အခန်း (၅၂၅-၅၂၆)
Vol. 35 Ch. 525-526
အခန်း (၅၂၅) : အော်ရိုရာ
"မင်းကြားသားပဲ။ မင်းက ငါ့သူငယ်ချင်းဖြစ်နေရင်တောင် သူတို့က မင်းကို မျက်နှာသာပေးချင်မှ ပေးမှာ။" ဟန်ရှောင်း ခေါင်းခါလိုက်သည်။ အော်ရိုရာသည် စိတ်ထားကောင်းသော မိန်းကလေးဖြစ်ပြီး သဘာဝအတိုင်း ကူညီလိုစိတ်ရှိမည်ဖြစ်သော်လည်း ဟီလာအတွက်မူ ပြောမရနိုင်ပေ။ ဒီမိန်းကလေးက အေးစက်စက်နိုင်သော စရိုက်ရှိပြီး တခြားသူများ၏ ကိစ္စများတွင် ဝင်ပါရခြင်းကို မကြိုက်ပေ။ ထို့အပြင် သူမသည် ညီမကို အလွန်အကာအကွယ်ပေးတတ်ပြီး ညီမဖြစ်သူ သဘောတူခြင်းကို တားဆီးလိမ့်မည်ဖြစ်သည်။
ဟီလာသည် သူ့အပေါ် အကြွေးတင်နေသော်လည်း သူမ၏ ခေါင်းမာသောစိတ်ဓာတ်ဖြင့် ညီမဖြစ်သူကို ထိုအကြွေး ပြန်ဆပ်ခွင့်ပြုမည် မဟုတ်ပေ။
"ဒါတော့ မဖြစ်နိုင်ဘူး။ သူ့ရဲ့ အက်စ်ပါ စွမ်းရည်ကို သုံးခိုင်းတာလေးက အများကြီးမှ မဟုတ်တာ။" ဟားလပ်စ် စိုးရိမ်လာသည်။
"ဒါက အတိတ်က အကြောင်းရင်း ရှိတယ်။ သူ့ညီမက အက်စ်ပါ စွမ်းရည်ကို သုံးလိုက်တိုင်း သူ့ကိုယ်ပိုင် အသက်စွမ်းအားကို ကုန်ဆုံးစေရတယ်။ သူအရင်က ဆိုးရွားတဲ့ အဖြစ်ဆိုးတချို့ကို ခံစားခဲ့ရဖူးတော့ ဒီကိစ္စနဲ့ပတ်သက်ရင် အရမ်းကို အထိမခံဖြစ်နေတာ။"
"မင်း ငါ့ကို ကတိပေးထားတယ်လေ။" ဟားလပ်စ်က လက်မလျှော့ဘဲ ပြောသည်။
"ကောင်းပြီလေ၊ ငါ မင်းအတွက် မေးပေးကြည့်မယ်။"
ဟန်ရှောင်းသည် မျှော်လင့်ချက်မရှိသလို ခေါင်းခါလိုက်ပြီး အမျိုးသမီးနှစ်ဦးကို ရှေ့သို့ လျှောက်သွားလိုက်သည်။
ဧရာမဝက်ဝံကြီး၏ နှာခေါင်းက ရှုံ့သွားသည်။ ၎င်းသည် ရင်းနှီးသော အနံ့တစ်ခုကို ရလိုက်ပြီး ပဲစိမ်းအရွယ် မျက်လုံးများသည် ဟန်ရှောင်းကို စိုက်ကြည့်နေကာ ဟန်ရှောင်းသည် သူ၏ ပိုင်ရှင်ဟောင်း ဟုတ်မဟုတ် မသေမချာဖြစ်နေသည်။ ဟန်ရှောင်းက လက်ဝှေ့ယမ်းပြလိုက်မှသာ ဝက်ဝံကြီးသည် စိတ်လှုပ်ရှားစွာ ပြေးထွက်လာပြီး ဟန်ရှောင်းရှေ့တွင် လူးလှိမ့်ကာ ဟန်ရှောင်း ပွတ်သပ်ပေးရန် ၎င်း၏ဗိုက်ကို ပြသလိုက်သည်။
"ဒီဝက်ဝံကို မင်း ကောင်းကောင်းမွေးထားတာပဲ။" ဟန်ရှောင်းက ဝက်ဝံ၏မေးစေ့ကို ပွတ်သပ်ပေးလိုက်သည်၊ ဝက်ဝံ၏ အမွေးပွပွ အထိအတွေ့သည် ဟာမွန်ထက် များစွာ ပိုကောင်းမွန်သည်။
အတိတ်တုန်းက ဒီဝက်ဝံကို ဝက်ဝံပေါက်လေးလို့ ခေါ်လို့ရသေးသည်။ ယခု မီတာအနည်းငယ် မြင့်လာသောအခါ ဟန်ရှောင်းက ၎င်းကို ကလေးဟု မခေါ်နိုင်တော့ပေ။
"ဟုတ်တယ်၊ သူ အရမ်းမြန်မြန် ကြီးလာတာ။ ကျွန်မဘေးမှာနေရင်း၊ ကျွန်မရဲ့ အက်စ်ပါ စွမ်းရည်တွေက သူ့အသက်စွမ်းအားကို ဖွံ့ဖြိုးစေတယ်။" အော်ရိုရာ ပြုံးလိုက်သည်။
ဝက်ဝံ၏ မေးစေ့ကို ပွတ်သပ်ရင်း ဟန်ရှောင်းက ရုတ်တရက် တွေးလိုက်သည်။ "ဒီလိုဆိုရင် သူ့အသား အရည်အသွေးက တော်တော်ကောင်းနေမှာပဲ။"
မြေပြင်ပေါ်တွင် လူးလှိမ့်နေသော ဝက်ဝံသည် ရုတ်တရက် တောင့်ခဲသွားပြီး တစ်ခုခုမှားနေသည်ဟု ခံစားရကာ နားရွက်များ ထောင်တက်လာသည်။
"နင်ငါတို့ကို ဘာလို့ တားတာလဲ။" ဟီလာက မေးလိုက်သည်။
ဟန်ရှောင်းက ဟားလပ်စ်ကို ဆွဲထုတ်လိုက်ပြီး "ဒါက ဟားလပ်စ်၊ ငါ့ရဲ့ ရဲဘော်ပဲ။ တိုက်ပွဲတစ်ခုမှာ သူ မတော်တဆ ဒဏ်ရာရသွားတယ်။ မင်းမျက်လုံးတွေက လုံလောက်အောင် စူးရှမယ်ဆိုရင် သူ့မှာ ယန္တရားလက် တပ်ထားတာကို မြင်မှာပေါ့..."
ဟီလာ လုံးဝ စကားမပြောနိုင် ဖြစ်သွားသည်။ "နင်က တခြားသူတွေရဲ့ အမြင်အာရုံကို တိုင်းတာဖို့ မျက်မမြင်တစ်ယောက်ရဲ့ စံနှုန်းကို သုံးနေတာလား။"
"ငါ သူ့ရဲ့ ပြတ်သွားတဲ့ လက်တွေကို ကုသပေးမယ်လို့ ကတိပေးထားတယ်၊ အော်ရိုရာ့ဆီက အကူအညီ တောင်းချင်လို့။"
"အဲဒါကို စဉ်းတောင် မစဉ်းစားနဲ့။" အော်ရိုရာ မဖြေနိုင်ခင်မှာပင် ဟီလာက ဟန်ရှောင်းကို ငြင်းပယ်လိုက်သည်။
ဟန်ရှောင်း၏ ပါးစပ် တွန့်သွားသည်။ "မင်းအနေနဲ့ အနည်းဆုံးတော့ စဉ်းစားဟန်ဆောင်သင့်တယ်လေ..."
"နင် ငါ့ညီမကို နားလည်ပါတယ်။ သူက တခြားသူတွေရဲ့ ဒဏ်ရာတွေကို သူ့ကိုယ်ပိုင် အသက်စွမ်းအားကို အရင်းခံပြီးမှ ပြန်ကောင်းအောင် လုပ်ပေးနိုင်တာ။ ဒီကမ္ဘာပေါ်မှာ ကျွန်မညီမကို လူတစ်ယောက်တည်းကိုပဲ ကယ်တင်ခွင့်ပြုမယ်... အဲဒီလူက ရှင်ပဲ။"
ဟီလာသည် ခဏမျှ ရပ်တန့်သွားပြီးမှ "ငါတို့ရဲ့ ဆက်ဆံရေးက အရမ်းကောင်းတယ်လို့ မထင်လိုက်နဲ့။ ငါတို့ နင့်အပေါ် အကြွေးတင်နေလို့ပဲ။ နင်ကလွဲရင် ငါတို့ ဘယ်သူ့ကိုမှ ကယ်မှာ မဟုတ်ဘူး။"
အော်ရိုရာ၏ [အသက်၏အရုဏ်ဦး] စွမ်းရည်သည် သူမအား နှိုင်းယှဉ်၍မရအောင် ပြည့်လျှံနေသော သက်စွမ်းအားကို ပေးအပ်ထားပြီး၊ သူမ၏ ဆဲလ်များသည် အထူးသက်စွမ်းအားတစ်မျိုးကို ထုတ်လုပ်နိုင်သည်။ အော်ရိုရာ ပိုင်ဆိုင်သော အသက်စွမ်းအားသည် ရေတစ်ပုံးနှင့်တူပြီး ပြင်းထန်သော ဒဏ်ရာကို ကုသရန် တစ်စက်တည်းသာ လိုအပ်သည်။
သို့သော်လည်း ၎င်းသည် သူမ၏ 'အသက်စွမ်းအား' ကုန်ဆုံးသွားခြင်း ဖြစ်နေတုန်းပင်...
အော်ရိုရာသည် လက်ရှိတွင် ကျန်းမာနေသော်လည်း ဟီလာသည် သူမ၏ အသက်စွမ်းအားကို ဤကဲ့သို့ ဖြုန်းတီးခွင့် ဘယ်တော့မှ ပေးမည်မဟုတ်ပေ။
ဟန်ရှောင်း မတုံ့ပြန်နိုင်မီ အော်ရိုရာက ဖြတ်ပြောလိုက်သည်။ "အစ်မ၊ ဒါက ကျွန်မအတွက် အရမ်းလွယ်တဲ့ အလုပ်တစ်ခုပါ၊ ပြီးတော့ ကျွန်မက အမြဲတမ်း တခြားသူတွေရဲ့ အကူအညီကို ခံယူနေရတဲ့သူပါ။ ကျွန်မလည်း ဘလက်စတားအတွက် တစ်ခုခု ပြန်လုပ်ပေးချင်တယ်။"
"မရဘူး၊" ဟီလာက ပြတ်ပြတ်သားသား ငြင်းသည်။
"အစ်မ၊ အစ်မ အမြဲတမ်း ကျွန်မအတွက် ဆုံးဖြတ်ချက်တွေ ချပေးလို့မရဘူးလေ၊" အော်ရိုရာက မျှော်လင့်ချက်မဲ့စွာ ပြောလိုက်သည်။
" နင် ငါသင်ပေးထားတာတွေကို ဘာလို့ နားမထောင်ချင်ရတာလဲ။ ဒီလောကကြီးမှာ ကြင်နာတတ်တဲ့သူတွေပဲ အနိုင်ကျင့်ခံရမှာ" ဟီလာက ဒေါသတကြီး ပြောလိုက်သည်။ "စောစောကလည်း ဒီအတိုင်းပဲ၊ အခုလည်း ဒီလိုထပ်ဖြစ်ပြန်ပြီ။ နင် ဘယ်တော့မှ ကြီးပြင်းလာမှာလဲ။ ပထမဆုံးတစ်ကြိမ် ရှိသွားပြီဆိုတာနဲ့ ဒဏ်ရာရတဲ့လူတွေအားလုံး နင့်ကို လာရှာကြလိမ့်မယ်။ နင်က သူတို့ကိုကူညီဖို့ နင့်အသက်စွမ်းအားကို အမြဲတမ်း ကုန်ဆုံးခံနေတော့မှာလား။"
ဟန်ရှောင်း ချက်ချင်း မကျေမနပ်ဖြစ်သွားသည်။ ဒီမိန်းကလေးက သူ့ကို ဆူပူကြိမ်းမောင်းနေတယ်လို့ ဘာလို့ ခံစားနေရတာလဲ။
ဟန်ရှောင်းသည် ဖီးလစ်ကို ချက်ချင်း စောင့်ကြည့်ရေးမှတ်တမ်းအား ကြည့်ခိုင်းပြီး ခိုလှုံရေးစခန်း အပြင်ဘက်တွင် ယခင်က ဖြစ်ပွားခဲ့သော ရုန်းရင်းဆန်ခတ်မှုအကြောင်း သူ့အား အကျဉ်းချုံး ရှင်းပြစေသည်။ ခိုလှုံရေးစခန်း၏ နေ့စဥ်လုပ်ဆောင်မှုများကို ဘန်းနက်က ထိန်းချုပ်ထားပြီး ဟန်ရှောင်းသည် ထိုသို့သော ကိစ္စငယ်များတွင် ဝင်ရောက်စွက်ဖက်ရန် စိတ်မဝင်စားပေ။ သူသိချင်သည်မှာ ညီအစ်မနှစ်ယောက်၏ ပဋိပက္ခနောက်ကွယ်မှ အကြောင်းရင်းကိုသာ ဖြစ်သည်။
အတိတ်တွင် ညီအစ်မနှစ်ယောက်လုံးသည် ခက်ခဲသော အခြေအနေများတွင် နေထိုင်ခဲ့ရပြီး အချင်းချင်းသာ အားကိုးခဲ့ရသည်။ ယခုအခါ ၎င်းတို့သည် ငြိမ်းချမ်းစွာ နေထိုင်ခဲ့ကြပြီး နေ့တိုင်း တစ်ယောက်ကိုတစ်ယောက် တွေ့မြင်နေရသည်မှာ နှစ်အနည်းငယ် ကြာမြင့်လာသောအခါ၊ ၎င်းတို့သည် မွေးချင်းအရင်းများ ဖြစ်နေလျှင်ပင် ၎င်းတို့၏ စရိုက်များသည် လုံးဝ သဟဇာတမဖြစ်နိုင်တော့ပေ။ ထို့ကြောင့် ပဋိပက္ခသည် ရှောင်လွှဲ၍မရပေ။
"အစ်မ၊ ဘာလို့ အစ်မက အမြဲတမ်း ကိစ္စတွေကို ပိုကြီးအောင် လုပ်နေရတာလဲ။ ကျွန်မ မကူညီချင်တဲ့အခါ သဘာဝအတိုင်း ငြင်းလိုက်မှာပေါ့၊" အော်ရိုရာက ပြောသည်။ "ပြီးတော့၊ ဦးလေး ဘလက်စတားက ကျွန်မတို့ကို အများကြီး ကူညီခဲ့တယ်၊ ကျွန်မ သူ့ကို ကျေးဇူးဆပ်ချင်တယ်..."
"မရဘူးဆို မရဘူးပဲ!" ထို့နောက် ဟီလာသည် ဟန်ရှောင်းကို စိုက်ကြည့်ကာ မာန်ဖီလိုက်သည်။ "နင်က ငါတို့ရဲ့ ကျေးဇူးရှင်ပါ၊ ဒီအကြွေးကို ငါတို့ သေချာပေါက် ပြန်ဆပ်မှာပါ။ ဒါပေမဲ့ နင် ငါ့ညီမကို ထိမယ်လို့ မကြံနဲ့။"
ဟန်ရှောင်း ဆွံ့အသွားသည်။ သူမ၏ ဤစကားများက သူ့တွင် မသမာသော ရည်ရွယ်ချက်အချို့ ရှိနေသလိုလို… သူမသည် တကယ်ကို ကာကွယ်လွန်းနေသည်။
ရန်ဖြစ်နေသော ညီအစ်မနှစ်ယောက်ကို ကြည့်ရင်း ဟားလပ်စ်သည် ဟန်ရှောင်းကို ကြည့်ကာ မျှော်လင့်ချက်မဲ့စွာ ပြောလိုက်သည်။ "မင်းပြောတာ မှန်တယ်။ တကယ် မျှော်လင့်ချက်မရှိဘူးပဲ။"
"သွားရအောင်။"
သူတို့နှစ်ယောက် ထွက်သွားခါနီးတွင် အော်ရိုရာက ရုတ်တရက် အသံမြှင့်ကာ လေးနက်သော လေသံဖြင့် "အစ်မ၊ အစ်မ ကျွန်မကို အမြဲတမ်း အကာအကွယ်ပေးနိုင်မှာ မဟုတ်ဘူး၊ ကျွန်မလည်း အမြဲတမ်း အကာအကွယ်ပေးခံနေရတဲ့ ကလေးလေးတစ်ယောက် မဖြစ်နိုင်ဘူး။ အစ်မ ကျွန်မအတွက် ဆုံးဖြတ်ချက်တွေ မချပေးဖို့ ကျွန်မ ရိုးရိုးသားသား တောင်းဆိုပါတယ်။"
"မရဘူး၊ နင့်အတွေးတွေက ကလေးဆန်လွန်းတယ်၊ ပြီးတော့ နင့်ကိုယ်နင် ဘယ်လိုကာကွယ်ရမလဲဆိုတာ လုံးဝမသိဘူး။" ဟီလာက အလျှော့မပေးပေ။
"အစ်မက ဘာလို့ ကျွန်မကို အမြဲတမ်း ပြောင်းလဲချင်နေရတာလဲ။" အော်ရိုရာသည် ပထမဆုံးအကြိမ်အဖြစ် ဒေါသထွက်လာပြီး သူမ၏မျက်လုံးများတွင် ရွှေရောင်အလင်းတန်းတစ်ခု လက်သွားသည်။ "ကျွန်မ အထင်အမြင်သေးဆုံး လူစားမျိုးက အကူအညီလည်း မလိုဘဲ တခြားသူတွေကို ကူညီလိုစိတ်ရှိသူတွေကို လှောင်ပြောင်တဲ့သူတွေပဲ။ မျှော်လင့်ချက်မဲ့တာကို ဖြတ်သန်းခဲ့ဖူးသူတစ်ယောက်ကပဲ မျှော်လင့်ချက်မဲ့နေချိန်တွေမှာ အကူအညီကို ဘယ်လောက်တောင် မျှော်လင့်နေလဲဆိုတာ နားလည်နိုင်မှာ။ ကျွန်မ ဒီခံစားချက်ကို ကောင်းကောင်းသိတယ်။ ကျွန်မ အကူအညီ အလိုအပ်ဆုံးညတွေမှာ တစ်ယောက်ယောက်က ကျွန်မကို ကယ်တင်ဖို့ အကြိမ်ကြိမ် ဆုတောင်းခဲ့ဖူးတယ်၊ ဒါပေမဲ့ ဘယ်သူကမှ ကျွန်မဆီ လက်ကမ်းမပေးဘူး၊ ဆေးထိုးအပ်က ကျွန်မရဲ့ သွေးကြောထဲကို အခါခါ ထိုးဝင်လာတယ်။ အဲ့လို မျှော်လင့်ချက်မဲ့ခြင်းမျိုးကို အစ်မ နားလည်ရဲ့လား။"
ဟီလာ၏ မျက်နှာသည် အပြစ်ရှိသလို ခံစားမှုများဖြင့် ပြည့်နှက်နေသည်။ အော်ရိုရာ ဂျာမီနယ်အဖွဲ့အစည်း၏ ဖမ်းဆီးခြင်းကို ခံရပြီး ဒုက္ခများစွာ တွေ့ကြုံခဲ့ရခြင်းမှာ သူမ၏ ပေါ့ဆမှုကြောင့် ဖြစ်သည်။ သို့သော်လည်း သူမသည် အကူအညီများစွာ မပေးနိုင်ခဲ့ဘဲ ဟန်ရှောင်း၏ မမျှော်လင့်ထားသော အကူအညီကြောင့်သာ ညီမဖြစ်သူကို ကယ်တင်နိုင်ခဲ့သည်။ ဟီလာသည် မိမိကိုယ်ကို အသုံးမကျသော အစ်မတစ်ယောက်အဖြစ် အမြဲခံစားခဲ့ရသည်။
အတိတ်တွင် အော်ရိုရာသည် သူမရှေ့တွင် ခံစားခဲ့ရသော နာကျင်မှုများအကြောင်း ဘယ်သောအခါမှ မပြောခဲ့ပေ၊ ဤသည်မှာ အော်ရိုရာက သူမကို အပြစ်တင်သည့် ပထမဆုံးအကြိမ်ဖြစ်သည်။ ဟီလာသည် လုံးဝ အငိုက်မိသွားပြီး မည်သို့ တုံ့ပြန်ရမည်ကို မသိတော့ပေ။
"အစ်မက စိတ်ဓာတ်ပြင်းပြတဲ့ စရိုက်ရှိတာ ကျွန်မသိပါတယ်၊ အစ်မ ဖိအားမများစေဖို့ ကျွန်မ အစ်မနဲ့တွေ့တိုင်း အရမ်းကို အကောင်းမြင်သလို ဟန်ဆောင်ခဲ့တယ်" အော်ရိုရာက ပြောသည်။ "ဒါပေမဲ့ ကျွန်မ ဘယ်လောက်တောင် ပျော်နိုင်ခဲ့မယ်လို့ အစ်မ ထင်နေလဲ။
"ကျွန်မ ရှင်းပြလို့မရတဲ့ နာကျင်မှုတွေကို ခံစားခဲ့ရတယ်၊ လူသားတွေ ဘယ်လောက်တောင် ရက်စက်ပြီး ကြမ်းကြုတ်နိုင်လဲဆိုတာ ကျွန်မသိတယ်။ ဘယ်သူမှ ကူညီမယ့်သူမရှိဘဲ မျှော်လင့်ချက်မဲ့တဲ့ အခြေအနေမှာ ရောက်နေရတဲ့ စိတ်ပျက်အားငယ်မှုကို ကျွန်မသိတယ်။ ကျွန်မ လုပ်နိုင်တာ တစ်ခုတည်းက အမှောင်ထုကို လက်မခံဘဲ တိုက်ထုတ်ဖို့ပဲ။ ကျွန်မရဲ့ စရိုက်ကို နာကျင်မှုတွေက ဖျက်စီးပြီး အမုန်းတရားတွေနဲ့ ပြည့်နှက်သွားအောင် လုပ်တာကို ကျွန်မ လက်မခံဘူး။ ကျွန်မကို ယုံပါ၊ ဒါက ကျွန်မ ဖြတ်သန်းခဲ့ရတဲ့ ရုပ်ပိုင်းဆိုင်ရာ နာကျင်မှုကို ခံနိုင်ရည်ရှိအောင် ကြိုးစားရတာထက် အများကြီး ပိုခက်ခဲတယ်။
"ဟန်ရှောင်းက ကျွန်မ မျှော်လင့်ချက်မဲ့နေတဲ့ အချိန်တွေမှာ ကူညီခဲ့တယ်၊ ဒါကြောင့် ကျွန်မ တခြားသူတွေကို ကူညီဖို့ ဆန္ဒရှိတာ။"
ထို့နောက် သူမသည် ဟီလာ၏ မျက်လုံးများကို စိုက်ကြည့်ကာ ညင်သာစွာ ပြောလိုက်သည်။ "ကျွန်မတို့ အတိတ်မှာ အမြဲတမ်း နေထိုင်လို့မရဘူး၊ ကျွန်မတို့အားလုံး ကြီးပြင်းလာရမယ်။ အစ်မ၊ ကျွန်မ အစ်မကို ချစ်ပါတယ်၊ ဒါပေမဲ့ ကျွန်မ အစ်မရဲ့ အရုပ်လေး ဖြစ်မနေနိုင်ဘူး။ ကျွန်မမှာ ကိုယ်ပိုင် အတွေးအခေါ်တွေရှိပြီး ကျွန်မ ဖြစ်ချင်တဲ့ ပုံစံမျိုး ဖြစ်လာချင်တယ်။"
ဟီလာ ပါးစပ်ဟလိုက်သော်လည်း ဘာပြောရမှန်း မသိဖြစ်နေသည်။
ဟန်ရှောင်း မျက်ခုံးပင့်လိုက်ပြီး အနည်းငယ် အံ့အားသင့်သွားသည်။ ညီအစ်မနှစ်ယောက် တကယ်တမ်း ရန်ဖြစ်ကြလိမ့်မည်ဟု သူမမျှော်လင့်ထားပေ။ သူမရှိသည့် လွန်ခဲ့သော နှစ်အနည်းငယ်အတွင်း ညီအစ်မနှစ်ယောက်ကြားတွင် မကျေနပ်မှုများစွာ စုပုံနေခဲ့ပုံရသည်။
သူတို့ အတူတကွ အရာများစွာကို ဖြတ်သန်းခဲ့ကြလျှင်ပင်၊ သူတို့ အမြဲတမ်း ဤမျှ ချစ်ခင်နေရန် မဖြစ်နိုင်ပေ။ ရန်သူများ မရှိသည့်အခါ၊ ၎င်းတို့၏ မကိုက်ညီသော စရိုက်များကြောင့် အငြင်းအခုံ ဖြစ်ကြမည်မှာ သေချာသည်။ ဤသည်မှာ ဟန်ရှောင်း သူ၏ ယခင်ဘဝက အိမ်နီးချင်း စုံတွဲထံမှ တွေ့ရှိခဲ့ရသည့် အရာဖြစ်သည်။
သို့သော်လည်း အငြင်းအခုံ ဖြစ်ခြင်းသည် မကောင်းသည့်အရာတော့ မဟုတ်ပေ။ အနည်းဆုံးတော့ ညီအစ်မနှစ်ယောက်ကို တစ်ယောက်အကြောင်း တစ်ယောက် ပိုသိလာစေနိုင်သည်။
ဟန်ရှောင်း ခေါင်းခါလိုက်သည်။ မိန်းမတွေများ...
လူတိုင်း တိတ်ဆိတ်သွားပြီး အော်ရိုရာက ရှက်ရွံ့စွာဖြင့် ခေါင်းကို ပွတ်လိုက်သည်။ သူမ အလွန်ကြိုးစား တည်ဆောက်ခဲ့သော လေထုသည် ချက်ချင်း ပြိုလဲသွားသည်။ ထို့နောက် သူမက ဂရုတစိုက် မေးလိုက်သည်။ "အစ်မ၊ ကျွန်မ သူ့ကို ကုသပေးတော့မယ်နော်၊ ဟုတ်ပြီလား။"
"နင် ဒီလောက် အများကြီး ပြောပြီးနေပြီပဲ၊ ငါ ဘာပြောနိုင်ဦးမှာလဲ။ နင့်မှာ ဒီအစ်မ မရှိတော့ဘူးလို့ပဲ သဘောထားလိုက်တော့။ သွား သွား၊" ဟီလာက ပြန်ဖြေသည်။
အော်ရိုရာ ပြုံးရွှင်သွားပြီး ဟီလာကို ပွေ့ဖက်လိုက်သည်။
ထိုမြင်ကွင်းကို မြင်သောအခါ ဟန်ရှောင်းသည် သူတို့ကို သူ၏ စက်ယန္တရား ပြုပြင်မွမ်းမံသည့် အခန်းသို့ ခေါ်သွားသည်။ ဟားလပ်စ်၏ ယန္တရားလက်ကို ဖြုတ်လိုက်ပြီးနောက် အော်ရိုရာသည် သူမ၏ လက်ဖဝါးကို ဟားလပ်စ်၏ လက်မောင်းပြတ်နေရာသို့ ညွှန်လိုက်သည်။ ထူထပ်သော ရွှေရောင်အလင်းတန်းတစ်ခု သူမ၏ လက်ဖဝါးများမှ ထွက်ပေါ်လာပြီး ဟားလပ်စ်၏ ခန္ဓာကိုယ်ထဲသို့ ဝင်ရောက်သွားသည်။ ထို့နောက် ပြတ်တောက်နေသော ခြေလက်အင်္ဂါသည် အပင်ပေါက်လေးတစ်ခုကဲ့သို့ ပြန်လည် ကြီးထွားလာသည်။
လွန်ခဲ့သည့် နှစ်အနည်းငယ်အတွင်း အော်ရိုရာသည် သူမ၏ စွမ်းရည်များကို စတင် တိုးတက်လာပြီး အခြားသူများကို ကယ်တင်ရန် သူမ၏သွေးကို အသုံးပြုရန် မလိုအပ်တော့ပေ။ ယင်းအစား သူမ ခန္ဓာကိုယ်အတွင်းမှ အသက်စွမ်းအားကို ထုတ်လွှတ်နိုင်ခဲ့သည်။
ဘေးတွင် ဟန်ရှောင်းနှင့် ဟီလာတို့ အတူတူရပ်ကာ ထိုမြင်ကွင်းကို ကြည့်နေကြသည်။
ရုတ်တရက် ဟီလာက ရှုပ်ထွေးသော လေသံဖြင့် "ရှင် ကျွန်မ မှားတယ်လို့ ထင်လား။"
"ဟင်"
ဟန်ရှောင်း လှည့်ကြည့်လိုက်သောအခါ သူမ နှုတ်ခမ်းကိုကိုက်ကာ မျက်မှောင်ကြုတ်ထားသည်ကို တွေ့လိုက်ရသည်။ သူမသည် ခုလေးတင် ဖြစ်ပျက်ခဲ့သည့်အရာအတွက် စိတ်ပျက်နေတုန်းမှန်း ထင်ရှားသည်။
"အမှန်အမှားဆိုတာ မရှိပါဘူး၊ လူတိုင်းက မတူညီကြဘူးလေ။ ဒါပေမဲ့ မင်းကို ငါ့အမြင် ပြောရမယ်ဆိုရင်တော့ မင်းပြောတာက ပိုပြီး အကျိုးအကြောင်း ဆီလျော်တယ်လို့ ထင်တယ်။ ဒီကမ္ဘာကြီးက အရမ်း အန္တရာယ်များတယ်၊ ရန်သူတွေက နေရာတိုင်းမှာ ရှိနေတယ်။ လုပ်သင့်လုပ်ထိုက်ဆုံး အရာကတော့ ကိုယ့်ရဲ့ လုံခြုံရေးကို ပထမဦးစားပေးအဖြစ် ထားဖို့ပဲ။"
"ရှင်က တကယ်တမ်း ကျွန်မနဲ့ သဘောတူတယ်ပေါ့..." ဟီလာ၏ မျက်နှာတွင် ထူးဆန်းသော အမူအရာတစ်ခု ပေါ်လာသည်။ ဂြိုလ် အန္တရာယ်ကျရောက်နေချိန်တွင် ဟန်ရှောင်းသည် ဂလက်ဆီမှ ပြန်လာခဲ့သည်။ သူ၏ 'ကိုယ်ကျိုးမဖက်သော' စရိုက်လက္ခဏာဖြင့် ဟန်ရှောင်းသည် အော်ရိုရာကို ထောက်ခံလိမ့်မည်ဟု သူမ ထင်မှတ်ထားခဲ့သည်။
ထို့နောက် ဟန်ရှောင်းက ပခုံးတွန့်ကာ "ဒါပေမဲ့ မင်းက ငါ့ကို တကယ် ရွေးချယ်ခိုင်းမယ်ဆိုရင်တော့ ငါက ကြင်နာတတ်တဲ့သူနဲ့ မိတ်ဆွေဖြစ်ဖို့ ပိုဆန္ဒရှိမှာပဲ။"
အော်ရိုရာ၏ တောင်းဆိုမှုသာ မရှိခဲ့ပါက၊ သူ၏ တောင်းဆိုချက်ကို ဟီလာက ငြင်းပယ်လိုက်ပြီး ဖြစ်လိမ့်မည်။ သူ့အတွက်မူ သူက ပိုပြီး နာခံတတ်သူများကို သဘောကျသည်။
ညီအစ်မနှစ်ယောက်လုံး အလားအလာ အပြည့်ရှိကြသည်။ အဆင့် အက်စ် အက်စ်ပါစွမ်းရည်သည် အလွန်ရှားပါးပြီး အကယ်၍ ဟီလာသည် သူမ၏ ယခင်ဘဝက အမြင့်ဆုံးအဆင့်သို့ ကြီးထွားလာနိုင်ပါက 'ဟားလပ်စ်' တစ်ဒါဇင်ကို လက်ညှိုးတစ်ချောင်းတည်းဖြင့် ချေမှုန်းနိုင်လိမ့်မည်။ ထို့အပြင် အော်ရိုရာ၏ စွမ်းရည်များသည်လည်း အလွန်အသုံးဝင်ပြီး သူမသည် လမ်းလျှောက်နေသော သွေးပုလင်းတစ်လုံးနှင့် တူနေသည်။
သူတို့၏ ဆန့်ကျင်ဘက် စရိုက်လက္ခဏာများအတွက်မူ ဟန်ရှောင်းက လုံးဝ ဂရုမစိုက်ပေ။ ၎င်းတို့သည် သူ့အတွက် အသုံးဝင်သော အရည်အချင်းများ ဖြစ်နေသမျှ ကာလပတ်လုံး၊ ထိုအရာအားလုံးသည် သေးငယ်သော အသေးစိတ်အချက်များထက် မပိုပေ။ အေးမီစ်သည် အလွန်ပျော်ပါးတတ်သော်လည်း သူမကို ဝေဖန်ရဲသူ များများစားစား မရှိသကဲ့သို့ပင်၊ အစွမ်းသတ္တိသည် အရေးကြီးဆုံးဖြစ်သည်။
…
မကြာမီ ဟားလပ်စ်၏ လက်မောင်း ပြန်ပေါက်လာသည်။ ၎င်းကို အနည်းငယ် စမ်းသပ် ဝှေ့ယမ်းကြည့်ရင်း သူက စိတ်လှုပ်ရှားစွာ အော်လိုက်သည်။ "ဟားဟား။ ငါ့လက်မောင်း ပြန်ရပြီ!"
အော်ရိုရာသည် မျက်နှာမှ ချွေးများကို သုတ်လိုက်ပြီး ပျော်ရွှင်စွာဖြင့် "ကျွန်မ ရှင့်ကို ကူညီနိုင်ခဲ့လို့ ဝမ်းသာပါတယ်။"
အော်ရိုရာ၏ ခေါင်းကို ပွတ်သပ်ရင်း ဟန်ရှောင်းသည် သူမအား ချီးကျူးစကားများ ဆက်တိုက်ပြောကြားပြီးနောက် ဟားလပ်စ်နှင့်အတူ ထွက်ခွာသွားသည်။ ဟားလပ်စ်သည် သူ၏ လက်မောင်းအသစ်အတွက် အလွန် ကျေနပ်နေပြီး ပျော်ရွှင်စွာ ခုန်ပေါက် ထွက်သွားသည်။
သူ့အခန်းသို့ ပြန်ရောက်သောအခါ ဟန်ရှောင်းသည် ဟားလပ်စ်ကို လွှတ်လိုက်ပြီး သူ၏ ဂလက်ဆီ ဆက်သွယ်ရေးစက်ကို ထုတ်ကာ ဂါတွန် ကြယ်စနစ်၏ ဒေသဆိုင်ရာ ချန်နယ်ကို ဖွင့်လိုက်သည်။
ကစားသမားများကို ငှားရမ်းမည့် အစီအစဉ်သည် လမ်းကြောင်းပေါ် ရောက်နေပြီဖြစ်ပြီး နောက် စွမ်းအင်အဆင့်သို့ ရောက်ရှိရန် ကျွမ်းကျင်မှုများကိုလည်း ရရှိပြီးဖြစ်သည်။ ယခု ဂိုဒိုရာ၏ ကယ်ဆယ်ရေးအဖွဲ့ ဘယ်အချိန် ရောက်လာမည်ကို ကြည့်ရှုရမည့် အချိန်ဖြစ်သည်။
ဗားရှင်း ၂.၀ စတင်ခဲ့သည်မှာ လဝက်ရှိပြီဖြစ်ပြီး ဂိုဒိုရာ ရောက်ရှိလာရန် အချိန်တန်ပြီဖြစ်သည်။
ဂါတွန် ကြယ်စနစ်သည် ဂိုဒိုရာ၏ အုပ်ချုပ်ရေးဒေသ၏ တစ်စိတ်တစ်ပိုင်းဖြစ်ပြီး ဂြိုလ်များစွာ တစ်ချိန်တည်းတွင် ကပ်ဘေးသင့်နေခြင်းမှာ တကယ်ကို တိုက်ဆိုင်လွန်းနေသည်။ ဂိုဒိုရာသည် သဘာဝအတိုင်း သံသယဝင်လာမည်ဖြစ်ပြီး ၎င်းတို့ ပထမဆုံး တွေးမိမည့်သူမှာ ၎င်းတို့၏ ကမ္ဘာမကြေရန်သူဖြစ်သည့် အမှောင်ကြယ် ဖြစ်သည်။ ၎င်းသည် ထောင်ချောက်တစ်ခု ဖြစ်နိုင်သည်ဟု ခံစားရသောကြောင့် ဂိုဒိုရာသည် မဆင်မခြင် မလှုပ်ရှားဘဲ အခြေအနေကို ဦးစွာ စုံစမ်းစစ်ဆေးနေသည်။
လွန်ခဲ့သော နာရီအနည်းငယ်က ဟန်ရှောင်း၏ ဆက်သွယ်ရေးစက်သည် ဤကိစ္စနှင့် ပတ်သက်၍ ဒေသဆိုင်ရာ သတင်းစကားတစ်ခုကို လက်ခံရရှိခဲ့သည်။
ဂလက်ဆီ မီဒီယာ အများအပြားသည် ဂိုဒိုရာရှိ အခြေအနေကို သတိပြုမိပြီး ၎င်းအကြောင်း ဆောင်းပါးများ စတင် ရေးသားခဲ့ကြသည်။ ထို့ကြောင့် ဤကပ်ဘေးသည် လူအများ၏ အာရုံစိုက်မှုကို ဆွဲဆောင်ခဲ့ပြီး ဂိုဒိုရန် မီဒီယာများက ဤကိစ္စတွင် အစိတ်ဝင်စားဆုံး ဖြစ်သည်။ ပြောရလျှင် ဒီအဖြစ်အပျက်က ဂိုဒိုရာဒေသအတွင်းမှာ ဖြစ်ပွားနေတာဖြစ်သည်။
အစီရင်ခံစာများ ဆက်တိုက် ထွက်ပေါ်လာပြီးနောက်၊ ဂိုဒိုရန်လူမျိုးများ ပိုများလာသည်နှင့်အမျှ ၎င်းတို့၏ မဟာမိတ် လူမှုအဖွဲ့အစည်းများ ရင်ဆိုင်နေရသော ကပ်ဘေးအကြောင်းကို သိရှိလာကြပြီး ၎င်းတို့၏ ကိုယ်ပိုင် လူမှုအဖွဲ့အစည်းက ကယ်ဆယ်ရေးတပ်ဖွဲ့များ မစေလွှတ်ခဲ့ကြောင်း သိရှိသွားကြသည်။ နိုင်ငံသားများ၏ အသံများသည် ၎င်းတို့၏ လူမှုအဖွဲ့အစည်းကို အကူအညီပေးပို့ရန် တွန်းအားပေးရန် ချက်ချင်း ထွက်ပေါ်လာသည်။
ဂါတွန် ကြယ်စနစ်၏ ဒေသန္တရ သတင်းများကို ကြည့်ရှုပြီးနောက် ဟန်ရှောင်းသည် မျက်ခုံးပင့်ကာ ကောက်ချက်တစ်ခု ချလိုက်သည်။
"အမှောင်ကြယ်က သူတို့ရဲ့ အစီအစဉ်တွေကို စနေပြီ..."
ဤအချိန်တွင် ဂိုဒိုရာသည် ကိစ္စရပ်တွင် ဝင်ရောက်စွက်ဖက်ခြင်း မရှိသေးဘဲ ကပ်ဘေးသတင်းကို အမှောင်ကြယ်က တိတ်တဆိတ် ထုတ်လွှင့်မည်မှာ သေချာသည်။ ကြိုးကိုင်ခြယ်လှယ်မှုများနှင့် လှုံ့ဆော်မှုအချို့အားဖြင့် ဤအဖြစ်အပျက်တစ်ခုလုံး ပေါက်ကွဲထွက်သွားစေပြီး ဂိုဒိုရာအား လူတိုင်း၏ အာရုံစိုက်မှုဗဟိုချက် ဖြစ်လာစေသည်။
ဟန်ရှောင်းမှလွဲ၍ ကြယ်စနစ်တစ်ခုလုံးက ၎င်းကို ရုတ်တရက် မသိရသေးသော ကပ်ဘေးတစ်ခုဟု ထင်မြင်ခဲ့ကြသော်လည်း ၎င်းသည် အမှောင်ကြယ်၏ အစီအစဉ်များ၏ တစ်စိတ်တစ်ပိုင်းဖြစ်သည်ကို မည်သူမျှ မသိခဲ့ကြပေ။
"ငါ့ခန့်မှန်းချက် မမှားဘူးဆိုရင် အမှောင်ကြယ်ရဲ့ တပ်ဖွဲ့တွေက ရေပင်လယ်ဂြိုလ်ပေါ်မှာ ပုန်းအောင်းနေလောက်ပြီ။"
ဟန်ရှောင်း၏ မျက်လုံးများက အရောင်တောက်လာပြီး သူ့ဘာသာသူ တွေးတောနေလိုက်သည်။
စာစဉ် (၃၅)၊ အခန်း (၅၂၅) ပြီး၏။
လင်းဆက်
+++++
အခန်း (၅၂၆) : ဂိုဒိုရန် ကယ်ဆယ်ရေးအဖွဲ့
ရေပင်လယ်ဂြိုလ်၏ တစ်နေရာတွင် နျူကလီးယား ဓါတ်ရောင်ခြည် အလွန်များပြားစွာ စုစည်းနေသော မြေနေရာတစ်ခု ရှိသည်။ ပတ်ဝန်းကျင်သည် အထီးကျန်ဆန်ပြီး ယိုယွင်းပျက်စီးမှုများဖြင့် ပြည့်နှက်နေကာ ထူထဲသော မီးခိုးမြူများနှင့် ဖုန်မှုန့်များက နေရာတစ်ခုလုံးကို လွှမ်းခြုံထားသည်။ အပြာရောင်ကောင်းကင်ကို အလင်းမှုန်များက ဖုံးလွှမ်းထားပြီး ထူထဲသော အဖြူရောင်ပြာမှုန်များက မြေပြင်ကို ဖုံးအုပ်ထားသည်။ မျက်စိတစ်ဆုံး ကြည့်နိုင်သလောက် စိမ်းလန်းသော အကွက်တစ်ခုမျှ မရှိဘဲ၊ ထိုနေရာသည် သက်ရှိ လုံးဝ ကင်းမဲ့နေပုံရသည်။
ဤအချိန်တွင်၊ သေးသွယ်သော လွန်းပျံယာဉ်ပုံစံ အာကာသယာဉ် ဆယ်စီးကျော်သည် ထိုဧရိယာတွင် တိတ်ဆိတ်စွာ ရပ်နားထားသည်။ သွေးနှော ဂိုဒိုရန် တစ်စုသည် ထူးဆန်းသောပုံသဏ္ဍာန်ရှိ စက်ယန္တရားများကို ပြုပြင်ထိန်းသိမ်းနေကြသည်။
ဤအဖွဲ့သည် အမှောင်ကြယ်မှ သာမန် ရှေ့ပြေးတပ်ဖွဲ့တစ်ခုဖြစ်ပြီး ခေါင်းဆောင်တစ်ယောက်သာ အဆင့် ဘီ သို့ ရောက်ရှိထားသည်။ သူတို့၏ အဓိက ရည်ရွယ်ချက်မှာ မည်သည့်တိုက်ခိုက်မှုမှမရှိဘဲ တိတ်တဆိတ် ဝင်ရောက်ပြီး ပုန်းအောင်းနေရန် ဖြစ်သည်။ ၎င်းတို့၏ အာကာသယာဉ်များပင်လျှင် လျှို့ဝှက်မုဒ်တွင် ထားရှိပြီး ထောက်လှမ်းရေး ကိရိယာ အမျိုးမျိုးမှ ကာကွယ်ထားသည်။ ဟန်ရှောင်း၏ ယာဉ်တန်းသည် ဂြိုလ်တစ်ခုလုံးကို တစ်ကြိမ် စကင်ဖတ်ခဲ့ပြီးဖြစ်သော်လည်း ၎င်းတို့သည် ဤတပ်ဖွဲ့ငယ်လေးကို ရှာဖွေတွေ့ရှိနိုင်ခြင်း မရှိခဲ့ပေ။ အမှောင်ကြယ်သည် သူတို့၏ အရင်းအမြစ်အများစုကို လျှို့ဝှက်မှုနှင့် ခြေရာခံဆန့်ကျင်ရေး နည်းပညာများတွင် ရင်းနှီးမြှုပ်နှံထားသည်၊ မဟုတ်ပါက သူတို့သည် လွန်ခဲ့သော အချိန်များကတည်းက သုတ်သင်ခံခဲ့ရပြီးလောက်ပြီ ဖြစ်သည်။
အမှောင်ကြယ်သည် မျိုးဗီဇပြောင်းလဲမှုရင်းမြစ်ရှိသော ဂြိုလ်တိုင်းတွင် တိတ်တဆိတ်ဝင်ရောက်နေသော အဖွဲ့တစ်ဖွဲ့ကို ထားရှိခဲ့သည်။ သူတို့၏ တာဝန်မှာ မျိုးဗီဇပြောင်းလဲမှုရင်းမြစ်၏ ပင်မခန္ဓာကိုယ်၏ ကြီးထွားမှုအဆင့်ကို စောင့်ကြည့်လေ့လာရန်၊ အထူးစက်ယန္တရားများကို အသုံးပြုI ကြီးထွားမှုကို ဆုံးဖြတ်ရန်နှင့် ဘေးအန္တရာယ်ကို အနီးကပ် စောင့်ကြည့်ရန် ဖြစ်သည်။ ဤစက်ယန္တရားအစုသည် မျိုးဗီဇပြောင်းလဲမှုရင်းမြစ်ကို ရောင်းချသူထံမှ လက်ဆောင်ဖြစ်ပြီး၊ အမှန်တကယ် စိတ်ထားကောင်းသော ကြယ်တာရာ လက်နက်ကုန်သည်တစ်ဦးပင်။
သို့သော် ရှေ့ပြေးတပ်ဖွဲ့သည် မျိုးဗီဇပြောင်းလဲမှုရင်းမြစ်၏ တည်နေရာကို မသိရှိကြဘဲ ၎င်းတို့ ရှာဖွေရန်လည်း ရည်ရွယ်ချက်မရှိပေ။ ဤသည်မှာ ထိပ်တန်းအရာရှိကြီးများက သူတို့အား ပေးအပ်ခဲ့သော အမိန့်ဖြစ်သည်။
အမှန်တကယ်တွင်၊ လွန်ခဲ့သောတစ်လက အမှောင်ကြယ်မှ ဤရှေ့ပြေးတပ်ဖွဲ့သည် ရေပင်လယ်ဂြိုလ်သို့ အောင်မြင်စွာ တိတ်တဆိတ် ဝင်ရောက်ခဲ့သည်။ သို့သော်လည်း သူတို့သည် မျက်နှာမပြခဲ့ဘဲ၊ အဆင့်မြင့် ပုံရိပ်ယောင်နည်းပညာကို အားကိုး၍ နိုင်ငံ၆နိုင်ငံ၏ ဂြိုလ်တုများနှင့် ချိတ်ဆက်လိုက်သည်။ 'အမြင်မျှဝေခြင်း' မှတဆင့် သူတို့သည် မျိုးဗီဇပြောင်းလဲခြင်း ဘေးအန္တရာယ်နှင့် ဂြိုလ်သို့ကျရောက်လာသော ပျက်စီးဆုံးရှုံးမှုများကို စောင့်ကြည့်နိုင်သည်။ သို့သော်လည်း သူတို့သည် ထိုသို့သော ထောက်လှမ်းရေးသတင်းများကို ဂရုမစိုက်ခဲ့ကြပေ။ ဘလက်စတား ပေါ်လာပြီးမှသာ ရှေ့ပြေးတပ်ဖွဲ့က စတင် အာရုံစိုက်လာပြီး သတင်းကို ဌာနချုပ်သို့ ပေးပို့လိုက်သည်။
အမှောင်ကြယ်၏ ဌာနချုပ်တွင် တာဝန်ကျနေသော ထိပ်တန်းအရာရှိကြီးများသည် အစီအစဉ်၏ တိုးတက်မှုအပေါ် အလွန်အမင်း စိုးရိမ်နေကြသည်၊ ဘလက်စတားကြောင့် ပြီးခဲ့သောတစ်ကြိမ်က သူတို့၏ ဝါရင့်တပ်မှူးတစ်ဦးကို ဆုံးရှုံးခဲ့ရသဖြင့် သူ့ကို ရန်သူအဖြစ် သတ်မှတ်ထားခဲ့သည်မှာ ကြာပြီဖြစ်သည်။ ဤသတင်းသည် သူတို့အား အံ့အားသင့်စေခဲ့သော်လည်း ဆွေးနွေးမှုတစ်ရပ် ပြုလုပ်ပြီးနောက်၊ ဘလက်စတား ရေပင်လယ်ဂြိုလ်သို့ ပြန်လည်ရောက်ရှိလာရခြင်း၏ အကြောင်းရင်းမှာ သူတို့ကြောင့် မဟုတ်ကြောင်း တွေ့ရှိခဲ့ကြသည်။
"ကျွန်တော် စုံစမ်းပြီးပါပြီ၊ ရေပင်လယ်ဂြိုလ်က တကယ်တော့ ဘလက်စတားရဲ့ ဇာတိမြို့ပဲ။ ကျွန်တော်တို့ ဒီဂြိုလ်ကို ရွေးချယ်ခဲ့တာက တိုက်ဆိုင်မှုတစ်ခုသက်သက်ပါပဲ၊ ရေပင်လယ်ဂြိုလ်မှာ ဘလက်စတားနဲ့ ဆက်သွယ်ဖို့ နည်းလမ်းတချို့ ရှိလိမ့်မယ်။ အခု ဘေးအန္တရာယ် ကျရောက်လာတော့ သူတို့က ဘလက်စတားဆီက အကူအညီ တောင်းခံခဲ့ကြပုံရတယ်၊ ဒါကြောင့် ဒီလိုအခြေအနေမျိုး ဖြစ်လာတာ။ ဘလက်စတား ပေါ်လာတာက ကျွန်တော်တို့နဲ့ ဘာမှမဆိုင်ဘူး။"
"တကယ်တော့ ဒါက ဖြစ်နိုင်ခြေအရှိဆုံး ရှင်းပြချက်ပဲ။ ကျွန်တော်တို့ အမှောင်ထဲမှာပဲ နေခဲ့တယ်။ အခုအချိန်အထိ ဒီမျိုးဗီဇပြောင်းလဲခြင်း ဘေးအန္တရာယ်က ကျွန်တော်တို့ရဲ့ အစီအစဉ်ဖြစ်မှန်း ဘယ်သူမှ မသိသင့်ဘူး။"
"ဘေးအန္တရာယ်ကယ်ဆယ်ရေးတပ်ဖွဲ့က ဂိုဒိုရာကနေ ဂြိုလ်တွေကို ရောက်တော့မယ်။ ဘလက်စတား တစ်ယောက်တည်းက နောက်ထပ် အားဖြည့်မှုတစ်ခု သက်သက်ပဲ၊ ပြီးတော့ ရေပင်လယ်ဂြိုလ်က ကျွန်တော်တို့ရဲ့ ဂြိုလ်တွေအများကြီးထဲက တစ်ခုပဲ။ ဒါက ကျွန်တော်တို့ရဲ့ အစီအစဉ်တွေကို သက်ရောက်မှုရှိမှာ မဟုတ်ဘူး။"
သူတို့သည် ဟန်ရှောင်းအပေါ် ရန်လိုသော်လည်း ၎င်းတို့၏ အစီအစဉ်က ပိုအရေးကြီးသည်။ ရန်သူကို သတိမပေးမိစေရန်အတွက် အမှောင်ကြယ်သည် ဟန်ရှောင်းကို တိုက်ခိုက်မည့် အကြံအစည်ကို ငြင်းပယ်ခဲ့သည်။ ထို့အပြင် စုံစမ်းစစ်ဆေးပြီးနောက် သူသည် မဟူရာအလင်း လျှို့ဝှက်ယာဉ်ကို ပိုင်ဆိုင်ထားပြီး သူတို့ ဟန့်တားနိုင်ခြင်းမရှိဘဲ သူပြေးချင်သည့်အချိန်တိုင်း ထွက်ပြေးနိုင်ကြောင်း သိသွားကြသည်။
သူတို့၏ အမြင်တွင် ဟန်ရှောင်း ပေါ်လာခြင်းသည် တိုက်ဆိုင်မှုတစ်ခုဖြစ်ပြီး ခြုံငုံကြည့်လျှင် အခြေအနေကို သက်ရောက်မှု ရှိမည်မဟုတ်ပေ။ သူတို့ စိုးရိမ်ပြီး မိမိတို့ကိုယ်ကို ထုတ်ဖော်ပြသရန် မလိုအပ်ပေ၊ မစ်ရှင်က ပိုအရေးကြီးနေဆဲဖြစ်သည်။
ဗီဇပြောင်းလဲခြင်း ဘေးအန္တရာယ်သည် အမှောင်ကြယ်၏ အစီအစဉ်၏ အဓိကအချက်ဖြစ်ပြီး အရေးကြီးသော အပိုင်းမှာ နောက်ဆက်တွဲ ခြေလှမ်းများတွင် ရှိနေသည်။ သူတို့ လုပ်ဆောင်ရန်လိုသည်မှာ အခွင့်အရေးကို စောင့်ဆိုင်းရန်သာ ဖြစ်သည်။
…
နောက်ရက်များတွင် ဂါတွန် ကြယ်စနစ် အတွင်း ဒေသဆိုင်ရာ ပြဿနာများ ပိုမိုပြင်းထန်လာသည်။ အခြား အဆင့်မြင့် လူမှုအဖွဲ့အစည်းများက ဘေးမှ စောင့်ကြည့်နေပြီး မည်သူမျှ ကူညီရန် ဆန္ဒမရှိကြပေ။ ကံဆိုးသော ဂြိုလ်များအားလုံးသည် ဂိုဒိုရာ၏ အုပ်ချုပ်ရေးဒေသပတ်လည်တွင် တည်ရှိနေသောကြောင့် သံတမန်ရေးရာ စည်းမျဉ်းများအရ ပြဿနာကို ဂိုဒိုရာက ကိုင်တွယ်သင့်သည်။
အခြား အဆင့်မြင့် လူမှုအဖွဲ့အစည်းများသည် ဤကိစ္စတွင် သူတို့ဝင်မစွက်ဖက်ခဲ့သော်လည်း မည်သူကမျှ သူတို့ကို အပြစ်မတင်ခဲ့ပေ။ သို့သော် ဂိုဒိုရာသည် သူတို့၏ အုပ်ချုပ်ရေးဒေသရှိ ဂြိုလ်များကို မကိုင်တွယ်နိုင်ပါက သူတို့၏ နာမည်အတွက် အစွန်းအထင်းတစ်ခု ဖြစ်လာလိမ့်မည်။
ဘေးအန္တရာယ် ကယ်ဆယ်ရေးအဖွဲ့ကို စေလွှတ်မလွတ်ဆိုသည်မှာ ရွေးချယ်နိုင်သော ကိစ္စဖြစ်သော်လည်း ၎င်းသည် ကွဲအက်ကြယ်စင်ကွင်း အတွင်းရှိ လူမှုအဖွဲ့အစည်း၏ အဆင့်အတန်းနှင့် ရပ်တည်ချက်ကို သက်ရောက်မှု ရှိမည်ဖြစ်သည်။ စနစ်အတွင်းရှိ မဟာမိတ်များသည်လည်း ဂိုဒိုရာနှင့် ၎င်းတို့၏ ဆက်ဆံရေးကို ပြန်လည်သုံးသပ်လာကြလိမ့်မည်။ တရားဥပဒေစိုးမိုးရေး အဖွဲ့၏ အဖွဲ့ဝင်တစ်ဦးအနေဖြင့် လိုက်နာရမည့် စည်းမျဉ်းအနည်းငယ် ရှိသည်။ ဂိုဒိုရာသည် ဂါတွန် ကြယ်စနစ်တွင် သူ၏ ကြီးစိုးသောပါတီဖြစ်သော အဆင့်အတန်းကို ခိုင်မာစေရန်အတွက်၊ သူတို့သည် ပြည်သူလူထု ထင်မြင်ယူဆချက်များ၏ ဂယက်ကို ငြိမ်သက်အောင် ဖြေရှင်းရမည်ဖြစ်သည်။ ထို့ကြောင့် သူတို့သည် လက်ပိုက်ကြည့်နေမည်မဟုတ်ဘဲ လူသားချင်းစာနာမှုဆိုင်ရာ အကြောင်းပြချက်များဖြင့် ဘေးအန္တရာယ် ကယ်ဆယ်ရေးတပ်ဖွဲ့များကို စေလွှတ်လိမ့်မည်။
အာကာသယာဉ်များသည် ဂိုဒိုရာရှိ အာကာသစခန်းမှ တစ်စီးပြီးတစ်စီး ထွက်ခွာသွားပြီး ကြယ်ဇုန်တစ်ခုစီရှိ မတူညီသော ဂြိုလ်များဆီသို့ ဦးတည်သွားကြသည်။ နိုင်ငံ၆နိုင်ငံသည် နောက်ဆုံးတွင် ဂိုဒိုရန် အာကာသယာဉ်သည် ရေပင်လယ်ဂြိုလ်ဆီသို့ ဦးတည်နေပြီဖြစ်ကြောင်း သတင်းရရှိခဲ့သည်။
နိုင်ငံ၆နိုင်ငံ၏ အထက်တန်းလွှာများသည် မျက်ရည်ကျလုမတတ် စိတ်ထိခိုက်သွားကြသည်။ တစ်လကျော်ကြာ ဒုက္ခခံစားခဲ့ရပြီးနောက် ဂိုဒိုရာသည် ဤနိုင်ငံများအားလုံး၏ မိခင်ဖြစ်ကြောင်း နောက်ဆုံးတွင် သတိရသွားပြီး လာရောက်လည်ပတ်ရန် ဆန္ဒရှိလာသည်။
ရေပင်လယ်ဂြိုလ်၏ နည်းပညာသည် ဗီဇပြောင်းလဲခြင်း ဘေးအန္တရာယ်၏ အရင်းအမြစ်ကို ရှာဖွေတွေ့ရှိနိုင်စွမ်း မရှိသော်လည်း ဂိုဒိုရန် နည်းပညာက သေချာပေါက် လုပ်နိုင်မည်ဟု ၎င်းတို့က ယုံကြည်ကြသည်။ ဂိုဒိုရာမှ ပံ့ပိုးပေးသော အကူအညီဖြင့် ဘေးအန္တရာယ်ကို မကြာမီ ဖြေရှင်းနိုင်မည်ဖြစ်သည်။
နိုင်ငံ၆နိုင်ငံသည် အကူအညီတောင်းရန် ဟန်ရှောင်းကို အလျော့ပေးခဲ့သော်လည်း နိုင်ငံ၆နိုင်ငံအပေါ် ဂိုဒိုရာ၏ ရှေးယခင်ကတည်းက တည်ရှိခဲ့သော အဆင့်အတန်းသည် ဤမျှ အလွယ်တကူ အားနည်းသွားမည် မဟုတ်ပေ။ ဘလက်စတားသည် မျိုးဗီဇပြောင်းလဲခြင်း ဘေးအန္တရာယ်ကို အနာဂတ်တွင် ဖယ်ရှားပေးမည်ဟု ၎င်းတို့အား ကတိပေးခဲ့သော်လည်း လက်ရှိတွင် သူ၌ ဘေးအန္တရာယ်၏ အရင်းအမြစ်ကို ဖော်ထုတ်ရန် နည်းလမ်းတစ်စုံတစ်ရာ မရှိသေးပေ။ ၎င်းသည် ၎င်းတို့၏ လက်ရှိ အရေးပေါ်လိုအပ်ချက်များကို မဖြေရှင်းနိုင်ပေ။ ထို့ကြောင့် ဗီဇပြောင်းလဲခြင်း ဘေးအန္တရာယ် ပြဿနာနှင့် ပတ်သက်၍ နိုင်ငံ၆နိုင်ငံသည် ဘလက်စတားထက် ဂိုဒိုရာကို ပို၍ ယုံကြည်ကြဆဲဖြစ်သည်။
ဂိုဒိုရန် အာကာသယာဉ် ရောက်ရှိသည့်နေ့တွင် နိုင်ငံ၆နိုင်ငံသည် အကြီးတန်းအရာရှိများ၏ ကိုယ်စားလှယ်အဖွဲ့ကို ဦးဆောင်ကာ ဂိုဒိုရာထံ ကြိုတင်ပေးပို့ထားသော သြဒိနိတ်များဖြစ်သည့် သဘောတူထားသော ဆင်းသက်မည့်နေရာတွင် စောင့်ဆိုင်းနေကြသည်။
"ဒါက ဂိုဒိုရန် လူမှုအဖွဲ့အစည်းက လူအများကြီးနဲ့ ပထမဆုံး လာတာပဲ။ ကျွန်တော်တို့ သူတို့ကို ကြိုဆိုဖို့ အကောင်းဆုံး ယဉ်ကျေးမှုကို ထုတ်ပြရမယ်။"
ဂိုဒိုရာ ယာဉ်တန်းကို မြင်တွေ့နိုင်ခြင်းသည် လူမှုအဖွဲ့အစည်းတစ်ခုလုံးအတွက် ကြီးမားသော ဖြစ်ရပ်တစ်ခုဖြစ်သည်။ လက်ရှိတွင် နိုင်ငံ၆နိုင်ငံသည် ခက်ခဲသော အခြေအနေတွင် ရှိနေလျှင်ပင် သူတို့သည် ဥပဒေနှင့် အာဏာစိုးမိုးရေးကို အတိုင်းအတာတစ်ခုအထိ ပြန်လည် ထိန်းသိမ်းနိုင်ခဲ့သည်။ သူတို့၏ 'ကယ်တင်ရှင်' ကို လှိုက်လှဲစွာ လက်ခံကြိုဆိုနိုင်ရန် နိုင်ငံ၆နိုင်ငံသည် ၎င်းတို့အား အရိုအသေတန် မလုပ်ရဲဘဲ ခမ်းနားသော အခမ်းအနားတစ်ခုကို အမှန်တကယ် ပြင်ဆင်ခဲ့ကြသည်။
သို့သော် နိုင်ငံ၆နိုင်ငံသည် အကျပ်ရိုက်နေသည်။ ဤသည်မှာ သူတို့ ကြယ်စင်စု လူမှုအဖွဲ့အစည်းတစ်ခုနှင့် ပထမဆုံးအကြိမ် တွေ့ဆုံခြင်းဖြစ်သည်။ သူတို့သည် ဂိုဒိုရန်များ၏ ယဉ်ကျေးမှုကို မသိရှိကြဘဲ ဂလက်ဆီရှိ အခြေအနေကိုလည်း မသိကြပေ။ နားလည်မှုလွဲမှားမှုများ ဖြစ်ပေါ်စေမည်ကို စိုးရိမ်နေကြသည်။
ဤနေ့တွင် နိုင်ငံ၆နိုင်ငံ၏ နက္ခတ္တဗေဒစင်တာများသည် ကောင်းကင်ကို အချိန်တိုင်း အာရုံစိုက်ထားကြသည်။ ၎င်းတို့၏ တာဝန်မှာ ဂိုဒိုရန် အာကာသယာဉ်များ၏ ခြေရာများကို ပထမဆုံး ရှာဖွေတွေ့ရှိရန် ဖြစ်သည်။
မွန်းလွဲပိုင်းတွင် နေရောင်ခြည် အပြင်းထန်ဆုံးအချိန်၌ ယာဉ်တန်းတစ်စုသည် ရေပင်လယ်ဂြိုလ်၏ လေထုထဲသို့ ဖြည်းညှင်းစွာ ဝင်ရောက်လာသည်။ ရွှေရောင် အာကာသယာဉ်များသည် တိမ်များကြားမှ ထွက်ပေါ်လာပြီး ရေပင်လယ်ဂြိုလ်အပေါ်သို့ ဖြည်းညှင်းစွာ ပျံသန်းလာသည်။ ဤဂြိုလ်တုပုံရိပ်ကို နိုင်ငံ၆နိုင်ငံထံ ချက်ချင်း ပေးပို့လိုက်သည်။
ခေါင်းဆောင်များသည် စိတ်အားတက်ကြွလာပြီး ဂိုဒိုရန်များကို ဆင်းသက်မည့်နေရာတွင် လက်ခံကြိုဆိုရန် စိတ်စောလျက် ပြင်ဆင်နေကြသည်။
ဤအချိန်တွင် လေ့လာသူများက ရုတ်တရက် အရေးပေါ် သတင်းပို့ချက်တစ်ခု ပေးပို့လာသည်။ "မှားနေပြီ၊ ဂိုဒိုရန်တွေက ရုတ်တရက် လမ်းကြောင်းပြောင်းသွားတယ်။ သူတို့ ကျွန်တော်တို့ဆီ မလာတော့ဘူး။"
"ဘာ!"
ဆင်းသက်မည့်နေရာတွင် တာဝန်ကျနေသော အရာရှိများ ထိတ်လန့်သွားပြီး ဂြိုလ်တုပုံရိပ်များကို အလျင်အမြန် ကြည့်ရှုလိုက်ကြသည်။ ၎င်းတို့ တွေ့လိုက်ရသည်မှာ ဂိုဒိုရန် ယာဉ်တန်းသည် ကြိုတင်သတ်မှတ်ထားသော နေရာသို့ မလာဘဲ ခိုလှုံရေးစခန်းဆီသို့ ဦးတည်သွားနေသည်ကို တွေ့လိုက်ရသည်။
နိုင်ငံ၆နိုင်ငံ၏ ခေါင်းဆောင်များ၏ မျက်လုံးများသည် မယုံကြည်နိုင်မှုဖြင့် ချက်ချင်း ပြူးကျယ်သွားသည်။
လူမှုအဖွဲ့အစည်းများအကြား ဖလှယ်မှုများကို သဘောတရားအရ နိုင်ငံ၆နိုင်ငံက ကိုင်တွယ်သင့်ပြီး ၎င်းတို့သည် အကူအညီတောင်းခံခဲ့သူများ ဖြစ်သည်။ ဂိုဒိုရာသည် အဘယ်ကြောင့် ၎င်းတို့ကို တစ်နေရာတွင် ပစ်ထားပြီး ဘလက်စတားဆီသို့ ပြေးသွားရသနည်း။
သူတို့က ဒီဂြိုလ်ရဲ့ တကယ့် အုပ်စိုးသူတွေလေ
၎င်းတို့သည် ဂိုဒိုရန်များနှင့် ပုဂ္ဂိုလ်ရေးအရ ထိတွေ့ဆက်ဆံလိုပြီး ရေပင်လယ်ဂြိုလ်၏ ကျင့်ဝတ်သိက္ခာကို ပြသလိုခဲ့ကြသည်။ သို့သော်လည်း လက်တွေ့အခြေအနေသည် ၎င်းတို့၏ စိတ်ကူးများနှင့် ကွဲပြားနေသည်။ ၎င်းတို့၏ အပင်ပန်းခံ ပြင်ဆင်ထားသော ကြိုဆိုပွဲ အခမ်းအနားသည် အလဟဿ ဖြစ်သွားပြီး နိုင်ငံ၆နိုင်ငံ၏ အထက်တန်းလွှာများသည် ငိုချင်သော်လည်း မျက်ရည်မထွက်နိုင် ဖြစ်နေကြသည်။ ၎င်းတို့တွင် အတွေးတစ်ခုသာ ရှိသည်။
‘ဂိုဒိုရာအတွက်၊ ရေပင်လယ်ဂြိုလ်ရဲ့ လူမှုအဖွဲ့အစည်း တစ်ခုလုံးက ဘလက်စတား တစ်ယောက်တည်းနဲ့ နှိုင်းယှဉ်၍ မရနိုင်ဘူးလား။’
နိုင်ငံ၆နိုင်ငံ၏ ခေါင်းဆောင်များသည် ၎င်းတို့၏ ခေါင်းထဲသို့ အရှက်ရမှုလှိုင်းလုံးကြီးတစ်ခု တိုးဝင်လာသည်ကိုသာ ခံစားလိုက်ရပြီး ဟန်ရှောင်းနှင့် ၎င်းတို့၏ စကားဝိုင်းမှ အကြောင်းအရာများကို ပြန်တွေးမိသည်— တန်းတူရည်တူ စကားပြောချင်ရင် အရင်ဆုံး ဂြိုလ်ကနေ ထွက်သွားရမယ်။
…
ရွှေရောင် အာကာသယာဉ်များသည် ခိုလှုံရေးစခန်း အပြင်ဘက်တွင် ပျံဝဲနေပြီး ကစားသမားများသည် အုပ်စုလိုက် ပြေးထွက်လာကာ ဝန်းရံထားကြပြီး အာမေဋိတ်သံများ ပြုကြသည်။
ဘန်းနက်သည် နိုင်ငံ၆နိုင်ငံက ဂိုဒိုရာထံမှ အကူအညီတောင်းခံထားသည်ကို သိသော်လည်း ယာဉ်တန်း ရောက်လာလိမ့်မည်ဟု မမျှော်လင့်ထားပေ။ သူလည်း ကြိုဆိုရန် အလျင်အမြန် ပြေးထွက်လာခဲ့သည်။
ဟွမ်!
အာကာသယာဉ်များအားလုံး၏ အောက်ဘက်ခြမ်း ပွင့်လာပြီး အဝါရောင် ဆွဲငင်အား အလင်းတန်းများကို ပစ်လွှတ်လိုက်သည်။ ဂိုဒိုရန်များ တစ်ယောက်ပြီးတစ်ယောက် ပေါ်လာကြသည်၊ သင်္ဘောများက ဥ ဥချနေသကဲ့သို့ပင်။
ကယ်ဆယ်ရေးတပ်ဖွဲ့သည် မြေပြင်သို့ ဖြည်းညှင်းစွာ ချဉ်းကပ်လာပြီး၊ ဦးဆောင်သူမှာ နာဂါကင် ဖြစ်သည်။
ခိုလှုံရေးစခန်း နံရံများအပြင်ဘက်တွင် ဒုက္ခသည်များကို နေရာချထားရန် လူနေရပ်ကွက်သစ် အများအပြား ရှိသည်။ စစ်သားများနှင့် ဒုက္ခသည်များက ဤမြင်ကွင်းကို မြင်သောအခါ ၎င်းတို့၏ ပါးစပ်များ ကျယ်လောင်စွာ ဟသွားပြီး မျက်နှာများ ထုံကျင်သွားသည်။ ဤသည်မှာ ၎င်းတို့ ဂိုဒိုရန်များကို ပထမဆုံးအကြိမ် မြင်တွေ့ခြင်းဖြစ်ပြီး ၎င်းတို့သည် စူးစမ်းလိုစိတ်နှင့် တုန်လှုပ်ခြောက်ခြားမှု နှစ်မျိုးလုံးဖြင့် မျက်တောင်မခတ်ဘဲ ဂြိုလ်သားများကို စိုက်ကြည့်နေကြသည်။
ဘန်းနက်သည် ဟန်ရှောင်းက ၎င်းတို့ထဲမှ တစ်ဦးကို အတိတ်တွင် ဖမ်းဆီးခဲ့သည်ကို မြင်ဖူးသောကြောင့် သူက တည်ငြိမ်သော ပုံရိပ်ကို ထိန်းသိမ်းကာ လျှောက်လှမ်းသွားသည်။
"လေးစားရပါသော ဂိုဒိုရန် မိတ်ဆွေများ၊ ကျွန်တော်က ဒီခိုလှုံရေးစခန်းကို လောလောဆယ် တာဝန်ယူထားတဲ့ ဘန်းနက်ပါ။ ကျွန်တော်က ရေပင်လယ်ဂြိုလ် ကိုယ်စား ခင်ဗျားတို့အားလုံးကို ကြိုဆိုပြီး ခင်ဗျားတို့ရဲ့ ရက်ရောတဲ့ အကူအညီအတွက် ကျေးဇူးတင်ပါတယ်။ ကျွန်တော်တို့ရဲ့ ဂြိုလ်က ခင်ဗျားတို့ရဲ့ အကူအညီကို အသည်းအသန် လိုအပ်နေပါတယ်။"
နာဂါကင်သည် စကားမပြောဘဲ ခိုလှုံရေးစခန်းအပေါ် ပျံဝဲနေသော အာကာသယာဉ်များဆီသို့ လက်ညှိုးထိုးလိုက်သည်။ ဘာသာပြန်စက်ကို အသုံးပြု၍ သူက တင်းမာသော လေသံဖြင့် "ဒီအပေါ်က အာကာသယာဉ်တွေက ဘာတွေလဲ။"
ရေပင်လယ်ဂြိုလ်သည် ရိုးရှင်းသော ဂြိုလ်တစ်ခုဖြစ်ပြီး ဂိုဒိုရန် တပ်ဖွဲ့များသည် သဘာဝအတိုင်း သာလွန်မှု ခံစားချက် ရှိကြသည်။ ၎င်းတို့သည် ဌာနေတိုင်းရင်းသားများကို ၎င်းတို့၏ မျက်လုံးထဲတွင် ထည့်မထားသော်လည်း ထိုနေရာတွင် ကြယ်တာရာ သင်္ဘောများ ယာဉ်တန်းတစ်စုကို အမှန်တကယ် မြင်တွေ့ရသောအခါ ၎င်းတို့ စူးစမ်းလိုစိတ် မဖြစ်ဘဲ မနေနိုင်ပေ။
ဂိုဒိုရန်များ ခိုလှုံရေးစခန်းသို့ လမ်းကြောင်းပြောင်းရသည့် အကြောင်းရင်းမှာ ဟန်ရှောင်း ရှိနေသည်ကို သိသောကြောင့် မဟုတ်ဘဲ၊ ဟန်ရှောင်း၏ အမိန့်အောက်ရှိ ယာဉ်တန်းကို တွေ့ရှိခဲ့သောကြောင့် ဖြစ်သည်။ ထို့ကြောင့် နာဂါကင်သည် တပ်ဖွဲ့များကို လမ်းကြောင်းပြောင်းရန် အမိန့်ပေးခဲ့ပြီး သဘောတူထားသော သြဒိနိတ်များတွင် မဆင်းသက်ခဲ့ပေ။ ဤသည်မှာ ယာဉ်တန်း ပေါ်ပေါက်လာရခြင်း၏ အကြောင်းရင်းကို စုံစမ်းရန် ဖြစ်သည်။
နာဂါကင်သည် ကပ်ဘေးအဆင့် စူပါတစ်ဦး၏ အစွမ်းသတ္တိကို ပိုင်ဆိုင်ထားပြီး သူ မသိစိတ်ဖြင့် ထုတ်လွှတ်လိုက်သော အရှိန်အဝါသည်ပင် ဘန်းနက်၏ နှလုံးသားကို တင်းကျပ်သွားစေရန် လုံလောက်သည်။ သူသည် သူ့ရှေ့မှ လူထံမှ အန္တရာယ်ရှိသော အရှိန်အဝါကို ခံစားလိုက်ရပြီး ထိတ်လန့်သွားစေသည်။ ခဏတာမျှ သူ စကားပြောရန် မေ့သွားသည်။
ဤအချိန်တွင် ဟန်ရှောင်းသည် လူအုပ်ကြားမှ ထွက်ပေါ်လာပြီး ရယ်မောလိုက်သည်။ "နာဂါကင်၊ ကျွန်တော်တို့ ပြန်တွေ့ကြပြန်ပြီ။"
"မင်း" နာဂါကင် မျက်လုံးများ ပြူးကျယ်သွားသည်။ သူ၏ တင်းမာသော မျက်နှာထားသည် မိုးရွာပြီးနောက် မုန်တိုင်းတိမ်များကဲ့သို့ ချက်ချင်း ပျောက်ကွယ်သွားပြီး ပျော်ရွှင်သော အမူအရာကို ချန်ထားခဲ့သည်။ သူက ကျယ်လောင်စွာ ရယ်မောလိုက်ပြီး ဟန်ရှောင်းကို ပြင်းပြင်းထန်ထန် ဝက်ဝံပွေ့ဖက်ခြင်း ပေးရန် ခြေလှမ်းကျဲကြီးများဖြင့် လှမ်းလာသည်။
သူတို့ ဘေးချင်းယှဉ် အလုပ်လုပ်ခဲ့သည့် နောက်ဆုံးတိုက်ပွဲတွင် ဟန်ရှောင်းသည် နာဂါကင်အပေါ် သူ၏ အစွမ်းသတ္တိနှင့် ပတ်သက်၍ နက်ရှိုင်းသော အထင်ကြီးမှုကို ချန်ထားခဲ့သည်။ သူ ဟန်ရှောင်းကို မမေ့နိုင်ဘဲ တစ်ချက်ကြည့်ရုံဖြင့် ချက်ချင်း မှတ်မိသွားသည်။
"ဘလက်စတား၊ ဟားဟားဟား၊ မင်းလည်း ဒီမှာ ရှိနေမယ်လို့ မထင်ထားဘူး။"
နာဂါကင်သည် ရေပင်လယ်ဂြိုလ်ပေါ်ရှိ လူများအပေါ် ထားရှိသော မထီမဲ့မြင်ပြုမှုနှင့် နှိုင်းယှဉ်ပါက၊ သူသည် ဟန်ရှောင်းအပေါ် ပျော်ရွှင်စွာ ဆက်ဆံခဲ့ပြီး နှိုင်းယှဉ်ကြည့်လျှင် ကောင်းကင်နှင့်မြေကြီး ကွာခြားချက်ပင်။
သူ၏ အာမေဋိတ်သံကို ကြားသောအခါ နာဂါကင်နောက်မှ လူများသည် တီးတိုးစကားသံများ ထွက်ပေါ်လာသည်။
"တကယ် ဘလက်စတားပဲ။"
"တပ်မှူး နာဂါကင်နဲ့အတူ ကပ်ဘေးအဆင့် စူပါတစ်ယောက်ကို သတ်ခဲ့တဲ့သူ။"
ဂိုဒိုရန်များသည် ၎င်းတို့၏ မောက်မာမှု မရှိကြတော့ဘဲ အံ့အားသင့်သော အမူအရာများဖြင့် ပြောဆိုနေကြသည်။
ထိုနှစ်ယောက်ကို မြင်သောအခါ ဘန်းနက်သည် အံ့အားကြီးစွာသင့်ရင်း မယုံနိုင်စွာဖြင့် "ခင်ဗျား... ခင်ဗျားတို့ နှစ်ယောက် သိနေကြတာလား။"
ဟန်ရှောင်းက နာဂါကင်ကို လွှတ်လိုက်ပြီး ပြုံးလျက် "ကျွန်တော် ဦးလေးကို အရင်က မပြောခဲ့ဘူးလား။ ကျွန်တော့်မှာ ကြယ်ခရီးသွားဒေသမှာ သူငယ်ချင်းတွေ အများကြီး ရှိတယ်လို့။"
ဘန်းနက်သည် ထုံကျင်စွာ ခေါင်းညိတ်လိုက်ရုံသာ တတ်နိုင်၏။ ဟန်ရှောင်း ပြောခဲ့သည်ကို သူမှတ်မိသော်လည်း အတိအကျ အခြေအနေများကို သူ မသိခဲ့ပေ။ ဂိုဒိုရန် တပ်မှူးက ဟန်ရှောင်းကို 'ညီအစ်ကို' ဟု ခေါ်ဝေါ်နေသည်ကို ရုတ်တရက် မြင်လိုက်ရမှသာ သူသည် ဟန်ရှောင်း၏ ကြယ်ခရီးသွားဒေသအတွင်းရှိ အဆင့်အတန်းကို ပိုမို ရှင်းလင်းစွာ မြင်ယောင်လာသည်။
"မင်းက ငါထင်ထားတာထက် ပိုကောင်းအောင် အလိုက်သင့်နေထိုင်နိုင်ခဲ့ပုံပဲ။" ဘန်းနက်က သက်ပြင်းချရင်း ရှုပ်ထွေးသော လေသံဖြင့် ပြန်ဖြေသည်။
အတိတ်တွင် ဟန်ရှောင်းသည် ဘန်းနက်ကို သူနှင့်အတူ လိုက်ခဲ့ရန် တစ်ကြိမ် ဖိတ်ခေါ်ခဲ့သော်လည်း သူက ရေပင်လယ်ဂြိုလ်တွင် ကျန်ရစ်ရန် ရွေးချယ်ခဲ့သည်။ ယခုအချိန်တွင် နှစ်ယောက်ကြားက ကွာဟချက်သည် ဤမျှလောက် ဝေးကွာသွားခဲ့ပြီ။ သူကိုယ်တိုင် တပ်မှူး၏ အရှိန်အဝါကြောင့် သေလုမတတ် ကြောက်ရွံ့နေခဲ့သော်လည်း အခြားတစ်ဖက်ကမူ ဟန်ရှောင်းအပေါ် အလွန် ရင်းနှီးခင်မင်ပုံရသည်။
ဘန်းနက်သည် ခဏတာမျှ စိတ်သောကရောက်သွားပြီး သူ၏ မူလသဘောထားကို လျင်မြန်စွာ ပြန်လည်ရရှိကာ ဟန်ရှောင်းအတွက် တိတ်တဆိတ် ပျော်ရွှင်နေသည်။
အဝေးမှ ကစားသမားများအားလုံး တီးတိုးပြောနေကြသည်။
"ဂိုဒိုရန်တွေကလည်း ငါတို့ဂြိုလ်ကို ရောက်လာလိမ့်မယ်လို့ မထင်ထားဘူး။"
"ဟိုဘက်က တပ်မှူးက ငါတို့ခေါင်းဆောင်နဲ့ သိတဲ့ပုံပဲ။"
"ငါမှတ်မိသလောက်တော့ ဘန်ဟစ်ဒေါ့ရဲ့ ဗီဒီယိုတွေထဲမှာ ခေါင်းဆောင်က ဂိုဒိုရန်တွေနဲ့ ဆက်ဆံရေးကောင်းတယ်။ ဒါတွေက ခေါင်းဆောင်ကိုယ်တိုင် ခေါ်ထားတဲ့ စစ်ကူတွေ ဖြစ်ရမယ်။"
"မိုက်လှချည်လား၊ ခေါင်းဆောင်က တကယ် အဆင့်အတန်း ရှိတာပဲ။"
"မင်းက တကယ် ဘာမှမသိတာပဲ။ 'ဘလက်စတား ကွန်ရက်' ဆိုတဲ့ အသုံးအနှုန်းကို ဒီတိုင်းလျှောက်ပြီး တီထွင်ခဲ့တယ် ထင်နေလား။"
ဟန်ရှောင်းသည် ကစားသမားများကို စတင်ခေါ်ယူကတည်းက သူ့ကို ခေါ်ဝေါ်ပုံ ပြောင်းလဲလာခဲ့သည်။ ၎င်းတို့သည် သူ့ကို ဘလက်စတားဟု မခေါ်တော့ဘဲ 'ခေါင်းဆောင်' ဟူသော အသုံးအနှုန်းသို့ ပြောင်းလဲခဲ့သည်။ ကြေးစားတပ်ဖွဲ့သို့ မဝင်ရသေးသော ကစားသမားများပင်လျှင် သူ့ကို ထိုသို့ စတင်ခေါ်ဝေါ်လာကြသည်၊ အဘယ်ကြောင့်ဆိုသော် ၎င်းက ကစားသမားများကို သူနှင့် ပိုမိုရင်းနှီးသည်ဟု ခံစားစေသောကြောင့် ဖြစ်သည်။ မကြာမီတွင် ဤအမည်သည် ဖိုရမ်များတွင် ရေပန်းစားလာပြီး ၎င်းသည် သူ၏ အမည်ပြောင်သစ်အဖြစ် စွဲထင်သွားသည်။
ဘန်ဟစ်ဒေါ့၏ ဗီဒီယိုများသည် ဘလက်စတား ကြေးစားတပ်ဖွဲ့၏ ဇာတ်လမ်းများစွာကို မှတ်တမ်းတင်ထားသောကြောင့် ကစားသမားများသည် ဟန်ရှောင်းတွင် မျောလွင့်နဂါး၏ ကျောထောက်နောက်ခံ ရှိရုံသာမက ဂလက်ဆီရှိ ကျော်ကြားသော ကြေးစားအဖွဲ့များစွာနှင့် မဟာမိတ်ဖွဲ့ထားသည်ကို သိရှိကြသည်။ ထို့အပြင် သူတို့သည် တရားဥပဒေစိုးမိုးသော လူမှုအဖွဲ့အစည်းများစွာနှင့်ပင် ဆက်ဆံရေးကောင်းများ ရှိကြသည်။ ထို့ကြောင့် တစ်ယောက်က 'ဘလက်စတား ကွန်ရက်' ဟူသော အသုံးအနှုန်းကို နောက်ပြောင်ပြီး တီထွင်ခဲ့သည်။ အများစုက ၎င်းသည် အမှန်တကယ် အဓိပ္ပာယ်ရှိသည်ဟု ခံစားခဲ့ရသည်။ ဗီဒီယိုများကို ကြည့်ရှုပြီးနောက် ၎င်းတို့သည် ထိုအမည်နှင့် ထပ်တူကျသွားပြီး ၎င်းသည် လျင်မြန်စွာ ခေတ်စားလာသည်။
သို့သော်လည်း ကစားသမားများ၏ သတင်းအချက်အလက်မှာ အကန့်အသတ်ရှိနေဆဲဖြစ်ပြီး ဗီဇပြောင်းလဲခြင်း ဘေးအန္တရာယ်သည် ဂိုဒိုရာနှင့် အမှောင်ကြယ်ကြား ကစားခဲ့သည့် လျှို့ဝှက်ကြံစည်မှုဖြစ်ကြောင်း ၎င်းတို့ မသိကြသေးပေ၊ ပြီးတော့ နိုင်ငံ၆နိုင်ငံက ဂိုဒိုရာထံမှ အကူအညီတောင်းခံခဲ့သည်ကိုလည်း ၎င်းတို့ မသိရှိကြပေ... တိုတိုပြောရရင် သူတို့ ဘာမှ မသိကြပေ၊ ထို့ကြောင့် ဤအခြေအနေတွင် ဂိုဒိုရန် ယာဉ်တန်းကို ဟန်ရှောင်းက ဆင့်ခေါ်ခဲ့သည်ဟု သူတို့ ထင်နေကြဆဲဖြစ်သည်။
တကယ်ပဲ၊ ဒါက ဘလက်စတား ကွန်ရက်ပဲ!
နာဂါကင်သည် ခဏတာ ပျော်ရွှင်နေပြီး သူ၏ တာဝန်ကို ရုတ်တရက် ပြန်သတိရသွားသည်၊ သူက မေးခွန်းတစ်ခု မေးလိုက်သည်။ "ဟုတ်သားပဲ၊ မင်း ဘာလို့ ဒီမှာ ရောက်နေတာလဲ။"
ဟန်ရှောင်း၏ မျက်နှာအမူအရာ မပြောင်းလဲဘဲ "ဒီဂြိုလ်က ကျွန်တော့်ရဲ့ ဇာတိမြို့လေ၊ ကျွန်တော့်ရဲ့ ရည်မှန်းချက်က ခင်ဗျားတို့နဲ့ အတူတူပါပဲ။ ကျွန်တော်လည်း ဒီဘေးအန္တရာယ်ကို တားဆီးဖို့ ဒီကို ရောက်နေတာပါ၊ အခုက ကျွန်တော် ဂိုဒိုရန်တွေရဲ့ အကူအညီကို လိုအပ်နေတဲ့ အချိန်ပဲ။ အချိန်မဆွဲတော့ဘူး။ အထဲဝင်ပြီး စကားပြောကြတာပေါ့။"
စာစဉ် (၃၅)၊ အခန်း (၅၂၆) ပြီး၏။
လင်းဆက်
+++++