ရွှေရောင် စွမ်းရည် ကောင်းကင်ဝါးမျိုခြင်း၊ ကျားအမတခံတပ်သို့ ပြန်လည် ဝင်ရောက်ခြင်း။

စုရှင်းသည် ရှန်းနန်ယိုထျန်း၏ စကားများကို ကြားသော်လည်း သူသည် လျစ်လျူရှုနေခဲ့သည်။

ရှန်းနန်ယိုထျန်း ပြောခဲ့သည်မှာ သာမန် ကျင့်ကြံသူများ အတွက် မှန်ကန်သည်။ ၎င်းတို့သည် သေးငယ်သော နယ်ပယ်များကို ထိုးဖောက်ရန်ပင် အလွန် ခက်ခဲသည်ကို တွေ့ရှိရသည်။

သို့သော် စုရှင်း အတွက်မူ သူ့ကို အဟန့်အတား ဖြစ်စေသည့် တစ်ခုတည်းသော အရာမှာ အဓိက နယ်ပယ်များရှိ အတားအဆီးသာ ဖြစ်သည်။ သေးငယ်သော နယ်ပယ်များကို ထိုးဖောက်ခြင်းသည် အချိန်အနည်းငယ်သာ ကုန်စေသည်။

ဒါ့အပြင် စုရှင်းသည် ကောင်းကင်ဝါးမျိုးခြင်း စွမ်းရည်ကို ရရှိခဲ့ပြီး သူ၏ ရုပ်ခန္ဓာကိုယ် လေ့ကျင့်မှု စွမ်းရည်သည် တစ်ဖန် ပြန်လည် မြင့်တက်လာခဲ့သောကြောင့် သူသည် ခန္ဓာကိုယ် သန့်စင်ခြင်း လမ်းစဉ်ကို စွန့်လွှတ်မည် မဟုတ်ပါ။

စုရှင်း စဉ်းစားနေစဉ် ရှန်းနန်ယိုထျန်းက ပြောလိုက်သည်-

"ဟုတ်ပြီ၊ အခု မင်း ခန္ဓာကိုယ် သန့်စင်ခြင်း ကြီးမြတ်သော အောင်မြင်မှုကို ရရှိခဲ့ပြီ... မင်းရဲ့ ဆရာဦးလေးက မင်းကို ရွေးချယ်မှု တစ်ခု လုပ်ခိုင်းလိမ့်မယ်။ ဘယ်လို ရွေးချယ်မလဲဆိုတာကတော့ မင်းအပေါ်မှာ မူတည်တယ်။"

ရှန်းနန်ယိုထျန်း စကားဆုံးသွားပြီးနောက် ထပ်မံ မပြောတော့ပေ။

စူရှင်းသည် ခန်းမဆောင်ကြီးသို့ မကြာမီ ပြန်ရောက်ရန် မျှော်လင့်ရင်း သူ၏ ခြေလှမ်းများကို အရှိန်မြှင့်တင်ခဲ့သည်။

ခဏအကြာတွင် စုရှင်း ပြန်ရောက်လာခဲ့သည်။

ဝူကဲသည် အနည်းငယ် ခေါင်းညိတ်ပြီးနောက် စုရှင်းကို လက်ယပ်ခေါ်ကာ ပြောလိုက်သည်-

"ရှောင်ချွမ်၊ မင်း ဆရာ့နောက်ကနေ အတွင်းခန်းမဆောင်ကို လိုက်ခဲ့ပါ..."

စုရှင်းသည် အလျင်စလို လိုက်သွားပြီး ပိုမို လျှို့ဝှက်သော အဓိက ခန်းမဆောင်သို့ ရောက်ရှိခဲ့သည်။

ထို့နောက် ဝူကဲ၏ မျက်နှာ အနည်းငယ် မှောင်မိုက်သွားပြီး စုရှင်းကို ပြောလိုက်သည်-

"ရှောင်ချွမ်၊ မင်းက အခု အနှစ် တစ်ရာတောင် မပြည့်သေးဘူး ခန္ဓာကိုယ် သန့်စင်ခြင်း ကြီးမြတ်သော အောင်မြင်မှုရဲ့ ကျင့်ကြံသူ ဖြစ်နေပြီ။ ကိုယ်ခန္ဓာ ကျင့်ကြံမှု လမ်းစဉ်မှာဆိုရင် မင်းက ငါတို့ လောထျန်းဂိုဏ်းမှာ နှစ်ပေါင်း တစ်ထောင်အတွင်း တွေ့ဖူးသမျှထဲ အရည်အချင်း အရှိဆုံး တပည့်ပဲ။"

"လွန်ခဲ့တဲ့ အချိန်တုန်းက မင်း ပထမအဆင့် နတ်မျိုးစေ့ ဖြစ်လာခဲ့တယ်။ မင်းရဲ့ ဆရာ က မင်းကို ဂိုဏ်းရဲ့ လျှို့ဝှက်နည်းစနစ်တွေ ပေးအပ်ဖို့အတွက် မလောခဲ့ဘူးဆိုတာက အဓိကအနေနဲ့ကတော့ မင်းရဲ့ သဘောထားကို လေ့လာ စောင့်ကြည့်ဖို့ပဲ။"

"အခုတော့ မင်းရဲ့ဆရာအနေနဲ့ အရမ်း ကျေနပ်ပါတယ်... ဒါကြောင့် မင်းဆရာက မင်းကိာ ရွေးချယ်မှု တစ်ခု လုပ်စေချင်တယ်။ အမတ ဖြစ်ပြီးနောက်မှာ ချီသန့်စင်ခြင်း လမ်းစဉ် နဲ့ ခန္ဓာကိုယ် သန့်စင်ခြင်း လမ်းစဉ်၊ ဘယ်ဟာကို လိုက်နာချင်လဲ။"

ဤအရာကို ကြားသောအခါ စုရှင်းသည် စိတ်လှုပ်ရှားသွားပြီး အစ်ကိုကြီးရှန်းနန် ယခင်က ပြောခဲ့သည်များကို သတိရလိုက်သည်။

ထို့နောက် ဝူကဲသည် ခန္ဓာကိုယ် သန့်စင်ခြင်းတွင် ဂိုဏ်းသားကြီး တစ်ဦး ဖြစ်သည်ကို သူ သတိရလိုက်သည်။ လောထျန်းဂိုဏ်းတွင် ခန္ဓာကိုယ် သန့်စင်ခြင်း၌ လျှို့ဝှက်ချက်အချို့ ရှိနေနိုင်သလား။

ထို့ကြောင့် စုရှင်း ပြတ်သားစွာ ပြောလိုက်သည်-

"ဆရာ၊ ကျွန်တော် ခန္ဓာကိုယ် သန့်စင်ခြင်း လမ်းစဉ်ကို လိုက်နာလိုပါတယ်။"

ဤစကားကိုကို ကြားသောအခါ ဝူကဲသည် ခဏတာ တိတ်ဆိတ်သွားပြီးမှ ပြန်မေးလိုက်သည်-

"ခန္ဓာကိုယ် သန့်စင်ခြင်း လမ်းစဉ်မှာက ချီကျင့်ကြံမှုလို အမျိုးမျိုးသော မှော်ပညာတွေ မရှိဘူး၊ ပြီးတော့ ကျင့်ကြံဖို့လည်း အဆများစွာ ပိုခက်တယ်။ မင်း တကယ်ပဲ ဆုံးဖြတ်ချက် ခိုင်မာပြီလား။"

စုရှင်း ချက်ချင်း ခေါင်းညိတ်ပြီး ပြောလိုက်သည်-

"ဆရာ့တပည့်က ဆုံးဖြတ်ချက် ခိုင်မာပါတယ်။"

ဝူကဲက ကျယ်လောင်စွာ ရယ်မောပြီး ပြောလိုက်သည်-

"ကောင်းပြီ၊ မင်းက တကယ့်ကို ငါ့တပည့် ပီသတာပဲ။ လောထျန်းဂိုဏ်းရဲ့ နှစ်ပေါင်း တစ်ထောင်အတွင်း ရှားပါးတဲ့ ခန္ဓာကိုယ် သန့်စင်ခြင်း စွမ်းအားရှင် တစ်ယောက်ပဲ။"

"မင်းက ခန္ဓာကိုယ် သန့်စင်ခြင်း လမ်းစဉ်ကို အစကတည်းက လျှောက်လှမ်းခဲ့တာ၊ တခြား ခန္ဓာကိုယ် ခိုင်မာစေတဲ့ နည်းစနစ်တွေကို လေ့ကျင့်ခြင်း မရှိခဲ့ဘူး။ အခုက ဒီ လျှို့ဝှက်နည်းစနစ်ကို သင်ယူဖို့ အကောင်းဆုံး အချိန်ပဲ။"

"ဒီ နည်းစနစ်ကို မဟာ စုန်းမ ခန္ဓာကိုယ် သန့်စင်ခြင်း နည်းစနစ်လို့ ခေါ်တယ်။ နက်နဲသော အဆင့်အထိ ကျင့်ကြံနိုင်ရင် မဟာ လော သူတော်စင်တွေကိုတောင် ယှဉ်ပြိုင်နိုင်လိမ့်မယ်။"

"မဟာ စုန်းမ ခန္ဓာကိုယ် သန့်စင်ခြင်း နည်းစနစ်က ရှေးကာလတွေကတည်းက လက်ဆင့်ကမ်း လာခဲ့တဲ့ ရှေးဟောင်း လျှို့ဝှက် နည်းစနစ် တစ်ခု ဖြစ်တယ်။ လူသား အမတ ကိုယ်ခန္ဓာကို ရရှိပြီးမှပဲ လေ့ကျင့်နိုင်တယ်..."

"မင်းအမွေဆက်ခံထားတဲ့ အကြောင်းပြ ကိုယ်ခန္ဓာဖြစ်တဲ့ ကောင်းကင် မိုးကြိုး ကိုယ်ခန္ဓာက ထိပ်တန်းအဆင့် အမတ ကိုယ်ခန္ဓာ မဟုတ်ပေမဲ့ အတော်လေး အလားအလာ ကောင်းပြီး အရမ်း သင့်လျော်တယ်။ အနာဂတ်မှာ ကောင်းကင် အမတ ဒါမှမဟုတ် နက်နဲသော အမတ နယ်ပယ်ကိုတောင် ရောက်ဖို့... လုံးဝ ဖြစ်နိုင်ချေရှိတယ်။"

စုရှင်း ဤစကားကို ကြားသောအခါ သူ၏ နှလုံးသား တုန်လှုပ်သွားသည်။

ယင်းသည် ခန္ဓာကိုယ် သန့်စင်ခြင်း အတွက် နာ်းစနစ် ဖြစ်သည်။

မဟာ စုန်းမ ခန္ဓာကိုယ် သန့်စင်ခြင်း နည်းစနစ်သည် ရှေးဟောင်း စုန်းမ မျိုးနွယ်စုမှ လက်ဆင့်ကမ်းလာသည့် ရှေးဟောင်း ခန္ဓာကိုယ် သန့်စင်ခြင်း နည်းလမ်း ဖြစ်နိုင်မလား။

စုရှင်း၏ နှလုံးခုန်နှုန်း စတင် မြန်လာခဲ့သည်။

ထို့နောက် ဝူကဲသည် စုရှင်း၏ နဖူးကို လက်ညှိုးထိုးပြီး ပြောလိုက်သည်-

"မဟာ စုန်းမ ခန္ဓာကိုယ် သန့်စင်ခြင်း နည်းစနစ်မှာ အမြင့်ဆုံး ကန့်သတ်ချက် ရှိပေမဲ့ သူ့ရဲ့ အရည်အချင်းတွေနဲ့ ကောင်းကင်၊ မြေကြီး ရတနာတွေ အတွက် လိုအပ်ချက်တွေက ပိုတောင် မြင့်မားသေးတယ်။ မျိုးဆက် တစ်ခုစီမှာ လူတစ်ဦးတည်းကိုပဲ လက်ဆင့်ကမ်းခဲ့တာ..."

စုရှင်းသည် သူ့စိတ်ထဲတွင် မှတ်ဉာဏ် အပိုင်းအစများစွာ ထပ်ပေါင်းထည့်လိုက်သလို ခံစားလိုက်ရသည်။

စုရှင်းသည် ရှည်လျားသော ဘီလူးကြီး တစ်ဦးကို ဝိုးတဝါးဖြင့် မြင်လိုက်ရသည်။ တောနက်ထဲတွင် နေ့ရောညပါ မမောမပန်း ရပ်နေပြီး အအေးဒဏ် နှင့် အပူဒဏ်ကို မခံစားရဘဲ အစွန်းရောက် ရာသီဥတုကိုပင် မမှုဘဲ သူတို့၏ ခန္ဓာကိုယ်ကို လေ့ကျင့်နေသည်။

လှုပ်ရှားမှုတိုင်း၊ စိတ်ပိုင်းဆိုင်ရာ နည်းလမ်းတိုင်း၊ နည်းစနစ်တိုင်းသည် စုရှင်း၏ နှလုံးသားထဲတွင် စွဲထင်နေသည်။

အချိန်အတော်ကြာပြီးနောက် စုရှင်းသည် သူ၏ မျက်လုံးများကို ပြန်ဖွင့်လိုက်သောအခါ သူသည် လက်တွေ့ကမ္ဘာသို့ ပြန်ရောက်နေခဲ့သည်။

သူ၏ စိတ်ထဲတွင် မဟာ စုန်းမ ခန္ဓာကိုယ် သန့်စင်ခြင်း နည်းစနစ် တစ်ခုလုံးကို အပြည့်အဝ မှတ်မိနေခဲ့သည်။

"မဟာ စုန်းမ ခန္ဓာကိုယ် သန့်စင်ခြင်း နည်းစနစ်တွင် အလွှာ ဆယ်ခု ပါဝင်သည်။ ပထမအလွှာသည် လူသား အမတ ကျွမ်းကျင်သူနှင့် ယှဉ်ပြိုင်နိုင်သည်... ဒုတိယအလွှာကို ရောက်ရှိပါက မြေကမ္ဘာ အမတ ကျွမ်းကျင်သူ နှင့် ယှဉ်ပြိုင်နိုင်သည်..."

"ဒသမ အလွှာအထိ ကျင့်ကြံနိုင်ရင် သူတော်စင်နဲ့ ယှဉ်ပြိုင်နိုင်တယ်။"

"ဟူး... ဒီ မဟာ စုန်းမ ခန္ဓာကိုယ် သန့်စင်ခြင်း နည်းစနစ်က ကျင့်ကြံမှုရဲ့ ထိပ်ဆုံးကို ဦးတည်တဲ့ အဆုံးစွန် လျှို့ဝှက် နည်းစနစ်ပဲ"

စုရှင်း၏ မျက်လုံးများတွင် ပြင်းထန်သော ပျော်ရွှင်မှု အရိပ်အယောင် လင်းလက်သွားသည်။

ယခင်က စုရှင်းသည် သူ၏ ခန္ဓာကိုယ် သန့်စင်ခြင်း ကျင့်ကြံမှုအဆင့်ကို တိုးတက်အောင် လုပ်ရာတွင် စုန်းမ မျိုးနွယ်စု၏ အခြေခံ လေ့ကျင့်ခန်းများ နှင့် အသားဓာတ် အနှစ်သာရ အမြောက်အများကိုသာ အားကိုးခဲ့သည်။

အဆင့်နိမ့် နယ်ပယ်များတွင် ၎င်းသည် အလွန် ထိရောက်ခဲ့သည်။

သို့သော် နယ်ပယ် တိုးလာသည်နှင့်အမျှ ဤ ခန္ဓာကိုယ် သန့်စင်ခြင်း၏ ထိရောက်မှုသည် လျော့နည်းလာမည်မှာ ပြောရန်ပင် မလိုပေ။

သို့သော် ယခုမူ ကွဲပြားခြားနားသည်။ မဟာ စုန်းမ ခန္ဓာကိုယ် သန့်စင်ခြင်း နည်းစနစ်သည် လက်ထဲတွင် ရှိနေသဖြင့် စုရှင်းသည် သူ၏ ရုပ်ခန္ဓာကိုယ်ကို အသုံးပြု၍ အမတများ နှင့် ယှဉ်ပြိုင်နိုင်မည်။

သူ့ကိုယ်သူ တည်ငြိမ်စေရန် အသက်ပြင်းပြင်း ရှုပြီးနောက် စုရှင်းသည် ရုတ်တရက် တစ်ခုခုကို သတိရပြီး ရေရွတ်လိုက်သည်-

"ခန္ဓာကိုယ် သန့်စင်ခြင်း ကြီးမြတ်သော အောင်မြင်မှုကို ရရှိလို့ မဟာ စုန်းမ ခန္ဓာကိုယ် သန့်စင်ခြင်း နည်းစနစ်ကို ချီးမြှင့်ခံရတယ်..."

"ဒါဆို ချီကျင့်ကြံခြင်းမှာ မဟာယာန နယ်ပယ်ကို ရောက်ရှိရင်ရော၊ ပထမအဆင့် နတ်မျိုးစေ့အနေနဲ့ အဲဒီအခါကျရင် ဘယ်လို လျှို့ဝှက် နည်းစနစ်မျိုးကို ရရှိနိုင်မလဲ။"

စုရှင်း၏ နှလုံးသား စတင် ခုန်လာပြန်သည်။

ဒါက အမတ ကျင့်ကြံမှု နည်းစနစ်များ ဖြစ်နိုင်မလား။

သူတော်စင်ဘဝသို့ တိုက်ရိုက် ဦးတည်သည့် ကျယ်ပြန့်လွယ်ကူသော လမ်းကြောင်း။

စုရှင်းသည် မဟာ စုန်းမ ခန္ဓာကိုယ် သန့်စင်ခြင်း နည်းစနစ်ကို ရရှိထားသော်လည်း အနာဂတ် သရုပ်ပြခြင်းများတွင် မဟာယာန နယ်ပယ် ဆုလာဘ်များအား ရှာဖွေခြင်းမှ သူ့ကို တားဆီးထားခြင်း မရှိပါ။

မည်သို့ဖြစ်စေ ဆုလာဘ်နှစ်ခုစလုံးကို ရယူပြီးမှ ဘယ်အရာကို အဓိက အာရုံစိုက်ရမလဲ ဆိုသည်ကို နောက်မှ ဆုံးဖြတ်ခြင်းသည် စုရှင်းအပေါ်တွင် လုံးလုံး မူတည်သွားမည် မဟုတ်ပါလား။

"ကလေးတွေပဲ ရွေးချယ်တာတွေ၊ ဘာတွေ လုပ်ကြတာ။ ငါကတော့ အကုန်ယူမှာ..."

စုရှင်း၏ နှုတ်ခမ်းများ အနည်းငယ် ကွေးညွှတ်သွားသည်။ ဤ ထိုးဖောက်မှုဖြင့် ထိုသို့သော ကြီးမြတ်သည့် အံ့အားသင့်စရာကို မမျှော်လင့်ဘဲ တွေ့ရှိခဲ့ခြင်း ဖြစ်သည်။

သူသည် သရုပ်ပြခြင်း ဖန်သားပြင်ကို အာရုံပြန်စိုက်လိုက်သည်။

[လောထျန်း နယ်မြေမှ ထွက်ခွာပြီးနောက် သင်သည် ဝိညာဉ်စိုက်ခင်းဂူသို့ ပြန်လာခဲ့သည်။]

[ထို့နောက် သင်သည် စီစဉ်ထားသည့်အတိုင်း ဆင်းသက်ဂိုဏ်းသို့ ဝင်ရောက်ခဲ့ပြီး သင်၏ ရုပ်သေး အဖွဲ့အစည်း ဖြစ်သော ကောင်းကင် လျှို့ဝှက် နန်းတော်ကို အမျိုးမျိုးသော အဓိက ကုန်သည်များနှင့် ကုန်သွယ်စေခဲ့သည်။]

[ဆင်းသက်ဂိုဏ်းသို့ ဝင်ရောက်ပြီးနောက် သင်သည် နေ့စဉ် ဆေးလုံးများကို သန့်စင်ခဲ့သည်။]

[ဤနည်းဖြင့် နှစ်နှစ် ကုန်လွန်သွားခဲ့သည်။]

[ဤ ကာလအတွင်း သင်သည် လောထျန်း နယ်မြေသို့ နောက်ထပ် ခရီးစဉ်တစ်ခု သွားခဲ့သည်။]

[တတိယနှစ်တွင် သင်သည် ရှားစစ်တပ်ကို ဆေးလုံးများ ပေးခဲ့ပြီး ၎င်းတို့၏ ခွန်အားကို သိသိသာသာ မြှင့်တင်ပေးခဲ့သည်။]

[သင်သည် မီးထိန်းချုပ်ဂိုဏ်း၏ အပျက်အစီးများကိုလည်း သွားရောက်ခဲ့ပြီး ဇာမဏီငှက် အမြီး၏ အမွေးအတောင် တစ်ခုကို တွေ့ခဲ့သည်…]

…