လွန်ခဲ့သောနှစ်သုံးထောင်က ကပ်ဘေးကြီး၏အမှန်တရား။

ရက်အနည်းငယ် ကြာပြီးနောက်။

သွေးအရိပ်ဘိုးဘေး၏ လိုဏ်ဂူမှ အဖြစ်အပျက်နှင့် ပတ်သက်သောသတင်းသည် မုန်တိုင်းတစ်ခုနှယ် အင်မော်တယ်ရှားဂိုဏ်းထံသို့ ရောက်ရှိလာခဲ့ပြီး၊ ဂိုဏ်းအတွင်းမှ ကျင့်ကြံသူများနှင့် အကြီးအကဲများစွာထံ ပျံ့နှံ့သိရှိသွားတော့သည်။

"ခင်ဗျား ဘာပြောလိုက်တယ်.. သွေးအရိပ်ဘိုးဘေးရဲ့ လိုဏ်ဂူက အတုကြီးလား.. အဲ့ဒီနေရာက တကယ်တော့ နတ်ဆိုးတွေကို ချိပ်ပိတ်ထားတဲ့ ရှေးဟောင်းနေရာတစ်ခု ဟုတ်လား…"

အခြေတည်အဆင့်အကြီးအကဲတစ်ဦးမှာ သူကြားလိုက်ရသည်ကို မယုံနိုင်သကဲ့သို့ ထိတ်လန့် မှင်တက်သွားသည်။

"ဟုတ်တယ်…"

အခြား အခြေတည်အဆင့်အကြီးအကဲတစ်ဦးက ခေါင်းညိတ်လိုက်သည်။

"သွေးအရိပ်ဘိုးဘေးရဲ့ လိုဏ်ဂူ တားမြစ်အစီအရင် ကျိုးပေါက်သွားတုန်းက ရွှေအမြုတေ ဆရာသခင်အများကြီး ဝင်သွားကြတယ်.. ဘယ်သူက ထင်မှာလဲ.. အထဲမှာ ချိပ်ပိတ်ခံထားရတဲ့ နတ်ဆိုးတစ်ကောင် တကယ်ရှိနေခဲ့တာ.. ဒီနတ်ဆိုးက ရုတ်တရက် ရန်လိုလာပြီး ဝိညာဉ်သန္ဓေသားအဆင့်ရဲ့ ခွန်အားမျိုး ပိုင်ဆိုင်ထားတယ်… ရလဒ်ကတော့ တွေးသာကြည့်တော့.. ရွှေအမြုတေ ဆရာသခင်တွေနဲ့ အခြေတည်အဆင့်ကျင့်ကြံသူ အများကြီး အဲ့ဒီနတ်ဆိုးလက်ချက်နဲ့ သေကုန်ကြတာပေါ့.. ရွှေအမြုတေ ဆရာသခင်နဲ့ အခြေတည်အဆင့်ကျင့်ကြံသူ လက်တစ်ဆုပ်စာလောက်ပဲ အသက်ရှင် လွတ်မြောက်လာနိုင်ခဲ့တယ်.. အခု အဲ့ဒီနေရာက တားမြစ်နယ်မြေ ဖြစ်သွားပြီ.. ဘယ်ကျင့်ကြံသူမှ အနားမကပ်ရဲကြတော့ဘူး…"

သူကြားသိခဲ့ရသော သတင်းကို အတိုချုံး ပြန်လည်ပြောပြလိုက်သည်။

"နတ်ဆိုးတွေကို ချိပ်ပိတ်ထားတဲ့ ရှေးဟောင်းနေရာ ဟုတ်လား…"

"ဒါပေမဲ့ အရင်တုန်းက ဒါ သွေးအရိပ်ဘိုးဘေးရဲ့ လိုဏ်ဂူ အစစ်အမှန်ဖြစ်ကြောင်း သက်သေ အများကြီး ရှိခဲ့တာပဲ.."

"ဘာတွေ ဘယ်လိုဖြစ်ကုန်တာလဲ…"

အစီအရင်တောင်ထွတ်မှ ဆရာသခင် ယောင်ဝမ်သည် ဤကဲ့သို့သော အဖြစ်အပျက်မျိုး ဖြစ်ပွားလိမ့်မည်ဟု မယုံကြည်နိုင်ခဲ့ပေ။ အမှန်တကယ်တွင် သူတို့သည် ငတုံးများ မဟုတ်ကြချေ။

၎င်းသည် သွေးအရိပ်ဘိုးဘေး၏ လိုဏ်ဂူ ဖြစ်ကြောင်း သက်သေပြရန် လုံလောက်သော အထောက်အထားများ မရှိခဲ့ပါက၊ သူတို့ ဤမျှလောက် စွန့်စားခဲ့ကြမည် မဟုတ်ပေ။

"ငါ အတွင်းသတင်းတစ်ခု ကြားခဲ့တယ်…"

"လွန်ခဲ့တဲ့ နှစ်သုံးထောင်က ကပ်ဘေးကြီးက သွေးအရိပ်ဘိုးဘေးကြောင့် ဖြစ်ခဲ့တာလို့ ဆိုကြတယ်.."

"ဒီသွေးအရိပ်ဘိုးဘေးက သာမန် ဝိညာဉ်သန္ဓေသားအဆင့်ကျင့်ကြံသူတစ်ယောက် မဟုတ်ဘူး၊ သူက နတ်ဆိုးတစ်ကောင် ဝင်စားတာ ဖြစ်နိုင်ခြေအရမ်းများတယ်…"

"ဒါမှမဟုတ် သူက နတ်ဆိုးတစ်ကောင်ရဲ့ ထိန်းချုပ်မှုကို ခံခဲ့ရတာ ဖြစ်နိုင်တယ်.. ဒါကြောင့် သူက အင်မော်တယ်မြူခိုးကျွန်းအနှံ့ သတ်ဖြတ်မှုတွေ လုပ်ခဲ့ပြီးတော့.. ကြီးမားတဲ့ သေကြေပျက်စီးမှုတွေ ဖြစ်စေခဲ့တေပေါ့…"

"ကျုပ်တို့ အင်မော်တယ်ရှားဂိုဏ်းရဲ့ ဘိုးဘေးတွေက တခြား ဝိညာဉ်သန္ဓေသားအဆင့် ကျင့်ကြံသူတွေ အများကြီးနဲ့ ပူးပေါင်းပြီး သွေးအရိပ်ဘိုးဘေးကို ဝိုင်းဝန်း တိုက်ခိုက်ခဲ့ကြတယ်…"

"အဆုံးမှာတော့... ကြီးမားတဲ့ ပေးဆပ်မှုတစ်ခုနဲ့အတူ သွေးအရိပ်ဘိုးဘေး... ဒါမှမဟုတ်... နတ်ဆိုးကို ချိပ်ပိတ်နိုင်ခဲ့တာပဲ…"

ဆေးလုံးတောင်ထွတ်မှ တောင်ထွတ်သခင် မာချန်ကျွင်းက သူ ကြားသိခဲ့ရသော အတွင်းသတင်းကို လျှို့ဝှက်သောလေသံဖြင့် ထုတ်ဖော်ပြောကြားလိုက်သည်။

"ဟုတ်တယ်.. ကြားရတာတော့ အင်မော်တယ်မြူခိုးကျွန်းရဲ့ တစ်ခုတည်းသော စတုတ္တအဆင့် ဝိညာဉ်ကြောက အဲ့ဒီနတ်ဆိုးကြောင့် ညစ်ညမ်းသွားရတာတဲ့.."

"အင်မော်တယ်မြူခိုးကျွန်းမှာ မှော်ဆန်တဲ့ ကပ်ဘေးတစ်ခု မဖြစ်ပွားအောင် ကာကွယ်ဖို့ အင်မော်တယ်ရှားဂိုဏ်းရဲ့ ဘိုးဘေးတွေက အဲ့ဒီ စတုတ္တအဆင့် ဝိညာဉ်ကြောကို ဖျက်ဆီးပစ်ဖို့ ရွေးချယ်ခဲ့ကြတယ်တဲ့.."

"အဲ့ဒါက နောက်ဆုံးနည်းလမ်းပဲ…"

"ဘယ်သူက ထင်မှာလဲ.. အဲ့ဒီနောက်ပိုင်း ငါတို့ အင်မော်တယ်ရှားဂိုဏ်းက ဆုတ်ယုတ်သွားခဲ့ပြီး ဘယ်တော့မှ နလန် ပြန်မထူနိုင်ခဲ့တော့ဘူး…"

အခြား အခြေတည်အဆင့် အကြီးအကဲတစ်ဦးက လေးနက်စွာ ဝင်ပြောသည်။

သူသည်လည်း လွန်ခဲ့သော နှစ်သုံးထောင်က အင်မော်တယ်မြူခိုးကျွန်းအကြောင်း သတင်းအချို့ကို အပြင်မှ ကြားသိခဲ့ရသည်။

အင်မော်တယ်ရှားဂိုဏ်းတွင် ဤအချက်အလက်များကို မှတ်တမ်းတင်ထားခြင်း မရှိတော့သော်လည်း၊ အင်မော်တယ်မြူခိုးကျွန်း အပြင်ဘက်ရှိ အချို့သော ဝိညာဉ်သန္ဓေသားအဆင့် အင်အားစုများတွင်မူ မှတ်တမ်းများ ကျန်ရှိနေသေးပုံရသည်။

ဤသတင်းအချက်အလက်များသည် ရွှမ်ပေါင်မျှော်စင်မှ တမင်တကာ ဖွင့်ချလိုက်ခြင်းလည်း ဖြစ်သည်။

"ကံကောင်းတာကတော့.. ဂိုဏ်းချုပ်က သွေးအရိပ်ဘိုးဘေးရဲ့ လိုဏ်ဂူကို မသွားဖို့ ဇွတ်တားခဲ့တာပဲ… မဟုတ်လို့ကတော့.. ငါတို့ မသေရင်တောင် အင်မော်တယ်ရှားဂိုဏ်းတစ်ခုလုံး ကိစ္စတုံးသွားလောက်တယ်.."

အခြေတည်အဆင့် အကြီးအကဲတစ်ဦးမှာ အလွန်အမင်း ကျေးဇူးတင်နေမိသည်။

သူသည် သွေးအရိပ်ဘိုးဘေး၏ လိုဏ်ဂူကို စူးစမ်းရှာဖွေပြီး အတွင်းမှ ရတနာများကို ရယူရန် ဂိုဏ်းချုပ်ထံ စာရေးတင်ပြရန် ကြံရွယ်ခဲ့ဖူးသည်ကို သတိရမိသည်။ ကံကောင်းထောက်မစွာ၊ ဂိုဏ်းချုပ်သည် လူအများ၏အမြင်ကို အင်အားသုံး ခုခံကာကွယ်ခဲ့ပြီး၊ ဝိညာဉ်သန္ဓေသားအဆင့်လိုဏ်ဂူ၏ သွေးဆောင်မှုကို တွန်းလှန်ကာ အင်မော်တယ်ရှားဂိုဏ်းမှ ကျင့်ကြံသူများ ထိုလိုဏ်ဂူသို့ သွားရောက်ခြင်းမှ တားဆီးခဲ့သည်။

သို့မဟုတ်ပါက၊ ဤတစ်ကြိမ်တွင် အခြေတည်အဆင့် အကြီးအကဲမည်မျှ သေဆုံးသွားမည်ကို မည်သူ သိနိုင်မည်နည်း။

ဂိုဏ်းချုပ်ကဲ့သို့သော ရွှေအမြုတေ ဆရာသခင်ပင်လျှင် အသက်ရှင်လွတ်မြောက်နိုင်မည် မဟုတ်ပေ။ ထိုအခါ အင်မော်တယ်ရှားဂိုဏ်းသည် အမှန်တကယ်ပင် သမိုင်းတစ်ခုအဖြစ် ရောက်ရှိသွားနိုင်သည်။

"အမှန်အတိုင်း ပြောရရင်.. ဂိုဏ်းချုပ်က သွေးအရိပ်ဘိုးဘေးရဲ့ လိုဏ်ဂူမှာ ထူးဆန်းတာ တစ်ခုခု ရှိနေမှန်း ကြိုသိနေခဲ့တာလား… ဒါကြောင့် သူက သွေးအရိပ်ဘိုးဘေးရဲ့ လိုဏ်ဂူကို အမြဲတမ်း စိတ်မဝင်စားခဲ့တာပေါ့.. တခြားကျင့်ကြံသူတွေ သွားတာကိုတောင် တားဆီးခဲ့တာ ဖြစ်နိုင်မလား…"

တစ်စုံတစ်ယောက်က အလွန်သိချင်စွာ မေးလိုက်သည်။

မည်သို့ပင်ဆိုစေကာမူ၊ အတွင်းသတင်းကို မသိရှိဘဲနှင့် မည်သည့် ရွှေအမြုတေ ဆရာသခင်က ဝိညာဉ်သန္ဓေသားအဆင့် လိုဏ်ဂူ၏ သွေးဆောင်မှုကို တွန်းလှန်နိုင်မည်နည်း။

သူ ယုံကြည်သည်မှာ လန်ယွဲ့ရှီသည် ဝိညာဉ်သန္ဓေသားအဆင့် လိုဏ်ဂူရှိ လျှို့ဝှက်ချက်ကို သိရှိခဲ့ပြီး ဖြစ်သောကြောင့်သာ ဤသို့သော ရွေးချယ်မှုကို ပြုလုပ်ခဲ့ခြင်း ဖြစ်ရပေမည်။

"ပါးစပ်ပိတ်ထားစမ်း.. ဒီကိစ္စက မင်းတို့ ပေါ့ပေါ့ဆဆ ပြောလို့ရတဲ့ကိစ္စလား…"

"ဒီတစ်ခေါက် သွေးအရိပ်ဘိုးဘေးရဲ့ လိုဏ်ဂူက ရွှေအမြုတေ ဆရာသခင်တွေ အများကြီးကို သတ်ခဲ့ပြီး ရွှေအမြုတေ အင်အားစု အများကြီးကို ပျက်စီးစေခဲ့တယ်…"

"သူတို့သာ ဒီကိစ္စက ငါတို့ အင်မော်တယ်ရှားဂိုဏ်းက လုပ်တဲ့ ထောင်ချောက်လို့ ပြောနိုင်တဲ့ဆင်ခြေတစ်ခုခု ရှာတွေ့သွားရင်.. သူတို့အားလုံး ငါတို့ တံခါးဝကို လာခေါက်ကြတော့မှာ သေချာတယ်…"

"မင်းတို့အားလုံး ပါးစပ်ပိတ်ထားကြ…"

"ဒီကိစ္စက ငါတို့ အင်မော်တယ်ရှားဂိုဏ်းနဲ့ ဘာမှမဆိုင်ဘူး.. ငါတို့ကလည်း သားကောင်တွေပဲ.. နားလည်ကြလား.."

ဆေးလုံးတောင်ထွတ်မှ တောင်ထွတ်သခင် မာချန်ကျွင်းက မရေမတွက်နိုင်သော အင်မော်တယ်ရှားဂိုဏ်း ကျင့်ကြံသူများကို စိုက်ကြည့်ရင်း အလွန်လေးနက်စွာ ပြောလိုက်သည်။

"နားလည်ပါပြီ.. တောင်ထွတ်သခင်.."

ဤသို့ ကြားသောအခါ အင်မော်တယ်ရှားဂိုဏ်း ကျင့်ကြံသူများအားလုံး သဘောတူညီစွာ ခေါင်းညိတ်လိုက်ကြသည်။

သူတို့လည်း ဤကိစ္စ၏လေးနက်မှုကို သဘောပေါက်လိုက်ပြီး၊ သဘာဝအတိုင်း ပေါ့ပေါ့ဆဆ မပြောဆိုကြတော့ပေ။

မည်သို့ပင်ဖြစ်စေ၊ ဤတစ်ကြိမ်တွင် ရွှေအမြုတေ ဆရာသခင်များစွာ သေဆုံးခဲ့ရပြီး၊ အခြား အင်အားစုများ ကြီးမားစွာ နစ်နာခဲ့ရသည်။

ဤအချိန်တွင် အင်မော်တယ်ရှားဂိုဏ်းကို လက်ညှိုးထိုးသော မည်သည့် ကောလာဟလမဆို ထွက်ပေါ်လာပါက၊ အင်မော်တယ်ရှားဂိုဏ်းသည် လူတိုင်း၏ ပစ်မှတ် ဖြစ်သွားနိုင်ဖွယ် ရှိသည်။

ထိုအခါ အင်မော်တယ်ရှားဂိုဏ်းသည် ဤမျှ များပြားသော ရွှေအမြုတေအင်အားစုများထံမှ ဖိအားကို ကြံ့ကြံ့ခံနိုင်မည် မဟုတ်ပေ။

"ဒါပေမဲ့ ဆရာသခင်.. နတ်ဆိုးကို ချိပ်ပိတ်ထားတဲ့ ရှေးဟောင်းနေရာကရော.. ဘယ်လိုလုပ်မလဲ…"

"ကျွန်တော် မြင်တာတော့ အဲ့ဒီနတ်ဆိုးက ချိပ်ပိတ်တံဆိပ်ကနေ လွတ်မြောက်တော့မယ် ထင်တယ်.."

"ဒါသာ ချိပ်ပိတ်တံဆိပ်ကနေ လွတ်မြောက်သွားခဲ့ရင်.. ငါတို့ အင်မော်တယ်ရှားဂိုဏ်း ခုခံနိုင်မှာ မဟုတ်ဘူး…"

အခြေတည်အဆင့် အကြီးအကဲတစ်ဦးက စိုးရိမ်ပူပန်စွာ ပြောသည်။

ရွှေအမြုတေအင်အားစုများထံမှ ခြိမ်းခြောက်မှုများနှင့် နှိုင်းယှဉ်လျှင်၊ ထိုနတ်ဆိုးထံမှ ခြိမ်းခြောက်မှုက ပို၍ ကြီးမားသည်ဟု သူ ယုံကြည်သည်။

မည်သို့ပင်ဆိုစေကာမူ၊ ထိုနတ်ဆိုးသည် လက်တကမ်းအကွာတွင် ရှိနေပြီး မည်သည့်အချိန်တွင် လွတ်မြောက်လာမည်ကို မည်သူမျှ မသိနိုင်ပေ။

အကယ်၍ အမှန်တကယ် လွတ်မြောက်လာခဲ့ပါက သူတို့ ကြီးမားသော ဒုက္ခထဲသို့ သေချာပေါက် ကျရောက်သွားပေလိမ့်မည်။

အကြောင်းမှာ အင်မော်တယ်ရှားဂိုဏ်း၏ အခြေစိုက်စခန်းသည် ဤနေရာတွင် ရှိနေပြီး၊ ၎င်းကို ရွှေ့ပြောင်းရန် နည်းလမ်း မရှိသောကြောင့် ဖြစ်သည်။

"စိတ်မပူပါနဲ့… အချိန်တိုအတွင်းမှာတော့ ဒါက ခြိမ်းခြောက်မှုတစ်ခု ဖြစ်လာမှာ မဟုတ်သေးပါဘူး.."

"အဲ့ဒီနတ်ဆိုးအတွက် ချိပ်ပိတ်တံဆိပ်ကနေ လွတ်မြောက်ဖို့ဆိုတာ လွယ်တဲ့ကိစ္စ မဟုတ်ဘူး…"

"ဒါ့အပြင် ဒါက နှစ်ပေါင်းသုံးထောင်ကြာ ချိပ်ပိတ်ခံထားရတာ.. သူ့ရဲ့ အစွမ်းက အများကြီး အားနည်းသွားလောက်ပြီ…"

"အချိန်တိုအတွင်းမှာတော့ ငါတို့ကို ခြိမ်းခြောက်နိုင်မှာ မဟုတ်ဘူး.."

ဆေးလုံးတောင်ထွတ်မှ တောင်ထွတ်သခင် မာချန်ကျွင်းက ၎င်းတို့အား နှစ်သိမ့်ရန် ကြိုးစားလိုက်သည်။ ထိုမှသာ အင်မော်တယ်ရှားဂိုဏ်း ကျင့်ကြံသူများ ချက်ချင်းပင် စိတ်သက်သာရာ ရသွားကြသည်။

…

ဤအခိုက်အတန့်တွင်၊ အင်မော်တယ်ရှားတောင်ထွတ်၌။

လန်ယွဲ့ရှီ၊ ကျိပင်းယွီ၊ မုဇီယန်၊ ရှားကျင်းယန်နှင့် ကျိုးစွေ့တို့သည်လည်း သွေးအရိပ်ဘိုးဘေး၏ လိုဏ်ဂူမှ အဖြစ်အပျက်ကို သဘာဝအတိုင်း သိရှိနေကြသည်။

ဤအဖြစ်အပျက်ကို ကိုယ်တိုင် ကြုံတွေ့ခဲ့ရသော ကျိုးစွေ့ရှိနေသဖြင့်၊ သူတို့သည် အသေးစိတ်ကို ပို၍ပင် ကောင်းစွာ သိရှိနေကြသည်။

"ယောက်ျား... ရှင်ပြောတာက အဲ့ဒီနတ်ဆိုးက အရမ်း အန္တရာယ်များပြီး အနည်းဆုံး ဝိညာဉ်သန္ဓေသားအဆင့်ခွန်အား ရှိတယ် ဟုတ်လား.."

လန်ယွဲ့ရှီက အလွန် လေးနက်သော အမူအရာဖြင့် မေးလိုက်သည်။

ဝိညာဉ်သန္ဓေသားအဆင့်ရှိ နတ်ဆိုးတစ်ကောင်သည် အမှန်တကယ်ပင် ကြောက်မက်ဖွယ်ကောင်းလှပြီး၊ အင်မော်တယ်မြူခိုးကျွန်းတစ်ခုလုံးကို ရှင်းလင်းပစ်ရန် လုံလောက်ပေသည်။

"ဟုတ်တယ်"

ကျိုးစွေ့က ခေါင်းညိတ်လိုက်သည်။

"ငါ့ကိုယ်ပွားက အဝေးကနေပဲ အာရုံခံခဲ့ရပေမယ့်.. သူ့ရဲ့ အစွမ်းက သာမန်ရွှေအမြုတေ ဆရာသခင်တွေ ယှဉ်နိုင်တဲ့အရာ မဟုတ်ဘူးဆိုတာ သေချာတယ်.. ဒါက ဝိညာဉ်သန္ဓေသားအဆင့် ဘိုးဘေးတစ်ပါးနဲ့ သေချာပေါက် နှိုင်းယှဉ်နိုင်တယ်…"

"ဒါပေမဲ့ ဂိုဏ်းတစ်ခုလုံးကို ရွှေ့ပြောင်းပစ်ဖို့ကတော့ နည်းနည်း လွန်လွန်းမနေဘူးလား.."

လန်ယွဲ့ရှီက အနည်းငယ် တွန့်ဆုတ်စွာဖြင့် မေးလိုက်သည်။

သူမ တွန့်ဆုတ်နေမိသည်မှာ ဤအချက်ကြောင့်ပင် ဖြစ်သည်။

ဝိညာဉ်သန္ဓေသားအဆင့်လိုဏ်ဂူသည် သွေးနတ်ဆိုးသစ်ပင်ကို ချိပ်ပိတ်ထားသော နေရာ ဖြစ်ကြောင်း ကျိုးစွေ့ သိရှိသွားသောအခါ၊ ချက်ချင်းပင် ပြင်းထန်သော အန္တရာယ်ခံစားချက်တစ်ခု ရရှိခဲ့သည်။

အဘယ်ကြောင့်ဆိုသော်၊ အင်မော်တယ်ရှားဂိုဏ်းသည် ထိုသွေးနတ်ဆိုးသစ်ပင်နှင့် အလွန် နီးကပ်လွန်းနေသောကြောင့် ဖြစ်သည်။ အနည်းငယ်မျှသော ပေါ့ဆမှုတစ်ခုက ဂိုဏ်းတစ်ခုလုံးကို ပျက်သုဉ်းခြင်း ဆိုက်စေနိုင်သည်။

'ပညာရှိသည် အန္တရာယ်ရှိသော နံရံအောက်တွင် မရပ်။'ဟူသော ဆိုရိုးစကား ရှိသည်မဟုတ်လော။

သဘာဝအတိုင်း သူသည် အလွန်အမင်း အန္တရာယ်များသော ဤနေရာတွင် ဆက်လက်နေထိုင်လိုစိတ် မရှိတော့ပေ။ သွေးနတ်ဆိုးသစ်ပင်နှင့် ဝေးရာသို့ ချက်ချင်းထွက်ပြေးချင်ခဲ့သည်။