံတစ်ယောက်က ဦးဆောင်၍ တိုက်ရိုက် ထွက်ပြေးသွားသည်ကို မြင်သောအခါ အခြားသော အင်အားစုများလည်း ထွက်ပြေးသူများ၏ အုပ်စုထဲသို့ လျင်မြန်စွာ ပူးပေါင်း ပါဝင်လိုက်ကြသည်။

ကုန်းရယ်လျှံဖုန်း ကိုယ်တိုင်လည်း အိပ်မက်ရှည်တစ်ခုမှ ရုတ်တရက် လန့်နိုးလာသည့်အလား ထျန်းကျိရဲတိုက်မှ တပည့်များကို ထိုနေရာတွင်ပင် စွန့်ပစ်ထားခဲ့ကာ မျက်စိရှေ့မှ ချက်ချင်း ပျောက်ကွယ်သွားခဲ့သည်။

ကုန်းရယ်လျှံဖုန်းကိုယ်တိုင် ထွက်ပြေး ပျောက်ကွယ်သွားခြင်းက ကျိယန်ကမ္ဘာ၏ ခုခံရေးတပ်ပေါင်းစု လုံးဝ ပြိုကွဲသွားပြီ ဖြစ်ကြောင်းကို ညွှန်ပြနေပြီး လနက်မြို့ အပေါ်မှ ကောင်းကင်ပြင်ကြီးတစ်ခုလုံးကိုလည်း ကစဉ့်ကလျား အခြေအနေသို့ ဆိုက်ရောက်သွားစေသည်။

မိုးပျံလှေ အများအပြားသည် အလျင်စလို ထွက်ခွာရန် ကြိုးပမ်းကြရင်း အချင်းချင်း ဝင်တိုက်မိကြသည်။ ထျန်းချန်ကမ္ဘာမှ ရှနိုင်ငံတော် စစ်တပ်များ မရောက်လာသေးမီမှာပင် ကျိယန်ကမ္ဘာရှိ ကျင့်ကြံသူ အများအပြားမှာ ထို မိုးပျံလှေများ တိုက်မိမှုကြောင့် သေဆုံးကြတော့သည်။

လူတိုင်းသည် မိမိတို့ ထွက်ပြေးလွတ်မြောက်နိုင်ရန်၊ နောက်ကျကျန်ခဲ့သူများက တခြားကမ္ဘာမှ ကျူးကျော်သူအား နှောင့်နှေးစေရန်နှင့်၊ သူတို့အတွက် ကမ္ဘာ့တံခါး တည်ဆောက်ဖို့ အချိန်ပို ရရှိစေရန်တို့ကိုသာ တွေးတောနေကြသည်။

ဤကစဉ့်ကလျား မြင်ကွင်းကို မြင်တွေ့ရသောအခါ နန်းကုန်းယွဲ့ဟွာ အလွန်စိတ်မချမ်းမသာ ဖြစ်သွားသည်။ သူမသည် မကြာသေးမီကမှ ထီးနန်းကို သိမ်းပိုက်နိုင်ခဲ့ခြင်း ဖြစ်သည်။ ယခု နှစ်အနည်းငယ်သာ ကြာပြီးအချိန်မှာပင် သူမ၏ ထီးနန်းကို ပြန်လည် လက်လွှတ် ဆုံးရှုံးရတော့မည် ဖြစ်သည်။

သူမက နန်းကုန်းချင်ရ ထံသို့ လှမ်းကြည့်လိုက်ပြီးနောက် သူမထံသို့ စိတ်အာရုံဖြင့် သတင်းစကား ပေးပို့လိုက်သည်။

“ချင်ရ။ အခြေအနေက ငါတို့ ထိန်းချုပ်နိုင်စွမ်းထက် ကျော်လွန်သွားပြီ။ ငါတို့ ဒီနေရာကနေ ထွက်သွားမှ ဖြစ်မယ်။ ငါနဲ့ လိုက်ခဲ့ပါ။ ငါတို့ နှစ်ယောက် ကမ္ဘာ့တံခါးကို အတူတူ တည်ဆောက်ရင် ပိုမြန်လိမ့်မယ်။”

ယခင်အတိတ်ကာလက မိစ္ဆာမ နန်းကုန်းချင်ရက သူမ၏ ညီမအရင်း ဖြစ်ကြောင်း အခြားသူများ သိသွားမည်ကို နန်းကုန်းယွဲ့ဟွာ အလွန် စိုးရိမ် ကြောက်ရွံ့ခဲ့ဖူးသည်။

သို့သော် ယခုတော့ အခြေအနေများ လုံးဝ ပြောင်းလဲသွားခဲ့ပြီ ဖြစ်သည်။ ကျိယန်ကမ္ဘာ ပျက်စီးခြင်းက နီးကပ်လာနေသောကြောင့် ထိုအထင်အမြင်များကို ဂရုစိုက်နေရန် မလိုအပ်တော့ပေ။

သူတို့ ကျိယန်ကမ္ဘာမှ ထွက်ခွာသွားသည်နှင့်တစ်ပြိုင်နက် သူတို့၏ ဂုဏ်ပကာသနများနှင့် ပိုင်ဆိုင်မှုများအားလုံးသည် အတိတ်တွင် ကျန်ရစ် ပျောက်ကွယ်သွားမည် ဖြစ်သည်။ ကမ္ဘာသစ်တစ်ခုသို့ ရောက်ရှိသွားခြင်းသည် အရာအားလုံးကို အစမှ ပြန်လည် စတင်ရမည်ဟု အဓိပ္ပာယ်ရ၏။ ထိုအချိန် အခြားသူများ၏ ကဲ့ရဲ့ ဝေဖန်မှုများကို စိုးရိမ်ပူပန်နေရန် မလိုအပ်တော့ချေ။

နန်းကုန်းယွဲ့ဟွာ၏ စိတ်အာရုံ သတင်းစကားကို လက်ခံရရှိသောအခါ နန်းကုန်းချင်ရက ချက်ချင်းပင် သူမထံသို့ ဦးခေါင်း လှည့်လိုက်ပြီးနောက်

“ကောင်းပြီ”

ဟု စိတ်အာရုံဖြင့် ပြန်လည် တုံ့ပြန်လိုက်သည်။

မကြာမီပင် နန်းကုန်းယွဲ့ဟွာနှင့် နန်းကုန်းချင်ရတို့ စီးနင်းလိုက်ပါလာသော မိုးပျံလှေများသည် ကျိရှောင်နိုင်ငံတော် တည်ရှိရာ အရပ်ဆီသို့ အလျင်အမြန် ပျံသန်းထွက်ခွာသွားကြသည်။

အဝေးတစ်နေရာမှ အခြေအနေကို လေ့လာ ကြည့်ရှုနေရင်း ကျိယန်ကမ္ဘာ၏ အင်အားစုများ ဤကဲ့သို့ အလွယ်တကူ ပြိုကွဲကာ ထွက်ပြေးသွားကြသည်ကို မြင်သောအခါ သူ၏ နှုတ်ခမ်းထောင့်၌ ပေါ်လာသော အပြုံးအနည်းငယ်ကို လုချန်း မထိန်းချုပ်နိုင်ခဲ့ပေ။

ဤအခြေအနေသည် သူ မျှော်လင့်ထားသည့် အတိုင်း ဖြစ်သည်။ ကောင်းကင်နတ်ဆိုးကို အပြတ်အသတ် အနိုင်ယူ ချေမှုန်းလိုက်နိုင်သည်နှင့် ကျိယန်ကမ္ဘာ၏ အင်အားစုများ ကြောက်ရွံ့တုန်လှုပ်သွားကြမည်မှာ သေချာသည်။

ဥပဒေနိယာမ အလုံးစုံ နယ်ပယ်အဆင့်မှ အစွမ်းထက် ကျင့်ကြံသူများ ကမ္ဘာ့တံခါးမှတစ်ဆင့် ကျိယန်ကမ္ဘာမှ ထွက်ပြေးသွားကြခြင်းကို သူနည်းနည်းမှ ဂရုမစိုက်ပေ။ အမှန်တကယ်တော့ ဤကမ္ဘာ့ထိပ်တန်းအင်အားစု ခေါင်းဆောင်များ ထွက်ပြေးသွားခြင်းက သူ့အတွက် ကျိယန်ကမ္ဘာတစ်ခုလုံးကို အုပ်ချုပ် သိမ်းပိုက်ရန် ပို၍ပင် လွယ်ကူသွားစေသည်။

ထို့ပြင် ကြီးမားသော ခုခံမှုများ မရှိပါက ကျိယန်ကမ္ဘာတစ်ခုလုံးကို သိမ်းပိုက်ရန် အချိန်နှင့် အားစိုက်ထုတ်မှု များစွာ လိုအပ်တော့မည် မဟုတ်‌ပေ။ တကယ့်တော့ အင်အားအကြီးဆုံးသူများ ထွက်ပြေးသွားကြစေရန် သူ မျှော်လင့်နေခဲ့ခြင်းဖြစ်သည်။ သူတို့ထွက်ပြေးဖို့ ကမ္ဘာ့တံခါး တည်ဆောက်နိုင်မည့် အခွင့်အရေးနှင့် အချိန်ကို သူတို့အား တမင်တကာ ပေးရန်ပင် အစီအစဉ် ရှိခဲ့သည်။

ထိုအချိန်တွင် လနက်မြို့ကြီးတစ်ခုလုံးသည် လုံးဝ ကစဉ့်ကလျား ဖြစ်နေခဲ့သည်။ ကောင်းကင်နတ်ဆိုးကြီးသည် ဓားချက်တစ်ချက်တည်းဖြင့် ပျက်စီးသွားခဲ့ရပြီး ကျိယန်ကမ္ဘာ၏ ထိပ်တန်း အင်အားစုများအားလုံးပင်လျှင် ကြောက်လန့်တကြား ထွက်ပြေးနေကြပြီ ဖြစ်သည်။

ဤအဖြစ်အပျက်က တခြားကမ္ဘာမှ ကျူးကျော်သူများ၏ အင်အားသည် ကျိယန်ကမ္ဘာ၏ စုပေါင်း အင်အားထက် အဆမတန် သာလွန်နေကြောင်းကို ရှင်းလင်းစွာ သက်သေပြနေသည့် လက္ခဏာပင် ဖြစ်သည်။

လနက်မြို့မှ သာမန် ကျင့်ကြံသူများလည်း ထွက်ပြေးလွတ်မြောက်ရာ လမ်းကြောင်းများဆီသို့ အသီးသီး စတင် ထွက်ခွာသွားကြသည်။ မကြာမီပင် တစ်ချိန်က အလွန်စည်ကားခဲ့သော မြို့ကြီးထဲ၌ အိုမင်းမစွမ်းသူများ၊ အားနည်းသူများ၊ နာမကျန်းသူများနှင့် မသန်စွမ်းသူများသာ ကျန်ရစ်တော့သည်။

ကောင်းကင်ယံတွင် အစုလိုက်အပြုံလိုက် အလျင်အမြန် ထွက်ပြေးနေကြသော ကျင့်ကြံသူများကို ငေးကြည့်နေရင်း ကျိချိုးယုတစ်ယောက် ထိုနေရာမှာပင် ကြက်သေသေကာ ရပ်တန့်နေခဲ့သည်။

ဒါဆို... ကျိယန်ကမ္ဘာကြီး... အမှန်တကယ်... ကျဆုံးသွား... ခဲ့လေပြီ။

……………….