လီချင်းနှင့် ပြန်လည်တွေ့ဆုံခြင်း...

Vol. 49 Ch. 724

" ငါ ဖြည်းဖြည်းချင်းသွားရမယ်။ " လင်းယွမ်က သူ၏ စိတ်ကို လျင်မြန်စွာ ထိန်းချုပ်လိုက်သည်။

" အစောက ရှာဖွေတဲ့ နည်းလမ်းတွေက နတ်ဆိုးချောက်နက်က လာတာပဲ။ နတ်ဆိုးဘိုးဘေးဆီက ဖြစ်နိုင်လား။ " လင်းယွမ်က တွေးလိုက်သည်။

အချိန်လေဟာနယ်အပေါ် သူ၏ နားလည်မှုဖြင့် အခြားသူများ၏ ထောက်လှမ်းမှုများကို သိနိုင်ပြီး ပြန်လည်ထောက်လှမ်းခြင်းနှင့် ပစ်မှတ်ထားခြင်းတို့ကိုပင် လုပ်ဆောင်နိုင်သည်။

" ငါ နတ်ဆိုးဧကရာဇ်ခြောက်ပါးကို သတ်ခဲ့လို့ နတ်ဆိုးဘိုးဘေးက သတိထားမိသွားတာဖြစ်နိုင်တယ်။ " လင်းယွမ်က စိုးရိမ်ခြင်းမရှိပေ။

သူက အင်မော်တယ်ကမ္ဘာသို့ ရောက်ချိန်တွင် အားနည်းနေဆဲ ဖြစ်သောကြောင့် အင်မော်တယ်ဘိုးဘေးနှင့် နတ်ဆိုးဘိုးဘေးတို့ကို သတိထားခဲ့သည်။ သို့သော် ယခု နတ်ဆိုးဘိုးဘေးက နည်းလမ်းဆယ်ခုကျော်ကို အသုံးပြုခဲ့သော်လည်း လင်းယွမ်ကို ရှာဖွေနိုင်ခြင်းမရှိခဲ့ပေ။

" နတ်ဆိုးတွေကို ပြန်ဆုတ်ခိုင်းလိုက်တယ်။ တော်တော်သတိကြီးတာပဲ။ " လင်းယွမ်က အင်မော်တယ်မြို့တော်များကို တစ်ချက်ကြည့်ရုံနှင့် မြင်ခဲ့ပြီး သူ၏ ခေါင်းကို ခါလိုက်သည်။

" သူတို့က ငါနဲ့တွေ့ချင်တာလား။ " လင်းယွမ်က ယွင်ကျန်းဇီ၏ တင်ပြချက်ကို ရရှိလိုက်သည်။

ခန်းမထဲရှိ ပလ္လင်ပေါ်တွင် လင်းယွမ်၏ ပုံရိပ်ကပေါ်လာသည်။ မြို့သခင်နှင့် အခြားသူများကလည်း ရောက်ရှိလာကြသည်။

" သခင်ရဲ့ အကူအညီအတွက် အရမ်းကျေးဇူးတင်ပါတယ်။ သခင်သာမရှိရင် အင်မော်တယ်မြို့တော်က ပျက်ဆီးသွားလိမ့်မယ်။ " မြို့သခင်က လေးစားစွာ ပြောလိုက်သည်။

" အဲ့ဒါက သာမန်ကိစ္စတစ်ခုပါပဲ။ " လင်းယွမ်က တည်ငြိမ်စွာ ပြောလိုက်သည်။ ထိုနတ်ဆိုးခြောက်ပါးက သူ၏ ကျင့်ကြံမှုကို နှောက်ယှက်ခဲ့သောကြောင့် ရှင်းလင်းခဲ့ခြင်းဖြစ်သည်။

" ပြီးတော့ အခြားအင်မော်တယ်မြို့တော်က နတ်ဆိုးတွေလည်း ဆုတ်ခွာသွားကြပြီ။ " မြို့သခင်က သတိထားပြီးပြောလိုက်သည်။

" အဲ့ဒါက နတ်ဆိုးဘိုးဘေးရဲ့ အမိန့်ပဲ။ " လင်းယွမ်က ပြောလိုက်သည်။

လင်းယွမ်၏ စွမ်းအားက နတ်ဆိုးဧကရာဇ်များနှင့် နတ်ဆိုးများအားလုံးကို ချေမှုန်းနိုင်သော်လည်း သူတို့ကို အမိန့်ပေးနိုင်ခြင်းမရှိပေ။ နတ်ဆိုးဘိုးဘေးသာ နတ်ဆိုးများအားလုံးကို ဆုတ်ခွာရန် အမိန့်ပေးနိုင်လေသည်။

" နတ်ဆိုးဘိုးဘေးရဲ့ အမိန့်လား..." မြို့သခင်က တံတွေးများ မျိုချလိုက်သည်။

လင်းယွမ်က ၎င်းကို ရှင်းရှင်းလင်းလင်း မပြောခဲ့သော်လည်း နတ်ဆိုးဘိုးဘေးကို ရည်ညွှန်းသော လေသံအရ အဆင့်တူ ပုံစံမျိုးဖြစ်နေသည်။

" မှန်တယ်။ " လင်းယွမ်က လူတိုင်းကို ငုံ့ကြည့်ပြီး ရုတ်တရက် ပြောလိုက်သည်။ " ငါ့ကို ကူညီပြီး သိုင်းတာအိုကို ဖြန့်ဝေပေးပါ။ ဒီနေ့ကစပြီး သိုင်းတာအိုကျင့်ကြံသူအားလုံးက ငါ့ရဲ့ မျိုးနွယ်ဝင်တွေပဲ။ "

လင်းယွမ်က မြို့သခင်နှင့် အခြားသူများကို တွေ့ဆုံရသည့် အဓိကအကြောင်းရင်းမှာ ထိုကိစ္စကြောင့်သာဖြစ်သည်။ သိုင်းတာအိုဆင့်ကဲပြောင်းလဲခြင်းလမ်းစဉ်ကို ဖြန့်ဝေရန်အတွက် မြို့သခင်နှင့် အခြားခေါင်းဆောင်များ တာဝန်ယူပေးခြင်းက အထိရောက်ဆုံး နည်းလမ်းဖြစ်သည်။ အနည်းဆုံးတော့ ရွှမ်ထျန်းအင်မော်တယ်နယ်မြေတွင် သိုင်းတာအိုကျင့်ကြံခြင်းစနစ်က ပျံ့နှံ့သွားပေလိမ့်မည်။

အချိန်လေဟာနယ်၏ သတ္တမအဆင့်ကို ရောက်ရှိပြီးနောက် လင်းယွမ်က အင်မော်တယ်ကမ္ဘာတွင် စိုးရိမ်စရာမရှိတော့ဘဲ သိုင်းတာအိုကျင့်ကြံခြင်းစနစ်ကို ဖြန့်ဝေနိုင်ပြီဖြစ်သည်။ အင်မော်တယ်နယ်မြေ ၃၃ ခုက ကျယ်ပြောလှပြီး သိုင်းတာအိုသာ ထိုနေရာတွင် ပျံ့နှံ့သွားလျှင် လင်းယွမ်၏ ကြီးမြတ်သူအဆင့်သို့ တက်လှမ်းခြင်းအတွက် များစွာ အထောက်အကူပြုပေလိမ့်မည်။

လွန်ခဲ့သော ရာစုနှစ်များကတည်းက ထိုက်ယင်မူလစိတ်ဝိညာဉ်က သိုင်းတာအိုကို လျို့ဝှက်စွာ ဖြန့်ဝေနေခဲ့သည်။ ထိုဖြန့်ဝေခြင်းက လျို့ဝှက်စွာ လုပ်ဆောင်ခြင်းဖြစ်ပြီး ထိုက်ယင်မူလစိတ်ဝိညာဉ်ကလည်း အခွင့်အရေးရမှ အထောက်အကူပေးခဲ့ခြင်းဖြစ်သည်။

သို့သော် အင်မော်တယ်ကျင့်ကြံခြင်းစနစ်၏ လွှမ်းမိုးမှုအောက်တွင် သိုင်းတာအိုကျင့်ကြံခြင်းစနစ်ကို ဖြန့်ဝေခြင်းက ထိရောက်မှုမရှိလှပေ။ မည်သို့ပင် ဖြစ်စေ အင်မော်တယ်ဘိုးဘေး၏ ဦးဆောင်မှုအောက်တွင် သက်ရှိများက အင်မော်တယ်ကျင့်ကြံခြင်းစနစ်ကိုသာ ဦးစားပေးရွေးချယ်ကြပေလိမ့်မည်။

" သိုင်းတာအိုဖြန့်ဝေမှုက နှေးနေတုန်းပဲ။ " လင်းယွမ်က တွေးလိုက်သည်။

လင်းယွမ် အင်မော်တယ်ကမ္ဘာသို့ မရောက်မီက သိုင်းတာအိုပင်မရှိခဲ့ပေ။ သိုင်းတာအိုကို အစမှ ဖွံ့ဖြိုးတိုးတက်ရန်အတွက် ကြိုးစားအားထုတ်မှုသာမက အချိန်များစွာ လိုအပ်သည်။ ကျင့်ကြံသူတိုင်းက လင်းယွမ်ကဲ့သို့ မဟုတ်ကြပေ။ ထူးချွန်သော သိုင်းတာအိုပါရမီရှင်များ ရှိနေလျှင်တောင် အထွတ်အထိပ်သို့ တက်လှမ်းရန်အတွက် မျိုးဆက်များစွာ ကြာမြင့်ပေလိမ့်မည်။

" တကယ်တော့ အင်မော်တယ်ကမ္ဘာမှာ သိုင်းတာအိုရဲ့ အခြေခံမရှိတာတော့ မဟုတ်ဘူး။ " လင်းယွမ်က ဦးတည်ရာတစ်ခုသို့ ကြည့်လိုက်စဉ် သူ၏ စိတ်ထဲသို့ အတွေးတစ်ခု ဝင်ရောက်လာသည်။

ထိုနေရာက အင်မော်တယ်ကမ္ဘာ၏ အောက်ရှိကမ္ဘာများထဲမှ တစ်ခုဖြစ်သော စိတ်ဝိညာဉ်ကမ္ဘာ၏ တည်နေရာဖြစ်သည်။ လင်းယွမ်က ရှစ်ကြိမ်မြောက် ဆင်းသက်မှုတွင် သိုင်းတာအိုကို စိတ်ဝိညာဉ်တွင် အခြေချကာ အမြစ်တွယ်စေခဲ့သည်။ သိုင်းတာအိုကို ချောမွေ့စွာ တိုးတက်စေရန်အတွက် ပြင်ဆင်မှုများစွာ ပြုလုပ်ခဲ့သည်။ စိတ်ဝိညာဉ်ကမ္ဘာတွင် သိုင်းတာအိုကျင့်ကြံသူများက သိုင်းဘုရားကျောင်းကိုပင် တည်ထောင်ထားခဲ့ကြသည်။

စိတ်ဝိညာဉ်ကမ္ဘာနှင့် ပင်မစကြာဝဠာကြား အချိန်စီးဆင်းမှုကို တွက်ချက်ကြည့်လျှင် လင်းယွမ်၏ ရှစ်ကြိမ်မြောက် ဆင်းသက်မှုပြီးဆုံးချိန်မှစ၍ ယခုအချိန်ထိ စိတ်ဝိညာဉ်ကမ္ဘာတွင် နှစ်ပေါင်းတစ်သန်းကုန်လွန်ခဲ့ပြီးဖြစ်သည်။

" အခု စိတ်ဝိညာဉ်ကမ္ဘာမှာ သိုင်းတာအိုက ကောင်းကောင်းဖွံ့ဖြိုးတိုးတက်နေပုံပဲ။ " လင်းယွမ်၏ အကြည့်က အချိန်လေဟာနယ်အလွှာများကို ထိုးဖောက်ပြီး စိတ်ဝိညာဉ်ကမ္ဘာကို ခဏ ကြည့်ရှုလေ့လာခဲ့သည်။

လင်းယွမ်က အချိန်လေဟာနယ်၏ သတ္တမအဆင့်ကို အားမကိုးလျှင်တောင် စိတ်ဝိညာဉ်ကမ္ဘာမှ သိုင်းတာအိုဖွံ့ဖြိုးတိုးတက်မှုကို ခံစားနိုင်သည်။ သိုင်းတာအို၏ ဘိုးဘေးအနေဖြင့် လင်းယွမ်က သိုင်းတာအိုကျင့်ကြံသူများ၏ အလင်းရောင်ကို ခံစားနိုင်သည်။

လက်ရှိစိတ်ဝိညာဉ်ကမ္ဘာ၏ ငါးဆယ်ရာခိုင်နှုန်းကျော်က အလင်းစက်များဖြင့် ဖုံးလွှမ်းနေသည်။ ဆိုလိုသည်မှာ သိုင်းတာအိုကျင့်ကြံခြင်းစနစ်က ကြီးမားသော အဖွဲ့အစည်းကြီးတစ်ခုအဖြစ် ကြီးထွားလာပြီး အင်မော်တယ်ကျင့်ကြံခြင်းစနစ်ကိုပင် ဖိနှိပ်နိုင်စွမ်းရှိနေသည်။

" လီချင်းနဲ့ အခြားသူတွေ ကောင်းကောင်းလုပ်နေပုံပဲ။ "

လင်းယွမ်က ခေါင်းညိမ့်လိုက်သည်။ သူက ရှစ်ကြိမ်မြောက် ဆင်းသက်မှုမပြီးဆုံးမီ သူ၏ တပည့် လီချင်းကို သိုင်းတာအို၏ အဋ္ဌမအလွှာသို့ အတင်းအကျပ် ကျင့်ကြံစေခဲ့သော်လည်း အဋ္ဌမအလွှာက ကပ်ဘေးကျော်လွှားခြင်းအဆင့်နှင့် ညီမျှရုံသာဖြစ်သည်။ လင်းယွမ်က သိုင်းတာအို၏ ဆိုးတက်မှုကို လီချင်းနှင့် အခြားသူများအပေါ်တွင်သာ မှီခိုနိုင်သည်။

" ငါ စိတ်ဝိညာဉ်ကမ္ဘာက သိုင်းတာအိုကျင့်ကြံသူတွေကို ဒီကိုခေါ်ဆောင်လာနိုင်မယ်ဆိုရင် အင်မော်တယ်ကမ္ဘာမှာ သိုင်းတာအိုဖြန့်ဝေဖို့ အခက်အခဲကို လျော့ချနိုင်လိမ့်မယ်။ " လင်းယွမ်က တွေးလိုက်၏။

မည်သည့်လုပ်ငန်းမဆို အစမှစတင်ခြင်းက အခက်ခဲဆုံးဖြစ်သည်။ ထိုက်ယင်မူလစိတ်ဝိညာဉ်က သိုင်းတာအိုကို လျို့ဝှက်စွာ ဖြန့်ဝေခဲ့သော်လည်း သိုင်းတာအိုကျင့်ကြံသူများက သိန်းဂဏန်းမျှသာဖြစ်ပြီး အသန်မာဆုံးမှာ ဆဋ္ဌမအလွှာဖြစ်သည်။

စိတ်ဝိညာဉ်ကမ္ဘာတွင် နှစ်ပေါင်းတစ်သန်းကြာ တိုးတက်မှုဖြင့် သိုင်းတာအိုအဋ္ဌမအလွှာ တစ်ထောင်ကျော်ရှိပြီး သတ္တမနှင့် ဆဋ္ဌမအလွှာများက မရေတွက်နိုင်အောင် ရှိကြသည်။

" အချိန်လေဟာနယ်အပေါ် ငါ့ရဲ့ နားလည်မှုနဲ့ဆို ပြဿနာမရှိလောက်ဘူး။ "

အမှန်တကယ်တွင် စိတ်ဝိညာဉ်ကမ္ဘာမှ အင်မော်တယ်ကမ္ဘာသို့ သွားရန် နည်းလမ်းတစ်ခု ရှိသည်။ ၎င်းမှာ နဝမကောင်းကင်ဘုံသို့သွားပြီး အထက်သို့ ပျံသန်းလာရန်ဖြစ်သည်။ ကံကောင်းလျှင် အင်မော်တယ်ကမ္ဘာသို့ တက်လှမ်းနိုင်ပေလိမ့်မည်။ သို့သော် လင်းယွမ်ကြောင့် နဝမကောင်းကင်ဘုံးက ဖြတ်သန်းမရနိုင်သော နေရာဖြစ်လာသည်။ ကျင့်ကြံသူများက အဋ္ဌမကောင်းကင်ဘုံကိုသာ ဖြတ်သန်းနိုင်ပြီး နဝမကောင်းကင်ဘုံကို အုပ်ချုပ်နေသော လင်းယွမ်ကို ရင်ဆိုင်ရသောအခါ လုံးဝ နင်းခြေခံရပေလိမ့်မည်။

" စကြစို့ " လင်းယွမ်က စိတ်အသိမျှင်တစ်ခုကို ထုတ်လွှတ်ပြီး စိတ်ဝိညာဉ်ကမ္ဘာသို့ ပို့လွှတ်လိုက်သည်။

အဋ္ဌမကောင်းကင်ဘုံ။

နဝမကောင်းကင်ဘုံ၏ ဝင်ပေါက်တွင် လီချင်းက လေးနက်စွာ ထိုင်နေသည်။

" နှစ်ပေါင်းတစ်သန်းကြာတာတောင် ငါက အဲ့ဒီအချိန်တုန်းက ဆရာ့ထက် အများကြီး နိမ့်ကျနေတုန်းပဲ။ " လီချင်းက နဝမကောင်းကင်ဘုံ၏ ဝင်ပေါက်ကို ကြည့်လိုက်သည်။

နှစ်ပေါင်းတစ်သန်းကြာပြီးနောက် သူမက အဋ္ဌမအလွှာ အထွတ်အထိပ်သို့ ရောက်ရှိခဲ့ပြီး လင်းယွမ်ချန်ခဲ့သော လျို့ဝှက်နည်းစနစ်များကိုလည်း ပြည့်စုံသည်အထိ ကျွမ်းကျင်သွားခဲ့သည်။ ထို့ကြောင့် လီချင်းက စိတ်ဝိညာဉ်ကမ္ဘာတွင် အသန်မာဆုံးဖြစ်လာခဲ့ပြီး ရှေးဟောင်း ကပ်ဘေးကျော်လွှားခြင်းအဆင့်များထက်ပင် သာလွန်ခဲ့သည်။

သူမက ပထမကောင်းကင်ဘုံမှ အဋ္ဌမကောင်းကင်ဘုံသို့ ရောက်လာပြီး နဝမကောင်းကင်ဘုံသို့ ဝင်ရောက်နိုင်ခဲ့သည်။ သို့သော် နဝမကောင်းကင်ဘုံတွင် လင်းယွမ်၏ ပုံရိပ်နှင့် ရင်ဆိုင်ရသောအခါ သူမက လုံးဝ ဖိနှိပ်ခံခဲ့ရသည်။

" ဆရာက အင်မော်တယ်ကမ္ဘာမှာ ဘယ်လိုနေလဲမသိဘူး။ " လီချင်းက လင်းယွမ်ကို သတိရသွားသည်။

" ဟင် "

လီချင်း၏ အတွေးများ ပျံ့နှံ့နေချိန်တွင် အချိန်လေဟာနယ်လှိုင်းများ ထွက်ပေါ်လာပြီး ခမ်းနားသော ပုံရိပ်တစ်ခုက အချိန်လေဟာနယ်ကို ဖြတ်သန်းကာ အဋ္ဌမကောင်းကင်ဘုံသို့ ရောက်ရှိလာသည်။

လီချင်း၏ စိတ်ထဲတွင် ရိုသေလေးစားမှုများက ပြည့်နှက်လာပြီး ခမ်းနားသော ပုံရိပ်ကို ကြည့်ကာ မျက်ရည်များဝဲလာခဲ့သည်။

" ဆရာ.... "

" ငါ့အပေါ် ငြင်းဆန်မှုကိုတောင် ခံစားရတာပဲ။ " လင်းယွမ်၏ စိတ်အသိမျှင်တစ်ခုက စိတ်ဝိညာဉ်ကမ္ဘာသို့ ဆင်းသက်လာခြင်းဖြစ်ပြီး သူက ကမ္ဘာတစ်ခုလုံး၏ ကြောက်ရွံ့မှုကို ခံစားလိုက်ရသည်။

စိတ်အသိအနည်းငယ်သာ ဖြစ်သော်လည်း လင်းယွမ်သာ ဆန္ဒရှိလျှင် စိတ်ဝိညာဉ်ကမ္ဘာကို အလွယ်တကူ ဖျက်ဆီးပစ်နိုင်လေသည်။ အချိန်လေဟာနယ်အပေါ် ကျွမ်းကျင်မှုဖြင့် သူက စိတ်ဝိညာဉ်ကမ္ဘာ၏ အချိန်လေဟာနယ်ကို ဖြိုခွဲပစ်နိုင်သည်။