ကိုယ်ခန္ဓာ ပေါင်းစည်းခြင်းအဆင့် ပြီးပြည့်စုံခြင်း၊ ကောင်းကင် မိုးကြိုး ကိုယ်ခန္ဓာ တိုးတက်ခြင်း

ဤ အဆင့်မြင့် ရုပ်သေးသည် စစ်မှန်သော ကိုယ်ရည်ကိုယ်သွေးနှင့် အသိစိတ် မရှိသော်လည်း၊ နှိုင်းယှဉ်ချက်အရ ရှုပ်ထွေးသော အမိန့်များကို လုပ်ဆောင်နိုင်စွမ်း ရှိသည်။

ဥပမာအားဖြင့်၊ စုရှင်းသည် စစ်မှန်သော ဝမ်မူကို သူ့အစား အရောင်းအဝယ် လုပ်စေခဲ့ရာ သူသည် အရောင်းအဝယ်ကို ချောချောမွေ့မွေ့ လုပ်နိုင်ရုံသာမက သာမန်လူတစ်ဦးကဲ့သို့ ဈေးဆစ်ခြင်းကိုလည်း လုပ်ဆောင်နိုင်ခဲ့သည်…

"အင်း၊ စိတ်မကောင်းစရာ တစ်ခုက ရုပ်သေး အဖြစ် ပြောင်းလဲပြီးတာနဲ့ ကျင့်ကြံမှုအဆင့်က ပုံသေ ဖြစ်သွားတာပဲ..."

"ရုပ်သေးရဲ့ တိုက်ခိုက်ရေး စွမ်းအားကို ထပ်ပြီး မြှင့်တင်ဖို့က ငါ့ရဲ့ ရုပ်သေး တာအိုတိုးတက်လာပြီး အဆင့်မြင့် ပစ္စည်းတွေနဲ့ သတ္တုတွေကို ထည့်နိုင်မှပဲ ဖြစ်နိုင်မယ်... ဒါမှမဟုတ်လည်း သူ့အတွက် အဆင့်မြင့် မှော်ရတနာတွေကို ပြင်ဆင်ပေးနိုင်မှ ဖြစ်မယ်။"

စုရှင်းသည် ခေါင်းကို အနည်းငယ် ခါယမ်းလိုက်သည်။ ဤကိစ္စတွင် သာမန် ရုပ်သေးများသည် ရုပ်သေး ကျင့်ကြံသူများနှင့် ယှဉ်၍ မရပေ။

အဘယ်ကြောင့်ဆိုသော် ရုပ်သေး ကျင့်ကြံသူများ၏ အပေါ်ဆုံး ကန့်သတ်ချက်သည် အလွန် မြင့်မားသော်လည်း သာမန် ရုပ်သေးများ၏ အပေါ်ဆုံး ကန့်သတ်ချက်မှာ ပိတ်ဆို့ထားသကဲ့သို့ ဖြစ်နေသောကြောင့် ဖြစ်သည်။

"ဒါပေမယ့် ခွန်အားက အခြေခံအားဖြင့်တော့ လုံလောက်ပါတယ်... လက်ရှိ ကြယ်ပြာပေါ်မှာ ဝမ်မူကို ကောင်းကောင်း ဖိနှိပ်နိုင်တာဆိုလို့ အဲ့ဒီကျိန်စာသင့် နဂါး တစ်ဦးတည်းပဲ..."

"ကျိန်စာသင့်နဂါး ကိုယ်တိုင် မလှုပ်ရှားသရွေ့တော့ ဝမ်မူ ရုပ်သေးက အသေးအမွှား အားလုံးကို ခြောက်လှန့်ဖို့ လုံလောက်တယ်။"

ယခုအခါ စစ်မှန်သော ဝမ်မူသည် ပြည့်စုံသွားပြီ ဖြစ်သောကြောင့် စုရှင်း အသုံးပြုနိုင်သည့် တိုက်ခိုက်ရေး ရုပ်သေး အရေအတွက်သည် ဆယ်ခုအထိ ရောက်ရှိလာခဲ့သည်။

စုရှင်းသည် ဤ ရုပ်သေးများကို အပြင်သို့ လွှတ်ကာ စီးပွားရေး အသင်းအဖွဲ့ကြီးများနှင့် အရောင်းအဝယ်များကို စတင် လုပ်ဆောင်ခိုင်းနိုင်ပြီ ဖြစ်သည်။

သို့သော် ထိုသို့ မလုပ်ဆောင်မီ စုရှင်းသည် အန္တရာယ်များကို စုံစမ်းရန်အတွက် နောက်ထပ် သရုပ်ပြခြင်း တစ်ခုကို လုပ်ဆောင်ရန် စီစဉ်ခဲ့သည်။

"အချိန်ကြည့်ရ‌တာတော့ ကျင်းချုံးရွှယ်နဲ့ တွေ့ဆုံဖို့ အချိန်တန်ပြီပဲ..."

စုရှင်းသည် ရေရွတ်ပြီးနောက် ရုပ်ဖျက်ခြင်းနှင့် အရှိန်အဝါ ဖုံးကွယ်ခြင်းတို့ကို စတင် လုပ်ဆောင်ခဲ့သည်။

ဤတစ်ခါတွင်မူ စုရှင်း ကိုယ်တိုင် သွားရောက်ရန် စီစဉ်ခဲ့သည်။ အဘယ်ကြောင့်ဆိုသော် ကျင်းချုံးရွှယ်နှင့် တွေ့ဆုံမှုတိုင်းသည် အပန်းဖြေနိုင်သော ရှားပါးသည့် အခိုက်အတန့်များထဲမှ တစ်ခု ဖြစ်သောကြောင့်ပင်။

ဆယ့်ငါးမိနစ် ကြာပြီးနောက် စုရှင်းသည် ဗီလာသို့ ရောက်ရှိလာခဲ့သည်။

သူသည် အနည်းငယ် စိတ်လှုပ်ရှားပြီး မတည်မငြိမ် ဖြစ်နေသော ကျင်းချုံးရွှယ်ကို မြင်တွေ့ခဲ့ရသည်။

"စုရှင်း၊ ရှင်လား"

ကျင်းချုံးရွှယ်၏ မျက်လုံးများတွင် ပျော်ရွှင်မှု အရိပ်အယောင်များ လင်းလက်သွားခဲ့သည်။

ဤအရာကို မြင်သောအခါ စုရှင်းက ပြုံးကာ ပြောလိုက်သည်- "ကျွန်တော်ပေါ့ဗျ... ဘာလို့ ဒီလောက် စိတ်ပူနေရတာလဲ"

ကျင်းချုံးရွှယ်သည် သက်ပြင်းရှည်တစ်ချက် ရှုထုတ်လိုက်ပြီး သူမ၏ ပြည့်ဖောင်းသော ရင်ဘတ်ကို ပုတ်ကာ ပြောလိုက်သည်-

"ဟူး၊ ရှင်လေ ကျွန်မကို လန့်အောင် အရမ်း လုပ်တာဘဲ... အရင်က အဲဒီ အကြီးအကဲ အရောင်းအဝယ် လုပ်ဖို့ လာတုန်းက ရှင် တစ်ခုခု ဖြစ်သွားပြီလို့ ကျွန်မက ထင်နေတာ သိရဲ့လား"

ကျင်းချုံးရွှယ်က သူ့အတွက် စိတ်ရင်းမှန်ဖြင့် စိုးရိမ်နေသည်ကို မြင်သောအခါ စုရှင်း အနည်းငယ် ဟက်ထိသွားခဲ့သည်။

"မပူပါနဲ့၊ အဖွဲ့အစည်းထဲက အကြီးအကဲတွေက ကာကွယ်ပေးနေတဲ့ဟာကို ကျွန်တော်က ဘယ်လိုလုပ် အန္တရာယ်ဖြစ်မှာလဲ"

စုရှင်းသည် နှစ်သိမ့်ပေးပြီးနောက် စကားလမ်းကြောင်းကို ပြောင်းလိုက်သည်။

"ဒါနဲ့ မင်း အကြီးအကဲနဲ့ မနေ့က တွေ့ခဲ့တယ်မလား။ သူ့ကို ဘယ်လို ထင်လဲ"

ဤစကားကို ကြားသောအခါ ကျင်းချုံးရွှယ် အလေးအနက်ထားသော အမူအရာဖြင့် ပြောလိုက်သည်-

"သူ့ရဲ့ ခွန်အားက အတိုင်းအဆမဲ့ပဲ...ရှင် ဆေးလုံးတွေ အများကြီး သန့်စင်နိုင်တာ အံ့ဩစရာ မရှိပါဘူး။ ရှင့်နောက်ကွယ်မှာ လျှို့ဝှက်ဆန်းကြယ်တဲ့ သခင် ရှိနေတာကိုး။"

"အဲဒီ အကြီးအကဲ ဘိုင်က အနည်းဆုံး စစ်ဧကရာဇ်အဆင့် ကျွမ်းကျင်သူတစ်ဦး ဖြစ်ရမယ်။"

ကျင်းချုံးရွှယ် ဤစကားများကို ပြောနေစဉ် သူမ၏ မျက်လုံးများတွင် ရိုသေမှု အရိပ်အယောင်တစ်ခု ရှိနေခဲ့သည်။

စစ်ဧကရာဇ်၏ စွမ်းအားသည် ရှားနိုင်ငံတွင်သာမက ကြယ်ပြာပေါ်တွင်ပါ ထိပ်တန်း ဖြစ်သည်။

ဤစကားကို ကြားသောအခါ စုရှင်းသည် စကားမပြောဘဲ ပြုံးလိုက်သည်။

သူသည် မတွေးဘဲ မနေနိုင်ပေ။ ကျင်းချုံးရွှယ်နှင့် နေ့ရောညပါ အချိန်ဖြုန်းနေသော စုရှင်းက တကယ်တမ်းတွင် စစ်ဧကရာဇ် အထွတ်အထိပ်ထက် ကျော်လွန်သော တစ်စုံတစ်ဦး၊ လူသားမျိုးနွယ်၏ စစ်မှန်သော နံပါတ်တစ် ကျွမ်းကျင်သူ ဖြစ်သည်ကို သူမ သိရှိပါက မည်ကဲ့သို့သော မြင်ကွင်း ဖြစ်လိမ့်မည်နည်း။

အတော်လေး စိတ်ဝင်စားစရာ ကောင်းလိမ့်မည် မဟုတ်ပါလား။

စုရှင်း တိတ်ဆိတ်စွာ စဉ်းစားနေစဉ် ကျင်းချုံးရွှယ်၏ မျက်လုံးများတွင် စိုးရိမ်သော အသွင်အပြင် ပေါ်လာပြီး သူမက တွန့်ဆုတ်စွာ ပြောလိုက်သည်-

"စုရှင်း...ရှင် ပါဝင်နေတဲ့ လျှို့ဝှက် အဖွဲ့အစည်းက မကောင်းတဲ့ အရာများ ဖြစ်နေမလားဟင်၊ မပြောပြနိုင်တဲ့ လျှို့ဝှက်ချက်တွေ ဘာတွေများ ရှိနေမလား"

စုရှင်းသည် ကျင်းချုံးရွှယ်၏ စကားများကြောင့် အံ့အားသင့်သွားသည်။ ပြီးနောက် သူ၏ အဖွဲ့အစည်းက လူသားမျိုးနွယ်ကို သစ္စာဖောက်သော အယူလွဲအဖွဲ့ ဟုတ်၊မဟုတ်ကို သူမ စုံစမ်းနေကြောင်း သဘောပေါက်ခဲ့သည်။

ထို့ကြောင့် စုရှင်းက ချက်ချင်း အလေးအနက်ထားပြီး တုံ့ပြန်ခဲ့သည်-

"မပူပါနဲ့၊ အစ်မရွှယ်၊ ကျွန်တော် ပါဝင်တဲ့ အဖွဲ့အစည်းက လူသားမျိုးနွယ်ကို ကာကွယ်ဖို့နဲ့ ပြန်လည် အသက်သွင်းဖို့အတွက် တည်ရှိနေတယ်ဆိုတာ ကျွန်တော် လုံးဝ အာမခံပါတယ်။"

"ဒါပေမယ့် တစ်ချို့သော အကြောင်းပြချက်တွေကြောင့် ကျွန်တော်တို့က လူသိရှင်ကြားလုပ်လို့ မရဘူး…ကျွန်တော်တို့က တိုင်းတစ်ပါး မျိုးနွယ်တွေကို အရိပ်ထဲကနေဘဲ တိုက်ခိုက်လို့ ရတာ"

"ဒါကြောင့် ကျေးဇူးပြုပြီး ဒါကို လျှို့ဝှက် ထားပေးပါ၊ ကျွန်တော့်အကြောင်း ဒါမှမဟုတ် အဖွဲ့အစည်း အကြောင်း ဘယ်သူ့ကိုမှ မပြောပါနဲ့... မင်းရဲ့ အရင်းနှီးဆုံး ဆွေမျိုးတွေကိုတောင် မပြောပါနဲ့။"

စုရှင်း၏ အလေးအနက်ထားသော လေသံကို ကြားသောအခါ ကျင်းချုံးရွှယ်သည် နာခံစွာ ခေါင်းညိတ်ပြီး ပြောလိုက်သည်-

"မပူပါနဲ့၊ ရှင့်ရဲ့ ယုံကြည်မှုကို ကျွန်မ အလွဲသုံးစား မလုပ်ပါဘူး"

စုရှင်း၏ ရှင်းပြချက်အပြီးတွင် နှစ်ဦးသား စတင် စားသောက်ကြပြီး စကားပြောဆိုကြရာ သူတို့၏ ခံစားချက်များ ပိုမို နက်ရှိုင်းလာခဲ့သည်။

သူတို့ စားပြီးခါနီးတွင် ကျင်းချုံးရွှယ်သည် ထိုအပတ်၏ ကုန်ပစ္စည်းများကို စုရှင်းအား လွှဲပြောင်းပေးခဲ့ပြီး စုရှင်းကလည်း အဆာခံဆေးလုံး ငါးသောင်းကို လွှဲပြောင်းပေးကာ ပြောလိုက်သည်-

"ဒီမှာ ဆေးလုံး ငါးသောင်း၊ နောက်ထပ် ဒုတိယအဆင့် ထူးခြားသတ္တုတွင်း နယ်မြေ တစ်ခုအတွက် လျှောက်ထားပေးပါဦး..."

ကျင်းချုံးရွှယ် ခေါင်းညိတ်ပြီး ပြောလိုက်သည်-

"ဟုတ်ကဲ့၊ ဒါက ကျွန်မရဲ့ တာဝန်ပါပဲ။"

စုရှင်း ထွက်ခွာသွားပြီးနောက် ကျင်းချုံးရွှယ်သည် သူမ၏ လက်ထဲရှိ လက်စွပ်ကို ကြည့်ပြီး အနည်းငယ် အပြစ်ရှိသလို ခံစားရကာ ပြောလိုက်သည်-

"စုရှင်း နဲ့ သူ့ အဖွဲ့အစည်းက အဆာခံ ဆေးလုံးလိုမျိုး အရေးကြီးတဲ့ ဆေးလုံးကို ရှားနိုင်ငံကို ပေးနေတဲ့ဟာ... သူတို့က ဘယ်လိုလုပ် သစ္စာဖောက် ဖြစ်နိုင်မှာလဲ။ အင်း၊ ငါကတော့ တကယ် အရူးပဲ။"

…

စုရှင်းသည် ဝိညာဉ်စိုက်ခင်းဂူသို့ ပြန်လာခဲ့ပြီး ဤအပတ်အတွက် ကုန်ပစ္စည်းများကို စွမ်းအင်အဖြစ် ပြောင်းလဲခဲ့ရာ သရုပ်ပြခြင်းစွမ်းအင် သန်း၂၅၀ကျော် တိုးလာခဲ့သည်။

နောက်အပါတ်တွင် စုရှင်း၏ ဝင်ငွေသည် သရုပ်ပြခြင်းစွမ်းအင် သန်း၃၀၀အထိ ရောက်ရှိလာမည် ဖြစ်သည်။

အဆာခံဆေးလုံးများကို ကျင်းချုံးရွှယ်က သူ့အစား မဟာရှားစစ်တပ်နှင့် အရောင်းအဝယ် လုပ်ပေးခဲ့သည်။

စုရှင်းကိုယ်တိုင်ကမူ အနှစ်သာရ အားဖြည့်ဆေးလုံးနှင့် ကိုယ်တွင်းအင်္ဂါ သန့်စင်ဆေးလုံးများကို လုယွမ်ဝူနှင့် ‌အရောင်းအဝ် လုပ်ခဲ့သည်။

ယင်းသည် အန္တရာယ်ရှိပြီး ဖော်ထုတ်ခံရ‌နိုင်ခြေ ရှိသည်ဟု ထင်ရသော်လည်း အမှန်တကယ်မှာတော့ မဟုတ်ပါ။

အဘယ့်ကြောင့်ဆိုသော် ကြယ်ပြာပေါ်တွင် အကျဉ်းခန်းများစွာ ရှိနေသောကြောင့် ဖြစ်သည်။

ဤ အကျဉ်းခန်းများမှ ထွက်ရှိသော ပစ္စည်းများနှင့် အမျိုးမျိုးသော ဆေးလုံးများသည် အဆုံးမရှိသောကြောင့် ၎င်းတို့ကို တစ်ခုနှင့်တစ်ခု ဆက်စပ်ရန် မလွယ်ကူပေ။

စုရှင်းသည် ရှေ့ဖြစ်ဟော အသင်းမှတစ်ဆင့် အနှစ်သာရ အားဖြည့်ဆေးလုံးများကို မရောင်းချသရွေ့ လုယွမ်ဝူသည် မည်သည့်အရာကိုမှ သံသယဝင်မည် မဟုတ်ပေ။

ယင်းသည် စုရှင်း၏ ဗျူဟာလည်း ဖြစ်သည်။

အခြားနည်းလမ်းများဖြင့် ရောင်းချသော ပစ္စည်းများကို ရှေ့ဖြစ်ဟော အသင်းမှတစ်ဆင့် ထပ်မံ အရောင်းအဝယ် လုပ်မည် မဟုတ်ပါ။

ဥပမာအားဖြင့်၊ ယခင် သက်တမ်းတိုး ဆေးလုံး နှင့် နောင်လာမည့် အဆောင်လက်ဖွဲ့များ၊ အဆင့်မြင့် ဆေးလုံးများ၊ လက်နက်များကိုလည်း စုရှင်းသည် ရှေ့ဖြစ်ဟော အသင်းမှတစ်ဆင့် ရောင်းချရန် အစီအစဉ်မရှိပေ။

လက်ရှိတွင် ရှေ့ဖြစ်ဟော အသင်းသည် စုရှင်းအတွက် ကာကွယ်ရေး အကာအကွယ် တစ်ခု ဖြစ်သည်။ ယင်းသည် ကျင်းချုံးရွှယ် နှင့် ဆက်သွယ်ရန်နှင့် ပြင်ပ သတင်းအချက်အလက်များ ရရှိရန် လမ်းကြောင်း တစ်ခုအဖြစ် ဆောင်ရွက်နေသည်။

…